1約伯koh續接提起伊ê言論講，Iok-pek koh sòa-chiap thê-khí i ê giân-lūn kóng,

2上帝奪我ê理由；全能ê苦楚我ê心神；我指伊ê永活來講；Siōng-tè toa̍t góa ê lí-iû; Choân-lêng--ê khó͘-chhó͘ góa ê sim-sîn; Góa chí I ê éng-oa̍h lâi kóng;

3(因為我ê活命iáu-kú完全tī我ê內面，上帝ê氣iáu-kú tī我ê鼻孔；)(In-ūi góa ê oa̍h-miā iáu-kú oân-choân tī góa ê lāi-bīn, Siōng-tè ê khì iáu-kú tī góa ê phīⁿ-khang;)

4我ê嘴唇決斷無講不義，我ê舌也無講詭詐。Góa ê chhùi-tûn koat-toàn bô kóng put-gī, Góa ê chi̍h iā bô kóng khúi-chà.

5我斷斷無稱lín做義，我到死，也m̄算我做無完全。Góa toàn-toàn bô chheng lín chòe gī, Góa kàu sí, iā m̄ sǹg góa chòe bô oân-choân.

6我執守我ê義，無beh放sak，我ê心一世人無責備我。Góa chip-siú góa ê gī, bô beh pàng-sak, Góa ê sim chi̍t-sì-lâng bô chek-pī góa.

7願我ê對敵親像pháiⁿ人，願hit-ê起來攻擊我ê，親像不義ê人。Goān góa ê tùi-te̍k chhin-chhiūⁿ pháiⁿ-lâng, Goān hit ê khí-lâi kong-kek góa ê, chhin-chhiūⁿ put-gī ê lâng.

8無敬虔ê人，雖然搶tio̍h財利，上帝取伊ê活命ê時，iáu有甚麼ǹg望？Bô kèng-khiân ê lâng, sui-jiân chhiúⁿ-tio̍h châi-lī, Siōng-tè chhú i ê oa̍h-miā ê sî, iáu ū sím-mi̍h ǹg-bāng?

9患難臨到伊ê時，上帝kiám beh聽伊ê求叫？Hoān-lān lîm-kàu i ê sî, Siōng-tè kiám beh thiaⁿ i ê kiû-kiò?

10伊kiám會用全能ê做歡喜？伊時常求叫上帝mah？I kiám ōe ēng Choân-lêng--ê chòe hoaⁿ-hí? I sî-siông kiû-kiò Siōng-tè mah?

11上帝所做ê，我beh教示你，全能ê所有ê，我也無隱瞞。Siōng-tè só͘ chòe ê, góa beh kà-sī lí, Choân-lêng--ê só͘ ū-ê, góa iā bô ún-môa.

12看ah，lín本身lóng有看見，啥事一盡虛假ah？Khòaⁿ ah, lín pún-sin lóng ū khòaⁿ-kìⁿ, Siáⁿ-sū it-chīn hu-ké ah?

13Pháiⁿ人tùi上帝所受ê份額，強暴ê人tùi全能ê所得tio̍h ê產業，就是chit-ê。Pháiⁿ-lâng tùi Siōng-tè só͘ siū ê hūn-gia̍h, Kiông-pō ê lâng tùi Choân-lêng--ê só͘ tit-tio̍h ê sán-gia̍p, chiū-sī chit-ê.

14伊ê kiáⁿ兒若加添chōe-chōe，是beh hō͘刀thâi死；伊ê後裔無thang食夠額。I ê kiáⁿ-jî nā ke-thiⁿ chōe-chōe, sī beh hō͘ to thâi-sí; I ê hō͘-è bô thang chia̍h kàu gia̍h.

15伊所chhun ê人beh tú-tio̍h瘟疫來埋葬，也伊ê寡婦無啼哭。I só͘ chhun ê lâng beh tú-tio̍h un-e̍k lâi bâi-chòng, Iā i ê kóaⁿ-hū bô thî-khàu.

16伊雖然積聚銀親像塵埃，koh備辦衣裳親像土；I sui-jiân chek-chū gûn chhin-chhiūⁿ tîn-ai, Koh pī-pān i-chiûⁿ chhin-chhiūⁿ thô͘;

17伊做伊備辦，總是義人beh穿伊，無罪ê人beh分伊ê銀。I chòe i pī-pān, chóng-sī gī-lâng beh chhēng i, Bô-chōe ê lâng beh pun i ê gûn.

18伊親像蛀蟲起厝，koh親像守更ê搭伊ê寮á。I chhin-chhiūⁿ chiù-thâng khí chhù, Koh chhin-chhiūⁿ chiú-kiⁿ-ê tah i ê liâu-á.

19伊好額倒teh，總是無得tio̍h收埋；伊thí開目睭，就無去。I hó-gia̍h tó-teh, chóng-sī bô tit-tio̍h siu-bâi; I thí-khui ba̍k-chiu, chiū bô--khì.

20驚惶beh親像大水jip-tio̍h伊；暝時ê大風beh掃伊去。Kiaⁿ-hiâⁿ beh chhin-chhiūⁿ tōa-chúi jip-tio̍h i; Mî--sî ê tōa-hong beh sàu i khì.

21東風吹伊，伊就去；koh 趕伊離開本所在。Tang-hong chhe i, i chiū khì; Koh kóaⁿ i lī-khui pún só͘-chāi.

22因為上帝射tio̍h伊，也無寬恕；伊苦bōe-thang脫離伊ê手。In-ūi Siōng-tè siā-tio̍h i, iā bô khoan-sù; I khó͘-bōe-thang thoat-lī I ê chhiú.

23人beh對伊phah pho̍k-á，也beh出口號，趕伊離開本所在。Lâng beh tùi i phah pho̍k-á, Iā beh chhut kháu-hō, kóaⁿ i lī-khui pún só͘-chāi.

1出銀有伊ê礦，所鍛鍊ê金也有伊ê所在teh出。Chhut-gûn ū i ê khòng, Só͘ thoàn-liān ê kim iā ū i ê só͘-chāi teh chhut.

2鐵是tùi地裡取出來，銅是tùi石鎔出來。Thih sī tùi tōe--nih chhú--chhut-lâi, Tâng sī tùi chio̍h iûⁿ--chhut-lâi.

3人消無hit-ê烏暗，chhē到盡底；有烏暗kap死蔭中ê石。Lâng siau-bô hit ê o͘-àm, Chhē kàu chīn tóe; Ū o͘-àm kap sí-ìm tiong ê chio̍h.

4伊離開人寄腳ê所在，khui hia̍t；行tī hit頂面ê人無想tio̍h伊；in離開人，墜tī穴中，hìⁿ來hiàⁿ去。I lī-khui lâng kià-kha ê só͘-chāi, khui hia̍t; Kiâⁿ tī hí(**hit) téng-bīn ê lâng bô siūⁿ-tio̍h i; In lī-khui lâng, tūi tī hia̍t-tiong, hìⁿ-lâi hìⁿ-khì.

5論到地，米糧tùi hia出；伊ê下底親像hō͘火kā伊péng起來。Lūn-kàu tōe, bí-niû tùi hia chhut; I ê ē-tóe chhin-chhiūⁿ hō͘ hé kā i péng--khí-lâi.

6伊ê石中有藍寶石，伊也有金沙。I ê chio̍h-tiong ū lâm-pó-chio̍h, I iā ū kim-soa.

7Hit條路鷹鳥m̄-bat；小鷹ê目睭也無看見。Hit tiâu lō͘ eng-chiáu m̄-bat; Sió-eng ê ba̍k-chiu iā bô khòaⁿ-kìⁿ.

8惡獸m̄-bat踏tio̍h伊，猛獅也m̄-bat tùi hia過。Ok-siù m̄-bat ta̍h-tio̍h i, Béng-sai iā m̄-bat tùi hia kè.

9伊伸手phah tēng石，tùi山ê根基kā伊péng起來。I chhun-chhiú phah tēng-chio̍h, Tùi soaⁿ ê kun-ki kā i péng--khí-lâi.

10伊tī石頭中開溝，親目看見ta̍k樣ê寶物。I tī chio̍h-thâu tiong khui-kau, Chhin-ba̍k khòaⁿ-kìⁿ ta̍k-iūⁿ ê pó-mi̍h.

11伊塞密水hō͘伊bōe滴落來；koh the̍h出隱密ê物，hō͘伊見光。I that-ba̍t chúi hō͘ i bōe tih--lo̍h-lâi; Koh the̍h-chhut ún-ba̍t ê mi̍h, hō͘ i kìⁿ kng.

12總是智慧tùi toh落能chhē-tio̍h？聰明ê所在tī toh落？Chóng-sī tì-hūi tùi toh-lo̍h ōe chhē-tio̍h? Chhong-bêng ê só͘-chāi tī toh-lo̍h?

13伊ê價錢無人知，tī活人ê地也無teh thang chhē。I ê kè-chîⁿ bô lâng chai, Tī oa̍h-lâng ê tōe iā bô tè(**teh) thang chhē.

14深淵講，無tī我chia；大海講，無kap我tī-teh。Chhim-ian kóng, Bô tī góa chia; Tōa-hái kóng, Bô kap góa tī-teh.

15Bōe能用黃金來得tio̍h 伊；也bōe能秤(phêng)銀做伊ê價錢。Bōe-ōe ēng n̂g-kim lâi tit-tio̍h i; Iā bōe-ōe phêng gûn chòe i ê kè-chîⁿ.

16O-hui ê金bōe值tio̍h 伊；寶貴ê碧玉kap藍寶石也bōe。O-hui ê kim bōe ta̍t-tio̍h i; Pó-kùi ê phek-ge̍k kap lâm-pó-chio̍h iā bōe.

17黃金kap玻璃bōe比得伊；好金ê器具無夠額kap伊換。N̂g-kim kap po-lê bōe pí-tit i; Hó-kim ê khì-kū bô kàu-gia̍h kap i ōaⁿ.

18珊瑚、水晶lóng無夠額thang講；因為得tio̍h智慧贏過珍珠。Sian-hô chúi-chiⁿ lóng bô kàu-gia̍h thang kóng; In-ūi tit-tio̍h tì-hūi iâⁿ-kè chin-chu.

19Kó͘-si̍t ê黃玉bōe比得伊；足成ê金m̄值tio̍h 伊。Kó͘-si̍t ê n̂g-ge̍k bōe pí-tit i; Chiok-siâⁿ ê kim m̄-ta̍t-tio̍h i.

20Án-ni智慧tùi toh落來？聰明ê所在tī toh落？Án-ni tì-hūi tùi toh-lo̍h lâi? Chhong-bêng ê só͘-chāi tī toh-lo̍h?

21既然對一切有活命ê ê目睭隱密；對空中ê飛鳥遮掩。Kì-jiân tùi it-chhè ū oa̍h-miā-ê ê ba̍k-chiu ún-ba̍t; Tùi khong-tiong ê pe-chiáu jia-iám.

22A-pa-tùn kap死失講，阮耳孔聽見伊ê風聲。A-pa-tùn kap Sí-sit kóng, Goán hī-khang thiaⁿ-kìⁿ i ê hong-siaⁿ.

23上帝明白智慧ê路，也知伊ê所在。Siōng-tè bêng-pe̍k tì-hūi ê lō͘, Iā chai i ê só͘-chāi.

24因為伊鑑察到地ê極頭，遍看普天下。In-ūi I kàm-chhat kàu tōe ê ke̍k-thâu, Piàn-khòaⁿ phó͘-thiⁿ-ē.

25定tio̍h風ê輕重，koh量水ê chōe少。Tiāⁿ-tio̍h hong ê khin-tāng, Koh niû chúi ê chōe-chió.

26伊kā雨水定tio̍h例，kā雷電定tio̍h伊ê路；I kā hō͘-chúi tiāⁿ-tio̍h lē, Kā lûi-tiān tiāⁿ-tio̍h i ê lō͘;

27Hit時伊看見伊，來講明伊，伊造成伊，koh查察伊。Hit-sî I khòaⁿ-kìⁿ i, lâi kóng-bêng i, I chō-chiâⁿ i, koh cha-chhat i.

28伊對人講，看ah，敬畏主就是智慧，離開pháiⁿ就是聰明。I tùi lâng kóng, Khòaⁿ ah, kèng-ùi Chú chiū-sī tì-hūi, Lī-khui pháiⁿ chiū-sī chhong-bêng.

1約伯koh續接提起伊ê言論，講，Iok-pek koh sòa-chiap thê-khí i ê giân-lūn, kóng,

2願我親像從前hiah-ê月，親像上帝保守我ê日。Goān góa chhin-chhiūⁿ chiông-chêng hiah ê ge̍h, Chhin-chhiūⁿ Siōng-tè pó-siú góa ê ji̍t.

3Hit時伊ê燈照tī我ê頭殼，我靠伊ê光行過烏暗。Hit-sî I ê teng chiò tī góa ê thâu-khak, Góa khò I ê kng kiâⁿ-kè o͘-àm.

4親像我tī秋天ê日，tī我ê布棚上帝kap我親密。Chhin-chhiūⁿ góa tī chhiu-thiⁿ ê ji̍t, Tī góa ê pò͘-pîⁿ Siōng-tè kap góa chhin-bi̍t.

5全能ê iáu-kú kap我tī-teh，我ê kiáⁿ兒tī我ê四圍。Choân-lêng--ê iáu-kú kap góa tī-teh, Góa ê kiáⁿ-jî tī góa ê sì-ûi.

6用妳洗我ê腳，石磐kā我出油成溪。Ēng ni sóe góa ê kha, Chio̍h-pôaⁿ kā góa chhut-iû chiâⁿ-khoe.

7我行到城門，tī街市設我ê座位。Góa kiâⁿ kàu siâⁿ-mn̂g, Tī koe-chhī siat góa ê chō-ūi.

8少年人看見我就走去bih，老人也起來khiā。Siàu-liân lâng khòaⁿ-kìⁿ góa chiū cháu khì bih, Lāu-lâng iā khí-lâi khiā.

9首領就停止伊ê話，用手掩in ê嘴。Siú-léng chiū thêng-chí i ê ōe, Ēng chhiú ng in ê chhùi.

10貴族無開聲，舌頭連tī上kiuⁿ。Kùi-cho̍k bô khui siaⁿ, Chi̍h-thâu liâm tī chiūⁿ-kiuⁿ.

11因為耳孔聽見ê，就稱我做有福氣，目睭看見ê，就kā我做干證。In-ūi hī-khang thiaⁿ-kìⁿ-ê, chiū chheng góa chòe ū hok-khì, Ba̍k-chiu khòaⁿ-kìⁿ-ê, chiū kā góa chòe kan-chèng.

12因為我拯救哀求ê艱苦人，kap無父ê kiáⁿ，無人幫贊ê。In-ūi góa chín-kiù ai-kiû ê kan-khó͘ lâng, Kap bô-pē ê kiáⁿ, bô lâng pang-chān ê.

13得beh死無ê人kā我祝福，我也hō͘寡婦ê心歡喜來唱歌。Tit-beh sí-bô ê lâng kā góa chiok-hok, Góa iā hō͘ kóaⁿ-hū ê sim hoaⁿ-hí lâi chhiùⁿ-koa.

14我穿公義，伊也用我做衫，用公平做袍，做帽。Góa chhēng kong-gī, i iā ēng góa chòe saⁿ, Ēng kong-pêng chòe phàu, chòe bō.

15我做chhiⁿ-mî人ê目睭，做跛腳ê人ê腳。Góa chòe chhiⁿ-mî lâng ê ba̍k-chiu, Chòe pái-kha ê lâng ê kha.

16我做sòng-hiong人ê父，平素m̄-bat-ê ê案件我查察伊。Góa chòe sòng-hiong lâng ê pē, Pêng-sò͘ m̄-bat--ê ê àn-kiāⁿ góa cha-chhat i.

17我phah折pháiⁿ人ê牙槽，搶伊ê嘴齒所咬ê。Góa phah-chi̍h pháiⁿ-lâng ê gê-chô, Chhiúⁿ i ê chhùi-khí só͘ kā ê.

18我就講，我beh死tī我ê siū，我ê日子beh加添親像沙。Góa chiū kóng, Góa beh sí tī góa ê siū, Góa ê ji̍t-chí beh ke-thiⁿ chhin-chhiūⁿ soa.

19我ê根伸到水邊，露水kui暝落tī我ê枝。Góa ê kun chhun kàu chúi-piⁿ, Lō͘-chúi kui-mî lo̍h tī góa ê ki.

20我ê榮光tī我常常新，我ê弓tī我ê手koh再ân。Góa ê êng-kng tī góa siông-siông sin, Góa ê keng tī góa ê chhiú koh-chài ân.

21人聽見我，就thèng候，靜靜等我指教。Lâng thiaⁿ-kìⁿ góa, chiū thèng-hāu, Chēng-chēng tán góa chí-kàu.

22我講了，in就無koh講；我ê話親像雨滴tī in ê頂面。Góa kóng-liáu, in chiū bô koh kóng; Góa ê ōe chhin-chhiūⁿ hō͘ tih tī in ê téng-bīn.

23In thèng候我親像thèng候雨水，大開in ê嘴，親像欣慕春天ê雨。In thèng-hāu góa chhin-chhiūⁿ thèng-hāu hō͘-chúi, Tōa khui in ê chhùi, chhin-chhiūⁿ him-bō͘ chhun-thiⁿ ê hō͘.

24In失望，我安慰in；in bōe能改變我ê面ê光。In sit-bāng, góa an-ùi in; In bōe-ōe kóe-piàn góa ê bīn ê kng.

25我kā in揀路，我坐頭位；我親像王tī軍隊中khiā起，koh親像安慰傷心ê人。Góa kā in kéng lō͘, góa chē thâu-ūi; Góa chhin-chhiūⁿ ông tī kun-tūi-tiong khiā-khí, Koh chhin-chhiūⁿ an-ùi siong-sim ê lâng.