1耶和華講，牧者殘害我ê草場ê羊，hō͘伊四散；in有災厄ah。Iâ-hô-hoa kóng, Bo̍k-chiá chân-hāi Góa ê chháu-tiûⁿ ê iûⁿ, hō͘ i sì-sòaⁿ; in ū chai-ē ah.

2所以以色列ê上帝耶和華責備hiah-ê養飼我ê百姓ê牧者，án-ni講，Lín phah散我ê羊群，來趕in去，無看顧in；看ah，我beh照lín所行ê pháiⁿ來辦lín；這是耶和華講ê。Só͘-í Í-sek-lia̍t ê Siōng-tè Iâ-hô-hoa chek-pī hiah-ê iúⁿ-chhī Góa ê peh-sìⁿ ê bo̍k-chiá, án-ni kóng, Lín phah-sòaⁿ Góa ê iûⁿ-kûn, lâi kóaⁿ in khì, bô khòaⁿ-kò͘ in; khòaⁿ ah, Góa beh chiàu lín só͘ kiâⁿ ê pháiⁿ lâi pān lín; che sī Iâ-hô-hoa kóng--ê.

3我beh聚集我ê羊群所chhun-ê，tùi我所趕in到ê ta̍k國；chhōa in koh tò來in ê寮，hō͘ in生湠chōe-chōe。Góa beh chū-chi̍p Góa ê iûⁿ-kûn só͘ chhun--ê, tùi Góa só͘ kóaⁿ in kàu ê ta̍k-kok; chhōa in koh tò-lâi in ê tiâu, hō͘ in siⁿ-thòaⁿ chōe-chōe.

4我beh設立牧者治理in，養飼in；hō͘ in無koh驚惶gông-ngia̍h，亦無減少；這是耶和華講ê。Góa beh siat-li̍p bo̍k-chiá tī-lí in, iúⁿ-chhī in; hō͘ in bô koh kiaⁿ-hiâⁿ gông-ngia̍h, ia̍h bô kiám-chió; che sī Iâ-hô-hoa kóng--ê.

5耶和華講，日子beh到，我beh kā大衛興起義ê枝；伊beh做王來治理；行tāi-chì有智慧，tī地上行公平kap公義。Iâ-hô-hoa kóng, Ji̍t-chí beh kàu, Góa beh kā Tāi-pi̍t heng-khí gī ê Ki; I beh chòe ông lâi tī-lí; kiâⁿ tāi-chì ū tì-hūi, tī tōe-chiūⁿ kiâⁿ kong-pêng kap kong-gī.

6當祂ê日，猶大beh得tio̍h救；以色列beh安然khiā起；祂ê名beh稱做耶和華咱ê義。Tng I ê ji̍t, Iû-tāi beh tit-tio̍h kiù; Í-sek-lia̍t beh an-jiân khiā-khí; I ê miâ beh chheng-chòe Iâ-hô-hoa lán ê gī.

7耶和華講，看ah，日子beh到，人kí耶和華ê永活來chiù-chōa，無beh講，祂是chhōa以色列ê後裔tùi埃及地上來ê。Iâ-hô-hoa kóng, Khòaⁿ ah, ji̍t-chí beh kàu, lâng kí Iâ-hô-hoa ê éng-oa̍h lâi chiù-chōa, bô beh kóng, I sī chhōa Í-sek-lia̍t ê hō͘-è tùi Ai-ki̍p tōe chiūⁿ-lâi--ê.

8In kí耶和華ê永活來chiù-chōa，是beh講，祂帶以色列ê後裔chhōa in tùi北方ê地，亦tùi見若我所趕in到ê地上來；in beh khiā起tī本所在。In kí Iâ-hô-hoa ê éng-oa̍h lâi chiù-chōa, sī beh kóng, I tòa Í-sek-lia̍t ê hō͘-è chhōa in tùi pak-hng ê tōe, ia̍h tùi kìⁿ-nā Góa só͘ kóaⁿ in kàu ê tōe chiūⁿ--lâi; in beh khiā-khí tī pún só͘-chāi.

9論到hiah-ê先知，我ê心tī我ê內面憂傷；我ê骨lóng gī-gī-chhoah；為tio̍h耶和華kap伊聖ê話，我親像酒醉ê人，親像hō͘酒所khah贏ê人。Lūn-kàu hiah ê sian-ti. Góa ê sim tī góa ê lāi-bīn iu-siong; góa ê kut lóng gī-gī-chhoah; ūi-tio̍h Iâ-hô-hoa kap I sèng ê ōe, góa chhin-chhiūⁿ chiú-chùi ê lâng, chhin-chhiūⁿ hō͘ chiú só͘ khah-iâⁿ ê lâng.

10因為地方滿滿行淫亂ê人；koh因為tú-tio̍h咒詛，地就悲哀；曠野ê草場lóng枯焦；in所行ê路，就是pháiⁿ；in ê勢力無正直。In-ūi tōe-hng móa-móa kiâⁿ îm-loān ê lâng; koh in-ūi tú-tio̍h chiù-chó͘, tōe chiū pi-ai; khòng-iá ê chháu-tiûⁿ lóng ko͘-tâ; in só͘ kiâⁿ ê lō͘, chiū-sī pháiⁿ; in ê sè-le̍k bô chèng-ti̍t.

11連先知kap祭司，都是褻瀆ê；就tī我ê厝內，我亦看見in ê pháiⁿ；這是耶和華講ê。Liân sian-ti kap chè-si, to sī siat-to̍k--ê; chiū tī Góa ê chhù-lāi, Góa ia̍h khòaⁿ-kìⁿ in ê pháiⁿ; che sī Iâ-hô-hoa kóng--ê.

12因為án-ni，in ê路beh親像烏暗中滑滑ê地；in beh tú-tio̍h趕逐，tī-hia跋倒；當辨理in ê年，我beh hō͘災厄到tī in；這是耶和華講ê。In-ūi án-ni, in ê lō͘ beh chhin-chhiūⁿ o͘-àm-tiong ku̍t-ku̍t ê tōe; in beh tú-tio̍h kóaⁿ-tio̍k, tī-hia poa̍h-tó; tng pān-lí in ê nî, Góa beh hō͘ chai-ē kàu tī in; che sī Iâ-hô-hoa kóng--ê.

13Tī撒馬利亞ê先知，我已經看見in ê愚戇；in託Pa-le̍k來讖語，hō͘我ê百姓以色列行叉路。Tī Sat-má-lī-a ê sian-ti, Góa í-keng khòaⁿ-kìⁿ in ê gû-gōng; in thok Pa-le̍k lâi chhàm-gú, hō͘ Góa ê peh-sìⁿ Í-sek-lia̍t kiâⁿ chha-lō͘.

14Tī耶路撒冷ê先知，我已經看見可惡ê事；in行姦淫，做事白賊；koh助pháiⁿ人ê手ná有力；致到無人回頭離開伊ê pháiⁿ；in tī我ê面前，lóng親像所多瑪；khiā起tī-hia ê百姓lóng親像蛾摩拉。Tī Iâ-lō͘-sat-léng ê sian-ti, Góa í-keng khòaⁿ-kìⁿ khó-ò͘ⁿ ê sū; in kiâⁿ kan-îm, chòe sū pe̍h-chha̍t; koh chō͘ pháiⁿ lâng ê chhiú ná ū la̍t; tì-kàu bô lâng hôe-thâu lī-khui i ê pháiⁿ; in tī Góa ê bīn-chêng, lóng chhin-chhiūⁿ Só͘-to-má; khiā-khí tī-hia ê peh-sìⁿ lóng chhin-chhiūⁿ Gô-mô͘-la̍h.

15所以萬軍ê耶和華論到chiah-ê先知，有án-ni講；看ah，我beh用茵籐hō͘ in食，koh用苦ê水hō͘ in lim；因為褻瀆ê事出tī耶路撒冷ê先知，流行遍地。Só͘-í bān-kun ê Iâ-hô-hoa lūn-kàu chiah ê sian-ti, ū án-ni kóng; Khòaⁿ ah, Góa beh ēng in-tîn hō͘ in chia̍h, koh ēng khó͘ ê chúi hō͘ in lim; in-ūi siat-to̍k ê sū chhut tī Iâ-lō͘-sat-léng ê sian-ti, liû-hêng piàn-tōe.

16萬軍ê耶和華án-ni講，chiah-ê先知對lín讖語ê，lín莫得聽in ê話；in用虛假教示lín；所講ê異象是出tī in ê心；m̄是出tī耶和華ê嘴。Bān-kun ê Iâ-hô-hoa án-ni kóng, Chiah ê sian-ti tùi lín chhàm-gú--ê, lín bo̍h-tit thiaⁿ in ê ōe; in ēng hu-ké kà-sī lín; só͘ kóng ê īⁿ-siōng sī chhut tī in ê sim; m̄-sī chhut tī Iâ-hô-hoa ê chhùi.

17In常常對藐視我ê人講，耶和華講lín beh享受平安；koh對一切照in心ê剛硬來行ê人講，的確無有災厄臨到lín。In siông-siông tùi biáu-sī Góa ê lâng kóng, Iâ-hô-hoa kóng lín beh hióng-siū pêng-an; koh tùi it-chhè chiàu in sim ê kong-ngī lâi kiâⁿ ê lâng kóng, Tek-khak bô ū chai-ē lîm-kàu lín.

18Chī-chūi kap耶和華契合，得tio̍h聽伊ê話來曉悟ah？Chī-chūi kap Iâ-hô-hoa khè-ha̍p, tit-tio̍h thiaⁿ I ê ōe lâi hiáu-ngō͘ ah?

19Chī-chūi注意聽祂ê話ah？看ah，耶和華ê受氣親像大風發出；就是真透ê捲螺風，beh轉旋來攻擊pháiⁿ人ê頭殼。Chī-chūi chù-ì thiaⁿ I ê ōe ah? Khòaⁿ ah, Iâ-hô-hoa ê siū-khì chhin-chhiūⁿ tōa hong hoat-chhut; chiū-sī chin thàu ê kńg-lê-hong, beh tńg-se̍h lâi kong-kek pháiⁿ-lâng ê thâu-khak.

20耶和華ê心所擬定ê，iáu未做，iáu未成；祂ê受氣的確無倒tńg，日後lín beh明白透徹。Iâ-hô-hoa ê sim só͘ gí-tiāⁿ--ê, iáu-bē chòe, iáu-bē chiâⁿ; I ê siū-khì tek-khak bô tò-tńg, ji̍t-āu lín beh bêng-pe̍k thàu-thiat.

21Hiah-ê先知，我無差in，in家己走；我無對in講，in家己宣傳。Hiah ê sian-ti, Góa bô chhe in, in ka-kī cháu; Góa bô tùi in kóng, in ka-kī soan-thoân.

22In若kap我契合，就的確hō͘我ê百姓聽我ê話；hō͘ in回頭離開in ê pháiⁿ路，kap in所行ê pháiⁿ。In nā kap Góa khè-ha̍p, chiū tek-khak hō͘ Góa ê peh-sìⁿ thiaⁿ Góa ê ōe; hō͘ in hôe-thâu lī-khui in ê pháiⁿ-lō͘, kap in só͘ kiâⁿ ê pháiⁿ.

23耶和華講，我kiám做近ê上帝，無做遠ê上帝mah？Iâ-hô-hoa kóng, Góa kiám chòe kūn ê Siōng-tè, bô chòe hn̄g ê Siōng-tè mah?

24耶和華講，人kiám會bih tī隱密ê所在，hō͘我看伊bōe tio̍h mah？耶和華講，我kiám無充滿tī天地mah？Iâ-hô-hoa kóng, Lâng kiám ōe bih tī ún-ba̍t ê só͘-chāi, hō͘ Góa khòaⁿ i bōe tio̍h mah? Iâ-hô-hoa kóng, Góa kiám bô chhiong-móa tī thiⁿ-tōe mah?

25我已經聽見hiah-ê先知所講ê，就是託我ê名宣傳白賊；in講，我有夢見，我有夢見。Góa í-keng thiaⁿ-kìⁿ hiah ê sian-ti só͘ kóng-ê, chiū-sī thok Góa ê miâ soan-thoân pe̍h-chha̍t; in kóng, Góa ū bāng-kìⁿ, góa ū bāng-kìⁿ.

26宣傳白賊ê先知，就是宣傳in ê心ê詭詐；in存chit號ê心，beh到tī時ah？Soan-thoân pe̍h-chha̍t ê sian-ti, chiū-sī soan-thoân in ê sim ê khúi-chà; in chûn chit-hō ê sim, beh kàu tī-sî ah?

27In ta̍k人將所夢ê相kap講起；想beh hō͘我ê百姓bōe記得我ê名；親像in ê列祖因為Pa-le̍k，來bōe記得我ê名一樣。In ta̍k-lâng chiong só͘ bāng--ê saⁿ-kap kóng-khí; siūⁿ beh hō͘ Góa ê peh-sìⁿ bōe-kì-tit Góa ê miâ; chhin-chhiūⁿ in ê lia̍t-chó͘ in-ūi Pa-le̍k, lâi bōe-kì-tit Góa ê miâ chi̍t-iūⁿ.

28先知若有夢見thang講起伊ê夢；得tio̍h我ê話ê，tio̍h用誠實傳我ê話；粗糠kap麥thái能比得？這是耶和華講ê。Sian-ti nā ū bāng-kìⁿ thang kóng-khí i ê bāng; tit-tio̍h Góa ê ōe--ê, tio̍h ēng sêng-si̍t thoân Góa ê ōe; chho͘-khng kap be̍h thái ōe pí-tit? Che sī Iâ-hô-hoa kóng--ê.

29耶和華講，我ê話kiám m̄是親像火，koh親像能phah破石磐ê大槌mah？Iâ-hô-hoa kóng, Góa ê ōe kiám m̄-sī chhin-chhiūⁿ hé, koh chhin-chhiūⁿ ōe phah-phòa chio̍h-pôaⁿ ê tōa-thûi mah?

30耶和華講，看ah，hiah-ê先知對伊ê同伴偷the̍h我ê話ê，我攻擊in。Iâ-hô-hoa kóng, Khòaⁿ ah, hiah ê sian-ti tùi i ê tâng-phōaⁿ thau-the̍h Góa ê ōe--ê, Góa kong-kek--in.

31耶和華講，hiah-ê先知用嘴舌講，這是耶和華講ê；我攻擊in。Iâ-hô-hoa kóng, Hiah ê sian-ti ēng chhùi-chi̍h kóng, Che sī Iâ-hô-hoa kóng--ê; Góa kong-kek in.

32耶和華講，看ah，hiah-ê用假ê夢來做先知ê；in講起in ê夢；亦用in ê白賊，kap in ê風hàm，hō͘我ê百姓行叉路；我攻擊in；因為我無差in，亦無命令in，in lóng無利益chit-ê百姓；這是耶和華講ê。Iâ-hô-hoa kóng, Khòaⁿ ah, hiah-ê ēng ké ê bāng lâi chòe sian-ti--ê; in kóng-khí in ê bāng; ia̍h ēng in ê pe̍h-chha̍t, kap in ê hong-hàm, hō͘ Góa ê peh-sìⁿ kiâⁿ chha-lō͘; Góa kong-kek in; in-ūi Góa bô chhe in, ia̍h bô bēng-lēng in, in lóng bô lī-ek chit ê peh-sìⁿ; che sī Iâ-hô-hoa kóng--ê.

33若chit-ê百姓，á是先知，á是祭司，問你講，耶和華有甚麼重擔ê默示？你就tio̍h kā in講，甚麼重擔ê默示ah！耶和華講，我beh棄sak lín，就是。Nā chit ê peh-sìⁿ, á-sī sian-ti, á-sī chè-si, mn̄g lí kóng, Iâ-hô-hoa ū sím-mi̍h tāng-tàⁿ ê be̍k-sī? lí chiū tio̍h kā in kóng, Sím-mi̍h tāng-tàⁿ ê be̍k-sī ah! Iâ-hô-hoa kóng, Góa beh khì-sak lín, chiū-sī.

34見若先知，á是祭司，á是百姓，講，耶和華重擔ê默示ê；hit號人，我beh刑罰伊kap伊ê家。Kìⁿ-nā sian-ti, á-sī chè-si, á-sī peh-sìⁿ, kóng, Iâ-hô-hoa tāng-tàⁿ ê be̍k-sī--ê; hit-hō lâng, Góa beh hêng-hoa̍t i kap i ê ke.

35Lín ta̍k人對伊ê厝邊，ta̍k人對伊ê兄弟，tio̍h án-ni講，耶和華有應甚麼？耶和華有講甚麼？Lín ta̍k-lâng tùi i ê chhù-piⁿ, ta̍k-lâng tùi i ê hiaⁿ-tī, tio̍h án-ni kóng, Iâ-hô-hoa ū ìn sím-mi̍h? Iâ-hô-hoa ū kóng sím-mi̍h?

36耶和華重擔ê默示，chit句lín m̄-thang koh講；因為ta̍k人所講ê話，beh做in本身ê重擔；因為lín將永活ê上帝，萬軍ê耶和華，咱ê上帝ê話解hō͘伊chhoa̍h去。Iâ-hô-hoa tāng-tàⁿ ê be̍k-sī, chit-kù lín m̄-thang koh kóng; in-ūi ta̍k-lâng só͘ kóng ê ōe, beh chòe in pún-sin ê tāng-tàⁿ; in-ūi lín chiong éng-oa̍h ê Siōng-tè, bān-kun ê Iâ-hô-hoa, lán ê Siōng-tè ê ōe kóe hō͘ i chhoa̍h--khì.

37你tio̍h對先知án-ni講，耶和華應你甚麼？耶和華講甚麼？Lí tio̍h tùi sian-ti án-ni kóng, Iâ-hô-hoa ìn lí sím-mi̍h? Iâ-hô-hoa kóng sím-mi̍h?

38Lín若講，耶和華重擔ê默示，耶和華就án-ni講，我差人到lín hia，kā lín講，M̄-thang講耶和華重擔ê默示；lín iáu teh講chit句耶和華重擔ê默示；Lín nā kóng, Iâ-hô-hoa tāng-tàⁿ ê be̍k-sī, Iâ-hô-hoa chiū án-ni kóng, Góa chhe lâng kàu lín hia, kā lín kóng, M̄-thang kóng Iâ-hô-hoa tāng-tàⁿ ê be̍k-sī; lín iáu teh kóng chit-kù Iâ-hô-hoa tāng-tàⁿ ê be̍k-sī;

39所以我beh全然bōe記得lín，將lín kap我所賞賜lín，以及lín ê列祖ê城，tùi我ê面前棄sak。só͘-í Góa beh choân-jiân bōe-kì-tit lín, chiong lín kap Góa só͘ siúⁿ-sù lín, í-ki̍p lín ê lia̍t-chó͘ ê siâⁿ, tùi Góa ê bīn-chêng khì-sak.

40Koh beh hō͘永遠ê凌辱，kap久長ê見笑，臨到lín；久長無bōe記得。Koh beh hō͘ éng-oán ê lêng-jio̍k, kap kú-tn̂g ê kiàn-siàu, lîm-kàu lín; kú-tn̂g bô bōe-kì--tit.

1巴比倫王Nî-pò͘-kah-nî-sat將猶大王Iok-ngá-kèng ê kiáⁿ Iâ-Ko-nî-ngá，kap猶大ê貴族，以及工匠、鐵匠，tùi耶路撒冷掠去帶到巴比倫。Chit-ê事了後，耶和華kí hō͘我看；有兩筐ê無花果，hē tī耶和華ê殿前。Pa-pí-lûn ông Nî-pò͘-kah-nî-sat chiong Iû-tāi ông Iok-ngá-kèng ê kiáⁿ Iâ-ko-nî-ngá, kap Iû-tāi ê kùi-cho̍k, í-ki̍p kang-chhiūⁿ, thih-chhiūⁿ, tùi Iâ-lō͘-sat-léng lia̍h--khì tòa kàu Pa-pí-lûn. Chit ê sū liáu-āu, Iâ-hô-hoa kí hō͘ góa khòaⁿ; ū nn̄g kheng ê bû-hoa-kó, hē tī Iâ-hô-hoa ê tiān-chêng.

2一khia筐貯siōng好ê無花果，親像起頭熟ê無花果；一khia筐貯真pháiⁿ ê無花果，bōe食得，因為真pháiⁿ。Chi̍t khia kheng tóe siōng-hó ê bû-hoa-kó, chhin-chhiūⁿ khí-thâu se̍k ê bû-hoa-kó; chi̍t khia kheng tóe chin-pháiⁿ ê bû-hoa-kó, bōe-chia̍h--tit, in-ūi chin-pháiⁿ.

3耶和華就kā我講，耶利米ah，你看見甚麼？我應講，無花果；好ê真好，pháiⁿ-ê真pháiⁿ，bōe食得，因為真pháiⁿ。Iâ-hô-hoa chiū kā góa kóng, Iâ-lī-bí ah, lí khòaⁿ-kìⁿ sím-mi̍h? Góa ìn kóng, Bû-hoa-kó; hó--ê chin-hó, pháiⁿ--ê chin-pháiⁿ, bōe-chia̍h--tit, in-ūi chin-pháiⁿ.

4耶和華ê話koh臨到我講，Iâ-hô-hoa ê ōe koh lîm-kàu góa kóng,

5耶和華以色列ê上帝án-ni講，受掠去ê猶大人，就是我差in離開chit所在到Ka-le̍k-tí人ê地ê；我beh看in親像chiah-ê好ê無花果；hō͘ in得tio̍h福氣。Iâ-hô-hoa Í-sek-lia̍t ê Siōng-tè án-ni kóng, Siū lia̍h--khì ê Iû-tāi lâng, chiū-sī Góa chhe in lī-khui chit só͘-chāi kàu Ka-le̍k-tí lâng ê tōe--ê; Góa beh khòaⁿ in chhin-chhiūⁿ chiah ê hó ê bû-hoa-kó; hō͘ in tit-tio̍h hok-khì.

6我beh眷顧in，hō͘ in得tio̍h福氣；chhōa in tò來chit所在；我亦beh建立in，無koh毀壞in；栽培in，無kā伊拔起來。Góa beh koàn-kò͘ in, hō͘ in tit-tio̍h hok-khì; chhōa in tò-lâi chit só͘-chāi; Góa ia̍h beh kiàn-li̍p in, bô koh húi-hoāi in; chai-pôe in, bô kā i pu̍ih--khí-lâi.

7我beh hō͘ in有hit號心，能bat我；知我是耶和華；in beh做我ê百姓，我beh做in ê上帝；因為in beh一心歸向我。Góa beh hō͘ in ū hit-hō sim, ōe bat Góa; chai Góa sī Iâ-hô-hoa; in beh chòe Góa ê peh-sìⁿ, Góa beh chòe in ê Siōng-tè; in-ūi in beh chi̍t-sim kui-ǹg Góa.

8耶和華án-ni講，猶大王Se-tí-ka，kap伊chiah-ê貴族，kap耶路撒冷所chhun，iáu留tī chit所在ê百姓，以及khiā起tī埃及地ê；我看in親像chiah-ê pháiⁿ ê無花果，bōe食得，因為真pháiⁿ。Iâ-hô-hoa án-ni kóng, Iû-tāi ông Se-tí-ka, kap i chiah ê kùi-cho̍k, kap Iâ-lō͘-sat-léng só͘ chhun, iáu lâu tī chit só͘-chāi ê peh-sìⁿ, í-ki̍p khiā-khí tī Ai-ki̍p tōe--ê; Góa khòaⁿ in chhin-chhiūⁿ chiah ê pháiⁿ ê bû-hoa-kó, bōe-chia̍h--tit, in-ūi chin pháiⁿ.

9我beh將in交出，hō͘ in 流落tī天下萬國，tú-tio̍h艱苦；亦tī我趕in到ê ta̍k所在，成做凌辱，做話柄，做譏刺，做咒詛。Góa beh chiong in kau-chhut, hō͘ in liû-lo̍h tī thiⁿ-ē bān-kok, tú-tio̍h kan-khó͘; ia̍h tī Góa kóaⁿ in kàu ê ta̍k só͘-chāi, chiâⁿ-chòe lêng-jio̍k, chòe ōe-pìⁿ, chòe ki-chhì, chòe chiù-chó͘.

10我beh用刀劍，用飢荒，用瘟疫，到in中間；直到in受滅tī我所賞賜in kap in列祖ê地。Góa beh ēng to-kiàm, ēng ki-hng, ēng un-e̍k, kàu in tiong-kan; ti̍t-kàu in siū bia̍t tī Góa só͘ siúⁿ-sù in kap in lia̍t-chó͘ ê tōe.

1當猶大王約西亞ê kiáⁿ Iok-ngá-kèng ê四年，就是巴比倫王Nî-pò͘-kah-nî-sat元年，有論起猶大百姓ê話臨到耶利米。Tng Iû-tāi ông Iok-se-a ê kiáⁿ Iok-ngá-kèng ê sì--nî, chiū-sī Pa-pí-lûn ông Nî-pò͘-kah-nî-sat goân--nî, ū lūn-khí Iû-tāi peh-sìⁿ ê ōe lîm-kàu Iâ-lī-bí.

2先知耶利米就將chit-ê話對猶大眾百姓，以及一切khiā起耶路撒冷ê人講：Sian-ti Iâ-lī-bí chiū chiong chit ê ōe tùi Iû-tāi chèng peh-sìⁿ, í-ki̍p it-chhè khiā-khí Iâ-lō͘-sat-léng ê lâng kóng:

3Tùi猶大王A-bûn ê kiáⁿ約西亞十三年，到taⁿ，二十三年久，有耶和華ê話臨到我；我已經對lín講；koh早早起來講；獨獨lín m̄聽。Tùi Iû-tāi ông A-bûn ê kiáⁿ Iok-se-a cha̍p-saⁿ--nî, kàu taⁿ, jī-cha̍p-saⁿ nî kú, ū Iâ-hô-hoa ê ōe lîm-kàu góa; góa í-keng tùi lín kóng; koh chá-chá khí-lâi kóng; to̍k-to̍k lín m̄-thiaⁿ.

4耶和華也早早起來，差祂ê奴僕眾先知到lín chia；但是lín無聽thàn，亦無俯耳孔來聽。Iâ-hô-hoa iā chá-chá khí--lâi, chhe I ê lô͘-po̍k chèng sian-ti kàu lín chia; nā-sī lín bô thiaⁿ-thàn, ia̍h bô àⁿ hī-khang lâi thiaⁿ.

5伊講，Lín ta̍k人tio̍h oa̍t頭離開伊ê pháiⁿ路，kap lín所做ê pháiⁿ；就thang khiā起耶和華所賞賜lín，kap lín ê列祖ê地，tùi古早到永遠。I kóng, Lín ta̍k-lâng tio̍h oa̍t-thâu lī-khui i ê pháiⁿ-lō͘, kap lín só͘ chòe ê pháiⁿ; chiū thang khiā-khí Iâ-hô-hoa só͘ siúⁿ-sù lín, kap lín ê lia̍t-chó͘ ê tōe, tùi kó͘-chá kàu éng-oán.

6M̄-thang thàn別號ê上帝，服事跪拜in；m̄-thang用lín ê手所做ê，來惹我ê受氣；án-ni我就無降災厄hō͘ lín。M̄-thang thàn pa̍t-hō ê siōng-tè, ho̍k-sāi kūi-pài in; m̄-thang ēng lín ê chhiú só͘ chòe--ê, lâi jiá Góa ê siū-khì; án-ni Góa chiū bô kàng chai-ē hō͘ lín.

7總是lín無聽thàn我，竟然用手所做ê，惹我ê受氣，陷害家己；這是耶和華講ê。Chóng-sī lín bô thiaⁿ-thàn Góa, kèng-jiân ēng chhiú só͘ chòe--ê, jiá Góa ê siū-khì, hām-hāi ka-kī; che sī Iâ-hô-hoa kóng--ê.

8所以萬軍ê耶和華án-ni講，因為lín無聽thàn我ê話，Só͘-í bān-kun ê Iâ-hô-hoa án-ni kóng, In-ūi lín bô thiaⁿ-thàn Góa ê ōe,

9看ah，我beh召北方chiah-ê族，kap我ê奴僕巴比倫王Nî-pò͘-kah-nî-sat，來攻擊chit所在，kap chit所在khiā起ê百姓，以及四圍ê列邦，我beh一盡剿滅in，hō͘ in做thang gông-ngia̍h，thang譏刺，永遠拋荒ê所在；這是耶和華講ê。khòaⁿ ah, Góa beh tiàu pak-hng chiah ê cho̍k, kap Góa ê lô͘-po̍k Pa-pí-lûn ông Nî-pò͘-kah-nî-sat, lâi kong-kek chit só͘-chāi, kap chit só͘-chāi khiā-khí ê peh-sìⁿ, í-ki̍p sì-ûi ê lia̍t-pang, Góa beh it-chīn châu-bia̍t in, hō͘ in chòe thang gông-ngia̍h, thang ki-chhì, éng-oán pha-hng ê só͘-chāi; che sī Iâ-hô-hoa kóng--ê.

10Koh in中間歡喜ê聲，快樂ê聲，新kiáⁿ婿ê聲，新娘ê聲，挨磨ê聲，kap燈ê光，我beh hō͘ in lóng soah。Koh in tiong-kan hoaⁿ-hí ê siaⁿ, khoài-lo̍k ê siaⁿ, sin-kiáⁿ-sài ê siaⁿ, sin-niû ê siaⁿ, oe-bō ê siaⁿ, kap teng ê kng, Góa beh hō͘ in lóng soah.

11全地的確拋荒，hō͘人gông-ngia̍h；chiah-ê列邦beh服事巴比倫王七十年。Choân-tōe tek-khak pha-hng, hō͘ lâng gông-ngia̍h; chiah ê lia̍t-pang beh ho̍k-sāi Pa-pí-lûn ông chhit-cha̍p-nî.

12七十年已經滿，我beh刑罰巴比倫王，kap伊ê國ê罪，koh hō͘ Ka-le̍k-tí人ê地永遠拋荒；這是耶和華講ê。Chhit-cha̍p-nî í-keng móa, Góa beh hêng-hoa̍t Pa-pí-lûn ông, kap i ê kok ê chōe, koh hō͘ Ka-le̍k-tí lâng ê tōe éng-oán pha-hng; che sī Iâ-hô-hoa kóng--ê.

13我beh用我所講攻擊hit-ê地ê事，lóng到tī in；就是見若記tī chit本冊，耶利米所論起chiah-ê國所讖語ê。Góa beh ēng Góa só͘ kóng kong-kek hit-ê tōe ê sū, lóng kàu tī in; chiū-sī kìⁿ-nā kì tī chit pún chheh, Iâ-lī-bí só͘ lūn-khí chiah ê kok só͘ chhàm-gú--ê.

14因為有chōe-chōe國，kap大ê君王，beh用in Ka-le̍k-tí人做奴僕；我亦beh照in ê所行，kap in ê手所做ê，報應in。In-ūi ū chōe-chōe kok, kap tōa ê kun-ông, beh ēng in Ka-le̍k-tí lâng chòe lô͘-po̍k; Góa ia̍h beh chiàu in ê só͘ kiâⁿ, kap in ê chhiú só͘ chòe--ê, pò-èng in.

15耶和華，以色列ê上帝，對我án-ni講，你tùi我ê手接chit杯受氣ê酒，hō͘我所差你去ê列國lim。Iâ-hô-hoa, Í-sek-lia̍t ê Siōng-tè, tùi góa án-ni kóng, Lí tùi Góa ê chhiú chih chit poe siū-khì ê chiú, hō͘ Góa só͘ chhe lí khì ê lia̍t-kok lim.

16In lim了就顛顛倒倒，亦beh發狂；因為我hō͘刀劍到in中間。In lim-liáu chiū tian-tian tó-tó, ia̍h beh hoat-kông; in-ūi Góa hō͘ to-kiàm kàu in tiong-kan.

17我就tùi耶和華ê手接chit-ê杯；hō͘耶和華所差我去ê列國lim伊。Góa chiū tùi Iâ-hô-hoa ê chhiú chih chit ê poe; hō͘ Iâ-hô-hoa só͘ chhe góa khì ê lia̍t-kok lim--i.

18就是耶路撒冷kap猶大chiah-ê城，以及in ê列王貴族；hō͘ in拋荒；做thang gông-ngia̍h，thang譏刺，thang咒詛ê，親像今á日一樣。Chiū-sī Iâ-lō͘-sat-léng kap Iû-tāi chiah ê siâⁿ, í-ki̍p in ê lia̍t-ông kùi-cho̍k; hō͘ in pha-hng; chòe thang gông-ngia̍h, thang ki-chhì, thang chiù-chó͘--ê, chhin-chhiūⁿ kin-á-ji̍t chi̍t-iūⁿ.

19Koh埃及王法老，kap伊ê人臣、貴族、眾百姓；Koh Ai-ki̍p ông Hoat-ló, kap i ê jîn-sîn, kùi-cho̍k, chèng peh-sìⁿ;

20kap相chham-chhap ê百姓，O͘-su地chiah-ê王，腓利士地chiah-ê王，A-si̍t-ki-lûn、Ka-sat、Í-kek-lûn，以及A-si̍t-tu̍t所chhun ê人；kap saⁿ-chham-chhap ê peh-sìⁿ, O͘-su tōe chiah ê ông, Hui-lī-sū tōe chiah ê ông, A-si̍t-ki-lûn, Ka-sat, Í-kek-lûn, í-ki̍p A-si̍t-tu̍t só͘ chhun ê lâng;

21koh Í-tong、Mô͘-ap、kap A-bûn ê後裔；koh Í-tong, Mô͘-ap, kap A-bûn ê hō͘-è;

22Chhui-lô列王、Se-tùn列王、海外ê海嶼ê列王；Chhui-lô lia̍t-ông, Se-tùn lia̍t-ông, hái-gōa ê hái-sū ê lia̍t-ông;

23Tí-tàn、Thê-má、Pò͘-su，kap一切剃鬢邊ê；Tí-tàn, Thê-má, Pò͘-su, kap it-chhè thì pìn-piⁿ--ê;

24A-lat-pek ê列王，tiàm tī曠野相chham-chhap ê百姓ê列王；A-lat-pek ê lia̍t-ông, tiàm tī khòng-iá saⁿ-chham-chhap ê peh-sìⁿ ê lia̍t-ông;

25Sim-lī ê列王、Í-lân ê列王、Bí-thài ê列王；Sim-lī ê lia̍t-ông, Í-lân ê lia̍t-ông, Bí-thài ê lia̍t-ông;

26北方遠近ê列王，chit-ê hit-ê，以及天下萬國lim伊；以後Si-sa-khek王亦beh lim伊。pak-hng hn̄g-kūn ê lia̍t-ông, chit-ê hit-ê, í-ki̍p thiⁿ-ē bān-kok lim--i; í-āu Si-sa-khek ông ia̍h beh lim--i.

27你tio̍h kā in講，萬軍ê耶和華，以色列ê上帝，án-ni講，Lín tio̍h lim，來醉，來吐，來跋倒；無koh起來；因為我hō͘刀劍到lín中間。Lí tio̍h kā in kóng, Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lín tio̍h lim, lâi chùi, lâi thò͘, lâi poa̍h-tó; bô koh khí--lâi; in-ūi Góa hō͘ to-kiàm kàu lín tiong-kan.

28In若m̄肯對你ê手接chit-ê杯去lim，你就tio̍h kā in講，萬軍ê耶和華án-ni講，Lín決斷tio̍h lim。In nā m̄-khéng tùi lí ê chhiú chih chit ê poe khì lim, lí chiū tio̍h kā in kóng, Bān-kun ê Iâ-hô-hoa án-ni kóng, Lín koat-toàn tio̍h lim.

29因為我降災厄tùi hit-ê用我ê名來稱ê城起手，lín能一盡免刑罰mah？的確bōe免得；因為我beh命令刀劍臨到地上lóng總ê百姓；這是萬軍ê耶和華講ê。In-ūi Góa kàng chai-ē tùi hit ê ēng Góa ê miâ lâi chheng ê siâⁿ khí-chhiú, lín ōe it-chīn bián hêng-hoa̍t mah? tek-khak bōe bián-tit; in-ūi Góa beh bēng-lēng to-kiàm lîm-kàu tōe-chiūⁿ lóng-chóng ê peh-sìⁿ; che sī bān-kun ê Iâ-hô-hoa kóng--ê.

30所以你tio̍h對in宣傳這一切ê話，來攻擊in，講，耶和華beh對頂面喉叫，對伊khiā起ê聖所出聲，對伊ê羊群大聲喉叫；伊beh對地上lóng總ê百姓hoah-hiàm，親像踏葡萄ê一樣。Só͘-í lí tio̍h tùi in soan-thoân che it-chhè ê ōe, lâi kong-kek in, kóng, Iâ-hô-hoa beh tùi téng-bīn âu-kiò, tùi I khiā-khí ê sèng-só͘ chhut-siaⁿ, tùi I ê iûⁿ-kûn tōa-siaⁿ âu-kiò; I beh tùi tōe-chiūⁿ lóng-chóng ê peh-sìⁿ hoah-hiàm, chhin-chhiūⁿ ta̍h phû-tô--ê chi̍t-iūⁿ.

31Beh有hoah ê聲聽到地極；因為耶和華beh kap列國計較；見有血氣ê，祂beh kap in爭辯；論到pháiⁿ人，祂beh將in交hō͘刀劍；這是耶和華講ê。Beh ū hoah ê siaⁿ thiaⁿ kàu tōe-ke̍k; in-ūi Iâ-hô-hoa beh kap lia̍t-kok kè-kàu; kìⁿ ū hiat-khì--ê, I beh kap in cheng-piān; lūn-kàu pháiⁿ-lâng, I beh chiong in kau hō͘ to-kiàm; che sī Iâ-hô-hoa kóng--ê.

32萬軍ê耶和華án-ni講，看ah，beh有災厄tùi chit國發到hit國；koh有大報頭風tùi地極起。Bān-kun ê Iâ-hô-hoa án-ni kóng, Khòaⁿ ah, beh ū chai-ē tùi chit-kok hoat kàu hit-kok; koh ū tōa pò-thâu-hong tùi tōe-ke̍k khí.

33當hit日，耶和華所thâi-ê，tùi地ê chit-pêng到地ê hit-pêng lóng有；無人啼哭，無人kā伊收拾，無人kā伊埋葬；beh成做地上ê糞埽。Tng hit-ji̍t, Iâ-hô-hoa só͘ thâi--ê, tùi tōe ê chit-pêng kàu tōe ê hit-pêng lóng ū; bô lâng thî-khàu, bô lâng kā i siu-si̍p, bô lâng kā i bâi-chòng; beh chiâⁿ-chòe tōe-chiūⁿ ê pùn-sò.

34牧者ah，lín tio̍h哀哭喉叫；羊群ê頭目ah，lín tio̍h kō tī火灰中；因為lín受thâi kap分散ê日期已經到；lín beh倒落去親像人所歡喜ê器具ka-la̍uh。Bo̍k-chiá ah, lín tio̍h ai-khàu âu-kiò; iûⁿ-kûn ê thâu-ba̍k ah, lín tio̍h kō tī hé-hu-tiong; in-ūi lín siū-thâi kap hun-sòaⁿ ê ji̍t-kî í-keng kàu; lín beh tó--lo̍h-khì chhin-chhiūⁿ lâng só͘ hoaⁿ-hí ê khì-kū ka-la̍uh.

35牧者無路thang逃走，羊群ê頭目亦無路thang脫離。Bo̍k-chiá bô lō͘ thang tô-cháu, iûⁿ-kûn ê thâu-ba̍k ia̍h bô lō͘ thang thoat-lī.

36有牧者喉叫ê聲，有羊群ê頭目teh哀哭；因為耶和華hō͘ in ê草場拋荒。Ū bo̍k-chiá âu-kiò ê siaⁿ, ū iûⁿ-kûn ê thâu-ba̍k teh ai-khàu; in-ūi Iâ-hô-hoa hō͘ in ê chháu-tiûⁿ pha-hng.

37耶和華發出猛烈ê受氣；平安ê羊寮成做冷靜。Iâ-hô-hoa hoat-chhut béng-lia̍t ê siū-khì; pêng-an ê iûⁿ-tiâu chiâⁿ-chòe léng-chēng.

38祂親像獅離開伊ê穴；因為欺壓ê猛烈koh因為祂受氣ê猛烈；in ê地lóng成做thang gông-ngia̍h-ê。I chhin-chhiūⁿ sai lī-khui i ê hia̍t; in-ūi khi-ap ê béng-lia̍t koh in-ūi I siū-khì ê béng-lia̍t; in ê tōe lóng chiâⁿ-chòe thang gông-ngia̍h--ê.