1願我ê頭殼做水泉，我ê目睭做目屎ê源頭；我thang為我ê百姓中受thâi ê人，日暝啼哭。Goān góa ê thâu-khak chòe chúi-chôaⁿ, góa ê ba̍k-chiu chòe ba̍k-sái ê goân-thâu; góa thang ūi góa ê peh-sìⁿ-tiong siū-thâi ê lâng, ji̍t-mî thî-khàu.

2願我tī曠野有出外人歇暝ê所在，我就thang棄sak我ê百姓來離開in；因為in lóng是行姦淫ê，是行詭詐ê黨類。Goān góa tī khòng-iá ū chhut-gōa lâng hioh-mî ê só͘-chāi, góa chiū thang khì-sak góa ê peh-sìⁿ lâi lī-khui in; in-ūi in lóng sī kiâⁿ kan-îm--ê, sī kiâⁿ khúi-chà ê tóng-lūi.

3In捲彎in ê舌親像弓來講白賊；in tī國內加添勢力，m̄是為tio̍h真實；就是pháiⁿ了koh pháiⁿ，也m̄-bat我；這是耶和華講ê。In kńg-oan in ê chi̍h chhin-chhiūⁿ keng lâi kóng pe̍h-chha̍t; in tī kok-lāi ke-thiⁿ sè-le̍k, m̄-sī ūi-tio̍h chin-si̍t; chiū-sī pháiⁿ-liáu koh pháiⁿ, iā m̄-bat Góa; che sī Iâ-hô-hoa kóng--ê.

4Lín ta̍k人tio̍h持防伊ê厝邊，lóng m̄-thang信靠兄弟；因為兄弟一盡相瞞騙；厝邊lóng四界行，譭謗人。Lín ta̍k-lâng tio̍h tî-hông i ê chhù-piⁿ, lóng m̄-thang sìn-khò hiaⁿ-tī; in-ūi hiaⁿ-tī it-chīn saⁿ môa-phiàn; chhù-piⁿ lóng sì-kòe kiâⁿ, húi-pòng lâng.

5In ta̍k人欺騙厝邊；m̄願講真實；in教示in ê舌講白賊；tio̍h磨做pháiⁿ。In ta̍k-lâng khi-phiàn chhù-piⁿ; m̄-goān kóng chin-si̍t; in kà-sī in ê chi̍h kóng pe̍h-chha̍t; tio̍h-bôa chòe-pháiⁿ.

6你khiā起tī詭詐中；in因為詭詐m̄肯認bat我；這是耶和華講ê。Lí khiā-khí tī khúi-chà-tiong; in in-ūi khúi-chà m̄-khéng jīn-bat Góa; che sī Iâ-hô-hoa kóng--ê.

7所以萬軍ê耶和華án-ni講，看ah，我beh將in熔化來鍛鍊in；若無，我因為我ê百姓beh怎樣做ah？Só͘-í bān-kun ê Iâ-hô-hoa án-ni kóng, Khòaⁿ ah, Góa beh chiong in iûⁿ-hòa lâi thoàn-liān in; nā bô, Góa in-ūi Góa ê peh-sìⁿ beh cháiⁿ-iūⁿ chòe ah?

8In ê舌是害死人ê箭；是講詭詐；人人對伊ê厝邊嘴講平安，心內teh siàu想伊。In ê chi̍h sī hāi-sí lâng ê chìⁿ; sī kóng khúi-chà; lâng-lâng tùi i ê chhù-piⁿ chhùi kóng pêng-an, sim-lāi teh siàu-siūⁿ i.

9耶和華講，我kiám無因為chiah-ê事來辦in mah？我ê心kiám無beh對chit號ê國民來報仇mah？Iâ-hô-hoa kóng, Góa kiám bô in-ūi chiah ê sū lâi pān in mah? Góa ê sim kiám bô beh tùi chit hō ê kok-bîn lâi pò-siû mah?

10我beh為tio̍h山嶺啼哭悲哀，為tio̍h曠野ê草場出聲哀哮；因為in已經燒lio去，甚至無人經過；人也無聽見cheng-siⁿ ê聲；空中ê飛鳥kap地上ê野獸lóng走了去。Góa beh ūi-tio̍h soaⁿ-niá thî-khàu pi-ai, ūi-tio̍h khòng-iá ê chháu-tiûⁿ chhut-siaⁿ ai-háu; in-ūi in í-keng sio-lio--khì, sīm-chì bô lâng keng-kè; lâng iā bô thiaⁿ-kìⁿ cheng-siⁿ ê siaⁿ; khong-tiong ê pe-chiáu kap tōe-chiūⁿ ê iá-siù lóng cháu-láu-khì.

11我beh hō͘耶路撒冷變做土堆，做野狗 khiā起ê所在；也beh hō͘猶大chiah-ê城拋荒，無人khiā起。Góa beh hō͘ Iâ-lō͘-sat-léng piàn-chòe thô͘-tui, chòe iá-káu khiā-khí ê só͘-chāi; iā beh hō͘ Iû-tāi chiah ê siâⁿ pha-hng, bô lâng khiā-khí.

12Chī-chūi是智慧ê人thang明白chit-ê ah？耶和華ê嘴對是誰講，hō͘伊thang傳報ah？chit-ê地啥事滅無，燒毀親像曠野，甚至無人經過ah？Chī-chūi sī tì-hūi ê lâng thang bêng-pe̍k chit-ê ah? Iâ-hô-hoa ê chhùi tùi chī-chūi kóng, hō͘ i thang thoân-pò ah? chit ê tōe siáⁿ-sū bia̍t-bô, sio-húi chhin-chhiūⁿ khòng-iá, sīm-chì bô lâng keng-kè ah?

13耶和華講，因為in有棄sak我所設tī in ê面前ê律法，無聽我ê聲，也無行伊；Iâ-hô-hoa kóng, In-ūi in ū khì-sak Góa só͘ siat tī in ê bīn-chêng ê lu̍t-hoat, bô thiaⁿ Góa ê siaⁿ, iā bô kiâⁿ i;

14獨獨照in ê心ê剛硬來行，koh thàn chiah-ê Pa-le̍k，就是in ê列祖所教示ê；to̍k-to̍k chiàu in ê sim ê kong-ngī lâi kiâⁿ, koh thàn chiah ê Pa-le̍k, chiū-sī in ê lia̍t-chó͘ só͘ kà-sī ê;

15所以萬軍ê耶和華，以色列ê上帝，án-ni講，看ah，我beh將茵籐 hō͘ chit-ê百姓食，koh將苦ê水hō͘ in lim。só͘-í bān-kun ê Iâ-hô-hoa, Í-sek-lia̍t ê Siōng-tè, án-ni kóng, Khòaⁿ ah, Góa beh chiong in-tîn hō͘ chit ê peh-sìⁿ chia̍h, koh chiong khó͘ ê chúi hō͘ in lim.

16我也beh四散in tī列邦中，就是in kap in ê列祖m̄-bat ê邦國；也beh hō͘刀劍追jip in，到我一盡剿滅in。Góa iā beh sì-sòaⁿ in tī lia̍t-pang-tiong, chiū-sī in kap in ê lia̍t-chó͘ m̄-bat ê pang-kok; iā beh hō͘ to-kiàm tui-jip in, kàu Góa it-chīn châu-bia̍t in.

17萬軍ê耶和華án-ni講，Tio̍h致意想，叫hiah-ê替人哭ê婦人人來，也差人去chhē hiah-ê gâu ê婦人人，hō͘ in來；Bān-kun ê Iâ-hô-hoa án-ni kóng, Tio̍h tì-ì siūⁿ, kiò hiah ê thòe lâng khàu ê hū-jîn-lâng lâi, iā chhe lâng khì chhē hiah ê gâu ê hū-jîn-lâng, hō͘ in lâi;

18in tio̍h緊緊來，為咱出聲哮，hō͘咱目屎直直流，hō͘咱ê目睭皮chhèng出水。in tio̍h kín-kín lâi, ūi lán chhut-siaⁿ háu, hō͘ lán ba̍k-sái ti̍t-ti̍t lâu, hō͘ lán ê ba̍k-chiu-phê chhèng-chhut chúi.

19因為聽見哀傷ê聲tùi錫安出，講，咱怎樣衰敗！大大見笑，因為咱離開土地，因為人有拆毀咱ê厝宅。In-ūi thiaⁿ-kìⁿ ai-siong ê siaⁿ tùi Sek-an chhut, kóng, Lán cháiⁿ-iūⁿ soe-pāi! tōa-tōa kiàn-siàu, in-ūi lán lī-khui thó͘-tōe, in-ūi lâng ū thiah-húi lán ê chhù-the̍h.

20Lín chiah-ê婦人人ah，tio̍h聽耶和華ê話，耳孔tio̍h聽受伊ê嘴所講ê話，tio̍h教示lín ê cha-bó͘-kiáⁿ啼哭，ta̍k-ê tio̍h教示in ê厝邊唱哀歌。Lín chiah ê hū-jîn-lâng ah, tio̍h thiaⁿ Iâ-hô-hoa ê ōe, hī-khang tio̍h thiaⁿ-siū I ê chhùi só͘ kóng ê ōe, tio̍h kà-sī lín ê cha-bó͘-kiáⁿ thî-khàu, ta̍k-ê tio̍h kà-sī in ê chhù-piⁿ chhiùⁿ ai-ko.

21因為死無上來咱ê窗á門，入咱ê宮殿；tùi外面剿滅hiah-ê gín-ná，tùi街路剿滅hiah-ê少年人。In-ūi sí-bô chiūⁿ-lâi lán ê thang-á-mn̂g, ji̍p lán ê kiong-tiān; tùi gōa-bīn châu-bia̍t hiah ê gín-ná, tùi ke-lō͘ châu-bia̍t hiah ê siàu-liân lâng.

22你tio̍h kā in講，耶和華án-ni講，人ê身屍beh親像糞埽，hiat tī郊野；koh親像收割ê人ka-chiah後所ka-la̍uh一把á ê稻á，無人拾伊。Lí tio̍h kā in kóng, Iâ-hô-hoa án-ni kóng, Lâng ê sin-si beh chhin-chhiūⁿ pùn-sò, hiat tī kau-iá; koh chhin-chhiūⁿ siu-koah ê lâng ka-chiah-āu só͘ ka-la̍uh chi̍t-pé-á ê tiū-á, bô lâng khioh--i.

23耶和華án-ni講，智慧ê人，莫得因為伊ê智慧來誇口；勇猛ê人，莫得因為伊ê勇猛來誇口；好額ê人，莫得因為伊ê好額來誇口。Iâ-hô-hoa án-ni kóng, Tì-hūi ê lâng, bo̍h-tit in-ūi i ê tì-hūi lâi khoa-kháu; ióng-béng ê lâng, bo̍h-tit in-ūi i ê ióng-béng lâi khoa-kháu; hó-gia̍h ê lâng, bo̍h-tit in-ūi i ê hó-gia̍h lâi khoa-kháu.

24見若ài誇口ê，tio̍h因為chit-ê來誇口，就是伊bat我，知我是耶和華，行慈愛、公平、公義tī地裡ê；因為我掠chiah-ê做歡喜；這是耶和華講ê。Kìⁿ-nā ài khoa-kháu--ê, tio̍h in-ūi chit-ê lâi khoa-kháu, chiū-sī i bat Góa, chai Góa sī Iâ-hô-hoa, kiâⁿ chû-ài, kong-pêng, kong-gī tī tōe--nih-ê; in-ūi Góa lia̍h chiah-ê chòe hoaⁿ-hí; che sī Iâ-hô-hoa kóng--ê.

25耶和華講，看ah，日子beh到，我beh刑罰一切受割禮ê，無受割禮ê；Iâ-hô-hoa kóng, Khòaⁿ ah, ji̍t-chí beh kàu, Góa beh hêng-hoa̍t it-chhè siū kat-lé--ê, bô siū kat-lé--ê;

26就是埃及、猶大、Í-tong、A-bûn族、Mô͘-ap人；kap一切khiā起曠野剃鬢邊ê；因為列國lóng無受割禮；以色列人ê心亦無受割禮。chiū-sī Ai-ki̍p, Iû-tāi, Í-tong, A-bûn-cho̍k, Mô͘-ap lâng; kap it-chhè khiā-khí khòng-iá thì pìn-piⁿ--ê; in-ūi lia̍t-kok lóng bô siū kat-lé; Í-sek-lia̍t lâng ê sim ia̍h bô siū kat-lé.

1以色列家ah，tio̍h聽耶和華對lín所講ê話。Í-sek-lia̍t ke ah, tio̍h thiaⁿ Iâ-hô-hoa tùi lín só͘ kóng ê ōe.

2耶和華án-ni講，Lín m̄-thang學列國ê所行；亦m̄-thang為tio̍h天ê兆頭來驚惶；因為列國為tio̍h這來驚惶。Iâ-hô-hoa án-ni kóng, Lín m̄-thang o̍h lia̍t-kok ê só͘-kiâⁿ; ia̍h m̄-thang ūi-tio̍h thiⁿ ê tiāu-thâu lâi kiaⁿ-hiâⁿ; in-ūi lia̍t-kok ūi-tio̍h che lâi kiaⁿ-hiâⁿ.

3眾百姓ê風俗是空虛；in tī樹林內剉一叢樹，師傅ê手用斧頭造成ê。Chèng peh-sìⁿ ê hong-sio̍k sī khang-hu; in tī chhiū-nâ-lāi chhò chi̍t châng chhiū, sai-hū ê chhiú ēng pó͘-thâu chō-chiâⁿ--ê.

4In用金用銀鑲伊，用釘kap槌á釘tiâu，hō͘伊無搖動。In ēng kim ēng gûn siuⁿ--i, ēng teng kap thûi-á tèng-tiâu, hō͘ i bô iô-tāng.

5伊親像chhia圓ê柱，bōe講話；tio̍h人扛，因為伊bōe行；lín莫得驚伊；因為in bōe降災厄，亦無權thang降福氣。I chhin-chhiūⁿ chhia-îⁿ ê thiāu, bōe kóng-ōe; tio̍h lâng kng, in-ūi i bōe kiâⁿ; lín bo̍h-tit kiaⁿ--i; in-ūi in bōe kàng chai-ē, ia̍h bô koân thang kàng hok-khì.

6耶和華ah，無甚麼能比並得你；獨獨你最大；你ê名大koh有能力。Iâ-hô-hoa ah, bô sím-mi̍h ōe pí-phēng-tit Lí; to̍k-to̍k Lí chòe tōa; Lí ê miâ tōa koh ū lêng-le̍k.

7萬百姓ê王ah，是誰 m̄-tio̍h驚畏你，這是合tī你；因為tī列國智慧ê人ê中間，雖然有高位ê，亦bōe比得你。Bān peh-sìⁿ ê Ông ah, chī-chūi m̄-tio̍h kiaⁿ-ùi Lí, che sī ha̍p tī Lí; in-ūi tī lia̍t-kok tì-hūi ê lâng ê tiong-kan, sui-jiân ū koân-ūi--ê, ia̍h bōe pí-tit Lí.

8In lóng是愚蠢無知；偶像ê教示，不過是柴nā-tiāⁿ。In lóng sī gû-chhún bû-ti; ngó͘-siōng ê kà-sī, put-kò sī chhâ nā-tiāⁿ.

9有銀phah kui片，tùi Tha-si帶來ê；亦有tùi O͘-hoat來ê金；lóng是師傅kap銀匠ê手做ê；koh有藍色紫色ê料做衫，lóng是奇巧ê師傅做ê。Ū gûn phah kui phìⁿ, tùi Tha-si tòa-lâi-ê; ia̍h ū tùi O͘-hoat lâi ê kim; lóng sī sai-hū kap gûn-chhiūⁿ ê chhiú chòe--ê; koh ū lâm-sek chí-sek ê liāu chòe-saⁿ, lóng sī kî-khiáu ê sai-hū chòe--ê.

10獨獨耶和華是真ê上帝，伊是活ê上帝，是永遠ê王；伊一下受氣，地就振動；伊一下痛恨，列國lóng擋bōe-tiâu。To̍k-to̍k Iâ-hô-hoa sī chin ê Siōng-tè, I sī oa̍h ê Siōng-tè, sī éng-oán ê Ông; I chi̍t-ē siū-khì, tōe chiū tín-tāng; I chi̍t-ē thòng-hūn, lia̍t-kok lóng tòng-bōe-tiâu.

11Lín tio̍h kā in án-ni講，Hiah-ê m̄是創造天地ê上帝 lóng beh tùi地上kap天下滅無去。Lín tio̍h kā in án-ni kóng, Hiah-ê m̄-sī chhòng-chō thiⁿ-tōe ê siōng-tè lóng beh tùi tōe-chiūⁿ kap thiⁿ-ē bia̍t-bô--khì.

12耶和華用能力創造地；用智慧建立世界；用聰明展開chiah-ê天。Iâ-hô-hoa ēng lêng-le̍k chhòng-chō tōe; ēng tì-hūi kiàn-li̍p sè-kài; ēng chhang-miâ tián-khui chiah ê thiⁿ.

13伊一下出聲，空中就有chōe-chōe水激動；伊hō͘雲霧tùi地極chhèng起來；伊為tio̍h雨創造sih-nà；伊hō͘風tùi伊ê府庫出來。I chi̍t-ē chhut siaⁿ, khong-tiong chiū ū chōe-chōe chúi kek-tōng; I hō͘ hûn-bū tùi tōe-ke̍k chhèng--khí-lâi; I ūi-tio̍h hō͘ chhòng-chō sih-nà; I hō͘ hong tùi I ê hú-khò͘ chhut--lâi.

14Ta̍k人lóng愚蠢無智識；ta̍k ê銀匠lóng為tio̍h伊雕刻ê偶像來見笑；因為伊所鑄ê偶像是假ê，亦無活氣tī伊ê內面。Ta̍k-lâng lóng gû-chhún bô tì-sek; ta̍k ê gûn-chhiūⁿ lóng ūi-tio̍h i tiau-khek ê ngó͘-siōng lâi kiàn-siàu; in-ūi i só͘ chù ê ngó͘-siōng sī ké--ê, ia̍h bô oa̍h-khì tī i ê lāi-bīn.

15lóng是空空ê；是迷惑人ê所做；到辨理in ê時，的確受除滅。Lóng sī khang-khang--ê; sī bê-he̍k lâng ê só͘ chòe; kàu pān-lí in ê sî, tek-khak siū tû-bia̍t.

16雅各ê份額無親像chiah-ê；因為伊是創造萬物ê主；以色列亦是伊產業ê支派；萬軍ê耶和華是伊ê名。Ngá-kok ê hūn-gia̍h bô chhin-chhiūⁿ chiah-ê; in-ūi I sī chhòng-chō bān-mi̍h ê Chú; Í-sek-lia̍t ia̍h sī I sán-gia̍p ê chi-phài; bān-kun ê Iâ-hô-hoa sī I ê miâ.

17你khiā起受圍ê城ê，tio̍h tùi地裡收拾你ê物件。Lí khiā-khí siū-ûi ê siâⁿ--ê, tio̍h tùi tōe--nih siu-si̍p lí ê mi̍h-kiāⁿ.

18因為耶和華án-ni講，看ah，我chit時beh將chit所在khiā起ê百姓hìⁿ出去；koh beh困苦in，hō͘ in曉悟。In-ūi Iâ-hô-hoa án-ni kóng, Khòaⁿ ah, Góa chit-sî beh chiong chit só͘-chāi khiā-khí ê peh-sìⁿ hìⁿ--chhut-khì; koh beh khùn-khó͘ in, hō͘ in hiáu-ngō͘.

19我有災厄ah，因為我受毀傷，我ê傷真傷重；總是我講，這是我ê痛苦，的確tio̍h忍受。Góa ū chai-ē ah, in-ūi góa siū húi-siong, góa ê siong chin siong-tiōng; chóng-sī góa kóng, Che sī góa ê thòng-khó͘, tek-khak tio̍h jím-siū.

20我ê布棚毀壞，我ê索lóng斷；我ê kiáⁿ兒離開我出去，taⁿ lóng無lah；無人koh搭我ê布棚，掛我ê帳幅。Góa ê pò͘-pîⁿ húi-hoāi, góa ê soh lóng tn̄g; góa ê kiáⁿ-jî lī-khui góa chhut-khì, taⁿ lóng bô--lah; bô lâng koh tah góa ê pò͘-pîⁿ, kòa góa ê tiùⁿ-pak.

21因為牧者lóng愚蠢，無chhē求耶和華；所以bōe得tio̍h興通，in ê羊群亦lóng四散。In-ūi bo̍k-chiá lóng gû-chhún, bô chhē-kiû Iâ-hô-hoa; só͘-í bōe tit-tio̍h heng-thong, in ê iûⁿ-kûn ia̍h lóng sì-sòaⁿ.

22有風聲，看ah，來lah；有大擾亂tùi北方出來，beh hō͘猶大chiah-ê城拋荒，做野狗 khiā起ê所在。Ū hong-siaⁿ, khòaⁿ ah, lâi--lah; ū tōa jiáu-loān tùi pak-hng chhut-lâi, beh hō͘ Iû-tāi chiah ê siâⁿ pha-hng, chòe iá-káu khiā-khí ê só͘-chāi.

23耶和華ah，我知人ê路，m̄是tùi家己；行路ê人亦bōe主意家己ê腳步。Iâ-hô-hoa ah, góa chai lâng ê lō͘, m̄-sī tùi ka-kī; kiâⁿ-lō͘ ê lâng ia̍h bōe chú-ì ka-kī ê kha-pō͘.

24耶和華ah，你責備我，tio̍h從寬；m̄-thang tī你ê受氣中責備我；驚了hō͘我歸tī無去。Iâ-hô-hoa ah, Lí chek-pī góa, tio̍h chiông-khoan; m̄-thang tī Lí ê siū-khì-tiong chek-pī góa; kiaⁿ-liáu hō͘ góa kui tī bô--khì.

25願你piàⁿ出你ê受氣tī m̄-bat你ê列國ê頂面，以及無求叫你ê名ê ta̍k族；因為in吞食雅各，吞伊，滅伊，hō͘伊khiā起ê所在拋荒。Goān Lí piàⁿ-chhut Lí ê siū-khì tī m̄-bat Lí ê lia̍t-kok ê téng-bīn, í-ki̍p bô kiû-kiò Lí ê miâ ê ta̍k-cho̍k; in-ūi in thun-chia̍h Ngá-kok, thun--i, bia̍t--i, hō͘ i khiā-khí ê só͘-chāi pha-hng.

1有話tùi耶和華臨到耶利米，講，Ū ōe tùi Iâ-hô-hoa lîm-kàu Iâ-lī-bí, kóng,

2Lín tio̍h聽chit-ê約ê話，kā猶大人kap耶路撒冷khiā起ê百姓講。Lín tio̍h thiaⁿ chit ê iok ê ōe, kā Iû-tāi lâng kap Iâ-lō͘-sat-léng khiā-khí ê peh-sìⁿ kóng.

3你對in講，耶和華以色列ê上帝án-ni講，無聽thàn chit-ê約ê話ê人，tio̍h受咒詛。Lí tùi in kóng, Iâ-hô-hoa Í-sek-lia̍t ê Siōng-tè án-ni kóng, Bô thiaⁿ-thàn chit ê iok ê ōe ê lâng, tio̍h siū chiù-chó͘.

4Chit-ê約是我chhōa lín ê列祖出埃及地，脫離鑄鐵ê爐，hit日所吩咐in-ê，講，Lín tio̍h聽thàn我ê話，照我一切所吩咐ê去行；án-ni lín就做我ê百姓，我亦做lín ê上帝。Chit ê iok sī Góa chhōa lín ê lia̍t-chó͘ chhut Ai-ki̍p tōe, thoat-lī chù-thih ê lô͘, hit-ji̍t só͘ hoan-hù in--ê, kóng, Lín tio̍h thiaⁿ-thàn Góa ê ōe, chiàu Góa it-chhè só͘ hoan-hù--ê khì kiâⁿ; án-ni lín chiū chòe Góa ê peh-sìⁿ, Góa ia̍h chòe lín ê Siōng-tè.

5Hō͘我thang堅固對lín ê列祖所chiù ê chōa；賞賜in流奶kap蜜ê地；tú-tú親像今á日一樣；我就應講，耶和華ah，A-bēng。Hō͘ Góa thang kian-kò͘ tùi lín ê lia̍t-chó͘ só͘ chiù ê chōa; siúⁿ-sù in lâu ni kap bi̍t ê tōe; tú-tú chhin-chhiūⁿ kin-á-ji̍t chi̍t-iūⁿ; góa chiū ìn kóng, Iâ-hô-hoa ah, A-bēng.

6耶和華對我講，你tio̍h傳chiah-ê話tī猶大chiah-ê城，kap耶路撒冷ê街市，講，Lín tio̍h聽chit-ê約ê話，來行伊。Iâ-hô-hoa tùi góa kóng, Lí tio̍h thoân chiah ê ōe tī Iû-tāi chiah ê siâⁿ, kap Iâ-lō͘-sat-léng ê koe-chhī, kóng, Lín tio̍h thiaⁿ chit ê iok ê ōe, lâi kiâⁿ--i.

7因為tùi我chhōa lín列祖出埃及hit一日，到今á日，我切切警戒in，就是早早起來警戒in，講，Lín tio̍h聽thàn我ê話。In-ūi tùi Góa chhōa lín lia̍t-chó͘ chhut Ai-ki̍p hit chi̍t ji̍t, kàu kin-á-ji̍t, Góa chhiat-chhiat kéng-kài in, chiū-sī chá-chá khí-lâi kéng-kài in, kóng, Lín tio̍h thiaⁿ-thàn Góa ê ōe.

8總是in m̄聽thàn，m̄俯耳孔；竟然ta̍k-ê照家己pháiⁿ心ê剛硬去行；所以我hō͘ chit-ê約一切咒詛ê話臨到in ê身上；chit-ê約是我吩咐in tio̍h行ê，總是in無行。Chóng-sī in m̄ thiaⁿ-thàn, m̄ àⁿ hī-khang; kéng-jiân ta̍k-ê chiàu ka-kī pháiⁿ-sim ê kong-ngī khì kiâⁿ; só͘-í Góa hō͘ chit ê iok it-chhè chiù-chó͘ ê ōe lîm-kàu in ê sin-chiūⁿ; chit ê iok sī Góa hoan-hù in tio̍h kiâⁿ--ê, chóng-sī in bô kiâⁿ.

9耶和華對我講，Tī猶大人kap耶路撒冷人ê中間有謀叛ê事。Iâ-hô-hoa tùi góa kóng, Tī Iû-tāi lâng kap Iâ-lō͘-sat-léng lâng ê tiong-kan ū bô͘-poān ê sū.

10In oa̍t-tńg行in ê列祖ê pháiⁿ，in ê列祖m̄肯聽我ê話；in就thàn別號ê上帝來服事伊；以色列家kap猶大家違背我kap in ê列祖所立ê約。In oa̍t-tńg kiâⁿ in ê lia̍t-chó͘ ê pháiⁿ, in ê lia̍t-chó͘ m̄-khéng thiaⁿ Góa ê ōe; in chiū thàn pa̍t-hō ê siōng-tè lâi ho̍k-sāi i; Í-sek-lia̍t ke kap Iû-tāi ke ûi-pōe Góa kap in ê lia̍t-chó͘ só͘ li̍p ê iok.

11所以耶和華án-ni講，看ah，我beh hō͘災厄臨到in，就是in所bōe逃脫ê；in beh對我哀求，我m̄聽in。Só͘-í Iâ-hô-hoa án-ni kóng, Khòaⁿ ah, Góa beh hō͘ chai-ē lîm-kàu in, chiū-sī in só͘ bōe tô-thoat--ê; in beh tùi Góa ai-kiû, Góa m̄ thiaⁿ in.

12Hit時猶大chiah-ê城ê人，kap耶路撒冷khiā起ê百姓，beh去哀求in所燒香來服事hiah-ê上帝；總是tú-tio̍h患難ê時，chiah-ê上帝 lóng bōe能拯救in。Hit-sî Iû-tāi chiah ê siâⁿ ê lâng, kap Iâ-lō͘-sat-léng khiā-khí ê peh-sìⁿ, beh khì ai-kiû in só͘ sio-hiuⁿ lâi ho̍k-sāi hiah ê siōng-tè; chóng-sī tú-tio̍h hoān-lān ê sî, chiah ê siōng-tè lóng bōe-ōe chín-kiù in.

13猶大ah，你ê上帝 ê數額，kap你ê城ê數額平平；你也為tio̍h thang見笑ê物來起壇，照耶路撒冷chiah-ê街路ê數額；hiah-ê壇就是燒香tī Pa-le̍k-ê。Iû-tāi ah, lí ê siōng-tè ê siàu-gia̍h, kap lí ê siâⁿ ê siàu-gia̍h pîⁿ-pîⁿ; lí iā ūi-tio̍h thang kiàn-siàu ê mi̍h lâi khí tôaⁿ, chiàu Iâ-lō͘-sat-léng chiah ê ke-lō͘ ê siàu-gia̍h; hiah ê tôaⁿ chiū-sī sio-hiuⁿ tī Pa-le̍k--ê.

14所以你莫得為tio̍h chit-ê百姓祈禱，莫得為tio̍h in出聲祈求，因為in tú-tio̍h患難哀求我ê時，我無beh聽in。Só͘-í lí bo̍h-tit ūi-tio̍h chit ê peh-sìⁿ kî-tó, bo̍h-tit ūi-tio̍h in chhut-siaⁿ kî-kiû, in-ūi in tú-tio̍h hoān-lān ai-kiû Góa ê sî, Góa bô beh thiaⁿ in.

15我所疼ê，你已經行pháiⁿ，你tī我ê厝beh啥事？hē願，獻肉，kiám會除去你ê罪惡，hō͘你歡喜？Góa só͘ thiàⁿ--ê, lí í-keng kiâⁿ pháiⁿ, lí tī Góa ê chhù beh siáⁿ-sū? hē goān, hiàn bah, kiám ōe tû-khì lí ê chōe-ok, hō͘ lí hoaⁿ-hí?

16耶和華bat稱你ê名做青翠ê橄欖樹，好看，亦結好果子；taⁿ伊用hōa-hōa嚷ê聲，起火tī伊ê頂面，枝椏亦受at折。Iâ-hô-hoa bat chheng lí ê miâ chòe chhiⁿ-chhùi ê kaⁿ-ná-chhiū, hó-khòaⁿ, ia̍h kiat hó ké-chí; taⁿ I ēng hōa-hōa-jióng ê siaⁿ, khí hé tī i ê téng-bīn, ki-oāiⁿ ia̍h siū at-chi̍h.

17萬軍ê耶和華，早栽培你ê，taⁿ命令災厄攻擊你；是因為以色列kap猶大家行pháiⁿ，ǹg Pa-le̍k燒香，惹我ê受氣；家己做，家己受。Bān-kun ê Iâ-hô-hoa, chá chai-pôe lí--ê, taⁿ bēng-lēng chai-ē kong-kek lí; sī in-ūi Í-sek-lia̍t kap Iû-tāi ke kiâⁿ-pháiⁿ, ǹg Pa-le̍k sio-hiuⁿ, jiá Góa ê siū-khì; ka-kī chòe, ka-kī siū.

18耶和華指點我，我chiah知；hit時你將in所行ê報我看。Iâ-hô-hoa chí-tiám góa, góa chiah chai; hit-sî Lí chiong in só͘ kiâⁿ--ê pò góa khòaⁿ.

19總是我親像純良ê羊á，牽到受thâi ê地；我並m̄知in設計謀beh害我，講，咱將樹kap果子lóng kā伊滅去，將伊tùi活人ê地剪除去；hō͘伊ê名無koh hō͘人記念。Chóng-sī góa chhin-chhiūⁿ sûn-liông ê iûⁿ-á, khan kàu siū thâi ê tōe; góa pēng m̄-chai in siat kè-bô͘ beh hāi góa, kóng, Lán chiong chhiū kap ké-chí lóng kā i bia̍t--khì, chiong i tùi oa̍h-lâng ê tōe chián-tû--khì; hō͘ i ê miâ bô koh hō͘ lâng kì-liām.

20萬軍ê耶和華ah，你是照公義判斷，鑑察人ê心腹腎腸ê；求你hō͘我看你tùi in報仇，因為我將我ê案件稟明tī你。Bān-kun ê Iâ-hô-hoa ah, Lí sī chiàu kong-gī phòaⁿ-toàn, kàm-chhat lâng ê sim-pak sīn-tn̂g--ê; kiû Lí hō͘ góa khòaⁿ Lí tùi in pò-siû, in-ūi góa chiong góa ê àn-kiāⁿ pín-bêng tī Lí.

21所以耶和華論到siàu想你ê性命ê A-ná-tu̍t人án-ni講，In講，你莫得奉耶和華ê名來讖語；免得你死tī阮ê手頭。Só͘-í Iâ-hô-hoa lūn-kàu siàu-siūⁿ lí ê sìⁿ-miā ê A-ná-tu̍t lâng án-ni kóng, In kóng, Lí bo̍h-tit hōng Iâ-hô-hoa ê miâ lâi chhàm-gú; bián-tit lí sí tī goán ê chhiú-thâu.

22所以萬軍ê耶和華án-ni講，看ah，我beh刑罰in；少年人beh hō͘刀thâi死；in ê kiáⁿ cha-bó͘-kiáⁿ beh因為飢荒來死；hō͘ in無chhun一個；Só͘-í bān-kun ê Iâ-hô-hoa án-ni kóng, Khòaⁿ ah, Góa beh hêng-hoa̍t in; siàu-liân lâng beh hō͘ to thâi-sí; in ê kiáⁿ cha-bó͘-kiáⁿ beh in-ūi ki-hng lâi sí; hō͘ in bô chhun chi̍t-ê;

23因為辨理in ê年，我beh降災厄tī A-ná-tu̍t人。in-ūi pān-lí in ê nî, Góa beh kàng chai-ē tī A-ná-tu̍t lâng.