1耶和華ê話臨到先知耶利米，論起列國ê事。Iâ-hô-hoa ê ōe lîm-kàu sian-ti Iâ-lī-bí, lūn-khí lia̍t-kok ê sū.

2論埃及：是論埃及王法老Nî-ko ê軍兵，紮營tī Pek-le̍k河邊ê Ka-ki-bí-si，當猶大王約西亞ê kiáⁿ Iok-ngá-kèng四年hō͘巴比倫王Nî-pò͘-kah-nî-sat所phah敗ê。Lūn Ai-ki̍p: sī lūn Ai-ki̍p ông Hoat-ló-nî-ko ê kun-peng, chat-iâⁿ tī Pek-la̍t hô-piⁿ ê Ka-ki-bí-si, tng Iû-tāi ông Iok-se-a ê kiáⁿ Iok-ngá-kèng sì--nî hō͘ Pa-pí-lûn ông Nî-pò͘-kah-nî-sat só͘ phah-pāi--ê.

3Lín tio̍h備辦大小ê藤牌，去交戰。Lín tio̍h pī-pān tōa-sió ê tîn-pâi, khì kau-chiàn.

4Lín tio̍h套馬、騎馬、戴盔khiā起來；磨鎗、穿戰甲。Lín tio̍h thò bé, khiâ bé, tì khoe khiā--khí-lâi; bôa chhiuⁿ, chhēng chiàn-kah.

5我啥事看見án-ni？in驚惶退後；in ê勇士thâi輸，緊緊走，無oa̍t頭；四周圍有驚惶；這是耶和華講ê。Góa siáⁿ-sū khòaⁿ-kìⁿ án-ni? in kiaⁿ-hiâⁿ thè-āu; in ê ióng-sū thâi-su, kín-kín cháu, bô oa̍t-thâu; sì-chiu-ûi ū kiaⁿ-hiâⁿ; che sī Iâ-hô-hoa kóng--ê.

6gâu走ê走bōe-lī，勇士bōe能脫離；tī北方，Pek-le̍k河邊，in lóng tio̍h-tak跋倒。Gâu-cháu-ê cháu-bōe-lī, ióng-sū bōe-ōe thoat-lī; tī pak-hng, Pek-la̍t hô-piⁿ, in lóng tio̍h-tak poa̍h-tó.

7Chit-ê親像尼羅河漲滿，親像江河ê水giâ湧ê，是是誰 ah？Chit-ê chhin-chhiūⁿ Nî-lô hô tiòng-móa, chhin-chhiūⁿ kang-hô ê chúi giâ-éng--ê, sī chī-chūi ah?

8埃及親像尼羅河漲滿，伊ê水親像江河giâ湧；伊ê話講，我beh chhèng高，我beh遮蓋遍地；我beh毀壞城kap其中khiā起ê百姓。Ai-ki̍p chhin-chhiūⁿ Nî-lô hô tiòng-móa, i ê chúi chhin-chhiūⁿ kang-hô giâ-éng; i ê ōe kóng, Góa beh chhèng-koâiⁿ, góa beh jia-khàm piàn-tōe; góa beh húi-hoāi siâⁿ kap kî-tiong khiā-khí ê peh-sìⁿ.

9馬tio̍h 緊上來；車tio̍h亂亂走；勇士tio̍h出來；Kó͘-si̍t kap Hut ê人lóng giâ藤牌；路得ê人gâu開弓。Bé tio̍h kín chiūⁿ--lâi; chhia tio̍h loān-loān cháu; ióng-sū tio̍h chhut--lâi; Kó͘-si̍t kap Hut ê lâng lóng giâ tîn-pâi; Lō͘-tek ê lâng gâu khui-keng.

10因為hit日是主，萬軍ê耶和華ê日，報仇ê日，thang對祂ê對敵報仇；刀劍beh吞食到飽，lim血到醉；因為主，萬軍ê耶和華，tī北方Pek-le̍k河邊有獻祭ê事。In-ūi hit-ji̍t sī Chú, bān-kun ê Iâ-hô-hoa ê ji̍t, pò-siû ê ji̍t, thang tùi I ê tùi-te̍k pò-siû; to-kiàm beh thun-chia̍h kàu-pá, lim huih kàu-chùi; in-ūi Chú, bān-kun ê Iâ-hô-hoa, tī pak-hng Pek-la̍t hô-piⁿ ū hiàn-chè ê sū.

11埃及ê百姓ah，tio̍h上去Ki-lia̍t，來取乳香；你用chōe-chōe藥是空空；你bōe得tio̍h醫好。Ai-ki̍p ê peh-sìⁿ ah, tio̍h chiūⁿ--khì Ki-lia̍t, lâi chhú jú-hiuⁿ; lí ēng chōe-chōe io̍h sī khang-khang; lí bōe tit-tio̍h i-hó.

12列邦聽見你ê凌辱；遍地lóng是你哀哭ê聲；因為勇士kap勇士相kha̍p，做一下跋倒。Lia̍t-pang thiaⁿ-kìⁿ lí ê lêng-jio̍k; piàn-tōe lóng sī lí ai-khàu ê siaⁿ; in-ūi ióng-sū kap ióng-sū saⁿ-kha̍p, chòe chi̍t-ē poa̍h-tó.

13耶和華對先知耶利米所講ê話，論到巴比倫王Nî-pò͘-kah-nî-sat beh到，來攻擊埃及地。Iâ-hô-hoa tùi sian-ti Iâ-lī-bí só͘ kóng ê ōe, lūn-kàu Pa-pí-lûn ông Nî-pò͘-kah-nî-sat beh kàu, lâi kong-kek Ai-ki̍p tōe.

14Lín tio̍h報揚tī埃及，宣佈tī Bi̍t-toat，宣佈tī Lô-hut kap Tap-pí-le̍k，講，Tio̍h 排隊，家己備辦，因為刀劍tī你ê四圍teh吞滅。Lín tio̍h pò-iông tī Ai-ki̍p, soan-pò͘ tī Bi̍t-toa̍t, soan-pò͘ tī Lô-hut kap Tap-pí-le̍k, kóng, Tio̍h pâi-tūi, ka-kī pī-pān, in-ūi to-kiàm tī lí ê sì-ûi teh thun-bia̍t.

15你ê大力ê怎樣跋倒？in khiā bōe在，因為耶和華趕in。Lí ê tōa-la̍t--ê cháiⁿ-iūⁿ poa̍h-tó? in khiā bōe chāi, in-ūi Iâ-hô-hoa kóaⁿ in.

16伊hō͘ chōe-chōe人跋倒；大家tó相tha̍h；in就講，起來，咱tò來去本族，到咱本所在，來閃避壓制咱ê刀劍。I hō͘ chōe-chōe lâng poa̍h-tó; tāi-ke tó saⁿ-tha̍h; in chiū kóng, Khí--lâi, lán tò--lâi khì pún-cho̍k, kàu lán pún só͘-chāi, lâi siám-pī ap-chè lán ê to-kiàm.

17In tī-hia叫講，埃及王法老不過是一個聲，伊有phah-sńg伊ê機會。In tī-hia kiò kóng, Ai-ki̍p ông Hoat-ló put-kò sī chi̍t ê siaⁿ, i ū phah-sńg i ê ki-hōe.

18大君王，伊ê名萬軍ê耶和華，講，我kí我ê活命來chiù-chōa，伊beh來親像山中ê Tha-po̍k，親像海邊ê Ka-bi̍t。Tōa kun-ông, I ê miâ bān-kun ê Iâ-hô-hoa, kóng, Góa kí Góa ê oa̍h-miā lâi chiù-chōa, i beh lâi chhin-chhiūⁿ soaⁿ-tiong ê Tha-po̍k, chhin-chhiūⁿ hái-piⁿ ê Ka-bi̍t.

19Khiā起tī埃及ê百姓ah，你tio̍h備辦受掠應用ê物件，因為Lô-hut beh拋荒燒毀，無人khiā起。Khiā-khí tī Ai-ki̍p ê peh-sìⁿ ah, lí tio̍h pī-pān siū-lia̍h èng-iōng ê mi̍h-kiāⁿ, in-ūi Lô-hut beh pha-hng sio-húi, bô lâng khiā-khí.

20埃及是súi ê牛種á，獨獨tùi北方出ê毀滅來lah，來lah。Ai-ki̍p sī súi ê gû-chéng-á, to̍k-to̍k tùi pak-hng chhut ê húi-bia̍t lâi lah, lâi lah.

21其中雇chhiàⁿ ê兵，親像寮(tiâu)內肥ê牛á，in oa̍t-tńg身做一下走，khiā-bōe-tiâu；因為in tú-tio̍h患難ê日，受刑罰ê時已經到lah。Kî-tiong kò͘-chhiàⁿ ê peng, chhin-chhiūⁿ tiâu-lāi pûi ê gû-á, in oa̍t-tńg-sin chòe chi̍t-ē cháu, khiā-bōe-tiâu; in-ūi in tú-tio̍h hoān-lān ê ji̍t, siū hêng-hoa̍t ê sî í-keng kàu lah.

22伊ê聲親像蛇，teh行；對敵beh kui陣來，in beh kia̍h斧頭來攻擊伊，親像剉樹ê人一樣。I ê siaⁿ chhin-chhiūⁿ chôa, teh kiâⁿ; tùi-te̍k beh kui-tīn lâi, in beh kia̍h pó͘-thâu lâi kong-kek--i, chhin-chhiūⁿ chhò-chhiū ê lâng chi̍t-iūⁿ.

23耶和華講，伊ê樹林雖然真密，in亦beh剉伊；因為in比草蜢khah chōe，bōe能算得。Iâ-hô-hoa kóng, I ê chhiū-nâ sui-jiân chin-ba̍t, in ia̍h beh chhò i; in-ūi in pí chháu-meh khah chōe, bōe-ōe sǹg--tit.

24埃及ê百姓beh見笑，beh交tī北方ê百姓ê手。Ai-ki̍p ê peh-sìⁿ beh kiàn-siàu, beh kau tī pak-hng ê peh-sìⁿ ê chhiú.

25萬軍ê耶和華，以色列ê上帝，講：看ah，我beh刑罰屬tī Lô ê A-bûn，kap法老，kap埃及，kap伊ê神明，kap伊ê君王；亦beh刑罰法老，以及óa靠伊ê人。Bān-kun ê Iâ-hô-hoa, Í-sek-lia̍t ê Siōng-tè, kóng: Khòaⁿ ah, Góa beh hêng-hoa̍t sio̍k tī Lô ê A-bûn, kap Hoat-ló, kap Ai-ki̍p, kap i ê sîn-bêng, kap i ê kun-ông; ia̍h beh hêng-hoa̍t Hoat-ló, í-ki̍p óa-khò i ê lâng.

26我beh將in交tī siàu想in ê性命ê人ê手，kap巴比倫王Nî-pò͘-kah-nî-sat ê手，kap伊ê人臣ê手；以後埃及的確koh有人khiā起，kap早前一樣；這是耶和華講ê。Góa beh chiong in kau tī siàu-siūⁿ in ê sìⁿ-miā ê lâng ê chhiú, kap Pa-pí-lûn ông Nî-pò͘-kah-nî-sat ê chhiú, kap i ê jîn-sîn ê chhiú; í-āu Ai-ki̍p tek-khak koh ū lâng khiā-khí, kap chá-chêng chi̍t-iūⁿ; che sī Iâ-hô-hoa kóng--ê.

27我ê奴僕雅各ah，你莫得驚；以色列ah，莫得驚惶；看ah，我beh tùi遠遠ê所在拯救你；tùi受掠去ê地拯救你ê後裔；雅各beh tò來，得tio̍h安靜、平安，無人hō͘伊驚惶。Góa ê lô͘-po̍k Ngá-kok ah, lí bo̍h-tit kiaⁿ; Í-sek-lia̍t ah, bo̍h-tit kiaⁿ-hiâⁿ; khòaⁿ ah, Góa beh tùi hn̄g-hn̄g ê só͘-chāi chín-kiù lí; tùi siū-lia̍h--khì ê tōe chín-kiù lí ê hō͘-è; Ngá-kok beh tò--lâi, tit-tio̍h an-chēng, pêng-an, bô lâng hō͘ i kiaⁿ-hiâⁿ.

28我ê奴僕雅各ah，莫得驚惶，因為我kap你tī-teh；亦beh將我所趕你到hiah-ê國一盡剿滅；總是無一盡剿滅你；beh照所合宜ê，責備你，斷斷bōe會無刑罰你；這是耶和華講ê。Góa ê lô͘-po̍k Ngá-kok ah, bo̍h-tit kiaⁿ-hiâⁿ, in-ūi Góa kap lí tī-teh; ia̍h beh chiong Góa só͘ kóaⁿ lí kàu hiah ê kok it-chīn châu-bia̍t; chóng-sī bô it-chīn châu-bia̍t lí; beh chiàu só͘ ha̍p-gî--ê, chek-pī lí, toàn-toàn bōe-ōe bô hêng-hoa̍t lí; che sī Iâ-hô-hoa kóng--ê.

1法老攻擊Ka-sat ê事先，有耶和華論腓利士人ê話臨到先知耶利米。Hoat-ló kong-kek Ka-sat ê tāi-seng, ū Iâ-hô-hoa lūn Hui-lī-sū lâng ê ōe lîm-kàu sian-ti Iâ-lī-bí.

2耶和華án-ni講，看ah，有水tùi北方chhèng起來，成做漲滿ê河，beh漲滿chit-ê地，kap其中所有ê，kap城kap其中所khiā起ê；人beh喉叫，境內khiā起ê百姓beh啼哭。Iâ-hô-hoa án-ni kóng, Khòaⁿ ah, ū chúi tùi pak-hng chhèng--khí-lâi, chiâⁿ-chòe tiòng-móa ê hô, beh tiòng-móa chit ê tōe, kap kî-tiong só͘ ū-ê, kap siâⁿ kap kî-tiong só͘ khiā-khí--ê; lâng beh âu-kiò, kéng-lāi khiā-khí ê peh-sìⁿ beh thî-khàu.

3為tio̍h對敵勇ê馬，伊ê蹄 kho̍k-kho̍k哮ê聲，也為tio̍h伊hiah-ê戰車緊緊走，伊ê車輪hū-hū哮，就chiah-ê做老父ê手軟，無oa̍t頭看伊ê kiáⁿ。Ūi-tio̍h tùi-te̍k ióng ê bé, i ê tôe kho̍k-kho̍k-háu ê siaⁿ, iā ūi-tio̍h i hiah ê chiàn-chhia kín-kín cháu, i ê chhia-lûn hū-hū-háu, chiū chiah-ê chòe lāu-pē--ê chhiú nńg, bô oa̍t-thâu khòaⁿ i ê kiáⁿ.

4因為時日到lah，beh毀滅一切ê腓利士人，beh tùi Chhui-lô Se-tùn剪除所chhun幫贊in-ê；因為耶和華beh毀滅腓利士人，Ka-hui-thok海嶼所chhun ê百姓。In-ūi sî-ji̍t kàu lah, beh húi-bia̍t it-chhè ê Hui-lī-sū lâng, beh tùi Chhui-lô Se-tùn chián-tû só͘ chhun pang-chān in--ê; in-ūi Iâ-hô-hoa beh húi-bia̍t Hui-lī-sū lâng, Ka-hui-thok hái-sū só͘ chhun ê peh-sìⁿ.

5Ka-sat已經無半支頭毛；A-si̍t-ki-lûn歸tī無；山谷所chhun-ê，你家己割肉，beh到jōa久ah？Ka-sat í-keng bô pòaⁿ-ki thâu-mn̂g; A-si̍t-ki-lûn kui tī bô; soaⁿ-kok só͘ chhun--ê, lí ka-kī koah-bah, beh kàu jōa-kú ah?

6耶和華ê刀劍ah，你beh到tī時chiah soah？tio̍h kiu入你ê刀鞘，安靜無振動。Iâ-hô-hoa ê to-kiàm ah, lí beh kàu tī-sî chiah soah? tio̍h kiu ji̍p lí ê to-siù, an-chēng bô tín-tāng.

7耶和華已經命令你攻擊A-si̍t-ki-lûn，攻擊海邊ê地；祂已經派你定tio̍h，你thái-thó能停止ah？Iâ-hô-hoa í-keng bēng-lēng lí kong-kek A-si̍t-ki-lûn, kong-kek hái-piⁿ ê tōe; I í-keng phài lí tiāⁿ-tio̍h, lí thái-thó ōe thêng-chí ah?

1論Mô͘-ap。萬軍ê耶和華以色列ê上帝án-ni講，Nî-pho有災厄ah，因為受毀壞；Ki-lia̍t-têng tú-tio̍h見笑，受取；Bí-su-ka tú-tio̍h見笑，受敗壞。Lūn Mô͘-ap. Bān-kun ê Iâ-hô-hoa Í-sek-lia̍t ê Siōng-tè án-ni kóng, Nî-pho ū chai-ē ah, in-ūi siū húi-hoāi; Ki-lia̍t-têng tú-tio̍h kiàn-siàu, siū-chhú; Bí-su-ka tú-tio̍h kiàn-siàu, siū pāi-hoāi.

2Mô͘-ap無koh受o-ló，有人tī Hi-si̍t-pún設計謀beh害伊；講，來lah，咱kā伊剪除，hō͘伊無koh成做國。Má-tek-biân ah，你亦tio̍h靜靜，莫做聲；刀劍beh追趕你。Mô͘-ap bô koh siū o-ló, ū lâng tī Hi-si̍t-pún siat kè-bô͘ beh hāi i; kóng, Lâi lah, lán kā i chián-tû, hō͘ i bô koh chiâⁿ-chòe kok. Má-tek-biân ah, lí ia̍h tio̍h chēng-chēng, bo̍h chòe siaⁿ; to-kiàm beh tui-kóaⁿ lí.

3Tùi Hô-lô-liām有喉叫ê聲，有搶劫kap大ê毀滅。Tùi Hô-lô-liām ū âu-kiò ê siaⁿ, ū chhiúⁿ-kiap kap tōa ê húi-bia̍t.

4Mô͘-ap tú-tio̍h毀滅，伊ê gín-á哮ê聲hō͘人聽見。Mô͘-ap tú-tio̍h húi-bia̍t, i ê gín-á háu ê siaⁿ hō͘ lâng thiaⁿ-kìⁿ.

5因為人爬上Ló͘-hi ê山坪，ná行ná哭；落Hô-lô-liām ê山坪，聽見毀滅哀哭ê聲。In-ūi lâng peh-chiūⁿ Ló͘-hi ê soaⁿ-phiâⁿ, ná-kiâⁿ ná-khàu; lo̍h Hô-lô-liām ê soaⁿ-phiâⁿ, thiaⁿ-kìⁿ húi-bia̍t ai-khàu ê siaⁿ.

6Lín tio̍h逃走，家己救性命；親像曠野ê杜松。Lín tio̍h tô-cháu, ka-kī kiù sìⁿ-miā; chhin-chhiūⁿ khòng-iá ê tō͘-siông.

7你因為óa靠家己ê所做，kap家己ê財寶，亦beh受掠。Ki-boat kap屬伊ê祭司貴族，亦beh做一下受遷移。Lí in-ūi óa-khò ka-kī ê só͘-chòe, kap ka-kī ê châi-pó, ia̍h beh siū-lia̍h. Ki-boat kap sio̍k i ê chè-si kùi-cho̍k, ia̍h beh chòe-chi̍t-ē siū chhian-î.

8行毀滅ê，beh到ta̍k ê城；無一個城能免得；山谷beh致到敗落，平洋beh受毀壞，照耶和華所講ê。Kiâⁿ húi-bia̍t--ê, beh kàu ta̍k ê siâⁿ; bô chi̍t ê siâⁿ ōe bián-tit; soaⁿ-kok beh tì-kàu pāi-lo̍h, pîⁿ-iûⁿ beh siū húi-hoāi, chiàu Iâ-hô-hoa só͘ kóng--ê.

9Tio̍h用翼hō͘ Mô͘-ap，hō͘伊飛走；伊chiah-ê城beh致到拋荒，無人khiā起。Tio̍h ēng si̍t hō͘ Mô͘-ap, hō͘ i pe-cháu; i chiah ê siâⁿ beh tì-kàu pha-hng, bô lâng khiā-khí.

10Chhìn-chhìn chhái-chhái做耶和華ê工(kong)ê，tio̍h受咒詛；禁止伊ê刀bak-tio̍h血ê，tio̍h受咒詛。Chhìn-chhìn chhái-chhái chòe Iâ-hô-hoa ê kang--ê, tio̍h siū chiù-chó͘; kìm-chí i ê to bak-tio̍h huih--ê, tio̍h siū chiù-chó͘.

11Mô͘-ap tùi少年以來，常常享受平安；親像坐清ê酒，無tùi chit-ê器具piàⁿ tī別ê器具；亦未bat受掠；因為án-ni伊ê原味 iáu tī-teh，氣味bē變。Mô͘-ap tùi siàu-liân í-lâi, siông-siông hióng-siū pêng-an; chhin-chhiūⁿ chē-chheng ê chiú, bô tùi chit ê khì-kū piàⁿ tī pa̍t ê khì-kū; ia̍h bē bat siū-lia̍h; in-ūi án-ni i ê goân-bī iáu tī-teh, khì-bī bē piàn.

12耶和華講，看ah，日子beh到，我beh差piàⁿ酒ê去伊hia，kā伊piàⁿ出來；piàⁿ空伊ê器具，phah破伊ê酒甕。Iâ-hô-hoa kóng, Khòaⁿ ah, ji̍t-chí beh kàu, Góa beh chhe piàⁿ-chiú--ê khì i hia, kā i piàⁿ-chhut--lâi; piàⁿ-khang i ê khì-kū, phah-phòa i ê chiú-àng.

13Mô͘-ap beh為tio̍h Ki-boat來見笑，親像以色列家為tio̍h in所óa靠ê Pek-te̍k-lī來見笑一樣。Mô͘-ap beh ūi-tio̍h Ki-boat lâi kiàn-siàu, chhin-chhiūⁿ Í-sek-lia̍t-ke ūi-tio̍h in só͘ óa-khò ê Pek-te̍k-lī lâi kiàn-siàu chi̍t-iūⁿ.

14你怎樣講，阮是勇士，是有力thang交戰ê人？Lí cháiⁿ-iūⁿ kóng, Goán sī ióng-sū, sī ū la̍t thang kau-chiàn ê lâng?

15Mô͘-ap變做拋荒，對敵上去，入伊hiah-ê城；所揀選ê少年人落去tú-tio̍h thâi死；這是君王，名做萬軍ê耶和華，講ê。Mô͘-ap pìⁿ-chòe pha-hng, tùi-te̍k chiūⁿ-khì, ji̍p i hiah ê siâⁿ; só͘ kéng-soán ê siàu-liân lâng lo̍h-khì tú-tio̍h thâi-sí; che sī Kun-ông, miâ chòe bān-kun ê Iâ-hô-hoa, kóng--ê.

16Mô͘-ap ê災厄近lah，伊ê患難緊緊到。Mô͘-ap ê chai-ē kūn lah, i ê hoān-lān kín-kín kàu.

17見若tī伊ê周圍，bat伊ê名ê，lín lóng tio̍h為伊悲傷；講，hit-ê勇ê槌，súi ê柺á，thái會折(chi̍h)到án-ni？Kìⁿ-nā tī i ê chiu-ûi, bat i ê miâ--ê, lín lóng tio̍h ūi i pi-siong; kóng, Hit ê ióng ê thûi, súi ê koáiⁿ-á, thái ōe chi̍h kàu án-ni?

18Tòa tī Tí-pún ê百姓ah，tio̍h tùi你榮光ê位落來，坐tī乾燥ê地；因為毀滅Mô͘-ap-ê上來攻擊你，毀壞你hiah-ê衛所。Tòa tī Tí-pún ê peh-sìⁿ ah, tio̍h tùi lí êng-kng ê ūi lo̍h-lâi, chē tī ta-sò ê tōe; in-ūi húi-bia̍t Mô͘-ap--ê chiūⁿ-lâi kong-kek lí, húi-hoāi lí hiah ê ōe-só͘.

19Tòa tī A-lô-jíⁿ-ê ah，tio̍h khiā tī路邊觀看，問逃走ê ta-po͘人，kap脫離ê婦人人，講，是甚麼tāi-chì ah？Tòa tī A-lô-jíⁿ--ê ah, tio̍h khiā tī lō͘-piⁿ koan-khòaⁿ, mn̄g tô-cháu ê ta-po͘-lâng, kap thoat-lī ê hū-jîn-lâng, kóng, Sī sím-mi̍h tāi-chì ah?

20Mô͘-ap因為毀壞來見笑，lín tio̍h啼哭喉叫；tio̍h tī A-lùn報告，講，Mô͘-ap變做拋荒。Mô͘-ap in-ūi húi-hoāi lâi kiàn-siàu, lín tio̍h thî-khàu âu-kiò; tio̍h tī A-lùn pò-kò, kóng, Mô͘-ap pìⁿ-chòe pha-hng.

21刑罰已經到tī平洋ê地，tī Hô-lûn，tī Ngá-cha̍p，tī Bí-hoat-ap；Hêng-hoa̍t í-keng kàu tī pîⁿ-iûⁿ ê tōe, tī Hô-lûn, tī Ngá-cha̍p, tī Bí-hoat-ap;

22tī Tí-pún，tī Nî-pho，tī Pek-te-pí-la̍h-thài-im；tī Tí-pún, tī Nî-pho, tī Pek-te-pí-la̍h-thài-im;

23tī Ki-lia̍t-têng，tī Pek-ka-boa̍t，tī Pek-bí-un；tī Ki-lia̍t-têng, tī Pek-ka-boa̍t, tī Pek-bí-un;

24tī加略，tī Pho-su-la̍h，kap Mô͘-ap地遠近所有ê城。tī Ka-lio̍k, tī Pho-su-la̍h, kap Mô͘-ap tōe hn̄g-kūn só͘ ū ê siâⁿ.

25Mô͘-ap ê角剉斷lah，伊ê手骨at折lah；這是耶和華講ê。Mô͘-ap ê kak chhò-tn̄g lah, i ê chhiú-kut at-chi̍h lah; che sī Iâ-hô-hoa kóng--ê.

26Lín tio̍h hō͘ Mô͘-ap酒醉；因為伊自高，悖逆耶和華；伊beh tī伊所吐ê中間kō來kō去；koh beh hō͘人恥笑。Lín tio̍h hō͘ Mô͘-ap chiú-chùi; in-ūi i chū-ko, pōe-ge̍k Iâ-hô-hoa; i beh tī i só͘ thò͘ ê tiong-kan kō-lâi kō-khì; koh beh hō͘ lâng thí-chhiò.

27以色列kiám m̄-bat hō͘你恥笑mah？伊kiám是tī賊ê中間hō͘人查出mah？因為你ta̍k-pái講起伊ê時，就搖頭拌(pōaⁿ)耳。Í-sek-lia̍t kiám m̄-bat hō͘ lí thí-chhiò mah? i kiám sī tī chha̍t ê tiong-kan hō͘ lâng chhâ-chhut mah? in-ūi lí ta̍k-pái kóng-khí i ê sî, chiū iô-thâu pōaⁿ-hī.

28Khiā起tī Mô͘-ap-ê ah，lín tio̍h離開chiah-ê城，khiā起tī石磐；親像ka-chui作siū tī孔口ê邊。Khiā-khí tī Mô͘-ap--ê ah, lín tio̍h lī-khui chiah ê siâⁿ, khiā-khí tī chio̍h-pôaⁿ; chhin-chhiūⁿ ka-chui choh-siū tī khang-kháu ê piⁿ.

29阮有聽見Mô͘-ap ê驕傲，伊ê驕傲到極；伊ê自高，伊ê驕傲，伊ê侮慢，存心家己掠做大。Goán ū thiaⁿ-kìⁿ Mô͘-ap ê kiau-ngō͘, i ê kiau-ngō͘ kàu-ke̍k; i ê chū-ko, i ê kiau-ngō͘, i ê bú-bān, chûn-sim ka-kī lia̍h chòe-tōa.

30耶和華講，我知伊ê受氣，kap伊空空ê誇口，所行是空空。Iâ-hô-hoa kóng, Góa chai i ê siū-khì, kap i khang-khang ê khoa-kháu, só͘-kiâⁿ sī khang-khang.

31因為án-ni，我beh為tio̍h Mô͘-ap啼哭，我beh為tio̍h Mô͘-ap全地喉叫；in beh為tio̍h Kiat-jíⁿ-hap-lia̍t-siat ê人吐氣。In-ūi án-ni, góa beh ūi-tio̍h Mô͘-ap thî-khàu, góa beh ūi-tio̍h Mô͘-ap choân-tōe âu-kiò; in beh ūi-tio̍h Kiat-jíⁿ-hap-lia̍t-siat ê lâng thó͘-khùi.

32Se-pí-má ê葡萄樹ah，我為tio̍h你啼哭，比Ngá-siā人ê啼哭khah傷重；你ê枝thòaⁿ過海，直直伸到Ngá-siā ê海；hit-ê行毀滅ê已經臨到你beh收成ê果子，kap你ê葡萄。Se-pí-má ê phû-tô-chhiū ah, góa ūi-tio̍h lí thî-khàu, pí Ngá-siā lâng ê thî-khàu khah siong-tiōng; lí ê ki thòaⁿ-kè hái, ti̍t-ti̍t chhun kàu Ngá-siā ê hái; hit ê kiâⁿ húi-bia̍t--ê í-keng lîm-kàu lí beh siu-sêng ê ké-chí, kap lí ê phû-tô.

33肥ê田kap Mô͘-ap地，伊ê歡喜快樂lóng無去。我hō͘酒窟ê酒無去；無人踏酒，出歡喜ê聲，hit-ê聲m̄是歡喜ê聲。Pûi ê chhân kap Mô͘-ap tōe, i ê hoaⁿ-hí khoài-lo̍k lóng bô--khì. Góa hō͘ chiú-khut ê chiú bô--khì; bô lâng ta̍h chiú, chhut hoaⁿ-hí ê siaⁿ, hit ê siaⁿ m̄-sī hoaⁿ-hí ê siaⁿ.

34因為Hi-si̍t-pún哀傷ê聲thàng到Í-lī-a-lī，直直到Ngá-cha̍p，koh tùi Só-jíⁿ到Hô-lô-liām，直到I-ki-la̍h Si-lī-si-a，因為Lêng-lîm ê水的確枯焦。In-ūi Hi-si̍t-pún ai-siong ê siaⁿ thàng-kàu Í-lī-a-lī, ti̍t-ti̍t kàu Ngá-cha̍p, koh tùi Só-jíⁿ kàu Hô-lô-liām, ti̍t-kàu I-ki-la̍h Si-lī-si-a, in-ūi Lêng-lîm ê chúi tek-khak ko͘-tâ.

35耶和華講，我beh tī Mô͘-ap地，hō͘ hit-ê獻祭tī山頭壇ê kap hit-ê燒香tī伊hiah-ê神明ê，lóng soah。Iâ-hô-hoa kóng, Góa beh tī Mô͘-ap tōe, hō͘ hit ê hiàn-chè tī soaⁿ-thâu-tôaⁿ--ê kap hit ê sio-hiuⁿ tī i hiah ê sîn-bêng--ê, lóng soah.

36因為án-ni，我ê心為tio̍h Mô͘-ap親像品簫teh tân；我ê心為tio̍h Kiat-jíⁿ-hap-lia̍t-siat人親像品簫teh tân；因為in所積聚ê財物lóng無去。In-ūi án-ni, góa ê sim ūi-tio̍h Mô͘-ap chhin-chhiūⁿ phín-siau teh tân; góa ê sim ūi-tio̍h Kiat-jíⁿ-hap-lia̍t-siat lâng chhin-chhiūⁿ phín-siau teh tân; in-ūi in só͘ chek-chū ê châi-bu̍t lóng bô--khì.

37頭殼ta̍k-ê光khō-khō，嘴鬚ta̍k-ê剪短短，手骨ta̍k-ê割傷，腰hâ麻布。Thâu-khak ta̍k-ê kng-khō-khō, chhùi-chhiu ta̍k-ê chián té-té, chhiú-kut ta̍k-ê koah-siong, io hâ môa-pò͘.

38Tī Mô͘-ap ta̍k間ê厝頂，kap伊hiah-ê街市，ta̍k所在有啼哭；因為我攻破Mô͘-ap，親像kòng破m̄中意ê器具。這是耶和華講ê。Tī Mô͘-ap ta̍k-keng ê chhù-téng, kap i hiah ê koe-chhī, ta̍k só͘-chāi ū thî-khàu; in-ūi Góa kong-phòa Mô͘-ap, chhin-chhiūⁿ kòng-phòa m̄-tèng-ì ê khì-kū. Che sī Iâ-hô-hoa kóng--ê.

39伊毀壞到án-ni！in啼哭到án-ni！Mô͘-ap見笑oa̍t倒tńg到án-ni！親像án-ni，Mô͘-ap beh hō͘四圍ê人恥笑gông-ngia̍h。I húi-hoāi kàu án-ni! in thî-khàu kàu án-ni! Mô͘-ap kiàn-siàu oa̍t-tò-tńg kàu án-ni! chhin-chhiūⁿ án-ni, Mô͘-ap beh hō͘ sì-ûi ê lâng thí-chhiò gông-ngia̍h.

40因為耶和華án-ni講，看ah，伊beh親像鷹鳥飛來，thí開伊ê翼tī Mô͘-ap。In-ūi Iâ-hô-hoa án-ni kóng, Khòaⁿ ah, i beh chhin-chhiūⁿ eng-chiáu pe--lâi, thí-khui i ê si̍t tī Mô͘-ap.

41加略hō͘人取去，hiah-ê衛所hō͘人佔去；到hit日，Mô͘-ap chiah-ê勇士ê心親像beh生kiáⁿ ê婦人人ê心。Ka-lio̍k hō͘ lâng chhú--khì, hiah ê ōe-só͘ hō͘ lâng chiàm--khì; kàu hit-ji̍t, Mô͘-ap chiah ê ióng-sū ê sim chhin-chhiūⁿ beh siⁿ-kiáⁿ ê hū-jîn-lâng ê sim.

42Mô͘-ap beh tú-tio̍h毀滅，無koh成做國；因為in自高，悖逆耶和華。Mô͘-ap beh tú-tio̍h húi-bia̍t, bô koh chiâⁿ-chòe kok; in-ūi in chū-ko, pōe-ge̍k Iâ-hô-hoa.

43耶和華講，Mô͘-ap khiā起ê百姓ah，驚惶、陷坑、活tauh，lóng到tī你。Iâ-hô-hoa kóng, Mô͘-ap khiā-khí ê peh-sìⁿ ah, kiaⁿ-hiâⁿ, hām-khiⁿ, oa̍h-tauh, lóng kàu tī lí.

44走避驚惶ê，beh跋落陷坑；tùi陷坑peh起來ê，beh hō͘活tauh tauh-tio̍h；因為我beh hō͘刑罰ê年臨到Mô͘-ap；這是耶和華講ê。Cháu-pī kiaⁿ-hiâⁿ-ê, beh poa̍h-lo̍h hām-khiⁿ; tùi hām-khiⁿ peh--khí-lâi ê, beh hō͘ oa̍h-tauh tauh-tio̍h; in-ūi Góa beh hō͘ hêng-hoa̍t ê nî lîm-kàu Mô͘-ap; che sī Iâ-hô-hoa kóng--ê.

45Hiah-ê逃走ê氣力盡，khiā tī Hi-si̍t-pún蔭影下；總是火tùi Hi-si̍t-pún出，火燄tùi Se-hông 發，一盡燒Mô͘-ap ê邊界，kap作亂ê人頭殼ê頂面。Hiah ê tô-cháu--ê khùi-la̍t chīn, khiā tī Hi-si̍t-pún ìm-ńg-ē; chóng-sī hé tùi Hi-si̍t-pún chhut, hé-iām tùi Se-hông hoat, it-chīn sio Mô͘-ap ê pian-kài, kap chok-loān ê lâng thâu-khak ê téng-bīn.

46Mô͘-ap ah，你有災厄；Ki-boat ê百姓滅無lah，你ê眾kiáⁿ hō͘人掠去，你ê眾cha-bó͘-kiáⁿ做受掠ê。Mô͘-ap ah, lí ū chai-ē; Ki-boat ê peh-sìⁿ bia̍t-bô lah, lí ê chèng-kiáⁿ hō͘ lâng lia̍h--khì, lí ê chèng cha-bó͘-kiáⁿ chòe siū-lia̍h--ê.

47耶和華講，總是到日後，我beh hō͘ Mô͘-ap受掠ê人倒tńg。論Mô͘-ap受審判ê話，到chia為止。Iâ-hô-hoa kóng, Chóng-sī kàu ji̍t-āu, Góa beh hō͘ Mô͘-ap siū-lia̍h ê lâng tò-tńg. Lūn Mô͘-ap siū sím-phòaⁿ ê ōe, kàu chia ûi-chí.