1Thê-bān人Í-lī-hoat應講，Thê-bān lâng Í-lī-hoat ìn kóng,

2人kiám能利益上帝mah？智慧ê人實在是利益家己。Lâng kiám-ōe lī-ek Siōng-tè mah? Tì-hūi ê lâng si̍t-chāi sī lī-ek ka-kī.

3你做人公義，kiám hō͘全能ê歡喜mah？你所行完全，kiám會hō͘伊得利mah？Lí chòe lâng kong-gī, kiám hō͘ Choân-lêng--ê hoaⁿ-hí mah? Lí só͘ kiâⁿ oân-choân, kiám ōe hō͘ I tek-lī mah?

4Kiám是因為你敬畏伊，來責備你，審判你mah？Kiám-sī in-ūi lí kèng-ùi I, Lâi chek-pī lí, sím-phòaⁿ lí mah?

5你ê罪惡kiám m̄是大mah？你ê罪過實在無窮盡。Lí ê chōe-ok kiám-m̄-sī tōa mah? Lí ê chōe-kòa si̍t-chāi bô kiông-chīn.

6你無因端the̍h兄弟ê tǹg-頭；koh thǹg無thang穿ê人ê衫。Lí bô in-toaⁿ the̍h hiaⁿ-tī ê tǹg-thâu; Koh thǹg bô thang chhēng ê lâng ê saⁿ.

7厭倦ê人，你無用水hō͘ in lim，iau餓ê人，你對in收khǹg食物。Ià-siān ê lâng, lí bô ēng chúi hō͘ in lim, Iau-gō ê lâng, lí tùi in siu-khǹg chia̍h-mi̍h.

8有能力ê人得tio̍h土地；體面ê人tiàm tī hit中間。Ū lêng-le̍k ê lâng tit-tio̍h thó͘-tōe; Thé-biān ê lâng tiàm tī hit tiong-kan.

9你hō͘寡婦空手tò去，無父ê kiáⁿ ê手骨受at折。Lí hō͘ kóaⁿ-hū khang-chhiú tò-khì, Bô-pē ê kiáⁿ ê chhiú-kut siū at-chi̍h.

10所以活tauh四面圍你；驚惶忽然到，攪擾你，Só͘-í oa̍h-tauh sì-bīn ûi lí; Kiaⁿ-hiâⁿ hut-jiân kàu, kiáu-jiáu lí,

11á是烏暗hō͘你無thang看見，chōe-chōe水淹密你。Á-sī o͘-àm hō͘ lí bô thang khòaⁿ-kìⁿ, Chōe-chōe chúi im-ba̍t lí.

12上帝kiám m̄是tī天ê高mah？Tio̍h看星辰ê極頭，怎樣hiah高；Siōng-tè kiám-m̄-sī tī thiⁿ ê koâiⁿ mah? Tio̍h khòaⁿ chhiⁿ-sîn ê ke̍k-thâu, cháiⁿ-iūⁿ hiah-koâiⁿ;

13你就講，上帝知甚麼？伊kiám會看透烏暗來審判mah？Lí chiū kóng, Siōng-tè chai sím-mi̍h? I kiám ōe khòaⁿ-thàu o͘-àm lâi sím-phòaⁿ mah?

14密雲遮蓋伊，hō͘伊bōe看見；伊行tī穹蒼ê頂面。Ba̍t-hûn jia-khàm I, hō͘ I bōe khòaⁿ-kìⁿ; I kiâⁿ tī kiong-chhong ê téng-bīn.

15你kiám ài thàn古早ê路，就是pháiⁿ人所行ê mah？Lí kiám ài thàn kó͘-chá ê lō͘, Chiū-sī pháiⁿ-lâng só͘ kiâⁿ-ê mah?

16In是未到時受滅去，in ê地基hō͘大水流去。In sī bē kàu-sî siū bia̍t--khì, In ê tōe-ki hō͘ tōa-chúi lâu-khì.

17In對上帝講，tio̍h離開阮，koh講，全能ê能kā阮做甚麼ah？In tùi Siōng-tè kóng, Tio̍h lī-khui goán, Koh kóng, Choân-lêng--ê ōe kā goán chòe sím-mi̍h ah?

18總是伊用好物充滿伊ê厝；願pháiⁿ人ê計謀離開我遠遠。Chóng-sī I ēng hó-mi̍h chhiong-móa i ê chhù; Goān pháiⁿ-lâng ê kè-bô͘ lī-khui góa hn̄g-hn̄g.

19義人beh看見來歡喜；無罪ê人beh恥笑in；Gī-lâng beh khòaⁿ-kìⁿ lâi hoaⁿ-hí; Bô-chōe ê lâng beh thí-chhiò in;

20講，hiah-ê起來攻擊阮ê，果然受剪除；in所chhun-ê lóng hō͘火燒去。Kóng, Hiah-ê khí-lâi kong-kek goán ê, kó-jiân siū chián-tû; In só͘ chhun-ê lóng hō͘ hé sio-khì.

21Taⁿ你tio̍h kap上帝親密，就會得tio̍h平安；án-ni福氣beh臨到你。Taⁿ lí tio̍h kap Siōng-tè chhin-bi̍t, chiū ōe tit-tio̍h pêng-an; Án-ni hok-khì beh lîm-kàu lí.

22Taⁿ tio̍h承受伊嘴內ê教示；將伊ê話khǹg tī你ê心。Taⁿ tio̍h sêng-siū I chhùi-lāi ê kà-sī; Chiong I ê ōe khǹg tī lí ê sim.

23你若歸向全能ê，對你ê布棚內除去不義，你就得tio̍h興起。Lí nā kui-ǹg Choân-lêng--ê, tùi lí ê pò͘-pîⁿ-lāi tû-khì put-gī, Lí chiū tit-tio̍h heng-khí.

24你tio̍h hiat寶貝tī塵埃裡，hiat O-hui ê金tī溪河石頭ê中間；Lí tio̍h hiat pó-pòe tī tîn-ai--nih, Hiat O-hui ê kim tī khoe-hô chio̍h-thâu ê tiong-kan;

25全能ê就beh做你ê寶貝，做你ê紋銀。Choân-lêng--ê chiū beh chòe lí ê pó-pòe, chòe lí ê bûn-gûn.

26你就beh掠全能ê做歡喜，面kia̍h高ǹg上帝。Lí chiū beh lia̍h choân-lêng--ê chòe hoaⁿ-hí, Bīn kia̍h-koâiⁿ ǹg Siōng-tè.

27你祈禱伊，伊就聽你，你也beh謝你ê願。Lí kî-tó I, I chiū thiaⁿ lí, Lí iā beh siā lí ê goān.

28你定tio̍h beh做甚麼，hit-ê tāi-chì的確成；光也beh照你ê路。Lí tiāⁿ-tio̍h beh chòe sím-mi̍h, hit ê tāi-chì tek-khak chiâⁿ; Kng iā beh chiò lí ê lō͘.

29In降低ê時，你猶原thang講，升高；謙卑ê人上帝beh拯救伊。In kàng-kē ê sî, lí iû-goân thang kóng, Seng-koâiⁿ; Khiam-pi ê lâng Siōng-tè beh chín-kiù i.

30連有罪ê人上帝也beh救伊；因為你ê手清氣，伊beh得tio̍h救。Liân ū-chōe ê lâng Siōng-tè iā beh kiù i; In-ūi lí ê chhiú chheng-khì, i beh tit-tio̍h kiù.

1約伯應講，Iok-pek ìn kóng,

2Taⁿ我ê哀怨算做悖逆；我所受ê責罰khah重tī我ê吐氣。Taⁿ góa ê ai-oàn sǹg-chòe pōe-ge̍k; Góa só͘ siū ê chek-hoa̍t khah-tāng tī góa ê thó͘-khùi.

3願我會知tùi怎樣chhē上帝，hō͘我thang到伊ê座位！Goān góa ōe chai tùi cháiⁿ-iūⁿ chhē Siōng-tè, Hō͘ góa thang kàu I ê chō-ūi!

4我beh排列案件tī伊ê面前，我ê嘴夠額thang辯明。Góa beh pâi-lia̍t àn-kiāⁿ tī I ê bīn-chêng, Góa ê chhùi kàu-gia̍h thang piān-bêng.

5我也得tio̍h知伊應我ê話，也明白伊對我所講ê。Góa iā tit-tio̍h chai I ìn góa ê ōe, Iā bêng-pe̍k I tùi góa só͘-kóng-ê.

6伊kiám beh用大權能kap我計較mah？的確無án-ni；伊beh àⁿ落聽我。I kiám beh ēng tōa koân-lêng kap góa kè-kàu mah? Tek-khak bô án-ni; I beh àⁿ-lo̍h thiaⁿ góa.

7Tī-hia正直ê會kap伊辯論，án-ni，我beh永遠脫離審判我ê。Tī-hia chèng-ti̍t--ê ōe kap I piān-lūn, Án-ni, góa beh éng-oán thoat-lī sím-phòaⁿ góa ê.

8看ah，我進前去，伊無tī-hia；我退後去，也無看見伊；Khòaⁿ ah, góa chìn-chêng khì, I bô tī-hia; Góa thè-āu khì, iā bô khòaⁿ-kìⁿ I;

9Tī tò-pêng伊teh行tāi-chì，我無看見伊；tī chiàⁿ-pêng伊tiàm密，我也無看見伊。Tī tò-pêng I teh kiâⁿ tāi-chì, góa bô khòaⁿ-kìⁿ I; Tī chiàⁿ-pêng I tiàm-ba̍t, góa iā bô khòaⁿ-kìⁿ I.

10總是伊知我所行ê路；伊試煉我了後，我beh親像過鍛鍊ê金。Chóng-sī I chai góa só͘ kiâⁿ ê lō͘; I chhì-liān góa liáu-āu, góa beh chhin-chhiūⁿ kè thoàn-liān ê kim.

11我ê腳tè伊ê腳步；我執守伊ê路，也無偏chhoa̍h。Góa ê kha tè I ê kha-pō͘; Góa chip-siú I ê lō͘, iā bô phian-chhoa̍h.

12伊嘴唇ê命令，我未bat違背；我對重伊嘴內ê話，贏過我所tio̍h用ê米糧。I chhùi-tûn ê bēng-lēng góa bē bat ûi-pōe; Góa tùi-tiōng I chhùi-lāi ê ōe, iâⁿ-kè góa só͘ tio̍h ēng ê bí-niû.

13伊有一定ê心志，是誰能kā伊oa̍t-tńg ah？伊ê心所ài-ê，就行伊。I ū it-tēng ê sim-chì, chī-chūi ōe kā I oa̍t-tńg ah? I ê sim só͘ ài-ê, chiū kiâⁿ i.

14所kā我定tio̍h-ê，伊beh成伊；chit號ê事伊iáu有chōe-chōe。Só͘ kā góa tiāⁿ-tio̍h--ê, I beh chiâⁿ i; Chit hō ê sū I iáu ū chōe-chōe.

15所以我tī伊ê面前gī-gī-chhoah；我想tio̍h就驚。Só͘-í góa tī I ê bīn-chêng gī-gī-chhoah; Góa siūⁿ-tio̍h chiū kiaⁿ.

16因為上帝hō͘我失膽，全能ê雨我gī-gī-chhoah；In-ūi Siōng-tè hō͘ góa sit-táⁿ, Choân-lêng--ê hō͘ góa gī-gī-chhoah;

17因為我ê驚惶m̄是為tio̍h烏暗，也m̄是因為烏暗遮蓋我ê面。In-ūi góa ê kiaⁿ-hiâⁿ m̄-sī ūi-tio̍h o͘-àm, Iā m̄-sī in-ūi o͘-àm jia-khàm góa ê bīn.

1全能ê啥事無將時期收khǹg？Bat伊ê人啥事無看見伊ê日ah？Choân-lêng-ê siáⁿ-sū bô chiong sî-kî siu-khǹg? Bat I ê lâng siáⁿ-sū bô khòaⁿ-kìⁿ I ê ji̍t ah?

2有人移徙地界，搶奪kui群ê cheng-siⁿ，來飼伊。Ū lâng î-sóa tōe-kài, Chhiúⁿ-toa̍t kui-kûn ê cheng-siⁿ, lâi chhī i.

3In趕無父ê kiáⁿ ê驢，牽寡婦ê牛做準當。In kóaⁿ bô-pē ê kiáⁿ ê lû, khan kóaⁿ-hū ê gû chòe chún-tǹg.

4In chhia sòng-hiong人離開路；地上ê艱苦人相kap去bih。In chhia sòng-hiong lâng lī-khui lō͘; Tōe-chiūⁿ ê kan-khó͘ lâng saⁿ-kap khì bih.

5看ah，in親像野驢tī曠野，出去做工，勤勤chhē食；曠野kā in ê kiáⁿ出食物。Khòaⁿ ah, in chhin-chhiūⁿ iá-lû tī khòng-iá, Chhut-khì chòe-kang, khûn-khûn chhē chia̍h; Khòng-iá kā in ê kiáⁿ chhut chia̍h-mi̍h.

6割田裡ê糧草，挽pháiⁿ人所chhun ê葡萄。Koah chhân--nih ê niû-chháu, Bán pháiⁿ-lâng só͘ chhun ê phû-tô.

7Thong暝thǹg-pak-theh無穿衫倒teh；寒冷無蓋被。Thong-mî thǹg-pak-theh bô chhēng-saⁿ tó-teh; Kôaⁿ-léng bô kah-phē.

8Tī山裡hō͘大雨ak-tâm；因為無jia遮就bih-óa tī石腳。Tī soaⁿ--nih hō͘ tōa-hō͘ ak-tâm; In-ūi bô jia-cha̍h chiū bih-óa tī chio̍h-kha.

9Tùi老母ê胸前搶無父ê kiáⁿ去；koh tùi sòng-hiong人the̍h準當；Tùi lāu-bú ê heng-chêng chhiúⁿ bô-pē ê kiáⁿ khì; Koh tùi sòng-hiong lâng the̍h chún-tǹg;

10致到人無衫，thǹg-theh來行；iau-iau teh擔稻把。Tì-kàu lâng bô-saⁿ, thǹg-theh lâi kiâⁿ; Iau-iau teh taⁿ tiū-pé.

11Tī hiah-ê人圍牆內，khoeh油，踏酒窟，家己iáu-kú嘴乾。Tī hiah ê lâng ûi-chhiûⁿ lāi, khoeh iû, ta̍h chiú-khut, Ka-kī iáu-kú chhùi-ta.

12Tī chōe-chōe百姓ê城內有人ai-ai chhan，受傷ê人ê心悲哀；總是上帝無鑑察hit-ê不義。Tī chōe-chōe peh-sìⁿ ê siâⁿ-lāi ū lâng ai-ai chhan, Siū-siong ê lâng ê sim pi-ai; Chóng-sī Siōng-tè bô kàm-chhat hit ê put-gī.

13也有人違背光明，m̄-bat伊ê路，也無tiàm tī伊ê路上。Iā ū lâng ûi-pōe kng-bêng, M̄-bat i ê lō͘, Iā bô tiàm tī i ê lō͘-chiūⁿ.

14Thâi人ê天phú光就起來，thâi死艱苦ê kap sòng-hiong人，tī暝時親像賊。Thâi-lâng--ê thiⁿ-phú-kng chiū khí-lâi, Thâi-sí kan-khó͘--ê kap sòng-hiong lâng, Tī mî--sî chhin-chhiūⁿ chha̍t.

15姦淫ê人ê目睭thèng候到黃昏，講，無人目睭能看見我；koh遮蓋伊ê面。Kan-îm ê lâng ê ba̍k-chiu thèng-hāu kàu hông-hun, Kóng, Bô lâng ba̍k-chiu ōe khòaⁿ-kìⁿ góa; Koh jia-khàm i ê bīn.

16In tī暝時iah厝孔，日時家己bih，也m̄知hit-ê光。In tī mî--sî iah chhù-khang, ji̍t--sî ka-kī bih, Iā m̄-chai hit ê kng.

17因為in看天光早做死蔭，因為in tī死蔭真慣勢。In-ūi in khòaⁿ thiⁿ-kng-chá chòe sí-ìm, In-ūi in tī sí-ìm chin koàiⁿ-sì.

18伊tī水面真輕快，in ê份額tī地上受咒詛；伊無koh oa̍t-tńg來行葡萄園ê路。I tī chúi-bīn chin khin-khoài, In ê hūn-gia̍h tī tōe-chiūⁿ siū chiù-chó͘; I bô koh oa̍t-tńg lâi kiâⁿ phû-tô-hn̂g ê lō͘.

19炕旱kap燒熱消無雪水；陰間對tī犯罪ê人也是án-ni。Khòng-hān kap sio-joa̍h siau-bô seh-chúi; Im-kan tùi-tī hoān-chōe ê lâng iā sī án-ni.

20懷孕伊ê胎beh bōe記得伊；蟲食伊，beh掠做甜；伊無koh受記念；不義beh親像樹受at折。Hoâi-īn i ê thai beh bōe-kì-tit i; thâng chia̍h i, beh lia̍h chòe tiⁿ; I bô koh siū kì-liām; Put-gī beh chhin-chhiūⁿ chhiū siū at-chi̍h.

21伊欺負無懷孕無生kiáⁿ ê婦人人；無好款待守寡人。I khi-hū bô hoâi-īn bô siⁿ-kiáⁿ ê hū-jîn-lâng; Bô hó khoán-thāi chiú-kóaⁿ-lâng.

22Koh用伊ê權能保全強猛ê人；雖然伊ê活命絕望，iáu-kú能koh起來。Koh ēng I ê koân-lêng pó-choân kiông-béng ê lâng; Sui-jiân i ê oa̍h-miā choa̍t-bāng, iáu-kú ōe koh khí-lâi.

23伊賞賜伊安然，伊就有所óa靠，伊ê目睭也看顧in ê路。I siúⁿ-sù i an-jiân, i chiū ū só͘ óa-khò, I ê ba̍k-chiu iā khòaⁿ-kò͘ in ê lō͘.

24In升高，tiap-á久就無去；in降低，hō͘人收拾，親像眾人，koh親像麥穗受割起來。In seng-koâiⁿ, tiap-á-kú chiū bô--khì; In kàng-kē, hō͘ lâng siu-si̍p, chhin-chhiūⁿ chèng-lâng, Koh chhin-chhiūⁿ be̍h-sūi siū koah--khí-lâi.

25若m̄是án-ni，是誰能證明我是白賊ê，也hō͘我ê話歸tī空空ah？Nā m̄-sī án-ni, chī-chūi ōe chèng-bêng góa sī pe̍h-chha̍t--ê, Iā hō͘ góa ê ōe kui tī khang-khang ah?