1Hit時耶和華tùi大風ê中間應約伯講，Hit-sî Iâ-hô-hoa tùi tōa-hong ê tiong-kan ìn Iok-pek kóng,

2Taⁿ一個用無知ê話，hō͘所議論ê無明，是是誰 ah？Taⁿ chi̍t-ê ēng bû-ti ê ōe, hō͘ só͘ gī-lūn-ê bô bêng, Sī chī-chūi ah?

3你tio̍h hâ腰親像大丈夫，我問你，你應我。Lí tio̍h hâ-io chhin-chhiūⁿ tāi-tiōng-hu, Góa mn̄g lí, lí ìn Góa.

4我hē地ê地基，hit時你tī toh落？你若知影就講伊。Góa hē tōe ê tōe-ki, hit-sî lí tī toh-lo̍h? Lí nā chai-iáⁿ chiū kóng i.

5Chī-chūi定tio̍h伊ê寸尺，是誰牽準索tī伊ê頂面，你知mah？Chī-chūi tiāⁿ-tio̍h i ê chhùn-chhioh, Chī-chūi khan chîn-soh tī i ê téng-bīn, lí chai mah?

6伊ê地基chhāi tī甚麼ê頂面？á是伊角頭ê石，是誰安置ah？I ê tōe-ki chhāi tī sím-mi̍h ê téng-bīn? Á-sī i kak-thâu ê chio̍h, chī-chūi an-tì ah?

7當hit時，天光早ê星相kap唱歌；上帝ê眾kiáⁿ也lóng出歡喜ê聲。Tng hit-sî thiⁿ-kng-chá ê chhiⁿ saⁿ-kap chhiùⁿ-koa; Siōng-tè ê chèng-kiáⁿ iā lóng chhut hoaⁿ-hí ê siaⁿ.

8大海沖出，親像tùi胎裡出來，hit時是誰用門關伊？Tōa-hái chhiong-chhut, chhin-chhiūⁿ tùi thai--nih chhut-lâi, Hit-sî chī-chūi ēng mn̂g koaiⁿ-i?

9Hit時我用雲做伊ê衫，用烏暗做布包伊；Hit-sî Góa ēng hûn chòe i ê saⁿ, Ēng o͘-àm chòe pò͘ pau i;

10kā伊定tio̍h我所立ê界限，koh kā伊設門栱kap門。Kā i tiāⁿ-tio̍h Góa só͘ li̍p ê kài-hān, Koh kā i siat mn̂g-kông kap mn̂g.

11講，你thang到chia，m̄-thang pôaⁿ過，你驕傲ê湧到chia為止。Kóng, Lí thang kàu chia, m̄-thang pôaⁿ-kè, Lí kiau-ngō͘ ê éng kàu chia ûi-chí.

12Tùi你出世ê日以來，你bat命令早起時，hō͘天光早知伊ê所在；Tùi lí chhut-sì ê ji̍t í-lâi, lí bat bēng-lēng chá-khí sî, Hō͘ thiⁿ-kng-chá chai i ê só͘-chāi;

13hō͘伊khiú地ê四極，將pháiⁿ人pōaⁿ出去？Hō͘ i khiú tōe ê sì-ke̍k, Chiong pháiⁿ-lâng pōaⁿ--chhut-khì?

14伊就變換親像過印ê土，in出現親像衣服。I chiū piàn-ōaⁿ chhin-chhiūⁿ kè-ìn ê thô͘, In chhut-hiān chhin-chhiūⁿ i-ho̍k.

15Pháiⁿ人所算做in ê光，taⁿ tùi in收倒tńg，kia̍h高ê手beh at折。Pháiⁿ-lâng só͘ sǹg-chòe in ê kng, taⁿ tùi in siu tò-tńg, Kia̍h-koâiⁿ ê chhiú beh at-chi̍h.

16你bat入海ê水源mah？á是bat行tī深淵祕密ê所在mah？Lí bat ji̍p hái ê chúi-goân mah? Á-sī bat kiâⁿ tī chhim-ian pì-bi̍t ê só͘-chāi mah?

17死無ê門有kā你開mah？死蔭ê門，你bat看見mah？Sí-bô ê mn̂g ū kā lí khui mah? Sí-ìm ê mn̂g, lí bat khòaⁿ-kìⁿ mah?

18地ê闊大，你有看透無？你若一盡知，做你講。Tōe ê khoah-tōa, lí ū khòaⁿ-thàu bô? Lí nā it-chīn chai, chòe lí kóng.

19光明khiā起ê所在，hit條路tùi toh落去，koh烏暗ê所在tī toh落；Kng-bêng khiā-khí ê só͘-chāi, hit tiâu lō͘ tùi toh-lo̍h khì, Koh o͘-àm ê só͘-chāi tī toh-lo̍h;

20Thang hō͘你chhōa伊tò去伊ê境界？你能知影透到伊ê厝ê路mah？Thang hō͘ lí chhōa i tò-khì i ê kéng-kài? Lí ōe chai-iáⁿ thàu kàu i ê chhù ê lō͘ mah?

21你知lah，因為hit時你已經出世，你年歲ê數額也chōe。Lí chai--lah, in-ūi hit-sî lí í-keng chhut-sì, Lí nî-hè ê siàu-gia̍h iā chōe.

22你bat入雪ê庫房，á是看見雹ê府庫，Lí bat ji̍p seh ê khò͘-pâng, Á-sī khòaⁿ-kìⁿ pha̍uh ê hú-khò͘,

23就是我所收khǹg來thèng候患難ê期，thèng候相thâi交戰ê日mah？Chiū-sī Góa só͘ siu-khǹg lâi thèng-hāu hoān-lān ê kî, Thèng-hāu saⁿ-thâi kau-chiàn ê ji̍t mah?

24光tùi甚麼路分開？東風tùi甚麼路四界吹tī地上？Kng tùi sím-mi̍h lō͘ pun-khui? Tang-hong tùi sím-mi̍h lō͘ sì-kòe chhe tī tōe-chiūⁿ?

25Chī-chūi kā大雨水開路；á是備辦雷電ê路；Chī-chūi kā tōa hō͘-chúi khui lō͘; Á-sī pī-pān lûi-tiān ê lō͘;

26來落雨tī無人ê地，tī無人khiā起ê曠野；Lâi lo̍h-hō͘ tī bô lâng ê tōe, Tī bô lâng khiā-khí ê khòng-iá;

27Hō͘拋荒荒廢ê地得tio̍h夠額，hō͘青草發生。Hō͘ pha-hng hong-hòe ê tōe tit-tio̍h kàu-gia̍h, Hō͘ chhiⁿ-chháu hoat-siⁿ.

28雨水有老父mah？露水一點一點，是誰 生ê ah？Hō͘-chúi ū lāu-pē mah? Lō͘-chúi chi̍t-tiám chi̍t-tiám, chī-chūi siⁿ-ê ah?

29冰tùi甚麼ê胎出？天ê霜，是是誰 生ê ah？Peng tùi sím-mi̍h ê thai chhut? Thiⁿ ê sng, sī chī-chūi siⁿ-ê ah?

30Chiah-ê水堅定親像石頭，深淵ê面結kui塊。Chiah ê chúi kian-tēng chhin-chhiūⁿ chio̍h-thâu, Chhim-ian ê bīn kiat kui-tè.

31卯星kui簇(chhok)，是你縛ê mah？參星ê帶是你tháu-ê mah？Báu-chhiⁿ kui-chhok, sī lí pa̍k-ê mah? Chham-chhiⁿ ê tòa sī lí tháu-ê mah?

32你hō͘十二宮照伊ê時候出來？也chhōa北斗kap伊所屬ê星mah？Lí hō͘ cha̍p-jī kiong chiàu i ê sî-hāu chhut lâi? Iā chhōa pak-táu kap i só͘ sio̍k ê chhiⁿ mah?

33你知天ê定例mah？á是設伊ê權管轄地mah？Lí chai thiⁿ ê tēng-lē mah? Á-sī siat i ê koân koán-hat tōe mah?

34你能出聲叫雲，hō͘雨水chōe-chōe遮蓋你mah？Lí ōe chhut-siaⁿ kiò hûn, Hō͘ hō͘-chúi chōe-chōe jia-khàm lí mah?

35你能發出sih-nà，in就去，對你講，阮tī-chia。Lí ōe hoat-chhut sih-nà, in chiū khì, tùi lí kóng, Goán tī-chia.

36Chī-chūi用智慧hē tī內面？Chī-chūi賞賜聰明tī心內？Chī-chūi ēng tì-hūi hē tī lāi-bīn? Chī-chūi siúⁿ-sù chhang-miâ tī sim-lāi?

37Chī-chūi能用智慧算雲ê數額？Chī-chūi能piàⁿ天ê盆；Chī-chūi ōe ēng tì-hūi sǹg hûn ê siàu-gia̍h? Chī-chūi ōe piàⁿ thiⁿ ê phûn;

38hit時塵埃成做土糜，土就結kui-thn̂g？Hit-sî tîn-ai chiâⁿ-chòe thô͘-bê, Thô͘ chiū kiat kui-thn̂g?

39你有kā母ê獅la̍k-tio̍h食物？hō͘獅á-thûn食飽mah？Lí ū kā bú ê sai la̍k-tio̍h chia̍h-mi̍h? Hō͘ sai-á-thûn chia̍h-pá mah?

40就是伊tī穴內撐腳，tī隱密ê所在bih-teh ê時。Chiū-sī i tī hia̍t-lāi thìⁿ-kha, Tī ún-ba̍t ê só͘-chāi bih-teh ê sî.

41烏鴉kiáⁿ ǹg上帝哀求；無thang食飛來飛去ê時，是誰為烏鴉備辦食物ah？O͘-a-kiáⁿ ǹg Siōng-tè ai-kiû; Bô thang chia̍h pe-lâi pe-khì ê sî, Chī-chūi ūi o͘-a pī-pān chia̍h-mi̍h ah?

1山裡ê山羊tī時生，你知mah？鹿母生kiáⁿ，你看出mah？Soaⁿ--nih ê soaⁿ-iûⁿ tī-sî siⁿ, lí chai mah? Lo̍k-bú siⁿ-kiáⁿ, lí khòaⁿ-chhut mah?

2In掛kui tī時到月，你會算mah？In tī時生，你會曉得mah？In kòa-kūi(**kui) tī-sî kàu-ge̍h, lí ōe sǹg mah? In tī-sî siⁿ, lí ōe hiáu-tit mah?

3In屈身生kiáⁿ，放出in ê勞苦。In khut-sin siⁿ-kiáⁿ, Pàng-chhut in ê lô-khó͘.

4In ê kiáⁿ漸漸肥phauh，tī山野長大；in出去，就無koh 倒tńg來。In ê kiáⁿ chiām-chiām pûi-phauh, tī soaⁿ-iá tióng-tōa; In chhut-khì, chiū bô koh tò-tńg lâi.

5Chī-chūi放野驢出去自由？Chī-chūi tháu山驢ê索？Chī-chūi pàng iá-lû chhut-khì chū-iû? Chī-chūi tháu soaⁿ-lû ê soh?

6我用曠野做伊ê厝，用鹹ê地做伊khiā起ê所在。Góa ēng khòng-iá chòe i ê chhù, Ēng kiâm ê tōe chòe i khiā-khí ê só͘-chāi.

7伊恥笑城內ê喧嘩，趕 cheng-siⁿ-ê teh hoah，伊也m̄聽。I thí-chhiò siâⁿ-lāi ê soan-hoa, Kóaⁿ cheng-siⁿ-ê teh hoah, i iā m̄-thiaⁿ.

8遍山是伊ê草場；伊也chhē ta̍k樣青翠ê物。Piàn-soaⁿ sī i ê chháu-tiûⁿ; I iā chhē ta̍k-iūⁿ chhiⁿ-chhùi ê mi̍h.

9野牛kiám肯服事你？á是歇tī你ê槽邊？Iá-gû kiám khéng ho̍k-sāi lí? Á-sī hioh tī lí ê chô-piⁿ?

10你會用索縛野牛tī犁溝mah？伊beh tè你耙(pē)山谷mah？Lí ōe ēng soh pa̍k iá-gû tī lôe-kau mah? I beh tè lí pē soaⁿ-kok mah?

11Kiám thang因為伊力大，就óa靠伊？Kiám thang用你ê工交代伊mah？Kiám thang in-ūi i la̍t tōa, chiū óa-khò i? Kiám thang ēng lí ê kang kau-tài i mah?

12你kiám thang信靠伊帶你ê種子tò來；koh收拾你ê五穀場mah？Lí kiám thang sìn-khò i tòa lí ê chéng-chí tò-lâi; Koh siu-si̍p lí ê gō͘-kak-tiûⁿ mah?

13鴕鳥ê翼歡喜teh ia̍t；總是伊ê翼kap毛有慈愛無？Tô-chiáu ê si̍t hoaⁿ-hí teh ia̍t; Chóng-sī i ê si̍t kap mn̂g ū chû-ài bô?

14因為伊放sak伊ê卵tī地裡，hō͘伊tī土沙得tio̍h燒lō；In-ūi i pàng-sak i ê nn̄g tī tōe--nih, Hō͘ i tī thô͘-soa tit-tio̍h sio-lō;

15無想tio̍h腳會lap-tio̍h，野獸會踏tio̍h。Bô siūⁿ-tio̍h kha ōe lap-tio̍h, Iá-siù ōe ta̍h-tio̍h.

16伊無可憐伊ê kiáⁿ，親像m̄是伊ê；伊ê tio̍h磨空空，伊也無掛慮。I bô khó-lîn i ê kiáⁿ, chhin-chhiūⁿ m̄-sī i-ê; I ê tio̍h-bôa khang-khang, i iā bô khòa-lū.

17因為上帝hō͘伊無智慧，也無hō͘伊有靈竅。In-ūi Siōng-tè hō͘ i bô tì-hūi, Iā bô hō͘ i ū lêng-khiàu.

18伊挺身高高ê時，就藐視馬kap騎馬ê。I théng-sin koâiⁿ-koâiⁿ ê sî, Chiū biáu-sī bé kap khiâ-bé--ê.

19馬ê力是你hō͘伊mah？你用話chhàng起來ê鬃moa伊ê頷頸mah？Bé ê la̍t sī lí hō͘ i mah? Lí ēng ōe chhàng--khí-lâi ê chang moa i ê ām-kún mah?

20你hō͘伊tiô跳親像草蜢mah？伊展威phǹg-phǹg哮真thang驚。Lí hō͘ i tiô-thiàu chhin-chhiūⁿ chháu-meh mah? I tián-ui phǹg-phǹg-háu chin thang kiaⁿ.

21伊tī山谷中用蹄耙(pê)土，家己歡喜伊ê力；伊出去迎接兵器。I tī soaⁿ-kok-tiong ēng tôe pê thô͘, ka-kī hoaⁿ-hí i ê la̍t; I chhut-khì ngiâ-chih peng-khì.

22伊藐視thang驚ê事，也無忍；也無因為刀劍來oa̍t倒tńg。I biáu-sī thang kiaⁿ ê sū, iā bô lún; Iā bô in-ūi to-kiàm lâi oa̍t-tò-tńg.

23箭袋kap光nà-nà ê鎗，以及手鏢，tī伊ê身上khiang-khiang哮有聲。Chìⁿ-tē kap kng-nà-nà ê chhiuⁿ, í-ki̍p chhiú-pio, Tī i ê sin-chiūⁿ khiang-khiang-háu ū siaⁿ.

24伊發性kap大受氣，將土吞落去；一下聽見哨角ê聲，就m̄定定khiā-teh。I hoat-sèng kap tōa siū-khì, chiong thô͘ thun--lo̍h-khì; Chi̍t-ē thiaⁿ-kìⁿ sàu-kak ê siaⁿ, chiū m̄ tiāⁿ-tiāⁿ khiā-teh.

25見若哨角tân，伊就講，ā-hah，伊tùi遠遠鼻見交戰，kap軍長親像雷ê聲，以及hoah-hiàm ê聲。Kìⁿ-nā sàu-kak tân, i chiū kóng, Ā-hah, I tùi hn̄g-hn̄g phīⁿ-kìⁿ kau-chiàn, Kap kun-tiúⁿ chhin-chhiūⁿ lûi ê siaⁿ, í-ki̍p hoah-hiàm ê siaⁿ.

26Boa̍h-hio̍h teh飛，thí開伊ê翼，ǹg南去，kiám是靠你ê智慧mah？Boa̍h-hio̍h teh pe, thí-khui i ê si̍t, ǹg-lâm khì, Kiám sī khò lí ê tì-hūi mah?

27鷹鳥chhèng高tī高ê所在作siū，是thàn你ê命令mah？Eng-chiáu chhèng-koâiⁿ tī koâiⁿ ê só͘-chāi choh-siū, Sī thàn lí ê bēng-lēng mah?

28伊tiàm tī石phiâⁿ，khiā起tī山尖kap堅固ê所在。I tiàm tī chio̍h-phiâⁿ, Khiā-khí tī soaⁿ-chiam kap kian-kò͘ ê só͘-chāi.

29Tùi-hia chhē食物，目睭金金看遠遠。Tùi-hia chhē chia̍h-mi̍h, Ba̍k-chiu kim-kim khòaⁿ hn̄g-hn̄g.

30伊ê kiáⁿ suh血；受thâi-ê tī toh落，伊也tī-hia。I ê kiáⁿ suh huih; Siū-thâi-ê tī toh-lo̍h, i iā tī-hia.

1耶和華koh應約伯講，Iâ-hô-hoa koh ìn Iok-pek kóng,

2好辯ê，kiám thang kap全能ê辯論mah？辯駁上帝ê，taⁿ tio̍h應伊。Hò͘ⁿ-piān-ê, kiám thang kap Choân-lêng--ê piān-lūn mah? Piān-pok Siōng-tè ê, taⁿ tio̍h ìn i.

3約伯就應耶和華講，Iok-pek chiū ìn Iâ-hô-hoa kóng,

4看ah，我是微細，我beh用甚麼應答你？我用手掩我ê嘴。Khòaⁿ ah, góa sī bî-sòe, góa beh ēng sím-mi̍h ìn-tap Lí? Góa ēng chhiú ng góa ê chhùi.

5我已經講一pái，taⁿ無beh應；講兩pái，也無koh講。Góa í-keng kóng chi̍t-pái, taⁿ bô beh ìn; Kóng nn̄g-pái, iā bô koh kóng.

6耶和華就tùi大風ê中間應約伯講，Iâ-hô-hoa chiū tùi tōa-hong ê tiong-kan ìn Iok-pek kóng,

7你tio̍h hâ腰親像大丈夫，我問你，你tio̍h應我。Lí tio̍h hâ-io chhin-chhiūⁿ tāi-tiōng-hu, Góa mn̄g lí, lí tio̍h ìn Góa.

8你beh廢無我ê公平mah？你beh擬定我有罪，來顯明家己做義mah？Lí beh hòe-bô Góa ê kong-pêng mah? Lí beh gí-tiāⁿ Góa ū chōe, lâi hián-bêng ka-kī chòe-gī mah?

9你有親像上帝hit號ê手骨mah？你能出聲起雷，親像伊mah？Lí ū chhin-chhiūⁿ Siōng-tè hit-hō ê chhiú-kut mah? Lí ōe chhut-siaⁿ khí-lûi, chhin-chhiūⁿ I mah?

10Taⁿ你thang用尊貴威嚴做裝飾，用榮光美妙做衣服。Taⁿ lí thang ēng chun-kùi ui-giâm chòe chng-thāⁿ, Ēng êng-kng bí-biāu chòe i-ho̍k.

11Tio̍h piàⁿ出你滿滿ê受氣；看一切驕傲ê人，hō͘伊降低。Tio̍h piàⁿ-chhut lí móa-móa ê siū-khì; Khòaⁿ it-chhè kiau-ngō͘ ê lâng, hō͘ i kàng-kē.

12看一切驕傲ê人，押chhi̍h hō͘伊低，踏pháiⁿ人tī in所khiā ê地。Khòaⁿ it-chhè kiau-ngō͘ ê lâng, ah-chhi̍h hō͘ i kē, Ta̍h pháiⁿ-lâng tī in só͘ khiā ê tōe.

13Kā in做一下khǹg tī土粉；包密in ê面tī烏暗密ê所在。Kā in chòe chi̍t-ē khǹg tī thô͘-hún; Pau-ba̍t in ê bīn tī o͘-àm ba̍t ê só͘-chāi.

14Án-ni我就承認你；真正你ê chiàⁿ手能救你。Án-ni Góa chiū sêng-jīn lí; Chin-chiàⁿ lí ê chiàⁿ-chhiú ōe kiù lí.

15Taⁿ你看河馬，我造你，也造伊；伊食草親像牛。Taⁿ lí khòaⁿ hô-bé, Góa chō lí, iā chō i; I chia̍h-chháu chhin-chhiūⁿ gû.

16看ah，伊ê氣力在tī伊ê腰，伊ê能力tī伊腹肚ê肌肉。Khòaⁿ ah, i ê khùi-la̍t chāi-tī i ê io, I ê lêng-le̍k tī i pak-tó͘ ê ki-bah.

17伊搖尾親像柏香樹；伊大腿ê筋相連絡；I iô-bé chhin-chhiūⁿ pek-hiuⁿ-chhiū; I tōa-thúi ê kun saⁿ liân-lo̍k;

18伊ê骨頭親像銅管，伊ê肢體親像鐵條。I ê kut-thâu chhin-chhiūⁿ tâng-kńg, I ê chi-thé chhin-chhiūⁿ thih-tiâu.

19伊是上帝chiah-ê工ê第一；創造伊ê會用刀親近伊。I sī Siōng-tè chiah ê kang ê tē-it; Chhòng-chō i--ê ōe ēng to chhin-kūn i.

20Chiah-ê山實在kā伊出食物，田野ê百獸也thit-thô tī-hia。Chiah ê soaⁿ si̍t-chāi kā i chhut chia̍h-mi̍h, Chhân-iá ê pah-siù iā thit-thô tī-hia.

21伊倒tī連花葉腳，睏tī kui苞蘆竹ê蔭影下，kap水窟內。I tó tī liân-hoe-hio̍h kha, Khùn tī kui-phō lô͘-tek ê ìm-ńg-ē, kap chúi-khut-lāi.

22連花葉ê蔭影遮蓋伊；溪邊ê柳樹圍se̍h伊。Liân-hoe-hio̍h ê ìm-ńg jia-khàm i; Khoe-piⁿ ê liú-chhiū ûi-se̍h i.

23看ah，就若河水氾濫，伊也無驚；約旦河漲到伊ê嘴，伊也安然。Khòaⁿ ah, chiū nā hô-chúi hoàn-lām, i iā bô kiaⁿ; Iok-tàn hô tiòng kàu i ê chhùi, i iā an-jiân.

24Chī-chūi能tī伊目睭金金ê時掠tio̍h伊，á是用活釦kǹg伊ê鼻ah？Chī-chūi ōe tī i ba̍k-chiu kim-kim ê sî lia̍h-tio̍h i, Á-sī ēng oa̍h-khàu kǹg i ê phīⁿ ah?