1約伯應講，Iok-pek ìn kóng,

2Lín tio̍h致意聽我ê話，用chit-ê做lín ê安慰。Lín tio̍h tì-ì thiaⁿ góa ê ōe, Ēng chit-ê chòe lín ê an-ùi.

3請寬容我，我beh koh講，我講了，kù-chāi你譏刺。Chhiáⁿ khoan-iông góa, góa beh koh kóng, Góa kóng-liáu, kù-chāi lí ki-chhì.

4論到我，我kiám是對人哀怨？我ê心神怎樣無著急ah？Lūn-kàu góa, góa kiám-sī tùi lâng ai-oàn? Góa ê sim-sîn cháiⁿ-iūⁿ bô tio̍h-kip ah?

5Lín tio̍h看我來gông-ngia̍h，用手掩嘴。Lín tio̍h khòaⁿ góa lâi gông-ngia̍h, Ēng chhiú ng-chhùi.

6我若想tio̍h，就驚，thong身軀ngia̍uh-ngia̍uh-chhoah。Góa nā siūⁿ-tio̍h, chiū kiaⁿ, Thong seng-khu ngia̍uh-ngia̍uh-chhoah.

7Pháiⁿ人啥事活teh，食長歲壽，勢力強盛ah？Pháiⁿ-lâng siáⁿ-sū oa̍h-teh, chia̍h tn̂g hè-siū, Sè-le̍k kiông-sēng ah?

8In看見kiáⁿ孫，kap in平平成立；in ê後裔tī in ê目睭前也是án-ni。In khòaⁿ-kìⁿ kiáⁿ-sun, kap in pîⁿ-pîⁿ sêng-li̍p; In ê hō͘-è tī in ê ba̍k-chiu-chêng iā sī án-ni.

9In ê家眷安然無驚；上帝ê柺也無phah in。In ê ke-koàn an-jiân bô kiaⁿ; Siōng-tè ê koáiⁿ iā bô phah in.

10In ê牛káng生湠無斷，in ê牛母生kiáⁿ，也無墮胎。In ê gû-káng siⁿ-thòaⁿ bô tn̄g, In ê gû-bú siⁿ-kiáⁿ, iā bô tūi-thai.

11In差gín-ná出去，親像羊群，in ê kiáⁿ兒四界tiô跳。In chhe gín-ná chhut-khì, chhin-chhiūⁿ iûⁿ-kûn, In ê kiáⁿ-jî sì-kòe tiô-thiàu.

12In tè lin-long鼓kap琴來唱歌，koh因為品簫ê聲來歡喜。In tè lin-long-kó͘ kap khîm lâi chhiùⁿ-koa, Koh in-ūi phín-siau ê siaⁿ lâi hoaⁿ-hí.

13In度過日，事事興通；目nih久落陰間。In tō͘ kè ji̍t, sū-sū heng-thong; ba̍k-nih-kú lo̍h im-kan.

14In對上帝講，tio̍h離開阮，阮m̄ ài bat你ê路。In tùi Siōng-tè kóng, Tio̍h lī-khui goán, Goán m̄ ài bat Lí ê lō͘.

15全能ê是是誰，hō͘阮tio̍h服事伊ah？阮祈求伊，有甚麼利益ah？Choân-lêng-ê sī chī-chūi, hō͘ goán tio̍h ho̍k-sāi I ah? Goán kî-kiû I, ū sím-mi̍h lī-ek ah?

16看ah，in ê福氣m̄是tī in ê手；願pháiⁿ人ê計謀離開我遠遠。Khòaⁿ ah, in ê hok-khì m̄-sī tī in ê chhiú; Goān pháiⁿ-lâng ê kè-bô͘ lī-khui góa hn̄g-hn̄g.

17Pháiⁿ人ê燈beh hoa，災厄到tī in；上帝ê受氣hō͘ in tú-tio̍h艱苦，有jōa-chōe pái ah？Pháiⁿ-lâng ê teng beh hoa, chai-ē kàu tī in; Siōng-tè ê siū-khì hō͘ in tú-tio̍h kan-khó͘, ū jōa-chōe pái ah?

18In親像風前ê草á幼，親像狂風吹去ê粗糠有jōa-chōe pái ah？In chhin-chhiūⁿ hong-chêng ê chháu-á-iù, Chhin-chhiūⁿ kông-hong chhe--khì ê chho͘-khng ū jōa-chōe pái ah?

19Lín講，上帝將伊ê罪惡kā伊ê kiáⁿ積聚teh；我講，m̄值tio̍h報應伊本身hō͘伊家己知；Lín kóng, Siōng-tè chiong i ê chōe-ok kā i ê kiáⁿ chek-chū teh; Góa kóng, M̄-ta̍t-tio̍h pò-èng i pún-sin hō͘ i ka-kī chai;

20Hō͘伊親目看見家己敗壞，本身lim全能ê ê受氣。Hō͘ i chhin-ba̍k khòaⁿ-kìⁿ ka-kī pāi-hoāi, Pún-sin lim Choân-lêng-ê ê siū-khì.

21伊ê年月半中長絕斷，過世了，伊tī伊ê家有甚麼快樂ah？I ê nî-ge̍h pòaⁿ-tiong-tn̂g choa̍t-tn̄g, Kè-sì-liáu, i tī i ê ke ū sím-mi̍h khoài-lo̍k ah?

22上帝審判hiah-ê tī高位ê，是誰能將知識教示伊ah？Siōng-tè sím-phòaⁿ hiah-ê tī koâiⁿ-ūi ê, Chī-chūi ōe chiong tì-sek kà-sī I ah?

23有人到死氣力齊備，滿滿得tio̍h平靜安然。Ū lâng kàu-sí khùi-la̍t chiâu-pī, Móa-móa tit-tio̍h pêng-chēng an-jiân.

24伊ê胸ha̍h真肥，伊ê骨髓潤澤。I ê heng-ha̍h chin pûi, I ê kut-chhé lūn-te̍k.

25有人到死，心痛苦，lóng bē-bat試tio̍h福氣。Ū-lâng kàu-sí, sim thòng-khó͘, Lóng bē-bat chhì-tio̍h hok-khì.

26In lóng一樣倒tī土裡，hō͘蟲蓋密。In lóng chi̍t-iūⁿ tó tī thô͘--nih, Hō͘ thâng khàm-ba̍t.

27看ah，我知lín ê意思，kap lín冤枉我ê計謀。Khòaⁿ ah, góa chai lín ê ì-sù, Kap lín oan-óng góa ê kè-bô͘.

28因為lín講，霸王ê厝tī toh落？pháiⁿ人平時khiā起ê厝tī toh落？In-ūi lín kóng, Pà-ông ê chhù tī toh-lo̍h? Pháiⁿ-lâng pêng-sî khiā-khí ê chhù tī toh-lo̍h?

29Lín無問過路 ê人mah？Kiám bōe認得伊n ê證據mah？Lín bô mn̄g kè-lō͘ ê lâng mah? Kiám bōe jīn-tit in ê chèng-kù mah?

30就是pháiⁿ人tī災厄ê日得tio̍h留teh，tī受氣ê日得tio̍h脫離。Chiū-sī pháiⁿ-lâng tī chai-ē ê ji̍t tit-tio̍h lâu-teh, Tī siū-khì ê ji̍t tit-tio̍h thoat-lī.

31伊所行ê，是誰當面講伊？伊所做ê，是誰報應伊？I só͘-kiâⁿ-ê, chī-chūi tng-bīn kóng i? I só͘-chòe-ê, chī-chūi pò-èng i?

32總是伊會hō͘人抬到塚山，koh有顧守ê tī伊ê墓。Chóng-sī i ōe hō͘ lâng kng kàu thióng-soaⁿ, Koh ū kò͘-siú--ê tī i ê bōng.

33山谷ê土丸伊掠做甜；beh有眾人tè tī伊ê後面，親像tī伊事先ê bōe算得。Soaⁿ-kok ê thô͘-oân i lia̍h-chòe tiⁿ; Beh ū chèng-lâng tè tī i ê āu-bīn, Chhin-chhiūⁿ tī i tāi-seng--ê bōe-sǹg-tit.

34Lín所應答ê話窮(khêng)真lóng是假，lín怎樣空空安慰我ah？Lín só͘ ìn-tap ê ōe khêng-chin lóng sī ké, Lín cháiⁿ-iūⁿ khang-khang an-ùi góa ah?

1Thê-bān人Í-lī-hoat應講，Thê-bān lâng Í-lī-hoat ìn kóng,

2人kiám能利益上帝mah？智慧ê人實在是利益家己。Lâng kiám-ōe lī-ek Siōng-tè mah? Tì-hūi ê lâng si̍t-chāi sī lī-ek ka-kī.

3你做人公義，kiám hō͘全能ê歡喜mah？你所行完全，kiám會hō͘伊得利mah？Lí chòe lâng kong-gī, kiám hō͘ Choân-lêng--ê hoaⁿ-hí mah? Lí só͘ kiâⁿ oân-choân, kiám ōe hō͘ I tek-lī mah?

4Kiám是因為你敬畏伊，來責備你，審判你mah？Kiám-sī in-ūi lí kèng-ùi I, Lâi chek-pī lí, sím-phòaⁿ lí mah?

5你ê罪惡kiám m̄是大mah？你ê罪過實在無窮盡。Lí ê chōe-ok kiám-m̄-sī tōa mah? Lí ê chōe-kòa si̍t-chāi bô kiông-chīn.

6你無因端the̍h兄弟ê tǹg-頭；koh thǹg無thang穿ê人ê衫。Lí bô in-toaⁿ the̍h hiaⁿ-tī ê tǹg-thâu; Koh thǹg bô thang chhēng ê lâng ê saⁿ.

7厭倦ê人，你無用水hō͘ in lim，iau餓ê人，你對in收khǹg食物。Ià-siān ê lâng, lí bô ēng chúi hō͘ in lim, Iau-gō ê lâng, lí tùi in siu-khǹg chia̍h-mi̍h.

8有能力ê人得tio̍h土地；體面ê人tiàm tī hit中間。Ū lêng-le̍k ê lâng tit-tio̍h thó͘-tōe; Thé-biān ê lâng tiàm tī hit tiong-kan.

9你hō͘寡婦空手tò去，無父ê kiáⁿ ê手骨受at折。Lí hō͘ kóaⁿ-hū khang-chhiú tò-khì, Bô-pē ê kiáⁿ ê chhiú-kut siū at-chi̍h.

10所以活tauh四面圍你；驚惶忽然到，攪擾你，Só͘-í oa̍h-tauh sì-bīn ûi lí; Kiaⁿ-hiâⁿ hut-jiân kàu, kiáu-jiáu lí,

11á是烏暗hō͘你無thang看見，chōe-chōe水淹密你。Á-sī o͘-àm hō͘ lí bô thang khòaⁿ-kìⁿ, Chōe-chōe chúi im-ba̍t lí.

12上帝kiám m̄是tī天ê高mah？Tio̍h看星辰ê極頭，怎樣hiah高；Siōng-tè kiám-m̄-sī tī thiⁿ ê koâiⁿ mah? Tio̍h khòaⁿ chhiⁿ-sîn ê ke̍k-thâu, cháiⁿ-iūⁿ hiah-koâiⁿ;

13你就講，上帝知甚麼？伊kiám會看透烏暗來審判mah？Lí chiū kóng, Siōng-tè chai sím-mi̍h? I kiám ōe khòaⁿ-thàu o͘-àm lâi sím-phòaⁿ mah?

14密雲遮蓋伊，hō͘伊bōe看見；伊行tī穹蒼ê頂面。Ba̍t-hûn jia-khàm I, hō͘ I bōe khòaⁿ-kìⁿ; I kiâⁿ tī kiong-chhong ê téng-bīn.

15你kiám ài thàn古早ê路，就是pháiⁿ人所行ê mah？Lí kiám ài thàn kó͘-chá ê lō͘, Chiū-sī pháiⁿ-lâng só͘ kiâⁿ-ê mah?

16In是未到時受滅去，in ê地基hō͘大水流去。In sī bē kàu-sî siū bia̍t--khì, In ê tōe-ki hō͘ tōa-chúi lâu-khì.

17In對上帝講，tio̍h離開阮，koh講，全能ê能kā阮做甚麼ah？In tùi Siōng-tè kóng, Tio̍h lī-khui goán, Koh kóng, Choân-lêng--ê ōe kā goán chòe sím-mi̍h ah?

18總是伊用好物充滿伊ê厝；願pháiⁿ人ê計謀離開我遠遠。Chóng-sī I ēng hó-mi̍h chhiong-móa i ê chhù; Goān pháiⁿ-lâng ê kè-bô͘ lī-khui góa hn̄g-hn̄g.

19義人beh看見來歡喜；無罪ê人beh恥笑in；Gī-lâng beh khòaⁿ-kìⁿ lâi hoaⁿ-hí; Bô-chōe ê lâng beh thí-chhiò in;

20講，hiah-ê起來攻擊阮ê，果然受剪除；in所chhun-ê lóng hō͘火燒去。Kóng, Hiah-ê khí-lâi kong-kek goán ê, kó-jiân siū chián-tû; In só͘ chhun-ê lóng hō͘ hé sio-khì.

21Taⁿ你tio̍h kap上帝親密，就會得tio̍h平安；án-ni福氣beh臨到你。Taⁿ lí tio̍h kap Siōng-tè chhin-bi̍t, chiū ōe tit-tio̍h pêng-an; Án-ni hok-khì beh lîm-kàu lí.

22Taⁿ tio̍h承受伊嘴內ê教示；將伊ê話khǹg tī你ê心。Taⁿ tio̍h sêng-siū I chhùi-lāi ê kà-sī; Chiong I ê ōe khǹg tī lí ê sim.

23你若歸向全能ê，對你ê布棚內除去不義，你就得tio̍h興起。Lí nā kui-ǹg Choân-lêng--ê, tùi lí ê pò͘-pîⁿ-lāi tû-khì put-gī, Lí chiū tit-tio̍h heng-khí.

24你tio̍h hiat寶貝tī塵埃裡，hiat O-hui ê金tī溪河石頭ê中間；Lí tio̍h hiat pó-pòe tī tîn-ai--nih, Hiat O-hui ê kim tī khoe-hô chio̍h-thâu ê tiong-kan;

25全能ê就beh做你ê寶貝，做你ê紋銀。Choân-lêng--ê chiū beh chòe lí ê pó-pòe, chòe lí ê bûn-gûn.

26你就beh掠全能ê做歡喜，面kia̍h高ǹg上帝。Lí chiū beh lia̍h choân-lêng--ê chòe hoaⁿ-hí, Bīn kia̍h-koâiⁿ ǹg Siōng-tè.

27你祈禱伊，伊就聽你，你也beh謝你ê願。Lí kî-tó I, I chiū thiaⁿ lí, Lí iā beh siā lí ê goān.

28你定tio̍h beh做甚麼，hit-ê tāi-chì的確成；光也beh照你ê路。Lí tiāⁿ-tio̍h beh chòe sím-mi̍h, hit ê tāi-chì tek-khak chiâⁿ; Kng iā beh chiò lí ê lō͘.

29In降低ê時，你猶原thang講，升高；謙卑ê人上帝beh拯救伊。In kàng-kē ê sî, lí iû-goân thang kóng, Seng-koâiⁿ; Khiam-pi ê lâng Siōng-tè beh chín-kiù i.

30連有罪ê人上帝也beh救伊；因為你ê手清氣，伊beh得tio̍h救。Liân ū-chōe ê lâng Siōng-tè iā beh kiù i; In-ūi lí ê chhiú chheng-khì, i beh tit-tio̍h kiù.

1約伯應講，Iok-pek ìn kóng,

2Taⁿ我ê哀怨算做悖逆；我所受ê責罰khah重tī我ê吐氣。Taⁿ góa ê ai-oàn sǹg-chòe pōe-ge̍k; Góa só͘ siū ê chek-hoa̍t khah-tāng tī góa ê thó͘-khùi.

3願我會知tùi怎樣chhē上帝，hō͘我thang到伊ê座位！Goān góa ōe chai tùi cháiⁿ-iūⁿ chhē Siōng-tè, Hō͘ góa thang kàu I ê chō-ūi!

4我beh排列案件tī伊ê面前，我ê嘴夠額thang辯明。Góa beh pâi-lia̍t àn-kiāⁿ tī I ê bīn-chêng, Góa ê chhùi kàu-gia̍h thang piān-bêng.

5我也得tio̍h知伊應我ê話，也明白伊對我所講ê。Góa iā tit-tio̍h chai I ìn góa ê ōe, Iā bêng-pe̍k I tùi góa só͘-kóng-ê.

6伊kiám beh用大權能kap我計較mah？的確無án-ni；伊beh àⁿ落聽我。I kiám beh ēng tōa koân-lêng kap góa kè-kàu mah? Tek-khak bô án-ni; I beh àⁿ-lo̍h thiaⁿ góa.

7Tī-hia正直ê會kap伊辯論，án-ni，我beh永遠脫離審判我ê。Tī-hia chèng-ti̍t--ê ōe kap I piān-lūn, Án-ni, góa beh éng-oán thoat-lī sím-phòaⁿ góa ê.

8看ah，我進前去，伊無tī-hia；我退後去，也無看見伊；Khòaⁿ ah, góa chìn-chêng khì, I bô tī-hia; Góa thè-āu khì, iā bô khòaⁿ-kìⁿ I;

9Tī tò-pêng伊teh行tāi-chì，我無看見伊；tī chiàⁿ-pêng伊tiàm密，我也無看見伊。Tī tò-pêng I teh kiâⁿ tāi-chì, góa bô khòaⁿ-kìⁿ I; Tī chiàⁿ-pêng I tiàm-ba̍t, góa iā bô khòaⁿ-kìⁿ I.

10總是伊知我所行ê路；伊試煉我了後，我beh親像過鍛鍊ê金。Chóng-sī I chai góa só͘ kiâⁿ ê lō͘; I chhì-liān góa liáu-āu, góa beh chhin-chhiūⁿ kè thoàn-liān ê kim.

11我ê腳tè伊ê腳步；我執守伊ê路，也無偏chhoa̍h。Góa ê kha tè I ê kha-pō͘; Góa chip-siú I ê lō͘, iā bô phian-chhoa̍h.

12伊嘴唇ê命令，我未bat違背；我對重伊嘴內ê話，贏過我所tio̍h用ê米糧。I chhùi-tûn ê bēng-lēng góa bē bat ûi-pōe; Góa tùi-tiōng I chhùi-lāi ê ōe, iâⁿ-kè góa só͘ tio̍h ēng ê bí-niû.

13伊有一定ê心志，是誰能kā伊oa̍t-tńg ah？伊ê心所ài-ê，就行伊。I ū it-tēng ê sim-chì, chī-chūi ōe kā I oa̍t-tńg ah? I ê sim só͘ ài-ê, chiū kiâⁿ i.

14所kā我定tio̍h-ê，伊beh成伊；chit號ê事伊iáu有chōe-chōe。Só͘ kā góa tiāⁿ-tio̍h--ê, I beh chiâⁿ i; Chit hō ê sū I iáu ū chōe-chōe.

15所以我tī伊ê面前gī-gī-chhoah；我想tio̍h就驚。Só͘-í góa tī I ê bīn-chêng gī-gī-chhoah; Góa siūⁿ-tio̍h chiū kiaⁿ.

16因為上帝hō͘我失膽，全能ê雨我gī-gī-chhoah；In-ūi Siōng-tè hō͘ góa sit-táⁿ, Choân-lêng--ê hō͘ góa gī-gī-chhoah;

17因為我ê驚惶m̄是為tio̍h烏暗，也m̄是因為烏暗遮蓋我ê面。In-ūi góa ê kiaⁿ-hiâⁿ m̄-sī ūi-tio̍h o͘-àm, Iā m̄-sī in-ūi o͘-àm jia-khàm góa ê bīn.