1Ná-má人Só-hoat應講，Ná-má lâng Só-hoat ìn kóng,

2我ê心內著急，所以我ê心思逼我tio̍h應。Góa ê sim-lāi tio̍h-kip, Só͘-í góa ê sim-su pek góa tio̍h ìn.

3我聽見hit-ê凌辱我ê責備，我智慧ê心教我應。Góa thiaⁿ-kìⁿ hit ê lêng-jio̍k Góa ê chek-pī, Góa tì-hūi ê sim kà góa ìn.

4你kiám m̄知tùi古早，tùi有人tī世間以來；Lí kiám m̄-chai tùi kó͘-chá, Tùi ū lâng tī sè-kan í-lâi;

5Pháiⁿ人ê大悅無久長，無敬虔ê人ê歡喜目nih久nā-tiāⁿ？Pháiⁿ-lâng ê tāi-ia̍t bô kú-tn̂g, Bô kèng-khiân ê lâng ê hoaⁿ-hí ba̍k-nih-kú nā-tiāⁿ?

6伊ê高雖然抵天，伊ê頭殼雖然到雲裡；I ê koâiⁿ sui-jiân tú-thiⁿ, I ê thâu-khak sui-jiân kàu hûn--nih;

7伊到尾beh滅無，親像伊ê糞一樣；平素看見伊ê人beh講，伊tī toh落ah？I kàu-bé beh bia̍t-bô, chhin-chhiūⁿ i ê pùn chi̍t-iūⁿ; Pêng-sò͘ khòaⁿ-kìⁿ i ê lâng beh kóng, I tī toh-lo̍h ah?

8伊beh親像眠夢飛去，無thang chhē-tio̍h；伊beh受趕走，親像暝時ê異象。I beh chhin-chhiūⁿ bîn-bāng pe--khì, bô thang chhē-tio̍h; I beh siū kóaⁿ-cháu, chhin-chhiūⁿ mî--sî ê īⁿ-siōng.

9平素看見伊ê，伊ê目睭bōe koh看見伊；伊ê本所在也無koh看見伊。Pêng-sò͘ khòaⁿ-kìⁿ i ê, i ê ba̍k-chiu bōe koh khòaⁿ-kìⁿ i; I ê pún só͘-chāi iā bô koh khòaⁿ-kìⁿ i.

10伊ê kiáⁿ兒beh對sòng-hiong人求恩，伊ê手beh還貨財。I ê kiáⁿ-jî beh tùi sòng-hiong lâng kiû-un, I ê chhiú beh hêng hè-châi.

11伊ê骨滿滿有少年ê力；總是beh kap伊相kap倒tī土裡。I ê kut móa-móa ū siàu-liân ê la̍t; Chóng-sī beh kap i saⁿ-kap tó tī thô͘--nih.

12罪惡tī伊ê嘴雖然甜，雖然伊khǹg tī伊ê舌下；Chōe-ok tī i ê chhùi sui-jiân tiⁿ, Sui-jiân i khǹg tī i ê chi̍h-ē;

13雖然保惜，m̄肯放sak，定定kâm tī伊ê嘴；Sui-jiân pó-sioh, m̄-khéng pàng-sak, Tiāⁿ-tiāⁿ kâm tī i ê chhùi;

14伊ê食物到伊ê腸á就變，成做毒蛇ê膽tī伊ê內面。I ê chia̍h-mi̍h kàu i ê tn̂g-á chiū piàn, Chiâⁿ-chòe to̍k-chôa ê táⁿ tī i ê lāi-bīn.

15伊吞食財寶，beh koh吐出；上帝beh對伊ê腹肚jîm出來。I thun-chia̍h châi-pó, beh koh thò͘-chhut; Siōng-tè beh tùi i ê pak-tó͘ jîm--chhut-lâi.

16伊beh suh毒蛇ê毒；蛇ê舌也beh害死伊。I beh suh to̍k-chôa ê to̍k; Chôa ê chi̍h iā beh hāi-sí i.

17伊bōe得tio̍h看見江河，流蜜kap奶ê溪。I bōe tit-tio̍h khòaⁿ-kìⁿ kang-hô, Lâu bi̍t kap lin ê khoe.

18伊tio̍h磨所得tio̍h-ê，tio̍h 還人，無thang食落去，bōe會照所交易ê財物來歡喜。I tio̍h-bôa só͘ tit-tio̍h--ê, tio̍h hêng lâng, bô thang chia̍h--lo̍h-khì, Bōe-ōe chiàu só͘ kau-e̍k ê châi-bu̍t lâi hoaⁿ-hí.

19因為伊壓制sòng-hiong人，koh棄sak伊；強佔人ê厝，也bōe會起造。In-ūi i ap-chè sòng-hiong lâng, koh khì-sak i; Kiông-chiàm lâng ê chhù, iā bōe-ōe khí-chō.

20因為伊ê心內bē-bat安靜，伊所歡喜-ê lóng bōe保全。In-ūi i ê sim-lāi bē-bat an-chēng, I só͘ hoaⁿ-hí-ê lóng bōe pó-choân.

21無一件無hō͘伊吞落去，所以伊ê 福祿bōe久長。Bô chi̍t-kiāⁿ bô hō͘ i thun--lo̍h-khì, Só͘-í i ê hok-lo̍k bōe kú-tn̂g.

22當伊好額充足ê時，beh到狹toe̍h ê所在；艱苦ê人lóng beh出手phah伊。Tng i hó-gia̍h chhiong-chiok ê sî, beh kàu oe̍h-toe̍h ê só͘-chāi; Kan-khó͘ ê lâng lóng beh chhut-chhiú phah i.

23伊ê腹肚beh飽ê時，上帝beh降猛烈ê受氣tī伊；伊teh食ê時，beh降受氣tī伊ê頂面。I ê pak-tó͘ beh pá ê sî, Siōng-tè beh kàng béng-lia̍t ê siū-khì tī i; I teh chia̍h ê sî, beh kàng siū-khì tī i ê téng-bīn.

24伊閃離鐵ê器具，銅ê弓beh射透伊。I siám-lī thih ê khì-kū, Tâng ê keng beh siā-thàu i.

25伊一下拔伊，就對伊ê身軀出來，光nà-nà ê箭尾beh對伊ê膽出；驚惶beh到tī伊。I chi̍t-ē pu̍ih i, chiū tùi i ê seng-khu chhut-lâi, Kng-nà-nà ê chìⁿ-bé beh tùi i ê táⁿ chhut; Kiaⁿ-hiâⁿ beh kàu tī i.

26一切ê烏暗收khǹg為tio̍h伊ê財寶，人所無pûn ê火beh燒滅伊；koh beh燒毀留tī伊ê布棚ê。It-chhè ê o͘-àm siu-khǹg ūi-tio̍h i ê châi-pó, Lâng só͘ bô pûn ê hé beh sio-bia̍t i; Koh beh sio-húi lâu tī i ê pò͘-pîⁿ ê.

27天beh顯明伊ê罪惡，地beh起來攻擊伊。Thiⁿ beh hián-bêng i ê chōe-ok, Tōe beh khí-lâi kong-kek i.

28伊ê家伙beh無去，lóng beh消滅tī上帝受氣ê日。I ê ke-hé beh bô--khì, Lóng beh siau-bia̍t tī Siōng-tè siū-khì ê ji̍t.

29這就是pháiⁿ人tùi上帝所得ê份額；是上帝kā伊定tio̍h ê產業。Che chiū-sī pháiⁿ-lâng tùi Siōng-tè só͘ tit ê hūn-gia̍h; Sī Siōng-tè kā i tiāⁿ-tio̍h ê sán-gia̍p.

1約伯應講，Iok-pek ìn kóng,

2Lín tio̍h致意聽我ê話，用chit-ê做lín ê安慰。Lín tio̍h tì-ì thiaⁿ góa ê ōe, Ēng chit-ê chòe lín ê an-ùi.

3請寬容我，我beh koh講，我講了，kù-chāi你譏刺。Chhiáⁿ khoan-iông góa, góa beh koh kóng, Góa kóng-liáu, kù-chāi lí ki-chhì.

4論到我，我kiám是對人哀怨？我ê心神怎樣無著急ah？Lūn-kàu góa, góa kiám-sī tùi lâng ai-oàn? Góa ê sim-sîn cháiⁿ-iūⁿ bô tio̍h-kip ah?

5Lín tio̍h看我來gông-ngia̍h，用手掩嘴。Lín tio̍h khòaⁿ góa lâi gông-ngia̍h, Ēng chhiú ng-chhùi.

6我若想tio̍h，就驚，thong身軀ngia̍uh-ngia̍uh-chhoah。Góa nā siūⁿ-tio̍h, chiū kiaⁿ, Thong seng-khu ngia̍uh-ngia̍uh-chhoah.

7Pháiⁿ人啥事活teh，食長歲壽，勢力強盛ah？Pháiⁿ-lâng siáⁿ-sū oa̍h-teh, chia̍h tn̂g hè-siū, Sè-le̍k kiông-sēng ah?

8In看見kiáⁿ孫，kap in平平成立；in ê後裔tī in ê目睭前也是án-ni。In khòaⁿ-kìⁿ kiáⁿ-sun, kap in pîⁿ-pîⁿ sêng-li̍p; In ê hō͘-è tī in ê ba̍k-chiu-chêng iā sī án-ni.

9In ê家眷安然無驚；上帝ê柺也無phah in。In ê ke-koàn an-jiân bô kiaⁿ; Siōng-tè ê koáiⁿ iā bô phah in.

10In ê牛káng生湠無斷，in ê牛母生kiáⁿ，也無墮胎。In ê gû-káng siⁿ-thòaⁿ bô tn̄g, In ê gû-bú siⁿ-kiáⁿ, iā bô tūi-thai.

11In差gín-ná出去，親像羊群，in ê kiáⁿ兒四界tiô跳。In chhe gín-ná chhut-khì, chhin-chhiūⁿ iûⁿ-kûn, In ê kiáⁿ-jî sì-kòe tiô-thiàu.

12In tè lin-long鼓kap琴來唱歌，koh因為品簫ê聲來歡喜。In tè lin-long-kó͘ kap khîm lâi chhiùⁿ-koa, Koh in-ūi phín-siau ê siaⁿ lâi hoaⁿ-hí.

13In度過日，事事興通；目nih久落陰間。In tō͘ kè ji̍t, sū-sū heng-thong; ba̍k-nih-kú lo̍h im-kan.

14In對上帝講，tio̍h離開阮，阮m̄ ài bat你ê路。In tùi Siōng-tè kóng, Tio̍h lī-khui goán, Goán m̄ ài bat Lí ê lō͘.

15全能ê是是誰，hō͘阮tio̍h服事伊ah？阮祈求伊，有甚麼利益ah？Choân-lêng-ê sī chī-chūi, hō͘ goán tio̍h ho̍k-sāi I ah? Goán kî-kiû I, ū sím-mi̍h lī-ek ah?

16看ah，in ê福氣m̄是tī in ê手；願pháiⁿ人ê計謀離開我遠遠。Khòaⁿ ah, in ê hok-khì m̄-sī tī in ê chhiú; Goān pháiⁿ-lâng ê kè-bô͘ lī-khui góa hn̄g-hn̄g.

17Pháiⁿ人ê燈beh hoa，災厄到tī in；上帝ê受氣hō͘ in tú-tio̍h艱苦，有jōa-chōe pái ah？Pháiⁿ-lâng ê teng beh hoa, chai-ē kàu tī in; Siōng-tè ê siū-khì hō͘ in tú-tio̍h kan-khó͘, ū jōa-chōe pái ah?

18In親像風前ê草á幼，親像狂風吹去ê粗糠有jōa-chōe pái ah？In chhin-chhiūⁿ hong-chêng ê chháu-á-iù, Chhin-chhiūⁿ kông-hong chhe--khì ê chho͘-khng ū jōa-chōe pái ah?

19Lín講，上帝將伊ê罪惡kā伊ê kiáⁿ積聚teh；我講，m̄值tio̍h報應伊本身hō͘伊家己知；Lín kóng, Siōng-tè chiong i ê chōe-ok kā i ê kiáⁿ chek-chū teh; Góa kóng, M̄-ta̍t-tio̍h pò-èng i pún-sin hō͘ i ka-kī chai;

20Hō͘伊親目看見家己敗壞，本身lim全能ê ê受氣。Hō͘ i chhin-ba̍k khòaⁿ-kìⁿ ka-kī pāi-hoāi, Pún-sin lim Choân-lêng-ê ê siū-khì.

21伊ê年月半中長絕斷，過世了，伊tī伊ê家有甚麼快樂ah？I ê nî-ge̍h pòaⁿ-tiong-tn̂g choa̍t-tn̄g, Kè-sì-liáu, i tī i ê ke ū sím-mi̍h khoài-lo̍k ah?

22上帝審判hiah-ê tī高位ê，是誰能將知識教示伊ah？Siōng-tè sím-phòaⁿ hiah-ê tī koâiⁿ-ūi ê, Chī-chūi ōe chiong tì-sek kà-sī I ah?

23有人到死氣力齊備，滿滿得tio̍h平靜安然。Ū lâng kàu-sí khùi-la̍t chiâu-pī, Móa-móa tit-tio̍h pêng-chēng an-jiân.

24伊ê胸ha̍h真肥，伊ê骨髓潤澤。I ê heng-ha̍h chin pûi, I ê kut-chhé lūn-te̍k.

25有人到死，心痛苦，lóng bē-bat試tio̍h福氣。Ū-lâng kàu-sí, sim thòng-khó͘, Lóng bē-bat chhì-tio̍h hok-khì.

26In lóng一樣倒tī土裡，hō͘蟲蓋密。In lóng chi̍t-iūⁿ tó tī thô͘--nih, Hō͘ thâng khàm-ba̍t.

27看ah，我知lín ê意思，kap lín冤枉我ê計謀。Khòaⁿ ah, góa chai lín ê ì-sù, Kap lín oan-óng góa ê kè-bô͘.

28因為lín講，霸王ê厝tī toh落？pháiⁿ人平時khiā起ê厝tī toh落？In-ūi lín kóng, Pà-ông ê chhù tī toh-lo̍h? Pháiⁿ-lâng pêng-sî khiā-khí ê chhù tī toh-lo̍h?

29Lín無問過路 ê人mah？Kiám bōe認得伊n ê證據mah？Lín bô mn̄g kè-lō͘ ê lâng mah? Kiám bōe jīn-tit in ê chèng-kù mah?

30就是pháiⁿ人tī災厄ê日得tio̍h留teh，tī受氣ê日得tio̍h脫離。Chiū-sī pháiⁿ-lâng tī chai-ē ê ji̍t tit-tio̍h lâu-teh, Tī siū-khì ê ji̍t tit-tio̍h thoat-lī.

31伊所行ê，是誰當面講伊？伊所做ê，是誰報應伊？I só͘-kiâⁿ-ê, chī-chūi tng-bīn kóng i? I só͘-chòe-ê, chī-chūi pò-èng i?

32總是伊會hō͘人抬到塚山，koh有顧守ê tī伊ê墓。Chóng-sī i ōe hō͘ lâng kng kàu thióng-soaⁿ, Koh ū kò͘-siú--ê tī i ê bōng.

33山谷ê土丸伊掠做甜；beh有眾人tè tī伊ê後面，親像tī伊事先ê bōe算得。Soaⁿ-kok ê thô͘-oân i lia̍h-chòe tiⁿ; Beh ū chèng-lâng tè tī i ê āu-bīn, Chhin-chhiūⁿ tī i tāi-seng--ê bōe-sǹg-tit.

34Lín所應答ê話窮(khêng)真lóng是假，lín怎樣空空安慰我ah？Lín só͘ ìn-tap ê ōe khêng-chin lóng sī ké, Lín cháiⁿ-iūⁿ khang-khang an-ùi góa ah?

1Thê-bān人Í-lī-hoat應講，Thê-bān lâng Í-lī-hoat ìn kóng,

2人kiám能利益上帝mah？智慧ê人實在是利益家己。Lâng kiám-ōe lī-ek Siōng-tè mah? Tì-hūi ê lâng si̍t-chāi sī lī-ek ka-kī.

3你做人公義，kiám hō͘全能ê歡喜mah？你所行完全，kiám會hō͘伊得利mah？Lí chòe lâng kong-gī, kiám hō͘ Choân-lêng--ê hoaⁿ-hí mah? Lí só͘ kiâⁿ oân-choân, kiám ōe hō͘ I tek-lī mah?

4Kiám是因為你敬畏伊，來責備你，審判你mah？Kiám-sī in-ūi lí kèng-ùi I, Lâi chek-pī lí, sím-phòaⁿ lí mah?

5你ê罪惡kiám m̄是大mah？你ê罪過實在無窮盡。Lí ê chōe-ok kiám-m̄-sī tōa mah? Lí ê chōe-kòa si̍t-chāi bô kiông-chīn.

6你無因端the̍h兄弟ê tǹg-頭；koh thǹg無thang穿ê人ê衫。Lí bô in-toaⁿ the̍h hiaⁿ-tī ê tǹg-thâu; Koh thǹg bô thang chhēng ê lâng ê saⁿ.

7厭倦ê人，你無用水hō͘ in lim，iau餓ê人，你對in收khǹg食物。Ià-siān ê lâng, lí bô ēng chúi hō͘ in lim, Iau-gō ê lâng, lí tùi in siu-khǹg chia̍h-mi̍h.

8有能力ê人得tio̍h土地；體面ê人tiàm tī hit中間。Ū lêng-le̍k ê lâng tit-tio̍h thó͘-tōe; Thé-biān ê lâng tiàm tī hit tiong-kan.

9你hō͘寡婦空手tò去，無父ê kiáⁿ ê手骨受at折。Lí hō͘ kóaⁿ-hū khang-chhiú tò-khì, Bô-pē ê kiáⁿ ê chhiú-kut siū at-chi̍h.

10所以活tauh四面圍你；驚惶忽然到，攪擾你，Só͘-í oa̍h-tauh sì-bīn ûi lí; Kiaⁿ-hiâⁿ hut-jiân kàu, kiáu-jiáu lí,

11á是烏暗hō͘你無thang看見，chōe-chōe水淹密你。Á-sī o͘-àm hō͘ lí bô thang khòaⁿ-kìⁿ, Chōe-chōe chúi im-ba̍t lí.

12上帝kiám m̄是tī天ê高mah？Tio̍h看星辰ê極頭，怎樣hiah高；Siōng-tè kiám-m̄-sī tī thiⁿ ê koâiⁿ mah? Tio̍h khòaⁿ chhiⁿ-sîn ê ke̍k-thâu, cháiⁿ-iūⁿ hiah-koâiⁿ;

13你就講，上帝知甚麼？伊kiám會看透烏暗來審判mah？Lí chiū kóng, Siōng-tè chai sím-mi̍h? I kiám ōe khòaⁿ-thàu o͘-àm lâi sím-phòaⁿ mah?

14密雲遮蓋伊，hō͘伊bōe看見；伊行tī穹蒼ê頂面。Ba̍t-hûn jia-khàm I, hō͘ I bōe khòaⁿ-kìⁿ; I kiâⁿ tī kiong-chhong ê téng-bīn.

15你kiám ài thàn古早ê路，就是pháiⁿ人所行ê mah？Lí kiám ài thàn kó͘-chá ê lō͘, Chiū-sī pháiⁿ-lâng só͘ kiâⁿ-ê mah?

16In是未到時受滅去，in ê地基hō͘大水流去。In sī bē kàu-sî siū bia̍t--khì, In ê tōe-ki hō͘ tōa-chúi lâu-khì.

17In對上帝講，tio̍h離開阮，koh講，全能ê能kā阮做甚麼ah？In tùi Siōng-tè kóng, Tio̍h lī-khui goán, Koh kóng, Choân-lêng--ê ōe kā goán chòe sím-mi̍h ah?

18總是伊用好物充滿伊ê厝；願pháiⁿ人ê計謀離開我遠遠。Chóng-sī I ēng hó-mi̍h chhiong-móa i ê chhù; Goān pháiⁿ-lâng ê kè-bô͘ lī-khui góa hn̄g-hn̄g.

19義人beh看見來歡喜；無罪ê人beh恥笑in；Gī-lâng beh khòaⁿ-kìⁿ lâi hoaⁿ-hí; Bô-chōe ê lâng beh thí-chhiò in;

20講，hiah-ê起來攻擊阮ê，果然受剪除；in所chhun-ê lóng hō͘火燒去。Kóng, Hiah-ê khí-lâi kong-kek goán ê, kó-jiân siū chián-tû; In só͘ chhun-ê lóng hō͘ hé sio-khì.

21Taⁿ你tio̍h kap上帝親密，就會得tio̍h平安；án-ni福氣beh臨到你。Taⁿ lí tio̍h kap Siōng-tè chhin-bi̍t, chiū ōe tit-tio̍h pêng-an; Án-ni hok-khì beh lîm-kàu lí.

22Taⁿ tio̍h承受伊嘴內ê教示；將伊ê話khǹg tī你ê心。Taⁿ tio̍h sêng-siū I chhùi-lāi ê kà-sī; Chiong I ê ōe khǹg tī lí ê sim.

23你若歸向全能ê，對你ê布棚內除去不義，你就得tio̍h興起。Lí nā kui-ǹg Choân-lêng--ê, tùi lí ê pò͘-pîⁿ-lāi tû-khì put-gī, Lí chiū tit-tio̍h heng-khí.

24你tio̍h hiat寶貝tī塵埃裡，hiat O-hui ê金tī溪河石頭ê中間；Lí tio̍h hiat pó-pòe tī tîn-ai--nih, Hiat O-hui ê kim tī khoe-hô chio̍h-thâu ê tiong-kan;

25全能ê就beh做你ê寶貝，做你ê紋銀。Choân-lêng--ê chiū beh chòe lí ê pó-pòe, chòe lí ê bûn-gûn.

26你就beh掠全能ê做歡喜，面kia̍h高ǹg上帝。Lí chiū beh lia̍h choân-lêng--ê chòe hoaⁿ-hí, Bīn kia̍h-koâiⁿ ǹg Siōng-tè.

27你祈禱伊，伊就聽你，你也beh謝你ê願。Lí kî-tó I, I chiū thiaⁿ lí, Lí iā beh siā lí ê goān.

28你定tio̍h beh做甚麼，hit-ê tāi-chì的確成；光也beh照你ê路。Lí tiāⁿ-tio̍h beh chòe sím-mi̍h, hit ê tāi-chì tek-khak chiâⁿ; Kng iā beh chiò lí ê lō͘.

29In降低ê時，你猶原thang講，升高；謙卑ê人上帝beh拯救伊。In kàng-kē ê sî, lí iû-goân thang kóng, Seng-koâiⁿ; Khiam-pi ê lâng Siōng-tè beh chín-kiù i.

30連有罪ê人上帝也beh救伊；因為你ê手清氣，伊beh得tio̍h救。Liân ū-chōe ê lâng Siōng-tè iā beh kiù i; In-ūi lí ê chhiú chheng-khì, i beh tit-tio̍h kiù.