1出銀有伊ê礦，所鍛鍊ê金也有伊ê所在teh出。Chhut-gûn ū i ê khòng, Só͘ thoàn-liān ê kim iā ū i ê só͘-chāi teh chhut.

2鐵是tùi地裡取出來，銅是tùi石鎔出來。Thih sī tùi tōe--nih chhú--chhut-lâi, Tâng sī tùi chio̍h iûⁿ--chhut-lâi.

3人消無hit-ê烏暗，chhē到盡底；有烏暗kap死蔭中ê石。Lâng siau-bô hit ê o͘-àm, Chhē kàu chīn tóe; Ū o͘-àm kap sí-ìm tiong ê chio̍h.

4伊離開人寄腳ê所在，khui hia̍t；行tī hit頂面ê人無想tio̍h伊；in離開人，墜tī穴中，hìⁿ來hiàⁿ去。I lī-khui lâng kià-kha ê só͘-chāi, khui hia̍t; Kiâⁿ tī hí(**hit) téng-bīn ê lâng bô siūⁿ-tio̍h i; In lī-khui lâng, tūi tī hia̍t-tiong, hìⁿ-lâi hìⁿ-khì.

5論到地，米糧tùi hia出；伊ê下底親像hō͘火kā伊péng起來。Lūn-kàu tōe, bí-niû tùi hia chhut; I ê ē-tóe chhin-chhiūⁿ hō͘ hé kā i péng--khí-lâi.

6伊ê石中有藍寶石，伊也有金沙。I ê chio̍h-tiong ū lâm-pó-chio̍h, I iā ū kim-soa.

7Hit條路鷹鳥m̄-bat；小鷹ê目睭也無看見。Hit tiâu lō͘ eng-chiáu m̄-bat; Sió-eng ê ba̍k-chiu iā bô khòaⁿ-kìⁿ.

8惡獸m̄-bat踏tio̍h伊，猛獅也m̄-bat tùi hia過。Ok-siù m̄-bat ta̍h-tio̍h i, Béng-sai iā m̄-bat tùi hia kè.

9伊伸手phah tēng石，tùi山ê根基kā伊péng起來。I chhun-chhiú phah tēng-chio̍h, Tùi soaⁿ ê kun-ki kā i péng--khí-lâi.

10伊tī石頭中開溝，親目看見ta̍k樣ê寶物。I tī chio̍h-thâu tiong khui-kau, Chhin-ba̍k khòaⁿ-kìⁿ ta̍k-iūⁿ ê pó-mi̍h.

11伊塞密水hō͘伊bōe滴落來；koh the̍h出隱密ê物，hō͘伊見光。I that-ba̍t chúi hō͘ i bōe tih--lo̍h-lâi; Koh the̍h-chhut ún-ba̍t ê mi̍h, hō͘ i kìⁿ kng.

12總是智慧tùi toh落能chhē-tio̍h？聰明ê所在tī toh落？Chóng-sī tì-hūi tùi toh-lo̍h ōe chhē-tio̍h? Chhong-bêng ê só͘-chāi tī toh-lo̍h?

13伊ê價錢無人知，tī活人ê地也無teh thang chhē。I ê kè-chîⁿ bô lâng chai, Tī oa̍h-lâng ê tōe iā bô tè(**teh) thang chhē.

14深淵講，無tī我chia；大海講，無kap我tī-teh。Chhim-ian kóng, Bô tī góa chia; Tōa-hái kóng, Bô kap góa tī-teh.

15Bōe能用黃金來得tio̍h 伊；也bōe能秤(phêng)銀做伊ê價錢。Bōe-ōe ēng n̂g-kim lâi tit-tio̍h i; Iā bōe-ōe phêng gûn chòe i ê kè-chîⁿ.

16O-hui ê金bōe值tio̍h 伊；寶貴ê碧玉kap藍寶石也bōe。O-hui ê kim bōe ta̍t-tio̍h i; Pó-kùi ê phek-ge̍k kap lâm-pó-chio̍h iā bōe.

17黃金kap玻璃bōe比得伊；好金ê器具無夠額kap伊換。N̂g-kim kap po-lê bōe pí-tit i; Hó-kim ê khì-kū bô kàu-gia̍h kap i ōaⁿ.

18珊瑚、水晶lóng無夠額thang講；因為得tio̍h智慧贏過珍珠。Sian-hô chúi-chiⁿ lóng bô kàu-gia̍h thang kóng; In-ūi tit-tio̍h tì-hūi iâⁿ-kè chin-chu.

19Kó͘-si̍t ê黃玉bōe比得伊；足成ê金m̄值tio̍h 伊。Kó͘-si̍t ê n̂g-ge̍k bōe pí-tit i; Chiok-siâⁿ ê kim m̄-ta̍t-tio̍h i.

20Án-ni智慧tùi toh落來？聰明ê所在tī toh落？Án-ni tì-hūi tùi toh-lo̍h lâi? Chhong-bêng ê só͘-chāi tī toh-lo̍h?

21既然對一切有活命ê ê目睭隱密；對空中ê飛鳥遮掩。Kì-jiân tùi it-chhè ū oa̍h-miā-ê ê ba̍k-chiu ún-ba̍t; Tùi khong-tiong ê pe-chiáu jia-iám.

22A-pa-tùn kap死失講，阮耳孔聽見伊ê風聲。A-pa-tùn kap Sí-sit kóng, Goán hī-khang thiaⁿ-kìⁿ i ê hong-siaⁿ.

23上帝明白智慧ê路，也知伊ê所在。Siōng-tè bêng-pe̍k tì-hūi ê lō͘, Iā chai i ê só͘-chāi.

24因為伊鑑察到地ê極頭，遍看普天下。In-ūi I kàm-chhat kàu tōe ê ke̍k-thâu, Piàn-khòaⁿ phó͘-thiⁿ-ē.

25定tio̍h風ê輕重，koh量水ê chōe少。Tiāⁿ-tio̍h hong ê khin-tāng, Koh niû chúi ê chōe-chió.

26伊kā雨水定tio̍h例，kā雷電定tio̍h伊ê路；I kā hō͘-chúi tiāⁿ-tio̍h lē, Kā lûi-tiān tiāⁿ-tio̍h i ê lō͘;

27Hit時伊看見伊，來講明伊，伊造成伊，koh查察伊。Hit-sî I khòaⁿ-kìⁿ i, lâi kóng-bêng i, I chō-chiâⁿ i, koh cha-chhat i.

28伊對人講，看ah，敬畏主就是智慧，離開pháiⁿ就是聰明。I tùi lâng kóng, Khòaⁿ ah, kèng-ùi Chú chiū-sī tì-hūi, Lī-khui pháiⁿ chiū-sī chhong-bêng.

1約伯koh續接提起伊ê言論，講，Iok-pek koh sòa-chiap thê-khí i ê giân-lūn, kóng,

2願我親像從前hiah-ê月，親像上帝保守我ê日。Goān góa chhin-chhiūⁿ chiông-chêng hiah ê ge̍h, Chhin-chhiūⁿ Siōng-tè pó-siú góa ê ji̍t.

3Hit時伊ê燈照tī我ê頭殼，我靠伊ê光行過烏暗。Hit-sî I ê teng chiò tī góa ê thâu-khak, Góa khò I ê kng kiâⁿ-kè o͘-àm.

4親像我tī秋天ê日，tī我ê布棚上帝kap我親密。Chhin-chhiūⁿ góa tī chhiu-thiⁿ ê ji̍t, Tī góa ê pò͘-pîⁿ Siōng-tè kap góa chhin-bi̍t.

5全能ê iáu-kú kap我tī-teh，我ê kiáⁿ兒tī我ê四圍。Choân-lêng--ê iáu-kú kap góa tī-teh, Góa ê kiáⁿ-jî tī góa ê sì-ûi.

6用妳洗我ê腳，石磐kā我出油成溪。Ēng ni sóe góa ê kha, Chio̍h-pôaⁿ kā góa chhut-iû chiâⁿ-khoe.

7我行到城門，tī街市設我ê座位。Góa kiâⁿ kàu siâⁿ-mn̂g, Tī koe-chhī siat góa ê chō-ūi.

8少年人看見我就走去bih，老人也起來khiā。Siàu-liân lâng khòaⁿ-kìⁿ góa chiū cháu khì bih, Lāu-lâng iā khí-lâi khiā.

9首領就停止伊ê話，用手掩in ê嘴。Siú-léng chiū thêng-chí i ê ōe, Ēng chhiú ng in ê chhùi.

10貴族無開聲，舌頭連tī上kiuⁿ。Kùi-cho̍k bô khui siaⁿ, Chi̍h-thâu liâm tī chiūⁿ-kiuⁿ.

11因為耳孔聽見ê，就稱我做有福氣，目睭看見ê，就kā我做干證。In-ūi hī-khang thiaⁿ-kìⁿ-ê, chiū chheng góa chòe ū hok-khì, Ba̍k-chiu khòaⁿ-kìⁿ-ê, chiū kā góa chòe kan-chèng.

12因為我拯救哀求ê艱苦人，kap無父ê kiáⁿ，無人幫贊ê。In-ūi góa chín-kiù ai-kiû ê kan-khó͘ lâng, Kap bô-pē ê kiáⁿ, bô lâng pang-chān ê.

13得beh死無ê人kā我祝福，我也hō͘寡婦ê心歡喜來唱歌。Tit-beh sí-bô ê lâng kā góa chiok-hok, Góa iā hō͘ kóaⁿ-hū ê sim hoaⁿ-hí lâi chhiùⁿ-koa.

14我穿公義，伊也用我做衫，用公平做袍，做帽。Góa chhēng kong-gī, i iā ēng góa chòe saⁿ, Ēng kong-pêng chòe phàu, chòe bō.

15我做chhiⁿ-mî人ê目睭，做跛腳ê人ê腳。Góa chòe chhiⁿ-mî lâng ê ba̍k-chiu, Chòe pái-kha ê lâng ê kha.

16我做sòng-hiong人ê父，平素m̄-bat-ê ê案件我查察伊。Góa chòe sòng-hiong lâng ê pē, Pêng-sò͘ m̄-bat--ê ê àn-kiāⁿ góa cha-chhat i.

17我phah折pháiⁿ人ê牙槽，搶伊ê嘴齒所咬ê。Góa phah-chi̍h pháiⁿ-lâng ê gê-chô, Chhiúⁿ i ê chhùi-khí só͘ kā ê.

18我就講，我beh死tī我ê siū，我ê日子beh加添親像沙。Góa chiū kóng, Góa beh sí tī góa ê siū, Góa ê ji̍t-chí beh ke-thiⁿ chhin-chhiūⁿ soa.

19我ê根伸到水邊，露水kui暝落tī我ê枝。Góa ê kun chhun kàu chúi-piⁿ, Lō͘-chúi kui-mî lo̍h tī góa ê ki.

20我ê榮光tī我常常新，我ê弓tī我ê手koh再ân。Góa ê êng-kng tī góa siông-siông sin, Góa ê keng tī góa ê chhiú koh-chài ân.

21人聽見我，就thèng候，靜靜等我指教。Lâng thiaⁿ-kìⁿ góa, chiū thèng-hāu, Chēng-chēng tán góa chí-kàu.

22我講了，in就無koh講；我ê話親像雨滴tī in ê頂面。Góa kóng-liáu, in chiū bô koh kóng; Góa ê ōe chhin-chhiūⁿ hō͘ tih tī in ê téng-bīn.

23In thèng候我親像thèng候雨水，大開in ê嘴，親像欣慕春天ê雨。In thèng-hāu góa chhin-chhiūⁿ thèng-hāu hō͘-chúi, Tōa khui in ê chhùi, chhin-chhiūⁿ him-bō͘ chhun-thiⁿ ê hō͘.

24In失望，我安慰in；in bōe能改變我ê面ê光。In sit-bāng, góa an-ùi in; In bōe-ōe kóe-piàn góa ê bīn ê kng.

25我kā in揀路，我坐頭位；我親像王tī軍隊中khiā起，koh親像安慰傷心ê人。Góa kā in kéng lō͘, góa chē thâu-ūi; Góa chhin-chhiūⁿ ông tī kun-tūi-tiong khiā-khí, Koh chhin-chhiūⁿ an-ùi siong-sim ê lâng.

1總是現今比我khah少年ê人恥笑我，hit號人ê老父，我本看in，bōe khah輸我羊群ê狗。Chóng-sī hiān-kim pí góa khah siàu-liân ê lâng thí-chhiò góa, Hit-hō lâng ê lāu-pē, góa pún khòaⁿ in, bōe khah-su góa iûⁿ-kûn ê káu.

2In ê壯年已經衰退，in ê手ê力kap我甚麼干涉？In ê chòng-liân í-keng soe-thè, In ê chhiú ê la̍t kap góa sím-mi̍h kan-sia̍p?

3In因為欠缺kap iau餓，身體消瘦，tī荒廢冷靜ê烏暗中khòe乾土。In in-ūi khiàm-kheh kap iau-gō, sin-thé siau-sán, Tī hong-hòe léng-chēng ê o͘-àm-tiong khòe ta-thô͘.

4Tī草苞中間挽lê-hok ê菜，金雀花ê根做in ê食物。Tī chháu-phō tiong-kan bán lê-hok ê chhài, Kim-chhiok-hoe ê kun chòe in ê chia̍h-mi̍h.

5In tùi人ê中間受趕出；人hoah in親像hoah賊。In tùi lâng ê tiong-kan siū kóaⁿ-chhut; Lâng hoah in chhin-chhiūⁿ hoah chha̍t.

6In續tio̍h tiàm tī山谷ê深坑，tī地穴kap石洞ê內面。In sòa tio̍h tiàm tī soaⁿ-kok ê chhim-khiⁿ, Tī tōe-hia̍t kap chio̍h-tōng ê lāi-bīn.

7Tī樹林內親像驢哮；tī刺phè腳teh伸勻(chhun-ûn)。Tī chhiū-nâ-lāi chhin-chhiūⁿ lû háu; Tī chhì-phè-kha teh chhun-ûn.

8In是戇人ê kiáⁿ兒，是下賤人ê kiáⁿ兒；受鞭phah趕出境外。In sī gōng-lâng ê kiáⁿ-jî, sī hā-chiān lâng ê kiáⁿ-jî; Siū piⁿ-phah kóaⁿ-chhut kéng-gōa.

9Taⁿ chiah-ê人掠我做in ê歌曲，做in ê話柄。Taⁿ chiah ê lâng lia̍h góa chòe in ê koa-khek, Chòe in ê ōe-pìⁿ.

10In厭惡我，離開我遠遠；見tio̍h我ê面就phùi-nōa。In iàm-ò͘ⁿ góa, lī-khui góa hn̄g-hn̄g; Kìⁿ-tio̍h góa ê bīn chiū phùi-nōa.

11因為伊放lēng伊ê索，來苦楚我，in就tī我ê面前無家己約束。In-ūi I pàng-lēng I ê soh, lâi khó͘-chhó͘ góa, In chiū tī góa ê bīn-chêng bô ka-kī iok-sok.

12卑賤ê種類tī我ê chiàⁿ-pêng起來，sak開我ê腳，造陷害ê路來攻擊我。Pi-chiān ê chéng-lūi tī góa ê chiàⁿ-pêng khí-lâi, Sak-khui góa ê kha, chō hām-hāi ê lō͘ lâi kong-kek góa.

13In毀壞我ê路，加添我ê患難，就是無得tio̍h幫贊ê人。In húi-hoāi góa ê lō͘, Ke-thiⁿ góa ê hoān-lān, Chiū-sī bô tit-tio̍h pang-chān ê lâng.

14In親像tùi闊大ê破隙來，tī毀壞ê中間直直kō來。In chhin-chhiūⁿ tùi khoah-tōa ê phòa-khiah lâi, Tī húi-hoāi ê tiong-kan ti̍t-ti̍t kō--lâi.

15驚惶ê事oa̍t-tńg到tī我，in趕逐我ê榮光親像風；我ê 福祿親像雲過去。Kiaⁿ-hiâⁿ ê sū oa̍t-tńg kàu tī góa, In kóaⁿ-tio̍k góa ê êng-kng chhin-chhiūⁿ hong; Góa ê hok-lo̍k chhin-chhiūⁿ hûn kè--khì.

16Taⁿ我ê心神tī我ê內面極失志；患難ê日kā我擒tiâu-tiâu。Taⁿ góa ê sim-sîn tī góa ê lāi-bīn ke̍k sit-chì; Hoān-lān ê ji̍t kā góa khîⁿ-tiâu-tiâu.

17暝時我ê骨受刺鑿lut節；痛疼khòe我無soah。Mî--sî góa ê kut siū chhì-chha̍k lut-chat; Thàng-thiàⁿ khòe góa bô soah.

18因為chit-ê大ê力，我ê衣服m̄成樣；親像三個頷頸領kā我束ân-ân。In-ūi chit-ê tōa ê la̍t, góa ê i-ho̍k m̄-chiâⁿ-iūⁿ; Chhin-chhiūⁿ saⁿ ê ām-kún-niá kā góa sok ân-ân.

19伊hiat我tī土糜；我就親像土粉kap火灰。I hiat góa tī thô͘-bê; Góa chiū chhin-chhiūⁿ thô͘-hún kap hé-hu.

20我求叫你，你m̄應我；我khiā起來，你kan-ta teh看。Góa kiû-kiò Lí, Lí m̄ ìn góa; Góa khiā--khí-lâi, Lí kan-ta teh khòaⁿ.

21你變殘忍來款待我，koh用你ê手ê大力窘迫我。Lí piàn chân-jím lâi khoán-thāi góa, Koh ēng Lí ê chhiú ê tōa-la̍t khún-pek góa.

22舉起我tī風ê頂面，hō͘我騎伊；koh消滅我tī真透ê風。Kú-khí góa tī hong ê téng-bīn, hō͘ góa khiâ i; Koh siau-bia̍t góa tī chin-thàu ê hong.

23因為我知你beh hō͘我到死無，到hit間為tio̍h lóng總有活命ê所定tio̍h ê厝。In-ūi góa chai Lí beh hō͘ góa kàu sí-bô, Kàu hit-keng ūi-tio̍h lóng-chóng ū oa̍h-miā--ê só͘ tiāⁿ-tio̍h ê chhù.

24人跋倒ê時，kiám無伸手？Tú-tio̍h災厄，kiám無因為án-ni hoah救？Lâng poa̍h-tó ê sî, kiám bô chhun-chhiú? Tú-tio̍h chai-ē kiám bô in-ūi án-ni hoah kiù?

25人tú-tio̍h患難，我kiám無為tio̍h伊啼哭？人sòng-hiong，我ê心kiám無為tio̍h伊憂悶？Lâng tú-tio̍h hoān-lān, góa kiám bô ūi-tio̍h i thî-khàu? Lâng sòng-hiong, góa ê sim kiám bô ūi-tio̍h i iu-būn?

26我ǹg望得tio̍h福氣，災厄就到；我thèng候光明，烏暗就來。Góa ǹg-bāng tit-tio̍h hok-khì, chai-ē chiū kàu; Góa thèng-hāu kng-bêng, o͘-àm chiū lâi.

27我ê心腸滾絞無歇；苦難ê日臨到我。Góa ê sim-tn̂g kún-ká bô-hioh; Khó͘-lān ê ji̍t lîm-kàu góa.

28我無日光就啼哭行去，我khiā tī會中，teh喉叫求幫贊。Góa bô ji̍t-kng chiū thî-khàu kiâⁿ-khì, Góa khiā tī hōe-tiong, teh âu-kiò kiû pang-chān.

29我kap山狗做兄弟，kap鴕鳥做同伴。Góa kap soaⁿ-káu chòe hiaⁿ-tī, Kap tô-chiáu chòe tâng-phōaⁿ.

30我ê皮膚烏，就liù落去，我ê骨頭因為熱受燒。Góa ê phê-hu o͘, chiū liù--lo̍h-khì, Góa ê kut-thâu in-ūi jia̍t siū sio.

31所以我ê琴變做悲哀ê音，我ê簫變做啼哭ê ê聲。Só͘-í góa ê khîm pìⁿ-chòe pi-ai ê im, Góa ê siau pìⁿ-chòe thî-khàu--ê ê siaⁿ.