1Se-tí-ka王差Má-ki-ngá ê kiáⁿ Pa-si-hō͘-jíⁿ，kap祭司Má-se-ngá ê kiáⁿ Se-hoan-ngá，去見耶利米講，Se-tí-ka ông chhe Má-ki-ngá ê kiáⁿ Pa-si-hō͘-jíⁿ, kap chè-si Má-se-ngá ê kiáⁿ Se-hoan-ngá, khì kìⁿ Iâ-lī-bí kóng,

2巴比倫王Nî-pò͘-kah-nî-sat beh kap咱交戰；求你替阮問耶和華；kiám-chhái耶和華照祂奇妙ê所做款待咱；hō͘伊離開咱上去。hit時耶和華ê話臨到耶利米。Pa-pí-lûn ông Nî-pò͘-kah-nî-sat beh kap lán kau-chiàn; kiû lí thòe goán mn̄g Iâ-hô-hoa; kiám-chhái Iâ-hô-hoa chiàu I kî-biāu ê só͘ chòe khoán-thāi lán; hō͘ i lī-khui lán chiūⁿ--khì. Hit-sî Iâ-hô-hoa ê ōe lîm-kàu Iâ-lī-bí.

3耶利米對in講，Lín tio̍h án-ni kā Se-tí-ka講，Iâ-lī-bí tùi in kóng, Lín tio̍h án-ni kā Se-tí-ka kóng,

4耶和華以色列ê上帝án-ni講，看ah，我beh hō͘ lín所kia̍h ê軍器，就是lín tī城外kap巴比倫王，以及圍困lín ê Ka-le̍k-tí人，交戰ê軍器倒tńg來；koh beh hō͘ chiah-ê lóng聚集tī chit-ê城內。Iâ-hô-hoa Í-sek-lia̍t ê Siōng-tè án-ni kóng, Khòaⁿ ah, Góa beh hō͘ lín só͘ kia̍h ê kun-khì, chiū-sī lín tī siâⁿ-gōa kap Pa-pí-lûn ông, í-ki̍p ûi-khùn lín ê Ka-le̍k-tí lâng, kau-chiàn ê kun-khì tò-tńg--lâi; koh beh hō͘ chiah-ê lóng chū-chi̍p tī chit ê siâⁿ-lāi.

5Koh我tī懊惱、受氣、大痛恨ê中間，用伸出ê手，kap大權能ê手骨，親身攻擊lín。Koh Góa tī àu-náu, siū-khì, tōa thòng-hūn ê tiong-kan, ēng chhun-chhut ê chhiú, kap tōa koân-lêng ê chhiú-kut, chhin-sin kong-kek lín.

6Koh beh phah chit-ê城khiā起ê百姓，無論人kap cheng-siⁿ；in beh tú-tio̍h大瘟疫來死。Koh beh phah chit ê siâⁿ khiā-khí ê peh-sìⁿ, bô-lūn lâng kap cheng-siⁿ; in beh tú-tio̍h tōa un-e̍k lâi sí.

7以後我beh將猶大王Se-tí-ka，kap伊ê人臣百姓，就是tī chit-ê城內，tùi瘟疫、刀劍、飢荒所chhun-ê，lóng交tī巴比倫王Nî-pò͘-kah-nî-sat ê手，kap in ê對敵ê手，以及siàu想in ê性命ê人ê手；伊beh用刀thâi死in；無保惜，無可憐，無寬容；這是耶和華講ê。Í-āu Góa beh chiong Iû-tāi ông Se-tí-ka, kap i ê jîn-sîn peh-sìⁿ, chiū-sī tī chit ê siâⁿ-lāi, tùi un-e̍k, to-kiàm, ki-hng só͘ chhun--ê, lóng kau tī Pa-pí-lûn ông Nî-pò͘-kah-nî-sat ê chhiú, kap in ê tùi-te̍k ê chhiú, í-ki̍p siàu-siūⁿ in ê sìⁿ-miā ê lâng ê chhiú; i beh ēng to thâi-sí in; bô pó-sioh, bô khó-lîn, bô khoan-iông; che sī Iâ-hô-hoa kóng--ê.

8你tio̍h對chit-ê百姓講，耶和華án-ni講，看ah，我將活路死路排tī lín ê面前。Lí tio̍h tùi chit ê peh-sìⁿ kóng, Iâ-hô-hoa án-ni kóng, Khòaⁿ ah, Góa chiong oa̍h-lō͘ sí-lō͘ pâi tī lín ê bīn-chêng.

9Tiàm tī chit-ê城內ê，beh tùi刀劍，tùi飢荒，tùi瘟疫，來死；獨獨出去投降圍困lín ê Ka-le̍k-tí人ê，beh得tio̍h活，來拾tio̍h伊ê性命。Tiàm tī chit ê siâⁿ-lāi--ê, beh tùi to-kiàm, tùi ki-hng, tùi un-e̍k, lâi sí; to̍k-to̍k chhut-khì tâu-hâng ûi-khùn lín ê Ka-le̍k-tí lâng--ê, beh tit-tio̍h oa̍h, lâi khioh-tio̍h i ê sìⁿ-miā.

10耶和華講，我ê面定定ǹg chit-ê城，beh降災厄，m̄降福氣；chit-ê城beh交巴比倫王ê手；伊beh用火燒伊。Iâ-hô-hoa kóng, Góa ê bīn tiāⁿ-tiāⁿ ǹg chit ê siâⁿ, beh kàng chai-ē, m̄ kàng hok-khì; chit ê siâⁿ beh kau Pa-pí-lûn ông ê chhiú; i beh ēng hé sio--i.

11論到猶大王ê家，lín tio̍h聽耶和華ê話。Lūn-kàu Iû-tāi ông ê ke, lín tio̍h thiaⁿ Iâ-hô-hoa ê ōe.

12大衛ê家ah，耶和華án-ni講，Lín ta̍k早起tio̍h行公平；拯救受搶劫ê脫離強暴ê人ê手；驚了我ê受氣，因為lín所行ê pháiⁿ，來發作；親像火to̍h起來，甚至無人能phah-hoa。Tāi-pi̍t ê ke ah, Iâ-hô-hoa án-ni kóng, Lín ta̍k chá-khí tio̍h kiâⁿ kong-pêng; chín-kiù siū chhiúⁿ-kiap--ê thoat-lī kiông-pō ê lâng ê chhiú; kiaⁿ-liáu Góa ê siū-khì, in-ūi lín só͘ kiâⁿ ê pháiⁿ, lâi hoat-choh; chhin-chhiūⁿ hé to̍h--khí-lâi, sīm-chì bô lâng ōe phah-hoa.

13耶和華講，khiā起tī山谷，平洋，石磐頂ê百姓，lín講，Chī-chūi會落來攻擊阮？Chī-chūi會入阮khiā起ê所在ah？看ah，我kap lín做對敵。Iâ-hô-hoa kóng, Khiā-khí tī soaⁿ-kok, pîⁿ-iûⁿ, chio̍h-pôaⁿ-téng ê peh-sìⁿ, lín kóng, Chī-chūi ōe lo̍h--lâi kong-kek goán? Chī-chūi ōe ji̍p goán khiā-khí ê só͘-chāi ah? Khòaⁿ ah, Góa kap lín chòe tùi-te̍k.

14耶和華koh講，我beh照lín做tāi-chì ê結果刑罰lín；我亦beh hō͘火to̍h tī伊ê樹林內，燒毀伊ê四圍。Iâ-hô-hoa koh kóng, Góa beh chiàu lín chòe tāi-chì ê kiat-kó hêng-hoa̍t lín; Góa ia̍h beh hō͘ hé to̍h tī i ê chhiū-nâ-lāi, sio-húi i ê sì-ûi.

1耶和華án-ni講，你落去猶大王ê宮內；tī-hia講chit-ê話，講，Iâ-hô-hoa án-ni kóng, Lí lo̍h-khì Iû-tāi ông ê kiong-lāi; tī-hia kóng chit ê ōe, kóng,

2坐大衛寶座ê猶大王ah，你kap你ê人臣以及入chiah-ê門ê百姓，lóng tio̍h聽耶和華ê話。Chē Tāi-pi̍t pó-chō ê Iû-tāi ông ah, lí kap lí ê jîn-sîn í-ki̍p ji̍p chiah ê mn̂g ê peh-sìⁿ, lóng tio̍h thiaⁿ Iâ-hô-hoa ê ōe.

3耶和華án-ni講，Lín tio̍h行公平kap公義，拯救受搶奪ê脫離壓制人ê ê手；m̄-thang用強暴欺負出外人，kap孤兒寡婦；tī chit-ê所在亦m̄-thang 流無罪ê人ê血。Iâ-hô-hoa án-ni kóng, Lín tio̍h kiâⁿ kong-pêng kap kong-gī, chín-kiù siū chhiúⁿ-toa̍t--ê thoat-lī ap-chè lâng--ê ê chhiú; m̄-thang ēng kiông-pō khi-hū chhut-gōa lâng, kap ko͘-jî kóaⁿ-hū; tī chit ê só͘-chāi ia̍h m̄-thang lâu bô-chōe ê lâng ê huih.

4Lín若認真行chit-ê tāi-chì，就beh有坐大衛寶座ê王，伊kap伊ê人臣百姓，或是坐車，或是騎馬，入chit-ê厝ê門。Lín nā jīn-chin kiâⁿ chit ê tāi-chì, chiū beh ū chē Tāi-pi̍t pó-chō ê ông, i kap i ê jîn-sîn peh-sìⁿ, he̍k-sī chē-chhia, he̍k-sī khiâ-bé, ji̍p chit ê chhù ê mn̂g.

5Lín若m̄聽chiah-ê話，耶和華講，我kí本身來chiù-chōa，chit間厝beh變做拋荒。Lín nā m̄-thiaⁿ chiah ê ōe, Iâ-hô-hoa kóng, Góa kí pún-sin lâi chiù-chōa, chit keng chhù beh pìⁿ-chòe pha-hng.

6耶和華論到猶大王ê家án-ni講，我看你親像Ki-lia̍t，親像黎巴嫩ê尾溜；總是我的確hō͘你變做曠野，做無人khiā起ê城。Iâ-hô-hoa lūn-kàu Iû-tāi ông ê ke án-ni kóng, Góa khòaⁿ lí chhin-chhiūⁿ Ki-lia̍t, chhin-chhiūⁿ Lī-pa-lùn ê bé-liu; chóng-sī Góa tek-khak hō͘ lí pìⁿ-chòe khòng-iá, chòe bô lâng khiā-khí ê siâⁿ.

7我beh備辦行毀滅ê人，ta̍k-ê kia̍h ke-si攻擊你；in beh剉你施ōng好ê柏香樹，hiat落火。Góa beh pī-pān kiâⁿ húi-bia̍t ê lâng, ta̍k-ê kia̍h ke-si kong-kek lí; in beh chhò lí siōng-hó ê pek-hiuⁿ-chhiū, hiat-lo̍h hé.

8Chōe-chōe國ê人beh經過chit-ê城，ta̍k-ê相kap講，耶和華啥事án-ni款待chit-ê大城ah？Chōe-chōe kok ê lâng beh keng-kè chit ê siâⁿ, ta̍k-ê saⁿ-kap kóng, Iâ-hô-hoa siáⁿ-sū án-ni khoán-thāi chit ê tōa siâⁿ ah?

9In beh應講，是因為in棄sak耶和華in ê上帝ê約，服事敬拜別ê上帝。In beh ìn kóng, Sī in-ūi in khì-sak Iâ-hô-hoa in ê Siōng-tè ê iok, ho̍k-sāi kèng-pài pa̍t ê siōng-tè.

10莫得為tio̍h死人啼哭，莫得為tio̍h伊悲傷；tio̍h因為受遷徙ê人大大啼哭；因為伊bōe koh tò來，亦bōe koh見tio̍h伊ê本國。Bo̍h-tit ūi-tio̍h sí-lâng thî-khàu, bo̍h-tit ūi-tio̍h i pi-siong; tio̍h in-ūi siū chhian-sóa ê lâng tōa-tōa thî-khàu; in-ūi i bōe koh tò--lâi, ia̍h bōe koh kìⁿ-tio̍h i ê pún-kok.

11因為論到猶大王約西亞ê kiáⁿ Sa-liông，續接伊ê老父約西亞做王，後來離開chit-ê所在ê，耶和華有án-ni講，In-ūi lūn-kàu Iû-tāi ông Iok-se-a ê kiáⁿ Sa-liông, sòa-chiap i ê lāu-pē Iok-se-a chòe ông, āu-lâi lī-khui chit ê só͘-chāi--ê, Iâ-hô-hoa ū án-ni kóng,

12伊的確無koh tò來chia；就是beh死tī hō͘人掠去ê地方，無koh看見chit-ê地方。I tek-khak bô koh tò--lâi chia; chiū-sī beh sí tī hō͘ lâng lia̍h-khì ê tōe-hng, bô koh khòaⁿ-kìⁿ chit ê tōe-hng.

13Hit-ê用不義來起厝，用無公道來起樓；白白kah人做伊ê工，無hō͘人工錢；hit人有災厄ah。Hit ê ēng put-gī lâi khí chhù, ēng bô kong-tō lâi khí lâu; pe̍h-pe̍h kah lâng chòe i ê kang, bô hō͘ lâng kang-chîⁿ; hit lâng ū chai-ē ah.

14伊講，我beh為本身起大厝，kap通風ê樓；為家己開大窗，用柏香柴做天羅板；用銀朱來油。I kóng, Góa beh ūi pún-sin khí tōa-chhù, kap thong-hong ê lâu; ūi ka-kī khui tōa thang, ēng pek-hiuⁿ-chhâ chòe thian-lô-pán; ēng gûn-chu lâi iû.

15你熱心tī柏香柴ê工作，就會做王mah？你ê老父kiám m̄是亦食，亦lim，亦行公平kap公義mah？hit時伊得tio̍h福氣。Lí jia̍t-sim tī pek-hiuⁿ-chhâ ê kong-chok, chiū ōe chòe ông mah? Lí ê lāu-pē kiám m̄-sī ia̍h chia̍h, ia̍h lim, ia̍h kiâⁿ kong-pêng kap kong-gī mah? Hit-sî i tit-tio̍h hok-khì.

16伊辨理困苦kap sòng-hiong人ê案件，伊就得tio̍h福氣；án-ni kiám m̄是bat我mah？這是耶和華講ê。I pān-lí khùn-khó͘ kap sòng-hiong lâng ê àn-kiāⁿ, i chiū tit-tio̍h hok-khì; án-ni kiám m̄-sī bat Góa mah? che sī Iâ-hô-hoa kóng--ê.

17獨獨你ê目睭，你ê心，注意貪心，流無罪ê人ê血，行壓制kap強暴。To̍k-to̍k lí ê ba̍k-chiu, lí ê sim, chù-ì tham-sim, lâu bô-chōe ê lâng ê huih, kiâⁿ ap-chè kap kiông-pō.

18所以耶和華論到猶大王約西亞ê kiáⁿ，Iok-ngá-kèng，án-ni講，人無beh為tio̍h伊哀傷，講，Ai-ah，我ê兄！á是，Ai-ah，我ê大姊！亦無因為伊哀傷，講，Ai-ah，我ê主！á是，Ai-ah，伊ê榮光！Só͘-í Iâ-hô-hoa lūn-kàu Iû-tāi ông Iok-se-a ê kiáⁿ, Iok-ngá-kèng, án-ni kóng, Lâng bô beh ūi-tio̍h i ai-siong, kóng, Ai-ah, góa ê hiaⁿ! á-sī, Ai--ah, góa ê tōa-chí! ia̍h bô in-ūi i ai-siong, kóng, Ai--ah, góa ê chú! á-sī, Ai--ah, i ê êng-kng!

19伊beh hō͘人tâi，親像tâi驢一樣；beh拖出去，hiat tī耶路撒冷ê城外。I beh hō͘ lâng tâi, chhin-chhiūⁿ tâi lû chi̍t-iūⁿ; beh thoa--chhut-khì, hiat tī Iâ-lō͘-sat-léng ê siâⁿ-gōa.

20你tio̍h 上黎巴嫩哀哭，tī Pa-san出聲，對A-pa-lîm哀哭；因為你所親愛ê lóng毀滅lah。Lí tio̍h chiūⁿ Lī-pa-lùn ai-khàu, tī Pa-san chhut-siaⁿ, tùi A-pa-lîm ai-khàu; in-ūi lí só͘ chhin-ài--ê lóng húi-bia̍t lah.

21當你興通ê時，我就對你講；你講，我m̄聽；你tùi少年以來，lóng是chit款，m̄聽thàn我ê話。Tng lí heng-thong ê sî, Góa chiū tùi lí kóng; lí kóng, Góa m̄ thiaⁿ; lí tùi siàu-liân í-lâi, lóng sī chit-khoán, m̄ thiaⁿ-thàn Góa ê ōe.

22你ê牧者beh hō͘風吹去；你所親愛ê beh hō͘人掠去；hit時你的確因為你一切ê pháiⁿ來漏氣見笑。Lí ê bo̍k-chiá beh hō͘ hong chhe--khì; lí só͘ chhin-ài--ê beh hō͘ lâng lia̍h--khì; hit-sî lí tek-khak in-ūi lí it-chhè ê pháiⁿ lâi làu-khùi kiàn-siàu.

23你khiā起黎巴嫩，作受tī柏香樹ê，痛苦臨到你，痛疼親像beh生kiáⁿ ê婦人人；hit時你ê可憐到怎樣！Lí khiā-khí Lī-pa-lùn, choh siū tī pek-hiuⁿ-chhiū--ê, thòng-khó͘ lîm-kàu lí, thàng-thiàⁿ chhin-chhiūⁿ beh siⁿ-kiáⁿ ê hū-jîn-lâng; hit-sî lí ê khó-lîn kàu cháiⁿ-iūⁿ!

24耶和華講，我kí我ê永活來chiù-chōa，雖然猶大王，Iok-ngá-kèng ê kiáⁿ Ko-nî-ngá，是我chiàⁿ手蓋印ê手指，亦beh kā你剝(pak)起來。Iâ-hô-hoa kóng, Góa kí Góa ê éng-oa̍h lâi chiù-chōa, sui-jiân Iû-tāi ông, Iok-ngá-kèng ê kiáⁿ Ko-nî-ngá, sī Góa chiàⁿ-chhiú kài-ìn ê chhiú-chí, ia̍h beh kā lí pak--khí-lâi.

25Koh我beh將你交hō͘ siàu想你ê性命ê人ê手；kap你所m̄敢見伊ê面ê人ê手，就是巴比倫王Nî-pò͘-kah-nî-sat ê手，kap Ka-le̍k-tí人ê手。Koh Góa beh chiong lí kau hō͘ siàu-siūⁿ lí ê sìⁿ-miā ê lâng ê chhiú; kap lí só͘ m̄-káⁿ kìⁿ i ê bīn ê lâng ê chhiú, chiū-sī Pa-pí-lûn ông Nî-pò͘-kah-nî-sat ê chhiú, kap Ka-le̍k-tí lâng ê chhiú.

26我亦beh趕你，kap生你ê老母，到別國，m̄是lín出世ê所在；lín beh死tī-hia。Góa ia̍h beh kóaⁿ lí, kap siⁿ lí ê lāu-bú, kàu pa̍t-kok, m̄-sī lín chhut-sì ê só͘-chāi; lín beh sí tī-hia.

27總是in ê心真ài tò去ê所在bōe得thang tò去。Chóng-sī in ê sim chin ài tò--khì ê só͘-chāi bōe-tit-thang tò--khì.

28Ko-nî-ngá chit人是受看輕，已經破ê磁器mah？是無thang歡喜ê器具mah？伊kap伊ê後裔，啥事受趕，hiat tī in所m̄ bat ê地ah？Ko-nî-ngá chit-lâng sī siū khòaⁿ-khin, í-keng phòa ê hûi-khì mah? sī bô thang hoaⁿ-hí ê khì-kū mah? i kap i ê hō͘-è, siáⁿ-sū siū kóaⁿ, hiat tī in só͘ m̄ bat ê tōe ah?

29地ah，地ah，地ah，tio̍h聽耶和華ê話；Tōe ah, tōe ah, tōe ah, tio̍h thiaⁿ Iâ-hô-hoa ê ōe;

30耶和華án-ni講，Tio̍h kí chit人無kiáⁿ，一生bōe得tio̍h興通ê；因為伊ê後裔ê中間，無koh有一人得tio̍h興通，能坐tī大衛ê寶座，來治理猶大。Iâ-hô-hoa án-ni kóng, Tio̍h kí chit-lâng bô kiáⁿ, it-seng bōe tit-tio̍h heng-thong--ê; in-ūi i ê hō͘-è ê tiong-kan, bô koh ū chi̍t-lâng tit-tio̍h heng-thong, ōe chē tī Tāi-pi̍t ê pó-chō, lâi tī-lí Iû-tāi.

1耶和華講，牧者殘害我ê草場ê羊，hō͘伊四散；in有災厄ah。Iâ-hô-hoa kóng, Bo̍k-chiá chân-hāi Góa ê chháu-tiûⁿ ê iûⁿ, hō͘ i sì-sòaⁿ; in ū chai-ē ah.

2所以以色列ê上帝耶和華責備hiah-ê養飼我ê百姓ê牧者，án-ni講，Lín phah散我ê羊群，來趕in去，無看顧in；看ah，我beh照lín所行ê pháiⁿ來辦lín；這是耶和華講ê。Só͘-í Í-sek-lia̍t ê Siōng-tè Iâ-hô-hoa chek-pī hiah-ê iúⁿ-chhī Góa ê peh-sìⁿ ê bo̍k-chiá, án-ni kóng, Lín phah-sòaⁿ Góa ê iûⁿ-kûn, lâi kóaⁿ in khì, bô khòaⁿ-kò͘ in; khòaⁿ ah, Góa beh chiàu lín só͘ kiâⁿ ê pháiⁿ lâi pān lín; che sī Iâ-hô-hoa kóng--ê.

3我beh聚集我ê羊群所chhun-ê，tùi我所趕in到ê ta̍k國；chhōa in koh tò來in ê寮，hō͘ in生湠chōe-chōe。Góa beh chū-chi̍p Góa ê iûⁿ-kûn só͘ chhun--ê, tùi Góa só͘ kóaⁿ in kàu ê ta̍k-kok; chhōa in koh tò-lâi in ê tiâu, hō͘ in siⁿ-thòaⁿ chōe-chōe.

4我beh設立牧者治理in，養飼in；hō͘ in無koh驚惶gông-ngia̍h，亦無減少；這是耶和華講ê。Góa beh siat-li̍p bo̍k-chiá tī-lí in, iúⁿ-chhī in; hō͘ in bô koh kiaⁿ-hiâⁿ gông-ngia̍h, ia̍h bô kiám-chió; che sī Iâ-hô-hoa kóng--ê.

5耶和華講，日子beh到，我beh kā大衛興起義ê枝；伊beh做王來治理；行tāi-chì有智慧，tī地上行公平kap公義。Iâ-hô-hoa kóng, Ji̍t-chí beh kàu, Góa beh kā Tāi-pi̍t heng-khí gī ê Ki; I beh chòe ông lâi tī-lí; kiâⁿ tāi-chì ū tì-hūi, tī tōe-chiūⁿ kiâⁿ kong-pêng kap kong-gī.

6當祂ê日，猶大beh得tio̍h救；以色列beh安然khiā起；祂ê名beh稱做耶和華咱ê義。Tng I ê ji̍t, Iû-tāi beh tit-tio̍h kiù; Í-sek-lia̍t beh an-jiân khiā-khí; I ê miâ beh chheng-chòe Iâ-hô-hoa lán ê gī.

7耶和華講，看ah，日子beh到，人kí耶和華ê永活來chiù-chōa，無beh講，祂是chhōa以色列ê後裔tùi埃及地上來ê。Iâ-hô-hoa kóng, Khòaⁿ ah, ji̍t-chí beh kàu, lâng kí Iâ-hô-hoa ê éng-oa̍h lâi chiù-chōa, bô beh kóng, I sī chhōa Í-sek-lia̍t ê hō͘-è tùi Ai-ki̍p tōe chiūⁿ-lâi--ê.

8In kí耶和華ê永活來chiù-chōa，是beh講，祂帶以色列ê後裔chhōa in tùi北方ê地，亦tùi見若我所趕in到ê地上來；in beh khiā起tī本所在。In kí Iâ-hô-hoa ê éng-oa̍h lâi chiù-chōa, sī beh kóng, I tòa Í-sek-lia̍t ê hō͘-è chhōa in tùi pak-hng ê tōe, ia̍h tùi kìⁿ-nā Góa só͘ kóaⁿ in kàu ê tōe chiūⁿ--lâi; in beh khiā-khí tī pún só͘-chāi.

9論到hiah-ê先知，我ê心tī我ê內面憂傷；我ê骨lóng gī-gī-chhoah；為tio̍h耶和華kap伊聖ê話，我親像酒醉ê人，親像hō͘酒所khah贏ê人。Lūn-kàu hiah ê sian-ti. Góa ê sim tī góa ê lāi-bīn iu-siong; góa ê kut lóng gī-gī-chhoah; ūi-tio̍h Iâ-hô-hoa kap I sèng ê ōe, góa chhin-chhiūⁿ chiú-chùi ê lâng, chhin-chhiūⁿ hō͘ chiú só͘ khah-iâⁿ ê lâng.

10因為地方滿滿行淫亂ê人；koh因為tú-tio̍h咒詛，地就悲哀；曠野ê草場lóng枯焦；in所行ê路，就是pháiⁿ；in ê勢力無正直。In-ūi tōe-hng móa-móa kiâⁿ îm-loān ê lâng; koh in-ūi tú-tio̍h chiù-chó͘, tōe chiū pi-ai; khòng-iá ê chháu-tiûⁿ lóng ko͘-tâ; in só͘ kiâⁿ ê lō͘, chiū-sī pháiⁿ; in ê sè-le̍k bô chèng-ti̍t.

11連先知kap祭司，都是褻瀆ê；就tī我ê厝內，我亦看見in ê pháiⁿ；這是耶和華講ê。Liân sian-ti kap chè-si, to sī siat-to̍k--ê; chiū tī Góa ê chhù-lāi, Góa ia̍h khòaⁿ-kìⁿ in ê pháiⁿ; che sī Iâ-hô-hoa kóng--ê.

12因為án-ni，in ê路beh親像烏暗中滑滑ê地；in beh tú-tio̍h趕逐，tī-hia跋倒；當辨理in ê年，我beh hō͘災厄到tī in；這是耶和華講ê。In-ūi án-ni, in ê lō͘ beh chhin-chhiūⁿ o͘-àm-tiong ku̍t-ku̍t ê tōe; in beh tú-tio̍h kóaⁿ-tio̍k, tī-hia poa̍h-tó; tng pān-lí in ê nî, Góa beh hō͘ chai-ē kàu tī in; che sī Iâ-hô-hoa kóng--ê.

13Tī撒馬利亞ê先知，我已經看見in ê愚戇；in託Pa-le̍k來讖語，hō͘我ê百姓以色列行叉路。Tī Sat-má-lī-a ê sian-ti, Góa í-keng khòaⁿ-kìⁿ in ê gû-gōng; in thok Pa-le̍k lâi chhàm-gú, hō͘ Góa ê peh-sìⁿ Í-sek-lia̍t kiâⁿ chha-lō͘.

14Tī耶路撒冷ê先知，我已經看見可惡ê事；in行姦淫，做事白賊；koh助pháiⁿ人ê手ná有力；致到無人回頭離開伊ê pháiⁿ；in tī我ê面前，lóng親像所多瑪；khiā起tī-hia ê百姓lóng親像蛾摩拉。Tī Iâ-lō͘-sat-léng ê sian-ti, Góa í-keng khòaⁿ-kìⁿ khó-ò͘ⁿ ê sū; in kiâⁿ kan-îm, chòe sū pe̍h-chha̍t; koh chō͘ pháiⁿ lâng ê chhiú ná ū la̍t; tì-kàu bô lâng hôe-thâu lī-khui i ê pháiⁿ; in tī Góa ê bīn-chêng, lóng chhin-chhiūⁿ Só͘-to-má; khiā-khí tī-hia ê peh-sìⁿ lóng chhin-chhiūⁿ Gô-mô͘-la̍h.

15所以萬軍ê耶和華論到chiah-ê先知，有án-ni講；看ah，我beh用茵籐hō͘ in食，koh用苦ê水hō͘ in lim；因為褻瀆ê事出tī耶路撒冷ê先知，流行遍地。Só͘-í bān-kun ê Iâ-hô-hoa lūn-kàu chiah ê sian-ti, ū án-ni kóng; Khòaⁿ ah, Góa beh ēng in-tîn hō͘ in chia̍h, koh ēng khó͘ ê chúi hō͘ in lim; in-ūi siat-to̍k ê sū chhut tī Iâ-lō͘-sat-léng ê sian-ti, liû-hêng piàn-tōe.

16萬軍ê耶和華án-ni講，chiah-ê先知對lín讖語ê，lín莫得聽in ê話；in用虛假教示lín；所講ê異象是出tī in ê心；m̄是出tī耶和華ê嘴。Bān-kun ê Iâ-hô-hoa án-ni kóng, Chiah ê sian-ti tùi lín chhàm-gú--ê, lín bo̍h-tit thiaⁿ in ê ōe; in ēng hu-ké kà-sī lín; só͘ kóng ê īⁿ-siōng sī chhut tī in ê sim; m̄-sī chhut tī Iâ-hô-hoa ê chhùi.

17In常常對藐視我ê人講，耶和華講lín beh享受平安；koh對一切照in心ê剛硬來行ê人講，的確無有災厄臨到lín。In siông-siông tùi biáu-sī Góa ê lâng kóng, Iâ-hô-hoa kóng lín beh hióng-siū pêng-an; koh tùi it-chhè chiàu in sim ê kong-ngī lâi kiâⁿ ê lâng kóng, Tek-khak bô ū chai-ē lîm-kàu lín.

18Chī-chūi kap耶和華契合，得tio̍h聽伊ê話來曉悟ah？Chī-chūi kap Iâ-hô-hoa khè-ha̍p, tit-tio̍h thiaⁿ I ê ōe lâi hiáu-ngō͘ ah?

19Chī-chūi注意聽祂ê話ah？看ah，耶和華ê受氣親像大風發出；就是真透ê捲螺風，beh轉旋來攻擊pháiⁿ人ê頭殼。Chī-chūi chù-ì thiaⁿ I ê ōe ah? Khòaⁿ ah, Iâ-hô-hoa ê siū-khì chhin-chhiūⁿ tōa hong hoat-chhut; chiū-sī chin thàu ê kńg-lê-hong, beh tńg-se̍h lâi kong-kek pháiⁿ-lâng ê thâu-khak.

20耶和華ê心所擬定ê，iáu未做，iáu未成；祂ê受氣的確無倒tńg，日後lín beh明白透徹。Iâ-hô-hoa ê sim só͘ gí-tiāⁿ--ê, iáu-bē chòe, iáu-bē chiâⁿ; I ê siū-khì tek-khak bô tò-tńg, ji̍t-āu lín beh bêng-pe̍k thàu-thiat.

21Hiah-ê先知，我無差in，in家己走；我無對in講，in家己宣傳。Hiah ê sian-ti, Góa bô chhe in, in ka-kī cháu; Góa bô tùi in kóng, in ka-kī soan-thoân.

22In若kap我契合，就的確hō͘我ê百姓聽我ê話；hō͘ in回頭離開in ê pháiⁿ路，kap in所行ê pháiⁿ。In nā kap Góa khè-ha̍p, chiū tek-khak hō͘ Góa ê peh-sìⁿ thiaⁿ Góa ê ōe; hō͘ in hôe-thâu lī-khui in ê pháiⁿ-lō͘, kap in só͘ kiâⁿ ê pháiⁿ.

23耶和華講，我kiám做近ê上帝，無做遠ê上帝mah？Iâ-hô-hoa kóng, Góa kiám chòe kūn ê Siōng-tè, bô chòe hn̄g ê Siōng-tè mah?

24耶和華講，人kiám會bih tī隱密ê所在，hō͘我看伊bōe tio̍h mah？耶和華講，我kiám無充滿tī天地mah？Iâ-hô-hoa kóng, Lâng kiám ōe bih tī ún-ba̍t ê só͘-chāi, hō͘ Góa khòaⁿ i bōe tio̍h mah? Iâ-hô-hoa kóng, Góa kiám bô chhiong-móa tī thiⁿ-tōe mah?

25我已經聽見hiah-ê先知所講ê，就是託我ê名宣傳白賊；in講，我有夢見，我有夢見。Góa í-keng thiaⁿ-kìⁿ hiah ê sian-ti só͘ kóng-ê, chiū-sī thok Góa ê miâ soan-thoân pe̍h-chha̍t; in kóng, Góa ū bāng-kìⁿ, góa ū bāng-kìⁿ.

26宣傳白賊ê先知，就是宣傳in ê心ê詭詐；in存chit號ê心，beh到tī時ah？Soan-thoân pe̍h-chha̍t ê sian-ti, chiū-sī soan-thoân in ê sim ê khúi-chà; in chûn chit-hō ê sim, beh kàu tī-sî ah?

27In ta̍k人將所夢ê相kap講起；想beh hō͘我ê百姓bōe記得我ê名；親像in ê列祖因為Pa-le̍k，來bōe記得我ê名一樣。In ta̍k-lâng chiong só͘ bāng--ê saⁿ-kap kóng-khí; siūⁿ beh hō͘ Góa ê peh-sìⁿ bōe-kì-tit Góa ê miâ; chhin-chhiūⁿ in ê lia̍t-chó͘ in-ūi Pa-le̍k, lâi bōe-kì-tit Góa ê miâ chi̍t-iūⁿ.

28先知若有夢見thang講起伊ê夢；得tio̍h我ê話ê，tio̍h用誠實傳我ê話；粗糠kap麥thái能比得？這是耶和華講ê。Sian-ti nā ū bāng-kìⁿ thang kóng-khí i ê bāng; tit-tio̍h Góa ê ōe--ê, tio̍h ēng sêng-si̍t thoân Góa ê ōe; chho͘-khng kap be̍h thái ōe pí-tit? Che sī Iâ-hô-hoa kóng--ê.

29耶和華講，我ê話kiám m̄是親像火，koh親像能phah破石磐ê大槌mah？Iâ-hô-hoa kóng, Góa ê ōe kiám m̄-sī chhin-chhiūⁿ hé, koh chhin-chhiūⁿ ōe phah-phòa chio̍h-pôaⁿ ê tōa-thûi mah?

30耶和華講，看ah，hiah-ê先知對伊ê同伴偷the̍h我ê話ê，我攻擊in。Iâ-hô-hoa kóng, Khòaⁿ ah, hiah ê sian-ti tùi i ê tâng-phōaⁿ thau-the̍h Góa ê ōe--ê, Góa kong-kek--in.

31耶和華講，hiah-ê先知用嘴舌講，這是耶和華講ê；我攻擊in。Iâ-hô-hoa kóng, Hiah ê sian-ti ēng chhùi-chi̍h kóng, Che sī Iâ-hô-hoa kóng--ê; Góa kong-kek in.

32耶和華講，看ah，hiah-ê用假ê夢來做先知ê；in講起in ê夢；亦用in ê白賊，kap in ê風hàm，hō͘我ê百姓行叉路；我攻擊in；因為我無差in，亦無命令in，in lóng無利益chit-ê百姓；這是耶和華講ê。Iâ-hô-hoa kóng, Khòaⁿ ah, hiah-ê ēng ké ê bāng lâi chòe sian-ti--ê; in kóng-khí in ê bāng; ia̍h ēng in ê pe̍h-chha̍t, kap in ê hong-hàm, hō͘ Góa ê peh-sìⁿ kiâⁿ chha-lō͘; Góa kong-kek in; in-ūi Góa bô chhe in, ia̍h bô bēng-lēng in, in lóng bô lī-ek chit ê peh-sìⁿ; che sī Iâ-hô-hoa kóng--ê.

33若chit-ê百姓，á是先知，á是祭司，問你講，耶和華有甚麼重擔ê默示？你就tio̍h kā in講，甚麼重擔ê默示ah！耶和華講，我beh棄sak lín，就是。Nā chit ê peh-sìⁿ, á-sī sian-ti, á-sī chè-si, mn̄g lí kóng, Iâ-hô-hoa ū sím-mi̍h tāng-tàⁿ ê be̍k-sī? lí chiū tio̍h kā in kóng, Sím-mi̍h tāng-tàⁿ ê be̍k-sī ah! Iâ-hô-hoa kóng, Góa beh khì-sak lín, chiū-sī.

34見若先知，á是祭司，á是百姓，講，耶和華重擔ê默示ê；hit號人，我beh刑罰伊kap伊ê家。Kìⁿ-nā sian-ti, á-sī chè-si, á-sī peh-sìⁿ, kóng, Iâ-hô-hoa tāng-tàⁿ ê be̍k-sī--ê; hit-hō lâng, Góa beh hêng-hoa̍t i kap i ê ke.

35Lín ta̍k人對伊ê厝邊，ta̍k人對伊ê兄弟，tio̍h án-ni講，耶和華有應甚麼？耶和華有講甚麼？Lín ta̍k-lâng tùi i ê chhù-piⁿ, ta̍k-lâng tùi i ê hiaⁿ-tī, tio̍h án-ni kóng, Iâ-hô-hoa ū ìn sím-mi̍h? Iâ-hô-hoa ū kóng sím-mi̍h?

36耶和華重擔ê默示，chit句lín m̄-thang koh講；因為ta̍k人所講ê話，beh做in本身ê重擔；因為lín將永活ê上帝，萬軍ê耶和華，咱ê上帝ê話解hō͘伊chhoa̍h去。Iâ-hô-hoa tāng-tàⁿ ê be̍k-sī, chit-kù lín m̄-thang koh kóng; in-ūi ta̍k-lâng só͘ kóng ê ōe, beh chòe in pún-sin ê tāng-tàⁿ; in-ūi lín chiong éng-oa̍h ê Siōng-tè, bān-kun ê Iâ-hô-hoa, lán ê Siōng-tè ê ōe kóe hō͘ i chhoa̍h--khì.

37你tio̍h對先知án-ni講，耶和華應你甚麼？耶和華講甚麼？Lí tio̍h tùi sian-ti án-ni kóng, Iâ-hô-hoa ìn lí sím-mi̍h? Iâ-hô-hoa kóng sím-mi̍h?

38Lín若講，耶和華重擔ê默示，耶和華就án-ni講，我差人到lín hia，kā lín講，M̄-thang講耶和華重擔ê默示；lín iáu teh講chit句耶和華重擔ê默示；Lín nā kóng, Iâ-hô-hoa tāng-tàⁿ ê be̍k-sī, Iâ-hô-hoa chiū án-ni kóng, Góa chhe lâng kàu lín hia, kā lín kóng, M̄-thang kóng Iâ-hô-hoa tāng-tàⁿ ê be̍k-sī; lín iáu teh kóng chit-kù Iâ-hô-hoa tāng-tàⁿ ê be̍k-sī;

39所以我beh全然bōe記得lín，將lín kap我所賞賜lín，以及lín ê列祖ê城，tùi我ê面前棄sak。só͘-í Góa beh choân-jiân bōe-kì-tit lín, chiong lín kap Góa só͘ siúⁿ-sù lín, í-ki̍p lín ê lia̍t-chó͘ ê siâⁿ, tùi Góa ê bīn-chêng khì-sak.

40Koh beh hō͘永遠ê凌辱，kap久長ê見笑，臨到lín；久長無bōe記得。Koh beh hō͘ éng-oán ê lêng-jio̍k, kap kú-tn̂g ê kiàn-siàu, lîm-kàu lín; kú-tn̂g bô bōe-kì--tit.