1耶和華對我講，雖然有摩西kap撒母耳khiā tī我ê面前，替in求，我ê心亦無眷顧chit-ê百姓；tio̍h趕in離開我ê面前，hō͘ in出去。Iâ-hô-hoa tùi góa kóng, Sui-jiân ū Mô͘-se kap Sat-bó͘-jíⁿ khiā tī Góa ê bīn-chêng, thòe in kiû, Góa ê sim ia̍h bô koàn-kò͘ chit ê peh-sìⁿ; tio̍h kóaⁿ in lī-khui Góa ê bīn-chêng, hō͘ in chhut--khì.

2In若對你講，阮tio̍h出去toh-lo̍h？你tio̍h kā in講，耶和華án-ni講，該死ê tio̍h死；該hō͘刀thâi-ê，tio̍h hō͘刀thâi；該tú-tio̍h飢荒ê，tio̍h tú-tio̍h飢荒；該hō͘人掠ê，tio̍h hō͘人掠。In nā tùi lí kóng, Goán tio̍h chhut-khì toh-lo̍h? lí tio̍h kā in kóng, Iâ-hô-hoa án-ni kóng, Kai sí--ê tio̍h sí; kai hō͘ to thâi--ê, tio̍h hō͘ to thâi; kai tú-tio̍h ki-hng--ê, tio̍h tú-tio̍h ki-hng; kai hō͘ lâng lia̍h--ê, tio̍h hō͘ lâng lia̍h.

3耶和華koh講，我tiau-chhoân四項來辦in；就是刀來thâi-in，狗來拖in，空中ê鳥，地上ê野獸，食來滅in。Iâ-hô-hoa koh kóng, Góa tiau-chhoân sì-hāng lâi pān--in; chiū-sī to lâi thâi--in, káu lâi thoa--in, khong-tiong ê chiáu, tōe-chiūⁿ ê iá-siù, chia̍h lâi bia̍t in.

4Koh beh hō͘ in 流落tī天下萬國中；lóng是因為猶大王Hi-se-ka ê kiáⁿ Má-ná-se tī耶路撒冷所行ê事。Koh beh hō͘ in liû-lo̍h tī thiⁿ-ē bān-kok tiong; lóng sī in-ūi Iû-tāi ông Hi-se-ka ê kiáⁿ Má-ná-se tī Iâ-lō͘-sat-léng só͘ kiâⁿ ê sū.

5耶路撒冷ah，是誰可憐你ah？是誰為你悲傷ah？是誰 oa̍t-tńg身問你平安無？Iâ-lō͘-sat-léng ah, chī-chūi khó-lîn lí ah? chī-chūi ūi lí pi-siong ah? chī-chūi oa̍t-tńg-sin mn̄g lí pêng-an--bô?

6耶和華講，你棄絕我，oa̍t-tńg身退後；因為án-ni，我伸手攻擊你，毀壞你；我憐憫你到厭。Iâ-hô-hoa kóng, Lí khì-choa̍t Góa, oa̍t-tńg-sin thè-āu; in-ūi án-ni, Góa chhun-chhiú kong-kek lí, húi-hoāi lí; Góa lîn-bín lí kàu ià.

7我tī境內ta̍k ê城門口，用簸箕簸in；我絕in ê後嗣，我滅我ê百姓，in猶原無oa̍t-tńg離開in ê路。Góa tī kéng-lāi ta̍k ê siâⁿ mn̂g-kháu, ēng pòa-ki pòa--in; Góa choa̍t in ê hō͘-sû, Góa bia̍t Góa ê peh-sìⁿ, in iû-goân bô oa̍t-tńg lī-khui in ê lō͘.

8In ê寡婦加添tī我ê面前，比海沙khah-chōe；我hō͘殘害ê中晝來，攻擊少年人ê老母；hō͘痛苦驚惶忽然到伊ê身上。In ê kóaⁿ-hū ke-thiⁿ tī Góa ê bīn-chêng, pí hái-soa khah-chōe; Góa hō͘ chân-hāi--ê tiong-tàu lâi, kong-kek siàu-liân lâng ê lāu-bú; hō͘ thòng-khó͘ kiaⁿ-hiâⁿ hut-jiân kàu i ê sin-chiūⁿ.

9生七個kiáⁿ ê婦人人，衰lám氣斷；當頭白日，伊ê日頭忽然落，伊漏氣見笑；所chhun ê百姓，我beh tī in ê對敵ê面前，交hō͘刀劍；這是耶和華講ê。Siⁿ chhit ê kiáⁿ ê hū-jîn-lâng, soe-lám khùi-tn̄g; tng-thâu pe̍h-ji̍t, i ê ji̍t-thâu hut-jiân lo̍h, i làu-khùi kiàn-siàu; só͘ chhun ê peh-sìⁿ, Góa beh tī in ê tùi-te̍k ê bīn-chêng, kau hō͘ to-kiàm; che sī Iâ-hô-hoa kóng--ê.

10我ê老母ah，我有災厄；因為你生我做一個kap全地相爭辯計較ê人；我平素無用銀借人，來the̍h利息；人亦無用銀借我，來the̍h利息；總是人lóng咒詛我。Góa ê lāu-bú ah, góa ū chai-ē; in-ūi lí siⁿ góa chòe chi̍t-ê kap choân-tōe saⁿ cheng-piān kè-kàu ê lâng; góa pêng-sò͘ bô ēng gûn chioh lâng, lâi the̍h lī-sek; lâng ia̍h bô ēng gûn chioh góa, lâi the̍h lī-sek; chóng-sī lâng lóng chiù-chó͘ góa.

11耶和華講，我真正beh堅固你，hō͘你得tio̍h福氣；災厄苦難臨到ê時，我真正beh hō͘對敵求你。Iâ-hô-hoa kóng, Góa chin-chiàⁿ beh kian-kò͘ lí, hō͘ lí tit-tio̍h hok-khì; chai-ē khó͘-lān lîm-kàu ê sî, Góa chin-chiàⁿ beh hō͘ tùi-te̍k kiû lí.

12鐵，就是北方ê鐵，kap銅，人kiám會at折伊mah？Thih, chiū-sī pak-hng ê thih, kap tâng, lâng kiám ōe at-chi̍h--i mah?

13因為你ê罪惡，我beh tī你ê 四境內hō͘你ê貨財寶物白白hō͘人搶去。In-ūi lí ê chōe-ok, Góa beh tī lí ê sì-kéng-lāi hō͘ lí ê hè-châi pó-mi̍h pe̍h-pe̍h hō͘ lâng chhiúⁿ--khì.

14我亦beh hō͘對敵帶in到你所m̄-bat ê地；因為我tī受氣中有發出火，beh kā lín燒lio去。Góa ia̍h beh hō͘ tùi-te̍k tòa in kàu lí só͘ m̄-bat ê tōe; in-ūi Góa tī siū-khì-tiong ū hoat-chhut hé, beh kā lín sio-lio--khì.

15耶和華ah，你知，求你記念我，眷顧我，kā我報冤仇tī hiah-ê窘迫我ê；你寬容ê時，m̄-thang掠我去；tio̍h知我為tio̍h你ê緣故受凌辱。Iâ-hô-hoa ah, Lí chai, kiû Lí kì-liām góa, koàn-kò͘ góa, kā góa pò oan-siû tī hiah ê khún-pek góa ê; Lí khoan-iông ê sî, m̄-thang lia̍h góa khì; tio̍h chai góa ūi-tio̍h Lí ê iân-kò͘ siū lêng-jio̍k.

16萬軍ê上帝耶和華ah，我得tio̍h你ê話就食伊；你ê話tī我是做我心內ê歡喜快樂；因為我是稱做屬你ê名ê。Bān-kun ê Siōng-tè Iâ-hô-hoa ah, góa tit-tio̍h Lí ê ōe chiū chia̍h--i; Lí ê ōe tī góa sī chòe góa sim-lāi ê hoaⁿ-hí khoài-lo̍k; in-ūi góa sī chheng-chòe sio̍k Lí ê miâ--ê.

17我無坐tī宴樂ê人ê會中，來快樂；我因為你ê感動，家己靜靜坐；因為你用受氣充滿我。Góa bô chē-tī iàn-lo̍k ê lâng ê hōe-tiong, lâi khoài-lo̍k; góa in-ūi Lí ê kám-tōng, ka-kī chēng-chēng chē; in-ūi Lí ēng siū-khì chhiong-móa góa.

18我ê痛苦怎樣久長無soah？我ê傷怎樣bōe醫得，醫bōe好ah？你款待我kiám beh親像欺騙ê溪，靠bōe住ê水ah？Góa ê thòng-khó͘ cháiⁿ-iūⁿ kú-tn̂g bô soah? góa ê siong cháiⁿ-iūⁿ bōe-i--tit, i-bōe-hó ah? Lí khoán-thāi góa kiám beh chhin-chhiūⁿ khi-phiàn ê khoe, khò-bōe-chū ê chúi ah?

19所以耶和華án-ni講，你若倒tńg來，我就beh hō͘你倒tńg來khiā tī我ê面前；你若tùi下賤ê中間揀寶貴ê出來，你就beh做親像我ê嘴；in的確beh歸向你，總是你m̄-thang歸ǹg in。Só͘-í Iâ-hô-hoa án-ni kóng, Lí nā tò-tńg--lâi, Góa chiū beh hō͘ lí tò-tńg--lâi khiā tī Góa ê bīn-chêng; lí nā tùi hā-chiān ê tiong-kan kéng pó-kùi--ê chhut-lâi, lí chiū beh chòe chhin-chhiūⁿ Góa ê chhùi; in tek-khak beh kui-ǹg lí, chóng-sī lí m̄-thang kui-ǹg in.

20我beh hō͘你對tī chit-ê百姓成做堅固ê銅牆；in beh攻擊你，總是bōe 贏你，因為我kap你tī-teh，beh拯救你，牽救你；這是耶和華講ê。Góa beh hō͘ lí tùi tī chit ê peh-sìⁿ chiâⁿ-chòe kian-kò͘ ê tâng chhiûⁿ; in beh kong-kek lí, chóng-sī bōe iâⁿ lí, in-ūi Góa kap lí tī-teh, beh chín-kiù lí, khan-kiù lí; che sī Iâ-hô-hoa kóng--ê.

21我beh牽救你脫離pháiⁿ人ê手，救贖你脫離強暴ê人ê手頭。Góa beh khan-kiù lí thoat-lī pháiⁿ-lâng ê chhiú, kiù-sio̍k lí thoat-lī kiông-pō ê lâng ê chhiú-thâu.

1耶和華ê話koh臨到我講，Iâ-hô-hoa ê ōe koh lîm-kàu góa kóng,

2你tī chit所在m̄-thang娶bó͘，生kiáⁿ cha-bó͘-kiáⁿ。Lí tī chit só͘-chāi m̄-thang chhōa-bó͘, siⁿ kiáⁿ cha-bó͘-kiáⁿ.

3因為論到chit所在所生ê kiáⁿ cha-bó͘-kiáⁿ，koh論到chit-ê國內生in ê父母，耶和華án-ni講：In-ūi lūn-kàu chit só͘-chāi só͘ siⁿ ê kiáⁿ cha-bó͘-kiáⁿ, koh lūn-kàu chit ê kok-lāi siⁿ--in ê pē-bú, Iâ-hô-hoa án-ni kóng:

4In beh tú-tio̍h重病來死；無人啼哭；bōe得tio̍h埋葬；beh tī地上親像糞埽；koh beh tùi刀劍，tùi飢荒來滅無；in ê身屍beh hō͘空中ê飛鳥，kap地上ê野獸做食物。In beh tú-tio̍h tāng-pīⁿ lâi sí; bô lâng thî-khàu; bōe tit-tio̍h bâi-chòng; beh tī tōe-chiūⁿ chhin-chhiūⁿ pùn-sò; koh beh tùi to-kiàm, tùi ki-hng lâi bia̍t-bô; in ê sin-si beh hō͘ khong-tiong ê pe-chiáu, kap tōe-chiūⁿ ê iá-siù chòe chia̍h-mi̍h.

5耶和華án-ni講，莫得入喪事ê家，莫得去kā伊啼哭，亦莫得為in悲傷；因為我將我ê平安，就是恩典kap憐憫，tùi chit-ê百姓搶去；這是耶和華講ê。Iâ-hô-hoa án-ni kóng, Bo̍h-tit ji̍p song-sū ê ke, bo̍h-tit khì kā i thî-khàu, ia̍h bo̍h-tit ūi in pi-siong; in-ūi Góa chiong Góa ê pêng-an, chiū-sī un-tián kap lîn-bín, tùi chit ê peh-sìⁿ chhiúⁿ--khì; che sī Iâ-hô-hoa kóng--ê.

6Tùi大到細，beh死tī chit-ê地方；bōe得tio̍h埋葬；無人為in啼哭，亦無人為in割肉，剃光頭。Tùi tōa kàu sòe, beh sí tī chit ê tōe-hng; bōe tit-tio̍h bâi-chòng; bô lâng ūi in thî-khàu, ia̍h bô lâng ūi in koah-bah, thì kng thâu.

7In tú-tio̍h喪事，無人為in peh餅，因為死人來安慰in；in死父死母，亦無人用安慰ê杯hō͘ in lim。In tú-tio̍h song-sū, bô lâng ūi in peh-piáⁿ, in-ūi sí-lâng lâi an-ùi in; in sí-pē sí-bú, ia̍h bô lâng ēng an-ùi ê poe hō͘ in lim.

8你亦m̄-thang入宴樂ê家，kap in坐teh lim食。Lí ia̍h m̄-thang ji̍p iàn-lo̍k ê ke, kap in chē-teh lim-chia̍h.

9因為萬軍ê耶和華，以色列ê上帝，án-ni講，Lín iáu活teh ê日，tī lín ê目前，我beh hō͘歡喜ê聲，快樂ê聲，新kiáⁿ婿ê聲，新娘ê聲tī chit所在lóng soah。In-ūi bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lín iáu oa̍h-teh ê ji̍t, tī lín ê ba̍k-chêng, Góa beh hō͘ hoaⁿ-hí ê siaⁿ, khoài-lo̍k ê siaⁿ, sin-kiáⁿ-sài ê siaⁿ, sin-niû ê siaⁿ tī chit só͘-chāi lóng soah.

10你將chiah-ê一切ê話指示chit-ê百姓；in對你講，耶和華啥事講，Beh降落chit-ê大災厄攻擊阮ah？阮有甚麼罪過？阮有甚麼罪過，得罪阮ê上帝耶和華ah？Lí chiong chiah ê it-chhè ê ōe chí-sī chit ê peh-sìⁿ; in tùi lí kóng, Iâ-hô-hoa siáⁿ-sū kóng, Beh kàng-lo̍h chit ê tōa chai-ē kong-kek goán ah? goán ū sím-mi̍h chōe-kòa? goán ū sím-mi̍h chōe-kòa, tek-chōe goán ê Siōng-tè Iâ-hô-hoa ah?

11你tio̍h kā in講，耶和華講，因為lín ê列祖放sak我，去thàn別號ê上帝，服事in，跪拜in；Lí tio̍h kā in kóng, Iâ-hô-hoa kóng, In-ūi lín ê lia̍t-chó͘ pàng-sak Góa, khì thàn pa̍t-hō ê siōng-tè, ho̍k-sāi in, kūi-pài in;

12koh放sak我，無守我ê律法；koh lín行pháiⁿ，比lín ê列祖khah-pháiⁿ；看ah，lín ta̍k人thàn pháiⁿ心ê剛硬去行；甚至無聽thàn我。koh pàng-sak Góa, bô siú Góa ê lu̍t-hoat; koh lín kiâⁿ-pháiⁿ, pí lín ê lia̍t-chó͘ khah-pháiⁿ; khòaⁿ ah, lín ta̍k-lâng thàn pháiⁿ-sim ê kong-ngī khì kiâⁿ; sīm-chì bô thiaⁿ-thàn Góa.

13所以我beh趕lín出chit所在，到lín以及lín ê列祖所m̄-bat ê地；tī-hia lín beh日暝服事別號ê上帝；tī-hia我無beh施恩hō͘ lín。Só͘-í Góa beh kóaⁿ lín chhut chit só͘-chāi, kàu lín í-ki̍p lín ê lia̍t-chó͘ só͘ m̄-bat ê tōe; tī-hia lín beh ji̍t-mî ho̍k-sāi pa̍t-hō ê siōng-tè; tī-hia Góa bô beh si-un hō͘ lín.

14耶和華講，看ah，日子beh到，人kí耶和華ê永活來chiù-chōa，無beh講，祂是chhōa以色列ê後裔tùi埃及地上來ê；Iâ-hô-hoa kóng, Khòaⁿ ah, ji̍t-chí beh kàu, lâng kí Iâ-hô-hoa ê éng-oa̍h lâi chiù-chōa, bô beh kóng, I sī chhōa Í-sek-lia̍t ê hō͘-è tùi Ai-ki̍p tōe chiūⁿ--lâi-ê;

15in kí耶和華ê永活來chiù-chōa，是beh講，祂chhōa以色列ê後裔tùi北方ê地，亦tùi見若祂所趕in到ê地上來；koh我beh chhōa in tò來in ê地，就是我前所賞賜in ê列祖ê。in kí Iâ-hô-hoa ê éng-oa̍h lâi chiù-chōa, sī beh kóng, I chhōa Í-sek-lia̍t ê hō͘-è tùi pak-hng ê tōe, ia̍h tùi kìⁿ-nā I só͘ kóaⁿ in kàu ê tōe chiūⁿ--lâi; koh Góa beh chhōa in tò-lâi in ê tōe, chiū-sī Góa chêng só͘ siúⁿ-sù in ê lia̍t-chó͘--ê.

16耶和華講，看ah，我beh召chōe-chōe掠魚ê來掠in；然後我beh召chōe-chōe phah獵ê，tùi chiah-ê山，chiah-ê山頭，chiah-ê石孔，來phah in。Iâ-hô-hoa kóng, Khòaⁿ ah, Góa beh tiàu chōe-chōe lia̍h-hî--ê lâi lia̍h in; jiân-āu Góa beh tiàu chōe-chōe phah-la̍h--ê, tùi chiah ê soaⁿ, chiah ê soaⁿ-thâu, chiah ê chio̍h-khang, lâi phah in.

17因為我ê目睭teh看in一切ê行做；in無遮蓋tī我ê面前；in ê罪過亦無khǹg密tī我ê目睭前。In-ūi Góa ê ba̍k-chiu teh khòaⁿ in it-chhè ê kiâⁿ-chòe; in bô jia-khàm tī Góa ê bīn-chêng; in ê chōe-kòa ia̍h bô khǹg-ba̍t tī Góa ê ba̍k-chiu-chêng.

18我beh事先家己報應in ê罪過kap罪惡；因為in用thang厭賤ê ê身屍phah lâ-sâm我ê土地；koh用in可惡ê物充滿我ê產業。Góa beh tāi-seng ka-kī pò-èng in ê chōe-kòa kap chōe-ok; in-ūi in ēng thang iàm-chiān--ê ê sin-si phah lâ-sâm Góa ê thó͘-tōe; koh ēng in khó-ò͘ⁿ ê mi̍h chhiong-móa Góa ê sán-gia̍p.

19耶和華ah，你是我ê氣力，是我ê衛所；tī苦難ê日，是我逃閃ê所在；列國ê人beh tùi地極來你chia，講，有影ah，阮ê列祖所承接ê不過是虛假，其中無有利益ê。Iâ-hô-hoa ah, Lí sī Góa ê khùi-la̍t, sī Góa ê ōe-só͘; tī khó͘-lān ê ji̍t, sī góa tô-siám ê só͘-chāi; lia̍t-kok ê lâng beh tùi tōe-ke̍k lâi lí chia, kóng, Ū-iáⁿ ah, goán ê lia̍t-chó͘ só͘ sêng-chiap-ê put-kò sī hu-ké, kî-tiong bô ū lī-ek--ê.

20人kiám thang為家己造上帝mah？in實在m̄是上帝。Lâng kiám thang ūi ka-kī chō siōng-tè mah? in si̍t-chāi m̄-sī Siōng-tè.

21看ah，我將只chit-pái hō͘ in知；我beh hō͘ in知我ê手段kap我ê能力；in就beh知我ê名是耶和華。Khòaⁿ ah, Góa chiong chí-chit-pái hō͘ in chai; Góa beh hō͘ in chai Góa ê chhiú-tōaⁿ kap Góa ê lêng-le̍k; in chiū beh chai Góa ê miâ sī Iâ-hô-hoa.

1猶大ê罪是用鐵筆，用鑽石筆尾記ê；就是刻tī in ê心ê碑，壇ê角。Iû-tāi ê chōe sī ēng thih-pit, ēng soān-chio̍h pit-bé kì--ê; chiū-sī khek tī in ê sim ê pi, tôaⁿ ê kak.

2In ê kiáⁿ記念in高山頂，青翠樹邊ê壇，kap偶像。In ê kiáⁿ kì-liām in koâiⁿ-soaⁿ-téng, chhiⁿ-chhùi chhiū-piⁿ ê tôaⁿ, kap ngó͘-siōng.

3我田裡ê山ah，我beh因為你tī四境內所犯ê罪，將你ê貨物，財寶kap山頭ê壇，lóng hō͘人搶去。Góa chhân--nih ê soaⁿ ah, Góa beh in-ūi lí tī sì-kéng-lāi só͘ hoān ê chōe, chiong lí ê hè-mi̍h, châi-pó kap soaⁿ-thâu ê tôaⁿ, lóng hō͘ lâng chhiúⁿ-khì.

4Koh你為tio̍h本身，beh將我所賞賜ê產業放hē-teh；我亦beh hō͘你tī所m̄-bat ê地服事你ê對敵；因為lín激我受氣ê火，直直to̍h到永遠。Koh lí ūi-tio̍h pún-sin, beh chiong Góa só͘ siúⁿ-sù ê sán-gia̍p pàng hē-teh; Góa ia̍h beh hō͘ lí tī só͘ m̄-bat ê tōe ho̍k-sāi lí ê tùi-te̍k; in-ūi lín kek Góa siū-khì ê hé, ti̍t-ti̍t to̍h kàu éng-oán.

5耶和華án-ni講，見若óa靠人，用肉體做伊ê手，伊ê心離開耶和華ê，hit號人受咒詛。Iâ-hô-hoa án-ni kóng, Kìⁿ-nā óa-khò lâng, ēng jio̍k-thé chòe i ê chhiú, i ê sim lī-khui Iâ-hô-hoa--ê, hit-hō lâng siū chiù-chó͘.

6因為伊beh親像曠野ê杜松；福氣到ê時，伊看bōe-tio̍h；beh tiàm tī沙漠乾燥ê所在，無人khiā起ê鹹地。In-ūi i beh chhin-chhiūⁿ khòng-iá ê tō͘-siông; hok-khì kàu ê sî, i khòaⁿ-bōe-tio̍h; beh tiàm tī soa-bô͘ ta-sò ê só͘-chāi, bô lâng khiā-khí ê kiâm-tōe.

7Óa靠耶和華，掠耶和華做伊所óa靠ê hit號人有福氣。Óa-khò Iâ-hô-hoa, lia̍h Iâ-hô-hoa chòe i só͘ óa-khò--ê hit-hō lâng ū hok-khì.

8伊beh親像水邊所栽ê樹，soan伊ê根tī河邊；炎熱到亦無驚；葉猶原beh青翠；tī乾燥ê年，lóng無掛慮；koh結果子無soah。I beh chhin-chhiūⁿ chúi-piⁿ só͘ chai ê chhiū, soan i ê kun tī hô-piⁿ; iām-jia̍t kàu ia̍h bô kiaⁿ; hio̍h iû-goân beh chhiⁿ-chhùi; tī ta-sò ê nî, lóng bô khòa-lū; koh kiat ké-chí bô soah.

9人ê心比萬物khah詭譎，pháiⁿ到極頭；是誰會知伊ah？Lâng ê sim pí bān-mi̍h khah khúi-khiat, pháiⁿ kàu ke̍k-thâu; chī-chūi ōe chai i ah?

10我耶和華是鑑察人ê心；試驗人ê臟腑ê；beh照ta̍k人所行ê，kap伊做tāi-chì ê結果，來報應伊。Góa Iâ-hô-hoa sī kàm-chhat lâng ê sim; chhì-giām lâng ê chōng-hú--ê; beh chiàu ta̍k-lâng só͘ kiâⁿ--ê, kap i chòe tāi-chì ê kiat-kó, lâi pò-èng i.

11人無照正道得tio̍h錢，親像鷓鴣孵m̄是伊生ê卵；到中年，hit-ê錢lóng beh離開伊，伊ê結局成做愚戇。Lâng bô chiàu chèng-tō tit-tio̍h chîⁿ, chhin-chhiūⁿ chià-ko͘ pū m̄-sī i siⁿ ê nn̄g; kàu tiong-liân, hit ê chîⁿ lóng beh lī-khui i, i ê kiat-kio̍k chiâⁿ-chòe gû-gōng.

12阮ê聖所是榮光ê寶座；tùi起頭安置tī高ê所在。Goán ê sèng-só͘ sī êng-kng ê pó-chō; tùi khí-thâu an-tì tī koâiⁿ ê só͘-chāi.

13以色列所ǹg望ê耶和華ah，見若棄sak你ê，lóng beh見笑；見若離開你ê，in ê名beh記tī土裡；因為in棄sak耶和華，活水ê源頭。Í-sek-lia̍t só͘ ǹg-bāng ê Iâ-hô-hoa ah, kìⁿ-nā khì-sak Lí--ê, lóng beh kiàn-siàu; kìⁿ-nā lī-khui Lí--ê, in ê miâ beh kì tī thô͘--nih; in-ūi in khì-sak Iâ-hô-hoa, oa̍h-chúi ê goân-thâu.

14耶和華ah，求你醫治我，我就得tio̍h醫好；拯救我，我就得tio̍h救；因為你是我所o-ló-ê。Iâ-hô-hoa ah, kiû Lí i-tī góa, góa chiū tit-tio̍h i-hó; chín-kiù góa, góa chiū tit-tio̍h kiù; in-ūi Lí sī góa só͘ o-ló--ê.

15看ah，人對我講，耶和華ê話tī toh-lo̍h？taⁿ tio̍h hō͘伊來。Khòaⁿ ah, lâng tùi góa kóng, Iâ-hô-hoa ê ōe tī toh-lo̍h? taⁿ tio̍h hō͘ i lâi.

16論到我，我無緊緊棄sak牧者ê職，m̄ tè你；災厄到ê日，m̄是我所ài；這是你所知，我ê嘴所講ê，lóng tī你ê面前。Lūn-kàu góa, góa bô kín-kín khì-sak bo̍k-chiá ê chit, m̄ tè--Lí; chai-ē kàu ê ji̍t, m̄-sī góa só͘ ài; che sī Lí só͘ chai, góa ê chhùi só͘ kóng--ê, lóng tī Lí ê bīn-chêng.

17莫得做hō͘我驚惶ê；當患難ê日。你做我逃閃ê所在。Bo̍h-tit chòe hō͘ góa kiaⁿ-hiâⁿ-ê; tng hoān-lān ê ji̍t. Lí chòe góa tô-siám ê só͘-chāi.

18Hō͘ hiah-ê窘迫我ê見笑，莫得hō͘我見笑；hō͘ in驚惶，莫得hō͘我驚惶；hō͘災厄ê日臨到in，用加倍ê毀壞來毀壞in。Hō͘ hiah ê khún-pek góa--ê kiàn-siàu, bo̍h-tit hō͘ góa kiàn-siàu; hō͘ in kiaⁿ-hiâⁿ, bo̍h-tit hō͘ góa kiaⁿ-hiâⁿ; hō͘ chai-ē ê ji̍t lîm-kàu in, ēng ka-pē ê húi-hoāi lâi húi-hoāi in.

19耶和華對我án-ni講，你去khiā tī眾百姓ê門，就是猶大列王tùi-hia入，tùi-hia出ê；koh khiā tī耶路撒冷chiah-ê門。Iâ-hô-hoa tùi góa án-ni kóng, Lí khì khiā tī chèng peh-sìⁿ ê mn̂g, chiū-sī Iû-tāi lia̍t-ông tùi-hia ji̍p, tùi-hia chhut--ê; koh khiā tī Iâ-lō͘-sat-léng chiah ê mn̂g.

20對in講，Lín chiah-ê猶大王，kap猶大眾人，kap耶路撒冷一切khiā起ê百姓，凡若tùi chiah-ê門入ê，lóng tio̍h聽耶和華ê話。Tùi in kóng, Lín chiah ê Iû-tāi ông, kap Iû-tāi chèng-lâng, kap Iâ-lō͘-sat-léng it-chhè khiā-khí ê peh-sìⁿ, hoān-nā tùi chiah ê mn̂g ji̍p--ê, lóng tio̍h thiaⁿ Iâ-hô-hoa ê ōe.

21耶和華án-ni講，Lín tio̍h家己謹慎，莫得tī安歇日擔擔，也莫得運入耶路撒冷chiah-ê城門。Iâ-hô-hoa án-ni kóng, Lín tio̍h ka-kī kín-sīn, bo̍h-tit tī an-hioh-ji̍t taⁿ-tàⁿ, iā bo̍h-tit ūn ji̍p Iâ-lō͘-sat-léng chiah ê siâⁿ-mn̂g.

22亦莫得tī安歇日tùi家內擔擔出去，無論甚麼工lóng m̄-thang做；獨獨tio̍h掠安歇日做聖日，照我平素吩咐lín ê列祖ê。Ia̍h bo̍h-tit tī an-hioh-ji̍t tùi ke-lāi taⁿ-tàⁿ chhut-khì, bô-lūn sím-mi̍h kang lóng m̄-thang chòe; to̍k-to̍k tio̍h lia̍h an-hioh-ji̍t chòe sèng-ji̍t, chiàu Góa pêng-sò͘ hoan-hù lín ê lia̍t-chó͘--ê.

23總是in m̄聽thàn，m̄俯耳孔；就是硬in ê頷頸，致到bōe聽，bōe受教示。Chóng-sī in m̄ thiaⁿ-thàn, m̄ àⁿ hī-khang; chiū-sī ngī in ê ām-kún, tì-kàu bōe thiaⁿ, bōe siū kà-sī.

24耶和華講，Lín若留心聽thàn我，tī安歇日無擔甚麼擔入chit-ê城chiah-ê門；獨獨掠安歇日做聖日，tī hit日lóng無做甚麼工；Iâ-hô-hoa kóng, Lín nā liû-sim thiaⁿ-thàn Góa, tī an-hioh-ji̍t bô taⁿ sím-mi̍h tàⁿ ji̍p chit ê siâⁿ chiah ê mn̂g; to̍k-to̍k lia̍h an-hioh-ji̍t chòe sèng-ji̍t, tī hit-ji̍t lóng bô chòe sím-mi̍h kang;

25就有君王、王親，坐大衛ê寶座ê，in kap in ê王親kap猶大人kap耶路撒冷khiā起ê百姓，或是坐車，或是騎馬，入chit-ê城chiah-ê門；koh chit-ê城beh留到永遠。chiū ū kun-ông, ông-chhin, chē Tāi-pi̍t ê pó-chō--ê, in kap in ê ông-chhin kap Iû-tāi lâng kap Iâ-lō͘-sat-léng khiā-khí ê peh-sìⁿ, he̍k-sī chē-chhia, he̍k-sī khiâ-bé, ji̍p chit ê siâⁿ chiah ê mn̂g; koh chit ê siâⁿ beh lâu kàu éng-oán.

26亦beh有人tùi猶大chiah-ê城。Kap耶路撒冷四圍ê所在，tùi便雅憫地，平洋、山地，kap南方ê地來；lóng帶燒祭，ta̍k樣ê祭，素祭，kap乳香，kap謝恩祭，到耶和華ê厝。Ia̍h beh ū lâng tùi Iû-tāi chiah ê siâⁿ. kap Iâ-lō͘-sat-léng sì-ûi ê só͘-chāi, tùi Piān-ngá-bín tōe, pîⁿ-iûⁿ, soaⁿ-tōe, kap lâm-hng ê tōe lâi; lóng tòa sio-chè, ta̍k-iūⁿ ê chè, sò͘-chè, kap jú-hiuⁿ, kap siā-un chè, kàu Iâ-hô-hoa ê chhù.

27Lín若m̄聽thàn我，m̄掠安歇日做聖日；猶原tī安歇日擔擔入耶路撒冷ta̍k ê門；我beh tī ta̍k ê門起火；chit-ê火亦beh燒毀耶路撒冷ê宮殿，bōe會phah-hoa。Lín nā m̄ thiaⁿ-thàn Góa, m̄ lia̍h an-hioh-ji̍t chòe sèng-ji̍t; iû-goân tī an-hioh-ji̍t taⁿ-tàⁿ ji̍p Iâ-lō͘-sat-léng ta̍k ê mn̂g; Góa beh tī ta̍k ê mn̂g khí hé; chit ê hé ia̍h beh sio-húi Iâ-lō͘-sat-léng ê kiong-tiān, bōe-ōe phah-hoa.