1猶大王約西亞ê kiáⁿ Iok-ngá-kèng第四年，有話tùi耶和華臨到耶利米講，Iû-tāi ông Iok-se-a ê kiáⁿ Iok-ngá-kèng tē sì--nî, ū ōe tùi Iâ-hô-hoa lîm-kàu Iâ-lī-bí kóng,

2你tio̍h the̍h一本冊，將我所對你講beh攻擊以色列kap猶大，kap ta̍k國，一切ê話；tùi我kā你講話ê hit日，就是tùi約西亞hiah-ê日起，到tī今á日；lóng寫tī hit內面。Lí tio̍h the̍h chi̍t pún chheh, chiong Góa só͘ tùi lí kóng beh kong-kek Í-sek-lia̍t kap Iû-tāi, kap ta̍k-kok, it-chhè ê ōe; tùi Góa kā lí kóng-ōe ê hit-ji̍t, chiū-sī tùi Iok-se-a hiah ê ji̍t khí, kàu tī kin-á-ji̍t; lóng siá tī hí(**hit) lāi-bīn.

3Kiám-chhái猶大家beh聽我所按算beh降hō͘ in一切ê災厄；致到in beh oa̍t頭，ta̍k人離開伊ê pháiⁿ路；我就thang赦免in ê罪過kap罪惡。Kiám-chhái Iû-tāi ke beh thiaⁿ Góa só͘ àn-sǹg beh kàng hō͘ in it-chhè ê chai-ē; tì-kàu in beh oa̍t-thâu, ta̍k-lâng lī-khui i ê pháiⁿ-lō͘; Góa chiū thang sià-bián in ê chōe-kòa kap chōe-ok.

4耶利米就叫Nî-lī-a ê kiáⁿ Pa-lio̍k來；Pa-lio̍k就將耶利米所傳耶和華對伊講一切ê話，lóng記tī冊。Iâ-lī-bí chiū kiò Nî-lī-a ê kiáⁿ Pa-lio̍k lâi; Pa-lio̍k chiū chiong Iâ-lī-bí só͘ thoân Iâ-hô-hoa tùi i kóng it-chhè ê ōe, lóng kì tī chheh.

5耶利米吩咐Pa-lio̍k講，我受阻礙，bōe能入耶和華ê厝。Iâ-lī-bí hoan-hù Pa-lio̍k kóng, Góa siū chó͘-gāi, bōe-ōe ji̍p Iâ-hô-hoa ê chhù.

6你tio̍h去，將我所傳，你所寫tī冊裡耶和華ê話，tī耶和華ê厝，tī禁食ê日讀hō͘百姓聽；亦讀hō͘ tùi chiah-ê城來ê猶大人聽。Lí tio̍h khì, chiong góa só͘ thoân, lí só͘ siá tī chheh--nih Iâ-hô-hoa ê ōe, tī Iâ-hô-hoa ê chhù, tī kìm-chia̍h ê ji̍t tha̍k hō͘ peh-sìⁿ thiaⁿ; ia̍h tha̍k hō͘ tùi chiah ê siâⁿ lâi ê Iû-tāi lâng thiaⁿ.

7Kiám-chhái in beh tī耶和華ê面前謙卑祈禱；in beh回頭，ta̍k人離開伊ê pháiⁿ路；因為耶和華對chit-ê百姓所講beh發出ê受氣，hit ê受氣真大。Kiám-chhái in beh tī Iâ-hô-hoa ê bīn-chêng khiam-pi kî-tó; in beh hôe-thâu, ta̍k-lâng lī-khui i ê pháiⁿ-lō͘; in-ūi Iâ-hô-hoa tùi chit ê peh-sìⁿ só͘ kóng beh hoat-chhut ê siū-khì, hit ê siū-khì chin tōa.

8Nî-lī-a ê kiáⁿ Pa-lio̍k就照先知耶利米一切所吩咐ê去行；tī耶和華ê厝，讀冊內所記耶和華ê話。Nî-lī-a ê kiáⁿ Pa-lio̍k chiū chiàu sian-ti Iâ-lī-bí it-chhè só͘ hoan-hù--ê khì kiâⁿ; tī Iâ-hô-hoa ê chhù, tha̍k chheh-lāi só͘ kì Iâ-hô-hoa ê ōe.

9猶大王約西亞ê kiáⁿ Iok-ngá-kèng五年，九月，耶路撒冷ê眾百姓，kap hiah-ê tùi猶大城來到耶路撒冷ê眾百姓；宣佈禁食tī耶和華ê面前。Iû-tāi ông Iok-se-a ê kiáⁿ Iok-ngá-kèng gō͘--nî, káu ge̍h, Iâ-lō͘-sat-léng ê chèng peh-sìⁿ, kap hiah-ê tùi Iû-tāi siâⁿ lâi kàu Iâ-lō͘-sat-léng ê chèng peh-sìⁿ; soan-pò͘ kìm-chia̍h tī Iâ-hô-hoa ê bīn-chêng.

10Hit時tī耶和華ê厝，書記Sa-hoan ê kiáⁿ Ki-má-lī-ngá ê房，tī頂院，近耶和華ê厝，新門ê門口，Pa-lio̍k tùi hit本冊讀耶利米ê話，hō͘眾百姓親耳聽。Hit-sî tī Iâ-hô-hoa ê chhù, su-kì Sa-hoan ê kiáⁿ Ki-má-lī-ngá ê pâng, tī téng-īⁿ, kūn Iâ-hô-hoa ê chhù, sin-mn̂g ê mn̂g-kháu, Pa-lio̍k tùi hit pún chheh tha̍k Iâ-lī-bí ê ōe, hō͘ chèng peh-sìⁿ chhin-hī thiaⁿ.

11Sa-hoan ê孫，Ki-má-lī-ngá ê kiáⁿ，Bí-kai-a聽見冊內耶和華一切ê話，Sa-hoan ê sun, Ki-má-lī-ngá ê kiáⁿ, Bí-kai-a thiaⁿ-kìⁿ chheh-lāi Iâ-hô-hoa it-chhè ê ōe,

12伊就落去王宮，入書記ê房；看ah，眾貴族lóng坐tī-hia，就是書記Í-lī-sa-má，Sī-má-ngá ê kiáⁿ Tē-lâi-ngá，A-kek-pho ê kiáⁿ Í-lī-ná-tan，Sa-hoan ê kiáⁿ Ki-má-lī-ngá，Hap-ná-nî-ngá ê kiáⁿ Se-tí-ka，kap lóng總ê貴族。i chiū lo̍h-khì ông-kiong, ji̍p su-kì ê pâng; khòaⁿ ah, chèng kùi-cho̍k lóng chē tī-hia, chiū-sī su-kì Í-lī-sa-má, Sī-má-ngá ê kiáⁿ Tē-lâi-ngá, A-kek-pho ê kiáⁿ Í-lī-ná-tan, Sa-hoan ê kiáⁿ Ki-má-lī-ngá, Hap-ná-nî-ngá ê kiáⁿ Se-tí-ka, kap lóng-chóng ê kùi-cho̍k.

13Tùi án-ni，Bí-kai-a對in講起伊所聽見一切ê話，就是Pa-lio̍k tùi百姓讀hit本冊ê時伊所聽見ê。Tùi án-ni Bí-kai-a tùi in kóng-khí i só͘ thiaⁿ-kìⁿ it-chhè ê ōe, chiū-sī Pa-lio̍k tùi peh-sìⁿ tha̍k hit pún chheh ê sî i só͘ thiaⁿ-kìⁿ ê.

14因為án-ni chiah-ê貴族就差Kó͘-sī ê曾孫，Sī-lī-bí-ngá ê孫，Nî-thàm-ngá ê kiáⁿ Iû-tí到Pa-lio̍k hia，對伊講，你將所讀hō͘百姓聽ê冊親手the̍h來。Nî-lī-a ê kiáⁿ Pa-lio̍k就親手the̍h hit本冊來in hia。In-ūi án-ni chiah ê kùi-cho̍k chiū chhe Kó͘-sī ê cheng-sun, Sī-lī-bí-ngá ê sun, Nî-thàm-ngá ê kiáⁿ Iû-tí kàu Pa-lio̍k hia, tùi i kóng, Lí chiong só͘ tha̍k hō͘ peh-sìⁿ thiaⁿ ê chheh chhin-chhiú the̍h--lâi. Nî-lī-a ê kiáⁿ Pa-lio̍k chiū chhin-chhiú the̍h hit pún chheh lâi in hia.

15In對伊講，請坐，讀hō͘阮聽；Pa-lio̍k就讀hō͘ in聽。In tùi i kóng, Chhiáⁿ chē, tha̍k hō͘ goán thiaⁿ; Pa-lio̍k chiū tha̍k hō͘ in thiaⁿ.

16In聽這一切ê話，就大家驚惶相看；kā Pa-lio̍k講，阮決斷beh將chiah-ê話lóng kā王講。In thiaⁿ che it-chhè ê ōe, chiū tāi-ke kiaⁿ-hiâⁿ saⁿ-khòaⁿ; kā Pa-lio̍k kóng, Goán koat-toàn beh chiong chiah ê ōe lóng kā ông kóng.

17In koh問Pa-lio̍k講，請你kā阮講，你用啥款來寫伊所傳一切ê話？In koh mn̄g Pa-lio̍k kóng, Chhiáⁿ lí kā goán kóng, lí ēng siáⁿ khoán lâi siá i só͘ thoân it-chhè ê ōe?

18Pa-lio̍k應講，伊親嘴對我講chiah-ê話，我就用pit-ba̍k寫tī冊裡。Pa-lio̍k ìn kóng, I chhin-chhùi tùi góa kóng chiah ê ōe, góa chiū ēng pit-ba̍k siá tī chheh--nih.

19Hiah-ê貴族tùi Pa-lio̍k講，你kap耶利米tio̍h去bih-teh，m̄-thang hō͘人知lín tī toh-lo̍h。Hiah ê kùi-cho̍k tùi Pa-lio̍k kóng, Lí kap Iâ-lī-bí tio̍h khì bih--teh, m̄-thang hō͘ lâng chai lín tī toh-lo̍h.

20Hiah-ê貴族將hit本hē tī書記Í-lī-sa-má ê房，chiah入院見王，將chiah-ê話lóng講起hō͘王聽。Hiah ê kùi-cho̍k chiong hit pún hē tī su-kì Í-lī-sa-má ê pâng, chiah ji̍p īⁿ kìⁿ ông, chiong chiah ê ōe lóng kóng-khí hō͘ ông thiaⁿ.

21王差Iû-tí去the̍h hit本來，伊就tùi書記Í-lī-sa-má ê房the̍h來。Iû-tí讀hō͘王聽，亦hō͘ khiā tī王左右chiah-ê貴族聽。Ông chhe Iû-tí khì the̍h hit-pún lâi, i chiū tùi su-kì Í-lī-sa-má ê pâng the̍h--lâi. Iû-tí tha̍k hō͘ ông thiaⁿ, ia̍h hō͘ khiā tī ông chó-iū chiah ê kùi-cho̍k thiaⁿ.

22Hit時是九月，王坐tī過冬天ê厝，面頭前有火爐teh to̍h。Hit-sî sī káu--ge̍h, ông chē tī kè tang-thiⁿ ê chhù, bīn-thâu-chêng ū hé-lô͘ teh to̍h.

23Iû-tí 見讀三篇á四篇，王就用書記ê刀kā伊割起來，hiat tī火爐，到全本lóng燒tī爐中ê火。Iû-tí kiàn tha̍k saⁿ-phiⁿ á sì-phiⁿ, ông chiū ēng su-kì ê to kā i koah-khí--lâi, hiat tī hé-lô͘, kàu choân-pún lóng sio tī lô͘-tiong ê hé.

24王kap聽見chiah-ê話ê人臣，in lóng無驚亦無拆裂in ê衫。Ông kap thiaⁿ-kìⁿ chiah ê ōe ê jîn-sîn, in lóng bô kiaⁿ ia̍h bô thiah-li̍h in ê saⁿ.

25Í-lī-ná-tan kap Tē-lâi-ngá，Ki-má-lī-ngá，求王莫得燒hit本；總是伊m̄聽。Í-lī-ná-tan kap Tē-lâi-ngá, Ki-má-lī-ngá, kiû ông bo̍h-tit sio hit-pún; chóng-sī i m̄ thiaⁿ.

26王就命令Hap-bí-le̍k ê kiáⁿ Iâ-la̍h-bia̍t，kap A-su-lia̍t ê kiáⁿ Se-lâi-ngá，kap A-pek-tia̍p ê kiáⁿ Sī-lī-bí-ngá；去掠書記Pa-lio̍k kap先知耶利米；總是耶和華kā in khǹg密。Ông chiū bēng-lēng Hap-bí-le̍k ê kiáⁿ Iâ-la̍h-bia̍t, kap A-su-lia̍t ê kiáⁿ Se-lâi-ngá, kap A-pek-tia̍p ê kiáⁿ Sī-lī-bí-ngá; khì lia̍h su-kì Pa-lio̍k kap sian-ti Iâ-lī-bí; chóng-sī Iâ-hô-hoa kā in khǹg-ba̍t.

27王將hit本，就是Pa-lio̍k所寫耶利米所傳ê話，燒去了後，耶和華ê話臨到耶利米講，Ông chiong hit-pún, chiū-sī Pa-lio̍k só͘ siá Iâ-lī-bí só͘ thoân ê ōe, sio--khì liáu-āu, Iâ-hô-hoa ê ōe lîm-kàu Iâ-lī-bí kóng,

28你koh the̍h一本，將猶大王Iok-ngá-kèng所燒從前hit本hiah-ê話lóng寫tī hit內面。Lí koh the̍h chi̍t-pún, chiong Iû-tāi ông Iok-ngá-kèng só͘ sio chiông-chêng hit-pún hiah ê ōe lóng siá tī hit lāi-bīn.

29論到猶大王Iok-ngá-kèng，你tio̍h講，耶和華án-ni講，你燒hit本，講，你啥事tī hit內面寫講，巴比倫王決斷beh來毀滅chit-ê土地，hō͘ chit所在ê人kap cheng-siⁿ lóng無去ah？Lūn-kàu Iû-tāi ông Iok-ngá-kèng, lí tio̍h kóng, Iâ-hô-hoa án-ni kóng, Lí sio hit pún, kóng, Lí siáⁿ-sū tī hit lāi-bīn siá kóng, Pa-pí-lûn ông koat-toàn beh lâi húi-bia̍t chit ê thó͘-tōe, hō͘ chit só͘-chāi ê lâng kap cheng-siⁿ lóng bô--khì ah?

30所以耶和華論猶大王Iok-ngá-kèng講，伊beh無人thang坐大衛ê寶座，伊ê身屍beh hiat-ka̍k tī外面，日時hō͘日曝，暝時hō͘霜凍。Só͘-í Iâ-hô-hoa lūn Iû-tāi ông Iok-ngá-kèng kóng, I beh bô lâng thang chē Tāi-pi̍t ê pó-chō, i ê sin-si beh hiat-ka̍k tī gōa-bīn, ji̍t--sî hō͘ ji̍t pha̍k, mî--sî hō͘ sng tàng.

31我beh因為伊kap伊ê後裔，kap伊ê人臣ê罪過，刑罰in；我bēh hō͘我所講一切ê災厄臨到in，以及耶路撒冷ê百姓，kap猶大人；總是in m̄聽。Góa beh in-ūi i kap i ê hō͘-è, kap i ê jîn-sîn ê chē-kòa, hêng-hoa̍t in; Góa bēh hō͘ Góa só͘ kóng it-chhè ê chai-ē lîm-kàu in, í-ki̍p Iâ-lō͘-sat-léng ê peh-sìⁿ, kap Iû-tāi lâng; chóng-sī in m̄ thiaⁿ.

32Tùi án-ni，耶利米koh the̍h一本，交hō͘ Nî-lī-a ê kiáⁿ書記Pa-lio̍k；伊就將耶利米所傳ê話寫tī hit內面；就是猶大王Iok-ngá-kèng所燒氣hit本一切ê話；另外koh天chōe-chōe相親像ê話。Tùi án-ni Iâ-lī-bí koh the̍h chi̍t-pún, kau hō͘ Nî-lī-a ê kiáⁿ su-kì Pa-lio̍k; i chiū chiong Iâ-lī-bí só͘ thoân ê ōe siá tī hit lāi-bīn; chiū-sī Iû-tāi ông Iok-ngá-kèng só͘ sio--khì hit-pún it-chhè ê ōe; lēng-gōa koh thiⁿ chōe-chōe saⁿ-chhin-chhiūⁿ ê ōe.

1約西亞ê kiáⁿ Se-tí-ka王替Iok-ngá-kèng ê kiáⁿ Ko-nî-ngá做王；巴比倫王Nî-pò͘-kah-nî-sat bat設立伊做王tī猶大地。Iok-se-a ê kiáⁿ Se-tí-ka ông thòe Iok-ngá-kèng ê kiáⁿ Ko-nî-ngá chòe ông; Pa-pí-lûn ông Nî-pò͘-kah-nî-sat bat siat-li̍p i chòe ông tī Iû-tāi tōe.

2總是伊kap伊ê人臣，kap國內ê百姓，lóng m̄聽耶和華ê話，就是伊託先知耶利米所講ê。Chóng-sī i kap i ê jîn-sîn, kap kok-lāi ê peh-sìⁿ, lóng m̄-thiaⁿ Iâ-hô-hoa ê ōe, chiū-sī i thok sian-ti Iâ-lī-bí só͘ kóng--ê.

3Se-tí-ka王差Sī-lī-bí-ngá ê kiáⁿ Iû-kah，kap祭司Má-se-ngá ê kiáⁿ Se-hoan-ngá，去見先知耶利米；講，求你替阮祈禱耶和華咱ê上帝。Se-tí-ka ông chhe Sī-lī-bí-ngá ê kiáⁿ Iû-kah, kap chè-si Má-se-ngá ê kiáⁿ Se-hoan-ngá, khì kìⁿ sian-ti Iâ-lī-bí; kóng, Kiû lí thòe goán kî-tó Iâ-hô-hoa lán ê Siōng-tè.

4Hit時耶利米出入tī百姓ê中間；因為in iáu未kā伊關落監。Hit-sî Iâ-lī-bí chhut-ji̍p tī peh-sìⁿ ê tiong-kan; in-ūi in iáu-bē kā i koaiⁿ-lo̍h kaⁿ.

5法老ê軍兵已經tùi埃及出來，hiah-ê圍困耶路撒冷ê Ka-le̍k-tí人聽見in ê風聲，就撤營離開耶路撒冷。Hoat-ló ê kun-peng í-keng tùi Ai-ki̍p chhut-lâi, hiah-ê ûi-khùn Iâ-lō͘-sat-léng ê Ka-le̍k-tí lâng thiaⁿ-kìⁿ in ê hong-siaⁿ, chiū thiat-iâⁿ lī-khui Iâ-lō͘-sat-léng.

6耶和華ê話臨到先知耶利米講：Iâ-hô-hoa ê ōe lîm-kàu sian-ti Iâ-lī-bí kóng:

7耶和華以色列ê上帝án-ni講，猶大王差lín來我chia問我，lín tio̍h án-ni kā伊講，看ah，法老ê軍兵hiah-ê出來beh幫贊lín-ê，beh tò去埃及本國。Iâ-hô-hoa Í-sek-lia̍t ê Siōng-tè án-ni kóng, Iû-tāi ông chhe lín lâi góa chia mn̄g góa, lín tio̍h án-ni kā i kóng, Khòaⁿ ah, Hoat-ló ê kun-peng hiah ê chhut-lâi beh pang-chān lín--ê, beh tò--khì Ai-ki̍p pún-kok.

8Ka-le̍k-tí人beh koh來，攻擊chit-ê城，beh取伊，亦beh用火燒伊。Ka-le̍k-tí lâng beh koh lâi, kong-kek chit ê siâⁿ, beh chhú--i, ia̍h beh ēng hé sio--i.

9耶和華án-ni講，Lín m̄-thang家己騙，講，Ka-le̍k-tí人的確beh離開阮，因為in無beh離開。Iâ-hô-hoa án-ni kóng, Lín m̄-thang ka-kī phiàn, kóng, Ka-le̍k-tí lâng tek-khak beh lī-khui goán, in-ūi in bô beh lī-khui.

10Lín就若phah敗攻擊lín ê Ka-le̍k-tí ê全軍，in中間只chhun受傷ê人，in ta̍k人亦beh對伊ê布棚內起來，用火燒chit-ê城。Lín chiū nā phah-pāi kong-kek lín ê Ka-le̍k-tí ê choân-kun, in tiong-kan chí chhun siū-siong ê lâng, in ta̍k-lâng ia̍h beh tùi i ê pò͘-pîⁿ-lāi khí-lâi, ēng hé sio chit ê siâⁿ.

11Ka-le̍k-tí ê軍兵，因為驚法老ê軍兵，就撤營離開耶路撒冷；Ka-le̍k-tí ê kun-peng, in-ūi kiaⁿ Hoat-ló ê kun-peng, chiū thiat-iâⁿ lī-khui Iâ-lō͘-sat-léng;

12Hit時耶利米出耶路撒冷，beh去便雅憫ê地；ài得tio̍h伊ê份額tī百姓ê中間。hit-sî Iâ-lī-bí chhut Iâ-lō͘-sat-léng, beh khì Piān-ngá-bín ê tōe; ài tit-tio̍h i ê hūn-gia̍h tī peh-sìⁿ ê tiong-kan.

13伊到便雅憫門hia，有顧門ê官，名叫I-lī-ngá，是Hap-ná-nî-a ê孫，Sī-lī-bí-ngá ê kiáⁿ；伊就掠先知耶利米，講，你是teh投降Ka-le̍k-tí人o͘h。I kàu Piān-ngá-bín mn̂g hia, ū kò͘-mn̂g ê koaⁿ, miâ kiò I-lī-ngá, sī Hap-ná-nî-a ê sun, Sī-lī-bí-ngá ê kiáⁿ; i chiū lia̍h sian-ti Iâ-lī-bí, kóng, Lí sī teh tâu-hâng Ka-le̍k-tí lâng o͘h.

14耶利米講，無影，我m̄是投降Ka-le̍k-tí人；I-lī-ngá m̄聽伊，就掠耶利米，送伊到貴族hia。Iâ-lī-bí kóng, Bô-iáⁿ, góa m̄-sī tâu-hâng Ka-le̍k-tí lâng; I-lī-ngá m̄-thiaⁿ i, chiū lia̍h Iâ-lī-bí, sàng i kàu kùi-cho̍k hia.

15Chiah-ê貴族受氣耶利米，就phah伊，關伊tī監裡，tī書記約拿單ê厝，因為in用hit間做監牢。Chiah ê kùi-cho̍k siū-khì Iâ-lī-bí, chiū phah i, koaiⁿ i tī kaⁿ--nih, tī su-kì Iok-ná-tan ê chhù, in-ūi in ēng hit-keng chòe kaⁿ-lô.

16耶利米已經到地陷ê穴內，耶利米tòa hia chōe-chōe日。Iâ-lī-bí í-keng kàu tōe-hām ê hia̍t-lāi, Iâ-lī-bí tòa hia chōe-chōe ji̍t.

17Se-tí-ka王差人帶伊來，王tī伊ê宮內暗靜問伊講，有甚麼話tùi耶和華來無？耶利米講，有；koh講，你beh交tī巴比倫王ê手。Se-tí-ka ông chhe lâng tòa i lâi, ông tī i ê kiong-lāi àm-chīⁿ mn̄g i kóng, Ū sím-mi̍h ōe tùi Iâ-hô-hoa lâi bô? Iâ-lī-bí kóng, Ū; koh kóng, Lí beh kau tī Pa-pí-lûn ông ê chhiú.

18耶利米koh對Se-tí-ka王講，我有甚麼得罪你，á是得罪你ê人臣kap chit-ê百姓，chiah hō͘你kā我關監？Iâ-lī-bí koh tùi Se-tí-ka ông kóng, Góa ū sím-mi̍h tek-chōe lí, á-sī tek-chōe lí ê jîn-sîn kap chit ê peh-sìⁿ, chiah hō͘ lí kā góa koaiⁿ-kaⁿ?

19你chiah-ê先知對lín讖語，講，巴比倫王的確無來攻擊lín kap chit-ê所在；taⁿ in tī toh-lo̍h？Lí chiah ê sian-ti tùi lín chhàm-gú, kóng, Pa-pí-lûn ông tek-khak bô lâi kong-kek lín kap chit ê só͘-chāi; taⁿ in tī toh-lo̍h?

20Taⁿ我ê主我ê王ah，請你聽我，准我所求，m̄-thang hō͘我倒tńg去書記約拿單ê厝，免得我死tī-hia。Taⁿ góa ê chú góa ê ông ah, chhiáⁿ lí thiaⁿ góa, chún góa só͘ kiû, m̄-thang hō͘ góa tò-tńg--khì su-kì Iok-ná-tan ê chhù, bián-tit góa sí tī-hia.

21Se-tí-ka王就命令關耶利米tī拘留所ê院；ta̍k日tùi做餅ê街the̍h一粒麵包hō͘伊；直到城內無麵包chiah soah；án-ni耶利米猶原tòa tī拘留所ê院內。Se-tí-ka ông chiū bēng-lēng koaiⁿ Iâ-lī-bí tī khu-liû-só͘ ê īⁿ; ta̍k-ji̍t tùi chòe-piáⁿ ê koe the̍h chi̍t-lia̍p mī-pau hō͘ i; ti̍t-kàu siâⁿ-lāi bô mī-pau chiah soah; án-ni Iâ-lī-bí iû-goân tòa tī khu-liû-só͘ ê īⁿ-lāi.

1Má-thán ê kiáⁿ Sī-hoat-thê-ngá，Pa-si-hō͘-jíⁿ ê kiáⁿ Ki-tāi-lī，Sī-lī-bí-ngá ê kiáⁿ Iû-kah，Má-ki-ngá ê kiáⁿ Pa-si-hō͘-jíⁿ，聽見耶利米對眾人所講ê話，講，Má-thán ê kiáⁿ Sī-hoat-thê-ngá, Pa-si-hō͘-jíⁿ ê kiáⁿ Ki-tāi-lī, Sī-lī-bí-ngá ê kiáⁿ Iû-kah, Má-ki-ngá ê kiáⁿ Pa-si-hō͘-jíⁿ, thiaⁿ-kìⁿ Iâ-lī-bí tùi chèng-lâng só͘ kóng ê ōe, kóng,

2耶和華án-ni講，見若tòa tī chit-ê城內ê beh tùi刀劍，tùi飢荒，tùi瘟疫來死；獨獨出去歸Ka-le̍k-tí人ê能得tio̍h活，beh拾tio̍h伊ê性命來活teh。Iâ-hô-hoa án-ni kóng, Kìⁿ-nā tòa tī chit ê siâⁿ-lāi--ê beh tùi to-kiàm, tùi ki-hng, tùi un-e̍k lâi sí; to̍k-to̍k chhut-khì kui Ka-le̍k-tí lâng--ê ōe tit-tio̍h oa̍h, beh khioh-tio̍h i ê sìⁿ-miā lâi oa̍h--teh.

3耶和華án-ni講，chit-ê城決斷beh交tī巴比倫王軍兵ê手；伊beh取伊。Iâ-hô-hoa án-ni kóng, Chit ê siâⁿ koat-toàn beh kau tī Pa-pí-lûn ông kun-peng ê chhiú; i beh chhú--i.

4Tùi án-ni，貴族kā王講，求你hō͘ chit人死；因為伊對城內chhun ê兵丁，kap眾百姓，講chit號ê話，hō͘ in ê手軟；chit-ê人m̄是求hō͘百姓平安，是hō͘ in tú-tio̍h災厄。Tùi án-ni, kùi-cho̍k kā ông kóng, Kiû lí hō͘ chit lâng sí; in-ūi i tùi siâⁿ-lāi chhun ê peng-teng, kap chèng peh-sìⁿ, kóng chit-hō ê ōe, hō͘ in ê chhiú nńg; chit ê lâng m̄-sī kiû hō͘ peh-sìⁿ pêng-an, sī hō͘ in tú-tio̍h chai-ē.

5Se-tí-ka王講，看ah，伊tī lín ê手頭，王bōe會干涉lín甚麼tāi-chì。Se-tí-ka ông kóng, Khòaⁿ ah, i tī lín ê chhiú-thâu, ông bōe-ōe kan-sia̍p lín sím-mi̍h tāi-chì.

6In就掠耶利米，hiat伊tī Hap-bí-le̍k ê kiáⁿ Má-ki-ngá ê井；hit-ê井tī拘留所ê院內；in用索將耶利米墜落去；井內無水，只有土糜；耶利米就陷tī土糜。In chiū lia̍h Iâ-lī-bí, hiat i tī Hap-bí-le̍k ê kiáⁿ Má-ki-ngá ê chíⁿ; hit ê chíⁿ tī khu-liû-só͘ ê īⁿ-lāi; in ēng soh chiong Iâ-lī-bí tūi--lo̍h-khì; chíⁿ-lāi bô chúi, chí-ū thô͘-bê; Iâ-lī-bí chiū hām tī thô͘-bê.

7Tī王宮內ê太監，Kó͘-si̍t人Í-pek-bí-le̍k，聽見in將耶利米墜落井；hit時王坐tī便雅憫門口。Tī ông-kiong-lāi ê thài-kàm, Kó͘-si̍t lâng Í-pek-bí-le̍k, thiaⁿ-kìⁿ in chiong Iâ-lī-bí tūi-lo̍h chíⁿ; hit-sî ông chē tī Piān-ngá-bín mn̂g-kháu.

8Í-pek-bí-le̍k就出王宮，對王講，Í-pek-bí-le̍k chiū chhut ông-kiong, tùi ông kóng,

9我ê主，我ê王ah，chiah-ê人款待先知耶利米ê，lóng是pháiⁿ；有kā伊hiat落井，伊會餓死tī-hia；因為城內無米糧。Góa ê chú, góa ê ông ah, chiah ê lâng khoán-thāi sian-ti Iâ-lī-bí--ê, lóng sī pháiⁿ; ū kā i hiat-lo̍h chíⁿ, i ōe gō-sí tī-hia; in-ūi siâⁿ-lāi bô bí-niû.

10王就吩咐Kó͘-si̍t人Í-pek-bí-le̍k講，你tùi chia帶三十人，thàn先知耶利米iáu未死，救伊出井。Ông chiū hoan-hù Kó͘-si̍t lâng Í-pek-bí-le̍k kóng, Lí tùi chia tòa saⁿ-cha̍p lâng, thàn sian-ti Iâ-lī-bí iáu-bē sí, kiù i chhut chíⁿ.

11Tùi án-ni，Í-pek-bí-le̍k chhōa chiah-ê人相kap去，入王宮，到庫房下，tùi-hia the̍h破布舊衫，用索墜落井，到耶利米hia。Tùi án-ni, Í-pek-bí-le̍k chhōa chiah ê lâng saⁿ-kap khì, ji̍p ông-kiong, kàu khò͘-pâng ē, tùi-hia the̍h phòa-pò͘ kū-saⁿ, ēng soh tūi-lo̍h chíⁿ, kàu Iâ-lī-bí hia.

12Kó͘-si̍t人Í-pek-bí-le̍k kā耶利米講，你用chiah-ê破布kap舊衫，chū tī胳下孔。hē tī索頂；耶利米就照án-ni行。Kó͘-si̍t lâng Í-pek-bí-le̍k kā Iâ-lī-bí kóng, Lí ēng chiah ê phòa-pò͘ kap kū-saⁿ, chū tī koh-ē-khang. hē tī soh-téng; Iâ-lī-bí chiū chiàu án-ni kiâⁿ.

13Án-ni，in就用索拔耶利米出井；耶利米猶原tòa tī拘留所ê院。Án-ni, in chiū ēng soh pu̍ih Iâ-lī-bí chhut chíⁿ; Iâ-lī-bí iû-goân tòa tī khu-liû-só͘ ê īⁿ.

14Se-tí-ka王差人帶先知耶利米入耶和華ê厝第三ê門，到伊hia；王就對耶利米講，我問你一項-事，你lóng m̄-thang隱密tī我。Se-tí-ka ông chhe lâng tòa sian-ti Iâ-lī-bí ji̍p Iâ-hô-hoa ê chhù tē saⁿ ê mn̂g, kàu i hia; ông chiū tùi Iâ-lī-bí kóng, Góa mn̄g lí chi̍t-hāng-sū, lí lóng m̄-thang ún-ba̍t tī góa.

15耶利米應Se-tí-ka講，我若kā你講，你kiám無beh thâi死我mah？我若指點你，你無beh聽。Iâ-lī-bí ìn Se-tí-ka kóng, Góa nā kā lí kóng, lí kiám bô beh thâi-sí góa mah? góa nā chí-tiám lí, lí bô beh thiaⁿ.

16Se-tí-ka王暗靜對耶利米chiù-chōa講，Hit-ê創造咱ê活命ê耶和華是活ê，我指伊來chiù-chōa，我的確無thâi你，亦m̄將你交hō͘ chiah-ê siàu想你ê性命ê人ê手。Se-tí-ka ông àm-chīⁿ tùi Iâ-lī-bí chiù-chōa kóng, Hit-ê chhòng-chō lán ê oa̍h-miā ê Iâ-hô-hoa sī oa̍h--ê, góa chí I lâi chiù-chōa, góa tek-khak bô thâi lí, ia̍h m̄ chiong lí kau hō͘ chiah-ê siàu-siūⁿ lí ê sìⁿ-miā ê lâng ê chhiú.

17耶利米對 Se-tí-ka講，耶和華萬軍ê上帝，以色列ê上帝，án-ni講，你若出去投降巴比倫王ê貴族，你ê性命就會活teh，chit-ê城不致hō͘火燒；你kap你ê全家lóng會活。Iâ-lī-bí tùi Se-tí-ka kóng, Iâ-hô-hoa bān-kun ê Siōng-tè, Í-sek-lia̍t ê Siōng-tè, án-ni kóng, Lí nā chhut-khì tâu-hâng Pa-pí-lûn ông ê kùi-cho̍k, lí ê sìⁿ-miā chiū ōe oa̍h-teh, chit ê siâⁿ put-tì hō͘ hé sio; lí kap lí ê choân-ke lóng ōe oa̍h.

18你若m̄出去投降巴比倫王ê貴族，就chit-ê城beh交tī Ka-le̍k-tí人ê手；in beh用火燒伊；你亦bōe脫離in ê手。Lí nā m̄ chhut--khì tâu-hâng Pa-pí-lûn ông ê kùi-cho̍k, chiū chit ê siâⁿ beh kau tī Ka-le̍k-tí lâng ê chhiú; in beh ēng hé sio--i; lí ia̍h bōe thoat-lī in ê chhiú.

19Se-tí-ka王對耶利米講，我驚hiah-ê投降Ka-le̍k-tí ê猶大人，驚見Ka-le̍k-tí人將我交tī in ê手，in會凌辱我。Se-tí-ka ông tùi Iâ-lī-bí kóng, Góa kiaⁿ hiah-ê tâu-hâng Ka-le̍k-tí ê Iû-tāi lâng, kiaⁿ-kìⁿ Ka-le̍k-tí lâng chiong góa kau tī in ê chhiú, in ōe lêng-jio̍k góa.

20耶利米講，Bōe-lah。求你聽我對你所講耶和華ê話，án-ni你就得tio̍h利益，你ê性命也會活teh。Iâ-lī-bí kóng, Bōe--lah. Kiû lí thiaⁿ góa tùi lí só͘ kóng Iâ-hô-hoa ê ōe, án-ni lí chiū tit-tio̍h lī-ek, lí ê sìⁿ-miā iā ōe oa̍h--teh.

21你若m̄肯出去，耶和華指示我ê話就是這：Lí nā m̄-khéng chhut--khì, Iâ-hô-hoa chí-sī góa ê ōe chiū-sī che:

22看ah，猶大王宮所chhun ê婦人人beh帶到巴比倫王ê貴族hia，chiah-ê婦人人beh講，你知己ê朋友使唆你，khah贏你；你ê腳lok落土糜，in就oa̍t-tńg身退去。Khòaⁿ ah, Iû-tāi ông-kiong só͘ chhun ê hū-jîn-lâng beh tòa kàu Pa-pí-lûn ông ê kùi-cho̍k hia, chiah ê hū-jîn-lâng beh kóng, Lí ti-kí ê pêng-iú sái-sō lí, khah-iâⁿ lí; lí ê kha lok--lo̍h thô͘-bê, in chiū oa̍t-tńg-sin thè--khì.

23人beh將你chiah-ê bó͘ kap你chiah-ê kiáⁿ，帶到Ka-le̍k-tí人hia，你亦bōe能脫離in ê手；beh hō͘巴比倫王ê手掠tio̍h；你也beh連累chit-ê城受火燒。Lâng beh chiong lí chiah ê bó͘ kap lí chiah ê kiáⁿ, tòa kàu Ka-le̍k-tí lâng hia, lí ia̍h bōe-ōe thoat-lī in ê chhiú; beh hō͘ Pa-pí-lûn ông ê chhiú lia̍h-tio̍h; lí iā beh liân-lūi chit ê siâⁿ siū hé sio.

24Se-tí-ka對耶利米講，莫得hō͘人知chiah-ê話，你就bōe死。Se-tí-ka tùi Iâ-lī-bí kóng, Bo̍h-tit hō͘ lâng chai chiah ê ōe, lí chiū bōe sí.

25貴族若聽見我有kap你講話，in就來chhē你，問你講，你kā王講甚麼，m̄-thang 對阮隱密，阮就無hō͘你死；王對你講甚麼，亦lóng tio̍h kā阮講；Kùi-cho̍k nā thiaⁿ-kìⁿ góa ū kap lí kóng-ōe, in chiū lâi chhē lí, mn̄g lí kóng, Lí kā ông kóng sím-mi̍h, m̄-thang tùi goán ún-ba̍t, goán chiū bô hō͘ lí sí; ông tùi lí kóng sím-mi̍h, ia̍h lóng tio̍h kā goán kóng;

26你就tio̍h kā in講，我tī王ê面前懇求伊莫得hō͘我koh入約拿單ê厝，來死tī-hia。lí chiū tio̍h kā in kóng, Góa tī ông ê bīn-chêng khún-kiû i bo̍h-tit hō͘ góa koh ji̍p Iok-ná-tan ê chhù, lâi sí tī-hia.

27後來眾貴族來chhē耶利米，問伊；伊就照王所吩咐一切ê話來應in。In就soah，無koh kap伊講話；因為事情無露出。Āu-lâi chèng kùi-cho̍k lâi chhē Iâ-lī-bí, mn̄g i; i chiū chiàu ông só͘ hoan-hù it-chhè ê ōe lâi ìn in. In chiū soah, bô koh kap i kóng-ōe; in-ūi sū-chêng bô lō͘-chhut.

28Tùi án-ni，耶利米猶原tòa tī拘留所ê院內；直到耶路撒冷受取ê日。Tùi án-ni, Iâ-lī-bí iû-goân tòa tī khu-liû-só͘ ê īⁿ-lāi; ti̍t-kàu Iâ-lō͘-sat-léng siū-chhú ê ji̍t.