1Lín tio̍h走來走去tī耶路撒冷ê街路來看來探聽，tī伊ê寬闊ê所在來chhē，看會tú-tio̍h一人，á是有人行公義，求誠實；我就beh赦免chit-ê城。Lín tio̍h cháu-lâi cháu-khì tī Iâ-lō͘-sat-léng ê ke-lō͘ lâi khòaⁿ lâi thàm-thiaⁿ, tī i ê khoan-khoah ê só͘-chāi lâi chhē, khòaⁿ ōe tú-tio̍h chi̍t-lâng, á-sī ū lâng kiâⁿ kong-gī, kiû sêng-si̍t; Góa chiū beh sià-bián chit ê siâⁿ.

2In雖然講，耶和華是活ê，in所chiù ê chōa實在是假。In sui-jiân kóng, Iâ-hô-hoa sī oa̍h--ê, in só͘ chiù ê chōa si̍t-chāi sī ké.

3耶和華ah，你ê目睭kiám m̄是ǹg誠實mah？你phah in，in也無憂傷；你毀滅in，in m̄肯受教督；in hō͘ in ê面比石khah-tēng，m̄肯回頭。Iâ-hô-hoa ah, Lí ê ba̍k-chiu kiám-m̄-sī ǹg sêng-si̍t mah? Lí phah in, in iā bô iu-siong; Lí húi-bia̍t in, in m̄-khéng siū kàu-tok; in hō͘ in ê bīn pí chio̍h khah-tēng, m̄-khéng hôe-thâu.

4我就講，chiah-ê人實在是sòng-hiong，是愚戇，因為m̄-bat耶和華ê路，kap in ê上帝ê法度；Góa chiū kóng, Chiah ê lâng si̍t-chāi sī sòng-hiong, sī gû-gōng, in-ūi m̄-bat Iâ-hô-hoa ê lō͘, kap in ê Siōng-tè ê hoat-tō͘;

5我beh去見in ê世家，kap in講話；因為in bat耶和華ê路，kap in ê上帝ê法度。但是in同心at折擔，phah斷縛伊ê索。góa beh khì kìⁿ in ê sè-ka, kap in kóng-ōe; in-ūi in bat Iâ-hô-hoa ê lō͘, kap in ê Siōng-tè ê hoat-tō͘. Nā-sī in tâng-sim at-chi̍h taⁿ, phah-tn̄g pa̍k i ê soh.

6所以樹林ê獅beh出來咬死in；ê-hng時ê豺狼beh吞食in，豹beh tī chiah-ê城外當等in，見若出城ê的確hō͘ in拆碎，因為in ê罪過真chōe，悖逆ná傷重。Só͘-í chhiū-nâ ê sai beh chhut-lâi kā-sí in; ê-hng-sî ê chhâi-lông beh thun-chia̍h in, pà beh tī chiah ê siâⁿ-gōa tng-tán in, kìⁿ-nā chhut-siâⁿ-ê tek-khak hō͘ in thiah-chhùi, in-ūi in ê chōe-kòa chin-chōe, pōe-ge̍k ná siong-tiōng.

7這我thái會赦免你ah？你ê kiáⁿ兒離開我，koh kí chiah-ê m̄是上帝ê來chiù-chōa；我hō͘ in飽足，in就行姦淫，kui陣聚集tī娼妓ê厝。Che Góa thái ōe sià-bián lí ah? lí ê kiáⁿ-jî lī-khui Góa, koh kí chiah ê m̄-sī Siōng-tè--ê lâi chiù-chōa; Góa hō͘ in pá-chiok, in chiū kiâⁿ kan-îm, kui-tīn chū-chi̍p tī chhiong-ki ê chhù.

8In親像飼飽ê馬四界跑；ta̍k-ê ǹg伊厝邊ê bó͘親像馬ki-ki哮。In chhin-chhiūⁿ chhī-pá ê bé sì-kòe pháu; ta̍k-ê ǹg i chhù-piⁿ ê bó͘ chhin-chhiūⁿ bé ki-ki-háu.

9耶和華講，我kiám無因為chiah-ê事來辦in mah？我ê心kiám無beh對chit號ê國民來報仇mah？Iâ-hô-hoa kóng, Góa kiám bô in-ūi chiah ê sū lâi pān in mah? Góa ê sim kiám bô beh tùi chit hō ê kok-bîn lâi pò-siû mah?

10Lín tio̍h 上伊ê葡萄園ê牆來毀壞伊，總是m̄-thang毀到了；tio̍h除去伊ê枝，因為in無屬tī耶和華。Lín tio̍h chiūⁿ i ê phû-tô-hn̂g ê chhiûⁿ lâi húi-hoāi i, chóng-sī m̄-thang húi kàu-liáu; tio̍h tû--khì i ê ki, in-ūi in bô sio̍k tī Iâ-hô-hoa.

11因為以色列家kap猶大家大大行詭詐，攻擊我；這是耶和華講ê。In-ūi Í-sek-lia̍t ke kap Iû-tāi ke tōa-tōa kiâⁿ khúi-chà, kong-kek Góa; che sī Iâ-hô-hoa kóng ê.

12In m̄認耶和華，就講，這並m̄是伊；災厄無beh臨到阮；刀劍kap飢荒阮也bōe會tú-tio̍h。In m̄-jīn Iâ-hô-hoa, chiū kóng, Che pēng m̄-sī I; chai-ē bô beh lîm-kàu goán; to-kiàm kap ki-hng goán iā bōe-ōe tú-tio̍h.

13先知ê話beh成做風，主ê話無tī in ê心；beh照án-ni hō͘ in tú-tio̍h。Sian-ti ê ōe beh chiâⁿ-chòe hong, Chú ê ōe bô tī in ê sim; beh chiàu án-ni hō͘ in tú-tio̍h.

14所以萬軍ê上帝耶和華講，因為lín講chit-ê話；看ah，我beh hō͘我ê話tī你ê嘴做火，hō͘ chit-ê百姓做柴，chit-ê火beh燒滅in。Só͘-í bān-kun ê Siōng-tè Iâ-hô-hoa kóng, In-ūi lín kóng chit ê ōe; khòaⁿ ah, Góa beh hō͘ Góa ê ōe tī lí ê chhùi chòe hé, hō͘ chit ê peh-sìⁿ chòe chhâ, chit ê hé beh sio-bia̍t in.

15耶和華講，以色列ê家ah，你看，我beh hō͘一國tùi遠遠來攻擊lín，就是強ê國，tùi古早就有ê國，伊ê言語你bōe曉得，也bōe明白伊所講ê。Iâ-hô-hoa kóng, Í-sek-lia̍t ê ke ah, lí khòaⁿ, Góa beh hō͘ chi̍t-kok tùi hn̄g-hn̄g lâi kong-kek lín, chiū-sī kiông ê kok, tùi kó͘-chá chiū ū ê kok, i ê giân-gú lí bōe hiáu-tit, iā bōe bêng-pe̍k i só͘ kóng--ê.

16In ê箭袋是開開ê墓；in lóng是勇士。In ê chìⁿ-tē sī khui-khui ê bōng; in lóng sī ióng-sū.

17In beh食了你ê五穀kap你ê米糧，就是你ê kiáⁿ cha-bó͘-kiáⁿ所tio̍h食ê；也beh食了你ê羊群，牛群；食了你ê葡萄kap無花果；koh beh用刀毀壞你所óa靠堅固ê城。In beh chia̍h-liáu lí ê gō͘-kak kap lí ê bí-niû, chiū-sī lí ê kiáⁿ cha-bó͘-kiáⁿ só͘ tio̍h chia̍h ê; iā beh chia̍h-liáu lí ê iûⁿ-kûn, gû-kûn; chia̍h-liáu lí ê phû-tô kap bû-hoa-kó; koh beh ēng to húi-hoāi lí só͘ óa-khò kian-kò͘ ê siâⁿ.

18耶和華講，就若到hit時我也無beh一盡剿滅lín。Iâ-hô-hoa kóng, Chiū-nā kàu hit-sî Góa iā bô beh it-chīn châu-bia̍t lín.

19Hit時lín若講，耶和華阮ê上帝為tio̍h啥事對阮行這一切ê事ah？你tio̍h應伊講，親像lín已經放sak我，服事別號ê上帝 tī lín ê地方，án-ni lín也beh服事外邦人tī無屬lín ê地方。Hit-sî lín nā kóng, Iâ-hô-hoa goán ê Siōng-tè ūi-tio̍h siáⁿ-sū tùi goán kiâⁿ che it-chhè ê sū ah? lí tio̍h ìn i kóng, Chhin-chhiūⁿ lín í-keng pàng-sak Góa, ho̍k-sāi pa̍t-hō ê siōng-tè tī lín ê tōe-hng, án-ni lín iā beh ho̍k-sāi gōa-pang lâng tī bô sio̍k lín ê tōe-hng.

20Lín tio̍h傳tī雅各家，報tī猶大講，Lín tio̍h thoân tī Ngá-kok ke, pò tī Iû-tāi kóng,

21戇戇無知ê百姓ah，lín有目睭bōe看，有耳孔bōe聽，taⁿ tio̍h聽chit-ê話；Gōng-gōng bû-ti ê peh-sìⁿ ah, lín ū ba̍k-chiu bōe khòaⁿ, ū hī-khang bōe thiaⁿ, taⁿ tio̍h thiaⁿ chit ê ōe;

22耶和華講，Lín m̄驚我mah？無ngia̍uh-ngia̍uh-chhoah tī我ê面前mah？我設永遠ê例，用沙做海ê界限，伊bōe pôaⁿ過；伊ê湧雖然giâ高，也bōe能贏；雖然hōa-hōa哮，也bōe能pôaⁿ過。Iâ-hô-hoa kóng, Lín m̄ kiaⁿ Góa mah? bô ngia̍uh-ngia̍uh-chhoah tī Góa ê bīn-chêng mah? Góa siat éng-oán ê lē, ēng soa chòe hái ê kài-hān, i bōe pôaⁿ-kè; i ê éng sui-jiân giâ koâiⁿ, iā bōe-ōe iâⁿ; sui-jiân hōa-hōa-háu, iā bōe-ōe pôaⁿ-kè.

23獨獨chit-ê百姓有反叛悖逆ê心；in悖逆我做in去。To̍k-to̍k chit ê peh-sìⁿ ū hoán-poān pōe-ge̍k ê sim; in pōe-ge̍k Góa chòe in khì.

24In心內也無講，Taⁿ咱tio̍h敬畏耶和華咱ê上帝，伊照時賞賜雨水，就是前ê雨；後ê雨；伊也有定chiah-ê收成ê時期，留teh hō͘咱。In sim-lāi iā bô kóng, Taⁿ lán tio̍h kèng-ùi Iâ-hô-hoa lán ê Siōng-tè, I chiàu-sî siúⁿ-sù hō͘-chúi, chiū-sī chêng ê hō͘; āu ê hō͘; I iā ū tēng chiah ê siu-sêng ê sî-kî, lâu-teh hō͘ lán.

25Lín ê罪孽hō͘ chiah-ê事反tńg離開lín；lín ê罪惡hō͘ lín bōe能得tio̍h福氣。Lín ê chōe-gia̍t hō͘ chiah ê sū hoán-tńg lī-khui lín; lín ê chōe-ok hō͘ lín bōe-ōe tit-tio̍h hok-khì.

26因為tī我ê百姓中有chhē-tio̍h pháiⁿ人；in bih-teh，親像設活tauh ê人teh當等；in張羅網來掠人。In-ūi tī Góa ê peh-sìⁿ-tiong ū chhē-tio̍h pháiⁿ-lâng; in bih--teh, chhin-chhiūⁿ siat oa̍h-tauh ê lâng teh tng-tán; in tiuⁿ lô-bāng lâi lia̍h lâng.

27In ê厝有詭詐滿滿，是親像鳥人內有鳥滿滿；所以in成做大koh好額。In ê chhù ū khúi-chà móa-móa, sī chhin-chhiūⁿ chiáu-lâng-lāi ū chiáu móa-móa; só͘-í in chiâⁿ-chòe tōa koh hó-gia̍h.

28In肥koh光生，做pháiⁿ過頭；無為tio̍h人申冤，就是無為tio̍h無父ê kiáⁿ申冤，hō͘伊興通；亦無因為sòng-hiong人判斷。In pûi koh kng-siⁿ, chòe pháiⁿ kè-thâu; bô ūi-tio̍h lâng sin-oan, chiū-sī bô ūi-tio̍h bô-pē ê kiáⁿ sin-oan, hō͘ i heng-thong; ia̍h bô in-ūi sòng-hiong lâng phòaⁿ-toàn.

29耶和華講，我kiám無因為chiah-ê事來辦in mah？我ê心kiám無beh對chit號ê國民來報仇mah？Iâ-hô-hoa kóng, Góa kiám bô in-ūi chiah ê sū lâi pān in mah? Góa ê sim kiám bô beh tùi chit-hō ê kok-bîn lâi pò-siû mah?

30Chit-ê土地有奇異可惡ê事；Chit ê thó͘-tōe ū kî-īⁿ khó-ò͘ⁿ ê sū;

31先知傳虛假，祭司óa靠in來霸權；我ê百姓亦ài伊án-ni；到結局，lín beh怎樣做？sian-ti thoân hu-ké, chè-si óa-khò in lâi pà-koân; Góa ê peh-sìⁿ ia̍h ài i án-ni; kàu kiat-kio̍k, lín beh cháiⁿ-iūⁿ chòe?

1便雅憫人ah，lín tio̍h走出耶路撒冷；tī Thê-ko-a pûn哨角；tī Pek-hap-ki-lîm放ian-tun；因為有災厄kap大ê毀滅tùi北方落來。Piān-ngá-bín lâng ah, lín tio̍h cháu-chhut Iâ-lō͘-sat-léng; tī Thê-ko-a pûn sàu-kak; tī Pek-hap-ki-lîm pàng ian-tun; in-ūi ū chai-ē kap tōa ê húi-bia̍t tùi pak-hng lo̍h--lâi.

2我beh剿滅錫安ê cha-bó͘-gín-ná，就是hit-ê súi koh幼秀ê。Góa beh châu-bia̍t Sek-an ê cha-bó͘-gín-ná, chiū-sī hit ê súi koh iù-siù--ê.

3牧者kap伊ê羊群beh到伊hia，tī伊ê周圍搭布棚；ta̍k-ê tī伊所佔ê地，hō͘羊食草。Bo̍k-chiá kap i ê iûⁿ-kûn beh kàu i hia, tī i ê chiu-ûi tah pò͘-pîⁿ; ta̍k-ê tī i só͘ chiàm ê tōe, hō͘ iûⁿ chia̍h-chháu.

4Lín tio̍h備辦交戰攻擊伊；起來ah，咱tio̍h thàn中晝ê時上去；慘ah，日已經斜西，beh暗ê影已經拖長。Lín tio̍h pī-pān kau-chiàn kong-kek i; khí-lâi ah, lán tio̍h thàn tiong-tàu ê sî chiūⁿ-khì; chhám--ah, ji̍t í-keng chhiâ-sai, beh àm ê iáⁿ í-keng thoa-tn̂g.

5起來ah，咱tio̍h透暝上去，毀壞伊ê宮殿。Khí-lâi ah, lán tio̍h thàu-mî chiūⁿ-khì, húi-hoāi i ê kiong-tiān.

6因為萬軍ê耶和華án-ni講，Lín tio̍h剉樹木，起土堆，攻擊耶路撒冷；這是hit-ê應該受刑罰ê城；in中間一盡是暴虐。In-ūi bān-kun ê Iâ-hô-hoa án-ni kóng, Lín tio̍h chhò chhiū-ba̍k, khí thô͘-tui, kong-kek Iâ-lō͘-sat-léng; che sī hit-ê eng-kai siū hêng-hoa̍t ê siâⁿ; in tiong-kan it-chīn sī pō-gio̍k.

7井怎樣chhèng出水，chit-ê城亦án-ni chhèng出pháiⁿ；tī in中間常常聽見有強暴毀滅ê事；病痛損傷亦常常tī我ê面前。Chíⁿ cháiⁿ-iūⁿ chhèng-chhut chúi, chit ê siâⁿ ia̍h án-ni chhèng-chhut pháiⁿ; tī in tiong-kan siông-siông thiaⁿ-kìⁿ ū kiông-pō húi-bia̍t ê sū; pīⁿ-thiàⁿ sún-siong ia̍h siông-siông tī Góa ê bīn-chêng.

8耶路撒冷ah，你tio̍h受教示；免得我ê心kap你生疏；免得我hō͘你拋荒，成做無人khiā起ê地。Iâ-lō͘-sat-léng ah, lí tio̍h siū kà-sī; bián-tit Góa ê sim kap lí chhiⁿ-so͘; bián-tit Góa hō͘ lí pha-hng, chiâⁿ-chòe bô lâng khiā-khí ê tōe.

9萬軍ê耶和華án-ni講，In beh一盡掠以色列chhun ê百姓，親像摘葡萄一樣；你tio̍h親像摘葡萄ê，手koh tńg入樹枝。Bān-kun ê Iâ-hô-hoa án-ni kóng, In beh it-chīn lia̍h Í-sek-lia̍t chhun ê peh-sìⁿ, chhin-chhiūⁿ tiah phû-tô chi̍t-iūⁿ; lí tio̍h chhin-chhiūⁿ tiah phû-tô-ê, chhiú koh tńg-ji̍p chhiū-ki.

10Taⁿ我beh對是誰講話做干證，hō͘ in聽ah？看ah，in ê耳á未受割禮，bōe能聽；看ah，耶和華ê話，in掠做見笑，無歡喜伊。Taⁿ góa beh tùi chī-chūi kóng-ōe chòe kan-chèng, hō͘ in thiaⁿ ah? khòaⁿ ah, in ê hī-á bē siū kat-lé, bōe-ōe thiaⁿ; khòaⁿ ah, Iâ-hô-hoa ê ōe, in lia̍h-chòe kiàn-siàu, bô hoaⁿ-hí--i.

11因為án-ni，我hō͘耶和華ê受氣充滿，忍bōe-tiâu；我beh做一下piàⁿ tī街路ê gín-ná，kap聚會ê少年人；連丈夫kap伊ê bó͘，老人kap日子滿足ê，lóng beh受掠。In-ūi án-ni, góa hō͘ Iâ-hô-hoa ê siū-khì chhiong-móa, lún-bōe-tiâu; góa beh chòe-chi̍t-ē piàⁿ tī ke-lō͘ ê gín-ná, kap chū-hōe ê siàu-liân lâng; liân tiōng-hu kap i ê bó͘, lāu-lâng kap ji̍t-chí móa-chiok--ê, lóng beh siū-lia̍h.

12In ê厝宅、田園，kap bó͘，lóng beh變做別人ê；因為我beh伸手攻擊chit所在khiā起ê百姓；這是耶和華講ê。In ê chhù-the̍h, chhân-hn̂g, kap bó͘, lóng beh piàn-chòe pa̍t-lâng-ê; in-ūi Góa beh chhun-chhiú kong-kek chit só͘-chāi khiā-khí ê peh-sìⁿ; che sī Iâ-hô-hoa kóng--ê.

13因為in tùi第一細到第一大ê，lóng一味貪心；tùi先知到祭司，lóng行奸詐。In-ūi in tùi tē-it sòe kàu tē-it tōa--ê, lóng it-bī tham-sim; tùi sian-ti kàu chè-si, lóng kiâⁿ kan-chà.

14In chhìn-chhìn chhái-chhái醫治我ê百姓ê傷，講，平安lah，平安lah；其實無平安。In chhìn-chhìn chhái-chhái i-tī Góa ê peh-sìⁿ ê siong, kóng, Pêng-an lah, pêng-an lah; kî-si̍t bô pêng-an.

15In行可惡ê事，知見笑mah？無，in lóng無見笑，亦bōe 紅面；因為án-ni，in beh跋倒tī跋倒ê人ê中間；我辦in ê時，in beh顛倒；這是耶和華講ê。In kiâⁿ khó-ò͘ⁿ ê sū, chai kiàn-siàu mah? bô, in lóng bô kiàn-siàu, ia̍h bōe âng-bīn; in-ūi án-ni, in beh poa̍h-tó tī poa̍h-tó ê lâng ê tiong-kan; Góa pān in ê sî, in beh tian-tó; che sī Iâ-hô-hoa kóng ê.

16耶和華án-ni講，Lín tio̍h khiā tī路裡看；查問舊ê路，hit條好路tī toh-lo̍h，就tio̍h行伊；án-ni lín ê心beh得tio̍h安歇；總是in講，阮m̄行伊。Iâ-hô-hoa án-ni kóng, Lín tio̍h khiā tī lō͘--nih khòaⁿ; chhâ-mn̄g kū ê lō͘, hit tiâu hó-lō͘ tī toh-lo̍h, chiū tio̍h kiâⁿ--i; án-ni lín ê sim beh tit-tio̍h an-hioh; chóng-sī in kóng, Goán m̄ kiâⁿ--i.

17我kā lín設守望ê，講，Tio̍h聽哨角ê聲；總是in講，阮m̄聽。Góa kā lín siat siú-bāng--ê, kóng, Tio̍h thiaⁿ sàu-kak ê siaⁿ; chóng-sī in kóng, Goán m̄ thiaⁿ.

18列國ah，因為án-ni lín tio̍h聽；會眾ah，lín tio̍h知in中間有甚麼事。Lia̍t-kok ah, in-ūi án-ni lín tio̍h thiaⁿ; hōe-chiòng ah, lín tio̍h chai in tiong-kan ū sím-mi̍h sū.

19地ah，tio̍h聽；看ah，我beh hō͘災厄到chit-ê百姓，就是in ê圖謀ê結果；因為in m̄聽thàn我ê話；我ê律法，in亦棄絕。Tōe ah, tio̍h thiaⁿ; khòaⁿ ah, Góa beh hō͘ chai-ē kàu chit ê peh-sìⁿ, chiū-sī in ê tô͘-bô͘ ê kiat-kó; in-ūi in m̄ thiaⁿ-thàn Góa ê ōe; Góa ê lu̍t-hoat, in ia̍h khì-choa̍t.

20Tùi Sī-pa出ê乳香，tùi遠遠ê所在出ê菖蒲，帶來hō͘我，beh啥tāi？lín ê燒祭無得tio̍h接納；lín ê禮物，我亦無歡喜。Tùi Sī-pa chhut ê jú-hiuⁿ, tùi hn̄g-hn̄g ê só͘-chāi chhut ê chhiong-pô͘, tòa lâi hō͘ Góa, beh siáⁿ-tāi? lín ê sio-chè bô tit-tio̍h chiap-la̍p; lín ê lé-mi̍h, Góa ia̍h bô hoaⁿ-hí.

21所以耶和華án-ni講，看ah，我beh hē窒礙ê石tī chit-ê百姓ê面前；父kap kiáⁿ beh做一下跋tī hit頂面；厝邊kap朋友亦lóng beh滅無。Só͘-í Iâ-hô-hoa án-ni kóng, Khòaⁿ ah, Góa beh hē that-gāi ê chio̍h tī chit ê peh-sìⁿ ê bīn-chêng; pē kap kiáⁿ beh chòe-chi̍t-ē poa̍h tī hit téng-bīn; chhù-piⁿ kap pêng-iú ia̍h lóng beh bia̍t-bô.

22耶和華án-ni講，看ah，有一種ê百姓tùi北方來；亦有一個大國興起，tùi地極來。Iâ-hô-hoa án-ni kóng, Khòaⁿ ah, ū chi̍t chióng ê peh-sìⁿ tùi pak-hng lâi; ia̍h ū chi̍t ê tōa-kok heng-khí, tùi tōe-ke̍k lâi.

23In kia̍h弓kap鎗；in殘忍無憐憫；in ê聲親像海hōa-hōa哮；錫安ê cha-bó͘-gín-ná ah，in lóng騎馬列陣，親像戰士beh攻擊你。In kia̍h keng kap chhiuⁿ; in chân-jím bô lîn-bín; in ê siaⁿ chhin-chhiūⁿ hái hōa-hōa-háu; Sek-an ê cha-bó͘-gín-ná ah, in lóng khiâ-bé lia̍t-tīn, chhin-chhiūⁿ chiàn-sū beh kong-kek lí.

24阮聽見in ê風聲，手就軟落去；痛苦擒tio̍h阮，痛疼親像生kiáⁿ ê婦人人一樣。Goán thiaⁿ-kìⁿ in ê hong-siaⁿ, chhiú chiū nńg--lo̍h-khì; thòng-khó͘ khîⁿ-tio̍h goán, thàng-thiàⁿ chhin-chhiūⁿ siⁿ-kiáⁿ ê hū-jîn-lâng chi̍t-iūⁿ.

25Lín m̄-thang出去田裡，亦m̄-thang行tī路裡；因為tī-hia有對敵ê刀劍，四圍有驚惶。Lín m̄-thang chhut-khì chhân--nih, ia̍h m̄-thang kiâⁿ tī lō͘-nih; in-ūi tī-hia ū tùi-te̍k ê to-kiàm, sì-ûi ū kiaⁿ-hiâⁿ.

26我ê百姓ah，tio̍h hâ麻布，kō tī火灰中；tio̍h悲傷，親像喪失獨生kiáⁿ，痛心啼哭；因為殘害ê beh忽然到tī咱。Góa ê peh-sìⁿ ah, tio̍h hâ môa-pò͘, kō tī hé-hu-tiong; tio̍h pi-siong, chhin-chhiūⁿ sòng-sit to̍k-siⁿ kiáⁿ, thòng-sim thî-khàu; in-ūi chân-hāi--ê beh hut-jiân kàu tī lán.

27我設立你tī我ê百姓中，做試驗ê kap衛所；hō͘你知來試驗in ê行做。Góa siat-li̍p lí tī Góa ê peh-sìⁿ-tiong, chòe chhì-giām--ê kap ōe-só͘; hō͘ lí chai lâi chhì-giām in ê kiâⁿ-chòe.

28In lóng是大悖逆ê人；四界行譭謗；in是銅，是鐵；lóng是行毀壞ê。In lóng sī tōa pōe-ge̍k ê lâng; sì-kòe kiâⁿ húi-pòng; in sī tâng, sī thih; lóng sī kiâⁿ húi-hoāi--ê.

29風櫃燒tio̍h，鉛已經熔tī火內；in直直鍛鍊，到尾是空空；因為pháiⁿ-ê iáu未除去。Hong-kūi sio--tio̍h, iân í-keng iûⁿ tī hé-lāi; in ti̍t-ti̍t thoàn-liān, kàu-bé sī khang-khang; in-ūi pháiⁿ--ê iáu-bē tû-khì.

30人beh稱 in做受棄sak ê銀，因為耶和華已經棄sak in。Lâng beh chheng in chòe siū khì-sak ê gûn, in-ūi Iâ-hô-hoa í-keng khì-sak in.

1有話tùi耶和華到耶利米，講，Ū ōe tùi Iâ-hô-hoa kàu Iâ-lī-bí, kóng,

2你tio̍h khiā tī耶和華ê厝ê門，tī-hia宣傳chit-ê話，講，凡若屬猶大入chiah-ê門，敬拜耶和華ê，tio̍h聽耶和華ê話。Lí tio̍h khiā tī Iâ-hô-hoa ê chhù ê mn̂g, tī-hia soan-thoân chit ê ōe, kóng, Hoān-nā sio̍k Iû-tāi ji̍p chiah ê mn̂g, kèng-pài Iâ-hô-hoa--ê, tio̍h thiaⁿ Iâ-hô-hoa ê ōe.

3萬軍ê耶和華，以色列ê上帝，án-ni講，Lín tio̍h改正所行所做，我就hō͘ lín khiā起tī chit-ê地方。Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lín tio̍h kóe-chiàⁿ só͘-kiâⁿ só͘-chòe, Góa chiū hō͘ lín khiā-khí tī chit ê tōe-hng.

4Lín m̄-thang óa靠白賊ê話，講，Chiah-ê是耶和華ê殿，是耶和華ê殿，是耶和華ê殿。Lín m̄-thang óa-khò pe̍h-chha̍t ê ōe, kóng, Chiah-ê sī Iâ-hô-hoa ê tiān, sī Iâ-hô-hoa ê tiān, sī Iâ-hô-hoa ê tiān.

5Lín若一盡改正所行所做；tī人kap厝邊ê中間，真正有行公平；Lín nā it-chīn kóe-chiàⁿ só͘-kiâⁿ só͘-chòe; tī lâng kap chhù-piⁿ ê tiong-kan, chin-chiàⁿ ū kiâⁿ kong-pêng;

6無pháiⁿ款待出外人，以及孤兒寡婦；tī chit-ê地方無留無罪ê人ê血，亦無thàn別號ê上帝來陷害家己；bô pháiⁿ khoán-thāi chhut-gōa lâng, í-ki̍p ko͘-jî kóaⁿ-hū; tī chit ê tōe-hng bô lâu bô-chōe ê lâng ê huih, ia̍h bô thàn pa̍t-hō ê siōng-tè lâi hām-hāi ka-kī;

7我就hō͘ lín khiā起tī chit-ê所在，就是我所賞賜lín ê列祖ê地，tùi永遠到永遠。Góa chiū hō͘ lín khiā-khí tī chit ê só͘-chāi, chiū-sī Góa só͘ siúⁿ-sù lín ê lia̍t-chó͘ ê tōe, tùi éng-oán kàu éng-oán.

8看ah，lín óa靠白賊無利益ê話。Khòaⁿ ah, lín óa-khò pe̍h-chha̍t bô lī-ek ê ōe.

9Lín偷the̍h、thâi人、姦淫，lām-sám chiù-chōa，ǹg Pa-le̍k燒香，亦thàn lín平素所m̄-bat別號ê上帝，Lín thau-the̍h, thâi-lâng, kan-îm, lām-sám chiù-chōa, ǹg Pa-le̍k sio-hiuⁿ, ia̍h thàn lín pêng-sò͘ só͘ m̄-bat pa̍t-hō ê siōng-tè,

10koh來khiā tī我ê面前，tī chit間用我ê名來稱呼ê厝，講，阮得tio̍h救lah；án-ni，是beh hō͘ lín去行chiah-ê可惡ê事mah？koh lâi khiā tī Góa ê bīn-chêng, tī chit-keng ēng Góa ê miâ lâi chheng-ho͘ ê chhù, kóng, Goán tit-tio̍h kiù lah; án-ni, sī beh hō͘ lín khì kiâⁿ chiah ê khó-ò͘ⁿ ê sū mah?

11Chit間用我ê名來稱呼ê厝，lín看做賊siū mah？耶和華講，看ah，我，我已經看見lah。Chit-keng ēng Góa ê miâ lâi chheng-ho͘ ê chhù, lín khòaⁿ-chòe chha̍t-siū mah? Iâ-hô-hoa kóng, Khòaⁿ ah, Góa, Góa í-keng khòaⁿ-kìⁿ lah.

12Lín taⁿ tio̍h去我tī Sī-lô ê所在，就是我起頭設做求叫我ê名ê位，看我因為我ê百姓以色列ê罪惡，怎樣款待hit所在。Lín taⁿ tio̍h khì Góa tī Sī-lô ê só͘-chāi, chiū-sī Góa khí-thâu siat-chòe kiû-kiò Góa ê miâ ê ūi, khòaⁿ Góa in-ūi Góa ê peh-sìⁿ Í-sek-lia̍t ê chōe-ok, cháiⁿ-iūⁿ khoán-thāi hit só͘-chāi.

13耶和華講，Taⁿ因為lín行chiah-ê一切ê事，我有對lín講，亦是早早起來講，但是lín m̄聽；我koh叫lín，但是lín m̄應；Iâ-hô-hoa kóng, Taⁿ in-ūi lín kiâⁿ chiah ê it-chhè ê sū, Góa ū tùi lín kóng, ia̍h sī chá-chá khí--lâi kóng, nā-sī lín m̄ thiaⁿ; Góa koh kiò lín, nā-sī lín m̄ ìn;

14所以我beh款待lín所óa靠chit間用我ê名稱呼ê厝，以及我所賞賜lín kap lín ê列祖ê地，親像我早款待Sī-lô一樣。só͘-í Góa beh khoán-thāi lín só͘ óa-khò chit-keng ēng Góa ê miâ chheng-ho͘ ê chhù, í-ki̍p Góa só͘ siúⁿ-sù lín kap lín ê lia̍t-chó͘ ê tōe, chhin-chhiūⁿ Góa chá khoán-thāi Sī-lô chi̍t-iūⁿ.

15我也beh趕lín離開我ê面前，親像我bat趕lín ê眾兄弟，Í-hoat-liân一切ê後裔。Góa iā beh kóaⁿ lín lī-khui Góa ê bīn-chêng, chhin-chhiūⁿ Góa bat kóaⁿ lín ê chèng hiaⁿ-tī, Í-hoat-liân it-chhè ê hō͘-è.

16所以你莫得為tio̍h chit-ê百姓祈禱，莫得為tio̍h in出聲祈求，亦莫得替in求我；因為我無beh聽你。Só͘-í lí bo̍h-tit ūi-tio̍h chit ê peh-sìⁿ kî-tó, bo̍h-tit ūi-tio̍h in chhut-siaⁿ kî-kiû, ia̍h bo̍h-tit thòe in kiû Góa; in-ūi Góa bô beh thiaⁿ lí.

17In tī猶大chiah-ê城中，kap耶路撒冷ê街路所行ê，你無看見mah？In tī Iû-tāi chiah ê siâⁿ-tiong, kap Iâ-lō͘-sat-léng ê ke-lō͘ só͘ kiâⁿ--ê, lí bô khòaⁿ-kìⁿ mah?

18kiáⁿ兒拾柴，老父hiâⁿ火，婦人人chhiau麵做餅，獻hō͘ 天后；koh tùi別號ê上帝灌奠；beh激我受氣。Kiáⁿ-jî khioh chhâ, lāu-pē hiâⁿ-hé, hū-jîn-lâng chhiau-mī chòe-piáⁿ, hiàn hō͘ Thian-hō͘; koh tùi pa̍t-hō ê siōng-tè koàn-tiān; beh kek Góa siū-khì.

19耶和華講，In kiám是激我受氣？kiám m̄是激in家己，致到in ê面見笑mah？Iâ-hô-hoa kóng, In kiám-sī kek Góa siū-khì? kiám m̄-sī kek in ka-kī, tì-kàu in ê bīn kiàn-siàu mah?

20所以主耶和華án-ni講，看ah，我beh將我ê受氣，我ê痛恨，piàⁿ tī chit所在；就是piàⁿ tī人，kap cheng-siⁿ，以及田野ê樹木，kap土地ê出產；親像火to̍h bōe hoa。Só͘-í Chú Iâ-hô-hoa án-ni kóng, Khòaⁿ ah, Góa beh chiong Góa ê siū-khì, Góa ê thòng-hūn, piàⁿ tī chit só͘-chāi; chiū-sī piàⁿ tī lâng, kap cheng-siⁿ, í-ki̍p chhân-iá ê chhiū-ba̍k, kap thó͘-tōe ê chhut-sán; chhin-chhiūⁿ hé to̍h bōe hoa.

21萬軍ê耶和華以色列ê上帝án-ni講，Tio̍h將lín ê燒祭參加tī lín chiah-ê祭，來食肉。Bān-kun ê Iâ-hô-hoa Í-sek-lia̍t ê Siōng-tè án-ni kóng, Tio̍h chiong lín ê sio-chè chham-ka tī lín chiah ê chè, lâi chia̍h bah.

22因為我chhōa lín ê列祖出埃及ê日，論到燒祭kap chiah-ê祭，我bē-bat對in講起來命令in。In-ūi Góa chhōa lín ê lia̍t-chó͘ chhut Ai-ki̍p ê ji̍t, lūn-kàu sio-chè kap chiah ê chè, Góa bē-bat tùi in kóng-khí lâi bēng-lēng in.

23我獨獨吩咐in chit一項，講，Lín tio̍h聽thàn我ê聲，我就beh做lín ê上帝，lín亦beh做我ê百姓；koh行我lóng總命令lín ê路，就thang得tio̍h福氣。Góa to̍k-to̍k hoan-hù in chí chi̍t-hāng, kóng, Lín tio̍h thiaⁿ-thàn Góa ê siaⁿ, Góa chiū beh chòe lín ê Siōng-tè, lín ia̍h beh chòe Góa ê peh-sìⁿ; koh kiâⁿ Góa lóng-chóng bēng-lēng lín ê lō͘, chiū thang tit-tio̍h hok-khì.

24總是in m̄聽thàn，亦m̄俯耳孔；竟然照in ê計謀，kap剛硬ê pháiⁿ心，退後無進前。Chóng-sī in m̄ thiaⁿ-thàn, ia̍h m̄ àⁿ hī-khang; kéng-jiân chiàu in ê kè-bô͘, kap kong-ngī ê pháiⁿ-sim, thè-āu bô chìn-chêng.

25Tùi lín ê列祖出埃及ê日到今á日，我差我ê眾奴僕先知到lín hia；koh ta̍k日早早起來差in。Tùi lín ê lia̍t-chó͘ chhut Ai-ki̍p ê ji̍t kàu kin-á-ji̍t, Góa chhe Góa ê chèng lô͘-po̍k sian-ti kàu lín hia; koh ta̍k-ji̍t chá-chá khí--lâi chhe in.

26In iáu-kú m̄聽我，亦m̄俯耳孔；反tńg硬in ê頷頸；in行pháiⁿ比in ê列祖khah傷重。In iáu-kú m̄ thiaⁿ Góa, ia̍h m̄ àⁿ hī-khang; hoán-tńg ngī in ê ām-kún; in kiâⁿ pháiⁿ pí in ê lia̍t-chó͘ khah siong-tiōng.

27你tio̍h將chiah-ê一切ê話kā in講；總是in無beh聽你；你叫in，in亦無beh應你。Lí tio̍h chiong chiah-ê it-chhè ê ōe kā in kóng; chóng-sī in bô beh thiaⁿ lí; lí kiò--in, in ia̍h bô beh ìn--lí.

28你tio̍h對in講，這就是m̄聽thàn耶和華in ê上帝ê聲，無受教督ê國民；誠實無去，tùi in ê嘴絕斷。Lí tio̍h tùi in kóng, Che chiū-sī m̄ thiaⁿ-thàn Iâ-hô-hoa in ê Siōng-tè ê siaⁿ, bô siū kàu-tok ê kok-bîn; sêng-si̍t bô-khì, tùi in ê chhùi choa̍t-tn̄g.

29耶路撒冷ah，tio̍h剃你ê頭毛hiat-ka̍k；tī光khō-khō高ê所在唱哀傷ê歌；因為耶和華棄sak離開伊所受氣ê世代。Iâ-lō͘-sat-léng ah, tio̍h thì lí ê thâu-mn̂g hiat-ka̍k; tī kng-khō-khō koâiⁿ ê só͘-chāi chhiùⁿ ai-siong ê koa; in-ūi Iâ-hô-hoa khì-sak lī-khui I só͘ siū-khì ê sè-tāi.

30耶和華講，猶大ê百姓行我所看做pháiⁿ ê事；將可惡ê物chhāi tī用我ê名稱呼ê厝，phah lâ-sâm伊。Iâ-hô-hoa kóng, Iû-tāi ê peh-sìⁿ kiâⁿ Góa só͘ khòaⁿ-chòe pháiⁿ ê sū; chiong khó-ò͘ⁿ ê mi̍h chhāi tī ēng Góa ê miâ chheng-ho͘ ê chhù, phah lâ-sâm--i.

31In tī Piān-him-lùn ê山谷，起Tô-hui-te̍k山頭ê壇；thang tī火中燒in ê kiáⁿ，cha-bó͘-kiáⁿ；這m̄是我所吩咐ê，亦m̄是我ê心所想ê。In tī Piān-him-lùn ê soaⁿ-kok, khí Tô-hui-te̍k soaⁿ-thâu ê tôaⁿ; thang tī hé-tiong sio in ê kiáⁿ, cha-bó͘-kiáⁿ; che m̄-sī Góa só͘ hoan-hù--ê, ia̍h m̄-sī Góa ê sim só͘ siūⁿ--ê.

32耶和華講，因為日子beh到，chit-ê地方無koh稱做Tô-hui-te̍k，kap Piān-him-lùn ê山谷；是beh稱做thâi人ê山谷；因為beh tī Tô-hui-te̍k埋葬死人，到無chhun所在。Iâ-hô-hoa kóng, In-ūi ji̍t-chí beh kàu, chit ê tōe-hng bô koh chheng-chòe Tô-hui-te̍k, kap Piān-him-lùn ê soaⁿ-kok; sī beh chheng-chòe Thâi-lâng ê soaⁿ-kok; in-ūi beh tī Tô-hui-te̍k bâi-chòng sí-lâng, kàu bô chhun só͘-chāi.

33Koh chit-ê百姓ê身屍，beh hō͘空中ê飛鳥，kap地上ê野獸，做食物；無人趕伊。Koh chit ê peh-sìⁿ ê sin-si, beh hō͘ khong-tiong ê pe-chiáu, kap tōe-chiūⁿ ê iá-siù, chòe chia̍h-mi̍h; bô lâng kóaⁿ--i.

34Hit時，tī猶大chiah-ê城kap耶路撒冷ê街市，我beh hō͘歡喜ê聲，快樂ê聲，新kiáⁿ婿ê聲，新娘ê聲，lóng總soah；因為chit-ê地lóng beh變做拋荒。Hit-sî, tī Iû-tāi chiah ê siâⁿ kap Iâ-lō͘-sat-léng ê koe-chhī, Góa beh hō͘ hoaⁿ-hí ê siaⁿ, khoài-lo̍k ê siaⁿ, sin-kiáⁿ-sài ê siaⁿ, sin-niû ê siaⁿ, lóng-chóng soah; in-ūi chit ê tōe lóng beh pìⁿ-chòe pha-hng.