1因為án-ni我ê心pho̍k-pho̍k-chhéng，搖動離開本位。In-ūi án-ni góa ê sim pho̍k-pho̍k-chhéng, Iô-tāng lī-khui pún-ūi.

2Tio̍h致意聽伊khū-khū ê聲，以及伊ê嘴所出旺ê聲。Tio̍h tì-ì thiaⁿ I khū-khū ê siaⁿ, Í-ki̍p I ê chhùi só͘ chhut ōng ê siaⁿ.

3伊ê聲發出到普天下，伊ê電sih到地極。I ê siaⁿ hoat-chhut kàu phó͘ thiⁿ-ē, I ê tiān sih kàu tōe-ke̍k.

4Tè後有聲khū-khū哮；伊用威嚴ê聲發雷；伊ê聲一下聽見，伊無停止in。Tè-āu ū siaⁿ khū-khū-háu; I ēng ui-giâm ê siaⁿ hoat lûi; I ê siaⁿ chi̍t-ē thiaⁿ-kìⁿ, I bô thêng-chí in.

5上帝發出雷ê聲真奇妙；伊行大事hō͘咱bōe測度得。Siōng-tè hoat-chhut lûi ê siaⁿ chin kî-biāu; I kiâⁿ tōa-sū hō͘ lán bōe chhek-to̍k--tit.

6因為伊對雪講，tio̍h落tī地上；tùi kui-chūn ê雨，kap kui-chūn ê大雨，也是án-ni講。In-ūi I tùi seh kóng, Tio̍h lo̍h tī tōe-chiūⁿ; Tùi kui-chūn ê hō͘, Kap kui-chūn ê tōa-hō͘, iā sī án-ni kóng.

7伊禁止ta̍k人ê手；hō͘所造ê人lóng會知。I kìm-chí ta̍k-lâng ê chhiú; Hō͘ só͘ chō ê lâng lóng ōe chai.

8百獸入穴，lóng tòa tī in ê洞。Pah-siù ji̍p hia̍t, Lóng tòa tī in ê tōng.

9大風對伊ê府庫來，寒冷tùi北方出。Tōa-hong tùi i ê hú-khò͘ lâi, Kôaⁿ-léng tùi pak-hng chhut.

10Tùi上帝ê pûn氣就kian冰，寬闊ê水就結tēng。Tùi Siōng-tè ê pûn-khùi chiū kian-peng, Khoan-khoah ê chúi chiū kiat-tēng.

11伊hō͘濕氣積滿tī密雲，展開電光ê雲；I hō͘ sip-khì chek-móa tī ba̍t-hûn, Tián-khui tiān-kng ê hûn;

12Chit-ê是thàn伊ê指揮四界行轉旋(tńg-se̍h)；tī世界ê地面，行伊一切所吩咐in ê；Chit-ê sī thàn I ê chí-hui sì-kòe kiâⁿ tńg-se̍h; Tī sè-kài ê tōe-bīn, Kiâⁿ I it-chhè só͘ hoan-hù in ê;

13或是為tio̍h責罰，或是為tio̍h潤澤地，或是為tio̍h施行慈愛，chiah hō͘伊來。He̍k-sī ūi-tio̍h chek-hoa̍t, he̍k-sī ūi-tio̍h lūn-te̍k tōe, He̍k-sī ūi-tio̍h si-hêng chû-ài, chiah hō͘ i lâi.

14約伯ah，你tio̍h留心來聽；tio̍h khiā-teh來想上帝奇妙ê事。Iok-pek ah, lí tio̍h liû-sim lâi thiaⁿ; Tio̍h khiā-teh lâi siūⁿ Siōng-tè kî-biāu ê sū.

15上帝怎樣吩咐chiah-ê？怎樣hō͘雲中ê電光照出，你知mah？Siōng-tè cháiⁿ-iūⁿ hoan-hù chiah-ê? Cháiⁿ-iūⁿ hō͘ hûn-tiong ê tiān-kng chiò-chhut, lí chai mah?

16雲怎樣鋪平tī空中；hit-ê知識齊備ê奇妙ê事，你知mah？Hûn cháiⁿ-iūⁿ pho͘-pîⁿ tī khong-tiong; Hit ê tì-sek chiâu-pī--ê kî-biāu ê sū, lí chai mah?

17土地因為南風靜靜ê時，你ê衣服怎樣燒lō，你知mah？Thó͘-tōe in-ūi lâm-hong chēng-chēng ê sî, Lí ê i-ho̍k cháiⁿ-iūⁿ sio-lō, lí chai mah?

18你kiám會kap伊相kap鋪穹蒼mah？chit-ê穹蒼堅定，親像鑄成ê鏡。Lí kiám ōe kap I saⁿ-kap pho͘ kiong-chhong mah? Chit ê kiong-chhong kian-tēng, chhin-chhiūⁿ chù-chiâⁿ ê kiàⁿ.

19阮因為愚戇bōe曉得排列阮ê話；你tio̍h教示阮應該對你講甚麼。Goán in-ūi gû-gōng bōe hiáu tit pâi-lia̍t goán ê ōe; Lí tio̍h kà-sī goán eng-kai tùi lí kóng sím-mi̍h.

20Kiám tio̍h報伊知，我beh講mah？人kiám ài受滅無mah？Kiám tio̍h pò I chai, góa beh kóng mah? Lâng kiám ài siū bia̍t-bô mah?

21Taⁿ人無看見穹蒼內燦爛ê光；獨獨風tùi teh過，就hō͘伊清彩。Taⁿ lâng bô khòaⁿ-kìⁿ kiong-chhong-lāi chhàn-lān ê kng; To̍k-to̍k hong tùi teh kè, chiū hō͘ i chheng-chhái.

22金ê光tùi北方出來；上帝有威嚴thang驚。Kim ê kng tùi pak-hng chhut-lâi; Siōng-tè ū ui-giâm thang kiaⁿ.

23全能ê，咱bōe能測度伊；伊有大能力，有公平充滿公義，無beh苦楚人。Choân-lêng--ê, lán bōe-ōe chhek-to̍k I; I ū tōa lêng-le̍k, ū kong-pêng chhiong-móa kong-gī, bô beh khó͘-chhó͘ lâng.

24所以人敬畏伊；伊無看有智慧ê心ê。Só͘-í lâng kèng-ùi I; I bô khòaⁿ ū tì-hūi ê sim--ê.

1Hit時耶和華tùi大風ê中間應約伯講，Hit-sî Iâ-hô-hoa tùi tōa-hong ê tiong-kan ìn Iok-pek kóng,

2Taⁿ一個用無知ê話，hō͘所議論ê無明，是是誰 ah？Taⁿ chi̍t-ê ēng bû-ti ê ōe, hō͘ só͘ gī-lūn-ê bô bêng, Sī chī-chūi ah?

3你tio̍h hâ腰親像大丈夫，我問你，你應我。Lí tio̍h hâ-io chhin-chhiūⁿ tāi-tiōng-hu, Góa mn̄g lí, lí ìn Góa.

4我hē地ê地基，hit時你tī toh落？你若知影就講伊。Góa hē tōe ê tōe-ki, hit-sî lí tī toh-lo̍h? Lí nā chai-iáⁿ chiū kóng i.

5Chī-chūi定tio̍h伊ê寸尺，是誰牽準索tī伊ê頂面，你知mah？Chī-chūi tiāⁿ-tio̍h i ê chhùn-chhioh, Chī-chūi khan chîn-soh tī i ê téng-bīn, lí chai mah?

6伊ê地基chhāi tī甚麼ê頂面？á是伊角頭ê石，是誰安置ah？I ê tōe-ki chhāi tī sím-mi̍h ê téng-bīn? Á-sī i kak-thâu ê chio̍h, chī-chūi an-tì ah?

7當hit時，天光早ê星相kap唱歌；上帝ê眾kiáⁿ也lóng出歡喜ê聲。Tng hit-sî thiⁿ-kng-chá ê chhiⁿ saⁿ-kap chhiùⁿ-koa; Siōng-tè ê chèng-kiáⁿ iā lóng chhut hoaⁿ-hí ê siaⁿ.

8大海沖出，親像tùi胎裡出來，hit時是誰用門關伊？Tōa-hái chhiong-chhut, chhin-chhiūⁿ tùi thai--nih chhut-lâi, Hit-sî chī-chūi ēng mn̂g koaiⁿ-i?

9Hit時我用雲做伊ê衫，用烏暗做布包伊；Hit-sî Góa ēng hûn chòe i ê saⁿ, Ēng o͘-àm chòe pò͘ pau i;

10kā伊定tio̍h我所立ê界限，koh kā伊設門栱kap門。Kā i tiāⁿ-tio̍h Góa só͘ li̍p ê kài-hān, Koh kā i siat mn̂g-kông kap mn̂g.

11講，你thang到chia，m̄-thang pôaⁿ過，你驕傲ê湧到chia為止。Kóng, Lí thang kàu chia, m̄-thang pôaⁿ-kè, Lí kiau-ngō͘ ê éng kàu chia ûi-chí.

12Tùi你出世ê日以來，你bat命令早起時，hō͘天光早知伊ê所在；Tùi lí chhut-sì ê ji̍t í-lâi, lí bat bēng-lēng chá-khí sî, Hō͘ thiⁿ-kng-chá chai i ê só͘-chāi;

13hō͘伊khiú地ê四極，將pháiⁿ人pōaⁿ出去？Hō͘ i khiú tōe ê sì-ke̍k, Chiong pháiⁿ-lâng pōaⁿ--chhut-khì?

14伊就變換親像過印ê土，in出現親像衣服。I chiū piàn-ōaⁿ chhin-chhiūⁿ kè-ìn ê thô͘, In chhut-hiān chhin-chhiūⁿ i-ho̍k.

15Pháiⁿ人所算做in ê光，taⁿ tùi in收倒tńg，kia̍h高ê手beh at折。Pháiⁿ-lâng só͘ sǹg-chòe in ê kng, taⁿ tùi in siu tò-tńg, Kia̍h-koâiⁿ ê chhiú beh at-chi̍h.

16你bat入海ê水源mah？á是bat行tī深淵祕密ê所在mah？Lí bat ji̍p hái ê chúi-goân mah? Á-sī bat kiâⁿ tī chhim-ian pì-bi̍t ê só͘-chāi mah?

17死無ê門有kā你開mah？死蔭ê門，你bat看見mah？Sí-bô ê mn̂g ū kā lí khui mah? Sí-ìm ê mn̂g, lí bat khòaⁿ-kìⁿ mah?

18地ê闊大，你有看透無？你若一盡知，做你講。Tōe ê khoah-tōa, lí ū khòaⁿ-thàu bô? Lí nā it-chīn chai, chòe lí kóng.

19光明khiā起ê所在，hit條路tùi toh落去，koh烏暗ê所在tī toh落；Kng-bêng khiā-khí ê só͘-chāi, hit tiâu lō͘ tùi toh-lo̍h khì, Koh o͘-àm ê só͘-chāi tī toh-lo̍h;

20Thang hō͘你chhōa伊tò去伊ê境界？你能知影透到伊ê厝ê路mah？Thang hō͘ lí chhōa i tò-khì i ê kéng-kài? Lí ōe chai-iáⁿ thàu kàu i ê chhù ê lō͘ mah?

21你知lah，因為hit時你已經出世，你年歲ê數額也chōe。Lí chai--lah, in-ūi hit-sî lí í-keng chhut-sì, Lí nî-hè ê siàu-gia̍h iā chōe.

22你bat入雪ê庫房，á是看見雹ê府庫，Lí bat ji̍p seh ê khò͘-pâng, Á-sī khòaⁿ-kìⁿ pha̍uh ê hú-khò͘,

23就是我所收khǹg來thèng候患難ê期，thèng候相thâi交戰ê日mah？Chiū-sī Góa só͘ siu-khǹg lâi thèng-hāu hoān-lān ê kî, Thèng-hāu saⁿ-thâi kau-chiàn ê ji̍t mah?

24光tùi甚麼路分開？東風tùi甚麼路四界吹tī地上？Kng tùi sím-mi̍h lō͘ pun-khui? Tang-hong tùi sím-mi̍h lō͘ sì-kòe chhe tī tōe-chiūⁿ?

25Chī-chūi kā大雨水開路；á是備辦雷電ê路；Chī-chūi kā tōa hō͘-chúi khui lō͘; Á-sī pī-pān lûi-tiān ê lō͘;

26來落雨tī無人ê地，tī無人khiā起ê曠野；Lâi lo̍h-hō͘ tī bô lâng ê tōe, Tī bô lâng khiā-khí ê khòng-iá;

27Hō͘拋荒荒廢ê地得tio̍h夠額，hō͘青草發生。Hō͘ pha-hng hong-hòe ê tōe tit-tio̍h kàu-gia̍h, Hō͘ chhiⁿ-chháu hoat-siⁿ.

28雨水有老父mah？露水一點一點，是誰 生ê ah？Hō͘-chúi ū lāu-pē mah? Lō͘-chúi chi̍t-tiám chi̍t-tiám, chī-chūi siⁿ-ê ah?

29冰tùi甚麼ê胎出？天ê霜，是是誰 生ê ah？Peng tùi sím-mi̍h ê thai chhut? Thiⁿ ê sng, sī chī-chūi siⁿ-ê ah?

30Chiah-ê水堅定親像石頭，深淵ê面結kui塊。Chiah ê chúi kian-tēng chhin-chhiūⁿ chio̍h-thâu, Chhim-ian ê bīn kiat kui-tè.

31卯星kui簇(chhok)，是你縛ê mah？參星ê帶是你tháu-ê mah？Báu-chhiⁿ kui-chhok, sī lí pa̍k-ê mah? Chham-chhiⁿ ê tòa sī lí tháu-ê mah?

32你hō͘十二宮照伊ê時候出來？也chhōa北斗kap伊所屬ê星mah？Lí hō͘ cha̍p-jī kiong chiàu i ê sî-hāu chhut lâi? Iā chhōa pak-táu kap i só͘ sio̍k ê chhiⁿ mah?

33你知天ê定例mah？á是設伊ê權管轄地mah？Lí chai thiⁿ ê tēng-lē mah? Á-sī siat i ê koân koán-hat tōe mah?

34你能出聲叫雲，hō͘雨水chōe-chōe遮蓋你mah？Lí ōe chhut-siaⁿ kiò hûn, Hō͘ hō͘-chúi chōe-chōe jia-khàm lí mah?

35你能發出sih-nà，in就去，對你講，阮tī-chia。Lí ōe hoat-chhut sih-nà, in chiū khì, tùi lí kóng, Goán tī-chia.

36Chī-chūi用智慧hē tī內面？Chī-chūi賞賜聰明tī心內？Chī-chūi ēng tì-hūi hē tī lāi-bīn? Chī-chūi siúⁿ-sù chhang-miâ tī sim-lāi?

37Chī-chūi能用智慧算雲ê數額？Chī-chūi能piàⁿ天ê盆；Chī-chūi ōe ēng tì-hūi sǹg hûn ê siàu-gia̍h? Chī-chūi ōe piàⁿ thiⁿ ê phûn;

38hit時塵埃成做土糜，土就結kui-thn̂g？Hit-sî tîn-ai chiâⁿ-chòe thô͘-bê, Thô͘ chiū kiat kui-thn̂g?

39你有kā母ê獅la̍k-tio̍h食物？hō͘獅á-thûn食飽mah？Lí ū kā bú ê sai la̍k-tio̍h chia̍h-mi̍h? Hō͘ sai-á-thûn chia̍h-pá mah?

40就是伊tī穴內撐腳，tī隱密ê所在bih-teh ê時。Chiū-sī i tī hia̍t-lāi thìⁿ-kha, Tī ún-ba̍t ê só͘-chāi bih-teh ê sî.

41烏鴉kiáⁿ ǹg上帝哀求；無thang食飛來飛去ê時，是誰為烏鴉備辦食物ah？O͘-a-kiáⁿ ǹg Siōng-tè ai-kiû; Bô thang chia̍h pe-lâi pe-khì ê sî, Chī-chūi ūi o͘-a pī-pān chia̍h-mi̍h ah?

1山裡ê山羊tī時生，你知mah？鹿母生kiáⁿ，你看出mah？Soaⁿ--nih ê soaⁿ-iûⁿ tī-sî siⁿ, lí chai mah? Lo̍k-bú siⁿ-kiáⁿ, lí khòaⁿ-chhut mah?

2In掛kui tī時到月，你會算mah？In tī時生，你會曉得mah？In kòa-kūi(**kui) tī-sî kàu-ge̍h, lí ōe sǹg mah? In tī-sî siⁿ, lí ōe hiáu-tit mah?

3In屈身生kiáⁿ，放出in ê勞苦。In khut-sin siⁿ-kiáⁿ, Pàng-chhut in ê lô-khó͘.

4In ê kiáⁿ漸漸肥phauh，tī山野長大；in出去，就無koh 倒tńg來。In ê kiáⁿ chiām-chiām pûi-phauh, tī soaⁿ-iá tióng-tōa; In chhut-khì, chiū bô koh tò-tńg lâi.

5Chī-chūi放野驢出去自由？Chī-chūi tháu山驢ê索？Chī-chūi pàng iá-lû chhut-khì chū-iû? Chī-chūi tháu soaⁿ-lû ê soh?

6我用曠野做伊ê厝，用鹹ê地做伊khiā起ê所在。Góa ēng khòng-iá chòe i ê chhù, Ēng kiâm ê tōe chòe i khiā-khí ê só͘-chāi.

7伊恥笑城內ê喧嘩，趕 cheng-siⁿ-ê teh hoah，伊也m̄聽。I thí-chhiò siâⁿ-lāi ê soan-hoa, Kóaⁿ cheng-siⁿ-ê teh hoah, i iā m̄-thiaⁿ.

8遍山是伊ê草場；伊也chhē ta̍k樣青翠ê物。Piàn-soaⁿ sī i ê chháu-tiûⁿ; I iā chhē ta̍k-iūⁿ chhiⁿ-chhùi ê mi̍h.

9野牛kiám肯服事你？á是歇tī你ê槽邊？Iá-gû kiám khéng ho̍k-sāi lí? Á-sī hioh tī lí ê chô-piⁿ?

10你會用索縛野牛tī犁溝mah？伊beh tè你耙(pē)山谷mah？Lí ōe ēng soh pa̍k iá-gû tī lôe-kau mah? I beh tè lí pē soaⁿ-kok mah?

11Kiám thang因為伊力大，就óa靠伊？Kiám thang用你ê工交代伊mah？Kiám thang in-ūi i la̍t tōa, chiū óa-khò i? Kiám thang ēng lí ê kang kau-tài i mah?

12你kiám thang信靠伊帶你ê種子tò來；koh收拾你ê五穀場mah？Lí kiám thang sìn-khò i tòa lí ê chéng-chí tò-lâi; Koh siu-si̍p lí ê gō͘-kak-tiûⁿ mah?

13鴕鳥ê翼歡喜teh ia̍t；總是伊ê翼kap毛有慈愛無？Tô-chiáu ê si̍t hoaⁿ-hí teh ia̍t; Chóng-sī i ê si̍t kap mn̂g ū chû-ài bô?

14因為伊放sak伊ê卵tī地裡，hō͘伊tī土沙得tio̍h燒lō；In-ūi i pàng-sak i ê nn̄g tī tōe--nih, Hō͘ i tī thô͘-soa tit-tio̍h sio-lō;

15無想tio̍h腳會lap-tio̍h，野獸會踏tio̍h。Bô siūⁿ-tio̍h kha ōe lap-tio̍h, Iá-siù ōe ta̍h-tio̍h.

16伊無可憐伊ê kiáⁿ，親像m̄是伊ê；伊ê tio̍h磨空空，伊也無掛慮。I bô khó-lîn i ê kiáⁿ, chhin-chhiūⁿ m̄-sī i-ê; I ê tio̍h-bôa khang-khang, i iā bô khòa-lū.

17因為上帝hō͘伊無智慧，也無hō͘伊有靈竅。In-ūi Siōng-tè hō͘ i bô tì-hūi, Iā bô hō͘ i ū lêng-khiàu.

18伊挺身高高ê時，就藐視馬kap騎馬ê。I théng-sin koâiⁿ-koâiⁿ ê sî, Chiū biáu-sī bé kap khiâ-bé--ê.

19馬ê力是你hō͘伊mah？你用話chhàng起來ê鬃moa伊ê頷頸mah？Bé ê la̍t sī lí hō͘ i mah? Lí ēng ōe chhàng--khí-lâi ê chang moa i ê ām-kún mah?

20你hō͘伊tiô跳親像草蜢mah？伊展威phǹg-phǹg哮真thang驚。Lí hō͘ i tiô-thiàu chhin-chhiūⁿ chháu-meh mah? I tián-ui phǹg-phǹg-háu chin thang kiaⁿ.

21伊tī山谷中用蹄耙(pê)土，家己歡喜伊ê力；伊出去迎接兵器。I tī soaⁿ-kok-tiong ēng tôe pê thô͘, ka-kī hoaⁿ-hí i ê la̍t; I chhut-khì ngiâ-chih peng-khì.

22伊藐視thang驚ê事，也無忍；也無因為刀劍來oa̍t倒tńg。I biáu-sī thang kiaⁿ ê sū, iā bô lún; Iā bô in-ūi to-kiàm lâi oa̍t-tò-tńg.

23箭袋kap光nà-nà ê鎗，以及手鏢，tī伊ê身上khiang-khiang哮有聲。Chìⁿ-tē kap kng-nà-nà ê chhiuⁿ, í-ki̍p chhiú-pio, Tī i ê sin-chiūⁿ khiang-khiang-háu ū siaⁿ.

24伊發性kap大受氣，將土吞落去；一下聽見哨角ê聲，就m̄定定khiā-teh。I hoat-sèng kap tōa siū-khì, chiong thô͘ thun--lo̍h-khì; Chi̍t-ē thiaⁿ-kìⁿ sàu-kak ê siaⁿ, chiū m̄ tiāⁿ-tiāⁿ khiā-teh.

25見若哨角tân，伊就講，ā-hah，伊tùi遠遠鼻見交戰，kap軍長親像雷ê聲，以及hoah-hiàm ê聲。Kìⁿ-nā sàu-kak tân, i chiū kóng, Ā-hah, I tùi hn̄g-hn̄g phīⁿ-kìⁿ kau-chiàn, Kap kun-tiúⁿ chhin-chhiūⁿ lûi ê siaⁿ, í-ki̍p hoah-hiàm ê siaⁿ.

26Boa̍h-hio̍h teh飛，thí開伊ê翼，ǹg南去，kiám是靠你ê智慧mah？Boa̍h-hio̍h teh pe, thí-khui i ê si̍t, ǹg-lâm khì, Kiám sī khò lí ê tì-hūi mah?

27鷹鳥chhèng高tī高ê所在作siū，是thàn你ê命令mah？Eng-chiáu chhèng-koâiⁿ tī koâiⁿ ê só͘-chāi choh-siū, Sī thàn lí ê bēng-lēng mah?

28伊tiàm tī石phiâⁿ，khiā起tī山尖kap堅固ê所在。I tiàm tī chio̍h-phiâⁿ, Khiā-khí tī soaⁿ-chiam kap kian-kò͘ ê só͘-chāi.

29Tùi-hia chhē食物，目睭金金看遠遠。Tùi-hia chhē chia̍h-mi̍h, Ba̍k-chiu kim-kim khòaⁿ hn̄g-hn̄g.

30伊ê kiáⁿ suh血；受thâi-ê tī toh落，伊也tī-hia。I ê kiáⁿ suh huih; Siū-thâi-ê tī toh-lo̍h, i iā tī-hia.