1耶和華對我án-ni講，你tio̍h去買一條麻布ê帶來hâ腰；m̄-thang hē tī水裡。Iâ-hô-hoa tùi góa án-ni kóng, Lí tio̍h khì bóe chi̍t-tiâu môa-pò͘ ê tòa lâi hâ-io; m̄-thang hē tī chúi--nih.

2我就照耶和華ê話，買一條帶hâ腰。Góa chiū chiàu Iâ-hô-hoa ê ōe, bóe chi̍t tiâu tòa hâ-io.

3耶和華ê話第二pái臨到我講，Iâ-hô-hoa ê ōe tē-jī pái lîm-kàu góa kóng,

4Tio̍h the̍h你所買ê帶，就是你腰裡ê帶，起來去Pek-la̍h，tī-hia khǹg伊tī石磐孔。Tio̍h the̍h lí só͘ bóe ê tòa, chiū-sī lí io--nih ê tòa, khí--lâi khì Pek-la̍h, tī-hia khǹg--i tī chio̍h-pôaⁿ khang.

5我就去，khǹg伊tī Pek-la̍h，照耶和華所吩咐我ê。Góa chiū khì, khǹg i tī Pek-la̍h, chiàu Iâ-hô-hoa só͘ hoan-hù góa--ê.

6過chōe-chōe日，耶和華對我講，你起來，去Pek-la̍h，將我吩咐你khǹg tī-hia ê腰帶the̍h來。Kè chōe-chōe ji̍t, Iâ-hô-hoa tùi góa kóng, Lí khí--lâi, khì Pek-la̍h, chiong Góa hoan-hù lí khǹg tī-hia ê io-tòa the̍h--lâi.

7我就去Pek-la̍h來掘，tùi我所khǹg ê所在the̍h hit條帶；看ah，hit條帶已經pháiⁿ去，lóng無路用。Góa chiū khì Pek-la̍h lâi ku̍t, tùi góa só͘ khǹg ê só͘-chāi the̍h hit tiâu tòa; khòaⁿ ah, hit tiâu tòa í-keng pháiⁿ--khì, lóng bô lō͘-ēng.

8耶和華ê話臨到我講，Iâ-hô-hoa ê ōe lîm-kàu góa kóng,

9耶和華án-ni講，我beh照án-ni敗壞猶大ê驕傲，kap耶路撒冷ê大驕傲。Iâ-hô-hoa án-ni kóng, Góa beh chiàu án-ni pāi-hoāi Iû-tāi ê kiau-ngō͘, kap Iâ-lō͘-sat-léng ê tōa kiau-ngō͘.

10Chit-ê pháiⁿ ê百姓m̄肯聽我ê話，照in ê心ê剛硬去行；koh thàn別號ê上帝，服事伊，跪拜伊；in beh親像chit條無路用ê帶。Chit-ê pháiⁿ ê peh-sìⁿ m̄-khéng thiaⁿ Góa ê ōe, chiàu in ê sim ê kong-ngī khì kiâⁿ; koh thàn pa̍t-hō ê siōng-tè, ho̍k-sāi i, kūi-pài i; in beh chhin-chhiūⁿ chit-tiâu bô lō͘-ēng ê tòa.

11耶和華講，腰帶怎樣連tī人ê腰，我有hō͘以色列全家，kap猶大全家，連tī我，亦是án-ni；beh hō͘ in做我ê百姓，做我ê名聲，做我ê o-ló，做我ê榮光；總是in m̄肯聽。Iâ-hô-hoa kóng, Io-tòa cháiⁿ-iūⁿ liân tī lâng ê io, Góa ū hō͘ Í-sek-lia̍t choân-ke, kap Iû-tāi choân-ke, liân tī Góa, ia̍h sī án-ni; beh hō͘ in chòe Góa ê peh-sìⁿ, chòe Góa ê miâ-siaⁿ, chòe Góa ê o-ló, chòe Góa ê êng-kng; chóng-sī in m̄-khéng thiaⁿ.

12你tio̍h koh對in講chit-ê話，以色列ê上帝耶和華án-ni講，Ta̍k ê甕beh貯酒滿滿；in beh對你講，阮kiám m̄知ta̍k ê甕beh貯酒滿滿mah？Lí tio̍h koh tùi in kóng chit ê ōe, Í-sek-lia̍t ê Siōng-tè Iâ-hô-hoa án-ni kóng, Ta̍k ê àng beh tóe chiú móa-móa; in beh tùi lí kóng, Goán kiám m̄-chai ta̍k ê àng beh tóe chiú móa-móa mah?

13你就tio̍h對in講，耶和華án-ni講，看ah，我beh hō͘ chit所在一切khiā起ê百姓，就是坐大衛寶座ê列王，kap祭司、先知，以及耶路撒冷一切khiā起ê百姓，lóng大大酒醉。Lí chiū tio̍h tùi in kóng, Iâ-hô-hoa án-ni kóng, Khòaⁿ ah, Góa beh hō͘ chit só͘-chāi it-chhè khiā-khí ê peh-sìⁿ, chiū-sī chē Tāi-pi̍t pó-chō ê lia̍t-ông, kap chè-si, sian-ti, í-ki̍p Iâ-lō͘-sat-léng it-chhè khiā-khí ê peh-sìⁿ, lóng tōa-tōa chiú-chùi.

14耶和華講，我beh hō͘ in大家相kha̍p；就是父kap kiáⁿ相kha̍p；我無beh可憐，無beh疼惜，無beh憐憫，來m̄滅伊。Iâ-hô-hoa kóng, Góa beh hō͘ in tāi-ke saⁿ-kha̍p; chiū-sī pē kap kiáⁿ saⁿ-kha̍p; Góa bô beh khó-lîn, bô beh thiàⁿ-sioh, bô beh lîn-bín, lâi m̄-bia̍t--i.

15Lín tio̍h聽，tio̍h俯耳孔；莫得驕傲，因為耶和華已經講伊。Lín tio̍h thiaⁿ, tio̍h àⁿ hī-khang; bo̍h-tit kiau-ngō͘, in-ūi Iâ-hô-hoa í-keng kóng--i.

16烏暗未到，lín ê腳未tio̍h-tak tī烏暗ê山，所ǹg望ê光iáu未變做死無ê蔭影，烏烏暗暗ê事先，lín tio̍h歸榮光lín ê上帝耶和華。O͘-àm bē kàu, lín ê kha bē tio̍h-tak tī o͘-àm ê soaⁿ, só͘ ǹg-bāng ê kng iáu-bē piàn-chòe sí-bô ê ìm-ńg, o͘-o͘ àm-àm ê tāi-seng, lín tio̍h kui êng-kng lín ê Siōng-tè Iâ-hô-hoa.

17Lín若m̄聽chit-ê話，就我ê心beh因為lín ê驕傲，tī隱密ê所在啼哭；我ê目睭beh目屎chhē-chhē倒；因為耶和華ê羊群受掠。Lín nā m̄ thiaⁿ chit ê ōe, chiū góa ê sim beh in-ūi lín ê kiau-ngō͘, tī ún-ba̍t ê só͘-chāi thî-khàu; góa ê ba̍k-chiu beh ba̍k-sái chhē-chhē-tò; in-ūi Iâ-hô-hoa ê iûⁿ-kûn siū-lia̍h.

18你tio̍h tùi君王kap太后講，Lín tio̍h謙卑，坐tī下面；因為lín榮光ê冕旒tùi lín ê頭殼lak落去。Lí tio̍h tùi kun-ông kap thài-hō͘ kóng, Lín tio̍h khiam-pi, chē tī ē-bīn; in-ūi lín êng-kng ê bián-liû tùi lín ê thâu-khak lak--lo̍h-khì.

19南方chiah-ê城lóng關，無人開；猶大全族受掠；koh掠到了了。Lâm-hng chiah ê siâⁿ lóng koaiⁿ, bô lâng khui; Iû-tāi choân-cho̍k siū-lia̍h; koh lia̍h kàu liáu-liáu.

20Lín tio̍h kia̍h目看，tùi北方來ê人；前所hō͘你ê羊群，就是你súi ê羊群，taⁿ tī toh-lo̍h ah？Lín tio̍h kia̍h-ba̍k khòaⁿ, tùi pak-hng lâi ê lâng; chêng só͘ hō͘ lí ê iûⁿ-kûn, chiū-sī lí súi ê iûⁿ-kûn, taⁿ tī toh-lo̍h ah?

21你平素所親密ê朋友，設使伊設立in做頭來管轄你，你iáu有甚麼話thang講？痛苦kiám無擒tiâu你，親像生kiáⁿ ê婦人人？Lí pêng-sò͘ só͘ chhin-bi̍t ê pêng-iú, siat-sú I siat-li̍p in chòe-thâu lâi koán-hat lí, lí iáu ū sím-mi̍h ōe thang kóng? thòng-khó͘ kiám bô khîⁿ-tiâu lí, chhin-chhiūⁿ siⁿ-kiáⁿ ê hū-jîn-lâng?

22你若心內講，這一切ê事為何到tī我leh？是因為你ê罪過真重，所以你露體赤腳。Lí nā sim-lāi kóng, Che it-chhè ê sū ūi-hô kàu tī góa leh? sī in-ūi lí ê chōe-kòa chin-tāng, só͘-í lí lō͘-thé chhiah-kha.

23Kó͘-si̍t ê人會變換皮膚，豹會變換斑點mah？若會，就lín chiah-ê慣練行pháiⁿ-ê，會行好。Kó͘-si̍t ê lâng ōe piàn-ōaⁿ phê-hu, pà ōe piàn-ōaⁿ pan-tiám mah? Nā ōe, chiū lín chiah-ê koàn-liān kiâⁿ pháiⁿ--ê, ōe kiâⁿ hó.

24所以我beh phah散in，親像草幼hō͘曠野ê風吹去一樣。Só͘-í Góa beh phah-sòaⁿ in, chhin-chhiūⁿ chháu-iù hō͘ khòng-iá ê hong chhe--khì chi̍t-iūⁿ.

25耶和華講，這是你所應該tú-tio̍h-ê；是我量hō͘你ê份額；因為你bōe記得我，去óa靠虛假。Iâ-hô-hoa kóng, Che sī lí só͘ eng-kai tú-tio̍h--ê; sī Góa niû hō͘ lí ê hūn-gia̍h; in-ūi lí bōe-kì-tit Góa, khì óa-khò hu-ké.

26所以我beh掀起你ê裙，罩tī你ê面；你ê見笑就露出。Só͘-í Góa beh hian-khí lí ê kûn, tà tī lí ê bīn; lí ê kiàn-siàu chiū lō͘-chhut.

27你hiah-ê可惡ê事，就是tī山裡田裡行姦淫，出ki-ki哮ê聲，娼妓款ê淫亂，我lóng看見lah。耶路撒冷ah，你有災厄；你m̄肯清氣，beh到tī時ah？Lí hiah-ê khó-ò͘ⁿ ê sū, chiū-sī tī soaⁿ--nih chhân--nih kiâⁿ kan-îm, chhut ki--ki-háu ê siaⁿ, chhiong-ki khoán ê îm-loān, Góa lóng khòaⁿ-kìⁿ lah. Iâ-lō͘-sat-léng ah, lí ū chai-ē; lí m̄-khéng chheng-khì, beh kàu tī-sî ah?

1論到炕旱ê事，耶和華ê話臨到耶利米。Lūn-kàu khòng-hān ê sū, Iâ-hô-hoa ê ōe lîm-kàu Iâ-lī-bí.

2猶大悲哀，城門衰敗，人穿烏衫坐tī土腳；耶路撒冷悲哀ê聲透到頂面。Iû-tāi pi-ai, siâⁿ-mn̂g soe-pāi, lâng chhēng o͘-saⁿ chē tī thô͘-kha; Iâ-lō͘-sat-léng pi-ai ê siaⁿ thàu kàu téng-bīn.

3In ê 世家差gín-ná工去chhiūⁿ水；in到井裡，chhē無水；就帶空ê器具tò來；見笑，漏氣，罩頭殼。In ê sè-ka chhe gín-ná-kang khì chhiūⁿ-chúi; in kàu chíⁿ--nih, chhē bô chúi; chiū tòa khang ê khì-kū tò--lâi; kiàn-siàu, làu-khùi, tà thâu-khak.

4作田人見笑，罩頭殼；是因為無落雨，土地pit裂。Choh-chhân lâng kiàn-siàu, tà thâu-khak; sī in-ūi bô lo̍h hō͘, thô͘(**thó͘)-tōe pit-li̍h.

5田野ê鹿母生kiáⁿ，就放hiat-ka̍k；因為無草。Chhân-iá ê lo̍k-bú siⁿ-kiáⁿ, chiū pàng hiat-ka̍k; in-ūi bô chháu.

6野驢khiā tī光khō-khō高ê所在，喘氣親像野狗；因為無草，目睭失明。Iá-lû khiā tī kng-khō-khō koâiⁿ ê só͘-chāi, chhoán-khùi chhin-chhiūⁿ iá-káu; in-ūi bô chháu, ba̍k-chiu sit-bêng.

7耶和華ah，阮ê罪過雖然做干證告阮；iáu-kú求你為tio̍h你ê名來做tāi-chì；阮ta̍uh-ta̍uh悖逆，得罪你。Iâ-hô-hoa ah, goán ê chōe-kòa sui-jiân chòe kan-chèng kò goán; iáu-kú kiû Lí ūi-tio̍h Lí ê miâ lâi chòe tāi-chì; goán ta̍uh-ta̍uh pōe-ge̍k, tek-chōe Lí.

8以色列所ǹg望ê，tī患難中做救主ê ah，你啥事tī chit所在親像寄腳ê，koh親像過路人oa̍t來歇過暝ah？Í-sek-lia̍t só͘ ǹg-bāng--ê, tī hoān-lān-tiong chòe Kiù-chú--ê ah, Lí siáⁿ-sū tī chit só͘-chāi chhin-chhiūⁿ kià-kha--ê, koh chhin-chhiūⁿ kè-lō͘ lâng oa̍t--lâi hioh kè-mî ah?

9你啥事親像gông-ngia̍h ê人，親像bōe能救人ê勇士ah？耶和華ah，你猶原tī阮中間；阮亦稱做屬你ê名ê人；m̄-thang放sak阮。Lí siáⁿ-sū chhin-chhiūⁿ gông-ngia̍h ê lâng, chhin-chhiūⁿ bōe-ōe kiù lâng ê ióng-sū ah? Iâ-hô-hoa ah, Lí iû-goân tī goán tiong-kan; goán ia̍h chheng-chòe sio̍k Lí ê miâ ê lâng; m̄-thang pàng-sak goán.

10耶和華對chit-ê百姓án-ni講，In ài放蕩，無約束in ê腳；所以耶和華m̄接納in，taⁿ beh記得in ê罪過，辦in ê罪惡。Iâ-hô-hoa tùi chit ê peh-sìⁿ án-ni kóng, In ài hòng-tōng, bô iok-sok in ê kha; só͘-í Iâ-hô-hoa m̄ chiap-la̍p in, taⁿ beh kì-tit in ê chōe-kòa, pān in ê chōe-ok.

11耶和華koh對我講，莫得為tio̍h chit-ê百姓祈禱，求福氣。Iâ-hô-hoa koh tùi góa kóng, Bo̍h-tit ūi-tio̍h chit ê peh-sìⁿ kî-tó, kiû hok-khì.

12In禁食ê時，我m̄聽in ê求叫；in獻燒祭kap禮物，我亦m̄接納。我反tńg beh用刀劍，用飢荒，用瘟疫來滅in。In kìm-chia̍h ê sî, Góa m̄-thiaⁿ in ê kiû-kiò; in hiàn sio-chè kap lé-mi̍h, Góa ia̍h m̄ chiap-la̍p. Góa hoán-tńg beh ēng to-kiàm, ēng ki-hng, ēng un-e̍k lâi bia̍t in.

13我就講，害ah，主耶和華ah，看ah，hiah-ê先知對in講，Lín bōe看見刀劍，亦bōe tú-tio̍h飢荒；耶和華beh tī chit-ê地方賞賜lín久長ê平安。Góa chiū kóng, Hāi--ah, Chú Iâ-hô-hoa ah, khòaⁿ ah, hiah ê sian-ti tùi in kóng, Lín bōe khòaⁿ-kìⁿ to-kiàm, ia̍h bōe tú-tio̍h ki-hng; Iâ-hô-hoa beh tī chit ê tōe-hng siúⁿ-sù lín kú-tn̂g ê pêng-an.

14耶和華對我講，hiah-ê先知託我ê名傳白賊；我無差in，無吩咐in，亦無對in講；in傳hō͘ lín-ê，是虛假ê啟示，kap占卜，kap無影ê事，以及in ê心ê詭詐。Iâ-hô-hoa tùi góa kóng, Hiah ê sian-ti thok Góa ê miâ thoân pe̍h-chha̍t; Góa bô chhe in, bô hoan-hù in, ia̍h bô tùi in kóng; in thoân hō͘ lín--ê, sī hu-ké ê khé-sī, kap chiam-pok, kap bô-iáⁿ ê sū, í-ki̍p in ê sim ê khúi-chà.

15所以耶和華án-ni講，論到託我ê名來傳播ê hiah-ê先知，我並無差in，in iáu-kú講，chit-ê地bōe會tú-tio̍h刀劍，飢荒；其實hiah-ê先知beh tùi刀劍飢荒來滅無。Só͘-í Iâ-hô-hoa án-ni kóng, Lūn-kàu thok Góa ê miâ lâi thoân-pò͘ ê hiah ê sian-ti, Góa pēng-bô chhe in, in iáu-kú kóng, Chit ê tōe bōe-ōe tú-tio̍h to-kiàm, ki-hng; kî-si̍t hiah ê sian-ti beh tùi to-kiàm ki-hng lâi bia̍t-bô.

16Koh聽in傳播ê百姓，beh因為飢荒刀劍受hiat-ka̍k tī耶路撒冷ê街路；in kap bó͘ kap kiáⁿ cha-bó͘-kiáⁿ，lóng無人埋葬；我beh將in ê pháiⁿ piàⁿ tī in ê身上。Koh thiaⁿ in thoân-pò͘ ê peh-sìⁿ, beh in-ūi ki-hng to-kiàm siū hiat-ka̍k tī Iâ-lō͘-sat-léng ê ke-lō͘; in kap bó͘ kap kiáⁿ cha-bó͘-kiáⁿ, lóng bô lâng bâi-chòng; Góa beh chiong in ê pháiⁿ piàⁿ tī in ê sin-chiūⁿ.

17你tio̍h將chit-ê話kā in講，願我ê目屎日暝流無soah；因為我ê百姓tú-tio̍h大毀傷，phah到真thiám。Lí tio̍h chiong chit ê ōe kā in kóng, Goān góa ê ba̍k-sái ji̍t-mî lâu bô soah; in-ūi góa ê peh-sìⁿ tú-tio̍h tōa húi-siong, phah kàu chin-thiám.

18我若出去田裡，就看見有hō͘刀thâi-ê；我若入城，就看見有tùi飢荒來破病ê；先知kap祭司tī國內四界行，亦lóng bōe曉得。Góa nā chhut-khì chhân--nih, chiū khòaⁿ-kìⁿ ū hō͘ to thâi--ê; góa nā ji̍p siâⁿ, chiū khòaⁿ-kìⁿ ū tùi ki-hng lâi phòa-pīⁿ--ê; sian-ti kap chè-si tī kok-lāi sì-kòe kiâⁿ, ia̍h lóng bōe hiáu-tit.

19你一盡棄sak猶大mah？你ê心厭惡錫安mah？啥事phah阮，亦無thang得tio̍h醫好？阮ǹg望平安，亦無有福氣；ǹg望醫治ê機會，無phah算tú-tio̍h驚惶。Lí it-chīn khì-sak Iû-tāi mah? Lí ê sim iàm-ò͘ⁿ Sek-an mah? siáⁿ-sū phah goán, ia̍h bô thang tit-tio̍h i-hó? Goán ǹg-bāng pêng-an, ia̍h bô ū hok-khì; ǹg-bāng i-tī ê ki-hōe, bô phah-sǹg tú-tio̍h kiaⁿ-hiâⁿ.

20耶和華ah，阮認家己ê罪惡，kap阮ê列祖ê罪過；因為阮得罪你。Iâ-hô-hoa ah, goán jīn ka-kī ê chōe-ok, kap goán ê lia̍t-chó͘ ê chōe-kòa; in-ūi goán tek-chōe Lí.

21求你因為你ê名ê緣故，莫得厭惡阮；莫得凌辱你榮光ê寶座；求你追念，莫得背你kap阮所立ê約。Kiû Lí in-ūi Lí ê miâ ê iân-kò͘, bo̍h-tit iàm-ò͘ⁿ goán; bo̍h-tit lêng-jio̍k Lí êng-kng ê pó-chō; kiû Lí tui-liām, bo̍h-tit pōe Lí kap goán só͘ li̍p ê iok.

22外邦無影跡ê神明，有一個會落雨mah？天會家己落大雨mah？耶和華阮ê上帝ah，會án-ni-ê，kiám m̄是你mah？所以阮猶原beh thèng候你；因為這lóng是你所做ê。Gōa-pang bô-iáⁿ-chiah ê sîn-bêng, ū chi̍t-ê ōe lo̍h-hō͘ mah? thiⁿ ōe ka-kī lo̍h tōa-hō͘ mah? Iâ-hô-hoa goán ê Siōng-tè ah, ōe án-ni--ê, kiám m̄-sī Lí mah? só͘-í goán iû-goân beh thèng-hāu Lí; in-ūi che lóng sī Lí só͘ chòe--ê.

1耶和華對我講，雖然有摩西kap撒母耳khiā tī我ê面前，替in求，我ê心亦無眷顧chit-ê百姓；tio̍h趕in離開我ê面前，hō͘ in出去。Iâ-hô-hoa tùi góa kóng, Sui-jiân ū Mô͘-se kap Sat-bó͘-jíⁿ khiā tī Góa ê bīn-chêng, thòe in kiû, Góa ê sim ia̍h bô koàn-kò͘ chit ê peh-sìⁿ; tio̍h kóaⁿ in lī-khui Góa ê bīn-chêng, hō͘ in chhut--khì.

2In若對你講，阮tio̍h出去toh-lo̍h？你tio̍h kā in講，耶和華án-ni講，該死ê tio̍h死；該hō͘刀thâi-ê，tio̍h hō͘刀thâi；該tú-tio̍h飢荒ê，tio̍h tú-tio̍h飢荒；該hō͘人掠ê，tio̍h hō͘人掠。In nā tùi lí kóng, Goán tio̍h chhut-khì toh-lo̍h? lí tio̍h kā in kóng, Iâ-hô-hoa án-ni kóng, Kai sí--ê tio̍h sí; kai hō͘ to thâi--ê, tio̍h hō͘ to thâi; kai tú-tio̍h ki-hng--ê, tio̍h tú-tio̍h ki-hng; kai hō͘ lâng lia̍h--ê, tio̍h hō͘ lâng lia̍h.

3耶和華koh講，我tiau-chhoân四項來辦in；就是刀來thâi-in，狗來拖in，空中ê鳥，地上ê野獸，食來滅in。Iâ-hô-hoa koh kóng, Góa tiau-chhoân sì-hāng lâi pān--in; chiū-sī to lâi thâi--in, káu lâi thoa--in, khong-tiong ê chiáu, tōe-chiūⁿ ê iá-siù, chia̍h lâi bia̍t in.

4Koh beh hō͘ in 流落tī天下萬國中；lóng是因為猶大王Hi-se-ka ê kiáⁿ Má-ná-se tī耶路撒冷所行ê事。Koh beh hō͘ in liû-lo̍h tī thiⁿ-ē bān-kok tiong; lóng sī in-ūi Iû-tāi ông Hi-se-ka ê kiáⁿ Má-ná-se tī Iâ-lō͘-sat-léng só͘ kiâⁿ ê sū.

5耶路撒冷ah，是誰可憐你ah？是誰為你悲傷ah？是誰 oa̍t-tńg身問你平安無？Iâ-lō͘-sat-léng ah, chī-chūi khó-lîn lí ah? chī-chūi ūi lí pi-siong ah? chī-chūi oa̍t-tńg-sin mn̄g lí pêng-an--bô?

6耶和華講，你棄絕我，oa̍t-tńg身退後；因為án-ni，我伸手攻擊你，毀壞你；我憐憫你到厭。Iâ-hô-hoa kóng, Lí khì-choa̍t Góa, oa̍t-tńg-sin thè-āu; in-ūi án-ni, Góa chhun-chhiú kong-kek lí, húi-hoāi lí; Góa lîn-bín lí kàu ià.

7我tī境內ta̍k ê城門口，用簸箕簸in；我絕in ê後嗣，我滅我ê百姓，in猶原無oa̍t-tńg離開in ê路。Góa tī kéng-lāi ta̍k ê siâⁿ mn̂g-kháu, ēng pòa-ki pòa--in; Góa choa̍t in ê hō͘-sû, Góa bia̍t Góa ê peh-sìⁿ, in iû-goân bô oa̍t-tńg lī-khui in ê lō͘.

8In ê寡婦加添tī我ê面前，比海沙khah-chōe；我hō͘殘害ê中晝來，攻擊少年人ê老母；hō͘痛苦驚惶忽然到伊ê身上。In ê kóaⁿ-hū ke-thiⁿ tī Góa ê bīn-chêng, pí hái-soa khah-chōe; Góa hō͘ chân-hāi--ê tiong-tàu lâi, kong-kek siàu-liân lâng ê lāu-bú; hō͘ thòng-khó͘ kiaⁿ-hiâⁿ hut-jiân kàu i ê sin-chiūⁿ.

9生七個kiáⁿ ê婦人人，衰lám氣斷；當頭白日，伊ê日頭忽然落，伊漏氣見笑；所chhun ê百姓，我beh tī in ê對敵ê面前，交hō͘刀劍；這是耶和華講ê。Siⁿ chhit ê kiáⁿ ê hū-jîn-lâng, soe-lám khùi-tn̄g; tng-thâu pe̍h-ji̍t, i ê ji̍t-thâu hut-jiân lo̍h, i làu-khùi kiàn-siàu; só͘ chhun ê peh-sìⁿ, Góa beh tī in ê tùi-te̍k ê bīn-chêng, kau hō͘ to-kiàm; che sī Iâ-hô-hoa kóng--ê.

10我ê老母ah，我有災厄；因為你生我做一個kap全地相爭辯計較ê人；我平素無用銀借人，來the̍h利息；人亦無用銀借我，來the̍h利息；總是人lóng咒詛我。Góa ê lāu-bú ah, góa ū chai-ē; in-ūi lí siⁿ góa chòe chi̍t-ê kap choân-tōe saⁿ cheng-piān kè-kàu ê lâng; góa pêng-sò͘ bô ēng gûn chioh lâng, lâi the̍h lī-sek; lâng ia̍h bô ēng gûn chioh góa, lâi the̍h lī-sek; chóng-sī lâng lóng chiù-chó͘ góa.

11耶和華講，我真正beh堅固你，hō͘你得tio̍h福氣；災厄苦難臨到ê時，我真正beh hō͘對敵求你。Iâ-hô-hoa kóng, Góa chin-chiàⁿ beh kian-kò͘ lí, hō͘ lí tit-tio̍h hok-khì; chai-ē khó͘-lān lîm-kàu ê sî, Góa chin-chiàⁿ beh hō͘ tùi-te̍k kiû lí.

12鐵，就是北方ê鐵，kap銅，人kiám會at折伊mah？Thih, chiū-sī pak-hng ê thih, kap tâng, lâng kiám ōe at-chi̍h--i mah?

13因為你ê罪惡，我beh tī你ê 四境內hō͘你ê貨財寶物白白hō͘人搶去。In-ūi lí ê chōe-ok, Góa beh tī lí ê sì-kéng-lāi hō͘ lí ê hè-châi pó-mi̍h pe̍h-pe̍h hō͘ lâng chhiúⁿ--khì.

14我亦beh hō͘對敵帶in到你所m̄-bat ê地；因為我tī受氣中有發出火，beh kā lín燒lio去。Góa ia̍h beh hō͘ tùi-te̍k tòa in kàu lí só͘ m̄-bat ê tōe; in-ūi Góa tī siū-khì-tiong ū hoat-chhut hé, beh kā lín sio-lio--khì.

15耶和華ah，你知，求你記念我，眷顧我，kā我報冤仇tī hiah-ê窘迫我ê；你寬容ê時，m̄-thang掠我去；tio̍h知我為tio̍h你ê緣故受凌辱。Iâ-hô-hoa ah, Lí chai, kiû Lí kì-liām góa, koàn-kò͘ góa, kā góa pò oan-siû tī hiah ê khún-pek góa ê; Lí khoan-iông ê sî, m̄-thang lia̍h góa khì; tio̍h chai góa ūi-tio̍h Lí ê iân-kò͘ siū lêng-jio̍k.

16萬軍ê上帝耶和華ah，我得tio̍h你ê話就食伊；你ê話tī我是做我心內ê歡喜快樂；因為我是稱做屬你ê名ê。Bān-kun ê Siōng-tè Iâ-hô-hoa ah, góa tit-tio̍h Lí ê ōe chiū chia̍h--i; Lí ê ōe tī góa sī chòe góa sim-lāi ê hoaⁿ-hí khoài-lo̍k; in-ūi góa sī chheng-chòe sio̍k Lí ê miâ--ê.

17我無坐tī宴樂ê人ê會中，來快樂；我因為你ê感動，家己靜靜坐；因為你用受氣充滿我。Góa bô chē-tī iàn-lo̍k ê lâng ê hōe-tiong, lâi khoài-lo̍k; góa in-ūi Lí ê kám-tōng, ka-kī chēng-chēng chē; in-ūi Lí ēng siū-khì chhiong-móa góa.

18我ê痛苦怎樣久長無soah？我ê傷怎樣bōe醫得，醫bōe好ah？你款待我kiám beh親像欺騙ê溪，靠bōe住ê水ah？Góa ê thòng-khó͘ cháiⁿ-iūⁿ kú-tn̂g bô soah? góa ê siong cháiⁿ-iūⁿ bōe-i--tit, i-bōe-hó ah? Lí khoán-thāi góa kiám beh chhin-chhiūⁿ khi-phiàn ê khoe, khò-bōe-chū ê chúi ah?

19所以耶和華án-ni講，你若倒tńg來，我就beh hō͘你倒tńg來khiā tī我ê面前；你若tùi下賤ê中間揀寶貴ê出來，你就beh做親像我ê嘴；in的確beh歸向你，總是你m̄-thang歸ǹg in。Só͘-í Iâ-hô-hoa án-ni kóng, Lí nā tò-tńg--lâi, Góa chiū beh hō͘ lí tò-tńg--lâi khiā tī Góa ê bīn-chêng; lí nā tùi hā-chiān ê tiong-kan kéng pó-kùi--ê chhut-lâi, lí chiū beh chòe chhin-chhiūⁿ Góa ê chhùi; in tek-khak beh kui-ǹg lí, chóng-sī lí m̄-thang kui-ǹg in.

20我beh hō͘你對tī chit-ê百姓成做堅固ê銅牆；in beh攻擊你，總是bōe 贏你，因為我kap你tī-teh，beh拯救你，牽救你；這是耶和華講ê。Góa beh hō͘ lí tùi tī chit ê peh-sìⁿ chiâⁿ-chòe kian-kò͘ ê tâng chhiûⁿ; in beh kong-kek lí, chóng-sī bōe iâⁿ lí, in-ūi Góa kap lí tī-teh, beh chín-kiù lí, khan-kiù lí; che sī Iâ-hô-hoa kóng--ê.

21我beh牽救你脫離pháiⁿ人ê手，救贖你脫離強暴ê人ê手頭。Góa beh khan-kiù lí thoat-lī pháiⁿ-lâng ê chhiú, kiù-sio̍k lí thoat-lī kiông-pō ê lâng ê chhiú-thâu.