1約伯應講，Iok-pek ìn kóng,

2Lín hō͘我ê心憂苦，用話傷害我，beh到tī時ah？Lín hō͘ góa ê sim iu-khó͘, Ēng ōe siong-hāi góa, beh kàu tī-sî ah?

3Lín這十pái凌辱我，lín pháiⁿ款待我，也無家己見笑。Lín che cha̍p-pái lêng-jio̍k góa, Lín pháiⁿ khoán-thāi góa, iā bô ka-kī kiàn-siàu.

4我若果然有過失，這過失是在tī我家己。Góa nā kó-jiân ū kè-sit, Che kè-sit sī chāi-tī góa ka-kī.

5Lín果然beh對我誇口大，koh用我ê凌辱責備我；Lín kó-jiân beh tùi góa khoa-kháu tōa, Koh ēng góa ê lêng-jio̍k chek-pī góa;

6就tio̍h知這是上帝枉屈我，用伊ê羅網圍我。Chiū tio̍h chai che sī Siōng-tè óng-khut góa, Ēng I ê lô-bāng ûi góa.

7看ah，我因為冤枉來喉叫，也無得tio̍h聽，我哮救，也無得tio̍h公斷。Khòaⁿ ah, góa in-ūi oan-óng lâi âu-kiò, iā bô tit-tio̍h thiaⁿ, Góa háu-kiù, iā bô tit-tio̍h kong-toàn.

8伊圍遮我ê路，hō͘我bōe得過去，koh hō͘我ê路徑烏暗。I ûi-cha̍h góa ê lō͘, hō͘ góa bōe-tit kè-khì, Koh hō͘ góa ê lō͘-kèng o͘-àm.

9伊thǹg去我ê榮光，liù去我ê頭殼頂ê冕旒。I thǹg--khì góa ê êng-kng, Liù--khì góa ê thâu-khak-téng ê bián-liû.

10伊tī四圍毀壞我，我就無去；我ê ǹg望拔起來，親像拔樹。I tī sì-ûi húi-hoāi góa, góa chiū bô--khì; Góa ê ǹg-bāng pu̍ih--khí-lâi, chhin-chhiūⁿ pu̍ih chhiū.

11伊ê受氣烈烈攻擊我，伊掠我做伊ê對敵ê一個。I ê siū-khì lia̍t-lia̍t kong-kek góa, I lia̍h góa chòe I ê tùi-te̍k ê chi̍t-ê.

12伊ê軍兵一齊來，造in ê路來攻擊我，紮營tī我ê布棚ê四圍。I ê kun-peng chi̍t-chôe lâi, chō in ê lō͘ lâi kong-kek góa, Chat-iâⁿ tī góa ê pò͘-pîⁿ ê sì-ûi.

13伊hō͘我ê兄弟隔開遠遠，相識ê人kap我生疏。I hō͘ góa ê hiaⁿ-tī keh-khui hn̄g-hn̄g, Saⁿ-bat ê lâng kap góa chhiⁿ-so͘.

14我ê親人kap我斷絕，我親密ê朋友lóng bōe記得我。Góa ê chhin-lâng kap góa toān-choa̍t, Góa chhin-bi̍t ê pêng-iú lóng bōe kì-tit góa.

15寄腳tī我厝內ê人，以及我ê女婢，lóng看我做外人；in看我做外邦人。Kià-kha tī góa chhù-lāi ê lâng, í-ki̍p góa ê lú-pī, lóng khòaⁿ góa chòe gōa-lâng; In khòaⁿ góa chòe gōa-pang lâng.

16我叫我ê奴僕，伊m̄應，我tio̍h親嘴求伊。Góa kiò góa ê lô͘-po̍k, i m̄ ìn, Góa tio̍h chhin-chhùi kiû i.

17我嘴ê氣味hō͘我ê bó͘厭賤；kap我siâng腹ê也厭賤我ê臭味。Góa chhùi ê khì-bī hō͘ góa ê bó͘ iàm-chiān; Kap góa siâng-pak-ê iā iàm-chiān góa ê chhàu-bī.

18連gín-ná也看輕我；我若起來，in lóng譏刺我。Liân gín-ná iā khòaⁿ-khin góa; góa nā khí-lâi, in lóng ki-chhì góa.

19我親密ê朋友lóng厭賤我；我平日所疼ê人，對我變面。Góa chhin-bi̍t ê pêng-iú lóng iàm-chiān góa; Góa pêng-ji̍t só͘ thiàⁿ ê lâng, tùi góa pìⁿ-bīn.

20我ê皮mo͘h tī我ê骨；我只有chhun嘴齒hōaⁿ。Góa ê phê mo͘h tī góa ê kut; Góa chí-ū chhun chhùi-khí-hōaⁿ.

21我ê朋友ah，lín tio̍h可憐我，可憐我；因為上帝ê手摸tio̍h我。Góa ê pêng-iú ah, lín tio̍h khó-lîn góa, khó-lîn góa; In-ūi Siōng-tè ê chhiú bong--tio̍h góa.

22Lín啥事親像上帝窘迫我，掠我ê肉做無thang飽足mah？Lín siáⁿ-sū chhin-chhiūⁿ Siōng-tè khún-pek góa, Lia̍h góa ê bah chòe bô thang pá-chiok mah?

23Taⁿ願將我ê話寫起來，koh記tī冊裡；Taⁿ goān chiong góa ê ōe siá--khí-lâi, Koh kì tī chheh--nih;

24用鐵鏨，用鉛刻tiâu tī石裡；hō͘伊永永tī-teh。Ēng thih-chām ēng iân khek-tiâu tī chio̍h--nih; Hō͘ i éng-éng tī-teh.

25因為我知救贖我ê是活ê；日後伊beh khiā tī土ê頂面；In-ūi góa chai kiù-sio̍k góa--ê sī oa̍h-ê; Ji̍t-āu i beh khiā tī thô͘ ê téng-bīn;

26我chit-ê皮敗壞了後，我beh tī肉體ê外面得tio̍h見上帝。Góa chit ê phê pāi-hoāi liáu-āu, Góa beh tī jio̍k-thé ê gōa-bīn tit-tio̍h kìⁿ Siōng-tè.

27我本身beh看見伊是為我ê，我親目看見伊m̄是外人；我ê心腸tī我ê內面到熔去。Góa pún-sin beh khòaⁿ-kìⁿ I sī ūi-góa--ê, Góa chhin-ba̍k khòaⁿ-kìⁿ I m̄-sī gōa-lâng; Góa ê sim-tn̂g tī góa ê lāi-bīn kàu iûⁿ--khì.

28Lín若講，阮beh怎樣窘迫伊！tāi-chì ê根本在tī我→伊；Lín nā kóng, Goán beh cháiⁿ-iūⁿ khún-pek i! Tāi-chì ê kun-pún chāi-tī góa→i;"

29Lín tio̍h驚刀劍，因為受氣就有刀劍ê刑罰，hō͘ lín知有審判。Lín tio̍h kiaⁿ to-kiàm, in-ūi siū-khì chiū ū to-kiàm ê hêng-hoa̍t, Hō͘ lín chai ū sím-phòaⁿ.

1Ná-má人Só-hoat應講，Ná-má lâng Só-hoat ìn kóng,

2我ê心內著急，所以我ê心思逼我tio̍h應。Góa ê sim-lāi tio̍h-kip, Só͘-í góa ê sim-su pek góa tio̍h ìn.

3我聽見hit-ê凌辱我ê責備，我智慧ê心教我應。Góa thiaⁿ-kìⁿ hit ê lêng-jio̍k Góa ê chek-pī, Góa tì-hūi ê sim kà góa ìn.

4你kiám m̄知tùi古早，tùi有人tī世間以來；Lí kiám m̄-chai tùi kó͘-chá, Tùi ū lâng tī sè-kan í-lâi;

5Pháiⁿ人ê大悅無久長，無敬虔ê人ê歡喜目nih久nā-tiāⁿ？Pháiⁿ-lâng ê tāi-ia̍t bô kú-tn̂g, Bô kèng-khiân ê lâng ê hoaⁿ-hí ba̍k-nih-kú nā-tiāⁿ?

6伊ê高雖然抵天，伊ê頭殼雖然到雲裡；I ê koâiⁿ sui-jiân tú-thiⁿ, I ê thâu-khak sui-jiân kàu hûn--nih;

7伊到尾beh滅無，親像伊ê糞一樣；平素看見伊ê人beh講，伊tī toh落ah？I kàu-bé beh bia̍t-bô, chhin-chhiūⁿ i ê pùn chi̍t-iūⁿ; Pêng-sò͘ khòaⁿ-kìⁿ i ê lâng beh kóng, I tī toh-lo̍h ah?

8伊beh親像眠夢飛去，無thang chhē-tio̍h；伊beh受趕走，親像暝時ê異象。I beh chhin-chhiūⁿ bîn-bāng pe--khì, bô thang chhē-tio̍h; I beh siū kóaⁿ-cháu, chhin-chhiūⁿ mî--sî ê īⁿ-siōng.

9平素看見伊ê，伊ê目睭bōe koh看見伊；伊ê本所在也無koh看見伊。Pêng-sò͘ khòaⁿ-kìⁿ i ê, i ê ba̍k-chiu bōe koh khòaⁿ-kìⁿ i; I ê pún só͘-chāi iā bô koh khòaⁿ-kìⁿ i.

10伊ê kiáⁿ兒beh對sòng-hiong人求恩，伊ê手beh還貨財。I ê kiáⁿ-jî beh tùi sòng-hiong lâng kiû-un, I ê chhiú beh hêng hè-châi.

11伊ê骨滿滿有少年ê力；總是beh kap伊相kap倒tī土裡。I ê kut móa-móa ū siàu-liân ê la̍t; Chóng-sī beh kap i saⁿ-kap tó tī thô͘--nih.

12罪惡tī伊ê嘴雖然甜，雖然伊khǹg tī伊ê舌下；Chōe-ok tī i ê chhùi sui-jiân tiⁿ, Sui-jiân i khǹg tī i ê chi̍h-ē;

13雖然保惜，m̄肯放sak，定定kâm tī伊ê嘴；Sui-jiân pó-sioh, m̄-khéng pàng-sak, Tiāⁿ-tiāⁿ kâm tī i ê chhùi;

14伊ê食物到伊ê腸á就變，成做毒蛇ê膽tī伊ê內面。I ê chia̍h-mi̍h kàu i ê tn̂g-á chiū piàn, Chiâⁿ-chòe to̍k-chôa ê táⁿ tī i ê lāi-bīn.

15伊吞食財寶，beh koh吐出；上帝beh對伊ê腹肚jîm出來。I thun-chia̍h châi-pó, beh koh thò͘-chhut; Siōng-tè beh tùi i ê pak-tó͘ jîm--chhut-lâi.

16伊beh suh毒蛇ê毒；蛇ê舌也beh害死伊。I beh suh to̍k-chôa ê to̍k; Chôa ê chi̍h iā beh hāi-sí i.

17伊bōe得tio̍h看見江河，流蜜kap奶ê溪。I bōe tit-tio̍h khòaⁿ-kìⁿ kang-hô, Lâu bi̍t kap lin ê khoe.

18伊tio̍h磨所得tio̍h-ê，tio̍h 還人，無thang食落去，bōe會照所交易ê財物來歡喜。I tio̍h-bôa só͘ tit-tio̍h--ê, tio̍h hêng lâng, bô thang chia̍h--lo̍h-khì, Bōe-ōe chiàu só͘ kau-e̍k ê châi-bu̍t lâi hoaⁿ-hí.

19因為伊壓制sòng-hiong人，koh棄sak伊；強佔人ê厝，也bōe會起造。In-ūi i ap-chè sòng-hiong lâng, koh khì-sak i; Kiông-chiàm lâng ê chhù, iā bōe-ōe khí-chō.

20因為伊ê心內bē-bat安靜，伊所歡喜-ê lóng bōe保全。In-ūi i ê sim-lāi bē-bat an-chēng, I só͘ hoaⁿ-hí-ê lóng bōe pó-choân.

21無一件無hō͘伊吞落去，所以伊ê 福祿bōe久長。Bô chi̍t-kiāⁿ bô hō͘ i thun--lo̍h-khì, Só͘-í i ê hok-lo̍k bōe kú-tn̂g.

22當伊好額充足ê時，beh到狹toe̍h ê所在；艱苦ê人lóng beh出手phah伊。Tng i hó-gia̍h chhiong-chiok ê sî, beh kàu oe̍h-toe̍h ê só͘-chāi; Kan-khó͘ ê lâng lóng beh chhut-chhiú phah i.

23伊ê腹肚beh飽ê時，上帝beh降猛烈ê受氣tī伊；伊teh食ê時，beh降受氣tī伊ê頂面。I ê pak-tó͘ beh pá ê sî, Siōng-tè beh kàng béng-lia̍t ê siū-khì tī i; I teh chia̍h ê sî, beh kàng siū-khì tī i ê téng-bīn.

24伊閃離鐵ê器具，銅ê弓beh射透伊。I siám-lī thih ê khì-kū, Tâng ê keng beh siā-thàu i.

25伊一下拔伊，就對伊ê身軀出來，光nà-nà ê箭尾beh對伊ê膽出；驚惶beh到tī伊。I chi̍t-ē pu̍ih i, chiū tùi i ê seng-khu chhut-lâi, Kng-nà-nà ê chìⁿ-bé beh tùi i ê táⁿ chhut; Kiaⁿ-hiâⁿ beh kàu tī i.

26一切ê烏暗收khǹg為tio̍h伊ê財寶，人所無pûn ê火beh燒滅伊；koh beh燒毀留tī伊ê布棚ê。It-chhè ê o͘-àm siu-khǹg ūi-tio̍h i ê châi-pó, Lâng só͘ bô pûn ê hé beh sio-bia̍t i; Koh beh sio-húi lâu tī i ê pò͘-pîⁿ ê.

27天beh顯明伊ê罪惡，地beh起來攻擊伊。Thiⁿ beh hián-bêng i ê chōe-ok, Tōe beh khí-lâi kong-kek i.

28伊ê家伙beh無去，lóng beh消滅tī上帝受氣ê日。I ê ke-hé beh bô--khì, Lóng beh siau-bia̍t tī Siōng-tè siū-khì ê ji̍t.

29這就是pháiⁿ人tùi上帝所得ê份額；是上帝kā伊定tio̍h ê產業。Che chiū-sī pháiⁿ-lâng tùi Siōng-tè só͘ tit ê hūn-gia̍h; Sī Siōng-tè kā i tiāⁿ-tio̍h ê sán-gia̍p.

1約伯應講，Iok-pek ìn kóng,

2Lín tio̍h致意聽我ê話，用chit-ê做lín ê安慰。Lín tio̍h tì-ì thiaⁿ góa ê ōe, Ēng chit-ê chòe lín ê an-ùi.

3請寬容我，我beh koh講，我講了，kù-chāi你譏刺。Chhiáⁿ khoan-iông góa, góa beh koh kóng, Góa kóng-liáu, kù-chāi lí ki-chhì.

4論到我，我kiám是對人哀怨？我ê心神怎樣無著急ah？Lūn-kàu góa, góa kiám-sī tùi lâng ai-oàn? Góa ê sim-sîn cháiⁿ-iūⁿ bô tio̍h-kip ah?

5Lín tio̍h看我來gông-ngia̍h，用手掩嘴。Lín tio̍h khòaⁿ góa lâi gông-ngia̍h, Ēng chhiú ng-chhùi.

6我若想tio̍h，就驚，thong身軀ngia̍uh-ngia̍uh-chhoah。Góa nā siūⁿ-tio̍h, chiū kiaⁿ, Thong seng-khu ngia̍uh-ngia̍uh-chhoah.

7Pháiⁿ人啥事活teh，食長歲壽，勢力強盛ah？Pháiⁿ-lâng siáⁿ-sū oa̍h-teh, chia̍h tn̂g hè-siū, Sè-le̍k kiông-sēng ah?

8In看見kiáⁿ孫，kap in平平成立；in ê後裔tī in ê目睭前也是án-ni。In khòaⁿ-kìⁿ kiáⁿ-sun, kap in pîⁿ-pîⁿ sêng-li̍p; In ê hō͘-è tī in ê ba̍k-chiu-chêng iā sī án-ni.

9In ê家眷安然無驚；上帝ê柺也無phah in。In ê ke-koàn an-jiân bô kiaⁿ; Siōng-tè ê koáiⁿ iā bô phah in.

10In ê牛káng生湠無斷，in ê牛母生kiáⁿ，也無墮胎。In ê gû-káng siⁿ-thòaⁿ bô tn̄g, In ê gû-bú siⁿ-kiáⁿ, iā bô tūi-thai.

11In差gín-ná出去，親像羊群，in ê kiáⁿ兒四界tiô跳。In chhe gín-ná chhut-khì, chhin-chhiūⁿ iûⁿ-kûn, In ê kiáⁿ-jî sì-kòe tiô-thiàu.

12In tè lin-long鼓kap琴來唱歌，koh因為品簫ê聲來歡喜。In tè lin-long-kó͘ kap khîm lâi chhiùⁿ-koa, Koh in-ūi phín-siau ê siaⁿ lâi hoaⁿ-hí.

13In度過日，事事興通；目nih久落陰間。In tō͘ kè ji̍t, sū-sū heng-thong; ba̍k-nih-kú lo̍h im-kan.

14In對上帝講，tio̍h離開阮，阮m̄ ài bat你ê路。In tùi Siōng-tè kóng, Tio̍h lī-khui goán, Goán m̄ ài bat Lí ê lō͘.

15全能ê是是誰，hō͘阮tio̍h服事伊ah？阮祈求伊，有甚麼利益ah？Choân-lêng-ê sī chī-chūi, hō͘ goán tio̍h ho̍k-sāi I ah? Goán kî-kiû I, ū sím-mi̍h lī-ek ah?

16看ah，in ê福氣m̄是tī in ê手；願pháiⁿ人ê計謀離開我遠遠。Khòaⁿ ah, in ê hok-khì m̄-sī tī in ê chhiú; Goān pháiⁿ-lâng ê kè-bô͘ lī-khui góa hn̄g-hn̄g.

17Pháiⁿ人ê燈beh hoa，災厄到tī in；上帝ê受氣hō͘ in tú-tio̍h艱苦，有jōa-chōe pái ah？Pháiⁿ-lâng ê teng beh hoa, chai-ē kàu tī in; Siōng-tè ê siū-khì hō͘ in tú-tio̍h kan-khó͘, ū jōa-chōe pái ah?

18In親像風前ê草á幼，親像狂風吹去ê粗糠有jōa-chōe pái ah？In chhin-chhiūⁿ hong-chêng ê chháu-á-iù, Chhin-chhiūⁿ kông-hong chhe--khì ê chho͘-khng ū jōa-chōe pái ah?

19Lín講，上帝將伊ê罪惡kā伊ê kiáⁿ積聚teh；我講，m̄值tio̍h報應伊本身hō͘伊家己知；Lín kóng, Siōng-tè chiong i ê chōe-ok kā i ê kiáⁿ chek-chū teh; Góa kóng, M̄-ta̍t-tio̍h pò-èng i pún-sin hō͘ i ka-kī chai;

20Hō͘伊親目看見家己敗壞，本身lim全能ê ê受氣。Hō͘ i chhin-ba̍k khòaⁿ-kìⁿ ka-kī pāi-hoāi, Pún-sin lim Choân-lêng-ê ê siū-khì.

21伊ê年月半中長絕斷，過世了，伊tī伊ê家有甚麼快樂ah？I ê nî-ge̍h pòaⁿ-tiong-tn̂g choa̍t-tn̄g, Kè-sì-liáu, i tī i ê ke ū sím-mi̍h khoài-lo̍k ah?

22上帝審判hiah-ê tī高位ê，是誰能將知識教示伊ah？Siōng-tè sím-phòaⁿ hiah-ê tī koâiⁿ-ūi ê, Chī-chūi ōe chiong tì-sek kà-sī I ah?

23有人到死氣力齊備，滿滿得tio̍h平靜安然。Ū lâng kàu-sí khùi-la̍t chiâu-pī, Móa-móa tit-tio̍h pêng-chēng an-jiân.

24伊ê胸ha̍h真肥，伊ê骨髓潤澤。I ê heng-ha̍h chin pûi, I ê kut-chhé lūn-te̍k.

25有人到死，心痛苦，lóng bē-bat試tio̍h福氣。Ū-lâng kàu-sí, sim thòng-khó͘, Lóng bē-bat chhì-tio̍h hok-khì.

26In lóng一樣倒tī土裡，hō͘蟲蓋密。In lóng chi̍t-iūⁿ tó tī thô͘--nih, Hō͘ thâng khàm-ba̍t.

27看ah，我知lín ê意思，kap lín冤枉我ê計謀。Khòaⁿ ah, góa chai lín ê ì-sù, Kap lín oan-óng góa ê kè-bô͘.

28因為lín講，霸王ê厝tī toh落？pháiⁿ人平時khiā起ê厝tī toh落？In-ūi lín kóng, Pà-ông ê chhù tī toh-lo̍h? Pháiⁿ-lâng pêng-sî khiā-khí ê chhù tī toh-lo̍h?

29Lín無問過路 ê人mah？Kiám bōe認得伊n ê證據mah？Lín bô mn̄g kè-lō͘ ê lâng mah? Kiám bōe jīn-tit in ê chèng-kù mah?

30就是pháiⁿ人tī災厄ê日得tio̍h留teh，tī受氣ê日得tio̍h脫離。Chiū-sī pháiⁿ-lâng tī chai-ē ê ji̍t tit-tio̍h lâu-teh, Tī siū-khì ê ji̍t tit-tio̍h thoat-lī.

31伊所行ê，是誰當面講伊？伊所做ê，是誰報應伊？I só͘-kiâⁿ-ê, chī-chūi tng-bīn kóng i? I só͘-chòe-ê, chī-chūi pò-èng i?

32總是伊會hō͘人抬到塚山，koh有顧守ê tī伊ê墓。Chóng-sī i ōe hō͘ lâng kng kàu thióng-soaⁿ, Koh ū kò͘-siú--ê tī i ê bōng.

33山谷ê土丸伊掠做甜；beh有眾人tè tī伊ê後面，親像tī伊事先ê bōe算得。Soaⁿ-kok ê thô͘-oân i lia̍h-chòe tiⁿ; Beh ū chèng-lâng tè tī i ê āu-bīn, Chhin-chhiūⁿ tī i tāi-seng--ê bōe-sǹg-tit.

34Lín所應答ê話窮(khêng)真lóng是假，lín怎樣空空安慰我ah？Lín só͘ ìn-tap ê ōe khêng-chin lóng sī ké, Lín cháiⁿ-iūⁿ khang-khang an-ùi góa ah?