1耶和華án-ni講，天是我ê座位，地是我ê腳踏椅；lín beh kā我起甚麼號ê厝？甚麼號ê所在，是做我安歇ê地方ah？Iâ-hô-hoa án-ni kóng, Thiⁿ sī Góa ê chō-ūi, tōe sī Góa ê kha-ta̍h-í; lín beh kā Góa khí sím-mi̍h hō ê chhù? sím-mi̍h hō ê só͘-chāi, sī chòe Góa an-hioh ê tōe-hng ah?

2耶和華講，Chiah-ê lóng是我ê手所創造ê，所以chiah-ê就lóng有；總是我所看顧ê，就是謙虛心痛悔，因為我ê話來ngia̍uh-ngia̍uh-chhoah ê人。Iâ-hô-hoa kóng, Chiah-ê lóng sī Góa ê chhiú só͘ chhòng-chō ê, só͘-í chiah-ê chiū lóng ū; chóng-sī Góa só͘ khòaⁿ-kò͘--ê, chiū-sī khiam-hu sim thòng-hóe, in-ūi Góa ê ōe lâi ngia̍uh-ngia̍uh-chhoah ê lâng.

3Thâi牛無各樣thâi人；獻羊無各樣kòng折狗頷頸；獻禮物無各樣獻豬血；燒乳香無各樣o-ló偶像；in揀家己ê道路，心歡喜in可惡ê事。Thâi-gû bô koh-iūⁿ thâi-lâng; hiàn iûⁿ bô koh-iūⁿ kòng-chi̍h káu ām-kún; hiàn lé-mi̍h bô koh-iūⁿ hiàn ti-huih; sio jú-hiuⁿ bô koh-iūⁿ o-ló ngó͘-siōng; in kéng ka-kī ê tō-lō͘, sim hoaⁿ-hí in khó-ò͘ⁿ ê sū.

4我亦揀迷惑in ê事，hō͘ in所驚惶ê臨到in；因為我叫，無人ìn；我講話，in無聽thàn；反tńg行我目睭中看做pháiⁿ-ê，揀我所無歡喜ê。Góa ia̍h kéng bê-he̍k in ê sū, hō͘ in só͘ kiaⁿ-hiâⁿ--ê lîm-kàu in; in-ūi Góa kiò, bô lâng ìn; Góa kóng-ōe, in bô thiaⁿ-thàn; hoán-tńg kiâⁿ Góa ba̍k-chiu-tiong khòaⁿ-chòe pháiⁿ--ê, kéng Góa só͘ bô hoaⁿ-hí--ê.

5Lín因為耶和華ê話來ngia̍uh-ngia̍uh-chhoah ê人，tio̍h聽伊ê話；Lín ê兄弟怨恨lín，因為我ê名革逐lín-ê，bat講，願耶和華得tio̍h榮光，hō͘阮得tio̍h看見lín ê歡喜；總是in beh tú-tio̍h見笑。Lín in-ūi Iâ-hô-hoa ê ōe lâi ngia̍uh-ngia̍uh-chhoah ê lâng, tio̍h thiaⁿ I ê ōe; Lín ê hiaⁿ-tī oàn-hūn lín, in-ūi Góa ê miâ kek-tio̍k lín--ê, bat kóng, Goān Iâ-hô-hoa tit-tio̍h êng-kng, hō͘ goán tit-tio̍h khòaⁿ-kìⁿ lín ê hoaⁿ-hí; chóng-sī in beh tú-tio̍h kiàn-siàu.

6有喧嘩ê聲tùi城內出，有聲tùi殿內出，就是耶和華報應祂ê對敵ê聲。Ū soan-hoa ê siaⁿ tùi siâⁿ-lāi chhut, ū siaⁿ tùi tiān-lāi chhut, chiū-sī Iâ-hô-hoa pò-èng I ê tùi-te̍k ê siaⁿ.

7錫安iáu未tú-tio̍h生kiáⁿ ê艱苦，就生產；iáu未知痛疼，就生ta-po͘-kiáⁿ。Sek-an iáu-bē tú-tio̍h siⁿ-kiáⁿ ê kan-khó͘, chiū seng-sán; iáu-bē chai thàng-thiàⁿ, chiū siⁿ ta-po͘-kiáⁿ.

8親像chit號事，是誰 bat聽見？chiah-ê事是誰 bat看見ah？kok kiám能一日來生？百姓kiám能 tiap-á久來出世？因為錫安一下tú-tio̍h生kiáⁿ ê艱苦，就生kiáⁿ兒。Chhin-chhiūⁿ chit-hō sū, chī-chūi bat thiaⁿ-kìⁿ? chiah ê sū chī-chūi bat khòaⁿ-kìⁿ ah? kok kiám-ōe chi̍t-ji̍t lâi siⁿ? peh-sìⁿ kiám-ōe tiap-á-kú lâi chhut-sì? in-ūi Sek-an chi̍t-ē tú-tio̍h siⁿ-kiáⁿ ê kan-khó͘, chiū siⁿ kiáⁿ-jî.

9耶和華講，我已經hō͘伊臨盆，kiám無hō͘伊生出mah？你ê上帝講，我hō͘人生kiáⁿ-ê，kiám關密伊ê胎mah？Iâ-hô-hoa kóng, Góa í-keng hō͘ i lîm-phûn, kiám-bô hō͘ i siⁿ-chhut mah? Lí ê Siōng-tè kóng, Góa hō͘ lâng siⁿ-kiáⁿ--ê, kiám koaiⁿ-ba̍t i ê thai mah?

10Lín chiah-ê疼耶路撒冷ê，tio̍h kap伊同快樂，為伊歡喜；lín為tio̍h伊悲哀ê，taⁿ tio̍h kap伊歡喜快樂。Lín chiah-ê thiàⁿ Iâ-lō͘-sat-léng--ê, tio̍h kap i tâng khoài-lo̍k, ūi i hoaⁿ-hí; lín ūi-tio̍h i pi-ai--ê, taⁿ tio̍h kap i hoaⁿ-hí khoài-lo̍k.

11致到lín thang suh伊ê安慰ê奶頭來得tio̍h飽；hō͘ lín得tio̍h伊豐盛ê榮光，親像chhē-tio̍h lín滿心歡喜。Tì-kàu lín thang suh i ê an-ùi ê lin-thâu lâi tit-tio̍h pá; hō͘ lín tit-tio̍h i hong-sēng ê êng-kng, chhin-chhiūⁿ chhē-tio̍h lín móa-sim hoaⁿ-hí.

12耶和華án-ni講，看ah，我beh hō͘平安開闊到tī伊，親像江河；hō͘列國ê榮光到tī伊，親像漲滿ê河；lín beh享受伊，lín beh得tio̍h抱tī身邊，搖tī腳頭u頂。Iâ-hô-hoa án-ni kóng, Khòaⁿ ah, Góa beh hō͘ pêng-an khui-khoah kàu tī i, chhin-chhiūⁿ kang-hô; hō͘ lia̍t-kok ê êng-kng kàu tī i, chhin-chhiūⁿ tiòng-móa ê hô; lín beh hióng-siū i, lín beh tit-tio̍h phō tī sin-piⁿ, iô tī kha-thâu-u-téng.

13親像人得tio̍h伊ê老母安慰伊，我亦beh án-ni安慰lín；lín亦beh tī耶路撒冷得tio̍h安慰。Chhin-chhiūⁿ lâng tit-tio̍h i ê lāu-bú an-ùi--i, Góa ia̍h beh án-ni an-ùi lín; lín ia̍h beh tī Iâ-lō͘-sat-léng tit-tio̍h an-ùi.

14Lín看見，心就快樂；lín ê骨beh得tio̍h潤澤，親像軟軟ê草一樣；koh耶和華ê手beh顯現tī祂ê奴僕；祂亦beh受氣祂ê對敵。Lín khòaⁿ-kìⁿ, sim chiū khoài-lo̍k; lín ê kut beh tit-tio̍h lūn-te̍k, chhin-chhiūⁿ nńg-nńg ê chháu chi̍t-iūⁿ; koh Iâ-hô-hoa ê chhiú beh hián-hiān tī I ê lô͘-po̍k; I ia̍h beh siū-khì I ê tùi-te̍k.

15看ah，耶和華beh tī火中降臨，伊ê車親像捲螺風，用大受氣行報應，用火焰行責罰。Khòaⁿ ah, Iâ-hô-hoa beh tī hé-tiong kàng-lîm, I ê chhia chhin-chhiūⁿ kńg-lê-hong, ēng tōa siū-khì kiâⁿ pò-èng, ēng hé-iām kiâⁿ chek-hoa̍t.

16因為耶和華beh用火用刀kap一切有血氣ê人爭戰，hō͘耶和華所thâi死ê chōe-chōe。In-ūi Iâ-hô-hoa beh ēng hé ēng to kap it-chhè ū hiat-khì ê lâng cheng-chiàn, hō͘ Iâ-hô-hoa só͘ thâi-sí-ê chōe-chōe.

17Hiah-ê分別做聖，清氣家己ê，進入tī園內，跟tè hit中間一個人ê後面，食豬肉kap可惡ê物kap老鼠；in beh做一下滅無；這是耶和華講ê。Hiah-ê hun-piat chòe-sèng, chheng-khì ka-kī--ê, chìn-ji̍p tī hn̂g-lāi, kun-tè hit tiong-kan chi̍t ê lâng ê āu-bīn, chia̍h ti-bah kap khó-ò͘ⁿ ê mi̍h kap niáu-chhú; in beh chòe chi̍t-ē bia̍t-bô; che sī Iâ-hô-hoa kóng--ê.

18因為我知in ê行做kap in ê念頭；時到我beh聚集萬百姓萬族；in beh來，beh看我ê榮光。In-ūi góa chai in ê kiâⁿ-chòe kap in ê liām-thâu; sî kàu Góa beh chū-chi̍p bān peh-sìⁿ bān-cho̍k; in beh lâi, beh khòaⁿ Góa ê êng-kng.

19我beh設記號tī in中間；逃走ê，我beh 差in到列國，就是到Tha-si、Phó͘-le̍k，開弓ê路得，kap Thó͘-pa、Ngá-oân，kap平素未有聽見我ê名聲，未有看見我ê榮光，遠遠ê海嶼；in beh將我ê榮光傳報tī列國中。Góa beh siat kì-hō tī in tiong-kan; tô-cháu--ê, Góa beh chhe in kàu lia̍t-kok, chiū-sī kàu Tha-si, Phó͘-le̍k, khui-keng ê Lō͘-tek, kap Thó͘-pa, Ngá-oân, kap pêng-sò͘ bē ū thiaⁿ-kìⁿ Góa ê miâ-siaⁿ, bē ū khòaⁿ-kìⁿ Góa ê êng-kng, hn̄g-hn̄g ê hái-sū; in beh chiong Góa ê êng-kng thoân-pò tī lia̍t-kok-tiong.

20In beh送lín ê眾兄弟tùi列國中tò來，hō͘ in有ê騎馬，有ê坐車，坐轎，騎騾，騎駱駝，到我ê聖山耶路撒冷，做禮物獻hō͘耶和華，親像以色列人用清氣ê器具貯禮物，獻tī耶和華ê厝；這是耶和華講ê。In beh sàng lín ê chèng hiaⁿ-tī tùi lia̍t-kok-tiong tò--lâi, hō͘ in ū-ê khiâ-bé, ū-ê chē-chhia, chē-kiō, khiâ-lô, khiâ lo̍k-tô, kàu Góa ê sèng-soaⁿ Iâ-lō͘-sat-léng, chòe lé-mi̍h hiàn-hō͘ Iâ-hô-hoa, chhin-chhiūⁿ Í-sek-lia̍t lâng ēng chheng-khì ê khì-kū tóe lé-mi̍h, hiàn tī Iâ-hô-hoa ê chhù; che sī Iâ-hô-hoa kóng--ê.

21耶和華講，我beh tùi in中間，取人做祭司，做利未人。Iâ-hô-hoa kóng, Góa beh tùi in tiong-kan, chhú lâng chòe chè-si, chòe Lī-bī lâng.

22耶和華講，因為我所造ê新天新地，tī我ê面前長長tī-teh；親像án-ni，lín ê後裔kap lín ê名字，亦beh長長tī-teh。Iâ-hô-hoa kóng, In-ūi Góa só͘ chō ê sin-thiⁿ sin-tōe, tī Góa ê bīn-chêng tn̂g-tn̂g tī-teh; chhin-chhiūⁿ án-ni, lín ê hō͘-è kap lín ê miâ-jī, ia̍h beh tn̂g-tn̂g tī-teh.

23Ta̍k-pái tú-tio̍h月ê初一，ta̍k-pái tú-tio̍h安歇日，見若有血氣ê，beh到我ê面前跪拜；這是耶和華講ê。Ta̍k-pái tú-tio̍h ge̍h ê chhoe-it, ta̍k-pái tú-tio̍h an-hioh-ji̍t, kìⁿ-nā ū hiat-khì--ê, beh kàu Góa ê bīn-chêng kūi-pài; che sī Iâ-hô-hoa kóng--ê.

24In beh出去看hiah-ê悖逆我ê人ê身屍；因為in ê蟲bōe死，in ê火bōe hoa；見有血氣ê lóng beh厭惡in。In beh chhut-khì khòaⁿ hiah ê pōe-ge̍k Góa ê lâng ê sin-si; in-ūi in ê thâng bōe sí, in ê hé bōe hoa; kìⁿ-ū hiat-khì--ê lóng beh iàm-ò͘ⁿ in.

1便雅憫地，A-ná-tu̍t城ê祭司中，Hi-le̍k-ka ê kiáⁿ，耶利米ê話記tī下底。Piān-ngá-bín tōe, A-ná-tu̍t siâⁿ ê chè-si tiong, Hi-le̍k-ka ê kiáⁿ, Iâ-lī-bí ê ōe kì tī ē-tóe.

2當猶大王A-bûn ê kiáⁿ約西亞坐位ê十三年，耶和華ê話臨到伊。Tng Iû-tāi ông A-bûn ê kiáⁿ Iok-se-a chē-ūi ê cha̍p-saⁿ--nî, Iâ-hô-hoa ê ōe lîm-kàu i.

3Koh tī猶大王約西亞ê kiáⁿ Iok-ngá-kèng坐位ê時，直到猶大王約西亞ê kiáⁿ Se-tí-ka十一年ê路尾；五月間，耶路撒冷人受掠ê時，耶和華ê話臨到伊。Koh tī Iû-tāi ông Iok-se-a ê kiáⁿ Iok-ngá-kèng chē-ūi ê sî, ti̍t-kàu Iû-tāi ông Iok-se-a ê kiáⁿ Se-tí-ka cha̍p-it--nî ê lō͘-bé; gō͘-ge̍h kan, Iâ-lō͘-sat-léng lâng siū-lia̍h ê sî, Iâ-hô-hoa ê ōe lîm-kàu i.

4耶和華ê話臨到我，講，Iâ-hô-hoa ê ōe lîm-kàu góa, kóng,

5我未創造你tī腹肚內ê事先，我bat你；你未出胎ê事先，我分別你做聖；設立你做列國ê先知。Góa bē chhòng-chō lí tī pak-tó͘-lāi ê tāi-seng, Góa bat lí; lí bē chhut-thai ê tāi-seng, Góa hun-piat lí chòe-sèng; siat-li̍p lí chòe lia̍t-kok ê sian-ti.

6我就講，害ah！主耶和華ah，你看，我bōe曉講，因為我是gín-ná。Góa chiū kóng, Hāi--ah! Chú Iâ-hô-hoa ah, lí khòaⁿ, góa bōe hiáu kóng, in-ūi góa sī gín-ná.

7總是耶和華對我講，你m̄-thang講，我是gín-ná；因為我見有差你，你tio̍h去；我見有吩咐你，你tio̍h講。Chóng-sī Iâ-hô-hoa tùi góa kóng, Lí m̄-thang kóng, Góa sī gín-ná; in-ūi Góa kìⁿ-ū chhe lí, lí tio̍h khì; Góa kìⁿ-ū hoan-hù lí, lí tio̍h kóng.

8你莫得驚in，因為我kap你tī-teh，beh救你；這是耶和華講ê。Lí bo̍h-tit kiaⁿ--in, in-ūi Góa kap lí tī-teh, beh kiù lí; che sī Iâ-hô-hoa kóng ê.

9耶和華就伸祂ê手摸我ê嘴。耶和華kā我講，你看，我有將我ê話，hē tī你ê嘴。Iâ-hô-hoa chiū chhun I ê chhiú bong góa ê chhùi. Iâ-hô-hoa kā góa kóng, Lí khòaⁿ, Góa ū chiong Góa ê ōe, hē tī lí ê chhùi.

10看ah，今á日我設立你tī列邦列國ê頂面；是為tio̍h beh拔出，beh拆毀，beh敗壞，beh chhia倒，beh建立，beh栽培。Khòaⁿ ah, kin-á-ji̍t Góa siat-li̍p lí tī lia̍t-pang lia̍t-kok ê téng-bīn; sī ūi-tio̍h beh pu̍ih-chhut, beh thiah-húi, beh pāi-hoāi, beh chhia-tó, beh kiàn-li̍p, beh chai-pôe.

11耶和華ê話koh臨到我講，耶利米ah，你看見甚麼？我講，我看見杏樹ê一支。Iâ-hô-hoa ê ōe koh lîm-kàu góa kóng, Iâ-lī-bí ah, lí khòaⁿ-kìⁿ sím-mi̍h? Góa kóng, Góa khòaⁿ-kìⁿ hēng-chhiū ê chi̍t-ki.

12耶和華就對我講，你所看是tio̍h；我teh關顧我ê話來成伊。Iâ-hô-hoa chiū tùi góa kóng, Lí só͘ khòaⁿ sī tio̍h; Góa teh koan-kò͘ Góa ê ōe lâi chiâⁿ--i.

13耶和華ê話第二pái臨到我講，你看見甚麼？我講，我看見一個鼎teh滾，伊ê面tùi北勢ǹg過來。Iâ-hô-hoa ê ōe tē-jī pái lîm-kàu góa kóng, Lí khòaⁿ-kìⁿ sím-mi̍h? Góa kóng, Góa khòaⁿ-kìⁿ chi̍t ê tiáⁿ teh kún, i ê bīn tùi pak--sì ǹg kè--lâi.

14耶和華就對我講，Beh有災厄tùi北方發出，臨到chit所在一切khiā起ê百姓。Iâ-hô-hoa chiū tùi góa kóng, Beh ū chai-ē tùi pak-hng hoat-chhut, lîm-kàu chit só͘-chāi it-chhè khiā-khí ê peh-sìⁿ.

15耶和華講，看ah，我beh召北方列國ê眾族；in beh來，ta̍k-ê安座位tī耶路撒冷chiah-ê城門口；周圍攻擊城牆，亦beh攻擊猶大一切ê城。Iâ-hô-hoa kóng, Khòaⁿ ah, Góa beh tiàu pak-hng lia̍t-kok ê chèng-cho̍k; in beh lâi, ta̍k-ê an chō-ūi tī Iâ-lō͘-sat-léng chiah ê siâⁿ-mn̂g-kháu; chiu-ûi kong-kek siâⁿ-chhiûⁿ, ia̍h beh kong-kek Iû-tāi it-chhè ê siâⁿ.

16論到chit-ê百姓一切ê pháiⁿ，就是離開我，ǹg別ê上帝燒香；跪拜in ê手所做ê；我beh講起我ê判斷來攻擊in。Lūn-kàu chit ê peh-sìⁿ it-chhè ê pháiⁿ, chiū-sī lī-khui Góa, ǹg pa̍t ê siōng-tè sio-hiuⁿ; kūi-pài in ê chhiú só͘ chòe--ê; Góa beh kóng-khí Góa ê phòaⁿ-toàn lâi kong-kek in.

17所以你tio̍h hâ腰，起來，將我所吩咐你一切ê話kā in講；莫得因為in來驚惶，驚了我hō͘你tī in ê面前來驚惶。Só͘-í lí tio̍h hâ-io, khí--lâi, chiong Góa só͘ hoan-hù lí it-chhè ê ōe kā in kóng; bo̍h-tit in-ūi in lâi kiaⁿ-hiâⁿ, kiaⁿ-liáu Góa hō͘ lí tī in ê bīn-chêng lâi kiaⁿ-hiâⁿ.

18看ah，因為我今á日hō͘你成做堅固ê城，做鐵柱，做銅牆，來抵擋全地，以及猶大ê列王、貴族、祭司，kap chit所在ê眾百姓。Khòaⁿ ah, in-ūi Góa kin-á-ji̍t hō͘ lí chiâⁿ-chòe kian-kò͘ ê siâⁿ, chòe thih-thiāu, chòe tâng-chhiûⁿ, lâi tí-tng choân-tōe, í-ki̍p Iû-tāi ê lia̍t-ông, kùi-cho̍k, chè-si, kap chit só͘-chāi ê chèng peh-sìⁿ.

19In beh攻擊你，總是bōe能贏你；因為我kap你tī-teh，beh拯救你；這是耶和華講ê。In beh kong-kek lí, chóng-sī bōe-ōe iâⁿ lí; in-ūi Góa kap lí tī-teh, beh chín-kiù lí; che sī Iâ-hô-hoa kóng--ê.

1耶和華ê話koh臨到我，講，Iâ-hô-hoa ê ōe koh lîm-kàu góa, kóng,

2你去ǹg耶路撒冷人ê耳孔叫講，耶和華án-ni講，你少年ê恩愛，婚姻ê愛情，你怎á樣tī曠野，tī bē-bat種作ê地，跟tè我；我lóng kā你記得。Lí khì ǹg Iâ-lō͘-sat-léng lâng ê hī-khang kiò kóng, Iâ-hô-hoa án-ni kóng, Lí siàu-liân ê un-ài, hun-in ê ài-chêng, lí cháiⁿ-á-iūⁿ tī khòng-iá, tī bē-bat chèng-choh ê tōe, kun-tè Góa; Góa lóng kā lí kì-tit.

3Hit時以色列做聖歸耶和華；做伊起頭熟ê土產；見若吞食伊ê，beh算做有罪；災厄beh臨到in；這是耶和華講ê。Hit-sî Í-sek-lia̍t chòe-sèng kui Iâ-hô-hoa; chòe I khí-thâu se̍k ê thó͘-sán; kìⁿ-nā thun-chia̍h i--ê, beh sǹg chòe ū chōe; chai-ē beh lîm-kàu in; che sī Iâ-hô-hoa kóng--ê.

4雅各ê家ah，以色列家ê ta̍k房頭ah，lín tio̍h聽耶和華ê話。Ngá-kok ê ke ah, Í-sek-lia̍t ke ê ta̍k pâng-thâu ah, lín tio̍h thiaⁿ Iâ-hô-hoa ê ōe.

5耶和華án-ni講，Lín ê列祖看我有甚麼不義，竟然離開我遠遠，去thàn hiah-ê虛假ê，來做虛假ê ah？Iâ-hô-hoa án-ni kóng, Lín ê lia̍t-chó͘ khòaⁿ Góa ū sím-mi̍h put-gī, kéng-jiân lī-khui Góa hn̄g-hn̄g, khì thàn hiah ê hu-ké--ê, lâi chòe hu-ké--ê ah?

6In亦無講，hit-ê chhōa咱出埃及地ê耶和華tī toh-lo̍h？伊是chhōa咱經過曠野、沙漠，kap深坑ê所在，炕旱死蔭ê地；無人經過，無人khiā起ê境界。In ia̍h bô kóng, Hit ê chhōa lán chhut Ai-ki̍p tōe ê Iâ-hô-hoa tī toh-lo̍h? I sī chhōa lán keng-kè khòng-iá, soa-bô͘, kap chhim-khiⁿ ê só͘-chāi, khòng-hān sí-ìm ê tōe; bô lâng keng-kè, bô lâng khiā-khí ê kéng-kài.

7我chhōa lín入肥ê地，hō͘ lín食hit中間ê果子kap好物；總是lín入來了，就phah lâ-sâm我ê地；hō͘我ê產業成做可惡ê。Góa chhōa lín ji̍p pûi ê tōe, hō͘ lín chia̍h hit tiong-kan ê ké-chí kap hó-mi̍h; chóng-sī lín ji̍p-lâi-liáu, chiū phah lâ-sâm Góa ê tōe; hō͘ Góa ê sán-gia̍p chiâⁿ-chòe khó-ò͘ⁿ--ê.

8祭司lóng無講，耶和華tī toh-lo̍h leh？講解律法ê m̄-bat我，官長悖謬我，先知靠Pa-le̍k來讖語，koh thàn無利益ê事。Chè-si lóng bô kóng, Iâ-hô-hoa tī toh-lo̍h leh? káng-kái lu̍t-hoat--ê m̄-bat Góa, koaⁿ-tiúⁿ pōe-biū Góa, sian-ti khò Pa-le̍k lâi chhàm-gú, koh thàn bô lī-ek ê sū.

9耶和華講，我因為án-ni beh kap lín爭辯；亦beh kap lín ê kiáⁿ-kiáⁿ孫孫爭辯。Iâ-hô-hoa kóng, Góa in-ūi án-ni beh kap lín cheng-piān; ia̍h beh kap lín ê kiáⁿ-kiáⁿ sun-sun cheng-piān.

10Lín tio̍h過去Ki-thê chiah-ê海嶼來觀看，差人去Ki-ta̍t留心查考；看bat有chit號事á無。Lín tio̍h kè-khì Ki-thê chiah ê hái-sū lâi koan-khòaⁿ, chhe lâng khì Ki-ta̍t liû-sim cha-khó; khòaⁿ bat ū chit-hō sū á-bô.

11Kiám有一國改換in ê上帝 mah？其實hiah-ê m̄是上帝；總是我ê百姓將in ê榮光來換hit-ê無利益ê。Kiám ū chi̍t-kok kóe-ōaⁿ in ê siōng-tè mah? kî-si̍t hiah-ê m̄-sī Siōng-tè; chóng-sī Góa ê peh-sìⁿ chiong in ê êng-kng lâi ōaⁿ hit-ê bô lī-ek--ê.

12Chiah-ê天ah，tio̍h因為chit-ê來gông-ngia̍h，極其驚惶，盡在冷靜；這是耶和華講ê。Chiah ê thiⁿ ah, tio̍h in-ūi chit-ê lâi gông-ngia̍h, ke̍k-kî kiaⁿ-hiâⁿ, chīn-chāi léng-chēng; che sī Iâ-hô-hoa kóng--ê.

13因為我ê百姓做兩項pháiⁿ-tāi，就是我做活水ê源頭，in離開我；koh為家己開池，是破裂bōe貯水ê池。In-ūi Góa ê peh-sìⁿ chòe nn̄g-hāng pháiⁿ-tāi, chiū-sī Góa chòe oa̍h-chúi ê goân-thâu, in lī-khui Góa; koh ūi ka-kī khui tî, sī phòa-li̍h bōe tóe chúi ê tî.

14以色列是奴僕mah？是家中生ê奴僕mah？為何成做受搶ê物ah？Í-sek-lia̍t sī lô͘-po̍k mah? Sī ke-tiong siⁿ ê lô͘-po̍k mah? Ūi-hô chiâⁿ-chòe siū chhiúⁿ ê mi̍h ah?

15勇ê獅ǹg伊hm̄-hm̄哮，出大聲，hō͘伊ê地拋荒；城亦lóng燒毀，無人khiā起。Ióng ê sai ǹg i hm̄-hm̄-háu, chhut tōa-siaⁿ, hō͘ i ê tōe pha-hng; siâⁿ ia̍h lóng sio-húi, bô lâng khiā-khí.

16Lô-hut人kap Tap-pí-le̍k人亦phah碎你ê頭殼頂。Lô-hut lâng kap Tap-pí-le̍k lâng ia̍h phah-chhùi lí ê thâu-khak-téng.

17Chit-ê事kiám m̄是你家己取ê mah？因為你ê上帝耶和華chhōa你行路ê時，你有棄sak伊。Chit ê sū kiám-m̄-sī lí ka-kī chhú--ê mah? in-ūi lí ê Siōng-tè Iâ-hô-hoa chhōa lí kiâⁿ-lō͘ ê sî, lí ū khì-sak I.

18Taⁿ你啥事tī埃及ê路，是beh lim Se-hat ê水mah？你啥事tī亞述ê路，是beh lim大河ê水mah？Taⁿ lí siáⁿ-sū tī Ai-ki̍p ê lō͘, sī beh lim Se-hat ê chúi mah? lí siáⁿ-sū tī A-su̍t ê lō͘, sī beh lim Tōa-hô ê chúi mah?

19你家己ê pháiⁿ beh警戒你；你悖逆ê事beh責備你；tùi án-ni thang知，thang看出你棄sak你ê上帝耶和華，無存敬畏我ê心，就是pháiⁿ koh艱苦ê事；這是主萬軍ê耶和華講ê。Lí ka-kī ê pháiⁿ beh kéng-kài lí; lí pōe-ge̍k ê sū beh chek-pī lí; tùi án-ni thang chai, thang khòaⁿ-chhut lí khì-sak lí ê Siōng-tè Iâ-hô-hoa, bô chûn kèng-ùi Góa ê sim, chiū-sī pháiⁿ koh kan-khó͘ ê sū; che sī Chú bān-kun ê Iâ-hô-hoa kóng--ê.

20我tī古早ê時，at折你ê擔，tháu開你ê索；你講，我m̄順服；因為你tī ta̍k ê高山頂，ta̍k叢青翠ê樹腳，屈落身軀行淫。Góa tī kó͘-chá ê sî, at-chi̍h lí ê taⁿ, tháu-khui lí ê soh; lí kóng, Góa m̄ sūn-ho̍k; in-ūi lí tī ta̍k ê koâiⁿ-soaⁿ-téng, ta̍k châng chhiⁿ-chhùi ê chhiū-kha, khut-lo̍h sin-khu kiâⁿ-îm.

21但是我bat栽種你，是上等ê葡萄樹，全然是真ê種子；你對tī我怎樣變做別款葡萄樹ê pháiⁿ枝ah？Nā-sī Góa bat chai-chèng lí, sī siōng-téng ê phû-tô-chhiū, choân-jiân sī chin ê chéng-chí; lí tùi-tī Góa cháiⁿ-iūⁿ pìⁿ-chòe pa̍t-khoán phû-tô-chhiū ê pháiⁿ-ki ah?

22你雖bóng用鹼(kiⁿ)，用chōe-chōe雪文來洗，你ê罪惡ê痕跡猶原顯出tī我ê面前；這是主耶和華講ê。Lí sui-bóng ēng kiⁿ, ēng chōe-chōe soat-bûn lâi sóe, lí ê chōe-ok ê hûn-jiah iû-goân hián-chhut tī Góa ê bīn-chêng; che sī Chú Iâ-hô-hoa kóng--ê.

23你thái-thó會講，我無bak-tio̍h lâ-sâm，無tè chiah-ê Pa-le̍k ah？你看，你山谷中ê路，就知你所行ê怎樣；你是單陵gâu走ê駱駝，走來走去。Lí thái-thó ōe kóng, Góa bô bak--tio̍h lâ-sâm, bô tè chiah ê Pa-le̍k ah? lí khòaⁿ, lí soaⁿ-kok-tiong ê lō͘, chiū chai lí só͘ kiâⁿ--ê cháiⁿ-iūⁿ; lí sī toaⁿ-niā gâu cháu ê lo̍k-tô, cháu-lâi cháu-khì.

24你是野驢，慣勢tī曠野；慾心發動，就吸風；瘋(siáu)ê時，是誰 能阻止伊ah？見若chhē伊ê，m̄免tio̍h磨；tī伊hit月，的確能chhē-tio̍h。Lí sī iá-lû, koàiⁿ-sì tī khòng-iá; io̍k-sim hoat-tōng, chiū khip-hong; siáu ê sî, chī-chūi ōe chó͘-chí i ah? kìⁿ-nā chhē i ê, m̄-bián tio̍h-bôa; tī i hit-ge̍h, tek-khak ōe chhē--tio̍h.

25你tio̍h禁止你ê腳，免致無鞋；禁止你ê嚨喉，免致嘴乾；總是你講，這是無chhái-kang，m̄-ah；我已經戀慕別ê；我beh tè in。Lí tio̍h kìm-chí lí ê kha, bián-tì bô ôe; kìm-chí lí ê nâ-âu, bián-tì chhùi-ta; chóng-sī lí kóng, Che sī bô chhái-kang, m̄--ah; góa í-keng loân-bō͘ pa̍t-ê; góa beh tè in.

26賊hō͘人掠tio̍h，怎樣見笑，以色列家 kap in ê君王、貴族、祭司、先知，亦lóng án-ni見笑。Chha̍t hō͘ lâng lia̍h--tio̍h, cháiⁿ-iūⁿ kiàn-siàu, Í-sek-lia̍t ke kap in ê kun-ông, kùi-cho̍k, chè-si, sian-ti, ia̍h lóng án-ni kiàn-siàu.

27In對柴頭講，你是我ê父；對石頭講，你是生我ê。In用ka-chiah ǹg我，無用面ǹg我；到tú-tio̍h患難ê時，chiah講，起來，來救阮。In tùi chhâ-thâu kóng, Lí sī góa ê pē; tùi chio̍h-thâu kóng, Lí sī siⁿ-góa-ê. In ēng ka-chiah ǹg Góa, bô ēng bīn ǹg Góa; kàu tú-tio̍h hoān-lān ê sî, chiah kóng, Khí--lâi, lâi kiù goán.

28你為家己所造ê上帝 tī toh-lo̍h？伊若會救你，tī你tú-tio̍h患難ê時，就tio̍h起來救你；猶大ah，你ê上帝ê數額kap你ê城ê數額平平chōe。Lí ūi ka-kī só͘ chō ê siōng-tè tī toh-lo̍h? i nā ōe kiù lí, tī lí tú-tio̍h hoān-lān ê sî, chiū tio̍h khí-lâi kiù lí; Iû-tāi ah, lí ê siōng-tè ê siàu-gia̍h kap lí ê siâⁿ ê siàu-gia̍h pîⁿ-pîⁿ chōe.

29耶和華講，Lín啥事kap我爭辯？lín lóng悖逆我。Iâ-hô-hoa kóng, Lín siáⁿ-sū kap Góa cheng-piān? lín lóng pōe-ge̍k Góa.

30我督責lín ê kiáⁿ兒，是空空；in無受警戒。Lín ê刀，親像猛獅，吞咬lín ê先知。Góa tok-chek lín ê kiáⁿ-jî, sī khang-khang; in bô siū kéng-kài. Lín ê to, chhin-chhiūⁿ béng sai, thun-kā lín ê sian-ti.

31Chit世代ah，lín tio̍h明耶和華ê話；我對tī以色列kiám bat做親像曠野，á是bat做親像烏暗ê地ah？我ê百姓啥事講，阮脫離約束，m̄ koh歸向你lah？Chit sè-tāi ah, lín tio̍h bêng Iâ-hô-hoa ê ōe; Góa tùi-tī Í-sek-lia̍t kiám bat chòe chhin-chhiūⁿ khòng-iá, á-sī bat chòe chhin-chhiūⁿ o͘-àm ê tōe ah? Góa ê peh-sìⁿ siáⁿ-sū kóng, Goán thoat-lī iok-sok, m̄ koh kui-ǹg Lí lah?

32在室女kiám會bōe記得伊ê裝飾mah？新娘kiám會bōe記得伊ê súi衫？總是我ê百姓bōe記得我bōe算得日。Chāi-sek-lú kiám ōe bōe-kì-tit i ê chng-thāⁿ mah? sin-niû kiám ōe bōe-kì-tit i ê súi-saⁿ? chóng-sī Góa ê peh-sìⁿ bōe-kì-tit Góa bōe sǹg-tit ji̍t.

33你怎樣修整你ê路，要求寵愛；連pháiⁿ婦人人，你亦用你ê路教示in。Lí cháiⁿ-iūⁿ siu-chéng lí ê lō͘, iau-kiû thióng-ài; liân pháiⁿ hū-jîn-lâng, lí ia̍h ēng lí ê lō͘ kà-sī in.

34Koh你ê衫á裾有無罪ê sòng-hiong人ê血；m̄是tī iah厝孔ê所在tú-tio̍h，是tī ta̍k所在lóng有。Koh lí ê saⁿ-á-ku ū bô-chōe ê sòng-hiong lâng ê huih; m̄-sī tī iah chhù-khang ê só͘-chāi tú-tio̍h, sī tī ta̍k só͘-chāi lóng ū.

35你iáu-kú講，我無罪；耶和華ê受氣的確oa̍t-tńg離開我，看ah，我beh審問你，因為你家己講，我無犯罪。Lí iáu-kú kóng, Góa bô chōe; Iâ-hô-hoa ê siū-khì tek-khak oa̍t-tńg lī-khui góa, Khòaⁿ ah, Góa beh sím-mn̄g lí, in-ūi lí ka-kī kóng, Góa bô hoān-chōe.

36你啥事走東走西，beh改換你ê路ah？你beh因為埃及來見笑，親像前因為亞述來見笑一樣。Lí siáⁿ-sū cháu-tang cháu-sai, beh kóe-ōaⁿ lí ê lō͘ ah? lí beh in-ūi Ai-ki̍p lâi kiàn-siàu, chhin-chhiūⁿ chêng in-ūi A-su̍t lâi kiàn-siàu chi̍t-iūⁿ.

37你亦beh雙手抱頭殼，tùi hia出來；因為耶和華已經棄絕你所óa靠ê；你亦bōe tùi in得tio̍h興通。Lí ia̍h beh siang-chhiú phō thâu-khak, tùi hia chhut-lâi; in-ūi Iâ-hô-hoa í-keng khì-choa̍t lí só͘ óa-khò--ê; lí ia̍h bōe tùi in tit-tio̍h heng-thong.