1先知耶利米tùi耶路撒冷寄phoe hō͘受掠iáu tī-teh-ê ê老大，kap chiah-ê祭司、先知、眾百姓，就是Nî-pò͘-kah-nî-sat tùi耶路撒冷掠到巴比倫ê。Sian-ti Iâ-lī-bí tùi Iâ-lō͘-sat-léng kià-phoe hō͘ siū-lia̍h iáu tī-teh--ê ê lāu-tōa, kap chiah ê chè-si, sian-ti, chèng peh-sìⁿ, chiū-sī Nî-pò͘-kah-nî-sat tùi Iâ-lō͘-sat-léng lia̍h kàu Pa-pí-lûn--ê.

2(這是tī Iâ-ko-nî-ngá王kap太后、太監，kap猶大耶路撒冷ê貴族，以及工匠、鐵匠，lóng離開耶路撒冷ê了後。)(Che sī tī Iâ-ko-nî-ngá ông kap thài-hō͘, thài-kàm, kap Iû-tāi Iâ-lō͘-sat-léng ê kùi-cho̍k, í-ki̍p kang-chhiūⁿ, thih-chhiūⁿ, lóng lī-khui Iâ-lō͘-sat-léng ê liáu-āu.)

3Hit張phoe託重Sa-hoan ê kiáⁿ Í-lī-a-sat，kap Hi-le̍k-ka ê kiáⁿ Ki-má-lī，帶去；chit兩人就是猶大王Se-tí-ka吹去巴比倫，見巴比倫王Nî-pò͘-kah-nî-sat-ê。Hit-tiuⁿ phoe thok-tiōng Sa-hoan ê kiáⁿ Í-lī-a-sat, kap Hi-le̍k-ka ê kiáⁿ Ki-má-lī, tòa--khì; chí(**chit) nn̄g lâng chiū-sī Iû-tāi ông Se-tí-ka chhe--khì Pa-pí-lûn, kìⁿ Pa-pí-lûn ông Nî-pò͘-kah-nî-sat--ê.

4phoe內講：萬軍ê耶和華，以色列ê上帝，tùi一切受掠去ê，就是我hō͘ in tùi耶路撒冷受掠到巴比倫ê人，án-ni講，Phoe-lāi kóng: Bān-kun ê Iâ-hô-hoa, Í-sek-lia̍t ê Siōng-tè, tùi it-chhè siū-lia̍h-khì--ê, chiū-sī Góa hō͘ in tùi Iâ-lō͘-sat-léng siū-lia̍h kàu Pa-pí-lûn ê lâng, án-ni kóng,

5Lín tio̍h起厝來khiā起；作園來食伊ê果子；Lín tio̍h khí-chhù lâi khiā-khí; choh-hn̂g lâi chia̍h i ê ké-chí;

6娶bó͘來生kiáⁿ，cha-bó͘-kiáⁿ；kā lín ê kiáⁿ娶bó͘；hō͘ lín ê cha-bó͘-kiáⁿ出嫁；hō͘ in生kiáⁿ，cha-bó͘-kiáⁿ；thang tī-hia加添chōe-chōe，無減少。Chhōa-bó͘ lâi siⁿ-kiáⁿ, cha-bó͘-kiáⁿ; kā lín ê kiáⁿ chhōa-bó͘; hō͘ lín ê cha-bó͘-kiáⁿ chhut-kè; hō͘ in siⁿ-kiáⁿ, cha-bó͘-kiáⁿ; thang tī-hia ke-thiⁿ chōe-chōe, bô kiám-chió.

7我所hō͘ lín受掠去hit-ê城，lín tio̍h圖謀伊ê平安，替伊祈禱耶和華；因為伊得tio̍h平安，lín亦tè伊平安。Góa só͘ hō͘ lín siū-lia̍h--khì hit ê siâⁿ, lín tio̍h tô͘-bô͘ i ê pêng-an, thòe i kî-tó Iâ-hô-hoa; in-ūi i tit-tio̍h pêng-an, lín ia̍h tè i pêng-an.

8萬軍ê耶和華，以色列ê上帝，án-ni講，莫得hō͘ lín中間ê先知kap卜卦ê引誘；亦莫得信lín ê 夢，就是lín所夢見ê。Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Bo̍h-tit hō͘ lín tiong-kan ê sian-ti kap pok-kòa--ê ín-iú; ia̍h bo̍h-tit sìn lín ê bāng, chiū-sī lín só͘ bāng-kìⁿ--ê.

9因為in託我ê名對lín宣傳白賊話；我並無差in；這是耶和華講ê。In-ūi in thok Góa ê miâ tùi lín soan-thoân pe̍h-chha̍t-ōe; Góa pēng-bô chhe in; che sī Iâ-hô-hoa kóng--ê.

10因為耶和華án-ni講，巴比倫七十年ê期限已經滿，我beh臨到lín，成我tùi lín所講ê好話；hō͘ lín tò來chit-ê所在。In-ūi Iâ-hô-hoa án-ni kóng, Pa-pí-lûn chhit-cha̍p nî ê kî-hān í-keng móa, Góa beh lîm-kàu lín, chiâⁿ Góa tùi lín só͘ kóng ê hó-ōe; hō͘ lín tò-lâi chit ê só͘-chāi.

11耶和華講，我知我tùi lín所存ê意思，是賞賜平安ê意思，m̄是降災厄；beh hō͘ lín尾景有ǹg望。Iâ-hô-hoa kóng, Góa chai Góa tùi lín só͘ chûn ê ì-sù, sī siúⁿ-sù pêng-an ê ì-sù, m̄-sī kàng chai-ē; beh hō͘ lín bé-kéng ū ǹg-bāng.

12Hit時lín beh求叫我，beh去祈禱我，我beh聽lín。Hit-sî lín beh kiû-kiò Góa, beh khì kî-tó Góa, Góa beh thiaⁿ lín.

13Lín beh chhē我，來tú-tio̍h；因為lín beh專心chhē我。Lín beh chhē Góa, lâi tú-tio̍h; in-ūi lín beh choan-sim chhē Góa.

14耶和華講：我beh hō͘ lín chhē-tio̍h；我亦beh hō͘ lín受掠ê人倒tńg來；beh tùi我所趕lín到ê ta̍k國ta̍k所在聚集lín；亦beh hō͘ lín tò來本所在，就是我所hō͘ lín tùi hia受掠ê；這是耶和華講ê。Iâ-hô-hoa kóng: Góa beh hō͘ lín chhē-tio̍h; Góa ia̍h beh hō͘ lín siū-lia̍h ê lâng tò-tńg--lâi; beh tùi Góa só͘ kóaⁿ lín kàu ê ta̍k-kok ta̍k só͘-chāi chū-chi̍p lín; ia̍h beh hō͘ lín tò-lâi pún só͘-chāi, chiū-sī Góa só͘ hō͘ lín tùi hia siū-lia̍h--ê; che sī Iâ-hô-hoa kóng--ê.

15因為lín講，耶和華tī巴比倫kā阮興起先知。In-ūi lín kóng, Iâ-hô-hoa tī Pa-pí-lûn kā goán heng-khí sian-ti.

16Taⁿ耶和華論到坐大衛寶座ê王，亦論到tiàm tī chit-ê城ê眾百姓，就是無kap lín相kap受掠ê兄弟；Taⁿ Iâ-hô-hoa lūn-kàu chē Tāi-pi̍t pó-chō ê ông, ia̍h lūn-kàu tiàm tī chit ê siâⁿ ê chèng peh-sìⁿ, chiū-sī bô kap lín saⁿ-kap siū-lia̍h ê hiaⁿ-tī;

17萬軍ê耶和華án-ni講，看ah，我beh用刀劍，用飢荒用瘟疫，到tī in；hō͘ in親像極pháiⁿ ê無花果，pháiⁿ到bōe食得。bān-kun ê Iâ-hô-hoa án-ni kóng, Khòaⁿ ah, Góa beh ēng to-kiàm, ēng ki-hng ēng un-e̍k, kàu tī in; hō͘ in chhin-chhiūⁿ ke̍k-pháiⁿ ê bû-hoa-kó, pháiⁿ kàu bōe-chia̍h-tit.

18我beh用刀劍，用飢荒，用瘟疫追jip in；hō͘ in 流落tī天下萬國；tī我趕in到ê ta̍k國，做thang咒詛，thang gông-ngia̍h thang譏刺，thang凌辱ê。Góa beh ēng to-kiàm, ēng ki-hng, ēng un-e̍k tui-jip in; hō͘ in liû-lo̍h tī thiⁿ-ē bān-kok; tī Góa kóaⁿ in kàu ê ta̍k-kok, chòe thang chiù-chó͘, thang gông-ngia̍h thang ki-chhì, thang lêng-jio̍k--ê.

19耶和華講，這是因為in無聽thàn我ê話，就是我差我chiah-ê奴僕眾先知kā in講ê話；是早早起來差in；總是lín無聽；這是耶和華講ê。Iâ-hô-hoa kóng, Che sī in-ūi in bô thiaⁿ-thàn Góa ê ōe, chiū-sī Góa chhe Góa chiah ê lô͘-po̍k chèng sian-ti kā in kóng ê ōe; sī chá-chá khí-lâi chhe in; chóng-sī lín bô thiaⁿ; che sī Iâ-hô-hoa kóng--ê.

20所以lín一切受掠去ê，就是我tùi耶路撒冷吹到巴比倫ê，lín lóng tio̍h聽耶和華ê話。Só͘-í lín it-chhè siū-lia̍h--khì ê, chiū-sī Góa tùi Iâ-lō͘-sat-léng chhe kàu Pa-pí-lûn--ê, lín lóng tio̍h thiaⁿ Iâ-hô-hoa ê ōe.

21萬軍ê耶和華，以色列ê上帝，án-ni講，論到Ko-nāi-ngá ê kiáⁿ A-hap，kap Má-se-ngá ê kiáⁿ Se-tí-ka，in託我ê名對lín宣傳白賊：看ah，我beh將in交tī巴比倫王Nî-pò͘-kah-nî-sat ê手；伊beh tī lín ê面前thâi in。Bān-kun ê Iâ-hô-hoa, Í-sek-lia̍t ê Siōng-tè, án-ni kóng, lūn-kàu Ko-nāi-ngá ê kiáⁿ A-hap, kap Má-se-ngá ê kiáⁿ Se-tí-ka, in thok Góa ê miâ tùi lín soan-thoân pe̍h-chha̍t: Khòaⁿ ah, Góa beh chiong in kau tī Pa-pí-lûn ông Nî-pò͘-kah-nî-sat ê chhiú; i beh tī lín ê bīn-chêng thâi in.

22猶大受掠ê眾人tī巴比倫ê，beh用chit兩人做話柄咒詛人，講，願耶和華hō͘你親像Se-tí-ka A-hap，hō͘巴比倫王用火燒伊。Iû-tāi siū-lia̍h ê chèng-lâng tī Pa-pí-lûn--ê, beh ēng chí(**chit) nn̄g lâng chòe ōe-pìⁿ chiù-chó͘ lâng, kóng, Goān Iâ-hô-hoa hō͘ lí chhin-chhiūⁿ Se-tí-ka A-hap, hō͘ Pa-pí-lûn ông ēng hé sio--i.

23In tī以色列中做出見笑ê事；淫in厝邊ê bó͘；koh託我ê名宣傳白賊，我所無命令in-ê；知ê是我，做干證ê亦是我；這是耶和華講ê。In tī Í-sek-lia̍t-tiong chòe-chhut kiàn-siàu ê sū; îm in chhù-piⁿ ê bó͘; koh thok Góa ê miâ soan-thoân pe̍h-chha̍t, Góa só͘ bô bēng-lēng in--ê; chai--ê sī Góa, chòe kan-chèng--ê ia̍h sī Góa; che sī Iâ-hô-hoa kóng--ê.

24論Nî-hi-lân人Sī-má-ngá，你tio̍h講，Lūn Nî-hi-lân lâng Sī-má-ngá, lí tio̍h kóng,

25萬軍ê耶和華，以色列ê上帝，án-ni講，你bat用家己ê名寄phoe hō͘耶路撒冷ê眾百姓，kap祭司Má-se-ngá ê kiáⁿ Se-hoan-ngá，kap眾祭司講，Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lí bat ēng ka-kī ê miâ kià phoe hō͘ Iâ-lō͘-sat-léng ê chèng peh-sìⁿ, kap chè-si Má-se-ngá ê kiáⁿ Se-hoan-ngá, kap chèng chè-si kóng,

26耶和華有設立你做祭司，來替祭司Iâ-hô-iâ-tāi，hō͘ lín監督耶和華ê厝，thang將一切khong-khám家己稱做先知ê人，用柴枷kā伊枷，用鎖kā伊鎖。Iâ-hô-hoa ū siat-li̍p lí chòe chè-si, lâi thòe chè-si Iâ-hô-iâ-tāi, hō͘ lín kam(**kàm)-tok Iâ-hô-hoa ê chhù, thang chiong it-chhè khong-khám ka-kī chheng chòe sian-ti ê lâng, ēng chhâ-kê kā i kê, ēng só kā i só.

27現今A-ná-tu̍t人耶利米對lín家己稱做先知，lín啥事無責備伊ah？Hiān-kim A-ná-tu̍t lâng Iâ-lī-bí tùi lín ka-kī chheng chòe sian-ti, lín siáⁿ-sū bô chek-pī i ah?

28因為伊寄phoe到巴比倫，kā阮講，受掠ê時beh久長；lín tio̍h起厝來khiā起；作園來食果子。In-ūi i kià-phoe kàu Pa-pí-lûn, kā goán kóng, Siū-lia̍h ê sî beh kú-tn̂g; lín tio̍h khí chhù lâi khiā-khí; choh-hn̂g lâi chia̍h ké-chí.

29祭司Se-hoan-ngá就將chit張phoe讀hō͘先知耶利米聽。Chè-si Se-hoan-ngá chiū chiong chit tiuⁿ phoe tha̍k hō͘ sian-ti Iâ-lī-bí thiaⁿ.

30Tùi án-ni，耶和華ê話臨到耶利米講，Tùi án-ni, Iâ-hô-hoa ê ōe lîm-kàu Iâ-lī-bí kóng,

31你tio̍h寄phoe hō͘一切受掠ê人講，耶和華論到Nî-hi-lân人Sī-má-ngá講，因為Sī-má-ngá對lín宣傳ê；我無差伊，伊hō͘ lín óa靠白賊；Lí tio̍h kià phoe hō͘ it-chhè siū-lia̍h ê lâng kóng, Iâ-hô-hoa lūn-kàu Nî-hi-lân lâng Sī-má-ngá kóng, In-ūi Sī-má-ngá tùi lín soan-thoân--ê; Góa bô chhe i, i hō͘ lín óa-khò pe̍h-chha̍t;

32所以耶和華án-ni講，我beh刑罰Nî-hi-lân人Sī-má-ngá，kap伊ê後裔；伊的確無留一人khiā起tī chit-ê百姓ê中間；亦無thang看見我所beh賞賜我ê百姓ê福氣；因為伊講悖逆耶和華ê話；這是耶和華講ê。só͘-í Iâ-hô-hoa án-ni kóng, Góa beh hêng-hoa̍t Nî-hi-lân lâng Sī-má-ngá, kap i ê hō͘-è; i tek-khak bô lâu chi̍t lâng khiā-khí tī chit ê peh-sìⁿ ê tiong-kan; ia̍h bô thang khòaⁿ-kìⁿ Góa só͘ beh siúⁿ-sù Góa ê peh-sìⁿ ê hok-khì; in-ūi i kóng pōe-ge̍k Iâ-hô-hoa ê ōe; che sī Iâ-hô-hoa kóng--ê.

1耶和華ê話臨到耶利米講，Iâ-hô-hoa ê ōe lîm-kàu Iâ-lī-bí kóng,

2以色列ê上帝耶和華án-ni講，見若我所bat kā你講ê話，lóng tio̍h寫tī冊裡。Í-sek-lia̍t ê Siōng-tè Iâ-hô-hoa án-ni kóng, Kìⁿ-nā Góa só͘ bat kā lí kóng ê ōe, lóng tio̍h siá tī chheh--nih.

3耶和華講，看ah，日子beh到，我beh hō͘我ê百姓以色列kap猶大受掠ê人倒tńg來；我亦beh hō͘ in tò來我所賞賜in ê列祖ê地；in就得tio̍h chit-ê地做業；這是耶和華講ê。Iâ-hô-hoa kóng, Khòaⁿ ah, ji̍t-chí beh kàu, Góa beh hō͘ Góa ê peh-sìⁿ Í-sek-lia̍t kap Iû-tāi siū-lia̍h ê lâng tò-tńg--lâi; Góa ia̍h beh hō͘ in tò--lâi Góa só͘ siúⁿ-sù in ê lia̍t-chó͘ ê tōe; in chiū tit-tio̍h chit ê tōe chòe-gia̍p; che sī Iâ-hô-hoa kóng--ê.

4耶和華論到以色列kap猶大ê話，記tī下底。Iâ-hô-hoa lūn-kàu Í-sek-lia̍t kap Iû-tāi ê ōe, kì tī ē-tóe.

5耶和華án-ni講，阮有聽見ngia̍uh-ngia̍uh-chhoah，驚惶，無平安ê聲。Iâ-hô-hoa án-ni kóng, Goán ū thiaⁿ-kìⁿ ngia̍uh-ngia̍uh-chhoah, kiaⁿ-hiâⁿ, bô pêng-an ê siaⁿ.

6Taⁿ lín tio̍h去問看有ta-po͘人生kiáⁿ無；怎樣我看見人人用手ji̍h腰，親像beh生kiáⁿ ê婦人人，面lóng變青？Taⁿ lín tio̍h khì mn̄g-khòaⁿ ū ta-po͘-lâng siⁿ kiáⁿ bô; cháiⁿ-iūⁿ Góa khòaⁿ-kìⁿ lâng-lâng ēng chhiú ji̍h io, chhin-chhiūⁿ beh siⁿ-kiáⁿ ê hū-jîn-lâng, bīn lóng piàn chhiⁿ?

7慘ah，hit-ê日是大，無thang比並；是雅各tú-tio̍h患難ê期日；總是伊beh得tio̍h救來脫出。Chhám--ah, hit ê ji̍t sī tōa, bô thang pí-phēng; sī Ngá-kok tú-tio̍h hoān-lān ê kî-ji̍t; chóng-sī i beh tit-tio̍h kiù lâi thoat-chhut.

8萬軍ê耶和華án-ni講，到hit日，我beh對你ê頷頸at折伊ê擔，chhoah斷縛你ê索；外邦人無koh用伊做差用。Bān-kun ê Iâ-hô-hoa án-ni kóng, Kàu hit-ji̍t, Góa beh tùi lí ê ām-kún at-chi̍h i ê taⁿ, chhoah-tn̄g pa̍k lí ê soh; gōa-pang lâng bô koh ēng i chòe chhe-ēng.

9In是beh服事in ê上帝耶和華，kap in ê王大衛，就是我beh kā in興起ê。In sī beh ho̍k-sāi in ê Siōng-tè Iâ-hô-hoa, kap in ê ông Tāi-pi̍t, chiū-sī Góa beh kā in heng-khí--ê.

10耶和華講，我ê奴僕雅各ah，án-ni你莫得驚；以色列ah，莫得驚惶；因為我beh tùi遠ê所在拯救你；亦beh tùi受掠去ê地拯救你ê後裔；雅各beh tò來得tio̍h安靜、平安；無人hō͘伊驚。Iâ-hô-hoa kóng, Góa ê lô͘-po̍k Ngá-kok ah, án-ni lí bo̍h-tit kiaⁿ; Í-sek-lia̍t ah, bo̍h-tit kiaⁿ-hiâⁿ; in-ūi Góa beh tùi hn̄g ê só͘-chāi chín-kiù lí; ia̍h beh tùi siū-lia̍h--khì ê tōe chín-kiù lí ê hō͘-è; Ngá-kok beh tò--lâi tit-tio̍h an-chēng, pêng-an; bô lâng hō͘ i kiaⁿ.

11因為我kap你tī-teh，來拯救你；亦beh將我所趕你到hiah-ê國一盡剿滅；總是無一盡剿滅你；beh照所合宜ê責備你；斷斷bōe會無刑罰你；這是耶和華講ê。In-ūi Góa kap lí tī-teh, lâi chín-kiù lí; ia̍h beh chiong Góa só͘ kóaⁿ lí kàu hiah ê kok it-chīn châu-bia̍t; chóng-sī bô it-chīn châu-bia̍t lí; beh chiàu só͘ ha̍p-gî--ê chek-pī lí; toàn-toàn bōe-ōe bô hêng-hoa̍t lí; che sī Iâ-hô-hoa kóng--ê.

12耶和華án-ni講，你ê傷bōe醫得，你ê傷痕真傷重。Iâ-hô-hoa án-ni kóng, Lí ê siong bōe i--tit, lí ê siong-hûn chin siong-tiōng.

13無人替你辯護，hō͘你ê傷痕得tio̍h包；你無醫治ê好藥。Bô lâng thòe lí piān-hō͘, hō͘ lí ê siong-hûn tit-tio̍h pau; lí bô i-tī ê hó-io̍h.

14疼你ê人lóng bōe記得你，無來探你；因為你ê罪過真重，罪惡真chōe；我用對敵hit款ê phah來phah你；亦用殘忍ê ê警戒，來警戒你。Thiàⁿ lí ê lâng lóng bōe-kì-tit lí, bô lâi thàm lí; in-ūi lí ê chōe-kòa chin-tāng, chōe-ok chin-chōe; Góa ēng tùi-te̍k hit-khoán ê phah lâi phah lí; ia̍h ēng chân-jím--ê ê kéng-kài, lâi kéng-kài lí.

15你啥事因為你ê傷來喉叫ah？你ê痛苦bōe醫得；因為你ê罪過真重，罪惡真chōe；我所以用chiah-ê款待你。Lí siáⁿ-sū in-ūi lí ê siong lâi âu-kiò ah? lí ê thòng-khó͘ bōe i--tit; in-ūi lí ê chōe-kòa chin-tāng, chōe-ok chin-chōe; Góa só͘-í ēng chiah-ê khoán-thāi lí.

16所以見若吞食你ê，beh受吞食；你ê對敵，一個一個lóng hō͘人掠去；搶你ê，beh hō͘人搶，劫你ê，我beh hō͘伊受劫。Só͘-í kìⁿ-nā thun-chia̍h lí ê, beh siū thun-chia̍h; lí ê tùi-te̍k, chi̍t-ê chi̍t-ê lóng hō͘ lâng lia̍h-khì; chhiúⁿ lí--ê, beh hō͘ lâng chhiúⁿ, kiap lí--ê, Góa beh hō͘ i siū kiap.

17耶和華講，我beh hō͘你ê身體復原，醫好你ê傷痕；因為人lóng 稱你做受趕逐ê，講，這是錫安，無人chhē見ê。Iâ-hô-hoa kóng, Góa beh hō͘ lí ê sin-thé ho̍k-goân, i-hó lí ê siong-hûn; in-ūi lâng lóng chheng lí chòe siū kóaⁿ-tio̍k--ê, kóng, Che sī Sek-an, bô lâng chhē-kìⁿ--ê.

18耶和華án-ni講，看ah，我beh hō͘雅各受遷徙ê布棚倒tńg來，亦beh可憐伊khiā起ê所在；城beh起tī原舊ê牆基，王宮亦照舊有人khiā起。Iâ-hô-hoa án-ni kóng, Khòaⁿ ah, Góa beh hō͘ Ngá-kok siū chhian-sóa ê pò͘-pîⁿ tò-tńg--lâi, ia̍h beh khó-lîn i khiā-khí ê só͘-chāi; siâⁿ beh khí tī goân-kū ê chhiûⁿ-ki, ông-kiong ia̍h chiàu-kū ū lâng khiā-khí.

19Beh有感謝kap快樂ê ê聲tùi in中間出來；我也beh hō͘ in加添chōe-chōe，不致減少；hō͘ in尊貴，不致卑微。Beh ū kám-siā kap khoài-lo̍k--ê ê siaⁿ tùi in tiong-kan chhut--lâi; Góa iā beh hō͘ in ke-thiⁿ chōe-chōe, put-tì kiám-chió; hō͘ in chun-kùi, put-tì pi-bî.

20In ê kiáⁿ兒beh親像早日；in ê會眾beh khiā在tī我ê面前；凡若壓制in-ê，我beh辦伊。In ê kiáⁿ-jî beh chhin-chhiūⁿ chá-ji̍t; in ê hōe-chiòng beh khiā-chāi tī Góa ê bīn-chêng; hoān-nā ap-chè in--ê, Góa beh pān i.

21In ê君王的確是屬tī in ê；掌管in-ê，beh tùi in中間出；我beh hō͘伊近óa，伊亦beh親近我；若m̄是án-ni，是誰敢好膽親近我；這是耶和華講ê。In ê kun-ông tek-khak sī sio̍k tī in--ê; chiáng-koán in--ê, beh tùi in tiong-kan chhut; Góa beh hō͘ i kūn-óa, i ia̍h beh chhin-kūn Góa; nā m̄-sī án-ni, chī-chūi káⁿ hó-táⁿ chhin-kūn Góa; che sī Iâ-hô-hoa kóng--ê.

22Lín beh做我ê百姓，我beh做lín ê上帝。Lín beh chòe Góa ê peh-sìⁿ, Góa beh chòe lín ê Siōng-tè.

23看ah，耶和華ê受氣親像大風發出；就是掃滅ê大風，beh tńg旋攻擊pháiⁿ人ê頭殼。Khòaⁿ ah, Iâ-hô-hoa ê siū-khì chhin-chhiūⁿ tōa hong hoat-chhut; chiū-sī sàu-bia̍t ê tōa-hong, beh tńg-se̍h kong-kek pháiⁿ-lâng ê thâu-khak.

24耶和華ê心所擬定ê iáu未做，iáu未成ê事先，祂ê大受氣的確無收倒tńg；日後lín beh明白。Iâ-hô-hoa ê sim só͘ gí-tiāⁿ--ê iáu-bē chòe, iáu-bē chiâⁿ ê tāi-seng, I ê tōa siū-khì tek-khak bô siu tò-tńg; ji̍t-āu lín beh bêng-pe̍k.

1耶和華講，hit時我beh做以色列ta̍k房頭ê上帝；in beh做我ê百姓。Iâ-hô-hoa kóng, Hit-sî Góa beh chòe Í-sek-lia̍t ta̍k pâng-thâu ê Siōng-tè; in beh chòe Góa ê peh-sìⁿ.

2耶和華án-ni講，以色列hō͘刀thâi無了ê百姓，tī曠野得tio̍h恩典；我去hō͘ in得tio̍h安歇。Iâ-hô-hoa án-ni kóng, Í-sek-lia̍t hō͘ to thâi-bô-liáu ê peh-sìⁿ, tī khòng-iá tit-tio̍h un-tián; Góa khì hō͘ in tit-tio̍h an-hioh.

3早時耶和華對我顯現，講，我用永遠ê疼，疼你；因為án-ni，我用慈愛牽你。Chá-sî Iâ-hô-hoa tùi góa hián-hiān, kóng, Góa ēng éng-oán ê thiàⁿ, thiàⁿ lí; in-ūi án-ni, Góa ēng chû-ài khan lí.

4以色列ê在室女ah，我beh koh建立你，你就得tio̍h建立；你beh koh用lin-long鼓做裝飾，kap快樂ê人做陣跳舞出去。Í-sek-lia̍t ê chāi-sek-lú ah, Góa beh koh kiàn-li̍p lí, lí chiū tit-tio̍h kiàn-li̍p; lí beh koh ēng lin-long-kó͘ chòe chng-thāⁿ, kap khoài-lo̍k ê lâng chòe-tīn thiàu-bú chhut-khì.

5你beh koh栽種葡萄園tī撒馬利亞chiah-ê山栽種ê beh栽種伊，來享受伊ê果子。Lí beh koh chai-chèng phû-tô-hn̂g tī Sat-má-lī-a chiah ê soaⁿ chai-chèng--ê beh chai-chèng i, lâi hióng-siū i ê ké-chí.

6因為beh有一日，Í-hoat-liân山守望ê人beh叫講，起來，咱上來去錫安，到耶和華咱ê上帝hia。In-ūi beh ū chi̍t-ji̍t, Í-hoat-liân soaⁿ siú-bāng ê lâng beh kiò kóng, Khí-lâi, lán chiūⁿ-lâi khì Sek-an, kàu Iâ-hô-hoa lán ê Siōng-tè hia.

7耶和華án-ni講，Lín tio̍h為雅各唱歡喜ê歌，為萬國中做頭ê國出大聲，傳播o-ló講，耶和華ah，救你ê百姓以色列所chhun ê人。Iâ-hô-hoa án-ni kóng, Lín tio̍h ūi Ngá-kok chhiùⁿ hoaⁿ-hí ê koa, ūi bān-kok-tiong chòe-thâu ê kok chhut tōa-siaⁿ, thoân-pò͘ o-ló kóng, Iâ-hô-hoa ah, kiù Lí ê peh-sìⁿ Í-sek-lia̍t só͘ chhun ê lâng.

8看ah，我beh chhōa in tùi北方來，聚集in tùi地極來；kap in來ê，有chhiⁿ-mî-ê、跛腳ê、帶娠(sin)ê、beh生kiáⁿ-ê，kui大陣相kap來。Khòaⁿ ah, Góa beh chhōa in tùi pak-hng lâi, chū-chi̍p in tùi tōe-ke̍k lâi; kap in lâi--ê, ū chhiⁿ-mî--ê, pái-kha--ê, tòa-sin--ê, beh siⁿ-kiáⁿ--ê, kui tōa-tīn saⁿ-kap lâi.

9In beh啼哭來，我beh tī祈禱chhōa in；我beh tī正直bōe跋倒ê路chhōa in到河邊；因為我是以色列ê父，Í-hoat-liân做我ê大kiáⁿ。In beh thî-khàu lâi, Góa beh tī kî-tó chhōa in; Góa beh tī chèng-ti̍t bōe poa̍h-tó ê lō͘ chhōa in kàu hô-piⁿ; in-ūi Góa sī Í-sek-lia̍t ê pē, Í-hoat-liân chòe Góa ê tōa kiáⁿ.

10列國ah，tio̍h聽耶和華ê話，傳報tī遠ê海嶼，講，趕散以色列ê beh聚集伊，koh顧守伊，親像牧者顧守伊ê羊群。Lia̍t-kok ah, tio̍h thiaⁿ Iâ-hô-hoa ê ōe, thoân-pò tī hn̄g ê hái-sū, kóng, Kóaⁿ-sòaⁿ Í-sek-lia̍t--ê beh chū-chi̍p i, koh kò͘-siú i, chhin-chhiūⁿ bo̍k-chiá kò͘-siú i ê iûⁿ-kûn.

11因為耶和華已經救贖雅各，贖回伊脫離比伊khah強ê ê手。In-ūi Iâ-hô-hoa í-keng kiù-sio̍k Ngá-kok, sio̍k -hôe i thoat-lī pí i khah kiông--ê ê chhiú.

12In beh到錫安高ê所在唱歌；koh beh親像河水流，到耶和華恩典ê地，得tio̍h五穀、酒、油、羊群、牛群ê細隻ê；in ê心beh親像灌ak ê園，lóng無koh憂苦。In beh kàu Sek-an koâiⁿ ê só͘-chāi chhiùⁿ-koa; koh beh chhin-chhiūⁿ hô-chúi lâu, kàu Iâ-hô-hoa un-tián ê tōe, tit-tio̍h gō͘-kak, chiú, iû, iûⁿ-kûn, gû-kûn ê sòe-chiah--ê; in ê sim beh chhin-chhiūⁿ koàn-ak ê hn̂g, lóng bô koh iu-khó͘.

13Hit時在室女beh跳舞來歡喜，少年人老人亦beh相kap歡喜；因為我beh hō͘ in ê悲哀變做歡喜，亦beh安慰in，hō͘ in tī憂悶了後來快樂。Hit-sî chāi-sek-lú beh thiàu-bú lâi hoaⁿ-hí, siàu-liân-lâng lāu-lâng ia̍h beh saⁿ-kap hoaⁿ-hí; in-ūi Góa beh hō͘ in ê pi-ai pìⁿ-chòe hoaⁿ-hí, ia̍h beh an-ùi in, hō͘ in tī iu-būn liáu-āu lâi khoài-lo̍k.

14我beh用油膩hō͘祭司ê心滿足；我ê百姓亦beh因為我ê恩惠滿意；這是耶和華講ê。Góa beh ēng iû-jī hō͘ chè-si ê sim móa-chiok; Góa ê peh-sìⁿ ia̍h beh in-ūi Góa ê un-hūi móa-ì; che sī Iâ-hô-hoa kóng--ê.

15耶和華án-ni講，Tī La̍h-má聽見聲，啼哭koh大傷悲，拉結哭伊ê kiáⁿ兒，m̄願受安慰，因為伊ê kiáⁿ無去。Iâ-hô-hoa án-ni kóng, Tī La̍h-má thiaⁿ-kìⁿ siaⁿ, thî-khàu koh tōa siong-pi, La̍h-kiat khàu i ê kiáⁿ-jî, m̄-goān siū an-ùi, in-ūi i ê kiáⁿ bô--khì.

16耶和華án-ni講，Tio̍h禁止你ê聲，莫得啼哭；禁止你ê目睭，莫得流目屎；因為你做工，beh有報賞；in beh tùi對敵ê國tò來；這是耶和華講ê。Iâ-hô-hoa án-ni kóng, Tio̍h kìm-chí lí ê siaⁿ, bo̍h-tit thî-khàu; kìm-chí lí ê ba̍k-chiu, bo̍h-tit lâu ba̍k-sái; in-ūi lí chòe-kang, beh ū pò-siúⁿ; in beh tùi tùi-te̍k ê kok tò-lâi; che sī Iâ-hô-hoa kóng--ê.

17耶和華講，你ê尾景有ǹg望，你ê kiáⁿ兒beh tò來家己ê境內。Iâ-hô-hoa kóng, Lí ê bé-kéng ū ǹg-bāng, lí ê kiáⁿ-jî beh tò--lâi ka-kī ê kéng-lāi.

18我實在有聽見Í-hoat-liân家己痛恨，講，你督責我，我就受督責；我親像教bē上chōa ê牛á，求你hō͘我oa̍t倒tńg，我就oa̍t倒tńg；因為你是我ê上帝耶和華。Góa si̍t-chāi ū thiaⁿ-kìⁿ Í-hoat-liân ka-kī thòng-hūn, kóng, Lí tok-chek góa, góa chiū siū tok-chek; góa chhin-chhiūⁿ kà bē-chiūⁿ-chōa ê gû-á, kiû Lí hō͘ góa oa̍t-tò-tńg, góa chiū oa̍t-tò-tńg; in-ūi Lí sī góa ê Siōng-tè Iâ-hô-hoa.

19我oa̍t倒tńg以後就反悔；受教示以後，就phah腳腿；我就見笑漏氣，因為我擔當少年ê時ê凌辱。Góa oa̍t-tò-tńg í-āu chiū hoán-hóe; siū kà-sī í-āu, chiū phah kha-thúi; góa chiū kiàn-siàu làu-khùi, in-ūi góa tam-tng siàu-liân ê sî ê lêng-jio̍k.

20耶和華講，Í-hoat-liân是我疼ê kiáⁿ mah？是thang歡喜ê gín-ná mah？我見若責備伊，iáu-kú深深siàu念伊；所以我ê心腸為tio̍h伊bōe平安，我的確beh憐憫伊。Iâ-hô-hoa kóng, Í-hoat-liân sī Góa thiàⁿ ê kiáⁿ mah? sī thang hoaⁿ-hí ê gín-ná mah? Góa kìⁿ-nā chek-pī i, iáu-kú chhim-chhim siàu-liām i; só͘-í Góa ê sim-tn̂g ūi-tio̍h i bōe pêng-an, Góa tek-khak beh lîn-bín i.

21以色列ê百姓ah，你tio̍h為家己立指路牌，khiā引路柱；你tio̍h留心ǹg大路，就是你所去ê原路；你tio̍h tò來，tò來tī你chiah-ê城。Í-sek-lia̍t ê peh-sìⁿ ah, lí tio̍h ūi ka-kī li̍p chí-lō͘-pâi, khiā ín-lō͘-thiāu; lí tio̍h liû-sim ǹg tōa-lō͘, chiū-sī lí só͘ khì ê goân-lō͘; lí tio̍h tò--lâi, tò-lâi tī lí chiah ê siâⁿ.

22悖謬ê cha-bó͘-gín-ná ah，你四界流無定tio̍h，beh到tī時ah？耶和華tī地上chhòng一項新ê事，就是cha-bó͘人beh保護ta-po͘人。Pōe-biū ê cha-bó͘-gín-ná ah, lí sì-kòe liû bô tiāⁿ-tio̍h, beh kàu tī-sî ah? Iâ-hô-hoa tī tōe-chiūⁿ chhòng chi̍t-hāng sin ê sū, chiū-sī cha-bó͘-lâng beh pó-hō͘ ta-po͘-lâng.

23萬軍ê耶和華，以色列ê上帝，án-ni講，我hō͘受掠ê人tò來ê時，tī猶大地kap伊hiah-ê城，人beh koh用chit-ê話講，公義ê厝，聖ê山ah，願耶和華賜福你。Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Góa hō͘ siū-lia̍h ê lâng tò--lâi ê sî, tī Iû-tāi tōe kap i hiah ê siâⁿ, lâng beh koh ēng chit ê ōe kóng, Kong-gī ê chhù, sèng ê soaⁿ ah, goān Iâ-hô-hoa sù-hok lí.

24猶大kap hiah-ê城ê人以及作穡人，四界飼羊ê人，lóng beh相kap khiā起tī-hia。Iû-tāi kap hiah ê siâⁿ ê lâng í-ki̍p choh-sit lâng, sì-kòe chhī-iûⁿ ê lâng, lóng beh saⁿ-kap khiā-khí tī-hia.

25因為心神厭倦ê人，我已經hō͘伊滿足；心神憂悶ê人，我已經hō͘伊知足。In-ūi sim-sîn ià-siān ê lâng, Góa í-keng hō͘ i móa-chiok; sim-sîn iu-būn ê lâng, Góa í-keng hō͘ i ti-chiok.

26先知講，我睏醒teh想，我ê睏真歡喜。Sian-ti kóng, Góa khùn-chhíⁿ teh siūⁿ, góa ê khùn chin hoaⁿ-hí.

27耶和華講，看ah，日子beh到，我beh hō͘以色列家kap猶大家，人kap cheng-siⁿ，lóng傳種。Iâ-hô-hoa kóng, Khòaⁿ ah, ji̍t-chí beh kàu, Góa beh hō͘ Í-sek-lia̍t ke kap Iû-tāi ke, lâng kap cheng-siⁿ, lóng thoân-chéng.

28我早前怎樣專心將in拔出、拆毀、chhia倒、滅無、困苦；亦beh照án-ni專心將in建立、栽種；這是耶和華講ê。Góa chá-chêng cháiⁿ-iūⁿ choan-sim chiong in pu̍ih-chhut, thiah-húi, chhia-tó, bia̍t-bô, khùn-khó͘; ia̍h beh chiàu án-ni choan-sim chiong in kiàn-li̍p, chai-chèng; che sī Iâ-hô-hoa kóng-ê.

29當hiah-ê日，人無koh講，老父食酸ê葡萄，kiáⁿ ê嘴齒酸軟。Tng hiah ê ji̍t, lâng bô koh kóng, Lāu-pē chia̍h sng ê phû-tô, kiáⁿ ê chhùi-khí sng-nńg.

30ta̍k人beh 因為家己ê罪來死；見若食酸ê葡萄ê，in ê嘴齒beh軟。Ta̍k-lâng beh in-ūi ka-kī ê chōe lâi sí; kìⁿ-nā chia̍h sng ê phû-tô--ê, in ê chhùi-khí beh nńg.

31耶和華講，看ah，日子beh到，我beh kap以色列家，猶大家，立新ê約：Iâ-hô-hoa kóng, Khòaⁿ ah, ji̍t-chí beh kàu, Góa beh kap Í-sek-lia̍t ke, Iû-tāi ke, li̍p sin ê iok:

32m̄是照我kap in ê列祖所立ê約，tī我牽in ê手，chhōa in出埃及地ê時所立ê；我雖bóng做in ê丈夫，in猶原背我ê約；這是耶和華講ê。m̄-sī chiàu Góa kap in ê lia̍t-chó͘ só͘ li̍p ê iok, tī Góa khan in ê chhiú, chhōa in chhut Ai-ki̍p tōe ê sî só͘ li̍p--ê; Góa sui-bóng chòe in ê tiōng-hu, in iû-goân pōe Góa ê iok; che sī Iâ-hô-hoa kóng--ê.

33耶和華講，hiah-ê日了後，我kap以色列家所beh立ê約是chit-ê；就是我beh用我ê律法hē tī in ê心內，刻tī in ê心；我beh做in ê上帝，in beh做我ê百姓。Iâ-hô-hoa kóng, Hiah ê ji̍t liáu-āu, Góa kap Í-sek-lia̍t ke só͘ beh li̍p ê iok sī chit-ê; chiū-sī Góa beh ēng Góa ê lu̍t-hoat hē tī in ê sim-lāi, khek tī in ê sim; Góa beh chòe in ê Siōng-tè, in beh chòe Góa ê peh-sìⁿ.

34In無koh ta̍k人教示in ê厝邊，kap in ta̍k人ê兄弟，講，Lín tio̍h bat耶和華；因為in tùi大到細，lóng beh bat我；因為我beh赦免in ê罪過，無koh記得in ê罪；這是耶和華講ê。In bô koh ta̍k-lâng kà-sī in ê chhù-piⁿ, kap in ta̍k-lâng ê hiaⁿ-tī, kóng, Lín tio̍h bat Iâ-hô-hoa; in-ūi in tùi tōa kàu sòe, lóng beh bat Góa; in-ūi Góa beh sià-bián in ê chōe-kòa, bô koh kì-tit in ê chōe; che sī Iâ-hô-hoa kóng--ê.

35耶和華設太陽做日時ê光，設月kap星ê定例做暝時ê光；搖動大海，hō͘伊ê湧hōa-hōa哮；萬軍ê耶和華就是祂ê名；Iâ-hô-hoa siat thài-iông chòe ji̍t--sî ê kng, siat ge̍h kap chhiⁿ ê tēng-lē chòe mî--sî ê kng; iô-tāng tōa-hái, hō͘ i ê éng hōa-hōa-háu; bān-kun ê Iâ-hô-hoa chiū-sī I ê miâ;

36祂有án-ni講，chiah-ê定例若會tī我ê面前廢無，以色列ê後裔chiah會tī我ê面前絕斷，永遠bōe成做國；這是耶和華講ê。I ū án-ni kóng, Chiah ê tēng-lē nā ōe tī Góa ê bīn-chêng hòe-bô, Í-sek-lia̍t ê hō͘-è chiah ōe tī Góa ê bīn-chêng choa̍t-tn̄g, éng-oán bōe chiâⁿ-chòe kok; che sī Iâ-hô-hoa kóng--ê.

37耶和華án-ni講，若tī頂面ê天能量得，tī下面ê地chiah-ê根基能測度得，就我的確因為以色列ê後裔一切ê所行來棄sak伊；這是耶和華講ê。Iâ-hô-hoa án-ni kóng, Nā tī téng-bīn ê thiⁿ ōe niû--tit, tī ē-bīn ê tōe chiah ê kun-ki ōe chhek-to̍k--tit, chiū Góa tek-khak in-ūi Í-sek-lia̍t ê hō͘-è it-chhè ê só͘-kiâⁿ lâi khì-sak--i; che sī Iâ-hô-hoa kóng--ê.

38耶和華講，看ah，日子beh到，chit-ê城beh kā耶和華起造，tùi Hap-lâm-gia̍p ê樓，到角頭ê門。Iâ-hô-hoa kóng, Khòaⁿ ah, ji̍t-chí beh kàu, chit ê siâⁿ beh kā Iâ-hô-hoa khí-chō, tùi Hap-lâm-gia̍p ê lâu, kàu kak-thâu ê mn̂g.

39量ê索koh牽出去，直到Ka-li̍p山；oa̍t-tńg到Ko-a。Niû ê soh koh khan chhut--khì, ti̍t-kàu Ka-li̍p soaⁿ; oa̍t-tńg kàu Ko-a.

40Hiat身屍kap piàⁿ火灰ka-nn̂g ê山谷，kap一切ê田園，直到Khip-lûn溪，koh直到東勢馬ê門ê角頭，lóng beh做聖，歸tī耶和華，無koh拔出，無koh chhia倒，直到永遠。Hiat sin-si kap piàⁿ hé-hu ka-nn̂g ê soaⁿ-kok, kap it-chhè ê chhân-hn̂g, ti̍t-kàu Khip-lûn khoe, koh ti̍t-kàu tang--sì Bé ê mn̂g ê kak-thâu, lóng beh chòe-sèng, kui tī Iâ-hô-hoa, bô koh pu̍ih-chhut, bô koh chhia-tó, ti̍t-kàu éng-oán.