1我kap我ê目睭立約，thái-thó會注意看在室女ah？Góa kap góa ê ba̍k-chiu li̍p-iok, Thái-thó ōe chù-ì khòaⁿ chāi-sek-lú ah?

2因為上帝tùi頂面所定tio̍h ê份額，全能ê tùi頂面所派ê基業是甚麼ah？In-ūi Siōng-tè tùi téng-bīn só͘ tiāⁿ-tio̍h ê hūn-gia̍h, Choân-lêng--ê tùi téng-bīn só͘ phài ê ki-gia̍p sī sím-mi̍h ah?

3Kiám m̄是患難臨到不義ê，災害臨到作孽ê mah？Kiám m̄-sī hoān-lān lîm-kàu put-gī--ê, Chai-hāi lîm-kàu chok-gia̍t--ê mah?

4伊kiám m̄是鑑察我ê路。點算我ê腳步mah？I kiám m̄-sī kàm-chhat góa ê lō͘. Tiám-sǹg góa ê kha-pō͘ mah?

5我若kap虛假相kap行，腳若趕緊tè詭詐；Góa nā kap hu-ké saⁿ-kap kiâⁿ, Kha nā kóaⁿ-kín tè khúi-chà;

6(願我hō͘公道ê 天秤來秤，hō͘上帝知我ê純全；)(Goān góa hō͘ kong-tō ê thian-phêng lâi chhìn, Hō͘ Siōng-tè chai góa ê sûn-choân;)

7我ê腳步若偏離正路，我ê心若跟tè我ê目睭，若有lâ-sâm黏tī我ê手；Góa ê kha-pō͘ nā phian-lī chiàⁿ-lō͘, Góa ê sim nā kun-tè góa ê ba̍k-chiu, Nā ū lâ-sâm liâm tī góa ê chhiú;

8就願我所種ê，別人食伊，我所出產ê，伊ê根受拔出。Chiū goān góa só͘ chèng-ê, pa̍t-lâng chia̍h i, Góa só͘ chhut-sán--ê, i ê kun siū pu̍ih-chhut.

9我ê心若hō͘婦女引誘去，á是我bih tī厝邊ê門teh等；Góa ê sim nā hō͘ hū-lú ín-iú khì, Á-sī góa bih tī chhù-piⁿ ê mn̂g teh tán;

10就願我ê婦人人kā人挨磨，別人也kap伊同房；Chiū goān góa ê hū-jîn-lâng kā lâng oe-bō, Pa̍t-lâng iā kap i tâng-pâng;

11因為這是大pháiⁿ。是審判司應該辦ê罪；In-ūi che sī tōa-pháiⁿ. Sī sím-phòaⁿ-si eng-kai pān ê chōe;

12這是火，燒到滅無，拔除我一切所出產ê ê根。Che sī hé, sio kàu bia̍t-bô, Pu̍ih-tû góa it-chhè só͘ chhut-sán--ê ê kun.

13我ê奴僕女婢kap我辯論ê時，我若藐視in ê理由；Góa ê lô͘-po̍k lú-pī kap góa piān-lūn ê sî, Góa nā biáu-sī in ê lí-iû;

14就上帝起來，我beh怎樣ah？伊審問，我beh怎樣應ah？Chiū Siōng-tè khí-lâi, góa beh cháiⁿ-iūⁿ ah? I sím-mn̄g, góa beh cháiⁿ-iūⁿ ìn ah?

15造我tī胎裡ê，kiám m̄是也造伊mah？造成阮tī腹肚ê，kiám m̄是一個mah？Chō góa tī the--ni̍h-ê, kiám-m̄-sī iā chō i mah? Chō-chiâⁿ goán tī pak-tó͘--ê, kiám m̄-sī chi̍t-ê mah?

16我若禁止sòng-hiong人ê意願，á是hō͘寡婦ê目睭看到煙暈；Góa nā kìm-chí sòng-hiong lâng ê ì-goān, Á-sī hō͘ kóaⁿ-hū ê ba̍k-chiu khòaⁿ kàu ian-n̄g;

17Á是我家己食淡薄物，無父ê kiáⁿ食無份ah？Á-sī góa ka-kī chia̍h tām-po̍h mi̍h, Bô-pē ê kiáⁿ chia̍h bô hūn ah?

18(Tùi我少年，伊kap我相kap大漢，親像kap老父一樣；我tùi出老母ê腹肚就牽成寡婦；)(Tùi góa siàu-liân i kap góa saⁿ-kap tōa-hàn, chhin-chhiūⁿ kap lāu-pē chi̍t-iūⁿ; Góa tùi chhut lāu-bú ê pak-tó͘ chiū khan-sêng kóaⁿ-hū;)

19我若看見人因為無衫來死，á是看見sòng-hiong人身軀無thang jia-kah；Góa nā khòaⁿ-kìⁿ lâng in-ūi bô saⁿ lâi sí, Á-sī khòaⁿ-kìⁿ sòng-hiong lâng seng-khu bô thang jia-kah;

20伊ê腰若無kā我祝福，伊也無對我ê羊ê毛家己燒，I ê io nā bô kā góa chiok-hok, I iā bô tùi góa ê iûⁿ ê mn̂g ka-kī sio,

21我若因為看見tī城門有幫贊我ê，就起手攻擊無父ê kiáⁿ；Góa nā in-ūi khòaⁿ-kìⁿ tī siâⁿ-mn̂g ū pang-chān góa ê, Chiū khí-chhiú kong-kek bô-pē ê kiáⁿ;

22願我ê手tùi肩胛lut落去，我ê手節tùi骨折去；Goān góa ê chhiú tùi keng-kah lut--lo̍h-khì, Góa ê chhiú-chat tùi kut chi̍h--khì;

23因為tùi上帝來ê災厄hō͘我驚惶；因為伊ê威嚴，我當bōe起。In-ūi tùi Siōng-tè lâi ê chai-ē hō͘ góa kiaⁿ-hiâⁿ; In-ūi I ê ui-giâm, góa tng bōe khí.

24我若用黃金做ǹg望，對好金講，你是我所óa靠ê；Góa nā ēng n̂g-kim chòe ǹg-bāng, Tùi hó-kim kóng, Lí sī góa só͘ óa-khò ê;

25我若因為財物豐盛，因為我ê手thàn chōe-chōe來歡喜；Góa nā in-ūi châi-bu̍t hong-sēng, In-ūi Góa ê chhiú thàn chōe-chōe lâi hoaⁿ-hí;

26我若看見日teh發光，月光光teh行；Góa nā khòaⁿ-kìⁿ ji̍t teh hoat-kng, Ge̍h kng-kng teh kiâⁿ;

27我ê心tī暗中受引誘，á是我ê嘴kap我ê手相chim；Góa ê sim tī àm-tiong siū ín-iú, Á-sī góa ê chhùi kap góa ê chhiú saⁿ-chim;

28這也是審判司應該辦ê罪，因為我án-ni是悖謬tī頂面ê上帝。Che iā sī sím-phòaⁿ-si eng-kai pān ê chōe, In-ūi góa án-ni sī pōe-biū tī téng-bīn ê Siōng-tè.

29我若掠怨恨我ê ê災厄做快樂，á是為tio̍h伊tú-tio̍h災厄來得意；Góa nā lia̍h oàn-hūn góa--ê ê chai-ē chòe khoài-lo̍k, Á-sī ūi-tio̍h i tú-tio̍h chai-ē lâi tek-ì;

30(其實我無容允我ê嘴犯罪，咒詛求hō͘ in死；)(Kî-si̍t góa bô iông-ún góa ê chhùi hoān-chōe, Chiù-chó͘ kiû hō͘ in sí;)

31若我布棚內ê人無講，是誰能chhē-tio̍h一個無食伊ê好物到飽ê？Nā góa pò͘-pîⁿ-lāi ê lâng bô kóng, Chī-chūi ōe chhē-tio̍h chi̍t-ê bô chia̍h i ê hó-mi̍h kàu pá--ê?

32(出外人無歇tī街路，我kā行路ê人開門；)(Chhut-gōa-lâng bô hioh tī ke-lō͘, Góa kā kiâⁿ-lō͘ ê lâng khui mn̂g;)

33我若親像亞當遮掩我ê過失，khǹg我ê罪孽tī我ê胸前；Góa nā chhin-chhiūⁿ A-tong jia-iám góa ê kè-si̍t, Khǹg góa ê chōe-gia̍t tī góa ê heng-chêng;

34為tio̍h驚大隊ê眾人，驚宗族ê藐視，致到靜靜m̄敢出門-Ūi-tio̍h kiaⁿ tōa-tūi ê chèng-lâng, Kiaⁿ chong-cho̍k ê biáu-sī, Tì-kàu chēng-chēng m̄-káⁿ chhut-mn̂g--

35願有一個teh聽我！(看ah，有我所畫ê號，願全能ê應我；) 願得tio̍h我ê對敵所寫ê告狀！Goān ū chi̍t-ê teh thiaⁿ góa! (Khòaⁿ ah, ū góa só͘ ūi ê hō, goān Choân-lêng--ê ìn góa;) Goān tit-tio̍h góa ê tùi-te̍k só͘ siá ê kò-chn̄g!

36我的確beh背伊tī我ê肩頭，戴伊做冕旒。Góa tek-khak beh pē i tī góa ê keng-thâu, Tì i chòe bián-liû.

37我beh對伊講明我腳步ê數額，beh親像人君就近伊。Góa beh tùi I kóng-bêng góa kha-pō͘ ê siàu-gia̍h, Beh chhin-chhiūⁿ jîn-kun chiū-kūn I.

38我ê田園若出聲告我，犁溝相kap啼哭；Góa ê chhân-hn̂g nā chhut-siaⁿ kò góa, Lôe-kau saⁿ-kap thî-khàu;

39我若食伊ê出產，無hō͘伊價錢，á是hō͘業主失落伊ê性命；Góa nā chia̍h i ê chhut-sán, bô hō͘ i kè-chîⁿ, Á-sī hō͘ gia̍p-chú sit-lo̍h i ê sìⁿ-miā;

40就願刺á發生替小麥，pháiⁿ草發生來替大麥。約伯ê話明白lah。Chiū goān chhì-á hoat-siⁿ thòe sió-be̍h, Pháiⁿ-chháu hoat-siⁿ lâi thòe tōa-be̍h. Iok-pek ê ōe bêng-pe̍k lah.

1Tùi án-ni，chit三個人就停soah，無koh應約伯，因為伊家己看做義。Tùi án-ni chí(**chit) saⁿ ê lâng chiū thêng-soah, bô koh ìn Iok-pek, in-ūi i ka-kī khòaⁿ-chòe gī.

2Hit時有Pò͘-se人，屬tī Lân ê族，Pa-la̍h-ka ê kiáⁿ Í-lī-hō͘，真受氣；受氣約伯，因為伊掠家己比上帝khah有義。Hit-sî ū Pò͘-se lâng, sio̍k tī Lân ê cho̍k, Pa-la̍h-ka ê kiáⁿ Í-lī-hō͘, chin siū-khì; siū-khì Iok-pek, in-ūi i lia̍h ka-kī pí Siōng-tè khah ū gī.

3也受氣伊三個朋友，因為in想無話thang應，iáu-kú擬約伯有罪。Iā siū-khì i saⁿ ê pêng-iú, in-ūi in siūⁿ bô ōe thang ìn, iáu-kú gí Iok-pek ū chōe.

4Í-lī-hō͘ beh kap約伯講話，iáu teh thèng候；是因為in比伊khah-chōe歲。Í-lī-hō͘ beh kap Iok-pek kóng-ōe, iáu teh thèng-hāu; sī in-ūi in pí i khah-chōe hè.

5Í-lī-hō͘看見chit三人嘴內無ōe thang應，就大受氣。Í-lī-hō͘ khòaⁿ-kìⁿ chí saⁿ lâng chhùi-lāi bô ōe thang ìn, chiū tōa siū-khì.

6Pò͘-se人Pa-la̍h-ka ê kiáⁿ Í-lī-hō͘應講，我少年，lín年老；所以我退讓，m̄敢對lín排列我ê意見。Pò͘-se lâng Pa-la̍h-ka ê kiáⁿ Í-lī-hō͘ ìn kóng, Góa siàu-liân, lín nî-lāu; Só͘-í góa thè-niū, m̄-káⁿ tùi lín pâi-lia̍t góa ê ì-kiàn.

7我講，日子chōe-ê tio̍h講，歲壽高ê tio̍h用智慧教示人。Góa kóng, Ji̍t-chí chōe-ê tio̍h kóng, Hè-siū koâiⁿ-ê tio̍h ēng tì-hūi kà-sī lâng.

8若是人ê內面有心神，也全能ê ê氣hō͘人聰明。Nā-sī lâng ê lāi-bīn ū sim-sîn, Iā Choân-lêng--ê ê khì hō͘ lâng chhang-miâ.

9Khah序大ê，無lóng有智慧，khah老年ê，無lóng會明白公平。Khah sī-tōa--ê, bô lóng ū tì-hūi, Khah ló-liân--ê, bô lóng ōe bêng-pe̍k kong-pêng.

10所以我講，lín tio̍h聽我；我也beh排列我ê意見。Só͘-í góa kóng, Lín tio̍h thiaⁿ góa; Góa iā beh pâi-lia̍t góa ê ì-kiàn.

11看ah，我已經thèng候lín ê話，koh耳孔聽lín ê理論；thèng候lín chhē-tio̍h thang講ê話。Khòaⁿ ah, góa í-keng thèng-hāu lín ê ōe, Koh hī-khang thiaⁿ lín ê lí-lūn; Thèng-hāu lín chhē-tio̍h thang kóng ê ōe.

12我留心聽lín。看ah，lín中間無一人辯倒約伯，也無一個應伊ê話。Góa liû-sim thiaⁿ lín. Khòaⁿ ah, lín tiong-kan bô chi̍t-lâng piān-tó Iok-pek, Iā bô chi̍t-ê ìn i ê ōe.

13Lín莫得講，阮tú-tio̍h智慧；上帝能贏伊，人bōe能。Lín bo̍h-tit kóng, Goán tú-tio̍h tì-hūi; Siōng-tè ōe iâⁿ i, lâng bōe-ōe.

14伊無用話kap我辯論；我也無beh用lín ê話應伊。I bô ēng ōe kap góa piān-lūn; Góa iā bô beh ēng lín ê ōe ìn i.

15In gāng-gāng無koh應，無話thang講。In gāng-gāng bô koh ìn, Bô ōe thang kóng.

16In無講話，定定khiā-teh無koh應，我kiám tio̍h koh thèng候mah？In bô kóng-ōe, tiāⁿ-tiāⁿ khiā-teh bô koh ìn, Góa kiám tio̍h koh thèng-hāu mah?

17我也beh盡我ê份額來應，排列我ê意見。Góa iā beh chīn góa ê hūn-gia̍h lâi ìn, Pâi-lia̍t góa ê ì-kiàn.

18因為我有話滿滿；我內面ê神激動我。In-ūi góa ū ōe móa-móa; Góa lāi-bīn ê sîn kek-tōng góa.

19看ah，我ê腹內親像封密密ê酒；也親像新ê皮袋teh-beh爆裂。Khòaⁿ ah, góa ê pak-lāi chhin-chhiūⁿ hong-ba̍t-ba̍t ê chiú; Iā chhin-chhiūⁿ sin ê phê-tē teh-beh piak-li̍h.

20我beh講出，hō͘我tháu去；我beh開嘴來應。Góa beh kóng-chhut, hō͘ góa tháu-khì; Góa beh khui-chhùi lâi ìn.

21我無beh看人ê身分；也無beh諂媚人。Góa bô beh khòaⁿ lâng ê sin-hūn; Iā bô beh thiám-mī lâng.

22因為我bōe曉得諂媚人；若有án-ni，就創造我ê beh緊緊除滅我。In-ūi góa bōe hiáu-tit thiám-mī lâng; Nā ū án-ni, chiū chhòng-chō góa--ê beh kín-kín tû-bia̍t góa.

1約伯ah，taⁿ請你聽我ê話，留心聽我一切ê言語。Iok-pek ah, taⁿ chhiáⁿ lí thiaⁿ góa ê ōe, Liû-sim thiaⁿ góa it-chhè ê giân-gú.

2看ah，我taⁿ開我ê嘴，我ê舌tī嘴內teh講。Khòaⁿ ah, góa taⁿ khui góa ê chhùi, Góa ê chi̍h tī chhùi-lāi teh kóng.

3我ê話beh講出我心內ê正直，我ê嘴唇beh老實講出所知ê。Góa ê ōe beh kóng-chhut góa sim-lāi ê chèng-ti̍t, Góa ê chhùi-tûn beh láu-si̍t kóng-chhut só͘ chai ê.

4上帝ê神創造我；全能ê ê氣hō͘我得tio̍h活。Siōng-tè ê Sîn chhòng-chō góa; Choân-lêng--ê ê khì hō͘ góa tit-tio̍h oa̍h.

5你若會，就tio̍h應我，起來khiā排列tī我ê面前。Lí nā ōe, chiū tio̍h ìn góa, Khí-lâi khiā pâi-lia̍t tī góa ê bīn-chêng.

6看ah，我tī上帝ê面前kap你一樣，也是用土ni̍h成ê。Khòaⁿ ah, góa tī Siōng-tè ê bīn-chêng kap lí chi̍t-iūⁿ, Iā sī ēng thô͘ ni̍h-chiâⁿ-ê.

7看ah，我無用威嚴hō͘你驚，也無用我ê勢力teh你。Khòaⁿ ah, góa bô ēng ui-giâm hō͘ lí kiaⁿ, Iā bô ēng góa ê sè-le̍k teh--lí.

8你所講ê，我實在有聽見，也有聽見你ê話ê聲，講，Lí só͘ kóng-ê, góa si̍t-chāi ū thiaⁿ-kìⁿ, Iā ū thiaⁿ-kìⁿ lí ê ōe ê siaⁿ, kóng,

9我是清氣，無過失，我是清白，tī我心內也無罪。Góa sī chheng-khì, bô kè-sit, Góa sī chheng-pe̍k, tī góa sim-lāi iā bô chōe.

10看ah，伊chhē空隙來攻擊我，掠我做伊ê對敵。Khòaⁿ ah, I chhē khàng-khiah lâi kong-kek góa, Lia̍h góa chòe I ê tùi-te̍k.

11伊用腳銬哭我ê腳，致意看我一切ê路。I ēng kha-khàu khàu góa ê kha, Tì-ì khòaⁿ góa it-chhè ê lō͘.

12看ah，講到這，你是不義，我beh應你；因為上帝比人khah大。Khòaⁿ ah, kóng kàu che, lí sī put-gī, góa beh ìn lí; In-ūi Siōng-tè pí lâng khah-tōa.

13你啥事kap伊相爭？因為伊ê事伊lóng無解明。Lí siáⁿ-sū kap I saⁿ-chiⁿ? In-ūi I ê sū I lóng bô kóe-bêng.

14因為上帝講一pái，也兩pái，總是人無致意。In-ūi Siōng-tè kóng chi̍t-pái, Iā nn̄g-pái, chóng-sī lâng bô tì-ì.

15人倒tī眠床睏，到伊睏重眠ê時，tī眠夢中，暝時ê異象，Lâng tó tī bîn-chhn̂g khùn, Kàu i khùn tāng-bîn ê sî, Tī bîn-bāng-tiong, mî--sî ê īⁿ-siōng,

16伊開in ê耳孔，蓋印tī in所受ê教示。I khui in ê hī-khang, Khàm-ìn tī in só͘ siū ê kà-sī.

17Beh hō͘人改換所計畫ê事，遏(at)止人ê驕傲。Beh hō͘ lâng kóe-ōaⁿ só͘ kè-e̍k ê sū, At-chí lâng ê kiau-ngō͘.

18阻止伊ê活命無落深坑，也伊ê性命無tùi刀劍來死。Chó͘-chí i ê oa̍h-miā bô lo̍h chhim-khiⁿ, Iā i ê sìⁿ-miā bô tùi to-kiàm lâi sí.

19人tī眠床裡受痛疼ê警戒；tī伊ê骨內親像交戰無soah。Lâng tī bîn-chhn̂g--nih siū thàng-thiàⁿ ê kéng-kài; Tī i ê kut-lāi chhin-chhiūⁿ kau-chiàn bô soah.

20致到伊ê活命厭賤食物，伊ê心神厭惡好味。Tì-kàu i ê oa̍h-miā iàm-chiān chia̍h-mi̍h, I ê sim-sîn iàm-ò͘ⁿ hó-bī.

21伊ê肉消瘦，無thang看見；平素無看見ê骨，taⁿ lóng thóng出。I ê bah siau-sán, bô thang khòaⁿ-kìⁿ; Pêng-sò͘ bô khòaⁿ-kìⁿ ê kut, taⁿ lóng thóng-chhut.

22伊ê性命近tī深坑；伊ê活命近tī hiah-ê滅無性命ê。I ê sìⁿ-miā kūn tī chhim-khiⁿ; I ê oa̍h-miā kūn tī hiah ê bia̍t-bô sìⁿ-miā ê.

23若有一個使者kap伊tī-teh，就是一千中ê一個，替伊講話ê，將人所tio̍h做ê指示伊；Nā ū chi̍t ê sù-chiá kap i tī-teh, Chiū-sī chi̍t-chheng-tiong ê chi̍t-ê, thòe i kóng-ōe-ê, Chiong lâng só͘ tio̍h-chòe-ê chí-sī i;

24伊就施恩hō͘伊，講，救伊免得落深坑，我已經chhē-tio̍h贖回伊ê。I chiū si-un hō͘ i, kóng, Kiù i bián-tit lo̍h chhim-khiⁿ, Góa í-keng chhē-tio̍h sio̍k-hôe i ê.

25伊ê肉比gín-ná ê肉khah幼軟；伊beh復到少年ê日子。I ê bah pí gín-ná ê bah khah iù-nńg; I beh ho̍k-tò siàu-liân ê ji̍t-chí.

26伊beh祈禱上帝，上帝歡喜伊；見tio̍h伊ê面來歡喜；伊koh算hit人做義。I beh kî-tó Siōng-tè, Siōng-tè hoaⁿ-hí i; Kìⁿ-tio̍h I ê bīn lâi hoaⁿ-hí; I koh sǹg hit-lâng chòe-gī.

27伊tī人ê面前唱歌講，我有犯罪，顛倒是非，無利益我。I tī lâng ê bīn-chêng chhiùⁿ-koa kóng, Góa ū hoān-chōe, tian-tò sī-hui, bô lī-ek góa.

28伊救贖我ê性命，免落深坑；我ê活命也beh看見光。I kiù-sio̍k góa ê sìⁿ-miā, bián-lo̍h chhim-khiⁿ; Góa ê oa̍h-miā iā beh khòaⁿ-kìⁿ kng.

29看ah，chiah-ê一切ê事上帝行tī人，兩pái，三pái。Khòaⁿ ah, chiah ê it-chhè ê sū Siōng-tè kiâⁿ tī lâng, Nn̄g-pái, saⁿ-pái.

30為tio̍h beh tùi深坑救伊ê性命倒tńg，hō͘伊得tio̍h活命ê光照伊。Ūi-tio̍h beh tùi chhim-khiⁿ kiù i ê sìⁿ-miā tò-tńg, Hō͘ i tit-tio̍h oa̍h-miā ê kng chiò i.

31約伯ah，你tio̍h àⁿ耳孔聽我ê話，tio̍h靜靜，我就beh講。Iok-pek ah, lí tio̍h àⁿ hī-khang thiaⁿ góa ê ōe, Tio̍h chēng-chēng, góa chiū beh kóng.

32你若有話thang講，就應我；做你講，因為我ài掠你做義。Lí nā ū ōe thang kóng, chiū ìn góa; Chòe lí kóng, in-ūi góa ài lia̍h lí chòe gī.

33若無，你tio̍h聽我講，你tio̍h靜靜，我beh教你智慧。Nā bô, lí tio̍h thiaⁿ góa kóng, lí tio̍h chēng-chēng, Góa beh kà lí tì-hūi.