1後來約伯開嘴，咒詛伊ê日。Āu-lâi Iok-pek khui-chhùi, chiù-chó͘ i ê ji̍t.

2約伯開嘴講：Iok-pek khui-chhùi kóng:

3我出世ê日，願hit-ê日無去；講，有懷孕ta-po͘-kiáⁿ hit暝，願hit-ê暝也無去。Góa chhut-sì ê ji̍t, goān hit ê ji̍t bô--khì; Kóng, ū hoâi-īn ta-po͘-kiáⁿ hit-mî, goān hit ê mî iā bô--khì.

4願hit-ê日變做烏暗；願上帝無tùi頂面看顧伊，光也無照伊。Goān hit ê ji̍t pìⁿ-chòe o͘-àm; Goān Siōng-tè bô tùi téng-bīn khòaⁿ-kò͘ i, Kng iā bô chiò i.

5願烏暗kap死蔭侵取伊；願密雲停tī伊ê頂面，願hō͘日變烏暗ê phah驚伊。Goān o͘-àm kap sí-ìm chhim-chhú i; Goān ba̍t-hûn thêng tī i ê téng-bīn, Goān hō͘ ji̍t piàn o͘-àm--ê phah-kiaⁿ i.

6論到hit暝，願烏暗搶去；願伊無kap 年中hiah-ê日同歡喜；也無入tī hiah-ê月ê數額。Lūn-kàu hit-mî, goān o͘-àm chhiúⁿ-khì; Goān i bô kap nî-tiong hiah ê ji̍t tâng hoaⁿ-hí; Iā bô ji̍p tī hiah ê ge̍h ê siàu-gia̍h.

7Ā！願hit暝無有生kiáⁿ；in中間無歡喜ê聲。Ā! Goān hit-mî bô ū siⁿ-kiáⁿ; In tiong-kan bô hoaⁿ-hí ê siaⁿ.

8願hiah-ê咒詛日ê，咒詛伊；以及hiah-ê會激動龍ê，咒詛伊。Goān hiah ê chiù-chó͘ ji̍t ê, chiù-chó͘ i; Í-ki̍p hiah-ê ōe kek-tōng lêng ê, chiù-chó͘ i.

9願hit暝天phú光ê星變烏暗；願伊ǹg望光也bōe得tio̍h；也無看見早起時天拆ha̍h；Goān hit-mî thiⁿ-phú-kng ê chhiⁿ pìⁿ o͘-àm; Goān i ǹg-bāng kng iā bōe tit-tio̍h; Iā bô khòaⁿ-kìⁿ chá-khí-sî thiⁿ thiah-ha̍h;

10因為無關密生我ê子宮，也無對我ê目睭遮蓋患難。In-ūi bô koaiⁿ-ba̍t siⁿ góa ê chú-kiong, Iā bô tùi góa ê ba̍k-chiu jia-khàm hoān-lān.

11我啥事無tī胎裡就死？啥事出腹肚，無續斷氣？Góa siáⁿ-sū bô tī thai--nih chiū sí? Siáⁿ-sū chhut pak-tó͘, bô sòa tn̄g-khùi?

12啥事有腳頭u接我？啥事有奶hō͘我suh？Siáⁿ-sū ū kha-thâu-u chih góa? Siáⁿ-sū ū ni hō͘ góa suh?

13若無án-ni，我已經倒teh來安然，已經睏來靜靜；Nā-bô án-ni, góa í-keng tó-teh lâi an-jiân, Í-keng khùn lâi chēng-chēng;

14Kap地上列王謀士相kap tī-teh，in bat為家己起造拋荒ê所在；Kap tōe-chiūⁿ lia̍t-ông bô͘-sū saⁿ-kap tī-teh, In bat ūi ka-kī khí-chō pha-hng ê só͘-chāi;

15á是kap有金ê首領tī-teh；in bat用銀充滿in ê厝ê。Á-sī kap ū kim ê siú-léng tī-teh; In bat ēng gûn chhiong-móa in ê chhù ê.

16á是親像ka-la̍uh身來掩密ê，我就無去；親像bē見tio̍h光ê嬰á。Á-sī chhin-chhiūⁿ ka-la̍uh sin lâi iám-ba̍t ê, góa chiū bô--khì; Chhin-chhiūⁿ bē kìⁿ-tio̍h kng ê eⁿ-á.

17Tī-hia pháiⁿ人soah伊ê攪擾；tī-hia厭倦ê得tio̍h安歇。Tī-hia pháiⁿ-lâng soah i ê kiáu-jiáu; Tī-hia ià-siān-ê tit-tio̍h an-hioh.

18Tī-hia受掠ê人相kap得tio̍h安然，無聽見督工ê ê聲。Tī-hia siū-lia̍h ê lâng saⁿ-kap tit-tio̍h an-jiân, Bô thiaⁿ-kìⁿ tok-kang--ê ê siaⁿ.

19序細序大lóng tī-hia；奴僕脫離伊ê主人。Sī-sòe sī-tōa lóng tī-hia; Lô͘-po̍k thoat-lī i ê chú-lâng.

20受苦難ê人，啥事hō͘伊有光ah？心內憂苦ê人，啥事hō͘伊有活命？Siū khó͘-lān ê lâng, siáⁿ-sū hō͘ i ū kng ah? Sim-lāi iu-khó͘ ê lâng, siáⁿ-sū hō͘ i ū oa̍h-miā?

21In ǹg望死，也bōe得tio̍h，chhē伊，比掘khǹg密ê寶貝khah出力。In ǹg-bāng sí, iā bōe tit-tio̍h, Chhē i, pí ku̍t khǹg-ba̍t ê pó-pòe khah chhut-la̍t.

22In chhē-tio̍h墳墓就快樂；歡喜到bōe顧得。In chhē-tio̍h hûn-bōng chiū khoài-lo̍k; Hoaⁿ-hí kàu bōe-kò͘--tit.

23人ê前途已經暗bong-bong，上帝四面圍困伊，啥事hō͘伊有光ah？Lâng ê chiân-tô͘ í-keng àm-bong-bong, Siōng-tè sì-bīn ûi-khùn i, siáⁿ-sū hō͘ i ū kng ah?

24因為我用吐氣替食物；我大聲哮，親像大水chhèng出。In-ūi góa ēng thó͘-khùi thòe chia̍h-mi̍h; Góa tōa-siaⁿ háu, chhin-chhiūⁿ tōa-chúi chhèng-chhut.

25因為我所真驚ê臨到我；我所驚惶ê到tī我。In-ūi góa só͘ chin-kiaⁿ-ê lîm-kàu góa; Góa só͘ kiaⁿ-hiâⁿ-ê kàu tī góa.

26我bōe得tio̍h安然，bōe得tio̍h平靜，bōe得tio̍h安歇，總是有患難來。Góa bōe tit-tio̍h an-jiân, bōe tit-tio̍h pêng-chēng, bōe tit-tio̍h an-hioh, Chóng-sī ū hoān-lān lâi.

1Thê-bān人Í-lī-hoat應講，Thê-bān lâng Í-lī-hoat ìn kóng,

2人若beh kap你談論，你會嫌厭bōe？總是是誰能家己約束無講話ah？Lâng nā beh kap lí tâm-lūn, lí ōe hiâm-ià bōe? Chóng-sī chī-chūi ōe ka-kī iok-sok bô kóng-ōe ah?

3看ah，你bat教示chōe-chōe人，軟弱ê手你也hō͘伊giám硬。Khòaⁿ ah, lí bat kà-sī chōe-chōe lâng, Loán-jio̍k ê chhiú lí iā hō͘ i giám-ngī.

4Beh跋倒ê，你用話扶伊；腳頭u酸軟ê，你hō͘伊勇健。Beh poa̍h-tó-ê, lí ēng ōe hû i; Kha-thâu-u sng-nńg ê, lí hō͘ i ióng-kiāⁿ.

5總是taⁿ tāi-chì到tī你，你就昏迷；kha̍p-tio̍h你，你就驚惶。Chóng-sī taⁿ tāi-chì kàu tī lí, lí chiū hun-bê; Kha̍p-tio̍h lí, lí chiū kiaⁿ-hiâⁿ.

6你ê óa靠kiám m̄是在tī你ê敬畏mah？你ê ǹg望kiám m̄是在tī你所行ê純全mah？Lí ê óa-khò kiám m̄-sī chāi-tī lí ê kèng-ùi mah? Lí ê ǹg-bāng kiám m̄-sī chāi-tī lí só͘ kiâⁿ ê sûn-choân mah?

7請你想看，無罪ê人是誰有死無？正直ê人tī甚麼所在受剪除？Chhiáⁿ lí siūⁿ-khòaⁿ, bô-chōe ê lâng chī-chūi ū sí-bô? Chèng-ti̍t ê lâng tī sím-mi̍h só͘-chāi siū chián-tû?

8照我看，用罪過種作，用惡毒做種子來掖ê，所收成也是án-ni。Chiàu góa khòaⁿ, ēng chōe-kòa chèng-choh, Ēng ok-to̍k chòe chéng-chí lâi iā ê, só͘ siu-sêng iā sī án-ni.

9上帝pûn氣，in就死無；對伊大受氣ê風，in就消滅。Siōng-tè pûn-khùi, in chiū sí-bô; Tùi I tōa siū-khì ê hong, in chiū siau-bia̍t.

10獅ê哮，猛獅ê聲，lóng soah；獅á-thûn ê嘴齒，lóng phah折。Sai ê háu, béng-sai ê siaⁿ, lóng soah; Sai-á-thûn ê chhùi-khí, lóng phah-chi̍h.

11老ê獅，因為無thang食就死；母ê獅，hiah-ê kiáⁿ也lóng四散。Lāu ê sai, in-ūi bô thang chia̍h chiū sí; Bú ê sai, hiah ê kiáⁿ iā lóng sì-sòaⁿ.

12有tāi-chì暗靜到tī我，我耳孔也聽見伊細細ê聲。Ū tāi-chì àm-chīⁿ kàu tī góa, Góa hī-khang iā thiaⁿ-kìⁿ i sòe-sòe ê siaⁿ.

13Tùi暝時異象ê思想，就是人睏重眠ê時，Tùi mî--sî īⁿ-siōng ê su-siúⁿ, Chiū-sī lâng khùn tāng-bîn ê sî,

14驚惶ngia̍uh-ngia̍uh-chhoah臨到我，hō͘我ê百骨khe̍h-khe̍h-tiō。Kiaⁿ-hiâⁿ ngia̍uh-ngia̍uh-chhoah lîm-kàu góa, Hō͘ góa ê pah-kut khe̍h-khe̍h-tiō.

15有神tùi我面前經過；我身軀ê毛管chhàng起來。Ū sîn tùi góa bīn-chêng keng-kè; Góa seng-khu ê mn̂g-kńg chhàng--khí-lâi.

16伊停teh，總是我bōe看明伊ê形狀；有像tī我目睭前；靜chauh-chauh，我聽見有聲，講，I thêng-teh, chóng-sī góa bōe khòaⁿ-bêng i ê hêng-chōng; Ū siōng tī góa ba̍k-chiu chêng; Chēng chauh-chauh, góa thiaⁿ-kìⁿ ū siaⁿ, kóng,

17會死ê人對tī上帝kiám是義mah？人對tī創造伊ê，kiám是清氣mah？Ōe-sí ê lâng tùi tī Siōng-tè kiám-sī gī mah? Lâng tùi tī chhòng-chō i ê, kiám sī chheng-khì mah?

18看ah，伊lóng無信用伊ê奴僕，也嫌伊ê使者做愚戇。Khòaⁿ ah, I lóng bô sìn-iōng I ê lô͘-po̍k, Iā hiâm I ê sù-chiá chòe gû-gōng.

19何況hiah-ê khiā起tī土厝，伊ê根基在tī土粉，比蛀蟲khah快死ê。Hô-hòng hiah ê khiā-khí tī thô͘-chhù, I ê kun-ki chāi-tī thô͘-hún, Pí chiù-thâng khah-khoài sí--ê.

20Tùi早起到ê-hng，就tú-tio̍h毀滅，永永無去，無人掛意。Tùi chá-khí kàu ê-hng, chiū tú-tio̍h húi-bia̍t, Éng-éng bô--khì, bô lâng khòa-ì.

21伊布棚ê索kiám無tùi中央拔出來？伊ê死，lóng無智慧。I pò͘-pîⁿ ê soh kiám bô tùi tiong-ng pu̍ih--chhut-lâi? I ê sí, lóng bô tì-hūi.

1Taⁿ做你求叫，看有是誰應你ah？chiah-ê聖ê ê中間，你beh ǹg 是誰 ah？Taⁿ chòe lí kiû-kiò, khòaⁿ ū chī-chūi ìn lí ah? Chiah ê sèng--ê ê tiong-kan, lí beh ǹg chī-chūi ah?

2因為受氣ê心，會害死戇人；怨妒會thâi死ham-bān ê人。In-ūi siū-khì ê sim, ōe hāi-sí gōng-lâng; Oàn-tò͘ ōe thâi-sí ham-bān ê lâng.

3我bat看見戇人釘根，總是忽然間我咒詛伊khiā起ê所在。Góa bat khòaⁿ-kìⁿ gōng-lâng tèng-kun, Chóng-sī hut-jiân-kan góa chiù-chó͘ i khiā-khí ê só͘-chāi.

4伊ê kiáⁿ兒離開安穩遠遠；tī城門受壓迫，也無有拯救in ê。I ê kiáⁿ-jî lī-khui an-ún hn̄g-hn̄g; Tī siâⁿ-mn̂g siū ap-pek, iā bô ū chín-kiù in ê.

5Iau ê人食伊所收成ê，tī刺phè內也搶去，有活tauh開嘴吞伊ê財物。Iau ê lâng chia̍h i só͘ siu-sêng ê, Tī chhì-phè-lāi iā chhiúⁿ--khì, Ū oa̍h-tauh khui-chhùi thun i ê châi-bu̍t.

6因為災厄m̄是tùi土裡出來，患難也m̄是tùi地裡發生；In-ūi chai-ē m̄-sī tùi thô͘--nih chhut-lâi, Hoān-lān iā m̄-sī tùi tōe--nih hoat-siⁿ;

7總是人出世定tio̍h有患難，親像火星飛上高。Chóng-sī lâng chhut-sì tiāⁿ-tio̍h ū hoān-lān, Chhin-chhiūⁿ hé-chhiⁿ pe-chiūⁿ koâiⁿ.

8換做我，我beh求叫上帝；將我ê事交代上帝。Ōaⁿ-chòe góa, góa beh kiû-kiò Siōng-tè; Chiong góa ê sū kau-tài Siōng-tè.

9就是行tāi-chì大到bōe測度得ê，行奇事算bōe了ê。Chiū-sī kiâⁿ tāi-chì tōa kàu bōe chhek-to̍k-tit ê, Kiâⁿ kî-sū sǹg-bōe-liáu-ê.

10伊落雨tī地面上，賞賜水tī田園裡。I lo̍h hō͘ tī tōe-bīn-chiūⁿ, Siúⁿ-sù chúi tī chhân-hn̂g--nih.

11Beh安置卑微ê tī高ê所在；beh舉起哀慘ê tī安穩ê地。Beh an-tì pi-bî-ê tī koâiⁿ ê só͘-chāi; Beh kú-khí ai-chhám-ê tī an-ún ê tōe.

12伊破壞káu-koài ê人ê計謀，致到in ê手所做ê bōe成功。I phò-hoāi káu-koài ê lâng ê kè-bô͘, Tì-kàu in ê chhiú só͘ chòe ê bōe sêng-kong.

13伊hō͘智慧ê人中家己ê詭計；hō͘詭譎ê人ê計謀緊緊敗。I hō͘ tì-hūi ê lâng tiòng ka-kī ê khúi-kè; Hō͘ khúi-khiat ê lâng ê kè-bô͘ kín-kín pāi.

14In日時tú-tio̍h烏暗，日中晝四界bong，親像暝時。In ji̍t--sî tú-tio̍h o͘-àm, Ji̍t tiong-tàu sì-kòe bong, chhin-chhiūⁿ mî--sî.

15伊救sòng-hiong人，脫離in ê嘴ê刀劍，以及強暴ê人ê手。I kiù sòng-hiong lâng, thoat-lī in ê chhùi ê to-kiàm, Í-ki̍p kiông-pō ê lâng ê chhiú.

16Tùi án-ni，軟chiáⁿ-ê有ǹg望，不義ê，嘴塞密。Tùi án-ni, nńg-chiáⁿ-ê ū ǹg-bāng, Put-gī-ê, chhùi that-ba̍t.

17看ah，上帝所警戒ê，hit人有福氣；所以m̄-thang看輕全能ê ê督責。Khòaⁿ ah, Siōng-tè só͘ kéng-kài-ê, hit-lâng ū hok-khì; Só͘-í m̄-thang khòaⁿ-khin Choân-lêng--ê ê tok-chek.

18因為伊hō͘人痛疼，就kā伊包密；伊傷人，也伊ê手醫好伊。In-ūi I hō͘ lâng thàng-thiàⁿ, chiū kā i pau-ba̍t; I siong lâng, iā I ê chhiú i-hó i.

19伊beh救你，tī六pái ê患難；就若七pái，災害也無kha̍p-tio̍h你。I beh kiù lí, tī la̍k-pái ê hoān-lān; chiū nā chhit-pái, chai-hāi iā bô kha̍p-tio̍h lí.

20Tī飢荒ê時，伊beh救你脫離死；tī交戰ê時，伊beh救你脫離刀劍ê勢力。Tī ki-hng ê sî, I beh kiù lí thoat-lī sí; Tī kau-chiàn ê sî, I beh kiù lí thoat-lī to-kiàm ê sè-le̍k.

21你beh得tio̍h khǹg密，免受嘴舌ê攻擊；災厄到ê時，你也免驚。Lí beh tit-tio̍h khǹg-ba̍t, bián siū chhùi-chi̍h ê kong-kek; Chai-ē kàu ê sî, lí iā bián kiaⁿ.

22災害kap飢荒，你beh笑伊，地上ê野獸，你也免驚。Chai-hāi kap ki-hng, lí beh chhiò i, tōe-chiūⁿ ê iá-siù, lí iā bián kiaⁿ.

23因為你beh kap田園裡ê石結約；田野ê獸也beh kap你和好。In-ūi lí beh kap chhân-hn̂g--nih ê chio̍h kiat-iok; Chhân-iá ê siù iā beh kap lí hô-hó.

24你beh知你ê布棚平安；你beh去看你ê羊寮lóng無欠缺。Lí beh chai lí ê pò͘-pîⁿ pêng-an; Lí beh khì khòaⁿ lí ê iûⁿ-tiâu lóng bô khiàm-kheh.

25你也beh知你ê kiáⁿ孫chōe-chōe，你ê後裔親像地上ê青草。Lí iā beh chai lí ê kiáⁿ-sun chōe-chōe, Lí ê hō͘-è chhin-chhiūⁿ tōe-chiūⁿ ê chhiⁿ-chháu.

26你beh歲壽滿足chiah歸墓，親像稻綑到時收khǹg。Lí beh hè-siū móa-chiok chiah kui bōng, Chhin-chhiūⁿ tiū-khún kàu-sî siu-khǹg.

27看ah，這阮有查到徹底，實在是án-ni；你tio̍h聽，知是做你ê利益。Khòaⁿ ah, che goán ū chhâ kàu thiat-tí, si̍t-chāi sī án-ni; Lí tio̍h thiaⁿ, chai sī chòe lí ê lī-ek.