1約伯ah，taⁿ請你聽我ê話，留心聽我一切ê言語。Iok-pek ah, taⁿ chhiáⁿ lí thiaⁿ góa ê ōe, Liû-sim thiaⁿ góa it-chhè ê giân-gú.

2看ah，我taⁿ開我ê嘴，我ê舌tī嘴內teh講。Khòaⁿ ah, góa taⁿ khui góa ê chhùi, Góa ê chi̍h tī chhùi-lāi teh kóng.

3我ê話beh講出我心內ê正直，我ê嘴唇beh老實講出所知ê。Góa ê ōe beh kóng-chhut góa sim-lāi ê chèng-ti̍t, Góa ê chhùi-tûn beh láu-si̍t kóng-chhut só͘ chai ê.

4上帝ê神創造我；全能ê ê氣hō͘我得tio̍h活。Siōng-tè ê Sîn chhòng-chō góa; Choân-lêng--ê ê khì hō͘ góa tit-tio̍h oa̍h.

5你若會，就tio̍h應我，起來khiā排列tī我ê面前。Lí nā ōe, chiū tio̍h ìn góa, Khí-lâi khiā pâi-lia̍t tī góa ê bīn-chêng.

6看ah，我tī上帝ê面前kap你一樣，也是用土ni̍h成ê。Khòaⁿ ah, góa tī Siōng-tè ê bīn-chêng kap lí chi̍t-iūⁿ, Iā sī ēng thô͘ ni̍h-chiâⁿ-ê.

7看ah，我無用威嚴hō͘你驚，也無用我ê勢力teh你。Khòaⁿ ah, góa bô ēng ui-giâm hō͘ lí kiaⁿ, Iā bô ēng góa ê sè-le̍k teh--lí.

8你所講ê，我實在有聽見，也有聽見你ê話ê聲，講，Lí só͘ kóng-ê, góa si̍t-chāi ū thiaⁿ-kìⁿ, Iā ū thiaⁿ-kìⁿ lí ê ōe ê siaⁿ, kóng,

9我是清氣，無過失，我是清白，tī我心內也無罪。Góa sī chheng-khì, bô kè-sit, Góa sī chheng-pe̍k, tī góa sim-lāi iā bô chōe.

10看ah，伊chhē空隙來攻擊我，掠我做伊ê對敵。Khòaⁿ ah, I chhē khàng-khiah lâi kong-kek góa, Lia̍h góa chòe I ê tùi-te̍k.

11伊用腳銬哭我ê腳，致意看我一切ê路。I ēng kha-khàu khàu góa ê kha, Tì-ì khòaⁿ góa it-chhè ê lō͘.

12看ah，講到這，你是不義，我beh應你；因為上帝比人khah大。Khòaⁿ ah, kóng kàu che, lí sī put-gī, góa beh ìn lí; In-ūi Siōng-tè pí lâng khah-tōa.

13你啥事kap伊相爭？因為伊ê事伊lóng無解明。Lí siáⁿ-sū kap I saⁿ-chiⁿ? In-ūi I ê sū I lóng bô kóe-bêng.

14因為上帝講一pái，也兩pái，總是人無致意。In-ūi Siōng-tè kóng chi̍t-pái, Iā nn̄g-pái, chóng-sī lâng bô tì-ì.

15人倒tī眠床睏，到伊睏重眠ê時，tī眠夢中，暝時ê異象，Lâng tó tī bîn-chhn̂g khùn, Kàu i khùn tāng-bîn ê sî, Tī bîn-bāng-tiong, mî--sî ê īⁿ-siōng,

16伊開in ê耳孔，蓋印tī in所受ê教示。I khui in ê hī-khang, Khàm-ìn tī in só͘ siū ê kà-sī.

17Beh hō͘人改換所計畫ê事，遏(at)止人ê驕傲。Beh hō͘ lâng kóe-ōaⁿ só͘ kè-e̍k ê sū, At-chí lâng ê kiau-ngō͘.

18阻止伊ê活命無落深坑，也伊ê性命無tùi刀劍來死。Chó͘-chí i ê oa̍h-miā bô lo̍h chhim-khiⁿ, Iā i ê sìⁿ-miā bô tùi to-kiàm lâi sí.

19人tī眠床裡受痛疼ê警戒；tī伊ê骨內親像交戰無soah。Lâng tī bîn-chhn̂g--nih siū thàng-thiàⁿ ê kéng-kài; Tī i ê kut-lāi chhin-chhiūⁿ kau-chiàn bô soah.

20致到伊ê活命厭賤食物，伊ê心神厭惡好味。Tì-kàu i ê oa̍h-miā iàm-chiān chia̍h-mi̍h, I ê sim-sîn iàm-ò͘ⁿ hó-bī.

21伊ê肉消瘦，無thang看見；平素無看見ê骨，taⁿ lóng thóng出。I ê bah siau-sán, bô thang khòaⁿ-kìⁿ; Pêng-sò͘ bô khòaⁿ-kìⁿ ê kut, taⁿ lóng thóng-chhut.

22伊ê性命近tī深坑；伊ê活命近tī hiah-ê滅無性命ê。I ê sìⁿ-miā kūn tī chhim-khiⁿ; I ê oa̍h-miā kūn tī hiah ê bia̍t-bô sìⁿ-miā ê.

23若有一個使者kap伊tī-teh，就是一千中ê一個，替伊講話ê，將人所tio̍h做ê指示伊；Nā ū chi̍t ê sù-chiá kap i tī-teh, Chiū-sī chi̍t-chheng-tiong ê chi̍t-ê, thòe i kóng-ōe-ê, Chiong lâng só͘ tio̍h-chòe-ê chí-sī i;

24伊就施恩hō͘伊，講，救伊免得落深坑，我已經chhē-tio̍h贖回伊ê。I chiū si-un hō͘ i, kóng, Kiù i bián-tit lo̍h chhim-khiⁿ, Góa í-keng chhē-tio̍h sio̍k-hôe i ê.

25伊ê肉比gín-ná ê肉khah幼軟；伊beh復到少年ê日子。I ê bah pí gín-ná ê bah khah iù-nńg; I beh ho̍k-tò siàu-liân ê ji̍t-chí.

26伊beh祈禱上帝，上帝歡喜伊；見tio̍h伊ê面來歡喜；伊koh算hit人做義。I beh kî-tó Siōng-tè, Siōng-tè hoaⁿ-hí i; Kìⁿ-tio̍h I ê bīn lâi hoaⁿ-hí; I koh sǹg hit-lâng chòe-gī.

27伊tī人ê面前唱歌講，我有犯罪，顛倒是非，無利益我。I tī lâng ê bīn-chêng chhiùⁿ-koa kóng, Góa ū hoān-chōe, tian-tò sī-hui, bô lī-ek góa.

28伊救贖我ê性命，免落深坑；我ê活命也beh看見光。I kiù-sio̍k góa ê sìⁿ-miā, bián-lo̍h chhim-khiⁿ; Góa ê oa̍h-miā iā beh khòaⁿ-kìⁿ kng.

29看ah，chiah-ê一切ê事上帝行tī人，兩pái，三pái。Khòaⁿ ah, chiah ê it-chhè ê sū Siōng-tè kiâⁿ tī lâng, Nn̄g-pái, saⁿ-pái.

30為tio̍h beh tùi深坑救伊ê性命倒tńg，hō͘伊得tio̍h活命ê光照伊。Ūi-tio̍h beh tùi chhim-khiⁿ kiù i ê sìⁿ-miā tò-tńg, Hō͘ i tit-tio̍h oa̍h-miā ê kng chiò i.

31約伯ah，你tio̍h àⁿ耳孔聽我ê話，tio̍h靜靜，我就beh講。Iok-pek ah, lí tio̍h àⁿ hī-khang thiaⁿ góa ê ōe, Tio̍h chēng-chēng, góa chiū beh kóng.

32你若有話thang講，就應我；做你講，因為我ài掠你做義。Lí nā ū ōe thang kóng, chiū ìn góa; Chòe lí kóng, in-ūi góa ài lia̍h lí chòe gī.

33若無，你tio̍h聽我講，你tio̍h靜靜，我beh教你智慧。Nā bô, lí tio̍h thiaⁿ góa kóng, lí tio̍h chēng-chēng, Góa beh kà lí tì-hūi.

1Í-lī-hō͘ koh應講，Í-lī-hō͘ koh ìn kóng,

2Lín有智慧ê人，tio̍h聽我ê話，有知識ê人tio̍h àⁿ耳孔聽我。Lín ū tì-hūi ê lâng, tio̍h thiaⁿ góa ê ōe, Ū tì-sek-ê lâng tio̍h àⁿ hī-khang thiaⁿ góa.

3因為耳á試驗話，親像上kiuⁿ分別滋味。In-ūi hī-á chhì-giām ōe, Chhin-chhiūⁿ chiūⁿ-kiuⁿ hun-piat chu-bī.

4咱tio̍h為家己揀hit-ê合宜ê，也tio̍h相kap知甚麼是好。Lán tio̍h ūi ka-kī kéng hit ê ha̍p-gî--ê, Iā tio̍h saⁿ-kap chai sím-mi̍h sī hó.

5因為約伯有講，我是公義，上帝奪我ê正理；In-ūi Iok-pek ū kóng, Góa sī kong-gī, Siōng-tè toa̍t góa ê chèng-lí;

6我雖然有你，iáu算做講白賊ê；我雖然無過失，所受ê傷bōe醫得。Góa sui-jiân ū lí, iáu sǹg chòe kóng pe̍h-chha̍t--ê; Góa sui-jiân bô kè-sit, só͘ siū ê siong bōe-i--tit.

7Chī-chūi親像約伯滿嘴侮慢，親像lim水ah？Chī-chūi chhin-chhiūⁿ Iok-pek móa-chhùi bú-bān, Chhin-chhiūⁿ lim chúi ah?

8伊kap作孽ê做伴來往，kap pháiⁿ人相kap行。I kap chok-gia̍t--ê chòe-phōaⁿ lâi-óng, Kap pháiⁿ-lâng saⁿ-kap kiâⁿ.

9因為伊bat講，人歡喜上帝，lóng是無利益。In-ūi i bat kóng, Lâng hoaⁿ-hí Siōng-tè, Lóng sī bô lī-ek.

10所以lín明理ê人，tio̍h聽我ê話。上帝斷斷bōe行pháiⁿ，全能ê斷斷bōe行不義。Só͘-í lín bêng-lí ê lâng, tio̍h thiaⁿ góa ê ōe. Siōng-tè toàn-toàn bōe kiâⁿ pháiⁿ, Choân-lêng--ê toàn-toàn bōe kiâⁿ put-gī.

11因為伊beh照人所做ê來報應伊，照人所行ê來hō͘伊tú-tio̍h。In-ūi I beh chiàu lâng só͘-chòe-ê lâi pò-èng i, Chiàu lâng só͘-kiâⁿ--ê lâi hō͘ i tú-tio̍h.

12上帝實在bōe做pháiⁿ；全能ê也無偏私來審判。Siōng-tè si̍t-chāi bōe chòe pháiⁿ; Choân-lêng--ê iā bô phian-su lâi sím-phòaⁿ.

13Chī-chūi用地託重伊ah？Chī-chūi安定全世界ah？Chī-chūi ēng tōe thok-tiōng I ah? Chī-chūi an-tiāⁿ choân sè-kài ah?

14伊若專心顧家己，將伊ê神kap氣收回歸家己，I nā choan-sim kò͘ ka-kī, Chiong I ê sîn kap khì siu-hôe kui ka-kī,

15見若有肉體ê beh做一下死，人猶原beh歸土。Kìⁿ-nā ū jio̍k-thé--ê beh chòe chi̍t-ē sí, Lâng iû-goân beh kui thó͘.

16你若明理，就tio̍h聽chit-ê，àⁿ耳孔聽我講話ê聲。Lí nā bêng-lí, chiū tio̍h thiaⁿ chit-ê, Àⁿ hī-khang thiaⁿ góa kóng-ōe ê siaⁿ.

17怨恨公平ê kiám會掌權mah？Hit-ê有公義ê，有權能ê，你kiám會定伊有罪mah？Oàn-hūn kong-pêng--ê kiám ōe chiáng-koân mah? Hit-ê ū kong-gī--ê, ū koân-lêng--ê, lí kiám ōe tēng I ū-chōe mah?

18伊對君王講，你是無hē落-ê；對貴族講，你是邪惡-ê。I tùi kun-ông kóng, Lí sī bô hē-lo̍h--ê; Tùi kùi-cho̍k kóng, Lí sī siâ-ok--ê.

19伊無偏私款待有爵位ê，也無欺貧重富，因為lóng是伊ê手所造ê。I bô phian-su khoán-thāi ū chiok-ūi-ê, Iā bô khi-pîn tiōng-hù, In-ūi lóng sī I ê chhiú só͘ chō ê.

20Tiap-á久ê中間，半暝ê時，in就死無；百姓受搖choah，teh過去；勇猛ê受除滅m̄免用手。Tiap-á-kú ê tiong-kan, pòaⁿ-mî ê sî, in chiū sí-bô; Peh-sìⁿ siū iô-choah, teh kè--khì; Ióng-béng--ê siū tû-bia̍t m̄-bián ēng chhiú.

21因為伊ê目睭鑑察ta̍k人ê路，看明伊ê腳步。In-ūi I ê ba̍k-chiu kàm-chhat ta̍k lâng ê lō͘, Khòaⁿ-bêng i ê kha-pō͘.

22無有烏暗，無有死蔭，thang hō͘行pháiⁿ ê人去bih。Bô ū o͘-àm, bô ū sí-ìm, Thang hō͘ kiâⁿ-pháiⁿ ê lâng khì bih.

23因為伊無kā人定tio̍h時期，hō͘人thang到伊ê面前受審判。In-ūi I bô kā lâng tiāⁿ-tio̍h sî-kî, Hō͘ lâng thang kàu I ê bīn-chêng siū sím-phòaⁿ.

24伊phah碎強猛ê人，m̄免查問，設立別人來替in。I phah-chhùi kiông-béng ê lâng, m̄-bián chhâ-mn̄g, Siat-li̍p pa̍t-lâng lâi thòe in.

25因為伊鑑察in ê所做；tī暝時chhia倒in，in就滅無。In-ūi I kàm-chhat in ê só͘-chòe; Tī mî--sî chhia-tó in, in chiū bia̍t-bô.

26Tī眾人teh看ê所在，伊phah in，親像phah做pháiⁿ ê人一樣。Tī chèng-lâng teh khòaⁿ ê só͘-chāi I phah in, Chhin-chhiūⁿ phah chòe-pháiⁿ ê lâng chi̍t-iūⁿ.

27因為in行偏斜(chhoa̍h)無tè伊，也lóng無致意伊ê路。In-ūi in kiâⁿ phian-chhoa̍h bô tè I, Iā lóng bô tì-ì I ê lō͘.

28致到hō͘ sòng-hiong人喉叫ê聲透到伊面前，伊也聽見困苦ê人ê喉叫。Tì-kàu hō͘ sòng-hiong lâng âu-kiò ê siaⁿ thàu-kàu I bīn-chêng, I iā thiaⁿ-kìⁿ khùn-khó͘ ê lâng ê âu-kiò.

29伊hō͘人安靜，是誰會嫌伊m̄-tio̍h ah？伊掩面，是誰看伊能tio̍h ah？伊款待一國á是一人lóng是án-ni；I hō͘ lâng an-chēng, chī-chūi ōe hiâm I m̄-tio̍h ah? I ng-bīn, chī-chūi khòaⁿ I ōe tio̍h ah? I khoán-thāi chi̍t-kok á-sī chi̍t-lâng lóng sī án-ni;

30免得無敬虔ê人做王，免得有人籠絡百姓。Bián-tit bô kèng-khiân ê lâng chòe ông, Bián-tit ū lâng lóng-lo̍k peh-sìⁿ.

31Kiám有人bat對上帝講，我已經受責罰，無koh犯罪ah？Kiám ū lâng bat tùi Siōng-tè kóng, Góa í-keng siū chek-hoa̍t, bô koh hoān-chōe ah?

32我所無看見ê，求你指示我，我若bat做pháiⁿ，我無beh koh做伊。Góa só͘ bô khòaⁿ-kìⁿ--ê, kiû Lí chí-sī góa, Góa nā bat chòe pháiⁿ, góa bô beh koh chòe i.

33Kiám是伊所報應，無照你ê意思，你chiah推辭m̄受mah？Taⁿ tio̍h揀ê，是你，m̄是我；你所知ê做你講。Kiám sī I só͘ pò-èng, bô chiàu lí ê ì-sù, lí chiah the-sî m̄-siū mah? Taⁿ tio̍h kéng--ê, sī lí, m̄-sī góa; lí só͘ chai-ê chòe lí kóng.

34明理ê人，kap聽我ê話ê智慧人，beh對我講；Bêng-lí ê lâng, kap thiaⁿ góa ê ōe ê tì-hūi lâng, Beh tùi góa kóng;

35約伯所講ê無知識，伊ê話無智慧。Iok-pek só͘ kóng-ê bô tì-sek, I ê ōe bô tì-hūi.

36願約伯受試驗到透底，因為伊ê應答親像pháiⁿ人。Goān Iok-pek siū chhì-giām kàu thàu-tóe, In-ūi i ê ìn-tap chhin-chhiūⁿ pháiⁿ lâng.

37因為伊tī伊ê罪koh加添悖逆；伊tī咱中間phah手；koh用chōe-chōe話反對上帝。In-ūi i tī i ê chōe koh ke-thiⁿ pōe-ge̍k; I tī lán tiong-kan phah-chhiú; Koh ēng chōe-chōe ōe hoán-tùi Siōng-tè.

1Í-lī-hō͘ koh應講，Í-lī-hō͘ koh ìn kóng,

2你掠chit-ê做有合理，你講，我ê義贏過上帝ê義ah，Lí lia̍h chit-ê chòe ū ha̍p-lí, Lí kóng, Góa ê gī iâⁿ-kè Siōng-tè ê gī ah,

3你竟然講，這有甚麼利益你？又koh，我有甚麼利益khah贏我bat去犯罪？Lí kéng-jiân kóng, Che ū sím-mi̍h lī-ek lí? Iū-koh, Góa ū sím-mi̍h lī-ek khah-iâⁿ góa bat khì hoān-chōe?

4我beh應你，以及óa你ê同伴。Góa beh ìn lí, Í-ki̍p óa-lí ê tâng-phōaⁿ.

5你tio̍h kia̍h目看天，看hit-ê穹蒼，是比你khah高。Lí tio̍h kia̍h-ba̍k khòaⁿ thiⁿ, Khòaⁿ hit ê kiong-chhong, sī pí lí khah-koâiⁿ.

6你若犯罪，會害tio̍h伊甚麼？你ê過失若加添，會礙tio̍h伊甚麼ah？Lí nā hoān-chōe, ōe hāi-tio̍h I sím-mi̍h? Lí ê kè-sit nā ke-thiⁿ, ōe gāi-tio̍h I sím-mi̍h ah?

7你若行義，有甚麼hō͘伊ah？á是伊對你ê手有得tio̍h甚麼ah？Lí nā kiâⁿ-gī, ū sím-mi̍h hō͘ I ah? Á-sī I tùi lí ê chhiú ū tit-tio̍h sím-mi̍h ah?

8你ê pháiⁿ關係你同類ê人，你ê義也關係世間人。Lí ê pháiⁿ koan-hē lí tâng-lūi ê lâng, Lí ê gī iā koan-hē sè-kan lâng.

9人因為受chōe-chōe暴虐就喉叫，因為受強ê人ê壓制，就哮救。Lâng in-ūi siū chōe-chōe pō-gio̍k chiū âu-kiò, In-ūi siū kiông ê lâng ê ap-chè, chiū háu-kiù.

10總是無人講，創造我ê上帝tī toh落？伊是hō͘人暝時唱歌ê。Chóng-sī bô lâng kóng, Chhòng-chō góa ê Siōng-tè tī toh-lo̍h? I sī hō͘ lâng mî--sî chhiùⁿ-koa--ê.

11伊是教示咱贏過地上ê走獸，hō͘咱有智慧，贏過tī空中ê飛鳥ê。I sī kà-sī lán iâⁿ-kè tōe-chiūⁿ ê cháu-siù, Hō͘ lán ū tì-hūi, iâⁿ-kè tī khong-tiong ê pe-chiáu ê.

12In tī-hia喉叫，總是無有應答ê，因為pháiⁿ人驕傲ê緣故。In tī-hia âu-kiò, chóng-sī bô ū ìn-tap ê, In-ūi pháiⁿ-lâng kiau-ngō͘ ê iân-kò͘.

13虛假ê，上帝無beh聽，全能ê也m̄看顧伊。Hu-kè-ê, Siōng-tè bô beh thiaⁿ, Choân-lêng--ê iā m̄ khòaⁿ-kò͘ i.

14何況你講，你無看見伊；chit-ê案件tī伊ê面前，你tio̍h請thèng候伊 ah！Hô-hòng lí kóng, lí bô khòaⁿ-kìⁿ I; Chit ê àn-kiāⁿ tī I ê bīn-chêng, lí tio̍h chhiáⁿ thèng-hāu I ah!

15總是taⁿ因為伊無受氣來責罰，也無不止注意侮慢；Chóng-sī taⁿ in-ūi I bô siū-khì lâi chek-hoa̍t, Iā bô put-chí chù-ì bú-bān;

16所以約伯開嘴lóng虛假，講chōe-chōe無知ê話。Só͘-í Iok-pek khui-chhùi lóng hu-ké, Kóng chōe-chōe bû-ti ê ōe.