1耶路撒冷人，kap猶大人，受掠去巴比倫；其中耶利米亦hō͘侍衛長掠去，用鐵鏈縛伊；後來tùi La̍h-má放伊去；然後耶和華ê話臨到耶利米。Iâ-lō͘-sat-léng lâng, kap Iû-tāi lâng, siū-lia̍h khì Pa-pí-lûn; kî-tiong Iâ-lī-bí ia̍h hō͘ Sī-ōe-tiúⁿ lia̍h--khì, ēng thih-liān pa̍k--i; āu-lâi tùi La̍h-má pàng i khì; jiân-āu Iâ-hô-hoa ê ōe lîm-kàu Iâ-lī-bí.

2侍衛長叫耶利米來，kā伊講，耶和華你ê上帝bat講，beh降chit-ê災厄hō͘ chit-ê所在。Sī-ōe-tiúⁿ kiò Iâ-lī-bí lâi, kā i kóng, Iâ-hô-hoa lí ê Siōng-tè bat kóng, beh kàng chit ê chai-ē hō͘ chit ê só͘-chāi.

3Taⁿ耶和華hō͘伊到，照伊所講ê來行。因為lín得罪耶和華，無聽thàn伊ê話，所以chit-ê tāi-chì到tī lín。Taⁿ Iâ-hô-hoa hō͘ i kàu, chiàu I só͘ kóng--ê lâi kiâⁿ. In-ūi lín tek-chōe Iâ-hô-hoa, bô thiaⁿ-thàn I ê ōe, só͘-í chit ê tāi-chì kàu tī lín.

4看ah，我今á日tháu開你手裡ê鐵鏈；你若看kap我去巴比倫是好，就thang來去，我beh好款待你；你若看kap我去巴比倫m̄好，就莫-用去。看ah，全地tī你ê面前，你看toh-lo̍h是好，是合宜，做你thang去。Khòaⁿ ah, góa kin-á-ji̍t tháu-khui lí chhiú--nih ê thih-liān; lí nā khòaⁿ kap góa khì Pa-pí-lûn sī hó, chiū thang lâi khì, góa beh hó khoán-thāi lí; lí nā khòaⁿ kap góa khì Pa-pí-lûn m̄-hó, chiū bo̍h-ēng khì. Khòaⁿ ah, choân-tōe tī lí ê bīn-chêng, lí khòaⁿ toh-lo̍h sī hó, sī ha̍p-gî, chòe lí thang khì.

5伊iáu未tò去，侍衛長koh kā伊講，你thang tò去Sa-hoan ê孫，A-hi-kam ê kiáⁿ，Ki-tāi-lī hia；現今巴比倫王設立伊管轄猶大chiah-ê城；你thang kap伊khiā起tī百姓中，á是你所看做合宜ê所在，就thang去。Tùi án-ni，侍衛長送伊米糧kap禮物，hō͘伊去。I iáu-bē tò-khì, Sī-ōe-tiúⁿ koh kā i kóng, Lí thang tò--khì Sa-hoan ê sun, A-hi-kam ê kiáⁿ, Ki-tāi-lī hia; hiān-kim Pa-pí-lûn ông siat-li̍p i koán-hat Iû-tāi chiah ê siâⁿ; lí thang kap i khiā-khí tī peh-sìⁿ-tiong, á-sī lí só͘ khòaⁿ-chòe ha̍p-gî ê só͘-chāi, chiū thang khì. Tùi án-ni, Sī-ōe-tiúⁿ sàng i bí-niû kap lé-mi̍h, hō͘ i khì.

6耶利米就到Bí-su-pa，見A-hi-kam ê kiáⁿ Ki-tāi-lī；kap伊khiā起tī境內chhun ê百姓ê中間。Iâ-lī-bí chiū kàu Bí-su-pa, kìⁿ A-hi-kam ê kiáⁿ Ki-tāi-lī; kap i khiā-khí tī kéng-lāi chhun ê peh-sìⁿ ê tiong-kan.

7Tī田野一切ê軍長，kap屬in ê人，聽見巴比倫王設立A-hi-kam ê kiáⁿ Ki-tāi-lī管轄chit所在；亦將無掠去巴比倫ê ta-po͘人、婦人人、gín-á，kap境內極sòng-hiong ê人，lóng總交伊；Tī chhân-iá it-chhè ê kun-tiúⁿ, kap sio̍k in ê lâng, thiaⁿ-kìⁿ Pa-pí-lûn ông siat-li̍p A-hi-kam ê kiáⁿ Ki-tāi-lī koán-hat chit só͘-chāi; ia̍h chiong bô lia̍h-khì Pa-pí-lûn ê ta-po͘-lâng, hū-jîn-lâng, gín-á, kap kéng-lāi ke̍k sòng-hiong ê lâng, lóng-chóng kau i;

8in就來Bí-su-pa Ki-tāi-lī hia；就是Nî-thàm-ngá ê kiáⁿ以實瑪利，Ka-lī-a兩個kiáⁿ Iok-hap-lân kap約拿單，Tan-hō͘-bia̍t ê kiáⁿ Se-lâi-ngá，kap Nî-tô-hoat人Í-húi ê眾kiáⁿ，Má-ka人ê kiáⁿ Iâ-sat-nî-a，kap屬in ê人。in chiū lâi Bí-su-pa Ki-tāi-lī hia; chiū-sī Nî-thàm-ngá ê kiáⁿ Í-si̍t-má-lī, Ka-lī-a nn̄g ê kiáⁿ Iok-hap-lân kap Iok-ná-tan, Tan-hō͘-bia̍t ê kiáⁿ Se-lâi-ngá, kap Nî-tô-hoat lâng Í-húi ê chèng-kiáⁿ, Má-ka lâng ê kiáⁿ Iâ-sat-nî-a, kap sio̍k in ê lâng.

9Sa-hoan ê孫，A-hi-kam ê kiáⁿ，Ki-tāi-lī tùi in kap屬in ê人chiù-chōa，講，莫得驚服事Ka-le̍k-tí人；做lín khiā起chia，服事巴比倫王，lín就會得tio̍h福氣。Sa-hoan ê sun, A-hi-kam ê kiáⁿ, Ki-tāi-lī tùi in kap sio̍k in ê lâng chiù-chōa, kóng, Bo̍h-tit kiaⁿ ho̍k-sāi Ka-le̍k-tí lâng; chòe lín khiā-khí chia, ho̍k-sāi Pa-pí-lûn ông, lín chiū ōe tit-tio̍h hok-khì.

10論到我，我beh tiàm tī Bí-su-pa，伺候hiah-ê能來咱chia ê Ka-le̍k-tí人；但是lín chiah-ê，lín tio̍h積聚酒，夏天ê果子，kap油，收tī器具內，khiā起tī lín所佔 ê城。Lūn-kàu góa, góa beh tiàm tī Bí-su-pa, su-hāu hiah ê ōe lâi lán chia ê Ka-le̍k-tí lâng; nā-sī lín chiah-ê, lín tio̍h chek-chū chiú, hē-thiⁿ ê ké-chí, kap iû, siu tī khì-kū lāi, khiā-khí tī lín só͘ chiàm ê siâⁿ.

11Koh有tī Mô͘-ap，kap A-bûn族ê中間，tī Í-tong，kap列國中間一切ê猶大人，聽見巴比倫王有留所chhun ê猶大人，koh設立Sa-hoan ê孫，A-hi-kam ê kiáⁿ，Ki-tāi-lī管轄in；Koh ū tī Mô͘-ap, kap A-bûn cho̍k ê tiong-kan, tī Í-tong, kap lia̍t-kok tiong-kan it-chhè ê Iû-tāi lâng, thiaⁿ-kìⁿ Pa-pí-lûn ông ū lâu só͘ chhun ê Iû-tāi lâng, koh siat-li̍p Sa-hoan ê sun, A-hi-kam ê kiáⁿ, Ki-tāi-lī koán-hat in;

12Chiah-ê一切ê猶大人tùi in hō͘人趕去ê ta̍k所在tò來，到猶大地ê Bí-su-pa、Ki-tāi-lī hia，續積聚chōe-chōe酒kap夏天ê果子。chiah ê it-chhè ê Iû-tāi lâng tùi in hō͘ lâng kóaⁿ-khì ê ta̍k só͘-chāi tò--lâi, kàu Iû-tāi tōe ê Bí-su-pa, Ki-tāi-lī hia, sòa chek-chū chōe-chōe chiú kap hē-thiⁿ ê ké-chí.

13Ka-lī-a ê kiáⁿ，Iok-hap-lân，kap tī田野一切ê軍長來Bí-su-pa見Ki-tāi-lī，對伊講，Ka-lī-a ê kiáⁿ, Iok-hap-lân, kap tī chhân-iá it-chhè ê kun-tiúⁿ lâi Bí-su-pa kìⁿ Ki-tāi-lī, tùi i kóng,

14A-bûn族ê王，Pa-lī-su，有差Nî-thàm-ngá ê kiáⁿ以實瑪利來beh取你ê性命，你知mah？總是A-hi-kam ê kiáⁿ Ki-tāi-lī m̄信in。A-bûn-cho̍k ê ông, Pa-lī-su, ū chhe Nî-thàm-ngá ê kiáⁿ Í-si̍t-má-lī lâi beh chhú lí ê sìⁿ-miā, lí chai mah? chóng-sī A-hi-kam ê kiáⁿ Ki-tāi-lī m̄-sìn in.

15Ka-lī-a ê kiáⁿ，Iok-hap-lân tī Bí-su-pa暗靜對Ki-tāi-lī講，求你准我去，我beh thâi Nî-thàm-ngá ê kiáⁿ以實瑪利，的確無人知；kiám thang hō͘伊取你ê性命，致到歸óa你ê猶大人四散，hō͘猶大所chhun ê人lóng滅無ah？Ka-lī-a ê kiáⁿ, Iok-hap-lân tī Bí-su-pa àm-chīⁿ tùi Ki-tāi-lī kóng, Kiû lí chún góa khì, góa beh thâi Nî-thàm-ngá ê kiáⁿ Í-si̍t-má-lī, tek-khak bô lâng chai; kiám thang hō͘ i chhú lí ê sìⁿ-miā, tì-kàu kui-óa lí ê Iû-tāi lâng sì-sòaⁿ, hō͘ Iû-tāi só͘-chhun ê lâng lóng bia̍t-bô ah?

16A-hi-kam ê kiáⁿ Ki-tāi-lī kā Ka-lí-a ê kiáⁿ Iok-hap-lân講，你m̄-thang做chit-ê事；你所講以實瑪利ê事是無影。A-hi-kam ê kiáⁿ Ki-tāi-lī kā Ka-lí-a ê kiáⁿ Iok-hap-lân kóng, Lí m̄-thang chòe chit ê sū; lí só͘ kóng Í-si̍t-má-lī ê sū sī bô-iáⁿ.

1七月間，Í-lī-sa-má ê孫，Nî-thàm-ngá ê kiáⁿ，以實瑪利，伊是王親，亦是王ê大臣，chhōa十人來Bí-su-pa，見A-hi-kam ê kiáⁿ Ki-tāi-lī；in tī Bí-su-pa相kap食。Chhit-ge̍h-kan, Í-lī-sa-má ê sun, Nî-thàm-ngá ê kiáⁿ, Í-si̍t-má-lī, i sī ông-chhin, ia̍h sī ông ê tāi-sîn, chhōa cha̍p-lâng lâi Bí-su-pa, kìⁿ A-hi-kam ê kiáⁿ Ki-tāi-lī; in tī Bí-su-pa saⁿ-kap chia̍h.

2Nî-thàm-ngá ê kiáⁿ以實瑪利，以及kap伊來ê hit十人，起來，用刀thâi死Sa-hoan ê孫，A-hi-kam ê kiáⁿ，Ki-tāi-lī，就是巴比倫王所立來管轄chit-ê地ê。Nî-thàm-ngá ê kiáⁿ Í-si̍t-má-lī, í-ki̍p kap i lâi ê hit cha̍p-lâng, khí-lâi, ēng to thâi-sí Sa-hoan ê sun, A-hi-kam ê kiáⁿ, Ki-tāi-lī, chiū-sī Pa-pí-lûn-ông só͘ li̍p lâi koán-hat chit ê tōe--ê.

3以實瑪利koh thâi死tī Bí-su-pa歸óa Ki-tāi-lī lóng總ê猶大人；以及tī-hia所tú-tio̍h Ka-le̍k-tí ê軍兵。Í-si̍t-má-lī koh thâi-sí tī Bí-su-pa kui-óa Ki-tāi-lī lóng-chóng ê Iû-tāi lâng; í-ki̍p tī-hia só͘ tú-tio̍h Ka-le̍k-tí ê kun-peng.

4伊thâi死Ki-tāi-lī了後，第二日iáu無人知；I thâi-sí Ki-tāi-lī liáu-āu, tē-jī-ji̍t iáu bô lâng chai;

5Hit-tia̍p有八十人tùi示劍，tùi Sī-lô，tùi撒馬利亞來；剃嘴鬚，拆裂衫，家己割身軀，手the̍h禮物kap乳香，beh帶伊到耶和華ê厝。hit-tia̍p ū poeh-cha̍p lâng tùi Sī-kiàm, tùi Sī-lô, tùi Sat-má-lī-a lâi; thì chhùi-chhiu, thiah-li̍h saⁿ, ka-kī koah sin-khu, chhiú the̍h lé-mi̍h kap jú-hiuⁿ, beh tòa i kàu Iâ-hô-hoa ê chhù.

6Nî-thàm-ngá ê kiáⁿ，以實瑪利，tùi Bí-su-pa出來迎接in；ná行ná哭；到tú-tio̍h in，就kā in講，Lín來去見A-hi-kam ê kiáⁿ Ki-tāi-lī。Nî-thàm-ngá ê kiáⁿ, Í-si̍t-má-lī, tùi Bí-su-pa chhut-lâi ngiâ-chih in; ná-kiâⁿ ná-khàu; kàu tú-tio̍h in, chiū kā in kóng, Lín lâi khì kìⁿ A-hi-kam ê kiáⁿ Ki-tāi-lī.

7In到城中，Nî-thàm-ngá ê kiáⁿ以實瑪利，kap tè伊ê人，就thâi死in，hiat in tī乾井。In kàu siâⁿ-tiong, Nî-thàm-ngá ê kiáⁿ Í-si̍t-má-lī, kap tè i ê lâng, chiū thâi-sí in, hiat in tī ta-chíⁿ.

8In中間有十人對以實瑪利講，莫得thâi死阮；因為阮有chōe-chōe小麥、大麥、油、蜜，khǹg tī田裡；伊就停手，無thâi in tī in ê兄弟中。In tiong-kan ū cha̍p-lâng tùi Í-si̍t-má-lī kóng, Bo̍h-tit thâi-sí goán; in-ūi goán ū chōe-chōe sió-be̍h, tōa-be̍h, iû, bi̍t, khǹg tī chhân--nih; i chiū thêng-chhiú, bô thâi in tī in ê hiaⁿ-tī-tiong.

9以實瑪利thâi chiah-ê人，óa近Ki-tāi-lī hia，將in ê身屍hiat tī井裡；chit-ê井是從前A-sat王因為驚以色列王Pa-sa ê緣故所開ê；Nî-thàm-ngá ê kiáⁿ以實瑪利將所thâi ê身屍thūn滿伊。Í-si̍t-má-lī thâi chiah ê lâng, óa-kūn Ki-tāi-lī hia, chiong in ê sin-si hiat tī chíⁿ--nih; chit ê chíⁿ sī chiông-chêng A-sat ông in-ūi kiaⁿ Í-sek-lia̍t ông Pa-sa ê iân-kò͘ só͘ khui--ê; Nî-thàm-ngá ê kiáⁿ Í-si̍t-má-lī chiong só͘ thâi ê sin-si thūn-móa--i.

10以實瑪利掠Bí-su-pa所chhun ê百姓，就是王ê眾cha-bó͘-kiáⁿ，以及iáu tòa tī Bí-su-pa ê百姓，就是侍衛長Nî-pò͘-sat-la̍h-tàn所交代A-hi-kam ê kiáⁿ Ki-tāi-lī-ê。Nî-thàm-ngá ê kiáⁿ以實瑪利掠伊去，beh過去A-bûn族hia。Í-si̍t-má-lī lia̍h Bí-su-pa só͘ chhun ê peh-sìⁿ, chiū-sī ông ê chèng cha-bó͘-kiáⁿ, í-ki̍p iáu tòa tī Bí-su-pa ê peh-sìⁿ, chiū-sī sī-ōe-tiúⁿ Nî-pò͘-sat-la̍h-tàn só͘ kau-tài A-hi-kam ê kiáⁿ Ki-tāi-lī--ê. Nî-thàm-ngá ê kiáⁿ Í-si̍t-má-lī lia̍h i khì, beh kè--khì A-bûn cho̍k hia.

11Ka-lī-a ê kiáⁿ Iok-hap-lân，以及kap伊tī-teh ê眾軍長，聽見Nî-thàm-ngá ê kiáⁿ以實瑪利所行一切ê pháiⁿ，Ka-lī-a ê kiáⁿ Iok-hap-lân, í-ki̍p kap i tī-teh ê chèng kun-tiúⁿ, thiaⁿ-kìⁿ Nî-thàm-ngá ê kiáⁿ Í-si̍t-má-lī só͘ kiâⁿ it-chhè ê pháiⁿ,

12就chhōa眾人進前去，beh kap Nî-thàm-ngá ê kiáⁿ以實瑪利交戰；tī Ki-piàn ê大水邊chhē-tio̍h-ê。chiū chhōa chèng-lâng chìn-chêng khì, beh kap Nî-thàm-ngá ê kiáⁿ Í-si̍t-má-lī kau-chiàn; tī Ki-piàn ê tōa-chúi-piⁿ chhē--tio̍h-ê.

13以實瑪利所帶去hiah-ê百姓看去Ka-lī-a ê kiáⁿ Iok-hap-lân，以及kap伊來ê眾軍長，就lóng歡喜。Í-si̍t-má-lī só͘ tòa--khì hiah ê peh-sìⁿ khòaⁿ-khì Ka-lī-a ê kiáⁿ Iok-hap-lân, í-ki̍p kap i lâi ê chèng kun-tiúⁿ, chiū lóng hoaⁿ-hí.

14Tùi án-ni， 以實瑪利tùi Bí-su-pa所掠去ê眾百姓lóng oa̍t-tńg來歸Ka-lī-a ê kiáⁿ Iok-hap-lân。Tùi án-ni Í-si̍t-má-lī tùi Bí-su-pa só͘ lia̍h-khì ê chèng-peh-sìⁿ lóng oa̍t-tńg lâi kui Ka-lī-a ê kiáⁿ Iok-hap-lân.

15Nî-thàm-ngá ê kiáⁿ以實瑪利，kap八個人脫離Iok-hap-lân ê手，走去A-bûn族hia。Nî-thàm-ngá ê kiáⁿ Í-si̍t-má-lī, kap poeh ê lâng thoat-lī Iok-hap-lân ê chhiú, cháu-khì A-bûn cho̍k hia.

16後來Ka-lī-a ê kiáⁿ Iok-hap-lân，kap tè伊ê眾軍長，將所chhun ê百姓，就是Nî-thàm-ngá ê kiáⁿ以實瑪利phah死A-hi-kam ê kiáⁿ Ki-tāi-lī以後，tùi Bí-su-pa所帶去ê ta-po͘人、勇士、婦女、gín-á、太監，koh是伊tùi Ki-piàn帶來ê。Āu-lâi Ka-lī-a ê kiáⁿ Iok-hap-lân, kap tè--i ê chèng kun-tiúⁿ, chiong só͘ chhun ê peh-sìⁿ, chiū-sī Nî-thàm-ngá ê kiáⁿ Í-si̍t-má-lī phah-sí A-hi-kam ê kiáⁿ Ki-tāi-lī í-āu, tùi Bí-su-pa só͘ tòa--khì ê ta-po͘-lâng, ióng-sū, hū-lú, gín-á, thài-kàm, koh sī i tùi Ki-piàn tòa--lâi-ê.

17In就起身到伯利恆邊á Kim-hán ê客店停歇，想beh去埃及。In chiū khí-sin kàu Pek-lī-hêng piⁿ-á Kim-hán ê kheh-tiàm thêng-hioh, siūⁿ beh khì Ai-ki̍p.

18這是因為Ka-le̍k-tí人ê緣故；因為Nî-thàm-ngá ê kiáⁿ以實瑪利有thâi死A-hi-kam ê kiáⁿ Ki-tāi-lī，就是巴比倫王所立來管轄chit-ê土地ê，所以in驚。Che sī in-ūi Ka-le̍k-tí lâng ê iân-kò͘; in-ūi Nî-thàm-ngá ê kiáⁿ Í-si̍t-má-lī ū thâi-sí A-hi-kam ê kiáⁿ Ki-tāi-lī, chiū-sī Pa-pí-lûn ông só͘ li̍p lâi koán-hat chit ê thó͘-tōe--ê, só͘-í in kiaⁿ.

1眾軍長kap Ka-lī-a ê kiáⁿ Iok-hap-lân，kap Hô-sa-ngá ê kiáⁿ Iâ-sat-nî-a，以及眾百姓，tùi細到大，lóng進前來。Chèng kun-tiúⁿ kap Ka-lī-a ê kiáⁿ Iok-hap-lân, kap Hô-sa-ngá ê kiáⁿ Iâ-sat-nî-a, í-ki̍p chèng peh-sìⁿ, tùi sòe kàu tōa, lóng chìn-chêng lâi.

2對先知耶利米講，求你准阮tī你ê面前所求，替阮chiah-ê chhun ê人祈禱耶和華你ê上帝；阮本然真chōe，taⁿ所chhun-ê真少，這是你親目看見ê。Tùi sian-ti Iâ-lī-bí kóng, Kiû lí chún goán tī lí ê bīn-chêng só͘ kiû, thòe goán chiah ê chhun ê lâng kî-tó Iâ-hô-hoa lí ê Siōng-tè; goán pún-jiân chin-chōe, taⁿ só͘-chhun-ê chin-chió, che sī lí chhin-ba̍k khòaⁿ-kìⁿ--ê.

3願耶和華你ê上帝指示阮所tio̍h行ê路，所tio̍h做ê事。Goān Iâ-hô-hoa lí ê Siōng-tè chí-sī goán só͘ tio̍h kiâⁿ ê lō͘, só͘ tio̍h chòe ê sū.

4先知耶利米kā in講，我已經聽見；好，我beh照lín ê話，祈禱耶和華lín ê上帝；無論耶和華ìn lín甚麼，我的確lóng beh kā lín講，無對lín khǹg密一句。Sian-ti Iâ-lī-bí kā in kóng, Góa í-keng thiaⁿ-kìⁿ; hó, góa beh chiàu lín ê ōe, kî-tó Iâ-hô-hoa lín ê Siōng-tè; bô-lūn Iâ-hô-hoa ìn lín sím-mi̍h, góa tek-khak lóng beh kā lín kóng, bô tùi lín khǹg-ba̍t chi̍t-kù.

5Tùi án-ni， in kā耶利米講，阮若無照耶和華你ê上帝差你來講一切ê話去行，就願耶和華tī你阮ê中間做真實忠信ê干證。Tùi án-ni in kā Iâ-lī-bí kóng, Goán nā bô chiàu Iâ-hô-hoa lí ê Siōng-tè chhe lí lâi kóng it-chhè ê ōe khì kiâⁿ, chiū goān Iâ-hô-hoa tī lí goán ê tiong-kan chòe chin-si̍t tiong-sìn ê kan-chèng.

6阮chit時請你到耶和華阮ê上帝ê面前；祂所講ê，無論是好是pháiⁿ，阮lóng beh聽thàn祂ê話；阮聽thàn耶和華阮ê上帝ê話，就thang得tio̍h興通。Goán chit-sî chhiáⁿ lí kàu Iâ-hô-hoa goán ê Siōng-tè ê bīn-chêng; I só͘ kóng--ê, bô lūn sī hó sī pháiⁿ, goán lóng beh thiaⁿ-thàn I ê ōe; goán thiaⁿ-thàn Iâ-hô-hoa goán ê Siōng-tè ê ōe, chiū thang tit-tio̍h heng-thong.

7過十日，有耶和華ê話臨到耶利米。Kè cha̍p-ji̍t, ū Iâ-hô-hoa ê ōe lîm-kàu Iâ-lī-bí.

8伊就將Ka-lī-a ê kiáⁿ Iok-hap-lân，以及kap伊相kap tī-teh ê眾軍長，kap眾百姓，tùi細到大，lóng叫in來；I chiū chiong Ka-lī-a ê kiáⁿ Iok-hap-lân, í-ki̍p kap i saⁿ-kap tī-teh ê chèng kun-tiúⁿ, kap chèng peh-sìⁿ, tùi sòe kàu tōa, lóng kiò in lâi;

9對in講，耶和華以色列ê上帝，就是lín差我到伊ê面前來獻lín所求ê，伊án-ni講，tùi in kóng, Iâ-hô-hoa Í-sek-lia̍t ê Siōng-tè, chiū-sī lín chhe góa kàu I ê bīn-chêng lâi hiàn lín só͘ kiû--ê, I án-ni kóng,

10Lín若猶原beh tiàm tī chit所在，我就beh建造lín，無毀壞lín；beh栽培lín，無拔出lín；因為我有退悔我所降雨lín ê災厄。Lín nā iû-goân beh tiàm tī chit só͘-chāi, Góa chiū beh kiàn-chō lín, bô húi-hoāi lín; beh chai-pôe lín, bô pu̍ih-chhut lín; in-ūi Góa ū thè-hóe Góa só͘ kàng hō͘ lín ê chai-ē.

11莫得驚lín所驚ê巴比倫王；耶和華講，莫得驚伊；因為我kap lín tī-teh，beh拯救lín，hō͘ lín脫離伊ê手。Bo̍h-tit kiaⁿ lín só͘ kiaⁿ ê Pa-pí-lûn ông; Iâ-hô-hoa kóng, Bo̍h-tit kiaⁿ--i; in-ūi Góa kap lín tī-teh, beh chín-kiù lín, hō͘ lín thoat-lī i ê chhiú.

12我beh憐憫lín，hō͘ in亦憐憫lín；hō͘ lín tò來本所在。Góa beh lîn-bín lín, hō͘ in ia̍h lîn-bín lín; hō͘ lín tò-lâi pún só͘-chāi.

13設使lín講，阮m̄ tiàm chit所在，án-ni就是lín m̄聽thàn耶和華lín ê上帝ê話。Siat-sú lín kóng, Goán m̄ tiàm chit só͘-chāi, án-ni chiū-sī lín m̄ thiaⁿ-thàn Iâ-hô-hoa lín ê Siōng-tè ê ōe.

14若講，M̄-ah，阮beh入去埃及地；tī-hia無看見交戰，無聽見哨角ê聲，亦不致無thang食來iau餓；阮beh tòa hia khiā起。Nā kóng, M̄--ah, goán beh ji̍p--khì Ai-ki̍p tōe; tī-hia bô khòaⁿ-kìⁿ kau-chiàn, bô thiaⁿ-kìⁿ sàu-kak ê siaⁿ, ia̍h put-tì bô thang chia̍h lâi iau-gō; goán beh tòa hia khiā-khí.

15Taⁿ lín猶大所chhun ê百姓ah，tio̍h聽耶和華ê話；萬軍ê耶和華以色列ê上帝án-ni講，Lín若竟然硬鼻beh去埃及，tòa hia寄腳，Taⁿ lín Iû-tāi só͘ chhun ê peh-sìⁿ ah, tio̍h thiaⁿ Iâ-hô-hoa ê ōe; bān-kun ê Iâ-hô-hoa Í-sek-lia̍t ê Siōng-tè án-ni kóng, Lín nā kèng-jiân ngī-phīⁿ beh khì Ai-ki̍p, tòa hia kià-kha,

16就lín所驚ê刀劍beh tī-hia jip-tio̍h lín tī埃及地；koh lín所驚ê飢荒，beh tī埃及地kā lín tè-tiâu-tiâu；lín beh死tī-hia。chiū lín só͘ kiaⁿ ê to-kiàm beh tī-hia jip-tio̍h lín tī Ai-ki̍p tōe; koh lín só͘ kiaⁿ ê ki-hng, beh tī Ai-ki̍p tōe kā lín tè-tiâu-tiâu; lín beh sí tī-hia.

17見若硬鼻beh去埃及，寄腳tī-hia ê人，lóng beh án-ni；in beh tùi刀劍，tùi飢荒，tùi瘟疫來死；其中無一個留teh，亦無一個脫離我所降hō͘ in ê災厄。Kìⁿ-nā ngī-phīⁿ beh khì Ai-ki̍p, kià-kha tī-hia ê lâng, lóng beh án-ni; in beh tùi to-kiàm, tùi ki-hng, tùi un-e̍k lâi sí; kî-tiong bô chi̍t-ê lâu--teh, ia̍h bô chi̍t-ê thoat-lī Góa só͘ kàng hō͘ in ê chai-ē.

18因為萬軍ê耶和華以色列ê上帝，án-ni講，我有怎樣將我ê受氣kap大受氣piàⁿ tī耶路撒冷khiā起ê百姓；lín去埃及ê時，我亦beh照án-ni將我ê大受氣piàⁿ tī lín ê身上；hō͘ lín成做thang咒詛，thang gông-ngia̍h，thang詈罵，thang凌辱；lín亦無koh看見chit-ê所在。In-ūi bān-kun ê Iâ-hô-hoa Í-sek-lia̍t ê Siōng-tè, án-ni kóng, Góa ū cháiⁿ-iūⁿ chiong Góa ê siū-khì kap tōa siū-khì piàⁿ tī Iâ-lō͘-sat-léng khiā-khí ê peh-sìⁿ; lín khì Ai-ki̍p ê sî, Góa ia̍h beh chiàu án-ni chiong Góa ê tōa siū-khì piàⁿ tī lín ê sin-chiūⁿ; hō͘ lín chiâⁿ-chòe thang chiù-chó͘, thang gông-ngia̍h, thang lóe-mē, thang lêng-jio̍k; lín ia̍h bô koh khòaⁿ-kìⁿ chit ê só͘-chāi.

19Lín猶大所chhun ê百姓ah，耶和華論到lín有講，莫得去埃及；lín tio̍h確實知，我今á日有證明勸解lín lah。Lín Iû-tāi só͘ chhun ê peh-sìⁿ ah, Iâ-hô-hoa lūn-kàu lín ū kóng, Bo̍h-tit khì Ai-ki̍p; lín tio̍h khak-si̍t chai, góa kin-á-ji̍t ū chèng-bêng khoàn-kài lín lah.

20Lín行差謬連累家己；因為lín差我到耶和華lín ê上帝hia，講，求你替阮祈禱耶和華，咱ê上帝；照耶和華咱ê上帝一切所講ê，kā阮講；阮beh行伊。Lín kiâⁿ chha-biū liân-lūi ka-kī; in-ūi lín chhe góa kàu Iâ-hô-hoa lín ê Siōng-tè hia, kóng, Kiû lí thòe goán kî-tó Iâ-hô-hoa, lán ê Siōng-tè; chiàu Iâ-hô-hoa lán ê Siōng-tè it-chhè só͘ kóng--ê, kā goán kóng; goán beh kiâⁿ--i.

21我今á日有kā lín講lah；但是lín ê上帝耶和華ê聲，kap伊差我一切指示lín-ê，lín lóng無遵thàn。Góa kin-á-ji̍t ū kā lín kóng lah; nā-sī lín ê Siōng-tè Iâ-hô-hoa ê siaⁿ, kap I chhe góa it-chhè chí-sī lín--ê, lín lóng bô chun-thàn.

22Taⁿ lín tio̍h確實知，lín tī所beh去寄腳ê地，beh tùi刀劍，tùi飢荒，tùi瘟疫來死。Taⁿ lín tio̍h khak-si̍t chai, lín tī só͘ beh khì kià-kha ê tōe, beh tùi to-kiàm, tùi ki-hng, tùi un-e̍k lâi sí.