1論A-bûn。耶和華án-ni講，以色列無kiáⁿ mah？無後嗣mah？Má-le̍k-kham怎樣得tio̍h Ka-tek ê地做業，伊ê百姓怎樣khiā起伊中間hiah-ê城？Lūn A-bûn. Iâ-hô-hoa án-ni kóng, Í-sek-lia̍t bô kiáⁿ mah? bô hō͘-sû mah? Má-le̍k-kham cháiⁿ-iūⁿ tit-tio̍h Ka-tek ê tōe chòe gia̍p, i ê peh-sìⁿ cháiⁿ-iūⁿ khiā-khí i tiong-kan hiah ê siâⁿ?

2耶和華講，看ah，日子beh到，我beh hō͘交戰ê聲聽tī A-bûn族ê La̍h-pa，伊beh成做拋荒ê土堆；伊chiah-ê城beh hō͘火燒；前佔以色列ê，taⁿ beh hō͘以色列佔倒tńg；這是耶和華講ê。Iâ-hô-hoa kóng, Khòaⁿ ah, ji̍t-chí beh kàu, Góa beh hō͘ kau-chiàn ê siaⁿ thiaⁿ tī A-bûn cho̍k ê La̍h-pa, i beh chiâⁿ-chòe pha-hng ê thô͘-tui; i chiah ê siâⁿ beh hō͘ hé sio; chêng chiàm Í-sek-lia̍t--ê, taⁿ beh hō͘ Í-sek-lia̍t chiàm tò-tńg; che sī Iâ-hô-hoa kóng--ê.

3Hi-si̍t-pún ah，你tio̍h哀哭，因為Gāi ê城變做拋荒；La̍h-pa ê百姓ah，tio̍h喉叫，用麻布hâ腰；tio̍h啼哭，行來行去tī籬笆中；因為Má-le̍k-kham kap伊ê祭司貴族beh做一下hō͘人掠去。Hi-si̍t-pún ah, lí tio̍h ai-khàu, in-ūi Gāi ê siâⁿ pìⁿ-chòe pha-hng; La̍h-pa ê peh-sìⁿ ah, tio̍h âu-kiò, ēng môa-pò͘ hâ-io; tio̍h thî-khàu, kiâⁿ-lâi kiâⁿ-khì tī lî-pa-tiong; in-ūi Má-le̍k-kham kap i ê chè-si kùi-cho̍k beh chòe chi̍t-ē hō͘ lâng lia̍h-khì.

4悖逆ê百姓ah，lín啥事因為hiah-ê山谷，就是水潤澤ê山谷，來誇口ah？你óa靠財寶，講，Chī-chūi會來到阮chia。Pōe-ge̍k ê peh-sìⁿ ah, lín siáⁿ-sū in-ūi hiah ê soaⁿ-kok, chiū-sī chúi lūn-te̍k ê soaⁿ-kok, lâi khoa-kháu ah? lí óa-khò châi-pó, kóng, Chī-chūi ōe lâi kàu goán chia.

5主萬軍ê耶和華án-ni講，看ah，我beh hō͘驚惶tùi四圍臨到lín；lín beh受趕出，ta̍k人直直去；走無路ê，無人thang聚集。Chú bān-kun ê Iâ-hô-hoa án-ni kóng, Khòaⁿ ah, Góa beh hō͘ kiaⁿ-hiâⁿ tùi sì-ûi lîm-kàu lín; lín beh siū kóaⁿ-chhut, ta̍k-lâng ti̍t-ti̍t khì; cháu bô lō͘--ê, bô lâng thang chū-chi̍p.

6總是後來我beh hō͘ A-bûn族受掠ê人倒tńg；這是耶和華講ê。Chóng-sī āu-lâi Góa beh hō͘ A-bûn cho̍k siū-lia̍h ê lâng tò-tńg; che sī Iâ-hô-hoa kóng--ê.

7論Í-tong，萬軍ê耶和華án-ni講，Tī Thê-bān無koh有智慧mah？聰明ê人無koh有計畫mah？in ê智慧無去mah？Lūn Í-tong. Bān-kun ê Iâ-hô-hoa án-ni kóng, Tī Thê-bān bô koh ū tì-hūi mah? Chhang-miâ ê lâng bô koh ū kè-e̍k mah? in ê tì-hūi bô--khì mah?

8Tí-tàn ê百姓ah，退去ah，逃走ah，bih去密ah；因為我刑罰以掃ê時，beh hō͘伊ê災厄到tī伊。Tí-tàn ê peh-sìⁿ ah, thè--khì ah, tô-cháu ah, bih khì ba̍t ah; in-ūi Góa hêng-hoa̍t Í-sò ê sî, beh hō͘ i ê chai-ē kàu tī i.

9挽葡萄ê若到你hia挽，kiám無iáu留幾粒á mah？賊若暝時來，kiám m̄是損斷到滿意nā-tiāⁿ？Bán phû-tô--ê nā kàu lí hia bán, kiám bô iáu lâu kúi-lia̍p-á mah? chha̍t nā mî--sî lâi, kiám m̄-sī sńg-tn̄g kàu móa-ì nā-tiāⁿ?

10總是我hō͘以掃光溜溜，露現伊khǹg密ê所在，致到無tè thang bih；伊ê後裔，伊ê兄弟，伊ê厝邊lóng失敗；伊亦歸tī無。Chóng-sī Góa hō͘ Í-sò kng-liu-liu, lō͘-hiān i khǹg-ba̍t ê só͘-chāi, tì-kàu bô tè thang bih; i ê hō͘-è, i ê hiaⁿ-tī, i ê chhù-piⁿ lóng sit-pāi; i ia̍h kui tī bô.

11Tio̍h將你無父ê kiáⁿ放下teh，我beh保全in活；你chiah-ê寡婦，亦tio̍h óa靠我。Tio̍h chiong lí bô-pē ê kiáⁿ pàng-hē-teh, Góa beh pó-choân in oa̍h; lí chiah ê kóaⁿ-hū, ia̍h tio̍h óa-khò góa.

12因為耶和華án-ni講，看ah，本m̄應該lim hit-ê杯ê，的確beh lim伊，莫kioh你，你kiám會一盡免刑罰mah？你的確bōe免得刑罰，你的確tio̍h lim伊。In-ūi Iâ-hô-hoa án-ni kóng, Khòaⁿ ah, pún m̄ eng-kai lim hit ê poe--ê, tek-khak beh lim--i, bo̍h-kioh lí, lí kiám ōe it-chīn bián hêng-hoa̍t mah? lí tek-khak bōe bián-tit hêng-hoa̍t, lí tek-khak tio̍h lim--i.

13耶和華講，我kí家己來chiù-chōa，Pho-su-la̍h beh成做thang gông-ngia̍h，thang凌辱，thang咒詛，koh荒廢；伊lóng總ê城beh永遠變做拋荒。Iâ-hô-hoa kóng, Góa kí ka-kī lâi chiù-chōa, Pho-su-la̍h beh chiâⁿ-chòe thang gông-ngia̍h, thang lêng-jio̍k, thang chiù-chó͘, koh hong-hòe; i lóng-chóng ê siâⁿ beh éng-oán pìⁿ-chòe pha-hng.

14我tùi耶和華hia聽見消息，亦有使者奉差去列國，講，Lín tio̍h聚集來攻擊伊，tio̍h起來交戰。Góa tùi Iâ-hô-hoa hia thiaⁿ-kìⁿ siau-sit, ia̍h ū sù-chiá hōng-chhe khì lia̍t-kok, kóng, Lín tio̍h chū-chi̍p lâi kong-kek i, tio̍h khí-lâi kau-chiàn.

15因為我hō͘你tī列國中做微細，hō͘人看輕。In-ūi Góa hō͘ lí tī lia̍t-kok-tiong chòe bî-sòe, hō͘ lâng khòaⁿ-khin.

16Khiā起石洞內，把守山頂ê ah，你ê威風，你心內ê驕傲家己騙；你雖然親像鷹鳥，作你ê siū tī高ê所在，我beh tùi hia kā你取落來；這是耶和華講ê。Khiā-khí chio̍h-tōng-lāi, pé-siú soaⁿ-téng--ê ah, lí ê ui-hong, lí sim-lāi ê kiau-ngō͘ ka-kī phiàn; lí sui-jiân chhin-chhiūⁿ eng-chiáu, choh lí ê siū tī koâiⁿ ê só͘-chāi, Góa beh tùi hia kā lí chhú-lo̍h-lâi; che sī Iâ-hô-hoa kóng--ê.

17Í-tong beh成做thang gông-ngia̍h-ê，見若tùi hia過ê，的確beh奇怪，因為伊所tú-tio̍h一切ê災厄，來恥笑伊。Í-tong beh chiâⁿ-chòe thang gông-ngia̍h--ê, kìⁿ-nā tùi hia kè--ê, tek-khak beh kî-koài, in-ūi i só͘ tú-tio̍h it-chhè ê chai-ē, lâi thí-chhiò i.

18耶和華講，的確無人khiā起tī-hia，亦無人寄腳tī-hia；是beh親像所多瑪、蛾摩拉，kap附近ê城倒壞一樣。Iâ-hô-hoa kóng, Tek-khak bô lâng khiā-khí tī-hia, ia̍h bô lâng kià-kha tī-hia; sī beh chhin-chhiūⁿ Só͘-to-má, Gô-mô͘-la̍h, kap hū-kūn ê siâⁿ tó-hoāi chi̍t-iūⁿ.

19看ah，伊beh親像獅，tùi約旦河邊ê樹林起來，攻擊堅固khiā起ê所在；目nih久我beh hō͘ in逃走，離開chit-ê所在。Chī-chūi受揀選，我就派伊治理chit-ê地；是誰能比得我？是誰能kā我定一個期ah？有甚麼牧者能khiā tī我ê面前ah？Khòaⁿ ah, i beh chhin-chhiūⁿ sai, tùi Iok-tàn hô-piⁿ ê chhiū-nâ khí--lâi, kong-kek kian-kò͘ khiā-khí ê só͘-chāi; ba̍k-nih-kú Góa beh hō͘ in tô-cháu, lī-khui chit ê só͘-chāi. Chī-chūi siū kéng-soán, Góa chiū phài i tī-lí chit ê tōe; chī-chūi ōe pí--tit Góa? chī-chūi ōe kā Góa tēng chi̍t ê kî ah? ū sím-mi̍h bo̍k-chiá ōe khiā tī Góa ê bīn-chêng ah?

20所以lín tio̍h聽耶和華所計畫攻擊Í-tong ê計策；以及祂所註定攻擊Thê-bān khiā起ê百姓ê旨意；in定tio̍h beh將hiah-ê羊群ê細ê拖去；祂亦beh hō͘ in khiā起ê所在荒廢。Só͘-í lín tio̍h thiaⁿ Iâ-hô-hoa só͘ kè-e̍k kong-kek Í-tong ê kè-chhek; í-ki̍p I só͘ chù-tiāⁿ kong-kek Thê-bān khiā-khí ê peh-sìⁿ ê chí-ì; in tiāⁿ-tio̍h beh chiong hiah ê iûⁿ-kûn ê sòe--ê thoa--khì; I ia̍h beh hō͘ in khiā-khí ê só͘-chāi hong-hòe.

21因為in倒壞ê聲，地就振動；in喉叫ê聲，聽到紅海。In-ūi in tó-hoāi ê siaⁿ, tōe chiū tín-tāng; in âu-kiò ê siaⁿ, thiaⁿ kàu Âng-hái.

22看ah，伊beh起來，親像鷹鳥飛來，thí開伊ê翼tī Pho-su-la̍h；到hit日，Í-tong chiah-ê勇士ê心親像beh生kiáⁿ ê婦人人ê心。Khòaⁿ ah, i beh khí--lâi, chhin-chhiūⁿ eng-chiáu pe--lâi, thí-khui i ê si̍t tī Pho-su-la̍h; kàu hit-ji̍t, Í-tong chiah ê ióng-sū ê sim chhin-chhiūⁿ beh siⁿ-kiáⁿ ê hū-jîn-lâng ê sim.

23論大馬色。Hap-má kap A-jíⁿ-poa̍t見笑，因為in聽見pháiⁿ消息，就失膽；海面有憂愁，bōe平靜。Lūn Tāi-má-sek. Hap-má kap A-jíⁿ-poa̍t kiàn-siàu, in-ūi in thiaⁿ-kìⁿ pháiⁿ siau-sit, chiū sit-táⁿ; hái-bīn ū iu-chhiû, bōe pêng-chēng.

24大馬色衰弱，oa̍t-tńg身beh逃走，ngia̍uh-ngia̍uh-chhoah，將伊掠tiâu-tiâu；痛苦憂愁將伊khiú-tiâu-tiâu，親像beh生kiáⁿ ê婦人人一樣。Tāi-má-sek soe-jio̍k, oa̍t-tńg-sin beh tô-cháu, ngia̍uh-ngia̍uh-chhoah, chiong i lia̍h-tiâu-tiâu; thòng-khó͘ iu-chhiû chiong i khiú-tiâu-tiâu, chhin-chhiūⁿ beh siⁿ-kiáⁿ ê hū-jîn-lâng chi̍t-iūⁿ.

25Thang o-ló ê城，就是我所歡喜ê城，怎樣受放sak到án-ni？Thang o-ló ê siâⁿ, chiū-sī Góa só͘ hoaⁿ-hí ê siâⁿ, cháiⁿ-iūⁿ siū pàng-sak kàu án-ni?

26伊ê少年人beh tī伊ê街市倒落去；當hit日伊一切ê兵丁beh滅無；這是萬軍ê耶和華講ê。I ê siàu-liân lâng beh tī i ê koe-chhī tó--lo̍h-khì; tng hit-ji̍t i it-chhè ê peng-teng beh bia̍t-bô; che sī bān-kun ê Iâ-hô-hoa kóng--ê.

27我亦beh hō͘火to̍h tī大馬色ê城牆，燒滅Piān-hap-ta̍t ê宮殿。Góa ia̍h beh hō͘ hé to̍h tī Tāi-má-sek ê siâⁿ-chhiûⁿ, sio-bia̍t Piān-hap-ta̍t ê kiong-tiān.

28論Ki-ta̍t kap Hā-só chiah-ê國，就是巴比倫王Nî-pò͘-kah-nî-sat所phah-ê，耶和華án-ni講：你起來，上去Ki-ta̍t，剿滅東方ê人。Lūn Ki-ta̍t kap Hā-só chiah ê kok, chiū-sī Pa-pí-lûn ông Nî-pò͘-kah-nî-sat só͘ phah--ê, Iâ-hô-hoa án-ni kóng: Lí khí-lâi, chiūⁿ--khì Ki-ta̍t, châu-bia̍t tang-hng ê lâng.

29In ê布棚kap羊群，人beh搶去；將帳幅kap一切ê器具，kap駱駝，搶做家己ê；人對in hoah講，四圍lóng有驚惶。In ê pò͘-pîⁿ kap iûⁿ-kûn, lâng beh chhiúⁿ--khì; chiong tiùⁿ-pak kap it-chhè ê khì-kū, kap lo̍k-tô, chhiúⁿ chòe ka-kī ê; lâng tùi in hoah kóng, Sì-ûi lóng ū kiaⁿ-hiâⁿ.

30耶和華講，Hā-só khiā起ê百姓ah，tio̍h逃走，走去遠，bih去密；因為巴比倫王Nî-pò͘-kah-nî-sat設計beh害lín，定tio̍h意思beh攻擊lín。Iâ-hô-hoa kóng, Hā-só khiā-khí ê peh-sìⁿ ah, tio̍h tô-cháu, cháu-khì-hn̄g, bih-khì-ba̍t; in-ūi Pa-pí-lûn ông Nî-pò͘-kah-nî-sat siat-kè beh hāi lín, tiāⁿ-tio̍h ì-sù beh kong-kek lín.

31耶和華講，起來，上去攻擊安然khiā起無掛慮ê族，in無門戶，無門閂，是家己khiā起ê。Iâ-hô-hoa kóng, Khí--lâi, chiūⁿ--khì kong-kek an-jiân khiā-khí bô khòa-lū ê cho̍k, in bô mn̂g-hō͘, bô mn̂g-chhòaⁿ, sī ka-kī khiā-khí--ê.

32In ê駱駝beh hō͘人搶去；in chōe-chōe cheng-siⁿ beh hō͘人劫去；見若剃鬢邊ê，beh趕散in tī四方；hō͘災厄tùi四圍到tī in；這是耶和華講ê。In ê lo̍k-tô beh hō͘ lâng chhiúⁿ--khì; in chōe-chōe cheng-siⁿ beh hō͘ lâng kiap--khì; kìⁿ-nā thì pìn-piⁿ--ê, beh kóaⁿ-sòaⁿ in tī sì-hng; hō͘ chai-ē tùi sì-ûi kàu tī in; che sī Iâ-hô-hoa kóng--ê.

33Hā-só beh成做野狗 tiàm ê所在，永遠悽凊，無人tī-hia khiā起，亦無人tī-hia寄腳。Hā-só beh chiâⁿ-chòe iá-káu tiàm ê só͘-chāi, éng-oán chhiⁿ-chhìn, bô lâng tī-hia khiā-khí, ia̍h bô lâng tī-hia kià-kha.

34猶大王Se-tí-ka起頭坐位ê時，耶和華論Í-lân ê話臨到先知耶利米講，Iû-tāi ông Se-tí-ka khí-thâu chē-ūi ê sî, Iâ-hô-hoa lūn Í-lân ê ōe lîm-kàu sian-ti Iâ-lī-bí kóng,

35萬軍ê耶和華án-ni講，看ah，我beh at折Í-lân人ê弓，就是in上等ê氣力。Bān-kun ê Iâ-hô-hoa án-ni kóng, Khòaⁿ ah, Góa beh at-chi̍h Í-lân lâng ê keng, chiū-sī in siōng-téng ê khùi-la̍t.

36我beh hō͘四面ê風tùi天ê四面吹來，臨到Í-lân人，將in趕散tī四方；Í-lân受趕散ê人無一國無到。Góa beh hō͘ sì-bīn ê hong tùi thiⁿ ê sì-bīn chhe--lâi, lîm-kàu Í-lân lâng, chiong in kóaⁿ-sòaⁿ tī sì-hng; Í-lân siū kóaⁿ-sòaⁿ ê lâng bô chi̍t-kok bô kàu.

37耶和華講，我beh hō͘ Í-lân人tī對敵ê面前kap siàu想in ê性命ê人ê面前來驚惶；我也beh hō͘災厄，就是我ê大受氣，臨到in；koh beh hō͘刀劍追jip in，到一盡滅in。Iâ-hô-hoa kóng, Góa beh hō͘ Í-lân lâng tī tùi-te̍k ê bīn-chêng kap siàu-siūⁿ in ê sìⁿ-miā ê lâng ê bīn-chêng lâi kiaⁿ-hiâⁿ; Góa iā beh hō͘ chai-ē, chiū-sī Góa ê tōa siū-khì, lîm-kàu in; koh beh hō͘ to-kiàm tui-jip in, kàu it-chīn bia̍t in.

38我beh設立我ê寶座tī Í-lân，tùi-hia除去君王kap貴族；這是耶和華講ê。Góa beh siat-li̍p Góa ê pó-chō tī Í-lân, tùi-hia tû--khì kun-ông kap kùi-cho̍k; che sī Iâ-hô-hoa kóng--ê.

39總是到日後，我beh hō͘ Í-lân受掠ê人tò來；這是耶和華講ê。Chóng-sī kàu ji̍t-āu, Góa beh hō͘ Í-lân siū-lia̍h ê lâng tò--lâi; che sī Iâ-hô-hoa kóng--ê.

1耶和華託先知耶利米論巴比倫，論Ka-le̍k-tí人ê地，所講ê話。Iâ-hô-hoa thok sian-ti Iâ-lī-bí lūn Pa-pí-lûn, lūn Ka-le̍k-tí lâng ê tōe, só͘ kóng ê ōe.

2Lín tio̍h傳播tī列邦中hō͘ in聽見，tio̍h khiā大旗；tio̍h hō͘ in聽見，m̄-thang隱瞞；講，巴比倫受攻破，Pí-le̍k見笑，Bí-lô-ta̍t phah-pháiⁿ，伊ê佛lóng見笑，伊ê偶像lóng phah-pháiⁿ。Lín tio̍h thoân-pò͘ tī lia̍t-pang-tiong hō͘ in thiaⁿ-kìⁿ, tio̍h khiā tōa-kî; tio̍h hō͘ in thiaⁿ-kìⁿ, m̄-thang ún-môa; kóng, Pa-pí-lûn siū kong-phòa, Pí-le̍k kiàn-siàu, Bí-lô-ta̍t phah-pháiⁿ, i ê pu̍t lóng kiàn-siàu, i ê ngó͘-siōng lóng phah-pháiⁿ.

3因為有一國tùi北方起來攻擊伊，beh hō͘伊ê地拋荒，無人khiā起；人kap cheng-siⁿ lóng走去。In-ūi ū chi̍t-kok tùi pak-hng khí-lâi kong-kek i, beh hō͘ i ê tōe pha-hng, bô lâng khiā-khí; lâng kap cheng-siⁿ lóng cháu--khì.

4耶和華講，hit日hit時以色列人beh來，in beh kap猶大人相kap來，in beh行路，ná行ná哮，來chhē in ê上帝耶和華。Iâ-hô-hoa kóng, Hit-ji̍t hit-sî Í-sek-lia̍t lâng beh lâi, in beh kap Iû-tāi lâng saⁿ-kap lâi, in beh kiâⁿ-lō͘, ná-kiâⁿ ná-háu, lâi chhē in ê Siōng-tè Iâ-hô-hoa.

5In問錫安ê事，面ǹg-hia，講，來lah，lín tio̍h結永遠無bōe記得ê約，來kap耶和華連合。In mn̄g Sek-an ê sū, bīn ǹg-hia, kóng, Lâi--lah, lín tio̍h kiat éng-oán bô bōe-kì-tit ê iok, lâi kap Iâ-hô-hoa liân-ha̍p.

6我ê百姓做迷路ê羊；in ê牧者hō͘ in行叉路；hō͘ in oat去山裡；in tùi大山行到小山，bōe記得in安歇ê所在。Góa ê peh-sìⁿ chòe bê-lō͘ ê iûⁿ; in ê bo̍k-chiá hō͘ in kiâⁿ chha-lō͘; hō͘ in oat--khì soaⁿ--nih; in tùi tōa-soaⁿ kiâⁿ kàu sió-soaⁿ, bōe-kì-tit in an-hioh ê só͘-chāi.

7見若tú-tio̍h in ê beh吞食in；in chiah-ê對敵講，阮無罪，因為in得罪耶和華，就是公義khiā起ê所在，也是in ê列祖所ǹg望ê耶和華。Kìⁿ-nā tú-tio̍h in ê beh thun-chia̍h in; in chiah ê tùi-te̍k kóng, Goán bô chōe, in-ūi in tek-chōe Iâ-hô-hoa, chiū-sī kong-gī khiā-khí ê só͘-chāi, iā sī in ê lia̍t-chó͘ só͘ ǹg-bāng ê Iâ-hô-hoa.

8Lín tio̍h tùi巴比倫中逃走，tùi Ka-le̍k-tí人ê地出去；tio̍h親像公ê山羊tī羊群ê頭前。Lín tio̍h tùi Pa-pí-lûn tiong tô-cháu, tùi Ka-le̍k-tí lâng ê tōe chhut--khì; tio̍h chhin-chhiūⁿ kang ê soaⁿ-iûⁿ tī iûⁿ-kûn ê thâu-chêng.

9我beh激動chōe-chōe大國tùi北方相kap來攻擊巴比倫；in beh排陣攻擊伊；伊beh tùi-hia受攻破；in ê箭beh親像gâu射ê勇士ê箭，lóng無空空倒tńg來。Góa beh kek-tōng chōe-chōe tōa-kok tùi pak-hng saⁿ-kap lâi kong-kek Pa-pí-lûn; in beh pâi-tīn kong-kek i; i beh tùi-hia siū kong-phòa; in ê chìⁿ beh chhin-chhiūⁿ gâu siā ê ióng-sū ê chìⁿ, lóng bô khang-khang tò-tńg-lâi.

10Ka-le̍k-tí beh hō͘人搶去；見若搶伊ê lóng beh滿意；這是耶和華講ê。Ka-le̍k-tí beh hō͘ lâng chhiúⁿ--khì; kìⁿ-nā chhiúⁿ-i--ê lóng beh móa-ì; che sī Iâ-hô-hoa kóng--ê.

11搶我ê業ê ah，因為lín歡喜快樂；因為lín跳來跳去親像踏五穀ê牛母，也teh哮親像勇ê馬；Chhiúⁿ Góa ê gia̍p--ê ah, in-ūi lín hoaⁿ-hí khoài-lo̍k; in-ūi lín thiàu-lâi thiàu-khì chhin-chhiūⁿ ta̍h gō͘-kak ê gû-bú, iā teh háu chhin-chhiūⁿ ióng ê bé;

12lín ê老母beh見笑到極，生你ê的確漏氣；看ah，伊beh列tī chiah-ê國ê路尾，成做曠野，做乾燥ê地，做沙漠。lín ê lāu-bú beh kiàn-siàu kàu-ke̍k, siⁿ--lí-ê tek-khak làu-khùi; khòaⁿ ah, i beh lia̍t tī chiah ê kok ê lō͘-bé, chiâⁿ-chòe khòng-iá, chòe ta-sò ê tōe, chòe soa-bô͘.

13因為耶和華ê大受氣，的確無人khiā起，beh全然拋荒；見若經過巴比倫ê beh gông-ngia̍h，也因為伊所tú-tio̍h chiah-ê災厄來恥笑伊。In-ūi Iâ-hô-hoa ê tōa siū-khì, tek-khak bô lâng khiā-khí, beh choân-jiân pha-hng; kìⁿ-nā keng-kè Pa-pí-lûn--ê beh gông-ngia̍h, iā in-ūi i só͘ tú-tio̍h chiah ê chai-ē lâi thí-chhiò i.

14開弓ê人ah，lín tio̍h tī巴比倫四圍排陣；tio̍h射箭攻擊伊，莫得保惜lín ê箭；因為伊有得罪耶和華。Khui-keng ê lâng ah, lín tio̍h tī Pa-pí-lûn sì-ûi pâi-tīn; tio̍h siā-chìⁿ kong-kek i, bo̍h-tit pó-sioh lín ê chìⁿ; in-ūi i ū tek-chōe Iâ-hô-hoa.

15Lín tio̍h tī伊ê四圍hoah-hiàm；伊已經投降；伊ê營寨倒壞lah，城牆拆毀lah；因為這是耶和華報仇ê事，lín tio̍h ǹg伊報仇；伊怎樣款待人，也tio̍h án-ni款待伊。Lín tio̍h tī i ê sì-ûi hoah-hiàm; i í-keng tâu-hâng; i ê iâⁿ-chē tó-hoāi lah, siâⁿ-chhiûⁿ thiah-húi lah; in-ūi che sī Iâ-hô-hoa pò-siû ê sū, lín tio̍h ǹg i pò-siû; i cháiⁿ-iūⁿ khoán-thāi lâng, iā tio̍h án-ni khoán-thāi i.

16Lín tio̍h tùi巴比倫剪除掖種ê kap收割ê時kia̍h鐮á ê；因為驚壓制ê刀劍ta̍k人beh tò去本族，ta̍k人beh走到本所在。Lín tio̍h tùi Pa-pí-lûn chián-tû iā-chéng-ê kap siu-koah ê sî kia̍h liâm-á ê; in-ūi kiaⁿ ap-chè ê to-kiàm ta̍k-lâng beh tò--khì pún-cho̍k, ta̍k-lâng beh cháu kàu pún só͘-chāi.

17以色列是四散ê羊，是hō͘獅趕走ê；事先是亞述王吞伊，路尾chit-ê巴比倫王，Nî-pò͘-kah-nî-sat，at折伊ê骨頭。Í-sek-lia̍t sī sì-sòaⁿ ê iûⁿ, sī hō͘ sai kóaⁿ-cháu--ê; tāi-seng sī A-su̍t ông thun i, lō͘-bé chit ê Pa-pí-lûn ông, Nî-pò͘-kah-nî-sat, at-chi̍h i ê kut-thâu.

18所以萬軍ê耶和華，以色列ê上帝，án-ni講，看ah，我beh刑罰巴比倫王kap伊ê地，親像我bat刑罰亞述王一樣。Só͘-í bān-kun ê Iâ-hô-hoa, Í-sek-lia̍t ê Siōng-tè, án-ni kóng, Khòaⁿ ah, Góa beh hêng-hoa̍t Pa-pí-lûn ông kap i ê tōe, chhin-chhiūⁿ Góa bat hêng-hoa̍t A-su̍t ông chi̍t-iūⁿ.

19我beh koh chhōa以色列tò來伊ê草場，伊beh tī Ka-bi̍t kap Pa-san食草；koh tī Í-hoat-liân山kap Ki-lia̍t地，伊ê心得tio̍h飽足。Góa beh koh chhōa Í-sek-lia̍t tò-lâi i ê chháu-tiûⁿ, i beh tī Ka-bi̍t kap Pa-san chia̍h chháu; koh tī Í-hoat-liân soaⁿ kap Ki-lia̍t tōe, i ê sim tit-tio̍h pá-chiok.

20耶和華講，hit日hit時beh查以色列ê罪過，也lóng總無；beh chhē猶大ê罪惡，也chhē無；因為我所留teh ê百姓我beh赦免in。Iâ-hô-hoa kóng, Hit-ji̍t hit-sî beh chhâ Í-sek-lia̍t ê chōe-kòa, iā lóng-chóng bô; beh chhē Iû-tāi ê chōe-ok, iā chhē-bô; in-ūi góa só͘ lâu-teh ê peh-sìⁿ Góa beh sià-bián in.

21耶和華講，Tio̍h上去攻擊Bí-la̍h-tāi-ong ê地kap Pí-kat khiā起ê百姓；tio̍h追jip一盡thâi in，照我一切所吩咐你ê去行。Iâ-hô-hoa kóng, Tio̍h chiūⁿ-khì kong-kek Bí-la̍h-tāi-ong ê tōe kap Pí-kat khiā-khí ê peh-sìⁿ; tio̍h tui-jip it-chīn thâi in, chiàu Góa it-chhè só͘ hoan-hù lí-ê khì kiâⁿ.

22境內有交戰ê聲kap大毀滅。Kéng-lāi ū kau-chiàn ê siaⁿ kap tōa húi-bia̍t.

23Phah全地ê大支槌怎樣phah折毀壞ah！巴比倫tī列國中怎樣拋荒ah！Phah choân-tōe ê tōa ki thûi cháiⁿ-iūⁿ phah-chi̍h húi-hoāi ah! Pa-pí-lûn tī lia̍t-kok tiong cháiⁿ-iūⁿ pha-hng ah!

24巴比倫ah，我為你設活tauh，你hō͘伊tauh-tio̍h也m̄知；你hō͘人chhē-tio̍h，掠tio̍h，因為你kap耶和華做對敵。Pa-pí-lûn ah, Góa ūi lí siat oa̍h-tauh, lí hō͘ i tauh-tio̍h iā m̄-chai; lí hō͘ lâng chhē-tio̍h, lia̍h-tio̍h, in-ūi lí kap Iâ-hô-hoa chòe tùi-te̍k.

25耶和華已經開祂ê軍裝局，kia̍h出伊大受氣ê器械；因為主，萬軍ê耶和華，有tāi-chì tī Ka-le̍k-tí人ê地。Iâ-hô-hoa í-keng khui I ê kun-chong-ke̍k, kia̍h-chhut I tōa siū-khì ê khì-hâi; in-ūi Chú, bān-kun ê Iâ-hô-hoa, ū tāi-chì tī Ka-le̍k-tí lâng ê tōe.

26Lín tio̍h tùi極遠ê邊界來攻擊伊；開伊ê粟倉；hiat伊成土堆，一盡滅伊，無留半項。Lín tio̍h tùi ke̍k-hn̄g ê piⁿ-kài lâi kong-kek i; khui i ê chhek-chhng; hiat i chiâⁿ thô͘-tui, it-chīn bia̍t i, bô lâu pòaⁿ-hāng.

27Tio̍h thâi伊一切ê牛káng；hō͘ in落去受thâi；in有災厄ah！因為辦in ê日，hit-ê期已經到。Tio̍h thâi i it-chhè ê gû-káng; hō͘ in lo̍h--khì siū-thâi; in ū chai-ē ah! in-ūi pān in ê ji̍t, hit ê kî í-keng kàu.

28有tùi巴比倫地逃走出來ê ê聲，tī錫安報告耶和華咱ê上帝報仇，就是祂為tio̍h祂ê殿來報仇。Ū tùi Pa-pí-lûn tōe tô-cháu chhut-lâi-ê ê siaⁿ, tī Sek-an pò-kò Iâ-hô-hoa lán ê Siōng-tè pò-siû, chiū-sī I ūi-tio̍h I ê tiān lâi pò-siû.

29Tio̍h招集射箭ê兵，就是一切開弓ê，來攻擊巴比倫；tī伊ê四圍紮營來phah伊；m̄-thang hō͘伊走一個；照伊所做ê報應伊；伊怎樣款待人，tio̍h照án-ni款待伊；因為伊驕傲悖逆耶和華，以色列ê聖ê。Tio̍h chio-chi̍p siā-chìⁿ ê peng, chiū-sī it-chhè khui-keng--ê, lâi kong-kek Pa-pí-lûn; tī i ê sì-ûi chat-iâⁿ lâi phah i; m̄-thang hō͘ i cháu chi̍t-ê; chiàu i só͘ chòe--ê pò-èng i; i cháiⁿ-iūⁿ khoán-thāi lâng, tio̍h chiàu án-ni khoán-thāi i; in-ūi i kiau-ngō͘ pōe-ge̍k Iâ-hô-hoa, Í-sek-lia̍t ê Sèng--ê.

30因為án-ni伊ê少年人beh tī伊ê街市倒落去，當hit日伊一切ê兵丁beh滅無；這是耶和華講ê。In-ūi án-ni i ê siàu-liân lâng beh tī i ê koe-chhī tó--lo̍h-khì, tng hit-ji̍t i it-chhè ê peng-teng beh bia̍t-bô; che sī Iâ-hô-hoa kóng--ê.

31主，萬軍ê耶和華講，看ah，驕傲ê ah，我做你ê對敵；因為我辦你ê日，hit-ê期已經到。Chú, bān-kun ê Iâ-hô-hoa kóng, Khòaⁿ ah, kiau-ngō͘--ê ah, góa chòe lí ê tùi-te̍k; in-ūi Góa pān lí ê ji̍t, hit ê kî í-keng kàu.

32驕傲ê tio̍h-tak跋倒，無人扶伊起來；我beh hō͘火tī伊hiah-ê城to̍h去來，將伊四圍所有ê一盡燒lio去。Kiau-ngō͘--ê tio̍h-tak poa̍h-tó, bô lâng hû i khí--lâi; Góa beh hō͘ hé tī i hiah ê siâⁿ to̍h--khì-lâi, chiong i sì-ûi só͘-ū-ê it-chīn sio-lio-khì.

33萬軍ê耶和華án-ni講，以色列人kap猶大人平平受壓制；凡若掠in-ê，lóng kā伊顧tiâu-tiâu，m̄肯放伊去。Bān-kun ê Iâ-hô-hoa án-ni kóng, Í-sek-lia̍t lâng kap Iû-tāi lâng pîⁿ-pîⁿ siū ap-chè; hoān-nā lia̍h-in--ê, lóng kā i kò͘-tiâu-tiâu, m̄-khéng pàng i khì.

34救贖in-ê有大氣力；祂ê名是萬軍ê耶和華，祂beh申in ê冤，hō͘全地得tio̍h平安，亦hō͘巴比倫khiā起ê百姓ngia̍uh-ngia̍uh-chhoah。Kiù-sio̍k in--ê ū tōa khùi-la̍t; I ê miâ sī bān-kun ê Iâ-hô-hoa, I beh sin in ê oan, hō͘ choân-tōe tit-tio̍h pêng-an, ia̍h hō͘ Pa-pí-lûn khiā-khí ê peh-sìⁿ ngia̍uh-ngia̍uh-chhoah.

35耶和華講，有刀劍臨到Ka-le̍k-tí人，kap巴比倫khiā起ê百姓，kap in ê貴族，kap in ê博士。Iâ-hô-hoa kóng, Ū to-kiàm lîm-kàu Ka-le̍k-tí lâng, kap Pa-pí-lûn khiā-khí ê peh-sìⁿ, kap in ê kùi-cho̍k, kap in ê phok-sū.

36有刀劍臨到誇口ê人，in就成做戇；有刀劍臨到伊ê勇士，in就驚惶。Ū to-kiàm lîm-kàu khoa-kháu ê lâng, in chiū chiâⁿ-chòe gōng; ū to-kiàm lîm-kàu i ê ióng-sū, in chiū kiaⁿ-hiâⁿ.

37有刀劍臨到伊ê馬，伊ê車，kap其中ê十色人；in beh親像婦人人一樣；有刀劍臨到伊ê寶物，就受搶奪。Ū to-kiàm lîm-kàu i ê bé, i ê chhia, kap kî-tiong ê cha̍p-sek lâng; in beh chhin-chhiūⁿ hū-jîn-lâng chi̍t-iūⁿ; ū to-kiàm lîm-kàu i ê pó-mi̍h, chiū siū chhiúⁿ-toa̍t.

38有炕旱臨到伊lóng總ê水，就beh乾乾去；因為這是雕刻偶像ê地，人因為神佛來顛狂。Ū khòng-hān lîm-kàu i lóng-chóng ê chúi, chiū beh ta-la--khì; in-ūi che sī tiau-khek ngó͘-siōng ê tōe, lâng in-ūi sîn-pu̍t lâi tian-kông.

39所以曠野ê走獸kap豺狼beh tiàm tī-hia；刀劍亦beh tiàm tī hit中間；永永無人煙，代代無人khiā。Só͘-í khòng-iá ê cháu-siù kap chhâi-lông beh tiàm tī-hia; to-kiàm ia̍h beh tiàm tī hit tiong-kan; éng-éng bô jîn-ian, tāi-tāi bô lâng khiā.

40耶和華講，的確無人khiā起tī-hia，亦無人寄腳tī in中間；beh親像我上帝chhia倒所多瑪、蛾摩拉，kap附近ê城一樣。Iâ-hô-hoa kóng, Tek-khak bô lâng khiā-khí tī-hia, ia̍h bô lâng kià-kha tī in tiong-kan; beh chhin-chhiūⁿ Góa Siōng-tè chhia-tó Só͘-to-má, Gô-mô͘-la̍h, kap hū-kūn ê siâⁿ chi̍t-iūⁿ.

41看ah，有百姓tùi北方來；亦有大國kap chōe-chōe君王受激動，tùi地極來。Khòaⁿ ah, ū peh-sìⁿ tùi pak-hng lâi; ia̍h ū tōa-kok kap chōe-chōe kun-ông siū kek-tōng, tùi tōe-ke̍k lâi.

42In kia̍h弓 kap鎗，殘忍無憐憫；in ê聲親像海湧hōa-hōa哮；in騎馬排隊，親像上陣ê人；巴比倫ê城ah，in beh攻擊你。In kia̍h keng kap chhiuⁿ, chân-jím bô lîn-bín; in ê siaⁿ chhin-chhiūⁿ hái-éng hōa-hōa-háu; in khiâ-bé pâi-tūi, chhin-chhiūⁿ chiūⁿ-tīn ê lâng; Pa-pí-lûn ê siâⁿ ah, in beh kong-kek lí.

43巴比倫王聽見in ê風聲，手就軟落去；痛苦kā伊擒tiâu，痛疼親像beh生kiáⁿ ê婦人人。Pa-pí-lûn ông thiaⁿ-kìⁿ in ê hong-siaⁿ, chhiú chiū nńg--lo̍h-khì; thòng-khó͘ kā i khîⁿ-tiâu, thàng-thiàⁿ chhin-chhiūⁿ beh siⁿ-kiáⁿ ê hū-jîn-lâng.

44看ah，伊beh親像獅tùi約旦河邊ê樹林起來，攻擊堅固khiā起ê所在；目nih久，我beh hō͘ in逃走，離開chit-ê所在；是誰受揀選，我就派伊治理chit-ê地；是誰能比得我？是誰能kā我定一個期 ah？有甚麼牧者能khiā tī我ê面前ah？Khòaⁿ ah, i beh chhin-chhiūⁿ sai tùi Iok-tàn hô-piⁿ ê chhiū-nâ khí--lâi, kong-kek kian-kò͘ khiā-khí ê só͘-chāi; ba̍k-nih-kú, Góa beh hō͘ in tô-cháu, lī-khui chit ê só͘-chāi; chī-chūi siū kéng-soán, Góa chiū phài i tī-lí chit ê tōe; chī-chūi ōe pí--tit Góa? chī-chūi ōe kā Góa tēng chi̍t ê kî ah? ū sím-mi̍h bo̍k-chiá ōe khiā tī Góa ê bīn-chêng ah?

45所以lín tio̍h聽耶和華所計畫攻擊巴比倫ê計策；以及祂所註定攻擊Ka-le̍k-tí ê旨意。In定tio̍h beh將hiah-ê羊群ê細ê拖去。祂也beh hō͘ in khiā起ê所在荒廢。Só͘-í lín tio̍h thiaⁿ Iâ-hô-hoa só͘ kè-e̍k kong-kek Pa-pí-lûn ê kè-chhek; í-ki̍p I só͘ chù-tiāⁿ kong-kek Ka-le̍k-tí ê chí-ì. In tiāⁿ-tio̍h beh chiong hiah ê iûⁿ-kûn ê sòe--ê thoa--khì. I iā beh hō͘ in khiā-khí ê só͘-chāi hong-hòe.

46因為巴比倫倒壞ê聲，地就振動；in喉叫ê聲聽tī列邦中。In-ūi Pa-pí-lûn tó-hoāi ê siaⁿ, tōe chiū tín-tāng; in âu-kiò ê siaⁿ thiaⁿ tī lia̍t-pang tiong.

1耶和華án-ni講，看ah，我beh起毀滅ê風，攻擊巴比倫，kap tiàm tī Li̍p-ka-bí ê人。Iâ-hô-hoa án-ni kóng, Khòaⁿ ah, Góa beh khí húi-bia̍t ê hong, kong-kek Pa-pí-lûn, kap tiàm tī Li̍p-ka-bí ê lâng.

2我beh差外邦人來到巴比倫，來簸in；hō͘ in ê地空虛；tī伊tú-tio̍h患難ê日，in beh周圍攻擊伊。Góa beh chhe gōa-pang lâng lâi kàu Pa-pí-lûn, lâi pòa--in; hō͘ in ê tōe khang-hu; tī i tú-tio̍h hoān-lān ê ji̍t, in beh chiu-ûi kong-kek i.

3開弓ê tio̍h ǹg開弓ê來開弓，ǹg穿甲挺身ê來開弓；莫得惜伊ê少年人，tio̍h一盡滅伊ê全軍。Khui-keng--ê tio̍h ǹg khui-keng--ê lâi khui-keng, ǹg chhēng-kah théng-sin--ê lâi khui-keng; bo̍h-tit sioh i ê siàu-liân lâng, tio̍h it-chīn bia̍t i ê choân-kun.

4受thâi-ê beh倒tī Ka-le̍k-tí人ê地；受刺ê beh倒tī伊ê街路。Siū-thâi--ê beh tó tī Ka-le̍k-tí lâng ê tōe; siū-chhì--ê beh tó tī i ê ke-lō͘.

5雖bóng以色列kap猶大，in ê地方滿滿得罪以色列ê聖ê，iáu-kú in無hō͘萬軍ê耶和華伊ê上帝棄sak in。Sui-bóng Í-sek-lia̍t kap Iû-tāi, in ê tōe-hng móa-móa tek-chōe Í-sek-lia̍t ê Sèng--ê, iáu-kú in bô hō͘ bān-kun ê Iâ-hô-hoa i ê Siōng-tè khì-sak in.

6Lín tio̍h tùi巴比倫中走出，ta̍k人救家己ê性命；莫得tī in ê罪中來滅無；因為這是耶和華報仇ê期，祂beh hō͘ in tú-tio̍h應該受ê報應。Lín tio̍h tùi Pa-pí-lûn tiong cháu-chhut, ta̍k-lâng kiù ka-kī ê sìⁿ-miā; bo̍h-tit tī in ê chōe-tiong lâi bia̍t-bô; in-ūi che sī Iâ-hô-hoa pò-siû ê kî, I beh hō͘ in tú-tio̍h eng-kai siū ê pò-èng.

7巴比倫平素是耶和華手內ê金杯，hō͘全地ê人醉；列邦bat lim伊ê酒，所以列邦發狂。Pa-pí-lûn pêng-sò͘ sī Iâ-hô-hoa chhiú-lāi ê kim poe, hō͘ choân-tōe ê lâng chùi; lia̍t-pang bat lim i ê chiú, só͘-í lia̍t-pang hoat-kông.

8巴比倫忽然chhia倒，毀壞；tio̍h為伊啼哭，the̍h乳香來止伊ê痛疼，kiám-chhái iáu能醫得。Pa-pí-lûn hut-jiân chhia-tó, húi-hoāi; tio̍h ūi i thî-khàu, the̍h jú-hiuⁿ lâi chí i ê thàng-thiàⁿ, kiám-chhái iáu ōe-i-tit.

9咱想beh醫治巴比倫，但是伊無得tio̍h；咱tio̍h離開伊，ta̍k人tò來去本國；因為伊ê罪案抵天，透到穹蒼。Lán siūⁿ beh i-tī Pa-pí-lûn, nā-sī i bô tit-tio̍h; lán tio̍h lī-khui i, ta̍k-lâng tò-lâi khì pún-kok; in-ūi i ê chōe-àn tú-thiⁿ, thàu kàu kiong-chhong.

10耶和華已經顯明咱ê公義；來ah，咱thang tī錫安報告咱ê上帝耶和華ê所做。Iâ-hô-hoa í-keng hián-bêng lán ê kong-gī; lâi ah, lán thang tī Sek-an pò-kò lán ê Siōng-tè Iâ-hô-hoa ê só͘-chòe.

11Lín tio̍h磨光lín ê箭，giâ-tiâu lín ê藤牌，耶和華定tio̍h意思攻擊巴比倫，來毀滅伊；所以激動馬大君王ê心；因為這是耶和華報仇，就是祂為tio̍h祂ê殿來報仇。Lín tio̍h bôa-kng lín ê chìⁿ, giâ-tiâu lín ê tîn-pâi, Iâ-hô-hoa tiāⁿ-tio̍h ì-sù kong-kek Pa-pí-lûn, lâi húi-bia̍t--i; só͘-í kek-tōng Má-tāi kun-ông ê sim; in-ūi che sī Iâ-hô-hoa pò-siû, chiū-sī I ūi-tio̍h I ê tiān lâi pò-siû.

12Tio̍h khiā大旗攻擊巴比倫ê城牆；tio̍h堅固瞭望ê台，派守望ê，設埋伏；因為耶和華所講論巴比倫khiā起ê百姓，伊有計畫伊，亦有成伊。Tio̍h khiā tōa-kî kong-kek Pa-pí-lûn ê siâⁿ-chhiûⁿ; tio̍h kian-kò͘ liâu-bāng ê tâi, phài siú-bāng-ê, siat bâi-ho̍k; in-ūi Iâ-hô-hoa só͘ kóng lūn Pa-pí-lûn khiā-khí ê peh-sìⁿ, I ū kè-e̍k i, ia̍h ū chiâⁿ--i.

13Khiā起tī chōe-chōe水ê頂面，大發財ê ah，你ê結局到lah，貪心ê量滿lah。Khiā-khí tī chōe-chōe chúi ê téng-bīn, tōa hoat-châi--ê ah, lí ê kiat-kio̍k kàu lah, tham-sim ê liōng móa lah.

14萬軍ê耶和華kí家己chiù-chōa講，我beh hō͘人充滿lín中間，親像草蜢一樣，in beh hoah-hiàm攻擊你。Bān-kun ê Iâ-hô-hoa kí ka-kī chiù-chōa kóng, Góa beh hō͘ lâng chhiong-móa lín tiong-kan, chhin-chhiūⁿ chháu-meh chi̍t-iūⁿ, in beh hoah-hiàm kong-kek lí.

15耶和華用能力創造地，用智慧建立世界；用聰明展開chiah-ê天。Iâ-hô-hoa ēng lêng-le̍k chhòng-chō tōe, ēng tì-hūi kiàn-li̍p sè-kài; ēng chhang-miâ tián-khui chiah ê thiⁿ.

16祂一下出聲，空中就有chōe-chōe水激動；祂hō͘雲霧tùi地極chhèng起來；祂為tio̍h雨，創造sih-nà；祂hō͘風tùi祂ê府庫出來。I chi̍t-ē chhut-siaⁿ, khong-tiong chiū ū chōe-chōe chúi kek-tōng; I hō͘ hûn-bū tùi tōe-ke̍k chhèng--khí-lâi; I ūi-tio̍h hō͘, chhòng-chō sih-nà; I hō͘ hong tùi I ê hú-khò͘ chhut-lâi.

17Ta̍k人lóng愚蠢無智識；ta̍k ê銀匠lóng為tio̍h伊雕刻ê偶像來見笑；因為伊所鑄 ê偶像是假ê，也無活氣tī伊ê內面。Ta̍k-lâng lóng gû-chhún bô tì-sek; ta̍k ê gûn-chhiūⁿ lóng ūi-tio̍h i tiau-khek ê ngó͘-siōng lâi kiàn-siàu; in-ūi i só͘ chù ê ngó͘-siōng sī ké--ê, iā bô oa̍h-khì tī i ê lāi-bīn.

18lóng是空空ê；是迷惑人ê所做；到辨理in ê時，的確受除滅。Lóng sī khang-khang--ê; sī bê-he̍k lâng ê só͘-chòe; kàu pān-lí in ê sî, tek-khak siū tû-bia̍t.

19雅各ê份額無親像chiah-ê；因為伊是創造萬物ê主；以色列也是祂產業ê支派；萬軍ê耶和華是祂ê名。Ngá-kok ê hūn-gia̍h bô chhin-chhiūⁿ chiah-ê; in-ūi I sī chhòng-chō bān-mi̍h ê Chú; Í-sek-lia̍t iā sī I sán-gia̍p ê chi-phài; bān-kun ê Iâ-hô-hoa sī I ê miâ.

20你是我ê斧頭，交戰ê ke-si；我beh用你phah碎列邦，用你毀滅列國；Lí sī Góa ê pó͘-thâu, kau-chiàn ê ke-si; Góa beh ēng lí phah-chhùi lia̍t-pang, ēng lí húi-bia̍t lia̍t-kok;

21用你phah碎馬kap騎馬ê；ēng lí phah-chhùi bé kap khiâ-bé-ê;

22用你phah碎戰車，kap坐tī hit頂面ê；用你phah碎ta-po͘人kap婦人人；用你phah碎老人kap gín-á；ēng lí phah-chhùi chiàn-chhia, kap chē tī hí(**hit) téng-bīn--ê; ēng lí phah-chhùi ta-po͘-lâng kap hū-jîn-lâng; ēng lí phah-chhùi lāu-lâng kap gín-á;

23用你phah碎少年人kap在室女；用你phah碎牧者kap伊ê羊群；用你phah碎作田人，kap伊ê一對牛；用你phah碎總督kap官員。ēng lí phah-chhùi siàu-liân lâng kap chāi-sek-lú; ēng lí phah-chhùi bo̍k-chiá kap i ê iûⁿ-kûn; ēng lí phah-chhùi choh-chhân lâng, kap i ê chi̍t-tùi gû; ēng lí phah-chhùi chóng-tok kap koaⁿ-oân.

24耶和華講，早巴比倫kap Ka-le̍k-tí khiā起ê百姓，tī錫安所行一切ê pháiⁿ，我beh報應in，hō͘ lín親目看見。Iâ-hô-hoa kóng, Chá Pa-pí-lûn kap Ka-le̍k-tí khiā-khí ê peh-sìⁿ, tī Sek-an só͘ kiâⁿ it-chhè ê pháiⁿ, Góa beh pò-èng in, hō͘ lín chhin-ba̍k khòaⁿ-kìⁿ.

25耶和華講，你chit-ê行毀滅ê山ah，看ah，我對敵你；你毀滅全地，我beh伸我ê手tī你ê頂面，tùi山巖chhia你落去；hō͘你成做燒毀ê山。Iâ-hô-hoa kóng, Lí chit ê kiâⁿ húi-bia̍t ê soaⁿ ah, khòaⁿ ah, Góa tùi-te̍k lí; lí húi-bia̍t choân-tōe, Góa beh chhun Góa ê chhiú tī lí ê téng-bīn, tùi soaⁿ-giâm chhia lí lo̍h--khì; hō͘ lí chiâⁿ-chòe sio-húi ê soaⁿ.

26人的確無對你hia取一塊石做厝角，亦無一塊石做地基；你beh永遠拋荒；這是耶和華講ê。Lâng tek-khak bô tùi lí hia chhú chi̍t tè chio̍h chòe chhù-kak, ia̍h bô chi̍t tè chio̍h chòe tōe-ki; lí beh éng-oán pha-hng; che sī Iâ-hô-hoa kóng--ê.

27Tio̍h tī境內khiā大旗，tī ta̍k國中pûn哨角；tiau-tî備辦列國來攻擊伊；招集A-la̍h-le̍k、Bí-nî、A-si̍t-ki-ná chiah-ê國來攻擊伊；koh派軍長來攻擊伊；hō͘馬兵上來親像粗毛ê草蜢。Tio̍h tī kéng-lāi khiā tōa-kî, tī ta̍k-kok-tiong pûn sàu-kak; tiau-tî pī-pān lia̍t-kok lâi kong-kek i; chio-chi̍p A-la̍h-la̍t, Bí-nî, A-si̍t-ki-ná chiah ê kok lâi kong-kek i; koh phài kun-tiúⁿ lâi kong-kek i; hō͘ bé-peng chiūⁿ-lâi chhin-chhiūⁿ chho͘-mn̂g ê chháu-meh.

28Tiau-tî備辦列國kap馬大ê列王，伊ê總督，伊ê官員，kap伊所管全地ê人，來攻擊伊。Tiau-tî pī-pān lia̍t-kok kap Má-tāi ê lia̍t-ông, i ê chóng-tok, i ê koaⁿ-oân, kap i só͘ koán choân-tōe ê lâng, lâi kong-kek i.

29地振動koh悽慘；因為耶和華攻擊巴比倫ê旨意已經定tio̍h；beh hō͘巴比倫ê地拋荒，無人khiā起。Tōe tín-tāng koh chhiⁿ-chhám; in-ūi Iâ-hô-hoa kong-kek Pa-pí-lûn ê chí-ì í-keng tiāⁿ-tio̍h; beh hō͘ Pa-pí-lûn ê tōe pha-hng, bô lâng khiā-khí.

30巴比倫ê勇士m̄-ài交戰，tòa tī營盤內；伊ê力已經無，成做親像婦人人，in ê厝宅受燒，in ê門栱phah折。Pa-pí-lûn ê ióng-sū m̄-ài kau-chiàn, tòa tī iâⁿ-pôaⁿ-lāi; i ê la̍t í-keng bô, chiâⁿ-chòe chhin-chhiūⁿ hū-jîn-lâng, in ê chhù-the̍h siū-sio, in ê mn̂g-kông phah-chi̍h.

31走文書ê走去tú-tio̍h走文書ê；報消息ê tú-tio̍h報消息ê；報告巴比倫王知，伊ê城四面hō͘人取去；Cháu-bûn-su--ê cháu-khì tú-tio̍h cháu bûn-su--ê; pò siau-sit--ê tú-tio̍h pò siau-sit--ê; pò-kò Pa-pí-lûn ông chai, i ê siâⁿ sì-bīn hō͘ lâng chhú-khì;

32路頭hō͘人佔去，蘆竹受火燒，交戰ê人亦驚惶。lō͘ thâu hō͘ lâng chiàm-khì, lô͘-tek siū hé sio, kau-chiàn ê lâng ia̍h kiaⁿ-hiâⁿ.

33萬軍ê耶和華，以色列ê上帝，án-ni講：巴比倫親像粟埕，已經踏到平平；koh無jōa久，收成ê時就到。Bān-kun ê Iâ-hô-hoa, Í-sek-lia̍t ê Siōng-tè, án-ni kóng: Pa-pí-lûn chhin-chhiūⁿ chhek-tiâⁿ, í-keng ta̍h kàu pîⁿ-pîⁿ; koh bô jōa-kú, siu-sêng ê sî chiū kàu.

34巴比倫王Nî-pò͘-kah-nî-sat吞食我，teh碎我；hō͘我成做空ê器具；伊親像大魚吞我；用我ê寶物充滿伊ê腹肚，koh將我吐出。Pa-pí-lûn ông Nî-pò͘-kah-nî-sat thun-chia̍h góa, teh-chhùi góa; hō͘ góa chiâⁿ-chòe khang ê khì-kū; i chhin-chhiūⁿ tōa-hî thun góa; ēng góa ê pó-mi̍h chhiong-móa i ê pak-tó͘, koh chiong góa thò͘-chhut.

35錫安khiā起ê百姓beh講，巴比倫用暴虐款待我，kap我ê身體；願chit-ê罪歸tī伊。耶路撒冷人beh講，願流阮ê血ê罪歸tī Ka-le̍k-tí khiā起ê百姓。Sek-an khiā-khí ê peh-sìⁿ beh kóng, Pa-pí-lûn ēng pō-gio̍k khoán-thāi góa, kap góa ê sin-thé; goān chit ê chōe kui tī i. Iâ-lō͘-sat-léng lâng beh kóng, Goān lâu goán ê huih ê chōe kui tī Ka-le̍k-tí khiā-khí ê peh-sìⁿ.

36所以耶和華án-ni講，看ah，我beh替你申冤，亦beh替你報仇；我beh hō͘伊ê海乾去，hō͘伊ê水泉無水。Só͘-í Iâ-hô-hoa án-ni kóng, Khòaⁿ ah, Góa beh thòe lí sin-oan, ia̍h beh thòe lí pò-siû; Góa beh hō͘ i ê hái ta--khì, hō͘ i ê chúi-chôaⁿ bô chúi.

37巴比倫beh成做土堆，做野狗tòa ê所在；做thang gông-ngia̍h，thang恥笑ê，亦無人khiā去。Pa-pí-lûn beh chiâⁿ-chòe thô͘-tui, chòe iá-káu tòa ê só͘-chāi; chòe thang gông-ngia̍h, thang thí-chhiò--ê, ia̍h bô lâng khiā-khì.

38In beh親像勇ê獅hm̄-hm̄哮，親像細隻獅哮叫。In beh chhin-chhiūⁿ ióng ê sai hm̄-hm̄-háu, chhin-chhiūⁿ sòe-chiah sai háu-kiò.

39當in熱ê時，我beh為in辦酒桌，hō͘伊酒醉，hō͘伊快樂，長睏，永無精神；這是耶和華講ê。Tng in jia̍t ê sî, Góa beh ūi in pān chiú-toh, hō͘ i chiú-chùi, hō͘ i khoài-lo̍k, tn̂g khùn, éng bô cheng-sîn; che sī Iâ-hô-hoa kóng--ê.

40我beh帶in落去，親像羊á，親像公ê綿羊，公ê山羊，到受thâi ê地。Góa beh tòa in lo̍h--khì, chhin-chhiūⁿ iûⁿ-á, chhin-chhiūⁿ kang ê mî-iûⁿ, kang ê soaⁿ-iûⁿ, kàu siū-thâi ê tōe.

41Sī-sa-khek怎樣受攻破！天下所o-ló-ê，怎樣受霸佔！巴比倫tī列國中，怎樣變做拋荒！Sī-sa-khek cháiⁿ-iūⁿ siū kong-phòa! thiⁿ-ē só͘ o-ló--ê, cháiⁿ-iūⁿ siū pà-chiàm! Pa-pí-lûn tī lia̍t-kok-tiong, cháiⁿ-iūⁿ pìⁿ-chòe pha-hng!

42海水漲起來，淹過巴比倫；伊hō͘ chōe-chōe湧蓋密。Hái-chúi tiòng--khí-lâi, im-kè Pa-pí-lûn; i hō͘ chōe-chōe éng khàm-ba̍t.

43伊ê城變做拋荒，乾燥ê地，沙漠，無人khiā起，無人經過ê所在。I ê siâⁿ pìⁿ-chòe pha-hng, ta-sò ê tōe, soa-bô͘, bô lâng khiā-khí, bô lâng keng-kè ê só͘-chāi.

44我beh刑罰Pí-le̍k tī巴比倫，我beh挖出伊ê嘴所吞ê；萬百姓無koh歸óa伊；巴比倫ê城牆亦倒壞。Góa beh hêng-hoa̍t Pí-le̍k tī Pa-pí-lûn, Góa beh ó͘-chhut i ê chhùi só͘ thun ê; bān peh-sìⁿ bô koh kui-óa i; Pa-pí-lûn ê siâⁿ-chhiûⁿ ia̍h tó-hoāi.

45我ê百姓ah，lín tio̍h對伊ê中間出去；ta̍k人救家己，閃避耶和華ê大受氣。Góa ê peh-sìⁿ ah, lín tio̍h tùi i ê tiong-kan chhut-khì; ta̍k-lâng kiù ka-kī, siám-pī Iâ-hô-hoa ê tōa siū-khì.

46Lín ê心m̄-thang失膽，亦m̄-thang因為境內所聽見ê風聲來驚惶；因為今年有風聲傳來，暝時亦有風聲；境內有強暴ê事，官長攻擊官長。Lín ê sim m̄-thang sit-táⁿ, ia̍h m̄-thang in-ūi kéng-lāi só͘ thiaⁿ-kìⁿ ê hong-siaⁿ lâi kiaⁿ-hiâⁿ; in-ūi kin-nî ū hong-siaⁿ thoân-lâi, mî--sî ia̍h ū hong-siaⁿ; kéng-lāi ū kiông-pō ê sū, koaⁿ-tiúⁿ kong-kek koaⁿ-tiúⁿ.

47看ah，日子beh到，我beh辦巴比倫雕刻ê偶像，hō͘ in全地見笑；伊hiah ê受thâi ê人beh倒tī in中間。Khòaⁿ ah, ji̍t-chí beh kàu, Góa beh pān Pa-pí-lûn tiau-khek ê ngó͘-siōng, hō͘ in choân-tōe kiàn-siàu; i hiah ê siū-thâi ê lâng beh tó tī in tiong-kan.

48Hit時天地kap其中所有ê，beh因為巴比倫失敗來歡喜；因為行毀滅ê beh tùi北方來到伊hia；這是耶和華講ê。Hit-sî thiⁿ-tōe kap kî-tiong só͘ ū--ê, beh in-ūi Pa-pí-lûn sit-pāi lâi hoaⁿ-hí; in-ūi kiâⁿ húi-bia̍t--ê beh tùi pak-hng lâi kàu i hia; che sī Iâ-hô-hoa kóng--ê.

49巴比倫àn怎樣hō͘以色列受thâi ê人倒落去，親像án-ni，伊全地受thâi ê人亦beh tī巴比倫倒落去。Pa-pí-lûn àn-cháiⁿ-iūⁿ hō͘ Í-sek-lia̍t siū-thâi ê lâng tó--lo̍h-khì, chhin-chhiūⁿ án-ni, i choân-tōe siū-thâi ê lâng ia̍h beh tī Pa-pí-lûn tó--lo̍h-khì.

50閃避刀劍ê tio̍h緊走，m̄-thang khiā-teh；tio̍h tī遠遠ê所在記念耶和華，心內追想耶路撒冷。Siám-pī to-kiàm--ê tio̍h kín cháu, m̄-thang khiā--teh; tio̍h tī hn̄g-hn̄g ê só͘-chāi kì-liām Iâ-hô-hoa, sim-lāi tui-siūⁿ Iâ-lō͘-sat-léng.

51阮因為聽詈罵漏氣，滿面見笑；因為異邦人入耶和華ê厝hiah-ê聖ê所在。Goán in-ūi thiaⁿ lóe-mē làu-khùi, móa-bīn kiàn-siàu; in-ūi īⁿ-pang lâng ji̍p Iâ-hô-hoa ê chhù hiah ê sèng ê só͘-chāi.

52所以耶和華講，看ah，日子beh到，我辦巴比倫雕刻ê偶像；thong國受傷ê人beh hiⁿ-hiⁿ-chhan。Só͘-í Iâ-hô-hoa kóng, Khòaⁿ ah, ji̍t-chí beh kàu, Góa pān Pa-pí-lûn tiau-khek ê ngó͘-siōng; thong-kok siū-siong ê lâng beh hiⁿ-hiⁿ-chhan.

53巴比倫雖然上到天，雖然hō͘伊堅固高ê所在koh-khah堅固；iáu-kú有行毀滅ê beh tùi我chia到伊hia；這是耶和華講ê。Pa-pí-lûn sui-jiân chiūⁿ kàu thiⁿ, sui-jiân hō͘ i kian-kò͘ koâiⁿ ê só͘-chāi koh-khah kian-kò͘; iáu-kú ū kiâⁿ húi-bia̍t--ê beh tùi Góa chia kàu i hia; che sī Iâ-hô-hoa kóng--ê.

54Tùi巴比倫有哀哭ê聲，tùi Ka-le̍k-tí人ê地有大毀滅ê聲。Tùi Pa-pí-lûn ū ai-khàu ê siaⁿ, tùi Ka-le̍k-tí lâng ê tōe ū tōa húi-bia̍t ê siaⁿ.

55因為耶和華毀滅巴比倫，hō͘ in中間ê大聲soah去，in ê湧hōa-hōa哮，親像chōe-chōe ê水；伊響ê聲亦發出。In-ūi Iâ-hô-hoa húi-bia̍t Pa-pí-lûn, hō͘ in tiong-kan ê tōa-siaⁿ soah--khì, in ê éng hōa-hōa-háu, chhin-chhiūⁿ chōe-chōe ê chúi; i hiáng ê siaⁿ ia̍h hoat-chhut.

56因為毀滅ê來攻擊巴比倫；伊ê勇士受掠，in ê弓tú-tio̍h at折；因為耶和華是行報應ê上帝，祂決斷beh報仇。In-ūi húi-bia̍t--ê lâi kong-kek Pa-pí-lûn; i ê ióng-sū siū-lia̍h, in ê keng tú-tio̍h at-chi̍h; in-ūi Iâ-hô-hoa sī kiâⁿ pò-èng ê Siōng-tè, I koat-toàn beh pò-siû.

57君王，名做萬軍ê耶和華ê，講，我beh hō͘伊ê貴族、博士、總督、官員，以及勇士，lóng酒醉，永永睏，無精神。Kun-ông, miâ chòe bān-kun ê Iâ-hô-hoa--ê, kóng, Góa beh hō͘ i ê kùi-cho̍k, phok-sū, chóng-tok, koaⁿ-oân, í-ki̍p ióng-sū, lóng chiú-chùi, éng-éng khùn, bô cheng-sîn.

58萬軍ê耶和華án-ni講：巴比倫闊大ê城牆beh一盡倒壞；伊高大ê城門beh hō͘火燒lio去；眾百姓所tio̍h磨ê beh歸tī空空；列國所tio̍h磨ê歸tī火；in lóng beh厭倦。Bān-kun ê Iâ-hô-hoa án-ni kóng: Pa-pí-lûn khoah-tōa ê siâⁿ-chhiûⁿ beh it-chīn tó-hoāi; i koâiⁿ-tōa ê siâⁿ-mn̂g beh hō͘ hé sio-lio--khì; chèng peh-sìⁿ só͘ tio̍h-bôa--ê beh kui tī khang-khang; lia̍t-kok só͘ tio̍h-bôa--ê kui tī hé; in lóng beh ià-siān.

59猶大王Se-tí-ka坐位ê第四年上去巴比倫ê時，Má-se-ngá ê孫，Nî-lī-a ê kiáⁿ Se-lâi-ngá，kap王相kap去。Iû-tāi ông Se-tí-ka chē-ūi ê tē-sì-nî chiūⁿ-khì Pa-pí-lûn ê sî, Má-se-ngá ê sun, Nî-lī-a ê kiáⁿ Se-lâi-ngá, kap ông saⁿ-kap khì.

60(Se-lâi-ngá是王ê內侍) 先知耶利米有話吩咐伊。耶利米將一切beh臨到巴比倫ê災厄，就是論到巴比倫所寫一切ê話，來記上冊。(Se-lâi-ngá sī ông ê lōe-sī) sian-ti Iâ-lī-bí ū ōe hoan-hù i. Iâ-lī-bí chiong it-chhè beh lîm-kàu Pa-pí-lûn ê chai-ē, chiū-sī lūn-kàu Pa-pí-lûn só͘ siá it-chhè ê ōe, lâi kì-chiūⁿ-chheh.

61耶利米對Se-lâi-ngá講，你到巴比倫ê時，要緊tio̍h讀chit-ê冊裡ê話。Iâ-lī-bí tùi Se-lâi-ngá kóng, Lí kàu Pa-pí-lûn ê sî, iáu-kín tio̍h tha̍k chit ê chheh--nih ê ōe.

62Koh tio̍h講，耶和華ah，祢論到chit所在bat講beh滅伊，甚至無人khiā起，連cheng-siⁿ亦無，的確永遠拋荒。Koh tio̍h kóng, Iâ-hô-hoa ah, Lí lūn-kàu chit só͘-chāi bat kóng beh bia̍t--i, sīm-chì bô lâng khiā-khí, liân cheng-siⁿ ia̍h bô, tek-khak éng-oán pha-hng.

63你chit-ê冊讀了，就tio̍h縛tī一塊石頭，hiat落tī Pek-lat河中，Lí chit ê chheh tha̍k-liáu, chiū tio̍h pa̍k tī chi̍t tè chio̍h-thâu, hiat-lo̍h tī Pek-lat hô tiong,

64講，巴比倫為tio̍h耶和華所beh降hō͘伊ê災厄的確親像án-ni沉落去，bōe koh起來；in lóng beh厭倦。 耶利米ê話，到chia為止。kóng, Pa-pí-lûn ūi-tio̍h Iâ-hô-hoa só͘ beh kàng hō͘ i ê chai-ē tek-khak chhin-chhiūⁿ án-ni tîm--lo̍h-khì, bōe koh khí-lâi; in lóng beh ià-siān. Iâ-lī-bí ê ōe, kàu chia ûi-chí.