1Thê-bān人Í-lī-hoat應講，Thê-bān lâng Í-lī-hoat ìn kóng,

2智慧ê人kiám beh用空虛ê知識來應，á是用東風充滿伊ê腹肚mah？Tì-hūi ê lâng kiám beh ēng khang-hu ê tì-sek lâi ìn, Á-sī ēng tang-hong chhiong-móa i ê pak-tó͘ mah?

3伊kiám beh用無利益ê話，kap無路用ê話來辯論mah？I kiám beh ēng bô lī-ek ê ōe, Kap bô lō͘-ēng ê ōe lâi piān-lūn mah?

4你實在廢無敬畏，tī上帝ê面前阻擋敬虔ê心。Lí si̍t-chāi hòe-bô kèng-ùi, Tī Siōng-tè ê bīn-chêng chó͘-tòng kèng-khiân ê sim.

5因為你ê罪過教示你ê嘴，你揀詭詐ê人ê舌。In-ūi lí ê chōe-kòa kà-sī lí ê chhùi, Lí kéng khúi-chà ê lâng ê chi̍h.

6定你ê罪-ê是你ê嘴，m̄是我；你ê嘴唇干證你ê m̄-tio̍h。Tēng lí ê chōe--ê sī lí ê chhùi, m̄-sī góa; Lí ê chhùi-tûn kan-chèng lí ê m̄-tio̍h.

7你是頭一個出世ê人mah？á是比 chiah-ê山khah事先受造mah？Lí sī thâu-chi̍t-ê chhut-sì ê lâng mah? Á-sī pí chiah ê soaⁿ khah tāi-seng siū-chō mah?

8上帝秘密ê旨意，你bat聽見mah？智慧kiám是你獨得mah？Siōng-tè pì-ba̍t ê chí-ì, lí bat thiaⁿ-kìⁿ mah? Tì-hūi kiám sī lí to̍k tit mah?

9有甚麼你知，阮m̄知mah？Á是你明白，阮無明白ah？Ū sím-mi̍h lí chai, goán m̄-chai mah? Á-sī lí bêng-pe̍k, goán bô bêng-pe̍k ah?

10阮中間有頭毛白ê，kap年老ê，比你ê老父iáu khah老。Goán tiong-kan ū thâu-mn̂g pe̍h ê, kap nî-lāu ê, Pí lí ê lāu-pē iáu khah lāu.

11上帝ê安慰，以及伊溫和勸你ê話，你看做小khóa mah？Siōng-tè ê an-ùi, í-ki̍p I un-hô khǹg lí ê ōe, Lí khòaⁿ-chòe sió-khóa mah?

12你ê心啥事掠你去？你ê目睭啥事teh gîn？Lí ê sim siáⁿ-sū lia̍h lí khì? Lí ê ba̍k-chiu siáⁿ-sū teh gîn?

13Chiah hō͘你ê神反對上帝，也hō͘你ê嘴講hiah-ê話。Chiah hō͘ lí ê sîn hoán-tùi Siōng-tè, Iā hō͘ lí ê chhùi kóng hiah ê ōe.

14世間人是甚麼，能算做清氣ah？婦人人所生ê是甚麼，能算做公義mah？Sè-kan lâng sī sím-mi̍h, ōe sǹg-chòe chheng-khì ah? Hū-jîn-lâng só͘-siⁿ-ê sī sím-mi̍h, ōe sǹg-chòe kong-gī mah?

15看ah，上帝無信任伊ê聖ê；chiah-ê天tī伊面前也無清氣。Khòaⁿ ah, Siōng-tè bô sìn-jīm I ê sèng-ê; Chiah ê thiⁿ tī I bīn-chêng iā bô chheng-khì.

16何況可惡腐敗ê人，lim罪惡親像lim水ê ah？Hô-hòng khó-ò͘ⁿ hú-pāi ê lâng, Lim chōe-ok chhin-chhiūⁿ lim-chúi-ê ah?

17我beh指示你，你tio̍h聽我；我beh講起所看見ê。Góa beh chí-sī lí, lí tio̍h thiaⁿ góa; Góa beh kóng-khí só͘ khòaⁿ-kìⁿ ê.

18(就是智慧ê人tùi列祖所傳來，也無隱密ê。(Chiū-sī tì-hūi ê lâng tùi lia̍t-chó͘ só͘ thoân lâi, Iā bô ún-ba̍t ê.

19Chit-ê地獨獨賞賜in；也無外人tùi in中間經過。)Chit ê tōe to̍k-to̍k siúⁿ-sù in; Iā bô gōa-lâng tùi in tiong-kan keng-kè.)

20Pháiⁿ人一生ê日子是痛苦，就是為強暴ê人所定tio̍h ê年額。Pháiⁿ-lâng it-seng ê ji̍t-chí sī thòng-khó͘, Chiū-sī ūi kiông-pō ê lâng só͘ tiāⁿ-tio̍h ê nî-gia̍h.

21Thang驚ê聲常常tī伊耳孔；tī平安ê時，毀滅ê beh到伊hia。Thang kiaⁿ ê siaⁿ siông-siông tī i hī-khang; Tī pêng-an ê sî, húi-bia̍t--ê beh kàu i hia.

22伊m̄信能tùi烏暗tńg來；伊hō͘刀劍thèng候伊。I m̄-sìn ōe tùi o͘-àm tńg--lâi; I hō͘ to-kiàm thèng-hāu i.

23伊四界liû討食，講，toh落有ah？伊知有烏暗ê日便便teh thèng候伊。I sì-kòe liû thó chia̍h, kóng, Toh-lo̍h ū ah? I chai ū o͘-àm ê ji̍t piān-piān teh thèng-hāu i.

24患難困苦hō͘伊驚惶，koh贏伊；親像君王備辦出陣一樣。Hoān-lān khùn-khó͘ hō͘ i kiaⁿ-hiâⁿ, koh iâⁿ i; Chhin-chhiūⁿ kun-ông pī-pān chhut tīn chi̍t-iūⁿ.

25因為伊伸手攻擊上帝，用驕傲抗拒全能ê。In-ūi i chhun-chhiú kong-kek Siōng-tè, Ēng kiau-ngō͘ khòng-kū Choân-lêng--ê.

26伊用硬ê頷頸，厚ê藤牌，走來抵敵全能ê。I ēng ngī ê ām-kún, kāu ê tîn-pâi, Cháu-lâi tí-te̍k Choân-lêng--ê.

27因為伊ê面真肥，伊ê腰肥到有lâ。In-ūi i ê bīn chin pûi, I ê io pûi kàu ū lâ.

28伊khiā起tī荒廢ê城，無人khiā起ê厝，就是得beh變做土堆ê。I khiā-khí tī hong-hòe ê siâⁿ, Bô lâng khiā-khí ê chhù, Chiū-sī tit-beh piàn-chòe thô͘-tui ê.

29伊bōe得tio̍h好額，財物bōe長長tī-teh；in ê土產也bōe生湠tī地裡。I bōe tit-tio̍h hó-gia̍h, châi-bu̍t bōe tn̂g-tn̂g tī-teh; In ê thó͘-sán iā bōe siⁿ-thòaⁿ tī tōe--nih.

30伊bōe脫離烏暗；火燄beh燒乾伊ê枝，伊beh tùi上帝嘴內ê氣來無去。I bōe thoat-lī o͘-àm; Hé-iām beh sio-ta i ê ki, I beh tùi Siōng-tè chhùi-lāi ê khì lâi bô--khì.

31伊m̄-thang óa靠虛假，來家己騙；因為虛假beh成做伊ê報應。I m̄-thang óa-khò hu-ké, lâi ka-kī phiàn; In-ūi hu-ké beh chiâⁿ-chòe i ê pò-èng.

32伊ê日期未到ê事先，chit-ê tāi-chì beh成；伊ê枝bōe青翠。I ê ji̍t-kî bē kàu ê tāi-seng, chit ê tāi-chì beh chiâⁿ; I ê ki bōe chhiⁿ-chhùi.

33伊beh親像葡萄樹，伊ê粒未熟就lak，koh親像橄欖樹lak伊ê花。I beh chhin-chhiūⁿ phû-tô-chhiū, i ê lia̍p bē se̍k chiū lak, Koh chhin-chhiūⁿ kaⁿ-ná-chhiū lak i ê hoe.

34無虔誠ê類的確無生湠，pò͘賂ê ê布棚，beh hō͘火燒去。Bô khiân-sêng ê lūi tek-khak bô siⁿ-thòaⁿ, Pò͘-lō͘--ê ê pò͘-pîⁿ, beh hō͘ hé sio--khì.

35In懷孕殘害，生出罪孽，腹內所備辦ê是詭詐。In hoâi-īn chân-hāi, siⁿ-chhut chōe-gia̍t, Pak-lāi só͘ pī-pān-ê sī khúi-chà.

1約伯應講，Iok-pek ìn kóng,

2Chit號ê話，我有聽見chōe-chōe lah；lín ê安慰lóng是hō͘人倒艱苦。Chit-hō ê ōe, góa ū thiaⁿ-kìⁿ chōe-chōe lah; Lín ê an-ùi lóng sī hō͘ lâng tò kan-khó͘.

3Chit號荒唐ê話，有窮盡mah？有甚麼激動你來應mah？Chit-hō hong-tông ê ōe, ū kiông-chīn mah? Ū sím-mi̍h kek-tōng lí lâi ìn mah?

4我也能講親像lín chit號ê話；lín若tiàm-tī我ê境遇，我也能tàu kui-kōaⁿ ê話來攻擊lín；koh能tùi lín搖我ê頭。Góa iā ōe kóng chhin-chhiūⁿ lín chit-hō ê ōe; Lín nā tiàm-tī góa ê kéng-gū, góa iā ōe tàu kui-kōaⁿ ê ōe lâi kong-kek lín; Koh ōe tùi lín iô góa ê thâu.

5總是我會用嘴hō͘ lín堅固；用嘴唇ê安慰hō͘ lín減輕。chóng-sī góa ōe ēng chhùi hō͘ lín kian-kò͘; Ēng chhùi-tûn ê an-ùi hō͘ lín kiám-khin.

6我若講話，我ê憂悶猶原無減輕；我若靜靜，就憂悶會離開我mah？Góa nā kóng-ōe, góa ê iu-būn iû-goân bô kiám-khin; Góa nā chēng-chēng, chiū iu-būn ōe lī-khui góa mah?

7總是taⁿ伊hō͘我困苦；你hō͘我ê同伴離開我。Chóng-sī taⁿ I hō͘ góa khùn-khó͘; Lí hō͘ góa ê tâng-phōaⁿ lī-khui góa.

8你有掠tio̍h我，是thang做干證，我ê消瘦起來攻擊我；當我ê面前做干證。Lí ū lia̍h-tio̍h góa, sī thang chòe kan-chèng, Góa ê siau-sán khí-lâi kong-kek góa; Tng góa ê bīn-chêng chòe kan-chèng.

9伊受氣，拆裂我，窘迫我，伊對我咬齒；我ê對敵目睭金金gîn我。I siū-khì, thiah-li̍h góa, khún-pek góa, I tùi góa kā-khí; Góa ê tùi-te̍k ba̍k-chiu kim-kim gîn góa.

10In對我開in ê嘴，Siàn我ê嘴phóe來凌辱我；in聚集來攻擊我。In tùi góa khui in ê chhùi, Siàn góa ê chhùi-phóe lâi lêng-jio̍k góa; In chū-chi̍p lâi kong-kek góa.

11上帝將我交hō͘不義ê人，將我hiat tī pháiⁿ人ê手。Siōng-tè chiong góa kau-hō͘ put-gī ê lâng, Chiong góa hiat tī pháiⁿ-lâng ê chhiú.

12我安然ê時，伊kā我at折，Ni̍h我ê頷頸，kā我siak碎碎；koh chhāi我做伊ê箭靶。Góa an-jiân ê sî, I kā góa at-chi̍h, Ni̍h góa ê ām-kún, kā góa siak chhùi-chhùi; Koh chhāi góa chòe I ê chìⁿ-pé.

13伊ê箭四面圍我，破裂我ê臟腑；也無寬恕，將我ê膽piàⁿ tī地裡。I ê chìⁿ sì-bīn ûi góa, phòa-li̍h góa ê chōng-hú; Iā bô khoan-sù, chiong góa ê táⁿ piàⁿ tī tōe--nih.

14伊phah我，phah了koh phah；親像勇士走-來攻擊我。I phah góa, phah-liáu koh phah; Chhin-chhiūⁿ ióng-sū cháu-lâi kong-kek góa.

15我thīⁿ麻布tī我ê皮膚，將我ê角tàm落土。Góa thīⁿ môa-pò͘ tī góa ê phê-hu, Chiong góa ê kak tàm-lo̍h thô͘.

16我ê面因為流目屎就變紅；tī我ê目睭皮有死ê蔭影。Góa ê bīn in-ūi lâu ba̍k-sái chiū piàn âng; Tī góa ê ba̍k-chiu-phê ū sí ê ìm-ńg.

17總是我ê手無暴虐；我ê祈禱也是清氣。Chóng-sī góa ê chhiú bô pō-gio̍k; Góa ê kî-tó iā sī chheng-khì.

18地ah，莫得遮蓋我ê血；願我ê喉叫無停歇ê所在。Tōe ah, bo̍h-tit jia-khàm góa ê huih; goān góa ê âu-kiò bô thêng-hioh ê só͘-chāi.

19看ah，taⁿ我ê干證tī天裡，我ê保認ê tī頂面。Khòaⁿ ah, taⁿ góa ê kan-chèng tī thiⁿ--nih, Góa ê pó-jīn-ê tī téng-bīn.

20我ê朋友譏刺我，總是我ê目睭ǹg上帝流目屎。Góa ê pêng-iú ki-chhì góa, chóng-sī góa ê ba̍k-chiu ǹg Siōng-tè lâu ba̍k-sái.

21願伊ǹg上帝來替人辯明；也替人ê kiáⁿ tī伊ê厝邊辯明。Goān I ǹg Siōng-tè lâi thòe lâng piān-bêng; Iā thòe lâng ê kiáⁿ tī i ê chhù-piⁿ piān-bêng.

22因為koh kè kúi-nā nî，我beh行hit tiâu去無koh 倒tńg ê路。In-ūi koh kè kúi-nā nî, góa beh kiâⁿ hit tiâu khì bô koh tò-tńg ê lō͘.

1我ê khùi絕lah，我ê日子滅盡lah；我ê墳墓便lah。Góa ê khùi choa̍t lah, góa ê ji̍t-chí bia̍t-chīn lah; Góa ê hûn-bōng piān lah.

2實在有譏刺我ê tī我chia；我ê目睭常常看見in 刺激我ê事。Si̍t-chāi ū ki-chhì góa-ê tī góa chia; góa ê ba̍k-chiu siông-siông khòaⁿ-kìⁿ in chhì-kek góa ê sū.

3願你用準當hō͘我，kā我做保認tī你ê面前，有是誰肯kap我頓手？Goān Lí ēng chún-tǹg hō͘ góa, kā góa chòe pó-jīn tī Lí ê bīn-chêng, Ū chī-chūi khéng kap góa tùn-chhiú?

4因為你遮蓋in ê心，hō͘ in無明理，所以你無beh hō͘ in升高。In-ūi Lí jia-khàm in ê sim, hō͘ in bô bêng-lí, Só͘-í Lí bô beh hō͘ in seng-koâiⁿ.

5人交付伊ê朋友去hō͘人搶奪，伊ê kiáⁿ ê目睭beh失明。Lâng kau-hù i ê pêng-iú khì hō͘ lâng chhiúⁿ-toa̍t, I ê kiáⁿ ê ba̍k-chiu beh sit-bêng.

6我成做百姓中ê笑談；我hō͘人nōa phùi到面裡。Góa chiâⁿ-chòe peh-sìⁿ-tiong ê chhiàu-tâm; Góa hō͘ lâng nōa phùi kàu bīn--nih.

7我ê目睭因為憂悶來煙暈(ian-n̄g)，我ê百體lóng親像影。Góa ê ba̍k-chiu in-ūi iu-būn lâi ian-n̄g, Góa ê pah-thé lóng chhin-chhiūⁿ iáⁿ.

8因為án-ni，正直ê人beh gông-ngia̍h，無罪ê人beh激勵家己來攻擊無敬虔ê人。In-ūi án-ni chèng-ti̍t ê lâng beh gông-ngia̍h, Bô-chōe ê lâng beh kek-lē ka-kī lâi kong-kek bô kèng-khiân ê lâng.

9義ê人也beh堅守伊所行ê路，手清氣ê人beh ná加添伊ê氣力。Gī ê lâng iā beh kian-siú i só͘ kiâⁿ ê lō͘, Chhiú chheng-khì ê lâng beh ná ke-thiⁿ i ê khùi-la̍t.

10總是lín眾人請lín koh來，因為lín中間我chhē無一個智慧ê人。Chóng-sī lín chèng-lâng chhiáⁿ lín koh lâi, In-ūi lín tiong-kan góa chhē bô chi̍t-ê tì-hūi ê lâng.

11我ê日子已經過身，我ê計畫，我ê心所想-ê，已經斷絕。Góa ê ji̍t-chí í-keng kè-sin, góa ê kè-e̍k, Góa ê sim só͘-siūⁿ-ê, í-keng toān-choa̍t.

12In掠暝做日，講，光近tī烏暗。In lia̍h mî chòe ji̍t, kóng, Kng kūn tī o͘-àm.

13我若ǹg望陰間做我ê厝，我若鋪眠床tī烏暗中；Góa nā ǹg-bāng im-kan chòe góa ê chhù, Góa nā pho͘ bîn-chhn̂g tī o͘-àm tiong;

14我若對朽爛講，你是我ê老父，對蟲講，你是我ê老母、我ê姊妹；Góa nā tùi hiú-nōa kóng, Lí sī góa ê lāu-pē, Tùi thâng kóng, Lí sī góa ê lāu-bú góa ê chí-bē;

15Án-ni我ê ǹg望tī toh落？我ê ǹg望是誰能看見ah？Án-ni góa ê ǹg-bāng tī toh-lo̍h? Góa ê ǹg-bāng chī-chūi ōe khòaⁿ-kìⁿ ah?

16到做一下安歇tī土裡ê時，這ǹg望beh落到陰間ê門閂(chhòaⁿ)hia。Kàu chòe-chi̍t-ē an-hioh tī thô͘--nih ê sî, Che ǹg-bāng beh lo̍h-kàu im-kan ê mn̂g-chhòaⁿ hia.