1Má-thán ê kiáⁿ Sī-hoat-thê-ngá，Pa-si-hō͘-jíⁿ ê kiáⁿ Ki-tāi-lī，Sī-lī-bí-ngá ê kiáⁿ Iû-kah，Má-ki-ngá ê kiáⁿ Pa-si-hō͘-jíⁿ，聽見耶利米對眾人所講ê話，講，Má-thán ê kiáⁿ Sī-hoat-thê-ngá, Pa-si-hō͘-jíⁿ ê kiáⁿ Ki-tāi-lī, Sī-lī-bí-ngá ê kiáⁿ Iû-kah, Má-ki-ngá ê kiáⁿ Pa-si-hō͘-jíⁿ, thiaⁿ-kìⁿ Iâ-lī-bí tùi chèng-lâng só͘ kóng ê ōe, kóng,

2耶和華án-ni講，見若tòa tī chit-ê城內ê beh tùi刀劍，tùi飢荒，tùi瘟疫來死；獨獨出去歸Ka-le̍k-tí人ê能得tio̍h活，beh拾tio̍h伊ê性命來活teh。Iâ-hô-hoa án-ni kóng, Kìⁿ-nā tòa tī chit ê siâⁿ-lāi--ê beh tùi to-kiàm, tùi ki-hng, tùi un-e̍k lâi sí; to̍k-to̍k chhut-khì kui Ka-le̍k-tí lâng--ê ōe tit-tio̍h oa̍h, beh khioh-tio̍h i ê sìⁿ-miā lâi oa̍h--teh.

3耶和華án-ni講，chit-ê城決斷beh交tī巴比倫王軍兵ê手；伊beh取伊。Iâ-hô-hoa án-ni kóng, Chit ê siâⁿ koat-toàn beh kau tī Pa-pí-lûn ông kun-peng ê chhiú; i beh chhú--i.

4Tùi án-ni，貴族kā王講，求你hō͘ chit人死；因為伊對城內chhun ê兵丁，kap眾百姓，講chit號ê話，hō͘ in ê手軟；chit-ê人m̄是求hō͘百姓平安，是hō͘ in tú-tio̍h災厄。Tùi án-ni, kùi-cho̍k kā ông kóng, Kiû lí hō͘ chit lâng sí; in-ūi i tùi siâⁿ-lāi chhun ê peng-teng, kap chèng peh-sìⁿ, kóng chit-hō ê ōe, hō͘ in ê chhiú nńg; chit ê lâng m̄-sī kiû hō͘ peh-sìⁿ pêng-an, sī hō͘ in tú-tio̍h chai-ē.

5Se-tí-ka王講，看ah，伊tī lín ê手頭，王bōe會干涉lín甚麼tāi-chì。Se-tí-ka ông kóng, Khòaⁿ ah, i tī lín ê chhiú-thâu, ông bōe-ōe kan-sia̍p lín sím-mi̍h tāi-chì.

6In就掠耶利米，hiat伊tī Hap-bí-le̍k ê kiáⁿ Má-ki-ngá ê井；hit-ê井tī拘留所ê院內；in用索將耶利米墜落去；井內無水，只有土糜；耶利米就陷tī土糜。In chiū lia̍h Iâ-lī-bí, hiat i tī Hap-bí-le̍k ê kiáⁿ Má-ki-ngá ê chíⁿ; hit ê chíⁿ tī khu-liû-só͘ ê īⁿ-lāi; in ēng soh chiong Iâ-lī-bí tūi--lo̍h-khì; chíⁿ-lāi bô chúi, chí-ū thô͘-bê; Iâ-lī-bí chiū hām tī thô͘-bê.

7Tī王宮內ê太監，Kó͘-si̍t人Í-pek-bí-le̍k，聽見in將耶利米墜落井；hit時王坐tī便雅憫門口。Tī ông-kiong-lāi ê thài-kàm, Kó͘-si̍t lâng Í-pek-bí-le̍k, thiaⁿ-kìⁿ in chiong Iâ-lī-bí tūi-lo̍h chíⁿ; hit-sî ông chē tī Piān-ngá-bín mn̂g-kháu.

8Í-pek-bí-le̍k就出王宮，對王講，Í-pek-bí-le̍k chiū chhut ông-kiong, tùi ông kóng,

9我ê主，我ê王ah，chiah-ê人款待先知耶利米ê，lóng是pháiⁿ；有kā伊hiat落井，伊會餓死tī-hia；因為城內無米糧。Góa ê chú, góa ê ông ah, chiah ê lâng khoán-thāi sian-ti Iâ-lī-bí--ê, lóng sī pháiⁿ; ū kā i hiat-lo̍h chíⁿ, i ōe gō-sí tī-hia; in-ūi siâⁿ-lāi bô bí-niû.

10王就吩咐Kó͘-si̍t人Í-pek-bí-le̍k講，你tùi chia帶三十人，thàn先知耶利米iáu未死，救伊出井。Ông chiū hoan-hù Kó͘-si̍t lâng Í-pek-bí-le̍k kóng, Lí tùi chia tòa saⁿ-cha̍p lâng, thàn sian-ti Iâ-lī-bí iáu-bē sí, kiù i chhut chíⁿ.

11Tùi án-ni，Í-pek-bí-le̍k chhōa chiah-ê人相kap去，入王宮，到庫房下，tùi-hia the̍h破布舊衫，用索墜落井，到耶利米hia。Tùi án-ni, Í-pek-bí-le̍k chhōa chiah ê lâng saⁿ-kap khì, ji̍p ông-kiong, kàu khò͘-pâng ē, tùi-hia the̍h phòa-pò͘ kū-saⁿ, ēng soh tūi-lo̍h chíⁿ, kàu Iâ-lī-bí hia.

12Kó͘-si̍t人Í-pek-bí-le̍k kā耶利米講，你用chiah-ê破布kap舊衫，chū tī胳下孔。hē tī索頂；耶利米就照án-ni行。Kó͘-si̍t lâng Í-pek-bí-le̍k kā Iâ-lī-bí kóng, Lí ēng chiah ê phòa-pò͘ kap kū-saⁿ, chū tī koh-ē-khang. hē tī soh-téng; Iâ-lī-bí chiū chiàu án-ni kiâⁿ.

13Án-ni，in就用索拔耶利米出井；耶利米猶原tòa tī拘留所ê院。Án-ni, in chiū ēng soh pu̍ih Iâ-lī-bí chhut chíⁿ; Iâ-lī-bí iû-goân tòa tī khu-liû-só͘ ê īⁿ.

14Se-tí-ka王差人帶先知耶利米入耶和華ê厝第三ê門，到伊hia；王就對耶利米講，我問你一項-事，你lóng m̄-thang隱密tī我。Se-tí-ka ông chhe lâng tòa sian-ti Iâ-lī-bí ji̍p Iâ-hô-hoa ê chhù tē saⁿ ê mn̂g, kàu i hia; ông chiū tùi Iâ-lī-bí kóng, Góa mn̄g lí chi̍t-hāng-sū, lí lóng m̄-thang ún-ba̍t tī góa.

15耶利米應Se-tí-ka講，我若kā你講，你kiám無beh thâi死我mah？我若指點你，你無beh聽。Iâ-lī-bí ìn Se-tí-ka kóng, Góa nā kā lí kóng, lí kiám bô beh thâi-sí góa mah? góa nā chí-tiám lí, lí bô beh thiaⁿ.

16Se-tí-ka王暗靜對耶利米chiù-chōa講，Hit-ê創造咱ê活命ê耶和華是活ê，我指伊來chiù-chōa，我的確無thâi你，亦m̄將你交hō͘ chiah-ê siàu想你ê性命ê人ê手。Se-tí-ka ông àm-chīⁿ tùi Iâ-lī-bí chiù-chōa kóng, Hit-ê chhòng-chō lán ê oa̍h-miā ê Iâ-hô-hoa sī oa̍h--ê, góa chí I lâi chiù-chōa, góa tek-khak bô thâi lí, ia̍h m̄ chiong lí kau hō͘ chiah-ê siàu-siūⁿ lí ê sìⁿ-miā ê lâng ê chhiú.

17耶利米對 Se-tí-ka講，耶和華萬軍ê上帝，以色列ê上帝，án-ni講，你若出去投降巴比倫王ê貴族，你ê性命就會活teh，chit-ê城不致hō͘火燒；你kap你ê全家lóng會活。Iâ-lī-bí tùi Se-tí-ka kóng, Iâ-hô-hoa bān-kun ê Siōng-tè, Í-sek-lia̍t ê Siōng-tè, án-ni kóng, Lí nā chhut-khì tâu-hâng Pa-pí-lûn ông ê kùi-cho̍k, lí ê sìⁿ-miā chiū ōe oa̍h-teh, chit ê siâⁿ put-tì hō͘ hé sio; lí kap lí ê choân-ke lóng ōe oa̍h.

18你若m̄出去投降巴比倫王ê貴族，就chit-ê城beh交tī Ka-le̍k-tí人ê手；in beh用火燒伊；你亦bōe脫離in ê手。Lí nā m̄ chhut--khì tâu-hâng Pa-pí-lûn ông ê kùi-cho̍k, chiū chit ê siâⁿ beh kau tī Ka-le̍k-tí lâng ê chhiú; in beh ēng hé sio--i; lí ia̍h bōe thoat-lī in ê chhiú.

19Se-tí-ka王對耶利米講，我驚hiah-ê投降Ka-le̍k-tí ê猶大人，驚見Ka-le̍k-tí人將我交tī in ê手，in會凌辱我。Se-tí-ka ông tùi Iâ-lī-bí kóng, Góa kiaⁿ hiah-ê tâu-hâng Ka-le̍k-tí ê Iû-tāi lâng, kiaⁿ-kìⁿ Ka-le̍k-tí lâng chiong góa kau tī in ê chhiú, in ōe lêng-jio̍k góa.

20耶利米講，Bōe-lah。求你聽我對你所講耶和華ê話，án-ni你就得tio̍h利益，你ê性命也會活teh。Iâ-lī-bí kóng, Bōe--lah. Kiû lí thiaⁿ góa tùi lí só͘ kóng Iâ-hô-hoa ê ōe, án-ni lí chiū tit-tio̍h lī-ek, lí ê sìⁿ-miā iā ōe oa̍h--teh.

21你若m̄肯出去，耶和華指示我ê話就是這：Lí nā m̄-khéng chhut--khì, Iâ-hô-hoa chí-sī góa ê ōe chiū-sī che:

22看ah，猶大王宮所chhun ê婦人人beh帶到巴比倫王ê貴族hia，chiah-ê婦人人beh講，你知己ê朋友使唆你，khah贏你；你ê腳lok落土糜，in就oa̍t-tńg身退去。Khòaⁿ ah, Iû-tāi ông-kiong só͘ chhun ê hū-jîn-lâng beh tòa kàu Pa-pí-lûn ông ê kùi-cho̍k hia, chiah ê hū-jîn-lâng beh kóng, Lí ti-kí ê pêng-iú sái-sō lí, khah-iâⁿ lí; lí ê kha lok--lo̍h thô͘-bê, in chiū oa̍t-tńg-sin thè--khì.

23人beh將你chiah-ê bó͘ kap你chiah-ê kiáⁿ，帶到Ka-le̍k-tí人hia，你亦bōe能脫離in ê手；beh hō͘巴比倫王ê手掠tio̍h；你也beh連累chit-ê城受火燒。Lâng beh chiong lí chiah ê bó͘ kap lí chiah ê kiáⁿ, tòa kàu Ka-le̍k-tí lâng hia, lí ia̍h bōe-ōe thoat-lī in ê chhiú; beh hō͘ Pa-pí-lûn ông ê chhiú lia̍h-tio̍h; lí iā beh liân-lūi chit ê siâⁿ siū hé sio.

24Se-tí-ka對耶利米講，莫得hō͘人知chiah-ê話，你就bōe死。Se-tí-ka tùi Iâ-lī-bí kóng, Bo̍h-tit hō͘ lâng chai chiah ê ōe, lí chiū bōe sí.

25貴族若聽見我有kap你講話，in就來chhē你，問你講，你kā王講甚麼，m̄-thang 對阮隱密，阮就無hō͘你死；王對你講甚麼，亦lóng tio̍h kā阮講；Kùi-cho̍k nā thiaⁿ-kìⁿ góa ū kap lí kóng-ōe, in chiū lâi chhē lí, mn̄g lí kóng, Lí kā ông kóng sím-mi̍h, m̄-thang tùi goán ún-ba̍t, goán chiū bô hō͘ lí sí; ông tùi lí kóng sím-mi̍h, ia̍h lóng tio̍h kā goán kóng;

26你就tio̍h kā in講，我tī王ê面前懇求伊莫得hō͘我koh入約拿單ê厝，來死tī-hia。lí chiū tio̍h kā in kóng, Góa tī ông ê bīn-chêng khún-kiû i bo̍h-tit hō͘ góa koh ji̍p Iok-ná-tan ê chhù, lâi sí tī-hia.

27後來眾貴族來chhē耶利米，問伊；伊就照王所吩咐一切ê話來應in。In就soah，無koh kap伊講話；因為事情無露出。Āu-lâi chèng kùi-cho̍k lâi chhē Iâ-lī-bí, mn̄g i; i chiū chiàu ông só͘ hoan-hù it-chhè ê ōe lâi ìn in. In chiū soah, bô koh kap i kóng-ōe; in-ūi sū-chêng bô lō͘-chhut.

28Tùi án-ni，耶利米猶原tòa tī拘留所ê院內；直到耶路撒冷受取ê日。Tùi án-ni, Iâ-lī-bí iû-goân tòa tī khu-liû-só͘ ê īⁿ-lāi; ti̍t-kàu Iâ-lō͘-sat-léng siū-chhú ê ji̍t.

1猶大王Se-tí-ka九年十月，巴比倫王，Nî-pò͘-kah-nî-sat，chhōa伊lóng總ê軍兵來圍困耶路撒冷。Iû-tāi ông Se-tí-ka káu-nî cha̍p-ge̍h, Pa-pí-lûn ông, Nî-pò͘-kah-nî-sat, chhōa i lóng-chóng ê kun-peng lâi ûi-khùn Iâ-lō͘-sat-léng.

2Se-tí-ka十一年，四月，初九日，城就破。Se-tí-ka cha̍p-it--nî, sì ge̍h, chhoe káu-ji̍t, siâⁿ chiū phòa.

3耶路撒冷受取ê時，巴比倫王ê貴族Nî-kah-sa-lī-siat、Sam-kah-nî-pho、太監頭Sat-se-kim，博士長 Nî-kah-sat-lī-siat，kap巴比倫王其餘一切ê貴族，lóng來坐tī中門。Iâ-lō͘-sat-léng siū chhú ê sî, Pa-pí-lûn ông ê kùi-cho̍k Nî-kah-sa-lī-siat, Sam-kah-nî-pho, thài-kàm-thâu Sat-se-kim, phok-sū-tiúⁿ Nî-kah-sat-lī-siat, kap Pa-pí-lûn ông kî-û it-chhè ê kùi-cho̍k, lóng lâi chē tī tiong-mn̂g.

4猶大王Se-tí-ka kap一切ê戰士，看見in，就走；透暝tùi王ê園ê路，兩個城牆中間ê門，出城，ǹg平洋走去。Iû-tāi ông Se-tí-ka kap it-chhè ê chiàn-sū, khòaⁿ-kìⁿ in, chiū cháu; thàu-mî tùi ông ê hn̂g ê lō͘, nn̄g ê siâⁿ-chhiûⁿ tiong-kan ê mn̂g, chhut-siâⁿ, ǹg Pîⁿ-iûⁿ cháu-khì.

5Ka-le̍k-tí ê軍兵追jip in，tī耶利哥ê平洋jip-tio̍h Se-tí-ka；掠伊，就帶到Hap-má地ê Lī-pí-la̍h，巴比倫王Nî-pò͘-kah-nî-sat hia；伊就審判伊。Ka-le̍k-tí ê kun-peng tui-jip in, tī Iâ-lī-ko ê pîⁿ-iûⁿ jip--tio̍h Se-tí-ka; lia̍h--i, chiū tòa kàu Hap-má tōe ê Lī-pí-la̍h, Pa-pí-lûn ông Nî-pò͘-kah-nî-sat hia; i chiū sím-phòaⁿ--i.

6巴比倫王tī Lī-pí-la̍h thâi Se-tí-ka chiah-ê kiáⁿ，hō͘伊親目看見；巴比倫王koh thâi猶大一切尊貴ê人。Pa-pí-lûn ông tī Lī-pí-la̍h thâi Se-tí-ka chiah ê kiáⁿ, hō͘ i chhin-ba̍k khòaⁿ-kìⁿ; Pa-pí-lûn ông koh thâi Iû-tāi it-chhè chun-kùi ê lâng.

7亦koh iah Se-tí-ka ê目睭，用鐵鏈鏈伊，beh帶伊到巴比倫。Ia̍h koh iah Se-tí-ka ê ba̍k-chiu, ēng thih-liān liān--i, beh tòa i kàu Pa-pí-lûn.

8Ka-le̍k-tí人用火燒王宮kap百姓ê厝；koh拆毀耶路撒冷ê城牆。Ka-le̍k-tí lâng ēng hé sio ông-kiong kap peh-sìⁿ ê chhù; koh thiah-húi Iâ-lō͘-sat-léng ê siâⁿ-chhiûⁿ.

9Hit時侍衛長Nî-pò͘-sat-la̍h-tàn將城內所chhun ê百姓，kap投降歸服伊ê，以及其餘所chhun ê百姓，lóng掠去巴比倫。Hit-sî Sī-ōe-tiúⁿ Nî-pò͘-sat-la̍h-tàn chiong siâⁿ-lāi só͘ chhun ê peh-sìⁿ, kap tâu-hâng kui-ho̍k i--ê, í-ki̍p kî-û só͘ chhun ê peh-sìⁿ, lóng lia̍h-khì Pa-pí-lûn.

10侍衛長Nî-pò͘-sat-la̍h-tàn就將百姓中sòng到無半項ê人留tī猶大地；當時亦hō͘ in葡萄園kap田。Sī-ōe-tiúⁿ Nî-pò͘-sat-la̍h-tàn chiū chiong peh-sìⁿ-tiong sòng kàu bô pòaⁿ-hāng ê lâng lâu tī Iû-tāi tōe; tng-sî ia̍h hō͘ in phû-tô-hn̂g kap chhân.

11巴比倫王Nî-pò͘-kah-nî-sat論到耶利米，就吩咐侍衛長Nî-pò͘-sat-la̍h-tàn，講，Pa-pí-lûn ông Nî-pò͘-kah-nî-sat lūn-kàu Iâ-lī-bí, chiū hoan-hù Sī-ōe-tiúⁿ Nî-pò͘-sat-la̍h-tàn, kóng,

12將伊交代你，tio̍h好款待伊，m̄-thang害伊；伊對你講甚麼，你就照án-ni kā伊做。Chiong i kau-tài lí, tio̍h hó khoán-thāi i, m̄-thang hāi i; i tùi lí kóng sím-mi̍h, lí chiū chiàu án-ni kā i chòe.

13侍衛長Nî-pò͘-sat-la̍h-tàn，太監頭Nî-pò͘-sa-su-pan，博士長Nî-pò͘-sa-lí-siat，kap巴比倫王chiah-ê官長，Sī-ōe-tiúⁿ Nî-pò͘-sat-la̍h-tàn, thài-kàm-thâu Nî-pò͘-sa-su-pan, phok-sū-tiúⁿ Nî-pò͘-sa-lí-siat, kap Pa-pí-lûn ông chiah ê koaⁿ-tiúⁿ,

14差人chhōa耶利米出拘留所ê院，交代Sa-hoan ê孫，A-hi-kam ê kiáⁿ，Ki-tāi-lī，chhōa伊tò去in tau；tùi án-ni伊就khiā起百姓ê中間。chhe lâng chhōa Iâ-lī-bí chhut khu-liû-só͘ ê īⁿ, kau-tài Sa-hoan ê sun, A-hi-kam ê kiáⁿ, Ki-tāi-lī, chhōa i tò-khì in tau; tùi án-ni i chiū khiā-khí peh-sìⁿ ê tiong-kan.

15耶利米iáu關tī拘留所院內ê時，耶和華ê話臨到伊講，Iâ-lī-bí iáu koaiⁿ tī khu-liû-só͘ īⁿ-lāi ê sî, Iâ-hô-hoa ê ōe lîm-kàu i kóng,

16你tio̍h去kā Kó͘-si̍t人Í-pek-bí-le̍k講，萬軍ê耶和華，以色列ê上帝，án-ni講，看ah，我講降災厄，無降福氣ê話，的確到chit-ê城；到hit日beh成tī你ê面前。Lí tio̍h khì kā Kó͘-si̍t lâng Í-pek-bí-le̍k kóng, Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Khòaⁿ ah, Góa kóng kàng chai-ē, bô kàng hok-khì ê ōe, tek-khak kàu chit ê siâⁿ; kàu hit-ji̍t beh chiâⁿ tī lí ê bīn-chêng.

17耶和華講，到hit日我beh拯救你；你的確不致交付tī你所驚hiah-ê人ê手。Iâ-hô-hoa kóng, Kàu hit-ji̍t Góa beh chín-kiù lí; lí tek-khak put-tì kau-hù tī lí só͘ kiaⁿ hiah-ê lâng ê chhiú.

18我定tio̍h beh拯救你，你不致倒tī刀下；你beh拾tio̍h你ê性命；因為你óa靠我；這是耶和華講ê。Góa tiāⁿ-tio̍h beh chín-kiù lí, lí put-tì tó tī to-ē; lí beh khioh-tio̍h lí ê sìⁿ-miā; in-ūi lí óa-khò Góa; che sī Iâ-hô-hoa kóng--ê.

1耶路撒冷人，kap猶大人，受掠去巴比倫；其中耶利米亦hō͘侍衛長掠去，用鐵鏈縛伊；後來tùi La̍h-má放伊去；然後耶和華ê話臨到耶利米。Iâ-lō͘-sat-léng lâng, kap Iû-tāi lâng, siū-lia̍h khì Pa-pí-lûn; kî-tiong Iâ-lī-bí ia̍h hō͘ Sī-ōe-tiúⁿ lia̍h--khì, ēng thih-liān pa̍k--i; āu-lâi tùi La̍h-má pàng i khì; jiân-āu Iâ-hô-hoa ê ōe lîm-kàu Iâ-lī-bí.

2侍衛長叫耶利米來，kā伊講，耶和華你ê上帝bat講，beh降chit-ê災厄hō͘ chit-ê所在。Sī-ōe-tiúⁿ kiò Iâ-lī-bí lâi, kā i kóng, Iâ-hô-hoa lí ê Siōng-tè bat kóng, beh kàng chit ê chai-ē hō͘ chit ê só͘-chāi.

3Taⁿ耶和華hō͘伊到，照伊所講ê來行。因為lín得罪耶和華，無聽thàn伊ê話，所以chit-ê tāi-chì到tī lín。Taⁿ Iâ-hô-hoa hō͘ i kàu, chiàu I só͘ kóng--ê lâi kiâⁿ. In-ūi lín tek-chōe Iâ-hô-hoa, bô thiaⁿ-thàn I ê ōe, só͘-í chit ê tāi-chì kàu tī lín.

4看ah，我今á日tháu開你手裡ê鐵鏈；你若看kap我去巴比倫是好，就thang來去，我beh好款待你；你若看kap我去巴比倫m̄好，就莫-用去。看ah，全地tī你ê面前，你看toh-lo̍h是好，是合宜，做你thang去。Khòaⁿ ah, góa kin-á-ji̍t tháu-khui lí chhiú--nih ê thih-liān; lí nā khòaⁿ kap góa khì Pa-pí-lûn sī hó, chiū thang lâi khì, góa beh hó khoán-thāi lí; lí nā khòaⁿ kap góa khì Pa-pí-lûn m̄-hó, chiū bo̍h-ēng khì. Khòaⁿ ah, choân-tōe tī lí ê bīn-chêng, lí khòaⁿ toh-lo̍h sī hó, sī ha̍p-gî, chòe lí thang khì.

5伊iáu未tò去，侍衛長koh kā伊講，你thang tò去Sa-hoan ê孫，A-hi-kam ê kiáⁿ，Ki-tāi-lī hia；現今巴比倫王設立伊管轄猶大chiah-ê城；你thang kap伊khiā起tī百姓中，á是你所看做合宜ê所在，就thang去。Tùi án-ni，侍衛長送伊米糧kap禮物，hō͘伊去。I iáu-bē tò-khì, Sī-ōe-tiúⁿ koh kā i kóng, Lí thang tò--khì Sa-hoan ê sun, A-hi-kam ê kiáⁿ, Ki-tāi-lī hia; hiān-kim Pa-pí-lûn ông siat-li̍p i koán-hat Iû-tāi chiah ê siâⁿ; lí thang kap i khiā-khí tī peh-sìⁿ-tiong, á-sī lí só͘ khòaⁿ-chòe ha̍p-gî ê só͘-chāi, chiū thang khì. Tùi án-ni, Sī-ōe-tiúⁿ sàng i bí-niû kap lé-mi̍h, hō͘ i khì.

6耶利米就到Bí-su-pa，見A-hi-kam ê kiáⁿ Ki-tāi-lī；kap伊khiā起tī境內chhun ê百姓ê中間。Iâ-lī-bí chiū kàu Bí-su-pa, kìⁿ A-hi-kam ê kiáⁿ Ki-tāi-lī; kap i khiā-khí tī kéng-lāi chhun ê peh-sìⁿ ê tiong-kan.

7Tī田野一切ê軍長，kap屬in ê人，聽見巴比倫王設立A-hi-kam ê kiáⁿ Ki-tāi-lī管轄chit所在；亦將無掠去巴比倫ê ta-po͘人、婦人人、gín-á，kap境內極sòng-hiong ê人，lóng總交伊；Tī chhân-iá it-chhè ê kun-tiúⁿ, kap sio̍k in ê lâng, thiaⁿ-kìⁿ Pa-pí-lûn ông siat-li̍p A-hi-kam ê kiáⁿ Ki-tāi-lī koán-hat chit só͘-chāi; ia̍h chiong bô lia̍h-khì Pa-pí-lûn ê ta-po͘-lâng, hū-jîn-lâng, gín-á, kap kéng-lāi ke̍k sòng-hiong ê lâng, lóng-chóng kau i;

8in就來Bí-su-pa Ki-tāi-lī hia；就是Nî-thàm-ngá ê kiáⁿ以實瑪利，Ka-lī-a兩個kiáⁿ Iok-hap-lân kap約拿單，Tan-hō͘-bia̍t ê kiáⁿ Se-lâi-ngá，kap Nî-tô-hoat人Í-húi ê眾kiáⁿ，Má-ka人ê kiáⁿ Iâ-sat-nî-a，kap屬in ê人。in chiū lâi Bí-su-pa Ki-tāi-lī hia; chiū-sī Nî-thàm-ngá ê kiáⁿ Í-si̍t-má-lī, Ka-lī-a nn̄g ê kiáⁿ Iok-hap-lân kap Iok-ná-tan, Tan-hō͘-bia̍t ê kiáⁿ Se-lâi-ngá, kap Nî-tô-hoat lâng Í-húi ê chèng-kiáⁿ, Má-ka lâng ê kiáⁿ Iâ-sat-nî-a, kap sio̍k in ê lâng.

9Sa-hoan ê孫，A-hi-kam ê kiáⁿ，Ki-tāi-lī tùi in kap屬in ê人chiù-chōa，講，莫得驚服事Ka-le̍k-tí人；做lín khiā起chia，服事巴比倫王，lín就會得tio̍h福氣。Sa-hoan ê sun, A-hi-kam ê kiáⁿ, Ki-tāi-lī tùi in kap sio̍k in ê lâng chiù-chōa, kóng, Bo̍h-tit kiaⁿ ho̍k-sāi Ka-le̍k-tí lâng; chòe lín khiā-khí chia, ho̍k-sāi Pa-pí-lûn ông, lín chiū ōe tit-tio̍h hok-khì.

10論到我，我beh tiàm tī Bí-su-pa，伺候hiah-ê能來咱chia ê Ka-le̍k-tí人；但是lín chiah-ê，lín tio̍h積聚酒，夏天ê果子，kap油，收tī器具內，khiā起tī lín所佔 ê城。Lūn-kàu góa, góa beh tiàm tī Bí-su-pa, su-hāu hiah ê ōe lâi lán chia ê Ka-le̍k-tí lâng; nā-sī lín chiah-ê, lín tio̍h chek-chū chiú, hē-thiⁿ ê ké-chí, kap iû, siu tī khì-kū lāi, khiā-khí tī lín só͘ chiàm ê siâⁿ.

11Koh有tī Mô͘-ap，kap A-bûn族ê中間，tī Í-tong，kap列國中間一切ê猶大人，聽見巴比倫王有留所chhun ê猶大人，koh設立Sa-hoan ê孫，A-hi-kam ê kiáⁿ，Ki-tāi-lī管轄in；Koh ū tī Mô͘-ap, kap A-bûn cho̍k ê tiong-kan, tī Í-tong, kap lia̍t-kok tiong-kan it-chhè ê Iû-tāi lâng, thiaⁿ-kìⁿ Pa-pí-lûn ông ū lâu só͘ chhun ê Iû-tāi lâng, koh siat-li̍p Sa-hoan ê sun, A-hi-kam ê kiáⁿ, Ki-tāi-lī koán-hat in;

12Chiah-ê一切ê猶大人tùi in hō͘人趕去ê ta̍k所在tò來，到猶大地ê Bí-su-pa、Ki-tāi-lī hia，續積聚chōe-chōe酒kap夏天ê果子。chiah ê it-chhè ê Iû-tāi lâng tùi in hō͘ lâng kóaⁿ-khì ê ta̍k só͘-chāi tò--lâi, kàu Iû-tāi tōe ê Bí-su-pa, Ki-tāi-lī hia, sòa chek-chū chōe-chōe chiú kap hē-thiⁿ ê ké-chí.

13Ka-lī-a ê kiáⁿ，Iok-hap-lân，kap tī田野一切ê軍長來Bí-su-pa見Ki-tāi-lī，對伊講，Ka-lī-a ê kiáⁿ, Iok-hap-lân, kap tī chhân-iá it-chhè ê kun-tiúⁿ lâi Bí-su-pa kìⁿ Ki-tāi-lī, tùi i kóng,

14A-bûn族ê王，Pa-lī-su，有差Nî-thàm-ngá ê kiáⁿ以實瑪利來beh取你ê性命，你知mah？總是A-hi-kam ê kiáⁿ Ki-tāi-lī m̄信in。A-bûn-cho̍k ê ông, Pa-lī-su, ū chhe Nî-thàm-ngá ê kiáⁿ Í-si̍t-má-lī lâi beh chhú lí ê sìⁿ-miā, lí chai mah? chóng-sī A-hi-kam ê kiáⁿ Ki-tāi-lī m̄-sìn in.

15Ka-lī-a ê kiáⁿ，Iok-hap-lân tī Bí-su-pa暗靜對Ki-tāi-lī講，求你准我去，我beh thâi Nî-thàm-ngá ê kiáⁿ以實瑪利，的確無人知；kiám thang hō͘伊取你ê性命，致到歸óa你ê猶大人四散，hō͘猶大所chhun ê人lóng滅無ah？Ka-lī-a ê kiáⁿ, Iok-hap-lân tī Bí-su-pa àm-chīⁿ tùi Ki-tāi-lī kóng, Kiû lí chún góa khì, góa beh thâi Nî-thàm-ngá ê kiáⁿ Í-si̍t-má-lī, tek-khak bô lâng chai; kiám thang hō͘ i chhú lí ê sìⁿ-miā, tì-kàu kui-óa lí ê Iû-tāi lâng sì-sòaⁿ, hō͘ Iû-tāi só͘-chhun ê lâng lóng bia̍t-bô ah?

16A-hi-kam ê kiáⁿ Ki-tāi-lī kā Ka-lí-a ê kiáⁿ Iok-hap-lân講，你m̄-thang做chit-ê事；你所講以實瑪利ê事是無影。A-hi-kam ê kiáⁿ Ki-tāi-lī kā Ka-lí-a ê kiáⁿ Iok-hap-lân kóng, Lí m̄-thang chòe chit ê sū; lí só͘ kóng Í-si̍t-má-lī ê sū sī bô-iáⁿ.