1耶和華講，hit時我beh做以色列ta̍k房頭ê上帝；in beh做我ê百姓。Iâ-hô-hoa kóng, Hit-sî Góa beh chòe Í-sek-lia̍t ta̍k pâng-thâu ê Siōng-tè; in beh chòe Góa ê peh-sìⁿ.

2耶和華án-ni講，以色列hō͘刀thâi無了ê百姓，tī曠野得tio̍h恩典；我去hō͘ in得tio̍h安歇。Iâ-hô-hoa án-ni kóng, Í-sek-lia̍t hō͘ to thâi-bô-liáu ê peh-sìⁿ, tī khòng-iá tit-tio̍h un-tián; Góa khì hō͘ in tit-tio̍h an-hioh.

3早時耶和華對我顯現，講，我用永遠ê疼，疼你；因為án-ni，我用慈愛牽你。Chá-sî Iâ-hô-hoa tùi góa hián-hiān, kóng, Góa ēng éng-oán ê thiàⁿ, thiàⁿ lí; in-ūi án-ni, Góa ēng chû-ài khan lí.

4以色列ê在室女ah，我beh koh建立你，你就得tio̍h建立；你beh koh用lin-long鼓做裝飾，kap快樂ê人做陣跳舞出去。Í-sek-lia̍t ê chāi-sek-lú ah, Góa beh koh kiàn-li̍p lí, lí chiū tit-tio̍h kiàn-li̍p; lí beh koh ēng lin-long-kó͘ chòe chng-thāⁿ, kap khoài-lo̍k ê lâng chòe-tīn thiàu-bú chhut-khì.

5你beh koh栽種葡萄園tī撒馬利亞chiah-ê山栽種ê beh栽種伊，來享受伊ê果子。Lí beh koh chai-chèng phû-tô-hn̂g tī Sat-má-lī-a chiah ê soaⁿ chai-chèng--ê beh chai-chèng i, lâi hióng-siū i ê ké-chí.

6因為beh有一日，Í-hoat-liân山守望ê人beh叫講，起來，咱上來去錫安，到耶和華咱ê上帝hia。In-ūi beh ū chi̍t-ji̍t, Í-hoat-liân soaⁿ siú-bāng ê lâng beh kiò kóng, Khí-lâi, lán chiūⁿ-lâi khì Sek-an, kàu Iâ-hô-hoa lán ê Siōng-tè hia.

7耶和華án-ni講，Lín tio̍h為雅各唱歡喜ê歌，為萬國中做頭ê國出大聲，傳播o-ló講，耶和華ah，救你ê百姓以色列所chhun ê人。Iâ-hô-hoa án-ni kóng, Lín tio̍h ūi Ngá-kok chhiùⁿ hoaⁿ-hí ê koa, ūi bān-kok-tiong chòe-thâu ê kok chhut tōa-siaⁿ, thoân-pò͘ o-ló kóng, Iâ-hô-hoa ah, kiù Lí ê peh-sìⁿ Í-sek-lia̍t só͘ chhun ê lâng.

8看ah，我beh chhōa in tùi北方來，聚集in tùi地極來；kap in來ê，有chhiⁿ-mî-ê、跛腳ê、帶娠(sin)ê、beh生kiáⁿ-ê，kui大陣相kap來。Khòaⁿ ah, Góa beh chhōa in tùi pak-hng lâi, chū-chi̍p in tùi tōe-ke̍k lâi; kap in lâi--ê, ū chhiⁿ-mî--ê, pái-kha--ê, tòa-sin--ê, beh siⁿ-kiáⁿ--ê, kui tōa-tīn saⁿ-kap lâi.

9In beh啼哭來，我beh tī祈禱chhōa in；我beh tī正直bōe跋倒ê路chhōa in到河邊；因為我是以色列ê父，Í-hoat-liân做我ê大kiáⁿ。In beh thî-khàu lâi, Góa beh tī kî-tó chhōa in; Góa beh tī chèng-ti̍t bōe poa̍h-tó ê lō͘ chhōa in kàu hô-piⁿ; in-ūi Góa sī Í-sek-lia̍t ê pē, Í-hoat-liân chòe Góa ê tōa kiáⁿ.

10列國ah，tio̍h聽耶和華ê話，傳報tī遠ê海嶼，講，趕散以色列ê beh聚集伊，koh顧守伊，親像牧者顧守伊ê羊群。Lia̍t-kok ah, tio̍h thiaⁿ Iâ-hô-hoa ê ōe, thoân-pò tī hn̄g ê hái-sū, kóng, Kóaⁿ-sòaⁿ Í-sek-lia̍t--ê beh chū-chi̍p i, koh kò͘-siú i, chhin-chhiūⁿ bo̍k-chiá kò͘-siú i ê iûⁿ-kûn.

11因為耶和華已經救贖雅各，贖回伊脫離比伊khah強ê ê手。In-ūi Iâ-hô-hoa í-keng kiù-sio̍k Ngá-kok, sio̍k -hôe i thoat-lī pí i khah kiông--ê ê chhiú.

12In beh到錫安高ê所在唱歌；koh beh親像河水流，到耶和華恩典ê地，得tio̍h五穀、酒、油、羊群、牛群ê細隻ê；in ê心beh親像灌ak ê園，lóng無koh憂苦。In beh kàu Sek-an koâiⁿ ê só͘-chāi chhiùⁿ-koa; koh beh chhin-chhiūⁿ hô-chúi lâu, kàu Iâ-hô-hoa un-tián ê tōe, tit-tio̍h gō͘-kak, chiú, iû, iûⁿ-kûn, gû-kûn ê sòe-chiah--ê; in ê sim beh chhin-chhiūⁿ koàn-ak ê hn̂g, lóng bô koh iu-khó͘.

13Hit時在室女beh跳舞來歡喜，少年人老人亦beh相kap歡喜；因為我beh hō͘ in ê悲哀變做歡喜，亦beh安慰in，hō͘ in tī憂悶了後來快樂。Hit-sî chāi-sek-lú beh thiàu-bú lâi hoaⁿ-hí, siàu-liân-lâng lāu-lâng ia̍h beh saⁿ-kap hoaⁿ-hí; in-ūi Góa beh hō͘ in ê pi-ai pìⁿ-chòe hoaⁿ-hí, ia̍h beh an-ùi in, hō͘ in tī iu-būn liáu-āu lâi khoài-lo̍k.

14我beh用油膩hō͘祭司ê心滿足；我ê百姓亦beh因為我ê恩惠滿意；這是耶和華講ê。Góa beh ēng iû-jī hō͘ chè-si ê sim móa-chiok; Góa ê peh-sìⁿ ia̍h beh in-ūi Góa ê un-hūi móa-ì; che sī Iâ-hô-hoa kóng--ê.

15耶和華án-ni講，Tī La̍h-má聽見聲，啼哭koh大傷悲，拉結哭伊ê kiáⁿ兒，m̄願受安慰，因為伊ê kiáⁿ無去。Iâ-hô-hoa án-ni kóng, Tī La̍h-má thiaⁿ-kìⁿ siaⁿ, thî-khàu koh tōa siong-pi, La̍h-kiat khàu i ê kiáⁿ-jî, m̄-goān siū an-ùi, in-ūi i ê kiáⁿ bô--khì.

16耶和華án-ni講，Tio̍h禁止你ê聲，莫得啼哭；禁止你ê目睭，莫得流目屎；因為你做工，beh有報賞；in beh tùi對敵ê國tò來；這是耶和華講ê。Iâ-hô-hoa án-ni kóng, Tio̍h kìm-chí lí ê siaⁿ, bo̍h-tit thî-khàu; kìm-chí lí ê ba̍k-chiu, bo̍h-tit lâu ba̍k-sái; in-ūi lí chòe-kang, beh ū pò-siúⁿ; in beh tùi tùi-te̍k ê kok tò-lâi; che sī Iâ-hô-hoa kóng--ê.

17耶和華講，你ê尾景有ǹg望，你ê kiáⁿ兒beh tò來家己ê境內。Iâ-hô-hoa kóng, Lí ê bé-kéng ū ǹg-bāng, lí ê kiáⁿ-jî beh tò--lâi ka-kī ê kéng-lāi.

18我實在有聽見Í-hoat-liân家己痛恨，講，你督責我，我就受督責；我親像教bē上chōa ê牛á，求你hō͘我oa̍t倒tńg，我就oa̍t倒tńg；因為你是我ê上帝耶和華。Góa si̍t-chāi ū thiaⁿ-kìⁿ Í-hoat-liân ka-kī thòng-hūn, kóng, Lí tok-chek góa, góa chiū siū tok-chek; góa chhin-chhiūⁿ kà bē-chiūⁿ-chōa ê gû-á, kiû Lí hō͘ góa oa̍t-tò-tńg, góa chiū oa̍t-tò-tńg; in-ūi Lí sī góa ê Siōng-tè Iâ-hô-hoa.

19我oa̍t倒tńg以後就反悔；受教示以後，就phah腳腿；我就見笑漏氣，因為我擔當少年ê時ê凌辱。Góa oa̍t-tò-tńg í-āu chiū hoán-hóe; siū kà-sī í-āu, chiū phah kha-thúi; góa chiū kiàn-siàu làu-khùi, in-ūi góa tam-tng siàu-liân ê sî ê lêng-jio̍k.

20耶和華講，Í-hoat-liân是我疼ê kiáⁿ mah？是thang歡喜ê gín-ná mah？我見若責備伊，iáu-kú深深siàu念伊；所以我ê心腸為tio̍h伊bōe平安，我的確beh憐憫伊。Iâ-hô-hoa kóng, Í-hoat-liân sī Góa thiàⁿ ê kiáⁿ mah? sī thang hoaⁿ-hí ê gín-ná mah? Góa kìⁿ-nā chek-pī i, iáu-kú chhim-chhim siàu-liām i; só͘-í Góa ê sim-tn̂g ūi-tio̍h i bōe pêng-an, Góa tek-khak beh lîn-bín i.

21以色列ê百姓ah，你tio̍h為家己立指路牌，khiā引路柱；你tio̍h留心ǹg大路，就是你所去ê原路；你tio̍h tò來，tò來tī你chiah-ê城。Í-sek-lia̍t ê peh-sìⁿ ah, lí tio̍h ūi ka-kī li̍p chí-lō͘-pâi, khiā ín-lō͘-thiāu; lí tio̍h liû-sim ǹg tōa-lō͘, chiū-sī lí só͘ khì ê goân-lō͘; lí tio̍h tò--lâi, tò-lâi tī lí chiah ê siâⁿ.

22悖謬ê cha-bó͘-gín-ná ah，你四界流無定tio̍h，beh到tī時ah？耶和華tī地上chhòng一項新ê事，就是cha-bó͘人beh保護ta-po͘人。Pōe-biū ê cha-bó͘-gín-ná ah, lí sì-kòe liû bô tiāⁿ-tio̍h, beh kàu tī-sî ah? Iâ-hô-hoa tī tōe-chiūⁿ chhòng chi̍t-hāng sin ê sū, chiū-sī cha-bó͘-lâng beh pó-hō͘ ta-po͘-lâng.

23萬軍ê耶和華，以色列ê上帝，án-ni講，我hō͘受掠ê人tò來ê時，tī猶大地kap伊hiah-ê城，人beh koh用chit-ê話講，公義ê厝，聖ê山ah，願耶和華賜福你。Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Góa hō͘ siū-lia̍h ê lâng tò--lâi ê sî, tī Iû-tāi tōe kap i hiah ê siâⁿ, lâng beh koh ēng chit ê ōe kóng, Kong-gī ê chhù, sèng ê soaⁿ ah, goān Iâ-hô-hoa sù-hok lí.

24猶大kap hiah-ê城ê人以及作穡人，四界飼羊ê人，lóng beh相kap khiā起tī-hia。Iû-tāi kap hiah ê siâⁿ ê lâng í-ki̍p choh-sit lâng, sì-kòe chhī-iûⁿ ê lâng, lóng beh saⁿ-kap khiā-khí tī-hia.

25因為心神厭倦ê人，我已經hō͘伊滿足；心神憂悶ê人，我已經hō͘伊知足。In-ūi sim-sîn ià-siān ê lâng, Góa í-keng hō͘ i móa-chiok; sim-sîn iu-būn ê lâng, Góa í-keng hō͘ i ti-chiok.

26先知講，我睏醒teh想，我ê睏真歡喜。Sian-ti kóng, Góa khùn-chhíⁿ teh siūⁿ, góa ê khùn chin hoaⁿ-hí.

27耶和華講，看ah，日子beh到，我beh hō͘以色列家kap猶大家，人kap cheng-siⁿ，lóng傳種。Iâ-hô-hoa kóng, Khòaⁿ ah, ji̍t-chí beh kàu, Góa beh hō͘ Í-sek-lia̍t ke kap Iû-tāi ke, lâng kap cheng-siⁿ, lóng thoân-chéng.

28我早前怎樣專心將in拔出、拆毀、chhia倒、滅無、困苦；亦beh照án-ni專心將in建立、栽種；這是耶和華講ê。Góa chá-chêng cháiⁿ-iūⁿ choan-sim chiong in pu̍ih-chhut, thiah-húi, chhia-tó, bia̍t-bô, khùn-khó͘; ia̍h beh chiàu án-ni choan-sim chiong in kiàn-li̍p, chai-chèng; che sī Iâ-hô-hoa kóng-ê.

29當hiah-ê日，人無koh講，老父食酸ê葡萄，kiáⁿ ê嘴齒酸軟。Tng hiah ê ji̍t, lâng bô koh kóng, Lāu-pē chia̍h sng ê phû-tô, kiáⁿ ê chhùi-khí sng-nńg.

30ta̍k人beh 因為家己ê罪來死；見若食酸ê葡萄ê，in ê嘴齒beh軟。Ta̍k-lâng beh in-ūi ka-kī ê chōe lâi sí; kìⁿ-nā chia̍h sng ê phû-tô--ê, in ê chhùi-khí beh nńg.

31耶和華講，看ah，日子beh到，我beh kap以色列家，猶大家，立新ê約：Iâ-hô-hoa kóng, Khòaⁿ ah, ji̍t-chí beh kàu, Góa beh kap Í-sek-lia̍t ke, Iû-tāi ke, li̍p sin ê iok:

32m̄是照我kap in ê列祖所立ê約，tī我牽in ê手，chhōa in出埃及地ê時所立ê；我雖bóng做in ê丈夫，in猶原背我ê約；這是耶和華講ê。m̄-sī chiàu Góa kap in ê lia̍t-chó͘ só͘ li̍p ê iok, tī Góa khan in ê chhiú, chhōa in chhut Ai-ki̍p tōe ê sî só͘ li̍p--ê; Góa sui-bóng chòe in ê tiōng-hu, in iû-goân pōe Góa ê iok; che sī Iâ-hô-hoa kóng--ê.

33耶和華講，hiah-ê日了後，我kap以色列家所beh立ê約是chit-ê；就是我beh用我ê律法hē tī in ê心內，刻tī in ê心；我beh做in ê上帝，in beh做我ê百姓。Iâ-hô-hoa kóng, Hiah ê ji̍t liáu-āu, Góa kap Í-sek-lia̍t ke só͘ beh li̍p ê iok sī chit-ê; chiū-sī Góa beh ēng Góa ê lu̍t-hoat hē tī in ê sim-lāi, khek tī in ê sim; Góa beh chòe in ê Siōng-tè, in beh chòe Góa ê peh-sìⁿ.

34In無koh ta̍k人教示in ê厝邊，kap in ta̍k人ê兄弟，講，Lín tio̍h bat耶和華；因為in tùi大到細，lóng beh bat我；因為我beh赦免in ê罪過，無koh記得in ê罪；這是耶和華講ê。In bô koh ta̍k-lâng kà-sī in ê chhù-piⁿ, kap in ta̍k-lâng ê hiaⁿ-tī, kóng, Lín tio̍h bat Iâ-hô-hoa; in-ūi in tùi tōa kàu sòe, lóng beh bat Góa; in-ūi Góa beh sià-bián in ê chōe-kòa, bô koh kì-tit in ê chōe; che sī Iâ-hô-hoa kóng--ê.

35耶和華設太陽做日時ê光，設月kap星ê定例做暝時ê光；搖動大海，hō͘伊ê湧hōa-hōa哮；萬軍ê耶和華就是祂ê名；Iâ-hô-hoa siat thài-iông chòe ji̍t--sî ê kng, siat ge̍h kap chhiⁿ ê tēng-lē chòe mî--sî ê kng; iô-tāng tōa-hái, hō͘ i ê éng hōa-hōa-háu; bān-kun ê Iâ-hô-hoa chiū-sī I ê miâ;

36祂有án-ni講，chiah-ê定例若會tī我ê面前廢無，以色列ê後裔chiah會tī我ê面前絕斷，永遠bōe成做國；這是耶和華講ê。I ū án-ni kóng, Chiah ê tēng-lē nā ōe tī Góa ê bīn-chêng hòe-bô, Í-sek-lia̍t ê hō͘-è chiah ōe tī Góa ê bīn-chêng choa̍t-tn̄g, éng-oán bōe chiâⁿ-chòe kok; che sī Iâ-hô-hoa kóng--ê.

37耶和華án-ni講，若tī頂面ê天能量得，tī下面ê地chiah-ê根基能測度得，就我的確因為以色列ê後裔一切ê所行來棄sak伊；這是耶和華講ê。Iâ-hô-hoa án-ni kóng, Nā tī téng-bīn ê thiⁿ ōe niû--tit, tī ē-bīn ê tōe chiah ê kun-ki ōe chhek-to̍k--tit, chiū Góa tek-khak in-ūi Í-sek-lia̍t ê hō͘-è it-chhè ê só͘-kiâⁿ lâi khì-sak--i; che sī Iâ-hô-hoa kóng--ê.

38耶和華講，看ah，日子beh到，chit-ê城beh kā耶和華起造，tùi Hap-lâm-gia̍p ê樓，到角頭ê門。Iâ-hô-hoa kóng, Khòaⁿ ah, ji̍t-chí beh kàu, chit ê siâⁿ beh kā Iâ-hô-hoa khí-chō, tùi Hap-lâm-gia̍p ê lâu, kàu kak-thâu ê mn̂g.

39量ê索koh牽出去，直到Ka-li̍p山；oa̍t-tńg到Ko-a。Niû ê soh koh khan chhut--khì, ti̍t-kàu Ka-li̍p soaⁿ; oa̍t-tńg kàu Ko-a.

40Hiat身屍kap piàⁿ火灰ka-nn̂g ê山谷，kap一切ê田園，直到Khip-lûn溪，koh直到東勢馬ê門ê角頭，lóng beh做聖，歸tī耶和華，無koh拔出，無koh chhia倒，直到永遠。Hiat sin-si kap piàⁿ hé-hu ka-nn̂g ê soaⁿ-kok, kap it-chhè ê chhân-hn̂g, ti̍t-kàu Khip-lûn khoe, koh ti̍t-kàu tang--sì Bé ê mn̂g ê kak-thâu, lóng beh chòe-sèng, kui tī Iâ-hô-hoa, bô koh pu̍ih-chhut, bô koh chhia-tó, ti̍t-kàu éng-oán.

1猶大王Se-tí-ka第十年，就是Nî-pò͘-kah-nî-sat十八年，有耶和華ê話臨到耶利米。Iû-tāi ông Se-tí-ka tē cha̍p--nî, chiū-sī Nî-pò͘-kah-nî-sat cha̍p-poeh nî, ū Iâ-hô-hoa ê ōe lîm-kàu Iâ-lī-bí.

2Hit時，巴比倫王ê軍隊圍困耶路撒冷，先知耶利米關tī拘留所ê院，tī猶大王ê厝。Hit-sî Pa-pí-lûn ông ê kun-tūi ûi-khùn Iâ-lō͘-sat-léng, sian-ti Iâ-lī-bí koaiⁿ tī khu-liû-só͘ ê īⁿ, tī Iû-tāi ông ê chhù.

3因為猶大王Se-tí-ka已經將伊關禁，講，你啥事讖語講，耶和華án-ni講，看ah，我beh將chit-ê城交tī巴比倫王ê手，伊beh取伊；In-ūi Iû-tāi ông Se-tí-ka í-keng chiong i koaiⁿ-kìm, kóng, Lí siáⁿ-sū chhàm-gú kóng, Iâ-hô-hoa án-ni kóng, Khòaⁿ ah, Góa beh chiong chit ê siâⁿ kau tī Pa-pí-lûn ông ê chhiú, i beh chhú--i;

4猶大王Se-tí-ka的確bōe脫離Ka-le̍k-tí人ê手，定tio̍h beh交tī巴比倫王ê手，亦beh kap伊講話，嘴對嘴，伊ê目睭亦beh看伊ê目睭，Iû-tāi ông Se-tí-ka tek-khak bōe thoat-lī Ka-le̍k-tí lâng ê chhiú, tiāⁿ-tio̍h beh kau tī Pa-pí-lûn ông ê chhiú, ia̍h beh kap i kóng ōe, chhùi tùi chhùi, i ê ba̍k-chiu ia̍h beh khòaⁿ i ê ba̍k-chiu,

5Se-tí-ka beh hō͘伊帶到巴比倫，tòa tī-hia，到我眷顧伊ê時；lín雖然kap Ka-le̍k-tí人交戰，亦無利益？這是耶和華講ê。Se-tí-ka beh hō͘ i tòa kàu Pa-pí-lûn, tòa tī-hia, kàu Góa koàn-kò͘ i ê sî; lín sui-jiân kap Ka-le̍k-tí lâng kau-chiàn, ia̍h bô lī-ek? che sī Iâ-hô-hoa kóng--ê.

6耶利米講，耶和華ê話臨到我講，Iâ-lī-bí kóng, Iâ-hô-hoa ê ōe lîm-kàu góa kóng,

7看ah，你ê叔Sa-liông ê kiáⁿ Hap-ná-bia̍t beh來見你，講，我tī A-ná-tu̍t hit坵田，請你買伊；因為贖回ê權在tī你，你thang買。Khòaⁿ ah, lí ê chek Sa-liông ê kiáⁿ Hap-ná-bia̍t beh lâi kìⁿ lí, kóng, Góa tī A-ná-tu̍t hit khu chhân, chhiáⁿ lí bóe--i; in-ūi sio̍k-hôe ê koân chāi-tī lí, lí thang bóe.

8我ê叔ê kiáⁿ Hap-ná-bia̍t果然照耶和華ê話來拘留所ê院chhē我，對我講，我tī便雅憫ê境內，A-ná-tu̍t hit坵田，請你買；因為承接kap贖回ê權在tī你，你tio̍h買做你ê；我就知這是耶和華ê話。Góa ê chek ê kiáⁿ Hap-ná-bia̍t kó-jiân chiàu Iâ-hô-hoa ê ōe lâi khu-liû-só͘ ê īⁿ chhē góa, tùi góa kóng, Góa tī Piān-ngá-bín ê kéng-lāi, A-ná-tu̍t hit khu chhân, chhiáⁿ lí bóe; in-ūi sêng-chiap kap sio̍k-hôe ê koân chāi-tī lí, lí tio̍h bóe chòe lí-ê; góa chiū chai che sī Iâ-hô-hoa ê ōe.

9我就tùi我ê叔ê kiáⁿ，Hap-ná-bia̍t，買A-ná-tu̍t hit坵田，秤(phêng)hit-ê價銀hō͘伊，共十七sià-khek-le̍k。Góa chiū tùi góa ê chek ê kiáⁿ, Hap-ná-bia̍t, bóe A-ná-tu̍t hit khu chhân, phêng hit ê kè-gûn hō͘ i, kiōng cha̍p-chhit sià-khek-le̍k.

10我tī契面簽名，將契封密；koh請人來做知見，亦用天秤秤銀hō͘伊。Góa tī khòe-bīn chhiam miâ, chiong khòe hong-ba̍t; koh chhiáⁿ lâng lâi chòe ti-kìⁿ, ia̍h ēng thian-phêng phêng gûn hō͘ i.

11我就the̍h照規例所立ê買契，就是封密ê hit張，kap無封ê hit張；Góa chiū the̍h chiàu kui-lē só͘ li̍p ê bóe-khòe, chiū-sī hong-ba̍t--ê hit-tiuⁿ, kap bô hong--ê hit-tiuⁿ;

12當我ê叔ê kiáⁿ Hap-ná-bia̍t，kap簽名tī契面chiah-ê知見，以及坐tī拘留所院內一切猶大人ê面前，將買賣ê契交hō͘ Má-se-ngá ê孫，Nî-lī-a ê kiáⁿ，Pa-lio̍k。tng góa ê chek ê kiáⁿ Hap-ná-bia̍t, kap chhiam-miâ tī khòe-bīn chiah ê ti-kìⁿ, í-ki̍p chē tī khu-liû-só͘ īⁿ-lāi it-chhè Iû-tāi lâng ê bīn-chêng, chiong bóe-bōe ê khòe kau hō͘ Má-se-ngá ê sun, Nî-lī-a ê kiáⁿ, Pa-lio̍k.

13當in面前，我吩咐Pa-lio̍k講，Tng in bīn-chêng, góa hoan-hù Pa-lio̍k kóng,

14萬軍ê耶和華，以色列ê上帝，án-ni講，Tio̍h將封密ê kap無封ê，chit兩張契，收tī磁器ê內面，thang留存chōe-chōe日。Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Tio̍h chiong hong-ba̍t--ê kap bô hong--ê, chí(**chit) nn̄g tiuⁿ khòe, siu tī hûi-khì ê lāi-bīn, thang liû-chûn chōe-chōe ji̍t.

15因為萬軍ê耶和華，以色列ê上帝，án-ni講，將來tī chit所在人beh koh買厝宅、田園，kap葡萄園。In-ūi bān-kun ê Iâ-hô-hoa, Í-sek-lia̍t ê Siōng-tè, án-ni kóng, Chiong-lâi tī chit só͘-chāi lâng beh koh bóe chhù-the̍h, chhân-hn̂g, kap phû-tô-hn̂g.

16我將買契交hō͘ Nî-lī-a ê kiáⁿ Pa-lio̍k以後，就祈禱耶和華講，Góa chiong bóe-khòe kau hō͘ Nî-lī-a ê kiáⁿ Pa-lio̍k í-āu, chiū kî-tó Iâ-hô-hoa kóng,

17主耶和華ah，你bat用大權能kap伸出ê手，創造天地；在tī你無一項oh成ê事；Chú Iâ-hô-hoa ah, Lí bat ēng tōa koân-lêng kap chhun-chhut ê chhiú, chhòng-chō thiⁿ tōe; chāi-tī Lí bô chi̍t-hāng oh-chiâⁿ ê sū;

18你施慈愛hō͘千萬人，koh將老父ê罪過報應tī伊後裔ê身上；至大全能ê上帝，萬軍ê耶和華，是祂ê名。Lí si chû-ài hō͘ chheng-bān lâng, koh chiong lāu-pē ê chōe-kòa pò-èng tī i hō͘-è ê sin-chiūⁿ; chì-tōa choân-lêng ê Siōng-tè, bān-kun ê Iâ-hô-hoa, sī I ê miâ.

19你ê計畫有大本事，行tāi-chì有大權能，注目看世間人一切ê行做，照ta̍k人ê所行，kap in ê所做ê效果，來報應伊。Lí ê kè-e̍k ū tōa pún-sū, kiâⁿ tāi-chì ū tōa koân-lêng, chù-ba̍k khòaⁿ sè-kan lâng it-chhè ê kiâⁿ-chòe, chiàu ta̍k-lâng ê só͘-kiâⁿ, kap in ê só͘-chòe ê hāu-kó, lâi pò-èng i.

20Tī埃及地顯出神跡奇事，直到今á日；tī以色列kap別人ê中間，亦是án-ni；hō͘你得tio̍h名聲，親像今á日一樣；Tī Ai-ki̍p tōe hián-chhut sîn-jiah kî-sū, ti̍t-kàu kin-á-ji̍t; tī Í-sek-lia̍t kap pa̍t-lâng ê tiong-kan, ia̍h sī án-ni; hō͘ Lí tit-tio̍h miâ-siaⁿ, chhin-chhiūⁿ kin-á-ji̍t chi̍t-iūⁿ;

21用神跡奇事，kap大權能ê手，kap伸出ê手骨，kap大thang驚ê事，chhōa你ê百姓以色列出埃及地；ēng sîn-jiah kî-sū, kap tōa koân-lêng ê chhiú, kap chhun-chhut ê chhiú-kut, kap tōa thang kiaⁿ ê sū, chhōa Lí ê peh-sìⁿ Í-sek-lia̍t chhut Ai-ki̍p tōe;

22將chit-ê流奶kap蜜ê地賞賜in，就是祢對in ê列祖chiù-chōa beh hō͘ in ê。chiong chit ê lâu ni kap bi̍t ê tōe siúⁿ-sù in, chiū-sī Lí tùi in ê lia̍t-chó͘ chiù-chōa beh hō͘ in ê.

23In入來得tio̍h伊做業；總是無thàn祢ê話，無行祢ê律法；祢一切命令in行ê，in無行一項；所以祢hō͘ lóng總ê災厄到tī in。In ji̍p--lâi tit-tio̍h i chòe-gia̍p; chóng-sī bô thàn Lí ê ōe, bô kiâⁿ Lí ê lu̍t-hoat; Lí it-chhè bēng-lēng in kiâⁿ--ê, in bô kiâⁿ chi̍t-hāng; só͘-í Lí hō͘ lóng-chóng ê chai-ē kàu tī in.

24看ah，有高ê土堆，in已經逼óa chit-ê城，beh取伊；城亦因為刀劍、飢荒、瘟疫，交hō͘攻擊伊ê Ka-le̍k-tí人ê手，祢所講ê已經成，祢亦親目看見。Khòaⁿ ah, ū koâiⁿ ê thô͘-tui, in í-keng pek-óa chit ê siâⁿ, beh chhú--i; siâⁿ ia̍h in-ūi to-kiàm, ki-hng, un-e̍k, kau hō͘ kong-kek i ê Ka-le̍k-tí lâng ê chhiú, Lí só͘ kóng--ê í-keng chiâⁿ, Lí ia̍h chhin-ba̍k khòaⁿ-kìⁿ.

25主耶和華ah，祢kā我講，tio̍h為家己用銀買田，koh請人做知見；taⁿ chit-ê城已經交tī Ka-le̍k-tí人ê手lah。Chú Iâ-hô-hoa ah, Lí kā góa kóng, tio̍h ūi ka-kī ēng gûn bóe chhân, koh chhiáⁿ lâng chòe ti-kìⁿ; taⁿ chit ê siâⁿ í-keng kau tī Ka-le̍k-tí lâng ê chhiú lah.

26耶和華ê話臨到耶利米講，Iâ-hô-hoa ê ōe lîm-kàu Iâ-lī-bí kóng,

27看ah，我是耶和華，是見有血氣ê ê上帝，在tī我kiám有一項oh成ê事？Khòaⁿ ah, Góa sī Iâ-hô-hoa, sī kìⁿ-ū hiat-khì--ê ê Siōng-tè, chāi-tī Góa kiám ū chi̍t-hāng oh-chiâⁿ ê sū?

28所以耶和華án-ni講，看ah，我beh將chit-ê城交hō͘ Ka-le̍k-tí人ê手，kap巴比倫王Nî-pò͘-kah-nî-sat ê手，伊beh取伊。Só͘-í Iâ-hô-hoa án-ni kóng, Khòaⁿ ah, Góa beh chiong chit ê siâⁿ kau hō͘ Ka-le̍k-tí lâng ê chhiú, kap Pa-pí-lûn ông Nî-pò͘-kah-nî-sat ê chhiú, i beh chhú--i.

29攻城ê Ka-le̍k-tí人beh來，放火燒chit-ê城，以及厝宅；tī chiah-ê厝頂，人bat ǹg Pa-le̍k燒香，ǹg別ê上帝灌奠，惹我ê受氣。Kong siâⁿ ê Ka-le̍k-tí lâng beh lâi, pàng hé sio chit ê siâⁿ, í-ki̍p chhù-the̍h; tī chiah ê chhù-téng, lâng bat ǹg Pa-le̍k sio-hiuⁿ, ǹg pa̍t ê siōng-tè koàn-tiān, jiá Góa ê siū-khì.

30以色列人kap猶大人，tùi少年以來，專專行我目睭中看做pháiⁿ ê事；以色列人一盡用手所做ê，惹我ê受氣；這是耶和華講ê。Í-sek-lia̍t lâng kap Iû-tāi lâng, tùi siàu-liân í-lâi, choan-choan kiâⁿ Góa ba̍k-chiu-tiong khòaⁿ-chòe pháiⁿ ê sū; Í-sek-lia̍t lâng it-chīn ēng chhiú só͘ chòe--ê, jiá Góa ê siū-khì; che sī Iâ-hô-hoa kóng--ê.

31Chit-ê城tùi起造ê日到今á日，常常惹我ê受氣，hō͘我懊惱；致到我kā伊除去離開我ê面前。Chit ê siâⁿ tùi khí-chō ê ji̍t kàu kin-á-ji̍t, siông-siông jiá Góa ê siū-khì, hō͘ góa àu-náu; tì-kàu Góa kā i tû--khì lī-khui Góa ê bīn-chêng.

32是因為以色列人kap猶大人一切ê邪惡；就是in kap in ê君王、貴族、祭司、先知，kap猶大ê眾人，以及耶路撒冷khiā起ê百姓，所行ê，惹我ê受氣。Sī in-ūi Í-sek-lia̍t lâng kap Iû-tāi lâng it-chhè ê siâ-ok; chiū-sī in kap in ê kun-ông, kùi-cho̍k, chè-si, sian-ti, kap Iû-tāi ê chèng-lâng, í-ki̍p Iâ-lō͘-sat-léng khiā-khí ê peh-sìⁿ, só͘ kiâⁿ--ê, jiá Góa ê siū-khì.

33In用ka-chiah ǹg我，無用面；我雖然教示in，是早早起來教示in；總是in無聽thàn，來受教示。In ēng ka-chiah ǹg Góa, bô ēng bīn; Góa sui-jiân kà-sī in, sī chá-chá khí-lâi kà-sī in; chóng-sī in bô thiaⁿ-thàn, lâi siū kà-sī.

34In竟然用in可惡ê物，hē tī用我ê名所稱ê厝，來phah lâ-sâm伊。In kéng-jiân ēng in khó-ò͘ⁿ ê mi̍h, hē tī ēng Góa ê miâ só͘ chheng ê chhù, lâi phah lâ-sâm--i.

35In tī Piān-him-lùn ê山谷起Pa-le̍k ê高台，beh hō͘ in ê kiáⁿ cha-bó͘-kiáⁿ經過火歸Mô͘-lo̍k；in行這可惡ê事，hō͘猶大陷落罪；這m̄是我所命令ê，亦m̄是我ê心所想ê。In tī Piān-him-lùn ê soaⁿ-kok khí Pa-le̍k ê koâiⁿ-tâi, beh hō͘ in ê kiáⁿ cha-bó͘-kiáⁿ keng-kè hé kui Mô͘-lo̍k; in kiâⁿ che khó-ò͘ⁿ ê sū, hō͘ Iû-tāi hām-lo̍h chōe; che m̄-sī Góa só͘ bēng-lēng--ê, ia̍h m̄-sī Góa ê sim só͘ siūⁿ--ê.

36Taⁿ論到chit-ê城，是lín所講已經因為刀劍、飢荒、瘟疫，交tī巴比倫王ê手ê；以色列ê上帝耶和華án-ni講：Taⁿ lūn-kàu chit ê siâⁿ, sī lín só͘ kóng í-keng in-ūi to-kiàm, ki-hng, un-e̍k, kau tī Pa-pí-lûn ông ê chhiú--ê; Í-sek-lia̍t ê Siōng-tè Iâ-hô-hoa án-ni kóng:

37看ah，我tī受氣、懊惱、大受氣ê中間，將in趕到ta̍k國，後來我beh tùi-hia招集in出來，chhōa in tò來chit所在，hō͘ in安然khiā起。Khòaⁿ ah, Góa tī siū-khì, àu-náu, tōa siū-khì ê tiong-kan, chiong in kóaⁿ kàu ta̍k-kok, āu-lâi Góa beh tùi-hia chio-chi̍p in chhut--lâi, chhōa in tò-lâi chit só͘-chāi, hō͘ in an-jiân khiā-khí.

38In beh做我ê百姓，我beh做in ê上帝。In beh chòe Góa ê peh-sìⁿ, Góa beh chòe in ê Siōng-tè.

39我beh hō͘ in一心一路，hō͘ in常常敬畏我，hō͘ in kap in ê kiáⁿ孫得tio̍h福氣。Góa beh hō͘ in it-sim it-lō͘, hō͘ in siông-siông kèng-ùi Góa, hō͘ in kap in ê kiáⁿ-sun tit-tio̍h hok-khì.

40我beh kap in立永遠ê約，就是無oa̍t-tńg離開in，是beh賜福hō͘ in；koh hō͘ in存心敬畏我，無oa̍t-tńg離開我。Góa beh kap in li̍p éng-oán ê iok, chiū-sī bô oa̍t-tńg lī-khui in, sī beh sù-hok hō͘ in; koh hō͘ in chûn-sim kèng-ùi Góa, bô oa̍t-tńg lī-khui Góa.

41我beh歡喜in，賜福hō͘ in，我實在beh盡心盡意，栽培in tī chit-ê所在。Góa beh hoaⁿ-hí in, sù-hok hō͘ in, Góa si̍t-chāi beh chīn-sim chīn-ì, chai-pôe in tī chit ê só͘-chāi.

42因為耶和華án-ni講，我怎樣hō͘ chit-ê一切大ê災厄臨到chit-ê百姓，我亦beh án-ni hō͘我所應允in一切ê福氣臨到in。In-ūi Iâ-hô-hoa án-ni kóng, Góa cháiⁿ-iūⁿ hō͘ chit-ê it-chhè tōa ê chai-ē lîm-kàu chit ê peh-sìⁿ, Góa ia̍h beh án-ni hō͘ Góa só͘ èng-ún in it-chhè ê hok-khì lîm-kàu in.

43Lín講，chit-ê所在是拋荒，無人，無cheng-siⁿ；是交hō͘ Ka-le̍k-tí人ê手ê；將來人beh koh tī chit所在買田園。Lín kóng, Chit ê só͘-chāi sī pha-hng, bô lâng, bô cheng-siⁿ; sī kau hō͘ Ka-le̍k-tí lâng ê chhiú--ê; chiong-lâi lâng beh koh tī chit só͘-chāi bóe chhân-hn̂g.

44Tī便雅憫地，tī耶路撒冷ê四圍，tī猶大chiah-ê城，tī山地chiah-ê城，tī平洋chiah-ê城，kap tī南方chiah-ê城，人beh用銀買田，tī 契面簽名，將契封密，請人做知見；因為我beh hō͘受掠ê人tò來；這是耶和華講ê。Tī Piān-ngá-bín tōe, tī Iâ-lō͘-sat-léng ê sì-ûi, tī Iû-tāi chiah ê siâⁿ, tī soaⁿ-tōe chiah ê siâⁿ, tī pîⁿ-iûⁿ chiah ê siâⁿ, kap tī lâm-hng chiah ê siâⁿ, lâng beh ēng gûn bóe-chhân, tī khòe-bīn chhiam-miâ, chiong khòe hong-ba̍t, chhiáⁿ lâng chòe ti-kìⁿ; in-ūi Góa beh hō͘ siū-lia̍h ê lâng tò--lâi; che sī Iâ-hô-hoa kóng--ê.

1耶利米iáu-kú關tī拘留所ê院內，耶和華ê話第二pái臨到伊講，Iâ-lī-bí iáu-kú koaiⁿ tī khu-liû-só͘ ê īⁿ-lāi, Iâ-hô-hoa ê ōe tē-jī-pái lîm-kàu i kóng,

2行伊ê ê耶和華，計畫來建立伊ê ê耶和華是祂ê名，祂án-ni講，Kiâⁿ i--ê ê Iâ-hô-hoa, kè-e̍k lâi kiàn-li̍p i--ê ê Iâ-hô-hoa sī I ê miâ, I án-ni kóng,

3你求我，我就應你，亦將你所m̄知，大koh oh得ê事，指示你。Lí kiû Góa, Góa chiū ìn lí, ia̍h chiong lí só͘ m̄-chai, tōa koh oh-tit ê sū, chí-sī lí.

4論到chit-ê城內ê厝，kap猶大王ê厝，就是拆毀來抵擋對敵ê土堆，kap抵擋刀劍ê；Lūn-kàu chit ê siâⁿ-lāi ê chhù, kap Iû-tāi ông ê chhù, chiū-sī thiah-húi lâi tí-tng tùi-te̍k ê thô͘-tui, kap tí-tng to-kiàm--ê;

5以色列ê上帝耶和華án-ni講，人beh來kap Ka-le̍k-tí人交戰，不過是hō͘身屍充滿chiah-ê厝，就是我tī受氣kap大受氣ê中間所thâi死ê人，因為in一切ê pháiⁿ，我就掩我ê面，m̄看chit-ê城。Í-sek-lia̍t ê Siōng-tè Iâ-hô-hoa án-ni kóng, Lâng beh lâi kap Ka-le̍k-tí lâng kau-chiàn, put-kò sī hō͘ sin-si chhiong-móa chiah ê chhù, chiū-sī Góa tī siū-khì kap tōa siū-khì ê tiong-kan só͘ thâi-sí ê lâng, in-ūi in it-chhè ê pháiⁿ, Góa chiū ng Góa ê bīn, m̄-khòaⁿ chit ê siâⁿ.

6看ah，我beh hō͘伊ê傷復原，koh用好藥醫好伊；koh將豐盛ê平安kap誠實顯明tī in。Khòaⁿ ah, Góa beh hō͘ i ê siong ho̍k-goân, koh ēng hó-io̍h i-hó--i; koh chiong hong-sēng ê pêng-an kap sêng-si̍t hián-bêng tī in.

7我亦beh hō͘猶大受掠ê，kap以色列受掠ê，倒tńg來；koh建立in親像起頭。Góa ia̍h beh hō͘ Iû-tāi siū-lia̍h--ê, kap Í-sek-lia̍t siū-lia̍h--ê, tò-tńg lâi; koh kiàn-li̍p in chhin-chhiūⁿ khí-thâu.

8我beh洗除in一切干犯我ê罪；我亦beh赦免in一切干犯我，背叛我chiah-ê罪。Góa beh sóe-tû in it-chhè kan-hoān Góa ê chōe; Góa ia̍h beh sià-bián in it-chhè kan-hoān Góa, pōe-poān Góa chiah ê chōe.

9Chit-ê城beh tī萬國kā我做歡喜ê名，做o-ló，做榮光；因為萬國聽見我所賞賜tī in一切ê福氣，也為tio̍h我所賞賜一切ê福氣kap平安，beh驚惶ngia̍uh-ngia̍uh-chhoah。Chit ê siâⁿ beh tī bān-kok kā Góa chòe hoaⁿ-hí ê miâ, chòe o-ló, chòe êng-kng; in-ūi bān-kok thiaⁿ-kìⁿ Góa só͘ siúⁿ-sù tī in it-chhè ê hok-khì, iā ūi-tio̍h Góa só͘ siúⁿ-sù it-chhè ê hok-khì kap pêng-an, beh kiaⁿ-hiâⁿ ngia̍uh-ngia̍uh-chhoah.

10耶和華án-ni講，Lín論到chit-ê地方有講，是拋荒，無人，無cheng-siⁿ ê地方；總是tī chit所在以及拋荒，無人，無人煙，無cheng-siⁿ ê猶大chiah-ê城，kap耶路撒冷ê街市，Iâ-hô-hoa án-ni kóng, Lín lūn-kàu chit ê tōe-hng ū kóng, Sī pha-hng, bô lâng, bô cheng-siⁿ ê tōe-hng; chóng-sī tī chit só͘-chāi í-ki̍p pha-hng, bô lâng, bô jîn-ian, bô cheng-siⁿ ê Iû-tāi chiah ê siâⁿ, kap Iâ-lō͘-sat-léng ê koe-chhī,

11beh koh聽見有歡喜ê聲，快樂ê聲，新kiáⁿ婿ê聲，新娘ê聲；亦有人ê聲，就是hiah-ê帶謝恩ê祭到耶和華ê厝ê，teh講，Tio̍h感謝萬軍ê耶和華，因為耶和華是好，伊ê慈愛永遠tī-teh；因為我beh hō͘ chit所在受掠ê人倒tńg來，親像起頭一樣；這是耶和華講ê。beh koh thiaⁿ-kìⁿ ū hoaⁿ-hí ê siaⁿ, khoài-lo̍k ê siaⁿ, sin-kiáⁿ-sài ê siaⁿ, sin-niû ê siaⁿ; ia̍h ū lâng ê siaⁿ, chiū-sī hiah ê tòa siā-un ê chè kàu Iâ-hô-hoa ê chhù--ê, teh kóng, Tio̍h kám-siā bān-kun ê Iâ-hô-hoa, in-ūi Iâ-hô-hoa sī hó, I ê chû-ài éng-oán tī-teh; in-ūi Góa beh hō͘ chit só͘-chāi siū-lia̍h ê lâng tò-tńg--lâi, chhin-chhiūⁿ khí-thâu chi̍t-iūⁿ; che sī Iâ-hô-hoa kóng--ê.

12萬軍ê耶和華án-ni講，Tī chit-ê拋荒，無人，無cheng-siⁿ ê地方，kap其中所有ê城，beh koh有牧者khiā起，hō͘ in ê羊群倒tī-hia。Bān-kun ê Iâ-hô-hoa án-ni kóng, Tī chit ê pha-hng, bô lâng, bô cheng-siⁿ ê tōe-hng, kap kî-tiong só͘ ū ê siâⁿ, beh koh ū bo̍k-chiá khiā-khí, hō͘ in ê iûⁿ-kûn tó tī-hia.

13Tī山地chiah-ê城，平洋chiah-ê城，南方chiah-ê城，便雅憫、耶路撒冷ê周圍，kap猶大chiah-ê城，beh koh有羊群經過算ê人ê手；這是耶和華講ê。Tī soaⁿ-tōe chiah ê siâⁿ, pîⁿ-iûⁿ chiah ê siâⁿ, lâm-hng chiah ê siâⁿ, Piān-ngá-bín, Iâ-lō͘-sat-léng ê chiu-ûi, kap Iû-tāi chiah ê siâⁿ, beh koh ū iûⁿ-kûn keng-kè sǹg ê lâng ê chhiú; che sī Iâ-hô-hoa kóng--ê.

14耶和華講，看ah，日子beh到，我應允以色列家kap猶大家ê好話，我beh hō͘伊成。Iâ-hô-hoa kóng, Khòaⁿ ah, ji̍t-chí beh kàu, Góa èng-ún Í-sek-lia̍t-ke kap Iû-tāi-ke ê hó-ōe, Góa beh hō͘ i chiâⁿ.

15當hit日hit時，我beh kā大衛發生義ê枝，伊beh tī地上行公平kap公義。Tng hit-ji̍t hit-sî Góa beh kā Tāi-pi̍t hoat-siⁿ gī ê Ki, I beh tī tōe-chiūⁿ kiâⁿ kong-pêng kap kong-gī.

16Tī hit日猶大beh得tio̍h救，耶路撒冷beh安然khiā起；伊ê名beh稱做，耶和華咱ê義。Tī hit-ji̍t Iû-tāi beh tit-tio̍h kiù, Iâ-lō͘-sat-léng beh an-jiân khiā-khí; i ê miâ beh chheng-chòe, Iâ-hô-hoa lán ê gī.

17因為耶和華án-ni講，大衛beh永遠有人坐以色列ê寶座。In-ūi Iâ-hô-hoa án-ni kóng, Tāi-pi̍t beh éng-oán ū lâng chē Í-sek-lia̍t ê pó-chō.

18祭司，利未人，亦永遠有人獻燒祭禮物；常常辦理獻祭ê事tī我ê面前。Chè-si, Lī-bī lâng, ia̍h éng-oán ū lâng hiàn sio-chè lé-mi̍h; siông-siông pān-lí hiàn-chè ê sū tī Góa ê bīn-chêng.

19耶和華ê話臨到耶利米講，Iâ-hô-hoa ê ōe lîm-kàu Iâ-lī-bí kóng,

20耶和華án-ni講，Lín若會廢無我所立日時ê約，暝時ê約，hō͘日暝無照in ê時；Iâ-hô-hoa án-ni kóng, Lín nā ōe hòe-bô Góa só͘ li̍p ji̍t--sî ê iok, mî--sî ê iok, hō͘ ji̍t-mî bô chiàu in ê sî;

21就會廢無我kap我ê奴僕大衛所立ê約，hō͘伊無有kiáⁿ tī伊ê寶座做王；亦會廢無我kap服事我ê祭司利未人所立ê約。chiū ōe hòe-bô Góa kap Góa ê lô͘-po̍k Tāi-pi̍t só͘ li̍p ê iok, hō͘ i bô ū kiáⁿ tī i ê pó-chō chòe ông; ia̍h ōe hòe-bô Góa kap ho̍k-sāi Góa ê chè-si Lī-bī lâng só͘ li̍p ê iok.

22天ê象bōe算得，海ê沙bōe量得，我beh照án-ni hō͘我ê奴僕大衛ê後裔，kap服事我ê利未人，加添chōe-chōe。Thiⁿ ê siōng bōe sǹg--tit, hái ê soa bōe niû--tit, Góa beh chiàu án-ni hō͘ Góa ê lô͘-po̍k Tāi-pi̍t ê hō͘-è, kap ho̍k-sāi Góa ê Lī-bī lâng, ke-thiⁿ chōe-chōe.

23耶和華ê話koh臨到耶利米講，Iâ-hô-hoa ê ōe koh lîm-kàu Iâ-lī-bí kóng,

24Chiah-ê百姓所講ê話，你無聽見mah？in講，耶和華所揀ê兩族，祂已經棄絕伊，in án-ni看輕我ê百姓，掠做bōe koh成國 tī in ê面前。Chiah ê peh-sìⁿ só͘ kóng ê ōe, lí bô thiaⁿ-kìⁿ mah? in kóng, Iâ-hô-hoa só͘ kéng ê nn̄g-cho̍k, I í-keng khì-choa̍t--i, in án-ni khòaⁿ-khin Góa ê peh-sìⁿ, lia̍h-chòe bōe koh chiâⁿ kok tī in ê bīn-chêng.

25耶和華án-ni講，我所立日時暝時ê約若會無去，我若無設天地ê定例；Iâ-hô-hoa án-ni kóng, Góa só͘ li̍p ji̍t--sî mî--sî ê iok nā ōe bô--khì, Góa nā bô siat thiⁿ-tōe ê tēng-lē;

26我就會棄sak雅各kap我ê奴僕大衛ê後裔致到無對伊ê後裔取人治理亞伯拉罕，以撒，雅各ê後裔。因為我beh hō͘ in受掠ê人tò來，亦beh憐憫in。Góa chiū ōe khì-sak Ngá-kok kap Góa ê lô͘-po̍k Tāi-pi̍t ê hō͘-è tì-kàu bô tùi i ê hō͘-è chhú lâng tī-lí A-pek-la̍h-hán, Í-sat, Ngá-kok ê hō͘-è. In-ūi Góa beh hō͘ in siū-lia̍h ê lâng tò-lâi, ia̍h beh lîn-bín in.