1耶和華ê話koh臨到我，講，Iâ-hô-hoa ê ōe koh lîm-kàu góa, kóng,

2你去ǹg耶路撒冷人ê耳孔叫講，耶和華án-ni講，你少年ê恩愛，婚姻ê愛情，你怎á樣tī曠野，tī bē-bat種作ê地，跟tè我；我lóng kā你記得。Lí khì ǹg Iâ-lō͘-sat-léng lâng ê hī-khang kiò kóng, Iâ-hô-hoa án-ni kóng, Lí siàu-liân ê un-ài, hun-in ê ài-chêng, lí cháiⁿ-á-iūⁿ tī khòng-iá, tī bē-bat chèng-choh ê tōe, kun-tè Góa; Góa lóng kā lí kì-tit.

3Hit時以色列做聖歸耶和華；做伊起頭熟ê土產；見若吞食伊ê，beh算做有罪；災厄beh臨到in；這是耶和華講ê。Hit-sî Í-sek-lia̍t chòe-sèng kui Iâ-hô-hoa; chòe I khí-thâu se̍k ê thó͘-sán; kìⁿ-nā thun-chia̍h i--ê, beh sǹg chòe ū chōe; chai-ē beh lîm-kàu in; che sī Iâ-hô-hoa kóng--ê.

4雅各ê家ah，以色列家ê ta̍k房頭ah，lín tio̍h聽耶和華ê話。Ngá-kok ê ke ah, Í-sek-lia̍t ke ê ta̍k pâng-thâu ah, lín tio̍h thiaⁿ Iâ-hô-hoa ê ōe.

5耶和華án-ni講，Lín ê列祖看我有甚麼不義，竟然離開我遠遠，去thàn hiah-ê虛假ê，來做虛假ê ah？Iâ-hô-hoa án-ni kóng, Lín ê lia̍t-chó͘ khòaⁿ Góa ū sím-mi̍h put-gī, kéng-jiân lī-khui Góa hn̄g-hn̄g, khì thàn hiah ê hu-ké--ê, lâi chòe hu-ké--ê ah?

6In亦無講，hit-ê chhōa咱出埃及地ê耶和華tī toh-lo̍h？伊是chhōa咱經過曠野、沙漠，kap深坑ê所在，炕旱死蔭ê地；無人經過，無人khiā起ê境界。In ia̍h bô kóng, Hit ê chhōa lán chhut Ai-ki̍p tōe ê Iâ-hô-hoa tī toh-lo̍h? I sī chhōa lán keng-kè khòng-iá, soa-bô͘, kap chhim-khiⁿ ê só͘-chāi, khòng-hān sí-ìm ê tōe; bô lâng keng-kè, bô lâng khiā-khí ê kéng-kài.

7我chhōa lín入肥ê地，hō͘ lín食hit中間ê果子kap好物；總是lín入來了，就phah lâ-sâm我ê地；hō͘我ê產業成做可惡ê。Góa chhōa lín ji̍p pûi ê tōe, hō͘ lín chia̍h hit tiong-kan ê ké-chí kap hó-mi̍h; chóng-sī lín ji̍p-lâi-liáu, chiū phah lâ-sâm Góa ê tōe; hō͘ Góa ê sán-gia̍p chiâⁿ-chòe khó-ò͘ⁿ--ê.

8祭司lóng無講，耶和華tī toh-lo̍h leh？講解律法ê m̄-bat我，官長悖謬我，先知靠Pa-le̍k來讖語，koh thàn無利益ê事。Chè-si lóng bô kóng, Iâ-hô-hoa tī toh-lo̍h leh? káng-kái lu̍t-hoat--ê m̄-bat Góa, koaⁿ-tiúⁿ pōe-biū Góa, sian-ti khò Pa-le̍k lâi chhàm-gú, koh thàn bô lī-ek ê sū.

9耶和華講，我因為án-ni beh kap lín爭辯；亦beh kap lín ê kiáⁿ-kiáⁿ孫孫爭辯。Iâ-hô-hoa kóng, Góa in-ūi án-ni beh kap lín cheng-piān; ia̍h beh kap lín ê kiáⁿ-kiáⁿ sun-sun cheng-piān.

10Lín tio̍h過去Ki-thê chiah-ê海嶼來觀看，差人去Ki-ta̍t留心查考；看bat有chit號事á無。Lín tio̍h kè-khì Ki-thê chiah ê hái-sū lâi koan-khòaⁿ, chhe lâng khì Ki-ta̍t liû-sim cha-khó; khòaⁿ bat ū chit-hō sū á-bô.

11Kiám有一國改換in ê上帝 mah？其實hiah-ê m̄是上帝；總是我ê百姓將in ê榮光來換hit-ê無利益ê。Kiám ū chi̍t-kok kóe-ōaⁿ in ê siōng-tè mah? kî-si̍t hiah-ê m̄-sī Siōng-tè; chóng-sī Góa ê peh-sìⁿ chiong in ê êng-kng lâi ōaⁿ hit-ê bô lī-ek--ê.

12Chiah-ê天ah，tio̍h因為chit-ê來gông-ngia̍h，極其驚惶，盡在冷靜；這是耶和華講ê。Chiah ê thiⁿ ah, tio̍h in-ūi chit-ê lâi gông-ngia̍h, ke̍k-kî kiaⁿ-hiâⁿ, chīn-chāi léng-chēng; che sī Iâ-hô-hoa kóng--ê.

13因為我ê百姓做兩項pháiⁿ-tāi，就是我做活水ê源頭，in離開我；koh為家己開池，是破裂bōe貯水ê池。In-ūi Góa ê peh-sìⁿ chòe nn̄g-hāng pháiⁿ-tāi, chiū-sī Góa chòe oa̍h-chúi ê goân-thâu, in lī-khui Góa; koh ūi ka-kī khui tî, sī phòa-li̍h bōe tóe chúi ê tî.

14以色列是奴僕mah？是家中生ê奴僕mah？為何成做受搶ê物ah？Í-sek-lia̍t sī lô͘-po̍k mah? Sī ke-tiong siⁿ ê lô͘-po̍k mah? Ūi-hô chiâⁿ-chòe siū chhiúⁿ ê mi̍h ah?

15勇ê獅ǹg伊hm̄-hm̄哮，出大聲，hō͘伊ê地拋荒；城亦lóng燒毀，無人khiā起。Ióng ê sai ǹg i hm̄-hm̄-háu, chhut tōa-siaⁿ, hō͘ i ê tōe pha-hng; siâⁿ ia̍h lóng sio-húi, bô lâng khiā-khí.

16Lô-hut人kap Tap-pí-le̍k人亦phah碎你ê頭殼頂。Lô-hut lâng kap Tap-pí-le̍k lâng ia̍h phah-chhùi lí ê thâu-khak-téng.

17Chit-ê事kiám m̄是你家己取ê mah？因為你ê上帝耶和華chhōa你行路ê時，你有棄sak伊。Chit ê sū kiám-m̄-sī lí ka-kī chhú--ê mah? in-ūi lí ê Siōng-tè Iâ-hô-hoa chhōa lí kiâⁿ-lō͘ ê sî, lí ū khì-sak I.

18Taⁿ你啥事tī埃及ê路，是beh lim Se-hat ê水mah？你啥事tī亞述ê路，是beh lim大河ê水mah？Taⁿ lí siáⁿ-sū tī Ai-ki̍p ê lō͘, sī beh lim Se-hat ê chúi mah? lí siáⁿ-sū tī A-su̍t ê lō͘, sī beh lim Tōa-hô ê chúi mah?

19你家己ê pháiⁿ beh警戒你；你悖逆ê事beh責備你；tùi án-ni thang知，thang看出你棄sak你ê上帝耶和華，無存敬畏我ê心，就是pháiⁿ koh艱苦ê事；這是主萬軍ê耶和華講ê。Lí ka-kī ê pháiⁿ beh kéng-kài lí; lí pōe-ge̍k ê sū beh chek-pī lí; tùi án-ni thang chai, thang khòaⁿ-chhut lí khì-sak lí ê Siōng-tè Iâ-hô-hoa, bô chûn kèng-ùi Góa ê sim, chiū-sī pháiⁿ koh kan-khó͘ ê sū; che sī Chú bān-kun ê Iâ-hô-hoa kóng--ê.

20我tī古早ê時，at折你ê擔，tháu開你ê索；你講，我m̄順服；因為你tī ta̍k ê高山頂，ta̍k叢青翠ê樹腳，屈落身軀行淫。Góa tī kó͘-chá ê sî, at-chi̍h lí ê taⁿ, tháu-khui lí ê soh; lí kóng, Góa m̄ sūn-ho̍k; in-ūi lí tī ta̍k ê koâiⁿ-soaⁿ-téng, ta̍k châng chhiⁿ-chhùi ê chhiū-kha, khut-lo̍h sin-khu kiâⁿ-îm.

21但是我bat栽種你，是上等ê葡萄樹，全然是真ê種子；你對tī我怎樣變做別款葡萄樹ê pháiⁿ枝ah？Nā-sī Góa bat chai-chèng lí, sī siōng-téng ê phû-tô-chhiū, choân-jiân sī chin ê chéng-chí; lí tùi-tī Góa cháiⁿ-iūⁿ pìⁿ-chòe pa̍t-khoán phû-tô-chhiū ê pháiⁿ-ki ah?

22你雖bóng用鹼(kiⁿ)，用chōe-chōe雪文來洗，你ê罪惡ê痕跡猶原顯出tī我ê面前；這是主耶和華講ê。Lí sui-bóng ēng kiⁿ, ēng chōe-chōe soat-bûn lâi sóe, lí ê chōe-ok ê hûn-jiah iû-goân hián-chhut tī Góa ê bīn-chêng; che sī Chú Iâ-hô-hoa kóng--ê.

23你thái-thó會講，我無bak-tio̍h lâ-sâm，無tè chiah-ê Pa-le̍k ah？你看，你山谷中ê路，就知你所行ê怎樣；你是單陵gâu走ê駱駝，走來走去。Lí thái-thó ōe kóng, Góa bô bak--tio̍h lâ-sâm, bô tè chiah ê Pa-le̍k ah? lí khòaⁿ, lí soaⁿ-kok-tiong ê lō͘, chiū chai lí só͘ kiâⁿ--ê cháiⁿ-iūⁿ; lí sī toaⁿ-niā gâu cháu ê lo̍k-tô, cháu-lâi cháu-khì.

24你是野驢，慣勢tī曠野；慾心發動，就吸風；瘋(siáu)ê時，是誰 能阻止伊ah？見若chhē伊ê，m̄免tio̍h磨；tī伊hit月，的確能chhē-tio̍h。Lí sī iá-lû, koàiⁿ-sì tī khòng-iá; io̍k-sim hoat-tōng, chiū khip-hong; siáu ê sî, chī-chūi ōe chó͘-chí i ah? kìⁿ-nā chhē i ê, m̄-bián tio̍h-bôa; tī i hit-ge̍h, tek-khak ōe chhē--tio̍h.

25你tio̍h禁止你ê腳，免致無鞋；禁止你ê嚨喉，免致嘴乾；總是你講，這是無chhái-kang，m̄-ah；我已經戀慕別ê；我beh tè in。Lí tio̍h kìm-chí lí ê kha, bián-tì bô ôe; kìm-chí lí ê nâ-âu, bián-tì chhùi-ta; chóng-sī lí kóng, Che sī bô chhái-kang, m̄--ah; góa í-keng loân-bō͘ pa̍t-ê; góa beh tè in.

26賊hō͘人掠tio̍h，怎樣見笑，以色列家 kap in ê君王、貴族、祭司、先知，亦lóng án-ni見笑。Chha̍t hō͘ lâng lia̍h--tio̍h, cháiⁿ-iūⁿ kiàn-siàu, Í-sek-lia̍t ke kap in ê kun-ông, kùi-cho̍k, chè-si, sian-ti, ia̍h lóng án-ni kiàn-siàu.

27In對柴頭講，你是我ê父；對石頭講，你是生我ê。In用ka-chiah ǹg我，無用面ǹg我；到tú-tio̍h患難ê時，chiah講，起來，來救阮。In tùi chhâ-thâu kóng, Lí sī góa ê pē; tùi chio̍h-thâu kóng, Lí sī siⁿ-góa-ê. In ēng ka-chiah ǹg Góa, bô ēng bīn ǹg Góa; kàu tú-tio̍h hoān-lān ê sî, chiah kóng, Khí--lâi, lâi kiù goán.

28你為家己所造ê上帝 tī toh-lo̍h？伊若會救你，tī你tú-tio̍h患難ê時，就tio̍h起來救你；猶大ah，你ê上帝ê數額kap你ê城ê數額平平chōe。Lí ūi ka-kī só͘ chō ê siōng-tè tī toh-lo̍h? i nā ōe kiù lí, tī lí tú-tio̍h hoān-lān ê sî, chiū tio̍h khí-lâi kiù lí; Iû-tāi ah, lí ê siōng-tè ê siàu-gia̍h kap lí ê siâⁿ ê siàu-gia̍h pîⁿ-pîⁿ chōe.

29耶和華講，Lín啥事kap我爭辯？lín lóng悖逆我。Iâ-hô-hoa kóng, Lín siáⁿ-sū kap Góa cheng-piān? lín lóng pōe-ge̍k Góa.

30我督責lín ê kiáⁿ兒，是空空；in無受警戒。Lín ê刀，親像猛獅，吞咬lín ê先知。Góa tok-chek lín ê kiáⁿ-jî, sī khang-khang; in bô siū kéng-kài. Lín ê to, chhin-chhiūⁿ béng sai, thun-kā lín ê sian-ti.

31Chit世代ah，lín tio̍h明耶和華ê話；我對tī以色列kiám bat做親像曠野，á是bat做親像烏暗ê地ah？我ê百姓啥事講，阮脫離約束，m̄ koh歸向你lah？Chit sè-tāi ah, lín tio̍h bêng Iâ-hô-hoa ê ōe; Góa tùi-tī Í-sek-lia̍t kiám bat chòe chhin-chhiūⁿ khòng-iá, á-sī bat chòe chhin-chhiūⁿ o͘-àm ê tōe ah? Góa ê peh-sìⁿ siáⁿ-sū kóng, Goán thoat-lī iok-sok, m̄ koh kui-ǹg Lí lah?

32在室女kiám會bōe記得伊ê裝飾mah？新娘kiám會bōe記得伊ê súi衫？總是我ê百姓bōe記得我bōe算得日。Chāi-sek-lú kiám ōe bōe-kì-tit i ê chng-thāⁿ mah? sin-niû kiám ōe bōe-kì-tit i ê súi-saⁿ? chóng-sī Góa ê peh-sìⁿ bōe-kì-tit Góa bōe sǹg-tit ji̍t.

33你怎樣修整你ê路，要求寵愛；連pháiⁿ婦人人，你亦用你ê路教示in。Lí cháiⁿ-iūⁿ siu-chéng lí ê lō͘, iau-kiû thióng-ài; liân pháiⁿ hū-jîn-lâng, lí ia̍h ēng lí ê lō͘ kà-sī in.

34Koh你ê衫á裾有無罪ê sòng-hiong人ê血；m̄是tī iah厝孔ê所在tú-tio̍h，是tī ta̍k所在lóng有。Koh lí ê saⁿ-á-ku ū bô-chōe ê sòng-hiong lâng ê huih; m̄-sī tī iah chhù-khang ê só͘-chāi tú-tio̍h, sī tī ta̍k só͘-chāi lóng ū.

35你iáu-kú講，我無罪；耶和華ê受氣的確oa̍t-tńg離開我，看ah，我beh審問你，因為你家己講，我無犯罪。Lí iáu-kú kóng, Góa bô chōe; Iâ-hô-hoa ê siū-khì tek-khak oa̍t-tńg lī-khui góa, Khòaⁿ ah, Góa beh sím-mn̄g lí, in-ūi lí ka-kī kóng, Góa bô hoān-chōe.

36你啥事走東走西，beh改換你ê路ah？你beh因為埃及來見笑，親像前因為亞述來見笑一樣。Lí siáⁿ-sū cháu-tang cháu-sai, beh kóe-ōaⁿ lí ê lō͘ ah? lí beh in-ūi Ai-ki̍p lâi kiàn-siàu, chhin-chhiūⁿ chêng in-ūi A-su̍t lâi kiàn-siàu chi̍t-iūⁿ.

37你亦beh雙手抱頭殼，tùi hia出來；因為耶和華已經棄絕你所óa靠ê；你亦bōe tùi in得tio̍h興通。Lí ia̍h beh siang-chhiú phō thâu-khak, tùi hia chhut-lâi; in-ūi Iâ-hô-hoa í-keng khì-choa̍t lí só͘ óa-khò--ê; lí ia̍h bōe tùi in tit-tio̍h heng-thong.

1有teh講，人若離出伊ê bó͘，bó͘就離開伊，嫁別人；就伊前ê丈夫kiám thang koh親近伊mah？若án-ni，hit-ê地方kiám無bak-tio̍h lâ-sâm mah？獨獨你kap chōe-chōe親愛ê行淫，iáu-kú thang歸tī我；這是耶和華講ê。Ū teh kóng, Lâng nā lî-chhut i ê bó͘, bó͘ chiū lī-khui i, kè pa̍t-lâng; chiū i chêng ê tiōng-hu kiám thang koh chhin-kūn i mah? nā án-ni, hit ê tōe-hng kiám bô bak-tio̍h lâ-sâm mah? to̍k-to̍k lí kap chōe-chōe chhin-ài--ê kiâⁿ-îm, iáu-kú thang kui tī Góa; che sī Iâ-hô-hoa kóng--ê.

2你tio̍h kia̍h目看chiah-ê光khō-khō高ê所在；tī toh-lo̍h無有淫行ah？你坐tī路邊thèng候，親像阿拉伯人tī曠野一樣；koh用你ê淫行邪惡phah lâ-sâm全地。Lí tio̍h kia̍h-ba̍k khòaⁿ chiah ê kng-khō-khō koâiⁿ ê só͘-chāi; tī toh-lo̍h bô ū îm-hēng ah? lí chē tī lō͘-piⁿ thèng-hāu, chhin-chhiūⁿ A-la̍h-pek lâng tī khòng-iá chi̍t-iūⁿ; koh ēng lí ê îm-hēng siâ-ok phah lâ-sâm choân-tōe.

3因為án-ni，好ê雨水停止，春天ê雨無落；你iáu有娼妓ê面，m̄知見笑。In-ūi án-ni, hó ê hō͘-chúi thêng-chí, chhun-thiⁿ ê hō͘ bô lo̍h; lí iáu ū chhiong-ki ê bīn, m̄-chai kiàn-siàu.

4你kiám m̄ tùi chit時叫我講，我ê父ah，你是我少年ê時，引chhōa我ê？Lí kiám m̄ tùi chit-sî kiò Góa kóng, Góa ê pē ah, Lí sī góa siàu-liân ê sî, ín-chhōa góa--ê?

5伊kiám永永khǹg受氣，留到路尾mah？看ah，你有án-ni講，iáu-kú盡你所能ê行pháiⁿ。I kiám éng-éng khǹg siū-khì, lâu kàu lō͘-bé mah? khòaⁿ ah, lí ū án-ni kóng, iáu-kú chīn lí só͘ ōe--ê kiâⁿ-pháiⁿ.

6當約西亞王坐位ê時，耶和華koh對我講，悖逆ê以色列所做ê，你有看見無？伊上chiah-ê高山，tī lóng總青翠ê樹腳行淫亂。Tng Iok-se-a ông chē-ūi ê sî, Iâ-hô-hoa koh tùi góa kóng, Pōe-ge̍k ê Í-sek-lia̍t só͘ chòe--ê, lí ū khòaⁿ-kìⁿ bô? I chiūⁿ chiah ê koâiⁿ-soaⁿ, tī lóng-chóng chhiⁿ-chhùi ê chhiū-kha kiâⁿ îm-loān.

7伊行chiah-ê tāi-chì以後，我講，伊beh歸óa我，總是伊無，伊奸詐ê小妹猶大亦有看見。I kiâⁿ chiah ê tāi-chì í-āu, Góa kóng, I beh kui-óa Góa, chóng-sī i bô, i kan-chà ê sió-bē Iû-tāi ia̍h ū khòaⁿ-kìⁿ.

8悖逆ê以色列行淫亂，我為tio̍h chit-ê緣故hō͘伊離書，離出伊；我看見伊奸詐ê小妹猶大，猶原無驚，亦是去行淫。Pōe-ge̍k ê Í-sek-lia̍t kiâⁿ îm-loān, Góa ūi-tio̍h chit ê iân-kò͘ hō͘ i lî-su, lî-chhut i; Góa khòaⁿ-kìⁿ i kan-chà ê sió-bē Iû-tāi, iû-goân bô kiaⁿ, ia̍h sī khì kiâⁿ-îm.

9伊隨便行伊ê淫亂，就phah lâ-sâm chit-ê地方；就kap石頭柴頭行淫。I sûi-piān kiâⁿ i ê îm-loān, chiū phah lâ-sâm chit ê tōe-hng; chiū kap chio̍h-thâu chhâ-thâu kiâⁿ-îm.

10雖然有chiah-ê一切ê事，伊奸詐ê小妹猶大猶原無專心歸向我，不過是假意nā-tiāⁿ；這是耶和華講ê。Sui-jiân ū chiah-ê it-chhè ê sū, i kan-chà ê sió-bē Iû-tāi iû-goân bô choan-sim kui-ǹg Góa, put-kò sī ké-ì nā-tiāⁿ; che sī Iâ-hô-hoa kóng--ê.

11耶和華對我講，悖逆ê以色列，比奸詐ê猶大，iáu khah有義。Iâ-hô-hoa tùi góa kóng, Pōe-ge̍k ê Í-sek-lia̍t, pí kan-chà ê Iû-tāi, iáu khah ū gī.

12你tio̍h去ǹg北方傳chiah-ê話，講，耶和華講，悖逆ê以色列ah，tio̍h tò來；我無beh用受氣ê目睭看lín；因為我是慈愛ê，我無beh永遠khǹg受氣；這是耶和華講ê。Lí tio̍h khì ǹg pak-hng thoân chiah ê ōe, kóng, Iâ-hô-hoa kóng, Pōe-ge̍k ê Í-sek-lia̍t ah, tio̍h tò--lâi; Góa bô beh ēng siū-khì ê ba̍k-chiu khòaⁿ lín; in-ūi Góa sī chû-ài--ê, Góa bô beh éng-oán khǹg siū-khì; che sī Iâ-hô-hoa kóng--ê.

13獨獨tio̍h認你ê罪，就是你違背耶和華你ê上帝；tī lóng總青翠ê樹腳，走東走西，chhē別ê；無聽thàn我ê話；這是耶和華講ê。To̍k-to̍k tio̍h jīn lí ê chōe, chiū-sī lí ûi-pōe Iâ-hô-hoa lí ê Siōng-tè; tī lóng-chóng chhiⁿ-chhùi ê chhiū-kha, cháu-tang cháu-sai, chhē pa̍t-ê; bô thiaⁿ-thàn Góa ê ōe; che sī Iâ-hô-hoa kóng--ê.

14耶和華講，悖逆ê kiáⁿ兒ah，tio̍h tò來；因為我做lín ê丈夫；koh我beh將lín tùi一個城取一人，tùi一族取兩人，帶到錫安。Iâ-hô-hoa kóng, Pōe-ge̍k ê kiáⁿ-jî ah, tio̍h tò--lâi; in-ūi Góa chòe lín ê tiōng-hu; koh Góa beh chiong lín tùi chi̍t ê siâⁿ chhú chi̍t lâng, tùi chi̍t-cho̍k chhú nn̄g lâng, tòa kàu Sek-an.

15我beh將合我ê心ê牧者賞賜lín；in beh用知識kap智慧養飼lín。Góa beh chiong ha̍p Góa ê sim ê bo̍k-chiá siúⁿ-sù lín; in beh ēng chai-bat kap tì-hūi iúⁿ-chhī lín.

16耶和華講，Lín tī國內生湠chōe-chōe；當hiah-ê日子，人無beh koh講起，耶和華ê約櫃；亦無beh記tī心裡；lóng bōe記得，lóng無去chhē，亦無koh做伊。Iâ-hô-hoa kóng, Lín tī kok-lāi siⁿ-thòaⁿ chōe-chōe; tng hiah ê ji̍t-chí, lâng bô beh koh kóng-khí, Iâ-hô-hoa ê iok-kūi; ia̍h bô beh kì tī sim--nih; lóng bōe-kì--tit, lóng bô khì chhē, ia̍h bô koh chòe--i.

17Hit時人beh稱耶路撒冷做耶和華ê寶座；萬國beh聚集到hia；就是因為耶和華ê名，來到耶路撒冷；in無koh照家己pháiⁿ心ê剛硬行tāi-chì。Hit-sî lâng beh chheng Iâ-lō͘-sat-léng chòe Iâ-hô-hoa ê pó-chō; bān-kok beh chū-chi̍p kàu hia; chiū-sī in-ūi Iâ-hô-hoa ê miâ, lâi kàu Iâ-lō͘-sat-léng; in bô koh chiàu ka-kī pháiⁿ-sim ê kong-ngī kiâⁿ tāi-chì.

18當hiah-ê日子，猶大家beh kap以色列家同行；tùi北方ê地相kap來，到我賞賜lín ê列祖做業ê地。Tng hiah ê ji̍t-chí, Iû-tāi ke beh kap Í-sek-lia̍t ke tâng-kiâⁿ; tùi pak-hng ê tōe saⁿ-kap lâi, kàu Góa siúⁿ-sù lín ê lia̍t-chó͘ chòe-gia̍p ê tōe.

19總是我講，我怎樣ōe-thang排列lín tī chiah-ê kiáⁿ ê中間，將好ê地賞賜你，就是列國中siōng好ê業？我koh講，Lín tio̍h稱我講，我ê父ah；亦無koh倒tńg去，m̄-tè我。Chóng-sī góa kóng, Góa cháiⁿ-iūⁿ ōe thang pâi-lia̍t lín tī chiah ê kiáⁿ ê tiong-kan, chiong hó ê tōe siúⁿ-sù lí, chiū-sī lia̍t-kok-tiong siōng-hó ê gia̍p? Góa koh kóng, Lín tio̍h chheng Góa kóng, Góa ê pē ah; ia̍h bô koh tò-tńg khì, m̄-tè Góa.

20以色列家ah，lín對我行奸詐，真正親像婦人行奸詐離開伊ê丈夫；這是耶和華講ê。Í-sek-lia̍t ke ah, lín tùi Góa kiâⁿ kan-chà, chin-chiàⁿ chhin-chhiūⁿ hū-jîn kiâⁿ kan-chà lī-khui i ê tiōng-hu; che sī Iâ-hô-hoa kóng--ê.

21Tī光khō-khō高ê所在聽見聲，就是以色列人啼哭懇求ê聲；就是因為in行邪癖ê路，bōe記得in ê上帝耶和華。Tī kng-khō-khō koâiⁿ ê só͘-chāi thiaⁿ-kìⁿ siaⁿ, chiū-sī Í-sek-lia̍t lâng thî-khàu khún-kiû ê siaⁿ; chiū-sī in-ūi in kiâⁿ siâ-phiah ê lō͘, bōe-kì-tit in ê Siōng-tè Iâ-hô-hoa.

22Lín chiah-ê悖逆ê kiáⁿ兒ah，tio̍h tò來；我beh醫好lín ê悖逆。看ah，阮來到你chia；因為你是阮ê上帝耶和華。Lín chiah ê pōe-ge̍k ê kiáⁿ-jî ah, tio̍h tò--lâi; Góa beh i-hó lín ê pōe-ge̍k. Khòaⁿ ah, goán lâi kàu Lí chia; in-ūi Lí sī goán ê Siōng-tè Iâ-hô-hoa.

23Tùi小山á是大山ê鬧熱，ǹg望得tio̍h幫贊，實在是空空；以色列ê得tio̍h救，真正在tī阮ê上帝耶和華。Tùi sió-soaⁿ á-sī tōa-soaⁿ ê lāu-jia̍t, ǹg-bāng tit-tio̍h pang-chān, si̍t-chāi sī khang-khang; Í-sek-lia̍t ê tit-tio̍h kiù, chin-chiàⁿ chāi-tī goán ê Siōng-tè Iâ-hô-hoa.

24Tùi阮少年以來，hit-ê thang見笑ê事，將阮ê列祖所tio̍h磨來得tio̍h-ê，就是in ê羊群，牛群，kap in ê kiáⁿ，cha-bó͘-kiáⁿ，lóng吞食去。Tùi goán siàu-liân í-lâi, hit ê thang kiàn-siàu ê sū, chiong goán ê lia̍t-chó͘ só͘ tio̍h-bôa lâi tit-tio̍h--ê, chiū-sī in ê iûⁿ-kûn, gû-kûn, kap in ê kiáⁿ, cha-bó͘-kiáⁿ, lóng thun-chia̍h--khì.

25阮倒tī阮ê見笑中，阮ê凌辱遮蓋阮；因為tùi少年到taⁿ，阮kap阮ê列祖常常得罪阮ê上帝耶和華；無聽thàn阮ê上帝耶和華ê聲。Goán tó tī goán ê kiàn-siàu-tiong, goán ê lêng-jio̍k jia-khàm goán; in-ūi tùi siàu-liân kàu taⁿ, goán kap goán ê lia̍t-chó͘ siông-siông tek-chōe goán ê Siōng-tè Iâ-hô-hoa; bô thiaⁿ-thàn goán ê Siōng-tè Iâ-hô-hoa ê siaⁿ.

1耶和華講，以色列ah，你若肯tò來，就tò來我chia；若tùi我ê面前除去你可惡ê事，亦無chhìn-chhái行；Iâ-hô-hoa kóng, Í-sek-lia̍t ah, Lí nā khéng tò--lâi, chiū tò--lâi Góa chia; nā tùi Góa ê bīn-chêng tû--khì lí khó-ò͘ⁿ ê sū, ia̍h bô chhìn-chhái kiâⁿ;

2亦照誠實、公平、公義，kí耶和華ê永活來chiù-chōa；就列國beh對祂來家己求福氣；亦beh因為祂來誇口。ia̍h chiàu sêng-si̍t, kong-pêng, kong-gī, kí Iâ-hô-hoa ê éng-oa̍h lâi chiù-chōa; chiū lia̍t-kok beh tùi I lâi ka-kī kiû hok-khì; ia̍h beh in-ūi I lâi khoa-kháu.

3耶和華對猶大人kap耶路撒冷án-ni講，Tio̍h開墾lín ê土地，莫得掖種tī刺phè內。Iâ-hô-hoa tùi Iû-tāi lâng kap Iâ-lō͘-sat-léng án-ni kóng, Tio̍h khai-khún lín ê thó͘-tōe, bo̍h-tit iā-chéng tī chhì-phè-lāi.

4猶大人kap耶路撒冷khiā起ê百姓ah，lín tio̍h kā本身行割禮，歸tī耶和華；除去心內ê私慾；驚了我ê受氣，因為lín所行ê pháiⁿ，來發作；親像火to̍h起來，甚至無人能phah-hoa。Iû-tāi lâng kap Iâ-lō͘-sat-léng khiā-khí ê peh-sìⁿ ah, lín tio̍h kā pún-sin kiâⁿ kat-lé, kui tī Iâ-hô-hoa; tû--khì sim-lāi ê su-io̍k; kiaⁿ-liáu Góa ê siū-khì, in-ūi lín só͘-kiâⁿ ê pháiⁿ, lâi hoat-choh; chhin-chhiūⁿ hé to̍h--khí-lâi, sīm-chì bô lâng ōe phah-hoa.

5Lín tio̍h傳tī猶大，報tī耶路撒冷，講，Lín tio̍h tī國內pûn哨角，大聲叫講，Lín tio̍h聚集，咱thang進入堅固ê城。Lín tio̍h thoân tī Iû-tāi, pò tī Iâ-lō͘-sat-léng, kóng, Lín tio̍h tī kok-lāi pûn sàu-kak, tōa-siaⁿ kiò kóng, Lín tio̍h chū-chi̍p, lán thang chìn-ji̍p kian-kò͘ ê siâⁿ.

6應該ǹg錫安khiā大旗；tio̍h逃走，m̄-thang停腳；因為我beh hō͘災厄kap大ê毀壞tùi北方來。Eng-kai ǹg Sek-an khiā tōa-kî; tio̍h tô-cháu, m̄-thang thêng-kha; in-ūi Góa beh hō͘ chai-ē kap tōa ê húi-hoāi tùi pak-hng lâi.

7有獅tùi ām ê樹林中上來，毀壞列國ê，伊已經起身，出伊ê本所在；beh hō͘你ê地拋荒，hō͘你ê城荒廢，無人khiā起。Ū sai tùi ām ê chhiū-nâ-tiong chiūⁿ--lâi, húi-hoāi lia̍t-kok--ê, i í-keng khí-sin, chhut i ê pún só͘-chāi; beh hō͘ lí ê tōe pha-hng, hō͘ lí ê siâⁿ hong-hòe, bô lâng khiā-khí.

8為tio̍h án-ni，lín ê腰tio̍h hâ麻布，大聲啼哭；因為耶和華ê大受氣無對咱oa̍t倒tńg。Ūi-tio̍h án-ni, lín ê io tio̍h hâ môa-pò͘, tōa-siaⁿ thî-khàu; in-ūi Iâ-hô-hoa ê tōa siū-khì bô tùi lán oa̍t-tò-tńg.

9耶和華講，到hit日君王ê心，貴族ê心，lóng beh消滅；祭司lóng beh生驚，先知lóng beh gông-ngia̍h。Iâ-hô-hoa kóng, kàu hit-ji̍t kun-ông ê sim, kùi-cho̍k ê sim, lóng beh siau-bia̍t; chè-si lóng beh chhiⁿ-kiaⁿ, sian-ti lóng beh gông-ngia̍h.

10我講，Ai-ah，主耶和華ah，你真正是大大欺騙chit-ê百姓kap耶路撒冷；kā in講，Lín beh得tio̍h平安，其實刀劍害tio̍h in ê性命。Góa kóng, Ai--ah, Chú Iâ-hô-hoa ah, Lí chin-chiàⁿ sī tōa-tōa khi-phiàn chit ê peh-sìⁿ kap Iâ-lō͘-sat-léng; kā in kóng, Lín beh tit-tio̍h pêng-an, kî-si̍t to-kiàm hāi-tio̍h in ê sìⁿ-miā.

11Hit時beh有話對chit-ê百姓kap耶路撒冷講，Beh有熱熱ê風，tùi曠野光khō-khō高ê所在，ǹg我ê眾百姓吹來；m̄是beh簸伊，亦m̄是beh hō͘伊清氣。Hit-sî beh ū ōe tùi chit ê peh-sìⁿ kap Iâ-lō͘-sat-léng kóng, Beh ū jia̍t-jia̍t ê hong, tùi khòng-iá kng-khō-khō koâiⁿ ê só͘-chāi, ǹg Góa ê chèng peh-sìⁿ chhe--lâi; m̄-sī beh pòa--i, ia̍h m̄-sī beh hō͘ i chheng-khì.

12Beh有koh-khah大ê風，為tio̍h我吹來；taⁿ我koh beh發出判詞來攻擊in。Beh ū koh-khah tōa ê hong, ūi-tio̍h Góa chhe--lâi; taⁿ Góa koh beh hoat-chhut phòaⁿ-sû lâi kong-kek in.

13看ah，伊beh親像雲起來；伊ê戰車親像捲螺風，伊ê馬比鷹鳥khah緊；有災厄ah，因為咱敗無lah。Khòaⁿ ah, i beh chhin-chhiūⁿ hûn khí-lâi; i ê chiàn-chhia chhin-chhiūⁿ kńg-lê-hong, i ê bé pí eng-chiáu khah kín; ū chai-ē ah, in-ūi lán pāi-bô lah.

14耶路撒冷ah，你tio̍h洗清你ê心，來除去pháiⁿ，hō͘你thang得tio̍h救；pháiⁿ念頭存tī你ê心內，beh到tī時ah？Iâ-lō͘-sat-léng ah, lí tio̍h sóe-chheng lí ê sim, lâi tû--khì pháiⁿ, hō͘ lí thang tit-tio̍h kiù; pháiⁿ liām-thâu chûn tī lí ê sim-lāi, beh kàu tī-sî ah?

15有聲tùi Tàn傳報，tùi Í-hoat-liân山報災厄。Ū siaⁿ tùi Tàn thoân-pò, tùi Í-hoat-liân soaⁿ pò chai-ē.

16Lín tio̍h傳hō͘列國，報告攻擊耶路撒冷ê tāi-chì，講，有圍困城ê，tùi遠遠ê所在來；出in ê聲，攻擊猶大chiah-ê城。Lín tio̍h thoân hō͘ lia̍t-kok, pò-kò kong-kek Iâ-lō͘-sat-léng ê tāi-chì, kóng, Ū ûi-khùn siâⁿ--ê, tùi hn̄g-hn̄g ê só͘-chāi lâi; chhut in ê siaⁿ, kong-kek Iû-tāi chiah ê siâⁿ.

17In周圍攻擊伊親像顧園ê人；因為伊背叛我；這是耶和華講ê。In chiu-ûi kong-kek i chhin-chhiūⁿ kò͘-hn̂g ê lâng; in-ūi i pōe-poān Góa; che sī Iâ-hô-hoa kóng--ê.

18你ê所行，你ê所做，致到你有chiah-ê事；這是你ê罪惡，實在是苦，是害到你ê心。Lí ê só͘-kiâⁿ, lí ê só͘-chòe, tì-kàu lí ū chiah ê sū; che sī lí ê chōe-ok, si̍t-chāi sī khó͘, sī hāi kàu lí ê sim.

19我ê臟腑ah，我ê臟腑ah，我ê心痛疼，我ê心tī我ê內面擘腹，我bōe會/能靜靜無講話；因為我已經聽見哨角ê聲，交戰ê hoah-hiàm。góa ê chōng-hú ah, góa ê chōng-hú ah, góa ê sim thàng-thiàⁿ, góa ê sim tī góa ê lāi-bīn peh-pak, góa bōe-ōe chēng-chēng bô kóng-ōe; in-ūi góa í-keng thiaⁿ-kìⁿ sàu-kak ê siaⁿ, kau-chiàn ê hoah-hiàm.

20人teh報毀壞，koh毀壞；因為全地敗壞，我ê布棚忽然敗壞，我ê帳帷tiap-á久破裂。Lâng teh pò húi-hoāi, koh húi-hoāi; in-ūi choân-tōe pāi-hoāi, góa ê pò͘-pîⁿ hut-jiân pāi-hoāi, góa ê tiùⁿ-ûi tiap-á-kú phòa-li̍h.

21我看見大旗，聽見哨角ê聲；beh到jōa久ah？Góa khòaⁿ-kìⁿ tōa-kî, thiaⁿ-kìⁿ sàu-kak ê siaⁿ; beh kàu jōa-kú ah?

22我ê百姓愚戇，m̄-bat我；in是愚戇無聰明ê kiáⁿ；行pháiⁿ就gâu，行好就ham-bān。Góa ê peh-sìⁿ gû-gōng, m̄-bat Góa; in sī gû-gōng bô chhang-miâ ê kiáⁿ; kiâⁿ-pháiⁿ chiū gâu, kiâⁿ-hó chiū ham-bān.

23先知講，我看地，看ah，地是空空渾沌；我看天，天亦無光。Sian-ti kóng, Góa khòaⁿ tōe, khòaⁿ ah, tōe sī khang-khang hūn-tūn; góa khòaⁿ thiⁿ, thiⁿ ia̍h bô kng.

24我看hiah-ê大山，看ah，in lóng振動；小山亦lóng搖來搖去。Góa khòaⁿ hiah ê tōa-soaⁿ, khòaⁿ ah, in lóng tín-tāng; sió-soaⁿ ia̍h lóng iô-lâi iô-khì.

25我koh看，看ah，lóng無人；空中ê飛鳥，亦lóng飛走。Góa koh khòaⁿ, khòaⁿ ah, lóng bô lâng; khong-tiong ê pe-chiáu, ia̍h lóng pe-cháu.

26我koh看伊，看ah，肥ê田變做拋荒ê地；一切ê城tī耶和華ê面前，因為祂ê大受氣，lóng總倒壞。Góa koh khòaⁿ--i, khòaⁿ ah, pûi ê chhân pìⁿ-chòe pha-hng ê tōe; it-chhè ê siâⁿ tī Iâ-hô-hoa ê bīn-chêng, in-ūi I ê tōa siū-khì, lóng-chóng tó-hoāi.

27因為耶和華án-ni講，全地的確拋荒；總是我無beh毀滅到盡。In-ūi Iâ-hô-hoa án-ni kóng, Choân-tōe tek-khak pha-hng; chóng-sī Góa bô beh húi-bia̍t kàu-chīn.

28因為án-ni地beh憂悶，天頂也beh烏暗；我已經講伊，已經定tio̍h伊，的確無退悔，也無oa̍t-tńg意思，m̄做伊。In-ūi án-ni tōe beh iu-būn, thiⁿ-téng iā beh o͘-àm; Góa í-keng kóng--i, í-keng tiāⁿ-tio̍h--i, tek-khak bô thè-hóe, iā bô oa̍t-tńg ì-sù, m̄ chòe--i.

29Ta̍k ê城ê人因為馬兵kap射箭ê人ê hōa-hōa哮，就lóng逃走，進入樹林，爬(pê)上石磐頂；ta̍k ê城tú-tio̍h棄sak，無人khiā起。Ta̍k ê siâⁿ ê lâng in-ūi bé-peng kap siā-chìⁿ ê lâng ê hōa-hōa-háu, chiū lóng tô-cháu, chìn-ji̍p chhiū-nâ, pê-chiūⁿ chio̍h-pôaⁿ-téng; ta̍k ê siâⁿ tú-tio̍h khì-sak, bô lâng khiā-khí.

30你衰敗ê時beh怎樣做？雖然穿朱紅ê衫，用金器裝飾，用色料畫你ê目睭，án-ni tián好看，是空空；戀愛你ê看輕你，續siàu想你ê性命。Lí soe-pāi ê sî beh cháiⁿ-iūⁿ chòe? Sui-jiân chhēng chu-âng ê saⁿ, ēng kim-khì chng-thāⁿ, ēng sek-liāu ūi lí ê ba̍k-chiu, án-ni tián hó-khòaⁿ, sī khang-khang; loân-ài lí--ê khòaⁿ-khin lí, sòa siàu-siūⁿ lí ê sìⁿ-miā.

31因為我聽見聲親像生kiáⁿ ê婦人人，親像生頭chiūⁿ-kiáⁿ ê艱苦，就是錫安cha-bó͘-kiáⁿ ê聲，伊喘大氣，thí開手講，我有災厄ah，因為我ê神魂為tio̍h thâi人ê來暈去。In-ūi góa thiaⁿ-kìⁿ siaⁿ chhin-chhiūⁿ siⁿ-kiáⁿ ê hū-jîn-lâng, chhin-chhiūⁿ siⁿ thâu-chiūⁿ-kiáⁿ ê kan-khó͘, chiū-sī Sek-an cha-bó͘-kiáⁿ ê siaⁿ, i chhoán tōa-khùi, thí-khui chhiú kóng, Góa ū chai-ē ah, in-ūi góa ê sîn-hûn ūi-tio̍h thâi-lâng-ê lâi hūn-khì.