1有話臨到耶利米，論到一切khiā起tī埃及地ê猶大人；就是khiā起tī Bi̍t-toat、Tap-pí-le̍k、Lô-hut、Pa-thek-lô境內ê猶大人，講，Ū ōe lîm-kàu Iâ-lī-bí, lūn-kàu it-chhè khiā-khí tī Ai-ki̍p tōe ê Iû-tāi lâng; chiū-sī khiā-khí tī Bi̍t-toa̍t, Tap-pí-le̍k, Lô-hut, Pa-thek-lô kéng-lāi ê Iû-tāi lâng, kóng,

2萬軍ê耶和華以色列ê上帝án-ni講：我所降落tī耶路撒冷，kap猶大chiah-ê城一切ê災厄，lín lóng看見；看ah，taⁿ in lóng拋荒，無人khiā起。Bān-kun ê Iâ-hô-hoa Í-sek-lia̍t ê Siōng-tè án-ni kóng: Góa só͘ kàng-lo̍h tī Iâ-lō͘-sat-léng, kap Iû-tāi chiah ê siâⁿ it-chhè ê chai-ē, lín lóng khòaⁿ-kìⁿ; khòaⁿ ah, taⁿ in lóng pha-hng, bô lâng khiā-khí.

3這是因為in所行ê pháiⁿ，in去燒香服事別ê上帝，就是in kap lín以及lín ê列祖所m̄-bat-ê；án-ni惹我ê受氣。Che sī in-ūi in só͘ kiâⁿ ê pháiⁿ, in khì sio-hiuⁿ ho̍k-sāi pa̍t ê siōng-tè, chiū-sī in kap lín í-ki̍p lín ê lia̍t-chó͘ só͘ m̄-bat--ê; án-ni jiá Góa ê siū-khì.

4總是我bat差我ê眾奴僕先知就近lín；是早早起來差伊，講，切切願lín m̄-thang行chit-ê可惡ê事，我所怨恨ê。Chóng-sī Góa bat chhe Góa ê chèng lô͘-po̍k sian-ti chiū-kūn lín; sī chá-chá khí-lâi chhe i, kóng, Chhiat-chhiat goān lín m̄-thang kiâⁿ chit ê khó-ò͘ⁿ ê sū, Góa só͘ oàn-hūn--ê.

5獨獨in無聽，亦無俯耳孔，無oa̍t-tńg離開in ê pháiⁿ；猶原燒香tī別號ê上帝。To̍k-to̍k in bô thiaⁿ, ia̍h bô àⁿ hī-khang, bô oa̍t-tńg lī-khui in ê pháiⁿ; iû-goân sio-hiuⁿ tī pa̍t-hō ê siōng-tè.

6因為án-ni，我ê大受氣kap我ê受氣piàⁿ出tī猶大chiah-ê城，kap耶路撒冷ê街市，親像火to̍h起來；致到in拋荒冷靜；親像今á日án-ni。In-ūi án-ni, Góa ê tōa siū-khì kap Góa ê siū-khì piàⁿ-chhut tī Iû-tāi chiah ê siâⁿ, kap Iâ-lō͘-sat-léng ê koe-chhī, chhin-chhiūⁿ hé to̍h--khí-lâi; tì-kàu in pha-hng léng-chēng; chhin-chhiūⁿ kin-á-ji̍t án-ni.

7Taⁿ耶和華萬軍ê上帝，以色列ê上帝，án-ni講，Lín啥事行chit-ê大pháiⁿ，害lín家己；hō͘ lín ê ta-po͘人、婦人人、gín-á，kap食奶ê嬰á，lóng tùi猶大中kā lín除去，無留一個？是因為lín用lín ê手所做ê激我ê受氣；Taⁿ Iâ-hô-hoa bān-kun ê Siōng-tè, Í-sek-lia̍t ê Siōng-tè, án-ni kóng, Lín siáⁿ-sū kiâⁿ chit ê tōa pháiⁿ, hāi lín ka-kī; hō͘ lín ê ta-po͘-lâng, hū-jîn-lâng, gín-á, kap chia̍h-ni ê eⁿ-á, lóng tùi Iû-tāi tiong kā lín tû-khì, bô lâu chi̍t-ê? Sī in-ūi lín ēng lín ê chhiú só͘ chòe--ê kek Góa ê siū-khì;

8tī所去寄腳ê埃及地，燒香tī別號ê上帝，致到lín tú-tio̍h剿滅，tī天下萬國中，成做thang咒詛，thang凌辱ê。tī só͘ khì kià-kha ê Ai-ki̍p tōe, sio-hiuⁿ tī pa̍t-hō ê siōng-tè, tì-kàu lín tú-tio̍h châu-bia̍t, tī thiⁿ-ē bān-kok tiong, chiâⁿ-chòe thang chiù-chó͘, thang lêng-jio̍k--ê.

9你ê列祖ê pháiⁿ，猶大列王ê pháiⁿ，in ê后妃ê pháiⁿ，lín家己ê pháiⁿ，lín ê bó͘ ê pháiⁿ，就是tī猶大地，耶路撒冷街市所行ê，lín bōe記得mah？Lí ê lia̍t-chó͘ ê pháiⁿ, Iû-tāi lia̍t-ông ê pháiⁿ, in ê hō͘-hui ê pháiⁿ, lín ka-kī ê pháiⁿ, lín ê bó͘ ê pháiⁿ, chiū-sī tī Iû-tāi tōe, Iâ-lō͘-sat-léng koe-chhī só͘ kiâⁿ--ê, lín bōe kì-tit mah?

10In到taⁿ iáu無家己謙卑，無驚惶，無遵thàn我tī lín ê面前，kap lín ê列祖ê面前，所設我ê法度，我ê律例。In kàu-taⁿ iáu bô ka-kī khiam-pi, bô kiaⁿ-hiâⁿ, bô chun-thàn Góa tī lín ê bīn-chêng, kap lín ê lia̍t-chó͘ ê bīn-chêng, só͘ siat Góa ê hoat-tō͘, Góa ê lu̍t-lē.

11所以萬軍ê耶和華以色列ê上帝án-ni講，看ah，我beh ǹg lín變面，降災厄致到剿滅猶大ê眾人。Só͘-í bān-kun ê Iâ-hô-hoa Í-sek-lia̍t ê Siōng-tè án-ni kóng, Khòaⁿ ah, Góa beh ǹg lín pìⁿ-bīn, kàng chai-ē tì-kàu châu-bia̍t Iû-tāi ê chèng-lâng.

12猶大所chhun ê百姓，硬鼻去埃及地，beh tī-hia寄腳ê，我beh取來滅in；in beh倒tī埃及地，in beh tùi刀劍，tùi飢荒，來滅無，tùi細到大，lóng beh tùi刀劍，tùi飢荒，來死；in beh成做thang咒詛，thang gông-ngia̍h，thang詈罵，thang凌辱ê。Iû-tāi só͘ chhun ê peh-sìⁿ, ngī-phīⁿ khì Ai-ki̍p tōe, beh tī-hia kià-kha--ê, Góa beh chhú lâi bia̍t--in; in beh tó tī Ai-ki̍p tōe, in beh tùi to-kiàm, tùi ki-hng, lâi bia̍t-bô, tùi sòe kàu tōa, lóng beh tùi to-kiàm, tùi ki-hng, lâi sí; in beh chiâⁿ-chòe thang chiù-chó͘, thang gông-ngia̍h, thang lóe-mē, thang lêng-jio̍k--ê.

13因為我beh用刀劍，用飢荒，用瘟疫，刑罰khiā起埃及地ê；親像我已經刑罰耶路撒冷一樣；In-ūi Góa beh ēng to-kiàm, ēng ki-hng, ēng un-e̍k, hêng-hoa̍t khiā-khí Ai-ki̍p tōe--ê; chhin-chhiūⁿ Góa í-keng hêng-hoa̍t Iâ-lō͘-sat-léng chi̍t-iūⁿ;

14Hō͘ hiah-ê去埃及地所chhun ê猶大人，lóng bōe得脫離，á是留teh，thang tò來猶大地，就是in ê心真欣慕tò來khiā起ê所在；因為得tio̍h脫離ê ê以外，無一個thang tò來。hō͘ hiah-ê khì Ai-ki̍p tōe só͘ chhun ê Iû-tāi lâng, lóng bōe-tit thoat-lī, á-sī lâu-teh, thang tò-lâi Iû-tāi tōe, chiū-sī in ê sim chin him-bō͘ tò-lâi khiā-khí ê só͘-chāi; in-ūi tit-tio̍h thoat-lī--ê ê í-gōa, bô chi̍t-ê thang tò-lâi.

15Hiah-ê tòa tī埃及地Pa-thek-lô ê人，見若知in ê bó͘ bat對別ê上帝燒香ê，kap tī邊頭teh-khiā ê眾婦人，聚集kui大陣，應耶利米講，Hiah-ê tòa tī Ai-ki̍p tōe Pa-thek-lô ê lâng, kìⁿ-nā chai in ê bó͘ bat tùi pa̍t ê siōng-tè sio-hiuⁿ--ê, kap tī piⁿ--thâu teh-khiā ê chèng hū-jîn, chū-chi̍p kui tōa-tīn, ìn Iâ-lī-bí kóng,

16你奉耶和華ê名對阮所講ê話，阮m̄聽你。Lí hōng Iâ-hô-hoa ê miâ tùi goán só͘ kóng ê ōe, goán m̄ thiaⁿ--lí.

17阮決斷beh成阮ê嘴所講一切ê話，ǹg天后燒香、灌奠，照阮kap阮ê列祖，阮ê君王，阮ê貴族，tī猶大chiah-ê城，kap耶路撒冷ê街市，平素所行ê一樣；因為hit時阮ê食物充足，享受平安；並無看見災厄。Goán koat-toàn beh chiâⁿ goán ê chhùi só͘ kóng it-chhè ê ōe, ǹg Thian-hō͘ sio-hiuⁿ, koàn-tiān, chiàu goán kap goán ê lia̍t-chó͘, goán ê kun-ông, goán ê kùi-cho̍k, tī Iû-tāi chiah ê siâⁿ, kap Iâ-lō͘-sat-léng ê koe-chhī, pêng-sò͘ só͘ kiâⁿ--ê chi̍t-iūⁿ; in-ūi hit-sî goán ê si̍t-bu̍t chhiong-chiok, hióng-siū pêng-an; pēng-bô khòaⁿ-kìⁿ chai-ē.

18總是tùi阮停止無燒香，無灌奠tī天后，阮反tńg欠缺一切；koh tùi刀劍，tùi飢荒來滅無。Chóng-sī tùi goán thêng-chí bô sio-hiuⁿ, bô koàn-tiān tī Thian-hō͘, goán hoán-tńg khiàm-kheh it-chhè; koh tùi to-kiàm, tùi ki-hng lâi bia̍t-bô.

19阮對天后燒香灌奠ê時，阮做餅來服事伊，對伊灌奠，阮丈夫kiám無份mah？Goán tùi Thian-hō͘ sio-hiuⁿ koàn-tiān ê sî, goán chòe-piáⁿ lâi ho̍k-sāi i, tùi i koàn-tiān, goán tiōng-hu kiám bô hūn mah?

20耶利米就應hiah-ê百姓，就是對hiah-ê ta-po͘婦人用chit-ê話應伊ê百姓，講，Iâ-lī-bí chiū ìn hiah ê peh-sìⁿ, chiū-sī tùi hiah ê ta-po͘ hū-jîn ēng chit ê ōe ìn--i ê peh-sìⁿ, kóng,

21Lín kap lín ê列祖，lín ê君王，lín ê貴族，kap國內ê百姓，tī猶大chiah-ê城，kap耶路撒冷街市所燒 ê香，耶和華kiám無記得in，心內kiám無想mah？Lín kap lín ê lia̍t-chó͘, lín ê kun-ông, lín ê kùi-cho̍k, kap kok-lāi ê peh-sìⁿ, tī Iû-tāi chiah ê siâⁿ, kap Iâ-lō͘-sat-léng koe-chhī só͘ sio ê hiuⁿ, Iâ-hô-hoa kiám bô kì-tit--in, sim-lāi kiám bô siūⁿ mah?

22耶和華因為lín所做ê pháiⁿ，所行可惡ê事，bōe koh忍得；所以lín ê地拋荒，成做thang gông-ngia̍h，thang咒詛，無人khiā起，親像今á日chit款。Iâ-hô-hoa in-ūi lín só͘ chòe ê pháiⁿ, só͘ kiâⁿ khó-ò͘ⁿ ê sū, bōe koh lún--tit; só͘-í lín ê tōe pha-hng, chiâⁿ-chòe thang gông-ngia̍h, thang chiù-chó͘, bô lâng khiā-khí, chhin-chhiūⁿ kin-á-ji̍t chit-khoán.

23因為lín燒香，亦因為lín得罪耶和華，亦無聽耶和華ê話，無thàn祂ê律法，祂ê條例，祂ê干證ê話，所以lín tú-tio̍h chit-ê災厄，親像今á日chit款。In-ūi lín sio-hiuⁿ, ia̍h in-ūi lín tek-chōe Iâ-hô-hoa, ia̍h bô thiaⁿ Iâ-hô-hoa ê ōe, bô thàn I ê lu̍t-hoat, I ê tiâu-lē, I ê kan-chèng ê ōe, só͘-í lín tú-tio̍h chit ê chai-ē, chhin-chhiūⁿ kin-á-ji̍t chit-khoán.

24耶利米koh對眾百姓kap眾婦人人講，Lín tī埃及地一切ê猶大人，tio̍h聽耶和華ê話。Iâ-lī-bí koh tùi chèng peh-sìⁿ kap chèng hū-jîn-lâng kóng, Lín tī Ai-ki̍p tōe it-chhè ê Iû-tāi lâng, tio̍h thiaⁿ Iâ-hô-hoa ê ōe.

25萬軍ê耶和華以色列ê上帝án-ni講，Lín kap lín ê bó͘ bat用嘴講，用手成伊，講，阮所hē ê願，決斷beh行伊，就是beh對天后燒香，亦beh對伊灌奠；taⁿ做你堅固你ê願，來行你ê願。Bān-kun ê Iâ-hô-hoa Í-sek-lia̍t ê Siōng-tè án-ni kóng, Lín kap lín ê bó͘ bat ēng chhùi kóng, ēng chhiú chiâⁿ--i, kóng, Goán só͘ hē ê goān, koat-toàn beh kiâⁿ--i, chiū-sī beh tùi Thian-hō͘ sio-hiuⁿ, ia̍h beh tùi i koàn-tiān; taⁿ chòe lí kian-kò͘ lí ê goān, lâi kiâⁿ lí ê goān.

26所以lín tòa埃及地一切ê猶大人，tio̍h聽耶和華ê話；耶和華講，看ah，我kí我ê大名來chiù-chōa，tī埃及全地，我ê名無koh hō͘猶大族一人ê嘴所稱呼，講，主耶和華是永活。Só͘-í lín tòa Ai-ki̍p tōe it-chhè ê Iû-tāi lâng, tio̍h thiaⁿ Iâ-hô-hoa ê ōe; Iâ-hô-hoa kóng, Khòaⁿ ah, Góa kí Góa ê tōa-miâ lâi chiù-chōa, tī Ai-ki̍p choân-tōe, Góa ê miâ bô koh hō͘ Iû-tāi cho̍k chi̍t-lâng ê chhùi só͘ chheng-ho͘, kóng, Chú Iâ-hô-hoa sī éng-oa̍h.

27看ah，我beh致意tī in，beh降災厄，無降福氣，tī埃及地一切ê猶大人beh tùi刀劍，tùi飢荒來滅無，到lóng了。Khòaⁿ ah, Góa beh tì-ì tī in, beh kàng chai-ē, bô kàng hok-khì, tī Ai-ki̍p tōe it-chhè ê Iû-tāi lâng beh tùi to-kiàm, tùi ki-hng lâi bia̍t-bô, kàu lóng liáu.

28脫離刀劍，beh tùi埃及地tò來猶大地ê，in ê人額真少；hiah-ê所chhun ê猶大人去埃及地，beh tī-hia寄腳ê，beh知是誰 ê話得tio̍h應驗，是我ê á是in-ê。Thoat-lī to-kiàm, beh tùi Ai-ki̍p tōe tò-lâi Iû-tāi tōe--ê, in ê lâng-gia̍h chin-chió; hiah-ê só͘ chhun ê Iû-tāi lâng khì Ai-ki̍p tōe, beh tī-hia kià-kha-ê, beh chai chī-chūi ê ōe tit-tio̍h èng-giām, sī Góa-ê á-sī in ê.

29耶和華講，我tī chit-ê所在beh刑罰lín，beh有chit-ê兆頭，hō͘ lín知我所講降災厄hō͘ lín hiah-ê話的確應驗。Iâ-hô-hoa kóng, Góa tī chit ê só͘-chāi beh hêng-hoa̍t lín, beh ū chit ê tiāu-thâu, hō͘ lín chai Góa só͘ kóng kàng chai-ē hō͘ lín hiah ê ōe tek-khak èng-giām.

30耶和華án-ni講，看ah，我beh將埃及王法老Ha̍p-hut-la̍h交tī伊ê對敵ê手，kap siàu想伊ê性命ê人ê手；親像我有將猶大王Se-tí-ka交tī伊ê對敵，就是siàu想伊ê性命ê巴比倫王Nî-pò͘-kah-nî-sat ê手。Iâ-hô-hoa án-ni kóng, Khòaⁿ ah, Góa beh chiong Ai-ki̍p ông Hoat-ló Ha̍p-hut-la̍h kau tī i ê tùi-te̍k ê chhiú, kap siàu-siūⁿ i ê sìⁿ-miā ê lâng ê chhiú; chhin-chhiūⁿ Góa ū chiong Iû-tāi ông Se-tí-ka kau tī i ê tùi-te̍k, chiū-sī siàu-siūⁿ i ê sìⁿ-miā ê Pa-pí-lûn ông Nî-pò͘-kah-nî-sat ê chhiú.

1猶大王約西亞ê kiáⁿ Iok-ngá-kèng四年，Nî-lī-a ê kiáⁿ，Pa-lio̍k，將先知耶利米所傳hiah-ê話記tī冊裡；Iû-tāi ông Iok-se-a ê kiáⁿ Iok-ngá-kèng sì--nî, Nî-lī-a ê kiáⁿ, Pa-lio̍k, chiong sian-ti Iâ-lī-bí só͘ thoân hiah ê ōe kì tī chheh--nih;

2Hit時耶利米對伊講，Pa-lio̍k ah，耶和華以色列ê上帝論到你有án-ni講：hit-sî Iâ-lī-bí tùi i kóng, Pa-lio̍k ah, Iâ-hô-hoa Í-sek-lia̍t ê Siōng-tè lūn-kàu lí ū án-ni kóng:

3你bat講，我有災厄ah；耶和華tī我痛苦ê頂面加添憂愁；我吐氣到厭倦，bōe得tio̍h平安。Lí bat kóng, Góa ū chai-ē ah; Iâ-hô-hoa tī góa thòng-khó͘ ê téng-bīn ke-thiⁿ iu-chhiû; góa thó͘-khùi kàu ià-siān, bōe tit-tio̍h pêng-an.

4Taⁿ你tio̍h án-ni kā伊講，耶和華án-ni講，看ah，我所建立ê，我beh拆毀，我所栽種ê，我beh拔起來；全地lóng án-ni。Taⁿ lí tio̍h án-ni kā i kóng, Iâ-hô-hoa án-ni kóng, Khòaⁿ ah, Góa só͘ kiàn-li̍p--ê, Góa beh thiah-húi, Góa só͘ chai-chèng--ê, Góa beh pu̍ih--khí-lâi; choân-tōe lóng án-ni.

5你為家己圖謀大tāi-chì mah？莫得圖謀。看ah，因為我beh hō͘災厄降落tī見有血氣ê。總是你無論去toh-lo̍h，我beh hō͘你拾tio̍h家己ê性命；這是耶和華講ê。Lí ūi ka-kī tô͘-bô͘ tōa tāi-chì mah? bo̍h-tit tô͘-bô͘. Khòaⁿ ah, in-ūi Góa beh hō͘ chai-ē kàng-lo̍h tī kìⁿ ū hiat-khì--ê. Chóng-sī lí bô-lūn khì toh-lo̍h, Góa beh hō͘ lí khioh--tio̍h ka-kī ê sìⁿ-miā; che sī Iâ-hô-hoa kóng--ê.

1耶和華ê話臨到先知耶利米，論起列國ê事。Iâ-hô-hoa ê ōe lîm-kàu sian-ti Iâ-lī-bí, lūn-khí lia̍t-kok ê sū.

2論埃及：是論埃及王法老Nî-ko ê軍兵，紮營tī Pek-le̍k河邊ê Ka-ki-bí-si，當猶大王約西亞ê kiáⁿ Iok-ngá-kèng四年hō͘巴比倫王Nî-pò͘-kah-nî-sat所phah敗ê。Lūn Ai-ki̍p: sī lūn Ai-ki̍p ông Hoat-ló-nî-ko ê kun-peng, chat-iâⁿ tī Pek-la̍t hô-piⁿ ê Ka-ki-bí-si, tng Iû-tāi ông Iok-se-a ê kiáⁿ Iok-ngá-kèng sì--nî hō͘ Pa-pí-lûn ông Nî-pò͘-kah-nî-sat só͘ phah-pāi--ê.

3Lín tio̍h備辦大小ê藤牌，去交戰。Lín tio̍h pī-pān tōa-sió ê tîn-pâi, khì kau-chiàn.

4Lín tio̍h套馬、騎馬、戴盔khiā起來；磨鎗、穿戰甲。Lín tio̍h thò bé, khiâ bé, tì khoe khiā--khí-lâi; bôa chhiuⁿ, chhēng chiàn-kah.

5我啥事看見án-ni？in驚惶退後；in ê勇士thâi輸，緊緊走，無oa̍t頭；四周圍有驚惶；這是耶和華講ê。Góa siáⁿ-sū khòaⁿ-kìⁿ án-ni? in kiaⁿ-hiâⁿ thè-āu; in ê ióng-sū thâi-su, kín-kín cháu, bô oa̍t-thâu; sì-chiu-ûi ū kiaⁿ-hiâⁿ; che sī Iâ-hô-hoa kóng--ê.

6gâu走ê走bōe-lī，勇士bōe能脫離；tī北方，Pek-le̍k河邊，in lóng tio̍h-tak跋倒。Gâu-cháu-ê cháu-bōe-lī, ióng-sū bōe-ōe thoat-lī; tī pak-hng, Pek-la̍t hô-piⁿ, in lóng tio̍h-tak poa̍h-tó.

7Chit-ê親像尼羅河漲滿，親像江河ê水giâ湧ê，是是誰 ah？Chit-ê chhin-chhiūⁿ Nî-lô hô tiòng-móa, chhin-chhiūⁿ kang-hô ê chúi giâ-éng--ê, sī chī-chūi ah?

8埃及親像尼羅河漲滿，伊ê水親像江河giâ湧；伊ê話講，我beh chhèng高，我beh遮蓋遍地；我beh毀壞城kap其中khiā起ê百姓。Ai-ki̍p chhin-chhiūⁿ Nî-lô hô tiòng-móa, i ê chúi chhin-chhiūⁿ kang-hô giâ-éng; i ê ōe kóng, Góa beh chhèng-koâiⁿ, góa beh jia-khàm piàn-tōe; góa beh húi-hoāi siâⁿ kap kî-tiong khiā-khí ê peh-sìⁿ.

9馬tio̍h 緊上來；車tio̍h亂亂走；勇士tio̍h出來；Kó͘-si̍t kap Hut ê人lóng giâ藤牌；路得ê人gâu開弓。Bé tio̍h kín chiūⁿ--lâi; chhia tio̍h loān-loān cháu; ióng-sū tio̍h chhut--lâi; Kó͘-si̍t kap Hut ê lâng lóng giâ tîn-pâi; Lō͘-tek ê lâng gâu khui-keng.

10因為hit日是主，萬軍ê耶和華ê日，報仇ê日，thang對祂ê對敵報仇；刀劍beh吞食到飽，lim血到醉；因為主，萬軍ê耶和華，tī北方Pek-le̍k河邊有獻祭ê事。In-ūi hit-ji̍t sī Chú, bān-kun ê Iâ-hô-hoa ê ji̍t, pò-siû ê ji̍t, thang tùi I ê tùi-te̍k pò-siû; to-kiàm beh thun-chia̍h kàu-pá, lim huih kàu-chùi; in-ūi Chú, bān-kun ê Iâ-hô-hoa, tī pak-hng Pek-la̍t hô-piⁿ ū hiàn-chè ê sū.

11埃及ê百姓ah，tio̍h上去Ki-lia̍t，來取乳香；你用chōe-chōe藥是空空；你bōe得tio̍h醫好。Ai-ki̍p ê peh-sìⁿ ah, tio̍h chiūⁿ--khì Ki-lia̍t, lâi chhú jú-hiuⁿ; lí ēng chōe-chōe io̍h sī khang-khang; lí bōe tit-tio̍h i-hó.

12列邦聽見你ê凌辱；遍地lóng是你哀哭ê聲；因為勇士kap勇士相kha̍p，做一下跋倒。Lia̍t-pang thiaⁿ-kìⁿ lí ê lêng-jio̍k; piàn-tōe lóng sī lí ai-khàu ê siaⁿ; in-ūi ióng-sū kap ióng-sū saⁿ-kha̍p, chòe chi̍t-ē poa̍h-tó.

13耶和華對先知耶利米所講ê話，論到巴比倫王Nî-pò͘-kah-nî-sat beh到，來攻擊埃及地。Iâ-hô-hoa tùi sian-ti Iâ-lī-bí só͘ kóng ê ōe, lūn-kàu Pa-pí-lûn ông Nî-pò͘-kah-nî-sat beh kàu, lâi kong-kek Ai-ki̍p tōe.

14Lín tio̍h報揚tī埃及，宣佈tī Bi̍t-toat，宣佈tī Lô-hut kap Tap-pí-le̍k，講，Tio̍h 排隊，家己備辦，因為刀劍tī你ê四圍teh吞滅。Lín tio̍h pò-iông tī Ai-ki̍p, soan-pò͘ tī Bi̍t-toa̍t, soan-pò͘ tī Lô-hut kap Tap-pí-le̍k, kóng, Tio̍h pâi-tūi, ka-kī pī-pān, in-ūi to-kiàm tī lí ê sì-ûi teh thun-bia̍t.

15你ê大力ê怎樣跋倒？in khiā bōe在，因為耶和華趕in。Lí ê tōa-la̍t--ê cháiⁿ-iūⁿ poa̍h-tó? in khiā bōe chāi, in-ūi Iâ-hô-hoa kóaⁿ in.

16伊hō͘ chōe-chōe人跋倒；大家tó相tha̍h；in就講，起來，咱tò來去本族，到咱本所在，來閃避壓制咱ê刀劍。I hō͘ chōe-chōe lâng poa̍h-tó; tāi-ke tó saⁿ-tha̍h; in chiū kóng, Khí--lâi, lán tò--lâi khì pún-cho̍k, kàu lán pún só͘-chāi, lâi siám-pī ap-chè lán ê to-kiàm.

17In tī-hia叫講，埃及王法老不過是一個聲，伊有phah-sńg伊ê機會。In tī-hia kiò kóng, Ai-ki̍p ông Hoat-ló put-kò sī chi̍t ê siaⁿ, i ū phah-sńg i ê ki-hōe.

18大君王，伊ê名萬軍ê耶和華，講，我kí我ê活命來chiù-chōa，伊beh來親像山中ê Tha-po̍k，親像海邊ê Ka-bi̍t。Tōa kun-ông, I ê miâ bān-kun ê Iâ-hô-hoa, kóng, Góa kí Góa ê oa̍h-miā lâi chiù-chōa, i beh lâi chhin-chhiūⁿ soaⁿ-tiong ê Tha-po̍k, chhin-chhiūⁿ hái-piⁿ ê Ka-bi̍t.

19Khiā起tī埃及ê百姓ah，你tio̍h備辦受掠應用ê物件，因為Lô-hut beh拋荒燒毀，無人khiā起。Khiā-khí tī Ai-ki̍p ê peh-sìⁿ ah, lí tio̍h pī-pān siū-lia̍h èng-iōng ê mi̍h-kiāⁿ, in-ūi Lô-hut beh pha-hng sio-húi, bô lâng khiā-khí.

20埃及是súi ê牛種á，獨獨tùi北方出ê毀滅來lah，來lah。Ai-ki̍p sī súi ê gû-chéng-á, to̍k-to̍k tùi pak-hng chhut ê húi-bia̍t lâi lah, lâi lah.

21其中雇chhiàⁿ ê兵，親像寮(tiâu)內肥ê牛á，in oa̍t-tńg身做一下走，khiā-bōe-tiâu；因為in tú-tio̍h患難ê日，受刑罰ê時已經到lah。Kî-tiong kò͘-chhiàⁿ ê peng, chhin-chhiūⁿ tiâu-lāi pûi ê gû-á, in oa̍t-tńg-sin chòe chi̍t-ē cháu, khiā-bōe-tiâu; in-ūi in tú-tio̍h hoān-lān ê ji̍t, siū hêng-hoa̍t ê sî í-keng kàu lah.

22伊ê聲親像蛇，teh行；對敵beh kui陣來，in beh kia̍h斧頭來攻擊伊，親像剉樹ê人一樣。I ê siaⁿ chhin-chhiūⁿ chôa, teh kiâⁿ; tùi-te̍k beh kui-tīn lâi, in beh kia̍h pó͘-thâu lâi kong-kek--i, chhin-chhiūⁿ chhò-chhiū ê lâng chi̍t-iūⁿ.

23耶和華講，伊ê樹林雖然真密，in亦beh剉伊；因為in比草蜢khah chōe，bōe能算得。Iâ-hô-hoa kóng, I ê chhiū-nâ sui-jiân chin-ba̍t, in ia̍h beh chhò i; in-ūi in pí chháu-meh khah chōe, bōe-ōe sǹg--tit.

24埃及ê百姓beh見笑，beh交tī北方ê百姓ê手。Ai-ki̍p ê peh-sìⁿ beh kiàn-siàu, beh kau tī pak-hng ê peh-sìⁿ ê chhiú.

25萬軍ê耶和華，以色列ê上帝，講：看ah，我beh刑罰屬tī Lô ê A-bûn，kap法老，kap埃及，kap伊ê神明，kap伊ê君王；亦beh刑罰法老，以及óa靠伊ê人。Bān-kun ê Iâ-hô-hoa, Í-sek-lia̍t ê Siōng-tè, kóng: Khòaⁿ ah, Góa beh hêng-hoa̍t sio̍k tī Lô ê A-bûn, kap Hoat-ló, kap Ai-ki̍p, kap i ê sîn-bêng, kap i ê kun-ông; ia̍h beh hêng-hoa̍t Hoat-ló, í-ki̍p óa-khò i ê lâng.

26我beh將in交tī siàu想in ê性命ê人ê手，kap巴比倫王Nî-pò͘-kah-nî-sat ê手，kap伊ê人臣ê手；以後埃及的確koh有人khiā起，kap早前一樣；這是耶和華講ê。Góa beh chiong in kau tī siàu-siūⁿ in ê sìⁿ-miā ê lâng ê chhiú, kap Pa-pí-lûn ông Nî-pò͘-kah-nî-sat ê chhiú, kap i ê jîn-sîn ê chhiú; í-āu Ai-ki̍p tek-khak koh ū lâng khiā-khí, kap chá-chêng chi̍t-iūⁿ; che sī Iâ-hô-hoa kóng--ê.

27我ê奴僕雅各ah，你莫得驚；以色列ah，莫得驚惶；看ah，我beh tùi遠遠ê所在拯救你；tùi受掠去ê地拯救你ê後裔；雅各beh tò來，得tio̍h安靜、平安，無人hō͘伊驚惶。Góa ê lô͘-po̍k Ngá-kok ah, lí bo̍h-tit kiaⁿ; Í-sek-lia̍t ah, bo̍h-tit kiaⁿ-hiâⁿ; khòaⁿ ah, Góa beh tùi hn̄g-hn̄g ê só͘-chāi chín-kiù lí; tùi siū-lia̍h--khì ê tōe chín-kiù lí ê hō͘-è; Ngá-kok beh tò--lâi, tit-tio̍h an-chēng, pêng-an, bô lâng hō͘ i kiaⁿ-hiâⁿ.

28我ê奴僕雅各ah，莫得驚惶，因為我kap你tī-teh；亦beh將我所趕你到hiah-ê國一盡剿滅；總是無一盡剿滅你；beh照所合宜ê，責備你，斷斷bōe會無刑罰你；這是耶和華講ê。Góa ê lô͘-po̍k Ngá-kok ah, bo̍h-tit kiaⁿ-hiâⁿ, in-ūi Góa kap lí tī-teh; ia̍h beh chiong Góa só͘ kóaⁿ lí kàu hiah ê kok it-chīn châu-bia̍t; chóng-sī bô it-chīn châu-bia̍t lí; beh chiàu só͘ ha̍p-gî--ê, chek-pī lí, toàn-toàn bōe-ōe bô hêng-hoa̍t lí; che sī Iâ-hô-hoa kóng--ê.