1約伯應伊講，Iok-pek ìn i kóng,

2Lín真正是百姓ah，lín死，智慧也kap lín死。Lín chin-chiàⁿ sī peh-sìⁿ ah, Lín sí, tì-hūi iā kap lín sí.

3我也有心思，親像lín一樣；我無khah輸lín；chiah-ê tāi-chì甚麼人m̄知？Góa iā ū sim-su, chhin-chhiūⁿ lín chi̍t-iūⁿ; Góa bô khah-su lín; Chiah ê tāi-chì sím-mi̍h lâng m̄-chai?

4我是求叫上帝，得tio̍h伊聽ê人，iáu-kú hō͘同伴譏刺；公義完全ê人，也hō͘人譏刺。Góa sī kiû-kiò Siōng-tè, tit-tio̍h I thiaⁿ ê lâng, Iáu-kú hō͘ tâng-phōaⁿ ki-chhì; Kong-gī oân-choân ê lâng, iā hō͘ lâng ki-chhì.

5安然ê人心內看輕患難；這患難便便teh thèng候腳tio̍h-tak ê人。An-jiân ê lâng sim-lāi khòaⁿ-khin hoān-lān; Che hoān-lān piān-piān teh thèng-hāu kha tio̍h-tak ê lâng.

6強盜ê布棚興通，惹tio̍h上帝ê人得tio̍h安然。就是上帝大賞賜tī in ê手ê。Kiông-tō ê pò͘-pîⁿ heng-thong, Jiá-tio̍h Siōng-tè ê lâng tit-tio̍h an-jiân. Chiū-sī Siōng-tè tōa siúⁿ-sù tī in ê chhiú--ê.

7Taⁿ你去問走獸，in beh教示你；也去問空中ê鳥，in beh kā你講；Taⁿ lí khì mn̄g cháu-siù, in beh kà-sī lí; Iā khì mn̄g khong-tiong ê chiáu, in beh kā lí kóng;

8Á是kap地講，伊beh教示你；海中ê魚也beh kā你講明。Á-sī kap tōe kóng, i beh kà-sī lí; Hái-tiong ê hî iā beh kā lí kóng-bêng.

9Tī chiah-ê一切，是誰 m̄知，是耶和華ê手做án-ni？Tī chiah-ê it-chhè, chī-chūi m̄ chai, Sī Iâ-hô-hoa ê chhiú chòe án-ni?

10一切動物ê性命，kap人類ê喘氣，lóng tī伊ê手。It-chhè tōng-bu̍t ê sìⁿ-miā, kap jîn-lūi ê chhoán-khùi, Lóng tī I ê chhiú.

11耳孔kiám bōe試驗言語，親像上腔試滋味mah？Hī-khang kiám bōe chhì-giām giân-gú, Chhin-chhiūⁿ chiūⁿ-khiuⁿ[kiuⁿ] chhì chu-bī mah?

12年老ê有智慧，歲壽chōe-ê有見識。Nî-lāu--ê ū tì-hūi, Hè-siū chōe-ê ū kiàn-sek.

13智慧kap能力在tī上帝；伊有計畫kap見識。Tì-hūi kap lêng-le̍k chāi-tī Siōng-tè; I ū kè-e̍k kap kiàn-sek.

14看ah，伊拆毀ê，bōe會koh起造；伊關禁ê人，無thang koh tháu放。Khòaⁿ ah, I thiah-húi-ê, bōe-ōe koh khí-chō; I koaiⁿ-kìm ê lâng, bô thang koh tháu-pàng.

15看ah，伊禁止hiah-ê水，水就乾去；伊koh hō͘水流出，地就變遷。Khòaⁿ ah, I kìm-chí hiah ê chúi, chúi chiū ta--khì; I koh hō͘ chúi lâu-chhut, tōe chiū piàn-chhian.

16權能kap效力在tī伊；受迷惑，kap迷惑人ê，lóng屬tī伊。Koân-lêng kap hāu-le̍k chāi-tī I; Siū bê-he̍k, kap bê-he̍k lâng--ê, lóng sio̍k tī I.

17伊hō͘謀士tú-tio̍h搶掠；koh hō͘審判司變成戇人。I hō͘ bô͘-sū tú-tio̍h chhiúⁿ-lia̍h; Koh hō͘ sím-phòaⁿ-si pìⁿ-chiâⁿ gōng-lâng.

18伊tháu放君王ê綑縛，koh用帶縛in ê腰。I tháu-pàng kun-ông ê khún-pa̍k, Koh ēng tòa pa̍k in ê io.

19伊hō͘祭司tú-tio̍h搶掠，koh chhia倒有權能ê人。I hō͘ chè-si tú-tio̍h chhiúⁿ-lia̍h, Koh chhia-tó ū koân-lêng ê lâng.

20伊改chhoa̍h忠信ê人ê話，koh除去老人ê見識。I kóe-chhoa̍h tiong-sìn ê lâng ê ōe, Koh tû-khì lāu-lâng ê kiàn-sek.

21伊hō͘貴族受凌辱；koh tháu開有力ê人ê腰帶。I hō͘ kùi-cho̍k siū lêng-jio̍k; Koh tháu-khui ū la̍t ê lâng ê io-tòa.

22伊tùi烏暗中顯出深奧ê事；koh帶出死蔭到光明ê所在。I tùi o͘-àm-tiong hián-chhut chhim-ò ê sū; Koh tòa-chhut sí-ìm kàu kng-bêng ê só͘-chāi.

23伊hō͘邦國興旺，也koh毀滅伊；伊hō͘邦國開闊，也koh遷徙in。I hō͘ pang-kok heng-ōng, iā koh húi-bia̍t i; I hō͘ pang-kok khui-khoah, iā koh chhian-sóa in.

24地上百姓ê頭人，伊除去in ê心思；hō͘ in漂流tī無路ê曠野。Tōe-chiūⁿ peh-sìⁿ ê thâu-lâng, I tû-khì in ê sim-su; Hō͘ in phiau-liû tī bô lō͘ ê khòng-iá.

25In無光，tī烏暗中四界摸；koh hō͘ in顛來顛去，親像酒醉ê人一樣。In bô kng, tī o͘-àm-tiong sì-kòe bong; Koh hō͘ in tian-lâi tian-khì, chhin-chhiūⁿ chiú-chùi ê lâng chi̍t-iūⁿ.

1看ah，這一切我ê目睭lóng看過，我ê耳孔lóng聽過，也明白。Khòaⁿ ah, che it-chhè góa ê ba̍k-chiu lóng khòaⁿ-kè, Góa ê hī-khang lóng thiaⁿ-kè, iā bêng-pe̍k.

2Lín所知ê，我也知；我無khah輸lín。Lín só͘ chai-ê, góa iā chai; Góa bô khah-su lín.

3我實在ài kap全能ê講話；我真ài kap上帝理論。Góa si̍t-chāi ài kap Choân-lêng-ê kóng-ōe; Góa chin ài kap Siōng-tè lí-lūn.

4總是lín是捏造白賊話ê，lóng是無路用ê醫生。Chóng-sī lín sī liap-chō pe̍h-chha̍t-ōe ê, Lóng sī bô lō͘-ēng ê i-seng.

5願lín一概靜靜，chiah算是lín ê智慧。Goān lín it-khài chēng-chēng, chiah sǹg sī lín ê tì-hūi.

6請lín聽我ê理論，致意聽我ê嘴ê分訴。Chhiáⁿ lín thiaⁿ góa ê lí-lūn, Tì-ì thiaⁿ góa ê chhùi ê hun-sò͘.

7Lín beh為上帝來講不義ê話mah？為伊講詭詐ê話mah？Lín beh ūi Siōng-tè lâi kóng put-gī ê ōe mah? Ūi I kóng khúi-chà ê ōe mah?

8Lín kiám beh偏袒伊mah？beh為上帝辯護mah？Lín kiám beh phian-thán I mah? Beh ūi Siōng-tè piān-hō͘ mah?

9伊若查出lín，kiám有好mah？Lín能騙伊親像騙人mah？I nā chhâ-chhut lín, kiám ū hó mah? Lín ōe phiàn I chhin-chhiūⁿ phiàn lâng mah?

10Lín若暗靜偏袒，伊的確beh責備lín。Lín nā àm-chīⁿ phian-thán, I tek-khak beh chek-pī lín.

11伊ê威嚴kiám無hō͘你驚mah？伊ê thang驚畏，kiám無臨到lín mah？I ê ui-giâm kiám bô hō͘ lí kiaⁿ mah? I ê thang kiaⁿ-ùi, kiám bô lîm-kàu lín mah?

12Lín所記念ê箴言是親像火灰；lín ê營寨是土糜ê營寨。Lín só͘ kì-liām ê chim-giân sī chhin-chhiūⁿ hé-hu; Lín ê iâⁿ-chē sī thô͘-bê ê iâⁿ-chē.

13Lín靜靜，莫得chhap我，kù-chāi我講，就無論甚麼做伊來。Lín chēng-chēng, bo̍h-tit chhap góa, kù-chāi góa kóng, Chiū bô-lūn sím-mi̍h chòe i lâi.

14我啥事將我ê肉咬tī我ê嘴齒，將我ê性命hē tī我ê手ah？Góa siáⁿ-sū chiong góa ê bah kā tī góa ê chhùi-khí, Chiong góa ê sìⁿ-miā hē tī góa ê chhiú ah?

15看ah，伊beh thâi死我，我無thang ǹg望；總是我beh tī伊ê面前表白我ê所行。Khòaⁿ ah, I beh thâi-sí góa, góa bô thang ǹg-bāng; Chóng-sī góa beh tī I ê bīn-chêng piáu-pe̍k góa ê só͘ kiâⁿ.

16這beh成做拯救我ê；因為無虔誠ê人bōe得到伊ê面前。Che beh chiâⁿ-chòe chín-kiù góa ê; In-ūi bô khiân-sêng ê lâng bōe tit kàu I ê bīn-chêng.

17Lín tio̍h細膩聽我ê話，hō͘我所辯論ê入lín ê耳孔。Lín tio̍h sòe-jī thiaⁿ góa ê ōe, Hō͘ góa só͘ piān-lūn-ê ji̍p lín ê hī-khang.

18看ah，我有排列我ê案件，我知我beh得tio̍h稱做義。Khòaⁿ ah, góa ū pâi-lia̍t góa ê àn-kiāⁿ, Góa chai góa beh tit-tio̍h chheng-chòe-gī.

19Chī-chūi能kap我辯論ah？有，我就靜靜來斷氣。Chī-chūi ōe kap góa piān-lūn ah? Ū, góa chiū chēng-chēng lâi tn̄g-khùi.

20獨獨有兩項，莫得行tī我，我就無閃避離開你ê面。To̍k-to̍k ū nn̄g-hāng, bo̍h-tit kiâⁿ tī góa, Góa chiū bô siám-pī lī-khui lí ê bīn.

21就是你ê手kiu 倒tńg，離開我遠遠；koh無用你ê威嚴hō͘我驚；Chiū-sī Lí ê chhiú kiu tò-tńg, lī-khui góa hn̄g-hn̄g; Koh bô ēng Lí ê ui-giâm hō͘ góa kiaⁿ;

22Án-ni，你叫，我就應；á是hō͘我講，你應我。Án-ni, Lí kiò, góa chiū ìn; Á-sī hō͘ góa kóng, Lí ìn góa.

23我ê罪過kap過失有jōa-chōe ah？求你hō͘我知我ê過失，我ê罪過。Góa ê chōe-kòa kap kè-sit ū jōa-chōe ah? Kiû Lí hō͘ góa chai góa ê kè-sit, góa ê chōe-kòa.

24你啥事掩(ng)你ê面，掠我做你ê對敵ah？Lí siáⁿ-sū ng Lí ê bīn, Lia̍h góa chòe Lí ê tùi-te̍k ah?

25你kiám beh搖動hō͘風吹ê樹葉mah？追jip枯焦ê草mah？Lí kiám beh iô-tāng hō͘ hong chhe ê chhiū-hio̍h mah? Tui-jip ko͘-tâ ê chháu mah?

26因為你記載艱苦ê事來辦我；koh hō͘我擔當少年ê時ê罪過。In-ūi Lí kì-chài kan-khó͘ ê sū lâi pān góa; Koh hō͘ góa tam-tng siàu-liân ê sî ê chōe-kòa.

27你用腳銬銬我ê腳，致意看我一切ê路；你kā我ê腳底劃定界限。Lí ēng kha-khàu khàu góa ê kha, tì-ì khòaⁿ góa it-chhè ê lō͘; Lí kā góa ê kha-tóe u̍ih-tiāⁿ kài-hān.

28我beh受敗壞，親像臭爛ê物，親像tio̍h蛀蟲ê衫。Góa beh siū pāi-hoāi, chhin-chhiūⁿ chhàu-nōa ê mi̍h, Chhin-chhiūⁿ tio̍h chiù-thâng ê saⁿ.

1Tùi婦人人所生ê人日子短少，有chōe-chōe煩惱。Tùi hū-jîn-lâng só͘ siⁿ ê lâng ji̍t-chí té-chió, Ū chōe-chōe hoân-ló.

2伊出親像花，續謝去，伊走去親像影，也無停teh。I chhut chhin-chhiūⁿ hoe, sòa siā-khì, I cháu-khì chhin-chhiūⁿ iáⁿ, iā bô thêng-teh.

3親像chit號ê人，你kiám開你ê目睭看伊ah？Koh chhōa我受你ê審判？Chhin-chhiūⁿ chit-hō ê lâng, Lí kiám khui Lí ê ba̍k-chiu khòaⁿ i ah? Koh chhōa góa siū Lí ê sím-phòaⁿ?

4Chī-chūi能hō͘清氣ê tùi無清氣ê出來？無一個能。Chī-chūi ōe hō͘ chheng-khì-ê tùi bô chheng-khì-ê chhut-lâi? Bô chi̍t-ê ōe.

5伊ê日子既然受限定，伊ê月ê數額在tī你；你也設伊ê界限，hō͘伊bōe能pôaⁿ過；I ê ji̍t-chí kì-jiân siū hān-tiāⁿ, i ê ge̍h ê siàu-gia̍h chāi-tī Lí; Lí iā siat i ê kài-hān, hō͘ i bōe-ōe pôaⁿ-kè;

6就求你目睭oa̍t-tńg無看伊，hō͘伊能安得，親像chhiàⁿ工人做完伊ê工。Chiū kiû Lí ba̍k-chiu oa̍t-tńg bô khòaⁿ i, hō͘ i ōe an-tit, Chhin-chhiūⁿ chhiàⁿ-kang lâng chòe-oân i ê kang.

7因為樹若剉起來，iáu-kú有ǹg望koh puh-íⁿ；軟ê枝發無soah。In-ūi chhiū nā chhò--khí-lâi, iáu-kú ū ǹg-bāng koh puh-íⁿ; Nńg ê ki hoat bô soah.

8雖然伊ê根tī地裡真老，伊ê叢也死tī土裡；Sui-jiân i ê kun tī tōe--nih chin lāu, I ê châng iā sí tī thô͘--nih;

9到得tio̍h水潤澤就會koh發íⁿ，也親像栽種ê物發枝。Kàu tit-tio̍h chúi lūn-te̍k chiū ōe koh hoat-íⁿ, Iā chhin-chhiūⁿ chai-chèng ê mi̍h hoat-ki.

10總是人死，就倒直直，氣一下斷，人tī toh落？Chóng-sī lâng sí, chiū tó ti̍t-ti̍t, Khùi chi̍t-ē tn̄g, lâng tī toh-lo̍h?

11海中ê水beh絕斷，河水beh消無乾去；Hái-tiong ê chúi beh choa̍t-tn̄g, Hô-chúi beh siau-bô ta--khì;

12人也是án-ni，倒落去bōe koh起來，到天無去，也bōe精神；長長睏叫bōe醒。Lâng iā-sī án-ni, tó-lo̍h-khì bōe koh khí-lâi, Kàu thiⁿ bô--khì, iā bōe cheng-sîn; Tn̂g-tn̂g khùn kiò bōe chhíⁿ.

13願你khǹg我tī陰間，收我tī隱密ê所在，thèng候你ê受氣soah，kā我定tio̍h日期，來記念我。Goān Lí khǹg góa tī im-kan, Siu góa tī ún-ba̍t ê só͘-chāi, thèng-hāu Lí ê siū-khì soah, Kā góa tiāⁿ-tio̍h ji̍t-kî, lâi kì-liām góa.

14人死能koh活mah？我就吞忍我勞苦ê日，thèng候我替換ê日到。Lâng sí ōe koh-oa̍h mah? Góa chiū thun-lún góa lô-khó͘ ê ji̍t, Thèng-hāu góa thòe-ōaⁿ ê ji̍t kàu.

15你一下叫，我就應你；你會欣慕你ê手所做ê。Lí chi̍t-ē kiò, góa chiū ìn Lí; Lí ōe him-bō͘ Lí ê chhiú só͘-chòe-ê.

16總是taⁿ你算我ê腳步；kiám無鑑察我ê罪過mah？Chóng-sī taⁿ Lí sǹg góa ê kha-pō͘; Kiám bô kàm-chhat góa ê chōe-kòa mah?

17我ê過失hō͘你封tī袋á內；我ê罪過你縛tiâu-tiâu。Góa ê kè-sit hō͘ Lí hong tī tē-á-lāi; Góa ê chōe-kòa Lí pa̍k tiâu-tiâu.

18山崩就散散去，石頭徙離伊ê本位。Soaⁿ pang chiū sòaⁿ-sòaⁿ khì, Chio̍h-thâu sóa-lī i ê pún-ūi.

19水能磨了石頭；大水能沖無地上ê土；你也án-ni絕人ê ǹg望。Chúi ōe bôa-liáu chio̍h-thâu; Tōa-chúi ōe chhiong-bô tōe-chiūⁿ ê thô͘; Lí iā án-ni choa̍t lâng ê ǹg-bāng.

20你永遠khah贏伊，伊就過去；你變換伊ê面貌，來差伊去。Lí éng-oán khah-iâⁿ i, i chiū kè-khì; Lí piàn-ōaⁿ i ê bīn-māu, lâi chhe i khì.

21伊ê kiáⁿ兒得tio̍h榮光，伊m̄知，in tú-tio̍h降低，伊也m̄知。I ê kiáⁿ-jî tit-tio̍h êng-kng, i m̄-chai, In tú-tio̍h kàng-kē, i iā m̄-chai.

22獨獨伊ê肉身家己teh痛疼，伊ê神魂家己teh憂悶。To̍k-to̍k i ê jio̍k-sin ka-kī teh thàng-thiàⁿ, I ê sîn-hûn ka-kī teh iu-būn.