1有teh講，人若離出伊ê bó͘，bó͘就離開伊，嫁別人；就伊前ê丈夫kiám thang koh親近伊mah？若án-ni，hit-ê地方kiám無bak-tio̍h lâ-sâm mah？獨獨你kap chōe-chōe親愛ê行淫，iáu-kú thang歸tī我；這是耶和華講ê。Ū teh kóng, Lâng nā lî-chhut i ê bó͘, bó͘ chiū lī-khui i, kè pa̍t-lâng; chiū i chêng ê tiōng-hu kiám thang koh chhin-kūn i mah? nā án-ni, hit ê tōe-hng kiám bô bak-tio̍h lâ-sâm mah? to̍k-to̍k lí kap chōe-chōe chhin-ài--ê kiâⁿ-îm, iáu-kú thang kui tī Góa; che sī Iâ-hô-hoa kóng--ê.

2你tio̍h kia̍h目看chiah-ê光khō-khō高ê所在；tī toh-lo̍h無有淫行ah？你坐tī路邊thèng候，親像阿拉伯人tī曠野一樣；koh用你ê淫行邪惡phah lâ-sâm全地。Lí tio̍h kia̍h-ba̍k khòaⁿ chiah ê kng-khō-khō koâiⁿ ê só͘-chāi; tī toh-lo̍h bô ū îm-hēng ah? lí chē tī lō͘-piⁿ thèng-hāu, chhin-chhiūⁿ A-la̍h-pek lâng tī khòng-iá chi̍t-iūⁿ; koh ēng lí ê îm-hēng siâ-ok phah lâ-sâm choân-tōe.

3因為án-ni，好ê雨水停止，春天ê雨無落；你iáu有娼妓ê面，m̄知見笑。In-ūi án-ni, hó ê hō͘-chúi thêng-chí, chhun-thiⁿ ê hō͘ bô lo̍h; lí iáu ū chhiong-ki ê bīn, m̄-chai kiàn-siàu.

4你kiám m̄ tùi chit時叫我講，我ê父ah，你是我少年ê時，引chhōa我ê？Lí kiám m̄ tùi chit-sî kiò Góa kóng, Góa ê pē ah, Lí sī góa siàu-liân ê sî, ín-chhōa góa--ê?

5伊kiám永永khǹg受氣，留到路尾mah？看ah，你有án-ni講，iáu-kú盡你所能ê行pháiⁿ。I kiám éng-éng khǹg siū-khì, lâu kàu lō͘-bé mah? khòaⁿ ah, lí ū án-ni kóng, iáu-kú chīn lí só͘ ōe--ê kiâⁿ-pháiⁿ.

6當約西亞王坐位ê時，耶和華koh對我講，悖逆ê以色列所做ê，你有看見無？伊上chiah-ê高山，tī lóng總青翠ê樹腳行淫亂。Tng Iok-se-a ông chē-ūi ê sî, Iâ-hô-hoa koh tùi góa kóng, Pōe-ge̍k ê Í-sek-lia̍t só͘ chòe--ê, lí ū khòaⁿ-kìⁿ bô? I chiūⁿ chiah ê koâiⁿ-soaⁿ, tī lóng-chóng chhiⁿ-chhùi ê chhiū-kha kiâⁿ îm-loān.

7伊行chiah-ê tāi-chì以後，我講，伊beh歸óa我，總是伊無，伊奸詐ê小妹猶大亦有看見。I kiâⁿ chiah ê tāi-chì í-āu, Góa kóng, I beh kui-óa Góa, chóng-sī i bô, i kan-chà ê sió-bē Iû-tāi ia̍h ū khòaⁿ-kìⁿ.

8悖逆ê以色列行淫亂，我為tio̍h chit-ê緣故hō͘伊離書，離出伊；我看見伊奸詐ê小妹猶大，猶原無驚，亦是去行淫。Pōe-ge̍k ê Í-sek-lia̍t kiâⁿ îm-loān, Góa ūi-tio̍h chit ê iân-kò͘ hō͘ i lî-su, lî-chhut i; Góa khòaⁿ-kìⁿ i kan-chà ê sió-bē Iû-tāi, iû-goân bô kiaⁿ, ia̍h sī khì kiâⁿ-îm.

9伊隨便行伊ê淫亂，就phah lâ-sâm chit-ê地方；就kap石頭柴頭行淫。I sûi-piān kiâⁿ i ê îm-loān, chiū phah lâ-sâm chit ê tōe-hng; chiū kap chio̍h-thâu chhâ-thâu kiâⁿ-îm.

10雖然有chiah-ê一切ê事，伊奸詐ê小妹猶大猶原無專心歸向我，不過是假意nā-tiāⁿ；這是耶和華講ê。Sui-jiân ū chiah-ê it-chhè ê sū, i kan-chà ê sió-bē Iû-tāi iû-goân bô choan-sim kui-ǹg Góa, put-kò sī ké-ì nā-tiāⁿ; che sī Iâ-hô-hoa kóng--ê.

11耶和華對我講，悖逆ê以色列，比奸詐ê猶大，iáu khah有義。Iâ-hô-hoa tùi góa kóng, Pōe-ge̍k ê Í-sek-lia̍t, pí kan-chà ê Iû-tāi, iáu khah ū gī.

12你tio̍h去ǹg北方傳chiah-ê話，講，耶和華講，悖逆ê以色列ah，tio̍h tò來；我無beh用受氣ê目睭看lín；因為我是慈愛ê，我無beh永遠khǹg受氣；這是耶和華講ê。Lí tio̍h khì ǹg pak-hng thoân chiah ê ōe, kóng, Iâ-hô-hoa kóng, Pōe-ge̍k ê Í-sek-lia̍t ah, tio̍h tò--lâi; Góa bô beh ēng siū-khì ê ba̍k-chiu khòaⁿ lín; in-ūi Góa sī chû-ài--ê, Góa bô beh éng-oán khǹg siū-khì; che sī Iâ-hô-hoa kóng--ê.

13獨獨tio̍h認你ê罪，就是你違背耶和華你ê上帝；tī lóng總青翠ê樹腳，走東走西，chhē別ê；無聽thàn我ê話；這是耶和華講ê。To̍k-to̍k tio̍h jīn lí ê chōe, chiū-sī lí ûi-pōe Iâ-hô-hoa lí ê Siōng-tè; tī lóng-chóng chhiⁿ-chhùi ê chhiū-kha, cháu-tang cháu-sai, chhē pa̍t-ê; bô thiaⁿ-thàn Góa ê ōe; che sī Iâ-hô-hoa kóng--ê.

14耶和華講，悖逆ê kiáⁿ兒ah，tio̍h tò來；因為我做lín ê丈夫；koh我beh將lín tùi一個城取一人，tùi一族取兩人，帶到錫安。Iâ-hô-hoa kóng, Pōe-ge̍k ê kiáⁿ-jî ah, tio̍h tò--lâi; in-ūi Góa chòe lín ê tiōng-hu; koh Góa beh chiong lín tùi chi̍t ê siâⁿ chhú chi̍t lâng, tùi chi̍t-cho̍k chhú nn̄g lâng, tòa kàu Sek-an.

15我beh將合我ê心ê牧者賞賜lín；in beh用知識kap智慧養飼lín。Góa beh chiong ha̍p Góa ê sim ê bo̍k-chiá siúⁿ-sù lín; in beh ēng chai-bat kap tì-hūi iúⁿ-chhī lín.

16耶和華講，Lín tī國內生湠chōe-chōe；當hiah-ê日子，人無beh koh講起，耶和華ê約櫃；亦無beh記tī心裡；lóng bōe記得，lóng無去chhē，亦無koh做伊。Iâ-hô-hoa kóng, Lín tī kok-lāi siⁿ-thòaⁿ chōe-chōe; tng hiah ê ji̍t-chí, lâng bô beh koh kóng-khí, Iâ-hô-hoa ê iok-kūi; ia̍h bô beh kì tī sim--nih; lóng bōe-kì--tit, lóng bô khì chhē, ia̍h bô koh chòe--i.

17Hit時人beh稱耶路撒冷做耶和華ê寶座；萬國beh聚集到hia；就是因為耶和華ê名，來到耶路撒冷；in無koh照家己pháiⁿ心ê剛硬行tāi-chì。Hit-sî lâng beh chheng Iâ-lō͘-sat-léng chòe Iâ-hô-hoa ê pó-chō; bān-kok beh chū-chi̍p kàu hia; chiū-sī in-ūi Iâ-hô-hoa ê miâ, lâi kàu Iâ-lō͘-sat-léng; in bô koh chiàu ka-kī pháiⁿ-sim ê kong-ngī kiâⁿ tāi-chì.

18當hiah-ê日子，猶大家beh kap以色列家同行；tùi北方ê地相kap來，到我賞賜lín ê列祖做業ê地。Tng hiah ê ji̍t-chí, Iû-tāi ke beh kap Í-sek-lia̍t ke tâng-kiâⁿ; tùi pak-hng ê tōe saⁿ-kap lâi, kàu Góa siúⁿ-sù lín ê lia̍t-chó͘ chòe-gia̍p ê tōe.

19總是我講，我怎樣ōe-thang排列lín tī chiah-ê kiáⁿ ê中間，將好ê地賞賜你，就是列國中siōng好ê業？我koh講，Lín tio̍h稱我講，我ê父ah；亦無koh倒tńg去，m̄-tè我。Chóng-sī góa kóng, Góa cháiⁿ-iūⁿ ōe thang pâi-lia̍t lín tī chiah ê kiáⁿ ê tiong-kan, chiong hó ê tōe siúⁿ-sù lí, chiū-sī lia̍t-kok-tiong siōng-hó ê gia̍p? Góa koh kóng, Lín tio̍h chheng Góa kóng, Góa ê pē ah; ia̍h bô koh tò-tńg khì, m̄-tè Góa.

20以色列家ah，lín對我行奸詐，真正親像婦人行奸詐離開伊ê丈夫；這是耶和華講ê。Í-sek-lia̍t ke ah, lín tùi Góa kiâⁿ kan-chà, chin-chiàⁿ chhin-chhiūⁿ hū-jîn kiâⁿ kan-chà lī-khui i ê tiōng-hu; che sī Iâ-hô-hoa kóng--ê.

21Tī光khō-khō高ê所在聽見聲，就是以色列人啼哭懇求ê聲；就是因為in行邪癖ê路，bōe記得in ê上帝耶和華。Tī kng-khō-khō koâiⁿ ê só͘-chāi thiaⁿ-kìⁿ siaⁿ, chiū-sī Í-sek-lia̍t lâng thî-khàu khún-kiû ê siaⁿ; chiū-sī in-ūi in kiâⁿ siâ-phiah ê lō͘, bōe-kì-tit in ê Siōng-tè Iâ-hô-hoa.

22Lín chiah-ê悖逆ê kiáⁿ兒ah，tio̍h tò來；我beh醫好lín ê悖逆。看ah，阮來到你chia；因為你是阮ê上帝耶和華。Lín chiah ê pōe-ge̍k ê kiáⁿ-jî ah, tio̍h tò--lâi; Góa beh i-hó lín ê pōe-ge̍k. Khòaⁿ ah, goán lâi kàu Lí chia; in-ūi Lí sī goán ê Siōng-tè Iâ-hô-hoa.

23Tùi小山á是大山ê鬧熱，ǹg望得tio̍h幫贊，實在是空空；以色列ê得tio̍h救，真正在tī阮ê上帝耶和華。Tùi sió-soaⁿ á-sī tōa-soaⁿ ê lāu-jia̍t, ǹg-bāng tit-tio̍h pang-chān, si̍t-chāi sī khang-khang; Í-sek-lia̍t ê tit-tio̍h kiù, chin-chiàⁿ chāi-tī goán ê Siōng-tè Iâ-hô-hoa.

24Tùi阮少年以來，hit-ê thang見笑ê事，將阮ê列祖所tio̍h磨來得tio̍h-ê，就是in ê羊群，牛群，kap in ê kiáⁿ，cha-bó͘-kiáⁿ，lóng吞食去。Tùi goán siàu-liân í-lâi, hit ê thang kiàn-siàu ê sū, chiong goán ê lia̍t-chó͘ só͘ tio̍h-bôa lâi tit-tio̍h--ê, chiū-sī in ê iûⁿ-kûn, gû-kûn, kap in ê kiáⁿ, cha-bó͘-kiáⁿ, lóng thun-chia̍h--khì.

25阮倒tī阮ê見笑中，阮ê凌辱遮蓋阮；因為tùi少年到taⁿ，阮kap阮ê列祖常常得罪阮ê上帝耶和華；無聽thàn阮ê上帝耶和華ê聲。Goán tó tī goán ê kiàn-siàu-tiong, goán ê lêng-jio̍k jia-khàm goán; in-ūi tùi siàu-liân kàu taⁿ, goán kap goán ê lia̍t-chó͘ siông-siông tek-chōe goán ê Siōng-tè Iâ-hô-hoa; bô thiaⁿ-thàn goán ê Siōng-tè Iâ-hô-hoa ê siaⁿ.

1耶和華講，以色列ah，你若肯tò來，就tò來我chia；若tùi我ê面前除去你可惡ê事，亦無chhìn-chhái行；Iâ-hô-hoa kóng, Í-sek-lia̍t ah, Lí nā khéng tò--lâi, chiū tò--lâi Góa chia; nā tùi Góa ê bīn-chêng tû--khì lí khó-ò͘ⁿ ê sū, ia̍h bô chhìn-chhái kiâⁿ;

2亦照誠實、公平、公義，kí耶和華ê永活來chiù-chōa；就列國beh對祂來家己求福氣；亦beh因為祂來誇口。ia̍h chiàu sêng-si̍t, kong-pêng, kong-gī, kí Iâ-hô-hoa ê éng-oa̍h lâi chiù-chōa; chiū lia̍t-kok beh tùi I lâi ka-kī kiû hok-khì; ia̍h beh in-ūi I lâi khoa-kháu.

3耶和華對猶大人kap耶路撒冷án-ni講，Tio̍h開墾lín ê土地，莫得掖種tī刺phè內。Iâ-hô-hoa tùi Iû-tāi lâng kap Iâ-lō͘-sat-léng án-ni kóng, Tio̍h khai-khún lín ê thó͘-tōe, bo̍h-tit iā-chéng tī chhì-phè-lāi.

4猶大人kap耶路撒冷khiā起ê百姓ah，lín tio̍h kā本身行割禮，歸tī耶和華；除去心內ê私慾；驚了我ê受氣，因為lín所行ê pháiⁿ，來發作；親像火to̍h起來，甚至無人能phah-hoa。Iû-tāi lâng kap Iâ-lō͘-sat-léng khiā-khí ê peh-sìⁿ ah, lín tio̍h kā pún-sin kiâⁿ kat-lé, kui tī Iâ-hô-hoa; tû--khì sim-lāi ê su-io̍k; kiaⁿ-liáu Góa ê siū-khì, in-ūi lín só͘-kiâⁿ ê pháiⁿ, lâi hoat-choh; chhin-chhiūⁿ hé to̍h--khí-lâi, sīm-chì bô lâng ōe phah-hoa.

5Lín tio̍h傳tī猶大，報tī耶路撒冷，講，Lín tio̍h tī國內pûn哨角，大聲叫講，Lín tio̍h聚集，咱thang進入堅固ê城。Lín tio̍h thoân tī Iû-tāi, pò tī Iâ-lō͘-sat-léng, kóng, Lín tio̍h tī kok-lāi pûn sàu-kak, tōa-siaⁿ kiò kóng, Lín tio̍h chū-chi̍p, lán thang chìn-ji̍p kian-kò͘ ê siâⁿ.

6應該ǹg錫安khiā大旗；tio̍h逃走，m̄-thang停腳；因為我beh hō͘災厄kap大ê毀壞tùi北方來。Eng-kai ǹg Sek-an khiā tōa-kî; tio̍h tô-cháu, m̄-thang thêng-kha; in-ūi Góa beh hō͘ chai-ē kap tōa ê húi-hoāi tùi pak-hng lâi.

7有獅tùi ām ê樹林中上來，毀壞列國ê，伊已經起身，出伊ê本所在；beh hō͘你ê地拋荒，hō͘你ê城荒廢，無人khiā起。Ū sai tùi ām ê chhiū-nâ-tiong chiūⁿ--lâi, húi-hoāi lia̍t-kok--ê, i í-keng khí-sin, chhut i ê pún só͘-chāi; beh hō͘ lí ê tōe pha-hng, hō͘ lí ê siâⁿ hong-hòe, bô lâng khiā-khí.

8為tio̍h án-ni，lín ê腰tio̍h hâ麻布，大聲啼哭；因為耶和華ê大受氣無對咱oa̍t倒tńg。Ūi-tio̍h án-ni, lín ê io tio̍h hâ môa-pò͘, tōa-siaⁿ thî-khàu; in-ūi Iâ-hô-hoa ê tōa siū-khì bô tùi lán oa̍t-tò-tńg.

9耶和華講，到hit日君王ê心，貴族ê心，lóng beh消滅；祭司lóng beh生驚，先知lóng beh gông-ngia̍h。Iâ-hô-hoa kóng, kàu hit-ji̍t kun-ông ê sim, kùi-cho̍k ê sim, lóng beh siau-bia̍t; chè-si lóng beh chhiⁿ-kiaⁿ, sian-ti lóng beh gông-ngia̍h.

10我講，Ai-ah，主耶和華ah，你真正是大大欺騙chit-ê百姓kap耶路撒冷；kā in講，Lín beh得tio̍h平安，其實刀劍害tio̍h in ê性命。Góa kóng, Ai--ah, Chú Iâ-hô-hoa ah, Lí chin-chiàⁿ sī tōa-tōa khi-phiàn chit ê peh-sìⁿ kap Iâ-lō͘-sat-léng; kā in kóng, Lín beh tit-tio̍h pêng-an, kî-si̍t to-kiàm hāi-tio̍h in ê sìⁿ-miā.

11Hit時beh有話對chit-ê百姓kap耶路撒冷講，Beh有熱熱ê風，tùi曠野光khō-khō高ê所在，ǹg我ê眾百姓吹來；m̄是beh簸伊，亦m̄是beh hō͘伊清氣。Hit-sî beh ū ōe tùi chit ê peh-sìⁿ kap Iâ-lō͘-sat-léng kóng, Beh ū jia̍t-jia̍t ê hong, tùi khòng-iá kng-khō-khō koâiⁿ ê só͘-chāi, ǹg Góa ê chèng peh-sìⁿ chhe--lâi; m̄-sī beh pòa--i, ia̍h m̄-sī beh hō͘ i chheng-khì.

12Beh有koh-khah大ê風，為tio̍h我吹來；taⁿ我koh beh發出判詞來攻擊in。Beh ū koh-khah tōa ê hong, ūi-tio̍h Góa chhe--lâi; taⁿ Góa koh beh hoat-chhut phòaⁿ-sû lâi kong-kek in.

13看ah，伊beh親像雲起來；伊ê戰車親像捲螺風，伊ê馬比鷹鳥khah緊；有災厄ah，因為咱敗無lah。Khòaⁿ ah, i beh chhin-chhiūⁿ hûn khí-lâi; i ê chiàn-chhia chhin-chhiūⁿ kńg-lê-hong, i ê bé pí eng-chiáu khah kín; ū chai-ē ah, in-ūi lán pāi-bô lah.

14耶路撒冷ah，你tio̍h洗清你ê心，來除去pháiⁿ，hō͘你thang得tio̍h救；pháiⁿ念頭存tī你ê心內，beh到tī時ah？Iâ-lō͘-sat-léng ah, lí tio̍h sóe-chheng lí ê sim, lâi tû--khì pháiⁿ, hō͘ lí thang tit-tio̍h kiù; pháiⁿ liām-thâu chûn tī lí ê sim-lāi, beh kàu tī-sî ah?

15有聲tùi Tàn傳報，tùi Í-hoat-liân山報災厄。Ū siaⁿ tùi Tàn thoân-pò, tùi Í-hoat-liân soaⁿ pò chai-ē.

16Lín tio̍h傳hō͘列國，報告攻擊耶路撒冷ê tāi-chì，講，有圍困城ê，tùi遠遠ê所在來；出in ê聲，攻擊猶大chiah-ê城。Lín tio̍h thoân hō͘ lia̍t-kok, pò-kò kong-kek Iâ-lō͘-sat-léng ê tāi-chì, kóng, Ū ûi-khùn siâⁿ--ê, tùi hn̄g-hn̄g ê só͘-chāi lâi; chhut in ê siaⁿ, kong-kek Iû-tāi chiah ê siâⁿ.

17In周圍攻擊伊親像顧園ê人；因為伊背叛我；這是耶和華講ê。In chiu-ûi kong-kek i chhin-chhiūⁿ kò͘-hn̂g ê lâng; in-ūi i pōe-poān Góa; che sī Iâ-hô-hoa kóng--ê.

18你ê所行，你ê所做，致到你有chiah-ê事；這是你ê罪惡，實在是苦，是害到你ê心。Lí ê só͘-kiâⁿ, lí ê só͘-chòe, tì-kàu lí ū chiah ê sū; che sī lí ê chōe-ok, si̍t-chāi sī khó͘, sī hāi kàu lí ê sim.

19我ê臟腑ah，我ê臟腑ah，我ê心痛疼，我ê心tī我ê內面擘腹，我bōe會/能靜靜無講話；因為我已經聽見哨角ê聲，交戰ê hoah-hiàm。góa ê chōng-hú ah, góa ê chōng-hú ah, góa ê sim thàng-thiàⁿ, góa ê sim tī góa ê lāi-bīn peh-pak, góa bōe-ōe chēng-chēng bô kóng-ōe; in-ūi góa í-keng thiaⁿ-kìⁿ sàu-kak ê siaⁿ, kau-chiàn ê hoah-hiàm.

20人teh報毀壞，koh毀壞；因為全地敗壞，我ê布棚忽然敗壞，我ê帳帷tiap-á久破裂。Lâng teh pò húi-hoāi, koh húi-hoāi; in-ūi choân-tōe pāi-hoāi, góa ê pò͘-pîⁿ hut-jiân pāi-hoāi, góa ê tiùⁿ-ûi tiap-á-kú phòa-li̍h.

21我看見大旗，聽見哨角ê聲；beh到jōa久ah？Góa khòaⁿ-kìⁿ tōa-kî, thiaⁿ-kìⁿ sàu-kak ê siaⁿ; beh kàu jōa-kú ah?

22我ê百姓愚戇，m̄-bat我；in是愚戇無聰明ê kiáⁿ；行pháiⁿ就gâu，行好就ham-bān。Góa ê peh-sìⁿ gû-gōng, m̄-bat Góa; in sī gû-gōng bô chhang-miâ ê kiáⁿ; kiâⁿ-pháiⁿ chiū gâu, kiâⁿ-hó chiū ham-bān.

23先知講，我看地，看ah，地是空空渾沌；我看天，天亦無光。Sian-ti kóng, Góa khòaⁿ tōe, khòaⁿ ah, tōe sī khang-khang hūn-tūn; góa khòaⁿ thiⁿ, thiⁿ ia̍h bô kng.

24我看hiah-ê大山，看ah，in lóng振動；小山亦lóng搖來搖去。Góa khòaⁿ hiah ê tōa-soaⁿ, khòaⁿ ah, in lóng tín-tāng; sió-soaⁿ ia̍h lóng iô-lâi iô-khì.

25我koh看，看ah，lóng無人；空中ê飛鳥，亦lóng飛走。Góa koh khòaⁿ, khòaⁿ ah, lóng bô lâng; khong-tiong ê pe-chiáu, ia̍h lóng pe-cháu.

26我koh看伊，看ah，肥ê田變做拋荒ê地；一切ê城tī耶和華ê面前，因為祂ê大受氣，lóng總倒壞。Góa koh khòaⁿ--i, khòaⁿ ah, pûi ê chhân pìⁿ-chòe pha-hng ê tōe; it-chhè ê siâⁿ tī Iâ-hô-hoa ê bīn-chêng, in-ūi I ê tōa siū-khì, lóng-chóng tó-hoāi.

27因為耶和華án-ni講，全地的確拋荒；總是我無beh毀滅到盡。In-ūi Iâ-hô-hoa án-ni kóng, Choân-tōe tek-khak pha-hng; chóng-sī Góa bô beh húi-bia̍t kàu-chīn.

28因為án-ni地beh憂悶，天頂也beh烏暗；我已經講伊，已經定tio̍h伊，的確無退悔，也無oa̍t-tńg意思，m̄做伊。In-ūi án-ni tōe beh iu-būn, thiⁿ-téng iā beh o͘-àm; Góa í-keng kóng--i, í-keng tiāⁿ-tio̍h--i, tek-khak bô thè-hóe, iā bô oa̍t-tńg ì-sù, m̄ chòe--i.

29Ta̍k ê城ê人因為馬兵kap射箭ê人ê hōa-hōa哮，就lóng逃走，進入樹林，爬(pê)上石磐頂；ta̍k ê城tú-tio̍h棄sak，無人khiā起。Ta̍k ê siâⁿ ê lâng in-ūi bé-peng kap siā-chìⁿ ê lâng ê hōa-hōa-háu, chiū lóng tô-cháu, chìn-ji̍p chhiū-nâ, pê-chiūⁿ chio̍h-pôaⁿ-téng; ta̍k ê siâⁿ tú-tio̍h khì-sak, bô lâng khiā-khí.

30你衰敗ê時beh怎樣做？雖然穿朱紅ê衫，用金器裝飾，用色料畫你ê目睭，án-ni tián好看，是空空；戀愛你ê看輕你，續siàu想你ê性命。Lí soe-pāi ê sî beh cháiⁿ-iūⁿ chòe? Sui-jiân chhēng chu-âng ê saⁿ, ēng kim-khì chng-thāⁿ, ēng sek-liāu ūi lí ê ba̍k-chiu, án-ni tián hó-khòaⁿ, sī khang-khang; loân-ài lí--ê khòaⁿ-khin lí, sòa siàu-siūⁿ lí ê sìⁿ-miā.

31因為我聽見聲親像生kiáⁿ ê婦人人，親像生頭chiūⁿ-kiáⁿ ê艱苦，就是錫安cha-bó͘-kiáⁿ ê聲，伊喘大氣，thí開手講，我有災厄ah，因為我ê神魂為tio̍h thâi人ê來暈去。In-ūi góa thiaⁿ-kìⁿ siaⁿ chhin-chhiūⁿ siⁿ-kiáⁿ ê hū-jîn-lâng, chhin-chhiūⁿ siⁿ thâu-chiūⁿ-kiáⁿ ê kan-khó͘, chiū-sī Sek-an cha-bó͘-kiáⁿ ê siaⁿ, i chhoán tōa-khùi, thí-khui chhiú kóng, Góa ū chai-ē ah, in-ūi góa ê sîn-hûn ūi-tio̍h thâi-lâng-ê lâi hūn-khì.

1Lín tio̍h走來走去tī耶路撒冷ê街路來看來探聽，tī伊ê寬闊ê所在來chhē，看會tú-tio̍h一人，á是有人行公義，求誠實；我就beh赦免chit-ê城。Lín tio̍h cháu-lâi cháu-khì tī Iâ-lō͘-sat-léng ê ke-lō͘ lâi khòaⁿ lâi thàm-thiaⁿ, tī i ê khoan-khoah ê só͘-chāi lâi chhē, khòaⁿ ōe tú-tio̍h chi̍t-lâng, á-sī ū lâng kiâⁿ kong-gī, kiû sêng-si̍t; Góa chiū beh sià-bián chit ê siâⁿ.

2In雖然講，耶和華是活ê，in所chiù ê chōa實在是假。In sui-jiân kóng, Iâ-hô-hoa sī oa̍h--ê, in só͘ chiù ê chōa si̍t-chāi sī ké.

3耶和華ah，你ê目睭kiám m̄是ǹg誠實mah？你phah in，in也無憂傷；你毀滅in，in m̄肯受教督；in hō͘ in ê面比石khah-tēng，m̄肯回頭。Iâ-hô-hoa ah, Lí ê ba̍k-chiu kiám-m̄-sī ǹg sêng-si̍t mah? Lí phah in, in iā bô iu-siong; Lí húi-bia̍t in, in m̄-khéng siū kàu-tok; in hō͘ in ê bīn pí chio̍h khah-tēng, m̄-khéng hôe-thâu.

4我就講，chiah-ê人實在是sòng-hiong，是愚戇，因為m̄-bat耶和華ê路，kap in ê上帝ê法度；Góa chiū kóng, Chiah ê lâng si̍t-chāi sī sòng-hiong, sī gû-gōng, in-ūi m̄-bat Iâ-hô-hoa ê lō͘, kap in ê Siōng-tè ê hoat-tō͘;

5我beh去見in ê世家，kap in講話；因為in bat耶和華ê路，kap in ê上帝ê法度。但是in同心at折擔，phah斷縛伊ê索。góa beh khì kìⁿ in ê sè-ka, kap in kóng-ōe; in-ūi in bat Iâ-hô-hoa ê lō͘, kap in ê Siōng-tè ê hoat-tō͘. Nā-sī in tâng-sim at-chi̍h taⁿ, phah-tn̄g pa̍k i ê soh.

6所以樹林ê獅beh出來咬死in；ê-hng時ê豺狼beh吞食in，豹beh tī chiah-ê城外當等in，見若出城ê的確hō͘ in拆碎，因為in ê罪過真chōe，悖逆ná傷重。Só͘-í chhiū-nâ ê sai beh chhut-lâi kā-sí in; ê-hng-sî ê chhâi-lông beh thun-chia̍h in, pà beh tī chiah ê siâⁿ-gōa tng-tán in, kìⁿ-nā chhut-siâⁿ-ê tek-khak hō͘ in thiah-chhùi, in-ūi in ê chōe-kòa chin-chōe, pōe-ge̍k ná siong-tiōng.

7這我thái會赦免你ah？你ê kiáⁿ兒離開我，koh kí chiah-ê m̄是上帝ê來chiù-chōa；我hō͘ in飽足，in就行姦淫，kui陣聚集tī娼妓ê厝。Che Góa thái ōe sià-bián lí ah? lí ê kiáⁿ-jî lī-khui Góa, koh kí chiah ê m̄-sī Siōng-tè--ê lâi chiù-chōa; Góa hō͘ in pá-chiok, in chiū kiâⁿ kan-îm, kui-tīn chū-chi̍p tī chhiong-ki ê chhù.

8In親像飼飽ê馬四界跑；ta̍k-ê ǹg伊厝邊ê bó͘親像馬ki-ki哮。In chhin-chhiūⁿ chhī-pá ê bé sì-kòe pháu; ta̍k-ê ǹg i chhù-piⁿ ê bó͘ chhin-chhiūⁿ bé ki-ki-háu.

9耶和華講，我kiám無因為chiah-ê事來辦in mah？我ê心kiám無beh對chit號ê國民來報仇mah？Iâ-hô-hoa kóng, Góa kiám bô in-ūi chiah ê sū lâi pān in mah? Góa ê sim kiám bô beh tùi chit hō ê kok-bîn lâi pò-siû mah?

10Lín tio̍h 上伊ê葡萄園ê牆來毀壞伊，總是m̄-thang毀到了；tio̍h除去伊ê枝，因為in無屬tī耶和華。Lín tio̍h chiūⁿ i ê phû-tô-hn̂g ê chhiûⁿ lâi húi-hoāi i, chóng-sī m̄-thang húi kàu-liáu; tio̍h tû--khì i ê ki, in-ūi in bô sio̍k tī Iâ-hô-hoa.

11因為以色列家kap猶大家大大行詭詐，攻擊我；這是耶和華講ê。In-ūi Í-sek-lia̍t ke kap Iû-tāi ke tōa-tōa kiâⁿ khúi-chà, kong-kek Góa; che sī Iâ-hô-hoa kóng ê.

12In m̄認耶和華，就講，這並m̄是伊；災厄無beh臨到阮；刀劍kap飢荒阮也bōe會tú-tio̍h。In m̄-jīn Iâ-hô-hoa, chiū kóng, Che pēng m̄-sī I; chai-ē bô beh lîm-kàu goán; to-kiàm kap ki-hng goán iā bōe-ōe tú-tio̍h.

13先知ê話beh成做風，主ê話無tī in ê心；beh照án-ni hō͘ in tú-tio̍h。Sian-ti ê ōe beh chiâⁿ-chòe hong, Chú ê ōe bô tī in ê sim; beh chiàu án-ni hō͘ in tú-tio̍h.

14所以萬軍ê上帝耶和華講，因為lín講chit-ê話；看ah，我beh hō͘我ê話tī你ê嘴做火，hō͘ chit-ê百姓做柴，chit-ê火beh燒滅in。Só͘-í bān-kun ê Siōng-tè Iâ-hô-hoa kóng, In-ūi lín kóng chit ê ōe; khòaⁿ ah, Góa beh hō͘ Góa ê ōe tī lí ê chhùi chòe hé, hō͘ chit ê peh-sìⁿ chòe chhâ, chit ê hé beh sio-bia̍t in.

15耶和華講，以色列ê家ah，你看，我beh hō͘一國tùi遠遠來攻擊lín，就是強ê國，tùi古早就有ê國，伊ê言語你bōe曉得，也bōe明白伊所講ê。Iâ-hô-hoa kóng, Í-sek-lia̍t ê ke ah, lí khòaⁿ, Góa beh hō͘ chi̍t-kok tùi hn̄g-hn̄g lâi kong-kek lín, chiū-sī kiông ê kok, tùi kó͘-chá chiū ū ê kok, i ê giân-gú lí bōe hiáu-tit, iā bōe bêng-pe̍k i só͘ kóng--ê.

16In ê箭袋是開開ê墓；in lóng是勇士。In ê chìⁿ-tē sī khui-khui ê bōng; in lóng sī ióng-sū.

17In beh食了你ê五穀kap你ê米糧，就是你ê kiáⁿ cha-bó͘-kiáⁿ所tio̍h食ê；也beh食了你ê羊群，牛群；食了你ê葡萄kap無花果；koh beh用刀毀壞你所óa靠堅固ê城。In beh chia̍h-liáu lí ê gō͘-kak kap lí ê bí-niû, chiū-sī lí ê kiáⁿ cha-bó͘-kiáⁿ só͘ tio̍h chia̍h ê; iā beh chia̍h-liáu lí ê iûⁿ-kûn, gû-kûn; chia̍h-liáu lí ê phû-tô kap bû-hoa-kó; koh beh ēng to húi-hoāi lí só͘ óa-khò kian-kò͘ ê siâⁿ.

18耶和華講，就若到hit時我也無beh一盡剿滅lín。Iâ-hô-hoa kóng, Chiū-nā kàu hit-sî Góa iā bô beh it-chīn châu-bia̍t lín.

19Hit時lín若講，耶和華阮ê上帝為tio̍h啥事對阮行這一切ê事ah？你tio̍h應伊講，親像lín已經放sak我，服事別號ê上帝 tī lín ê地方，án-ni lín也beh服事外邦人tī無屬lín ê地方。Hit-sî lín nā kóng, Iâ-hô-hoa goán ê Siōng-tè ūi-tio̍h siáⁿ-sū tùi goán kiâⁿ che it-chhè ê sū ah? lí tio̍h ìn i kóng, Chhin-chhiūⁿ lín í-keng pàng-sak Góa, ho̍k-sāi pa̍t-hō ê siōng-tè tī lín ê tōe-hng, án-ni lín iā beh ho̍k-sāi gōa-pang lâng tī bô sio̍k lín ê tōe-hng.

20Lín tio̍h傳tī雅各家，報tī猶大講，Lín tio̍h thoân tī Ngá-kok ke, pò tī Iû-tāi kóng,

21戇戇無知ê百姓ah，lín有目睭bōe看，有耳孔bōe聽，taⁿ tio̍h聽chit-ê話；Gōng-gōng bû-ti ê peh-sìⁿ ah, lín ū ba̍k-chiu bōe khòaⁿ, ū hī-khang bōe thiaⁿ, taⁿ tio̍h thiaⁿ chit ê ōe;

22耶和華講，Lín m̄驚我mah？無ngia̍uh-ngia̍uh-chhoah tī我ê面前mah？我設永遠ê例，用沙做海ê界限，伊bōe pôaⁿ過；伊ê湧雖然giâ高，也bōe能贏；雖然hōa-hōa哮，也bōe能pôaⁿ過。Iâ-hô-hoa kóng, Lín m̄ kiaⁿ Góa mah? bô ngia̍uh-ngia̍uh-chhoah tī Góa ê bīn-chêng mah? Góa siat éng-oán ê lē, ēng soa chòe hái ê kài-hān, i bōe pôaⁿ-kè; i ê éng sui-jiân giâ koâiⁿ, iā bōe-ōe iâⁿ; sui-jiân hōa-hōa-háu, iā bōe-ōe pôaⁿ-kè.

23獨獨chit-ê百姓有反叛悖逆ê心；in悖逆我做in去。To̍k-to̍k chit ê peh-sìⁿ ū hoán-poān pōe-ge̍k ê sim; in pōe-ge̍k Góa chòe in khì.

24In心內也無講，Taⁿ咱tio̍h敬畏耶和華咱ê上帝，伊照時賞賜雨水，就是前ê雨；後ê雨；伊也有定chiah-ê收成ê時期，留teh hō͘咱。In sim-lāi iā bô kóng, Taⁿ lán tio̍h kèng-ùi Iâ-hô-hoa lán ê Siōng-tè, I chiàu-sî siúⁿ-sù hō͘-chúi, chiū-sī chêng ê hō͘; āu ê hō͘; I iā ū tēng chiah ê siu-sêng ê sî-kî, lâu-teh hō͘ lán.

25Lín ê罪孽hō͘ chiah-ê事反tńg離開lín；lín ê罪惡hō͘ lín bōe能得tio̍h福氣。Lín ê chōe-gia̍t hō͘ chiah ê sū hoán-tńg lī-khui lín; lín ê chōe-ok hō͘ lín bōe-ōe tit-tio̍h hok-khì.

26因為tī我ê百姓中有chhē-tio̍h pháiⁿ人；in bih-teh，親像設活tauh ê人teh當等；in張羅網來掠人。In-ūi tī Góa ê peh-sìⁿ-tiong ū chhē-tio̍h pháiⁿ-lâng; in bih--teh, chhin-chhiūⁿ siat oa̍h-tauh ê lâng teh tng-tán; in tiuⁿ lô-bāng lâi lia̍h lâng.

27In ê厝有詭詐滿滿，是親像鳥人內有鳥滿滿；所以in成做大koh好額。In ê chhù ū khúi-chà móa-móa, sī chhin-chhiūⁿ chiáu-lâng-lāi ū chiáu móa-móa; só͘-í in chiâⁿ-chòe tōa koh hó-gia̍h.

28In肥koh光生，做pháiⁿ過頭；無為tio̍h人申冤，就是無為tio̍h無父ê kiáⁿ申冤，hō͘伊興通；亦無因為sòng-hiong人判斷。In pûi koh kng-siⁿ, chòe pháiⁿ kè-thâu; bô ūi-tio̍h lâng sin-oan, chiū-sī bô ūi-tio̍h bô-pē ê kiáⁿ sin-oan, hō͘ i heng-thong; ia̍h bô in-ūi sòng-hiong lâng phòaⁿ-toàn.

29耶和華講，我kiám無因為chiah-ê事來辦in mah？我ê心kiám無beh對chit號ê國民來報仇mah？Iâ-hô-hoa kóng, Góa kiám bô in-ūi chiah ê sū lâi pān in mah? Góa ê sim kiám bô beh tùi chit-hō ê kok-bîn lâi pò-siû mah?

30Chit-ê土地有奇異可惡ê事；Chit ê thó͘-tōe ū kî-īⁿ khó-ò͘ⁿ ê sū;

31先知傳虛假，祭司óa靠in來霸權；我ê百姓亦ài伊án-ni；到結局，lín beh怎樣做？sian-ti thoân hu-ké, chè-si óa-khò in lâi pà-koân; Góa ê peh-sìⁿ ia̍h ài i án-ni; kàu kiat-kio̍k, lín beh cháiⁿ-iūⁿ chòe?