1約伯koh續接提起伊ê言論，講，Iok-pek koh sòa-chiap thê-khí i ê giân-lūn, kóng,

2願我親像從前hiah-ê月，親像上帝保守我ê日。Goān góa chhin-chhiūⁿ chiông-chêng hiah ê ge̍h, Chhin-chhiūⁿ Siōng-tè pó-siú góa ê ji̍t.

3Hit時伊ê燈照tī我ê頭殼，我靠伊ê光行過烏暗。Hit-sî I ê teng chiò tī góa ê thâu-khak, Góa khò I ê kng kiâⁿ-kè o͘-àm.

4親像我tī秋天ê日，tī我ê布棚上帝kap我親密。Chhin-chhiūⁿ góa tī chhiu-thiⁿ ê ji̍t, Tī góa ê pò͘-pîⁿ Siōng-tè kap góa chhin-bi̍t.

5全能ê iáu-kú kap我tī-teh，我ê kiáⁿ兒tī我ê四圍。Choân-lêng--ê iáu-kú kap góa tī-teh, Góa ê kiáⁿ-jî tī góa ê sì-ûi.

6用妳洗我ê腳，石磐kā我出油成溪。Ēng ni sóe góa ê kha, Chio̍h-pôaⁿ kā góa chhut-iû chiâⁿ-khoe.

7我行到城門，tī街市設我ê座位。Góa kiâⁿ kàu siâⁿ-mn̂g, Tī koe-chhī siat góa ê chō-ūi.

8少年人看見我就走去bih，老人也起來khiā。Siàu-liân lâng khòaⁿ-kìⁿ góa chiū cháu khì bih, Lāu-lâng iā khí-lâi khiā.

9首領就停止伊ê話，用手掩in ê嘴。Siú-léng chiū thêng-chí i ê ōe, Ēng chhiú ng in ê chhùi.

10貴族無開聲，舌頭連tī上kiuⁿ。Kùi-cho̍k bô khui siaⁿ, Chi̍h-thâu liâm tī chiūⁿ-kiuⁿ.

11因為耳孔聽見ê，就稱我做有福氣，目睭看見ê，就kā我做干證。In-ūi hī-khang thiaⁿ-kìⁿ-ê, chiū chheng góa chòe ū hok-khì, Ba̍k-chiu khòaⁿ-kìⁿ-ê, chiū kā góa chòe kan-chèng.

12因為我拯救哀求ê艱苦人，kap無父ê kiáⁿ，無人幫贊ê。In-ūi góa chín-kiù ai-kiû ê kan-khó͘ lâng, Kap bô-pē ê kiáⁿ, bô lâng pang-chān ê.

13得beh死無ê人kā我祝福，我也hō͘寡婦ê心歡喜來唱歌。Tit-beh sí-bô ê lâng kā góa chiok-hok, Góa iā hō͘ kóaⁿ-hū ê sim hoaⁿ-hí lâi chhiùⁿ-koa.

14我穿公義，伊也用我做衫，用公平做袍，做帽。Góa chhēng kong-gī, i iā ēng góa chòe saⁿ, Ēng kong-pêng chòe phàu, chòe bō.

15我做chhiⁿ-mî人ê目睭，做跛腳ê人ê腳。Góa chòe chhiⁿ-mî lâng ê ba̍k-chiu, Chòe pái-kha ê lâng ê kha.

16我做sòng-hiong人ê父，平素m̄-bat-ê ê案件我查察伊。Góa chòe sòng-hiong lâng ê pē, Pêng-sò͘ m̄-bat--ê ê àn-kiāⁿ góa cha-chhat i.

17我phah折pháiⁿ人ê牙槽，搶伊ê嘴齒所咬ê。Góa phah-chi̍h pháiⁿ-lâng ê gê-chô, Chhiúⁿ i ê chhùi-khí só͘ kā ê.

18我就講，我beh死tī我ê siū，我ê日子beh加添親像沙。Góa chiū kóng, Góa beh sí tī góa ê siū, Góa ê ji̍t-chí beh ke-thiⁿ chhin-chhiūⁿ soa.

19我ê根伸到水邊，露水kui暝落tī我ê枝。Góa ê kun chhun kàu chúi-piⁿ, Lō͘-chúi kui-mî lo̍h tī góa ê ki.

20我ê榮光tī我常常新，我ê弓tī我ê手koh再ân。Góa ê êng-kng tī góa siông-siông sin, Góa ê keng tī góa ê chhiú koh-chài ân.

21人聽見我，就thèng候，靜靜等我指教。Lâng thiaⁿ-kìⁿ góa, chiū thèng-hāu, Chēng-chēng tán góa chí-kàu.

22我講了，in就無koh講；我ê話親像雨滴tī in ê頂面。Góa kóng-liáu, in chiū bô koh kóng; Góa ê ōe chhin-chhiūⁿ hō͘ tih tī in ê téng-bīn.

23In thèng候我親像thèng候雨水，大開in ê嘴，親像欣慕春天ê雨。In thèng-hāu góa chhin-chhiūⁿ thèng-hāu hō͘-chúi, Tōa khui in ê chhùi, chhin-chhiūⁿ him-bō͘ chhun-thiⁿ ê hō͘.

24In失望，我安慰in；in bōe能改變我ê面ê光。In sit-bāng, góa an-ùi in; In bōe-ōe kóe-piàn góa ê bīn ê kng.

25我kā in揀路，我坐頭位；我親像王tī軍隊中khiā起，koh親像安慰傷心ê人。Góa kā in kéng lō͘, góa chē thâu-ūi; Góa chhin-chhiūⁿ ông tī kun-tūi-tiong khiā-khí, Koh chhin-chhiūⁿ an-ùi siong-sim ê lâng.

1總是現今比我khah少年ê人恥笑我，hit號人ê老父，我本看in，bōe khah輸我羊群ê狗。Chóng-sī hiān-kim pí góa khah siàu-liân ê lâng thí-chhiò góa, Hit-hō lâng ê lāu-pē, góa pún khòaⁿ in, bōe khah-su góa iûⁿ-kûn ê káu.

2In ê壯年已經衰退，in ê手ê力kap我甚麼干涉？In ê chòng-liân í-keng soe-thè, In ê chhiú ê la̍t kap góa sím-mi̍h kan-sia̍p?

3In因為欠缺kap iau餓，身體消瘦，tī荒廢冷靜ê烏暗中khòe乾土。In in-ūi khiàm-kheh kap iau-gō, sin-thé siau-sán, Tī hong-hòe léng-chēng ê o͘-àm-tiong khòe ta-thô͘.

4Tī草苞中間挽lê-hok ê菜，金雀花ê根做in ê食物。Tī chháu-phō tiong-kan bán lê-hok ê chhài, Kim-chhiok-hoe ê kun chòe in ê chia̍h-mi̍h.

5In tùi人ê中間受趕出；人hoah in親像hoah賊。In tùi lâng ê tiong-kan siū kóaⁿ-chhut; Lâng hoah in chhin-chhiūⁿ hoah chha̍t.

6In續tio̍h tiàm tī山谷ê深坑，tī地穴kap石洞ê內面。In sòa tio̍h tiàm tī soaⁿ-kok ê chhim-khiⁿ, Tī tōe-hia̍t kap chio̍h-tōng ê lāi-bīn.

7Tī樹林內親像驢哮；tī刺phè腳teh伸勻(chhun-ûn)。Tī chhiū-nâ-lāi chhin-chhiūⁿ lû háu; Tī chhì-phè-kha teh chhun-ûn.

8In是戇人ê kiáⁿ兒，是下賤人ê kiáⁿ兒；受鞭phah趕出境外。In sī gōng-lâng ê kiáⁿ-jî, sī hā-chiān lâng ê kiáⁿ-jî; Siū piⁿ-phah kóaⁿ-chhut kéng-gōa.

9Taⁿ chiah-ê人掠我做in ê歌曲，做in ê話柄。Taⁿ chiah ê lâng lia̍h góa chòe in ê koa-khek, Chòe in ê ōe-pìⁿ.

10In厭惡我，離開我遠遠；見tio̍h我ê面就phùi-nōa。In iàm-ò͘ⁿ góa, lī-khui góa hn̄g-hn̄g; Kìⁿ-tio̍h góa ê bīn chiū phùi-nōa.

11因為伊放lēng伊ê索，來苦楚我，in就tī我ê面前無家己約束。In-ūi I pàng-lēng I ê soh, lâi khó͘-chhó͘ góa, In chiū tī góa ê bīn-chêng bô ka-kī iok-sok.

12卑賤ê種類tī我ê chiàⁿ-pêng起來，sak開我ê腳，造陷害ê路來攻擊我。Pi-chiān ê chéng-lūi tī góa ê chiàⁿ-pêng khí-lâi, Sak-khui góa ê kha, chō hām-hāi ê lō͘ lâi kong-kek góa.

13In毀壞我ê路，加添我ê患難，就是無得tio̍h幫贊ê人。In húi-hoāi góa ê lō͘, Ke-thiⁿ góa ê hoān-lān, Chiū-sī bô tit-tio̍h pang-chān ê lâng.

14In親像tùi闊大ê破隙來，tī毀壞ê中間直直kō來。In chhin-chhiūⁿ tùi khoah-tōa ê phòa-khiah lâi, Tī húi-hoāi ê tiong-kan ti̍t-ti̍t kō--lâi.

15驚惶ê事oa̍t-tńg到tī我，in趕逐我ê榮光親像風；我ê 福祿親像雲過去。Kiaⁿ-hiâⁿ ê sū oa̍t-tńg kàu tī góa, In kóaⁿ-tio̍k góa ê êng-kng chhin-chhiūⁿ hong; Góa ê hok-lo̍k chhin-chhiūⁿ hûn kè--khì.

16Taⁿ我ê心神tī我ê內面極失志；患難ê日kā我擒tiâu-tiâu。Taⁿ góa ê sim-sîn tī góa ê lāi-bīn ke̍k sit-chì; Hoān-lān ê ji̍t kā góa khîⁿ-tiâu-tiâu.

17暝時我ê骨受刺鑿lut節；痛疼khòe我無soah。Mî--sî góa ê kut siū chhì-chha̍k lut-chat; Thàng-thiàⁿ khòe góa bô soah.

18因為chit-ê大ê力，我ê衣服m̄成樣；親像三個頷頸領kā我束ân-ân。In-ūi chit-ê tōa ê la̍t, góa ê i-ho̍k m̄-chiâⁿ-iūⁿ; Chhin-chhiūⁿ saⁿ ê ām-kún-niá kā góa sok ân-ân.

19伊hiat我tī土糜；我就親像土粉kap火灰。I hiat góa tī thô͘-bê; Góa chiū chhin-chhiūⁿ thô͘-hún kap hé-hu.

20我求叫你，你m̄應我；我khiā起來，你kan-ta teh看。Góa kiû-kiò Lí, Lí m̄ ìn góa; Góa khiā--khí-lâi, Lí kan-ta teh khòaⁿ.

21你變殘忍來款待我，koh用你ê手ê大力窘迫我。Lí piàn chân-jím lâi khoán-thāi góa, Koh ēng Lí ê chhiú ê tōa-la̍t khún-pek góa.

22舉起我tī風ê頂面，hō͘我騎伊；koh消滅我tī真透ê風。Kú-khí góa tī hong ê téng-bīn, hō͘ góa khiâ i; Koh siau-bia̍t góa tī chin-thàu ê hong.

23因為我知你beh hō͘我到死無，到hit間為tio̍h lóng總有活命ê所定tio̍h ê厝。In-ūi góa chai Lí beh hō͘ góa kàu sí-bô, Kàu hit-keng ūi-tio̍h lóng-chóng ū oa̍h-miā--ê só͘ tiāⁿ-tio̍h ê chhù.

24人跋倒ê時，kiám無伸手？Tú-tio̍h災厄，kiám無因為án-ni hoah救？Lâng poa̍h-tó ê sî, kiám bô chhun-chhiú? Tú-tio̍h chai-ē kiám bô in-ūi án-ni hoah kiù?

25人tú-tio̍h患難，我kiám無為tio̍h伊啼哭？人sòng-hiong，我ê心kiám無為tio̍h伊憂悶？Lâng tú-tio̍h hoān-lān, góa kiám bô ūi-tio̍h i thî-khàu? Lâng sòng-hiong, góa ê sim kiám bô ūi-tio̍h i iu-būn?

26我ǹg望得tio̍h福氣，災厄就到；我thèng候光明，烏暗就來。Góa ǹg-bāng tit-tio̍h hok-khì, chai-ē chiū kàu; Góa thèng-hāu kng-bêng, o͘-àm chiū lâi.

27我ê心腸滾絞無歇；苦難ê日臨到我。Góa ê sim-tn̂g kún-ká bô-hioh; Khó͘-lān ê ji̍t lîm-kàu góa.

28我無日光就啼哭行去，我khiā tī會中，teh喉叫求幫贊。Góa bô ji̍t-kng chiū thî-khàu kiâⁿ-khì, Góa khiā tī hōe-tiong, teh âu-kiò kiû pang-chān.

29我kap山狗做兄弟，kap鴕鳥做同伴。Góa kap soaⁿ-káu chòe hiaⁿ-tī, Kap tô-chiáu chòe tâng-phōaⁿ.

30我ê皮膚烏，就liù落去，我ê骨頭因為熱受燒。Góa ê phê-hu o͘, chiū liù--lo̍h-khì, Góa ê kut-thâu in-ūi jia̍t siū sio.

31所以我ê琴變做悲哀ê音，我ê簫變做啼哭ê ê聲。Só͘-í góa ê khîm pìⁿ-chòe pi-ai ê im, Góa ê siau pìⁿ-chòe thî-khàu--ê ê siaⁿ.

1我kap我ê目睭立約，thái-thó會注意看在室女ah？Góa kap góa ê ba̍k-chiu li̍p-iok, Thái-thó ōe chù-ì khòaⁿ chāi-sek-lú ah?

2因為上帝tùi頂面所定tio̍h ê份額，全能ê tùi頂面所派ê基業是甚麼ah？In-ūi Siōng-tè tùi téng-bīn só͘ tiāⁿ-tio̍h ê hūn-gia̍h, Choân-lêng--ê tùi téng-bīn só͘ phài ê ki-gia̍p sī sím-mi̍h ah?

3Kiám m̄是患難臨到不義ê，災害臨到作孽ê mah？Kiám m̄-sī hoān-lān lîm-kàu put-gī--ê, Chai-hāi lîm-kàu chok-gia̍t--ê mah?

4伊kiám m̄是鑑察我ê路。點算我ê腳步mah？I kiám m̄-sī kàm-chhat góa ê lō͘. Tiám-sǹg góa ê kha-pō͘ mah?

5我若kap虛假相kap行，腳若趕緊tè詭詐；Góa nā kap hu-ké saⁿ-kap kiâⁿ, Kha nā kóaⁿ-kín tè khúi-chà;

6(願我hō͘公道ê 天秤來秤，hō͘上帝知我ê純全；)(Goān góa hō͘ kong-tō ê thian-phêng lâi chhìn, Hō͘ Siōng-tè chai góa ê sûn-choân;)

7我ê腳步若偏離正路，我ê心若跟tè我ê目睭，若有lâ-sâm黏tī我ê手；Góa ê kha-pō͘ nā phian-lī chiàⁿ-lō͘, Góa ê sim nā kun-tè góa ê ba̍k-chiu, Nā ū lâ-sâm liâm tī góa ê chhiú;

8就願我所種ê，別人食伊，我所出產ê，伊ê根受拔出。Chiū goān góa só͘ chèng-ê, pa̍t-lâng chia̍h i, Góa só͘ chhut-sán--ê, i ê kun siū pu̍ih-chhut.

9我ê心若hō͘婦女引誘去，á是我bih tī厝邊ê門teh等；Góa ê sim nā hō͘ hū-lú ín-iú khì, Á-sī góa bih tī chhù-piⁿ ê mn̂g teh tán;

10就願我ê婦人人kā人挨磨，別人也kap伊同房；Chiū goān góa ê hū-jîn-lâng kā lâng oe-bō, Pa̍t-lâng iā kap i tâng-pâng;

11因為這是大pháiⁿ。是審判司應該辦ê罪；In-ūi che sī tōa-pháiⁿ. Sī sím-phòaⁿ-si eng-kai pān ê chōe;

12這是火，燒到滅無，拔除我一切所出產ê ê根。Che sī hé, sio kàu bia̍t-bô, Pu̍ih-tû góa it-chhè só͘ chhut-sán--ê ê kun.

13我ê奴僕女婢kap我辯論ê時，我若藐視in ê理由；Góa ê lô͘-po̍k lú-pī kap góa piān-lūn ê sî, Góa nā biáu-sī in ê lí-iû;

14就上帝起來，我beh怎樣ah？伊審問，我beh怎樣應ah？Chiū Siōng-tè khí-lâi, góa beh cháiⁿ-iūⁿ ah? I sím-mn̄g, góa beh cháiⁿ-iūⁿ ìn ah?

15造我tī胎裡ê，kiám m̄是也造伊mah？造成阮tī腹肚ê，kiám m̄是一個mah？Chō góa tī the--ni̍h-ê, kiám-m̄-sī iā chō i mah? Chō-chiâⁿ goán tī pak-tó͘--ê, kiám m̄-sī chi̍t-ê mah?

16我若禁止sòng-hiong人ê意願，á是hō͘寡婦ê目睭看到煙暈；Góa nā kìm-chí sòng-hiong lâng ê ì-goān, Á-sī hō͘ kóaⁿ-hū ê ba̍k-chiu khòaⁿ kàu ian-n̄g;

17Á是我家己食淡薄物，無父ê kiáⁿ食無份ah？Á-sī góa ka-kī chia̍h tām-po̍h mi̍h, Bô-pē ê kiáⁿ chia̍h bô hūn ah?

18(Tùi我少年，伊kap我相kap大漢，親像kap老父一樣；我tùi出老母ê腹肚就牽成寡婦；)(Tùi góa siàu-liân i kap góa saⁿ-kap tōa-hàn, chhin-chhiūⁿ kap lāu-pē chi̍t-iūⁿ; Góa tùi chhut lāu-bú ê pak-tó͘ chiū khan-sêng kóaⁿ-hū;)

19我若看見人因為無衫來死，á是看見sòng-hiong人身軀無thang jia-kah；Góa nā khòaⁿ-kìⁿ lâng in-ūi bô saⁿ lâi sí, Á-sī khòaⁿ-kìⁿ sòng-hiong lâng seng-khu bô thang jia-kah;

20伊ê腰若無kā我祝福，伊也無對我ê羊ê毛家己燒，I ê io nā bô kā góa chiok-hok, I iā bô tùi góa ê iûⁿ ê mn̂g ka-kī sio,

21我若因為看見tī城門有幫贊我ê，就起手攻擊無父ê kiáⁿ；Góa nā in-ūi khòaⁿ-kìⁿ tī siâⁿ-mn̂g ū pang-chān góa ê, Chiū khí-chhiú kong-kek bô-pē ê kiáⁿ;

22願我ê手tùi肩胛lut落去，我ê手節tùi骨折去；Goān góa ê chhiú tùi keng-kah lut--lo̍h-khì, Góa ê chhiú-chat tùi kut chi̍h--khì;

23因為tùi上帝來ê災厄hō͘我驚惶；因為伊ê威嚴，我當bōe起。In-ūi tùi Siōng-tè lâi ê chai-ē hō͘ góa kiaⁿ-hiâⁿ; In-ūi I ê ui-giâm, góa tng bōe khí.

24我若用黃金做ǹg望，對好金講，你是我所óa靠ê；Góa nā ēng n̂g-kim chòe ǹg-bāng, Tùi hó-kim kóng, Lí sī góa só͘ óa-khò ê;

25我若因為財物豐盛，因為我ê手thàn chōe-chōe來歡喜；Góa nā in-ūi châi-bu̍t hong-sēng, In-ūi Góa ê chhiú thàn chōe-chōe lâi hoaⁿ-hí;

26我若看見日teh發光，月光光teh行；Góa nā khòaⁿ-kìⁿ ji̍t teh hoat-kng, Ge̍h kng-kng teh kiâⁿ;

27我ê心tī暗中受引誘，á是我ê嘴kap我ê手相chim；Góa ê sim tī àm-tiong siū ín-iú, Á-sī góa ê chhùi kap góa ê chhiú saⁿ-chim;

28這也是審判司應該辦ê罪，因為我án-ni是悖謬tī頂面ê上帝。Che iā sī sím-phòaⁿ-si eng-kai pān ê chōe, In-ūi góa án-ni sī pōe-biū tī téng-bīn ê Siōng-tè.

29我若掠怨恨我ê ê災厄做快樂，á是為tio̍h伊tú-tio̍h災厄來得意；Góa nā lia̍h oàn-hūn góa--ê ê chai-ē chòe khoài-lo̍k, Á-sī ūi-tio̍h i tú-tio̍h chai-ē lâi tek-ì;

30(其實我無容允我ê嘴犯罪，咒詛求hō͘ in死；)(Kî-si̍t góa bô iông-ún góa ê chhùi hoān-chōe, Chiù-chó͘ kiû hō͘ in sí;)

31若我布棚內ê人無講，是誰能chhē-tio̍h一個無食伊ê好物到飽ê？Nā góa pò͘-pîⁿ-lāi ê lâng bô kóng, Chī-chūi ōe chhē-tio̍h chi̍t-ê bô chia̍h i ê hó-mi̍h kàu pá--ê?

32(出外人無歇tī街路，我kā行路ê人開門；)(Chhut-gōa-lâng bô hioh tī ke-lō͘, Góa kā kiâⁿ-lō͘ ê lâng khui mn̂g;)

33我若親像亞當遮掩我ê過失，khǹg我ê罪孽tī我ê胸前；Góa nā chhin-chhiūⁿ A-tong jia-iám góa ê kè-si̍t, Khǹg góa ê chōe-gia̍t tī góa ê heng-chêng;

34為tio̍h驚大隊ê眾人，驚宗族ê藐視，致到靜靜m̄敢出門-Ūi-tio̍h kiaⁿ tōa-tūi ê chèng-lâng, Kiaⁿ chong-cho̍k ê biáu-sī, Tì-kàu chēng-chēng m̄-káⁿ chhut-mn̂g--

35願有一個teh聽我！(看ah，有我所畫ê號，願全能ê應我；) 願得tio̍h我ê對敵所寫ê告狀！Goān ū chi̍t-ê teh thiaⁿ góa! (Khòaⁿ ah, ū góa só͘ ūi ê hō, goān Choân-lêng--ê ìn góa;) Goān tit-tio̍h góa ê tùi-te̍k só͘ siá ê kò-chn̄g!

36我的確beh背伊tī我ê肩頭，戴伊做冕旒。Góa tek-khak beh pē i tī góa ê keng-thâu, Tì i chòe bián-liû.

37我beh對伊講明我腳步ê數額，beh親像人君就近伊。Góa beh tùi I kóng-bêng góa kha-pō͘ ê siàu-gia̍h, Beh chhin-chhiūⁿ jîn-kun chiū-kūn I.

38我ê田園若出聲告我，犁溝相kap啼哭；Góa ê chhân-hn̂g nā chhut-siaⁿ kò góa, Lôe-kau saⁿ-kap thî-khàu;

39我若食伊ê出產，無hō͘伊價錢，á是hō͘業主失落伊ê性命；Góa nā chia̍h i ê chhut-sán, bô hō͘ i kè-chîⁿ, Á-sī hō͘ gia̍p-chú sit-lo̍h i ê sìⁿ-miā;

40就願刺á發生替小麥，pháiⁿ草發生來替大麥。約伯ê話明白lah。Chiū goān chhì-á hoat-siⁿ thòe sió-be̍h, Pháiⁿ-chháu hoat-siⁿ lâi thòe tōa-be̍h. Iok-pek ê ōe bêng-pe̍k lah.