1當猶大王約西亞ê kiáⁿ Iok-ngá-kèng ê四年，就是巴比倫王Nî-pò͘-kah-nî-sat元年，有論起猶大百姓ê話臨到耶利米。Tng Iû-tāi ông Iok-se-a ê kiáⁿ Iok-ngá-kèng ê sì--nî, chiū-sī Pa-pí-lûn ông Nî-pò͘-kah-nî-sat goân--nî, ū lūn-khí Iû-tāi peh-sìⁿ ê ōe lîm-kàu Iâ-lī-bí.

2先知耶利米就將chit-ê話對猶大眾百姓，以及一切khiā起耶路撒冷ê人講：Sian-ti Iâ-lī-bí chiū chiong chit ê ōe tùi Iû-tāi chèng peh-sìⁿ, í-ki̍p it-chhè khiā-khí Iâ-lō͘-sat-léng ê lâng kóng:

3Tùi猶大王A-bûn ê kiáⁿ約西亞十三年，到taⁿ，二十三年久，有耶和華ê話臨到我；我已經對lín講；koh早早起來講；獨獨lín m̄聽。Tùi Iû-tāi ông A-bûn ê kiáⁿ Iok-se-a cha̍p-saⁿ--nî, kàu taⁿ, jī-cha̍p-saⁿ nî kú, ū Iâ-hô-hoa ê ōe lîm-kàu góa; góa í-keng tùi lín kóng; koh chá-chá khí-lâi kóng; to̍k-to̍k lín m̄-thiaⁿ.

4耶和華也早早起來，差祂ê奴僕眾先知到lín chia；但是lín無聽thàn，亦無俯耳孔來聽。Iâ-hô-hoa iā chá-chá khí--lâi, chhe I ê lô͘-po̍k chèng sian-ti kàu lín chia; nā-sī lín bô thiaⁿ-thàn, ia̍h bô àⁿ hī-khang lâi thiaⁿ.

5伊講，Lín ta̍k人tio̍h oa̍t頭離開伊ê pháiⁿ路，kap lín所做ê pháiⁿ；就thang khiā起耶和華所賞賜lín，kap lín ê列祖ê地，tùi古早到永遠。I kóng, Lín ta̍k-lâng tio̍h oa̍t-thâu lī-khui i ê pháiⁿ-lō͘, kap lín só͘ chòe ê pháiⁿ; chiū thang khiā-khí Iâ-hô-hoa só͘ siúⁿ-sù lín, kap lín ê lia̍t-chó͘ ê tōe, tùi kó͘-chá kàu éng-oán.

6M̄-thang thàn別號ê上帝，服事跪拜in；m̄-thang用lín ê手所做ê，來惹我ê受氣；án-ni我就無降災厄hō͘ lín。M̄-thang thàn pa̍t-hō ê siōng-tè, ho̍k-sāi kūi-pài in; m̄-thang ēng lín ê chhiú só͘ chòe--ê, lâi jiá Góa ê siū-khì; án-ni Góa chiū bô kàng chai-ē hō͘ lín.

7總是lín無聽thàn我，竟然用手所做ê，惹我ê受氣，陷害家己；這是耶和華講ê。Chóng-sī lín bô thiaⁿ-thàn Góa, kèng-jiân ēng chhiú só͘ chòe--ê, jiá Góa ê siū-khì, hām-hāi ka-kī; che sī Iâ-hô-hoa kóng--ê.

8所以萬軍ê耶和華án-ni講，因為lín無聽thàn我ê話，Só͘-í bān-kun ê Iâ-hô-hoa án-ni kóng, In-ūi lín bô thiaⁿ-thàn Góa ê ōe,

9看ah，我beh召北方chiah-ê族，kap我ê奴僕巴比倫王Nî-pò͘-kah-nî-sat，來攻擊chit所在，kap chit所在khiā起ê百姓，以及四圍ê列邦，我beh一盡剿滅in，hō͘ in做thang gông-ngia̍h，thang譏刺，永遠拋荒ê所在；這是耶和華講ê。khòaⁿ ah, Góa beh tiàu pak-hng chiah ê cho̍k, kap Góa ê lô͘-po̍k Pa-pí-lûn ông Nî-pò͘-kah-nî-sat, lâi kong-kek chit só͘-chāi, kap chit só͘-chāi khiā-khí ê peh-sìⁿ, í-ki̍p sì-ûi ê lia̍t-pang, Góa beh it-chīn châu-bia̍t in, hō͘ in chòe thang gông-ngia̍h, thang ki-chhì, éng-oán pha-hng ê só͘-chāi; che sī Iâ-hô-hoa kóng--ê.

10Koh in中間歡喜ê聲，快樂ê聲，新kiáⁿ婿ê聲，新娘ê聲，挨磨ê聲，kap燈ê光，我beh hō͘ in lóng soah。Koh in tiong-kan hoaⁿ-hí ê siaⁿ, khoài-lo̍k ê siaⁿ, sin-kiáⁿ-sài ê siaⁿ, sin-niû ê siaⁿ, oe-bō ê siaⁿ, kap teng ê kng, Góa beh hō͘ in lóng soah.

11全地的確拋荒，hō͘人gông-ngia̍h；chiah-ê列邦beh服事巴比倫王七十年。Choân-tōe tek-khak pha-hng, hō͘ lâng gông-ngia̍h; chiah ê lia̍t-pang beh ho̍k-sāi Pa-pí-lûn ông chhit-cha̍p-nî.

12七十年已經滿，我beh刑罰巴比倫王，kap伊ê國ê罪，koh hō͘ Ka-le̍k-tí人ê地永遠拋荒；這是耶和華講ê。Chhit-cha̍p-nî í-keng móa, Góa beh hêng-hoa̍t Pa-pí-lûn ông, kap i ê kok ê chōe, koh hō͘ Ka-le̍k-tí lâng ê tōe éng-oán pha-hng; che sī Iâ-hô-hoa kóng--ê.

13我beh用我所講攻擊hit-ê地ê事，lóng到tī in；就是見若記tī chit本冊，耶利米所論起chiah-ê國所讖語ê。Góa beh ēng Góa só͘ kóng kong-kek hit-ê tōe ê sū, lóng kàu tī in; chiū-sī kìⁿ-nā kì tī chit pún chheh, Iâ-lī-bí só͘ lūn-khí chiah ê kok só͘ chhàm-gú--ê.

14因為有chōe-chōe國，kap大ê君王，beh用in Ka-le̍k-tí人做奴僕；我亦beh照in ê所行，kap in ê手所做ê，報應in。In-ūi ū chōe-chōe kok, kap tōa ê kun-ông, beh ēng in Ka-le̍k-tí lâng chòe lô͘-po̍k; Góa ia̍h beh chiàu in ê só͘ kiâⁿ, kap in ê chhiú só͘ chòe--ê, pò-èng in.

15耶和華，以色列ê上帝，對我án-ni講，你tùi我ê手接chit杯受氣ê酒，hō͘我所差你去ê列國lim。Iâ-hô-hoa, Í-sek-lia̍t ê Siōng-tè, tùi góa án-ni kóng, Lí tùi Góa ê chhiú chih chit poe siū-khì ê chiú, hō͘ Góa só͘ chhe lí khì ê lia̍t-kok lim.

16In lim了就顛顛倒倒，亦beh發狂；因為我hō͘刀劍到in中間。In lim-liáu chiū tian-tian tó-tó, ia̍h beh hoat-kông; in-ūi Góa hō͘ to-kiàm kàu in tiong-kan.

17我就tùi耶和華ê手接chit-ê杯；hō͘耶和華所差我去ê列國lim伊。Góa chiū tùi Iâ-hô-hoa ê chhiú chih chit ê poe; hō͘ Iâ-hô-hoa só͘ chhe góa khì ê lia̍t-kok lim--i.

18就是耶路撒冷kap猶大chiah-ê城，以及in ê列王貴族；hō͘ in拋荒；做thang gông-ngia̍h，thang譏刺，thang咒詛ê，親像今á日一樣。Chiū-sī Iâ-lō͘-sat-léng kap Iû-tāi chiah ê siâⁿ, í-ki̍p in ê lia̍t-ông kùi-cho̍k; hō͘ in pha-hng; chòe thang gông-ngia̍h, thang ki-chhì, thang chiù-chó͘--ê, chhin-chhiūⁿ kin-á-ji̍t chi̍t-iūⁿ.

19Koh埃及王法老，kap伊ê人臣、貴族、眾百姓；Koh Ai-ki̍p ông Hoat-ló, kap i ê jîn-sîn, kùi-cho̍k, chèng peh-sìⁿ;

20kap相chham-chhap ê百姓，O͘-su地chiah-ê王，腓利士地chiah-ê王，A-si̍t-ki-lûn、Ka-sat、Í-kek-lûn，以及A-si̍t-tu̍t所chhun ê人；kap saⁿ-chham-chhap ê peh-sìⁿ, O͘-su tōe chiah ê ông, Hui-lī-sū tōe chiah ê ông, A-si̍t-ki-lûn, Ka-sat, Í-kek-lûn, í-ki̍p A-si̍t-tu̍t só͘ chhun ê lâng;

21koh Í-tong、Mô͘-ap、kap A-bûn ê後裔；koh Í-tong, Mô͘-ap, kap A-bûn ê hō͘-è;

22Chhui-lô列王、Se-tùn列王、海外ê海嶼ê列王；Chhui-lô lia̍t-ông, Se-tùn lia̍t-ông, hái-gōa ê hái-sū ê lia̍t-ông;

23Tí-tàn、Thê-má、Pò͘-su，kap一切剃鬢邊ê；Tí-tàn, Thê-má, Pò͘-su, kap it-chhè thì pìn-piⁿ--ê;

24A-lat-pek ê列王，tiàm tī曠野相chham-chhap ê百姓ê列王；A-lat-pek ê lia̍t-ông, tiàm tī khòng-iá saⁿ-chham-chhap ê peh-sìⁿ ê lia̍t-ông;

25Sim-lī ê列王、Í-lân ê列王、Bí-thài ê列王；Sim-lī ê lia̍t-ông, Í-lân ê lia̍t-ông, Bí-thài ê lia̍t-ông;

26北方遠近ê列王，chit-ê hit-ê，以及天下萬國lim伊；以後Si-sa-khek王亦beh lim伊。pak-hng hn̄g-kūn ê lia̍t-ông, chit-ê hit-ê, í-ki̍p thiⁿ-ē bān-kok lim--i; í-āu Si-sa-khek ông ia̍h beh lim--i.

27你tio̍h kā in講，萬軍ê耶和華，以色列ê上帝，án-ni講，Lín tio̍h lim，來醉，來吐，來跋倒；無koh起來；因為我hō͘刀劍到lín中間。Lí tio̍h kā in kóng, Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lín tio̍h lim, lâi chùi, lâi thò͘, lâi poa̍h-tó; bô koh khí--lâi; in-ūi Góa hō͘ to-kiàm kàu lín tiong-kan.

28In若m̄肯對你ê手接chit-ê杯去lim，你就tio̍h kā in講，萬軍ê耶和華án-ni講，Lín決斷tio̍h lim。In nā m̄-khéng tùi lí ê chhiú chih chit ê poe khì lim, lí chiū tio̍h kā in kóng, Bān-kun ê Iâ-hô-hoa án-ni kóng, Lín koat-toàn tio̍h lim.

29因為我降災厄tùi hit-ê用我ê名來稱ê城起手，lín能一盡免刑罰mah？的確bōe免得；因為我beh命令刀劍臨到地上lóng總ê百姓；這是萬軍ê耶和華講ê。In-ūi Góa kàng chai-ē tùi hit ê ēng Góa ê miâ lâi chheng ê siâⁿ khí-chhiú, lín ōe it-chīn bián hêng-hoa̍t mah? tek-khak bōe bián-tit; in-ūi Góa beh bēng-lēng to-kiàm lîm-kàu tōe-chiūⁿ lóng-chóng ê peh-sìⁿ; che sī bān-kun ê Iâ-hô-hoa kóng--ê.

30所以你tio̍h對in宣傳這一切ê話，來攻擊in，講，耶和華beh對頂面喉叫，對伊khiā起ê聖所出聲，對伊ê羊群大聲喉叫；伊beh對地上lóng總ê百姓hoah-hiàm，親像踏葡萄ê一樣。Só͘-í lí tio̍h tùi in soan-thoân che it-chhè ê ōe, lâi kong-kek in, kóng, Iâ-hô-hoa beh tùi téng-bīn âu-kiò, tùi I khiā-khí ê sèng-só͘ chhut-siaⁿ, tùi I ê iûⁿ-kûn tōa-siaⁿ âu-kiò; I beh tùi tōe-chiūⁿ lóng-chóng ê peh-sìⁿ hoah-hiàm, chhin-chhiūⁿ ta̍h phû-tô--ê chi̍t-iūⁿ.

31Beh有hoah ê聲聽到地極；因為耶和華beh kap列國計較；見有血氣ê，祂beh kap in爭辯；論到pháiⁿ人，祂beh將in交hō͘刀劍；這是耶和華講ê。Beh ū hoah ê siaⁿ thiaⁿ kàu tōe-ke̍k; in-ūi Iâ-hô-hoa beh kap lia̍t-kok kè-kàu; kìⁿ ū hiat-khì--ê, I beh kap in cheng-piān; lūn-kàu pháiⁿ-lâng, I beh chiong in kau hō͘ to-kiàm; che sī Iâ-hô-hoa kóng--ê.

32萬軍ê耶和華án-ni講，看ah，beh有災厄tùi chit國發到hit國；koh有大報頭風tùi地極起。Bān-kun ê Iâ-hô-hoa án-ni kóng, Khòaⁿ ah, beh ū chai-ē tùi chit-kok hoat kàu hit-kok; koh ū tōa pò-thâu-hong tùi tōe-ke̍k khí.

33當hit日，耶和華所thâi-ê，tùi地ê chit-pêng到地ê hit-pêng lóng有；無人啼哭，無人kā伊收拾，無人kā伊埋葬；beh成做地上ê糞埽。Tng hit-ji̍t, Iâ-hô-hoa só͘ thâi--ê, tùi tōe ê chit-pêng kàu tōe ê hit-pêng lóng ū; bô lâng thî-khàu, bô lâng kā i siu-si̍p, bô lâng kā i bâi-chòng; beh chiâⁿ-chòe tōe-chiūⁿ ê pùn-sò.

34牧者ah，lín tio̍h哀哭喉叫；羊群ê頭目ah，lín tio̍h kō tī火灰中；因為lín受thâi kap分散ê日期已經到；lín beh倒落去親像人所歡喜ê器具ka-la̍uh。Bo̍k-chiá ah, lín tio̍h ai-khàu âu-kiò; iûⁿ-kûn ê thâu-ba̍k ah, lín tio̍h kō tī hé-hu-tiong; in-ūi lín siū-thâi kap hun-sòaⁿ ê ji̍t-kî í-keng kàu; lín beh tó--lo̍h-khì chhin-chhiūⁿ lâng só͘ hoaⁿ-hí ê khì-kū ka-la̍uh.

35牧者無路thang逃走，羊群ê頭目亦無路thang脫離。Bo̍k-chiá bô lō͘ thang tô-cháu, iûⁿ-kûn ê thâu-ba̍k ia̍h bô lō͘ thang thoat-lī.

36有牧者喉叫ê聲，有羊群ê頭目teh哀哭；因為耶和華hō͘ in ê草場拋荒。Ū bo̍k-chiá âu-kiò ê siaⁿ, ū iûⁿ-kûn ê thâu-ba̍k teh ai-khàu; in-ūi Iâ-hô-hoa hō͘ in ê chháu-tiûⁿ pha-hng.

37耶和華發出猛烈ê受氣；平安ê羊寮成做冷靜。Iâ-hô-hoa hoat-chhut béng-lia̍t ê siū-khì; pêng-an ê iûⁿ-tiâu chiâⁿ-chòe léng-chēng.

38祂親像獅離開伊ê穴；因為欺壓ê猛烈koh因為祂受氣ê猛烈；in ê地lóng成做thang gông-ngia̍h-ê。I chhin-chhiūⁿ sai lī-khui i ê hia̍t; in-ūi khi-ap ê béng-lia̍t koh in-ūi I siū-khì ê béng-lia̍t; in ê tōe lóng chiâⁿ-chòe thang gông-ngia̍h--ê.

1猶大王約西亞ê kiáⁿ Iok-ngá-kèng起頭坐位ê時，有chit-ê話tùi耶和華來，講，耶和華án-ni講，Iû-tāi ông Iok-se-a ê kiáⁿ Iok-ngá-kèng khí-thâu chē-ūi ê sî, ū chit ê ōe tùi Iâ-hô-hoa lâi, kóng, Iâ-hô-hoa án-ni kóng,

2你tio̍h khiā tī耶和華ê厝ê院內；有猶大chiah-ê城來耶和華ê厝敬拜ê；你tio̍h用我lóng總命令你對in講ê話，kā in講；m̄-thang少一句。Lí tio̍h khiā tī Iâ-hô-hoa ê chhù ê īⁿ-lāi; ū Iû-tāi chiah ê siâⁿ lâi Iâ-hô-hoa ê chhù kèng-pài--ê; lí tio̍h ēng Góa lóng-chóng bēng-lēng lí tùi in kóng ê ōe, kā in kóng; m̄-thang chió chi̍t-kù.

3Kiám-chhái in肯聽thàn，ta̍k人回頭離開in ê pháiⁿ路；就我為tio̍h in所行ê pháiⁿ，想beh降hō͘ in ê災厄，thang退悔。Kiám-chhái in khéng thiaⁿ-thàn, ta̍k-lâng hôe-thâu lī-khui in ê pháiⁿ-lō͘; chiū Góa ūi-tio̍h in só͘ kiâⁿ ê pháiⁿ, siūⁿ beh kàng hō͘ in ê chai-ē, thang thè-hóe.

4你tio̍h kā in講，耶和華án-ni講，Lín若m̄肯聽我，來行我所設tī lín面前ê律法；Lí tio̍h kā in kóng, Iâ-hô-hoa án-ni kóng, Lín nā m̄-khéng thiaⁿ Góa, lâi kiâⁿ Góa só͘ siat tī lín bīn-chêng ê lu̍t-hoat;

5來聽thàn我所差到lín hia我chiah-ê奴僕，眾先知ê話；就是我早早起來所差ê，(總是lín無聽) ；lâi thiaⁿ-thàn Góa só͘ chhe kàu lín hia Góa chiah ê lô͘-po̍k, chèng sian-ti ê ōe; chiū-sī Góa chá-chá khí--lâi só͘ chhe--ê, (chóng-sī lín bô thiaⁿ);

6就我beh hō͘ chit間厝親像Sī-lô；hō͘ chit-ê城做地上萬國咒詛ê話柄。chiū Góa beh hō͘ chit keng chhù chhin-chhiūⁿ Sī-lô; hō͘ chit ê siâⁿ chòe tōe-chiūⁿ bān-kok chiù-chó͘ ê ōe-pìⁿ.

7耶利米tī耶和華ê厝內講chiah-ê話；祭司、先知，kap眾百姓lóng有聽見。Iâ-lī-bí tī Iâ-hô-hoa ê chhù-lāi kóng chiah-ê ōe; chè-si, sian-ti, kap chèng peh-sìⁿ lóng ū thiaⁿ-kìⁿ.

8耶利米將耶和華吩咐伊對眾百姓講ê話，一盡講了；祭司，先知，kap眾百姓lóng來掠伊，講，你的確tio̍h死。Iâ-lī-bí chiong Iâ-hô-hoa hoan-hù i tùi chèng peh-sìⁿ kóng ê ōe, it-chīn kóng-liáu; chè-si, sian-ti, kap chèng peh-sìⁿ lóng lâi lia̍h--i, kóng, Lí tek-khak tio̍h sí.

9你啥事託耶和華ê名來讖語，講，chit間厝beh親像Sī-lô，chit-ê城beh拋荒，無人khiā起ah？Tùi án-ni，眾百姓lóng tī耶和華ê厝聚集到耶利米hia。Lí siáⁿ-sū thok Iâ-hô-hoa ê miâ lâi chhàm-gú, kóng, Chit keng chhù beh chhin-chhiūⁿ Sī-lô, chit ê siâⁿ beh pha-hng, bô lâng khiā-khí ah? Tùi án-ni chèng peh-sìⁿ lóng tī Iâ-hô-hoa ê chhù chū-chi̍p kàu Iâ-lī-bí hia.

10猶大ê貴族聽見chiah-ê tāi-chì，就tùi王宮上到耶和華ê厝；坐tī耶和華ê厝新門ê門口。Iû-tāi ê kùi-cho̍k thiaⁿ-kìⁿ chiah ê tāi-chì, chiū tùi ông-kiong chiūⁿ-kàu Iâ-hô-hoa ê chhù; chē tī Iâ-hô-hoa ê chhù sin-mn̂g ê mn̂g-kháu.

11祭司、先知，對貴族kap眾百姓講，Chit人tio̍h擬伊死罪；因為伊有讖語攻擊chit-ê城；tú-tú親像lín親耳所聽ê。Chè-si, sian-ti, tùi kùi-cho̍k kap chèng peh-sìⁿ kóng, Chit lâng tio̍h gí i sí-chōe; in-ūi i ū chhàm-gú kong-kek chit ê siâⁿ; tú-tú chhin-chhiūⁿ lín chhin-hī só͘ thiaⁿ--ê.

12耶利米就對chiah-ê貴族kap眾百姓講，耶和華差我讖語，攻擊chit間厝，kap chit-ê城；講起lín所有聽見chiah-ê一切ê話。Iâ-lī-bí chiū tùi chiah ê kùi-cho̍k kap chèng peh-sìⁿ kóng, Iâ-hô-hoa chhe góa chhàm-gú, kong-kek chit keng chhù, kap chit ê siâⁿ; kóng-khí lín só͘ ū thiaⁿ-kìⁿ chiah-ê it-chhè ê ōe.

13所以lín taⁿ tio̍h改lín ê路，kap lín ê所做；聽thàn lín ê上帝耶和華ê聲；耶和華就beh退悔祂所beh降雨lín ê災厄。Só͘-í lín taⁿ tio̍h kóe lín ê lō͘, kap lín ê só͘ chòe; thiaⁿ-thàn lín ê Siōng-tè Iâ-hô-hoa ê siaⁿ; Iâ-hô-hoa chiū beh thè-hóe I só͘ beh kàng hō͘ lín ê chai-ē.

14論到我，看ah，我tī lín ê手頭；lín看做好，看做應該ê，就照án-ni款待我。Lūn-kàu góa, khòaⁿ ah, góa tī lín ê chhiú-thâu; lín khòaⁿ chòe hó, khòaⁿ chòe eng-kai--ê, chiū chiàu án-ni khoán-thāi góa.

15總是lín tio̍h確實知；若害死我，就beh hō͘無罪ê血歸tī lín，kap chit-ê城，kap其中khiā起ê百姓；因為耶和華實在有差我到lín chia，將chiah-ê一切ê話，傳到lín ê耳孔。Chóng-sī lín tio̍h khak-si̍t chai; nā hāi-sí góa, chiū beh hō͘ bô-chōe ê huih kui tī lín, kap chit ê siâⁿ, kap kî-tiong khiā-khí ê peh-sìⁿ; in-ūi Iâ-hô-hoa si̍t-chāi ū chhe góa kàu lín chia, chiong chiah-ê it-chhè ê ōe, thoân kàu lín ê hī-khang.

16貴族kap眾百姓就kā祭司先知講，Chit人m̄應該gí伊死罪；因為伊是託耶和華，咱ê上帝ê名，來對咱講。Kùi-cho̍k kap chèng peh-sìⁿ chiū kā chè-si sian-ti kóng, Chit-lâng m̄ eng-kai gí i sí-chōe; in-ūi i sī thok Iâ-hô-hoa, lán ê Siōng-tè ê miâ, lâi tùi lán kóng.

17國內ê老大就有kúi-nā人起來，對聚會ê眾百姓講，Kok-lāi ê lāu-tōa chiū ū kúi-nā lâng khí--lâi, tùi chū-hōe ê chèng peh-sìⁿ kóng,

18當猶大王Hi-se-ka ê日，有Mô͘-lī-sa人，Bí-ka，對猶大ê眾人讖語，講，萬軍ê耶和華án-ni講，錫安beh hō͘人lôe親像田園；耶路撒冷beh變做土堆；chit間殿ê山beh親像樹林高ê所在。Tng Iû-tāi ông Hi-se-ka ê ji̍t, ū Mô͘-lī-sa lâng, Bí-ka, tùi Iû-tāi ê chèng-lâng chhàm-gú, kóng, Bān-kun ê Iâ-hô-hoa án-ni kóng, Sek-an beh hō͘ lâng lôe chhin-chhiūⁿ chhân-hn̂g; Iâ-lō͘-sat-léng beh pìⁿ-chòe thô͘-tui; chit keng tiān ê soaⁿ beh chhin-chhiūⁿ chhiū-nâ koâiⁿ ê só͘-chāi.

19猶大王Hi-se-ka kap眾猶大人，kiám有hō͘伊死mah？Hi-se-ka kiám m̄是敬畏耶和華，懇求耶和華ê恩；耶和華就退悔伊所講beh降hō͘ in ê災厄mah？Taⁿ若害死chit人，咱就是做大pháiⁿ，害家己ê性命。Iû-tāi ông Hi-se-ka kap chèng Iû-tāi lâng, kiám ū hō͘ i sí mah? Hi-se-ka kiám m̄-sī kèng-ùi Iâ-hô-hoa, khún-kiû Iâ-hô-hoa ê un; Iâ-hô-hoa chiū thè-hóe I só͘ kóng beh kàng hō͘ in ê chai-ē mah? Taⁿ nā hāi-sí chit-lâng, lán chiū-sī chòe tōa pháiⁿ, hāi ka-kī ê sìⁿ-miā.

20Koh有一人託耶和華ê名來宣傳；是Ki-lia̍t-iâ-lîm人Sī-má-ngá ê kiáⁿ O͘-lī-a；伊照耶利米一切ê話來宣傳，攻擊chit-ê城kap chit-ê地。Koh ū chi̍t-lâng thok Iâ-hô-hoa ê miâ lâi soan-thoân; sī Ki-lia̍t-iâ-lîm lâng Sī-má-ngá ê kiáⁿ O͘-lī-a; i chiàu Iâ-lī-bí it-chhè ê ōe lâi soan-thoân, kong-kek chit ê siâⁿ kap chit ê tōe.

21Iok-ngá-kèng王kap伊ê眾勇士貴族聽見伊ê話，王就想beh hō͘伊死；O͘-lī-a聽見就驚，走去埃及。Iok-ngá-kèng ông kap i ê chèng ióng-sū kùi-cho̍k thiaⁿ-kìⁿ i ê ōe, ông chiū siūⁿ beh hō͘ i sí; O͘-lī-a thiaⁿ-kìⁿ chiū kiaⁿ, cháu-khì Ai-ki̍p.

22Iok-ngá-kèng王差人去埃及，就是A-kek-pho ê kiáⁿ Í-lī-ná-tan kap kúi-nā人到埃及。Iok-ngá-kèng ông chhe lâng khì Ai-ki̍p, chiū-sī A-kek-pho ê kiáⁿ Í-lī-ná-tan kap kúi-nā lâng kàu Ai-ki̍p.

23In就tùi埃及掠O͘-lī-a出來，送到Iok-ngá-kèng王hia；王用刀thâi伊，hiat伊ê身屍tī平常人ê墓。In chiū tùi Ai-ki̍p lia̍h O͘-lī-a chhut--lâi, sàng kàu Iok-ngá-kèng ông hia; ông ēng to thâi i, hiat i ê sin-si tī pêng-siông lâng ê bōng.

24總是Sa-hoan ê kiáⁿ A-hi-kam保護耶利米，chiah無交tī百姓ê手，hō͘伊死。Chóng-sī Sa-hoan ê kiáⁿ A-hi-kam pó-hō͘ Iâ-lī-bí, chiah bô kau tī peh-sìⁿ ê chhiú, hō͘ i sí.

1猶大王約西亞ê kiáⁿ Iok-ngá-kèng起頭坐位ê時，有一個話對耶和華臨到耶利米講，Iû-tāi ông Iok-se-a ê kiáⁿ Iok-ngá-kèng khí-thâu chē-ūi ê sî, ū chi̍t ê ōe tùi Iâ-hô-hoa lîm-kàu Iâ-lī-bí kóng,

2耶和華對我án-ni講，你為家己做索kap擔，hē tī你ê頷頸；Iâ-hô-hoa tùi góa án-ni kóng, Lí ūi ka-kī chòe soh kap taⁿ, hē tī lí ê ām-kún;

3託重來耶路撒冷見猶大王Se-tí-ka hiah-ê使者ê手；hō͘ in帶hiah-ê物到Í-tong王、Mô͘-ap王、A-bûn族ê王、Chhui-lô王、Se-tùn王hia。thok-tiōng lâi Iâ-lō͘-sat-léng kìⁿ Iû-tāi ông Se-tí-ka hiah ê sù-chiá ê chhiú; hō͘ in tòa hiah ê mi̍h kàu Í-tong ông, Mô͘-ap ông, A-bûn cho̍k ê ông, Chhui-lô ông, Se-tùn ông hia.

4Koh命令使者對in ê主講，萬軍ê耶和華，以色列ê上帝án-ni講，Lín tio̍h對lín ê主án-ni講，Koh bēng-lēng sù-chiá tùi in ê chú kóng, Bān-kun ê Iâ-hô-hoa, Í-sek-lia̍t ê Siōng-tè án-ni kóng, Lín tio̍h tùi lín ê chú án-ni kóng,

5我用我ê大權能，kap我伸出ê手，創造地kap地上ê人，以及cheng-siⁿ；將伊賞賜我所看做合宜ê。Góa ēng Góa ê tōa koân-lêng, kap Góa chhun-chhut ê chhiú, chhòng-chō tōe kap tōe-chiūⁿ ê lâng, í-ki̍p cheng-siⁿ; chiong i siúⁿ-sù Góa só͘ khòaⁿ-chòe ha̍p-gî--ê.

6Taⁿ我將chiah-ê地lóng交hō͘我ê奴僕巴比倫王，Nî-pò͘-kah-nî-sat ê手；我亦將田野ê走獸hō͘伊，做伊ê差用。Taⁿ Góa chiong chiah ê tōe lóng kau hō͘ Góa ê lô͘-po̍k Pa-pí-lûn ông, Nî-pò͘-kah-nî-sat ê chhiú; Góa ia̍h chiong chhân-iá ê cháu-siù hō͘ i, chòe i ê chhe-ēng.

7列國lóng beh服事伊，以及伊ê kiáⁿ，伊ê孫；直到伊本國tú-tio̍h報應ê日到；hit時chōe-chōe國kap大君王beh用伊做奴僕。Lia̍t-kok lóng beh ho̍k-sāi i, í-ki̍p i ê kiáⁿ, i ê sun; ti̍t-kàu i pún-kok tú-tio̍h pò-èng ê ji̍t kàu; hit-sî chōe-chōe kok kap tōa kun-ông beh ēng i chòe lô͘-po̍k.

8若有甚麼百姓，甚麼國，m̄肯服事chit-ê巴比倫王Nî-pò͘-kah-nî-sat，亦m̄肯將頷頸掛巴比倫王ê擔ê；我beh用刀劍，用飢荒，用瘟疫刑罰hit-ê百姓，直到我借伊ê手來一盡滅in；這是耶和華講ê。Nā ū sím-mi̍h peh-sìⁿ, sím-mi̍h kok, m̄-khéng ho̍k-sāi chit ê Pa-pí-lûn ông Nî-pò͘-kah-nî-sat, ia̍h m̄-khéng chiong ām-kún kòa Pa-pí-lûn ông ê taⁿ--ê; Góa beh ēng to-kiàm, ēng ki-hng, ēng un-e̍k hêng-hoa̍t hit ê peh-sìⁿ, ti̍t-kàu Góa chioh i ê chhiú lâi it-chīn bia̍t in; che sī Iâ-hô-hoa kóng--ê.

9總是lín，lín m̄-thang聽lín ê先知，lín ê卜卦ê，lín ê圓夢ê，lín ê行邪術ê，lín ê司公；in kā lín講，Lín bōe致到服事巴比倫王。Chóng-sī lín, lín m̄-thang thiaⁿ lín ê sian-ti, lín ê pok-kòa--ê, lín ê oân-bāng--ê, lín ê kiâⁿ siâ-su̍t ê, lín ê sai-kong; in kā lín kóng, Lín bōe tì-kàu ho̍k-sāi Pa-pí-lûn ông.

10In對lín讖語白賊，beh hō͘ lín遷徙離開本所在遠遠；致到我趕lín出，hō͘ lín滅無。In tùi lín chhàm-gú pe̍h-chha̍t, beh hō͘ lín chhian-sóa lī-khui pún só͘-chāi hn̄g-hn̄g; tì-kàu Góa kóaⁿ lín chhut, hō͘ lín bia̍t-bô.

11獨獨若有甚麼百姓肯將頷頸掛巴比倫王ê擔，來服事伊ê，我beh hō͘伊猶原tòa tī本所在，thang種作，thang khiā起；這是耶和華講ê。To̍k-to̍k nā ū sím-mi̍h peh-sìⁿ khéng chiong ām-kún kòa Pa-pí-lûn ông ê taⁿ, lâi ho̍k-sāi i--ê, Góa beh hō͘ i iû-goân tòa tī pún só͘-chāi, thang chèng-choh, thang khiā-khí; che sī Iâ-hô-hoa kóng--ê.

12我就照chiah-ê一切ê話，對猶大王Se-tí-ka講，Tio̍h將lín ê頷頸掛巴比倫王ê擔，來服事伊kap伊ê百姓，chiah會得tio̍h活。Góa chiū chiàu chiah-ê it-chhè ê ōe, tùi Iû-tāi ông Se-tí-ka kóng, Tio̍h chiong lín ê ām-kún kòa Pa-pí-lûn ông ê taⁿ, lâi ho̍k-sāi i kap i ê peh-sìⁿ, chiah ōe tit-tio̍h oa̍h.

13你kap你ê百姓啥事beh因為刀劍，因為飢荒，因為瘟疫來死，照耶和華論起m̄肯服事巴比倫王hit號國 ê話ah？Lí kap lí ê peh-sìⁿ siáⁿ-sū beh in-ūi to-kiàm, in-ūi ki-hng, in-ūi un-e̍k lâi sí, chiàu Iâ-hô-hoa lūn-khí m̄-khéng ho̍k-sāi Pa-pí-lûn ông hit-hō kok ê ōe ah?

14Hiah-ê先知kā lín講，Lín bōe致到服事巴比倫王，莫得聽in；因為in對lín所宣傳ê是白賊。Hiah ê sian-ti kā lín kóng, Lín bōe tì-kàu ho̍k-sāi Pa-pí-lûn ông, bo̍h-tit thiaⁿ--in; in-ūi in tùi lín só͘ soan-thoân--ê sī pe̍h-chha̍t.

15耶和華講，我無差in，總是in託我ê名宣傳白賊；致到我將lín kap hiah-ê對lín宣傳ê先知，lóng趕出，相kap滅無。Iâ-hô-hoa kóng, Góa bô chhe in, chóng-sī in thok Góa ê miâ soan-thoân pe̍h-chha̍t; tì-kàu Góa chiong lín kap hiah ê tùi lín soan-thoân ê sian-ti, lóng kóaⁿ chhut, saⁿ-kap bia̍t-bô.

16我koh對chiah-ê祭司kap chit 國 ê眾百姓講，耶和華án-ni講，Lín m̄-thang聽hiah-ê先知對lín所讖語ê；in講，看ah，耶和華ê厝ê器具無jōa久beh tùi巴比倫tòa tò來；其實in對lín所宣傳ê，是白賊。Góa koh tùi chiah ê chè-si kap chit kok ê chèng peh-sìⁿ kóng, Iâ-hô-hoa án-ni kóng, Lín m̄-thang thiaⁿ hiah ê sian-ti tùi lín só͘ chhàm-gú--ê; in kóng, Khòaⁿ ah, Iâ-hô-hoa ê chhù ê khì-kū bô jōa-kú beh tùi Pa-pí-lûn tòa tò-lâi; kî-si̍t in tùi lín só͘ soan-thoân--ê, sī pe̍h-chha̍t.

17莫得聽in，tio̍h服事巴比倫王，來得tio̍h活；mih-sái hō͘ chit-ê城變做拋荒？Bo̍h-tit thiaⁿ--in, tio̍h ho̍k-sāi Pa-pí-lûn ông, lâi tit-tio̍h oa̍h; mih-sái hō͘ chit ê siâⁿ pìⁿ-chòe pha-hng?

18In若果然是先知，有耶和華ê話到tī in，in就tio̍h求萬軍ê耶和華，hō͘ hiah-ê tī耶和華ê厝，kap猶大ê王宮，kap耶路撒冷chhun ê器具，無搬去巴比倫。In nā kó-jiân sī sian-ti, ū Iâ-hô-hoa ê ōe kàu tī in, in chiū tio̍h kiû bān-kun ê Iâ-hô-hoa, hō͘ hiah-ê tī Iâ-hô-hoa ê chhù, kap Iû-tāi ê ông-kiong, kap Iâ-lō͘-sat-léng chhun ê khì-kū, bô poaⁿ khì Pa-pí-lûn.

19因為萬軍ê耶和華án-ni講，論到chiah-ê銅柱、銅海、盆座，kap留tī chit-ê城所chhun ê器具；In-ūi bān-kun ê Iâ-hô-hoa án-ni kóng, Lūn-kàu chiah ê tâng thiāu, tâng hái, phûn-chō, kap lâu tī chit ê siâⁿ só͘ chhun ê khì-kū;

20就是巴比倫王Nî-pò͘-kah-nî-sat掠猶大王Iok-ngá-kèng ê kiáⁿ Iâ-Ko-nî-ngá，kap猶大耶路撒冷chiah-ê尊貴ê人，tùi耶路撒冷到巴比倫ê時，所無搶去ê；chiū-sī Pa-pí-lûn ông Nî-pò͘-kah-nî-sat lia̍h Iû-tāi ông Iok-ngá-kèng ê kiáⁿ Iâ-ko-nî-ngá, kap Iû-tāi Iâ-lō͘-sat-léng chiah ê chun-kùi ê lâng, tùi Iâ-lō͘-sat-léng kàu Pa-pí-lûn ê sî, só͘ bô chhiúⁿ--khì-ê;

21實在萬軍ê耶和華以色列ê上帝án-ni講，論到lâu tī耶和華ê厝，kap猶大王宮，kap耶路撒冷ê器具，si̍t-chāi bān-kun ê Iâ-hô-hoa Í-sek-lia̍t ê Siōng-tè án-ni kóng, Lūn-kàu lâu tī Iâ-hô-hoa ê chhù, kap Iû-tāi ông-kiong, kap Iâ-lō͘-sat-léng ê khì-kū,

22Hiah-ê beh搬到巴比倫留tī-hia；到我眷顧in ê日，就我beh帶in上來，koh歸chit-ê所在；這是耶和華講ê。hiah-ê beh poaⁿ kàu Pa-pí-lûn lâu tī-hia; kàu Góa koàn-kò͘ in ê ji̍t, chiū Góa beh tòa in chiūⁿ-lâi, koh kui chit ê só͘-chāi; che sī Iâ-hô-hoa kóng--ê.