1山裡ê山羊tī時生，你知mah？鹿母生kiáⁿ，你看出mah？Soaⁿ--nih ê soaⁿ-iûⁿ tī-sî siⁿ, lí chai mah? Lo̍k-bú siⁿ-kiáⁿ, lí khòaⁿ-chhut mah?

2In掛kui tī時到月，你會算mah？In tī時生，你會曉得mah？In kòa-kūi(**kui) tī-sî kàu-ge̍h, lí ōe sǹg mah? In tī-sî siⁿ, lí ōe hiáu-tit mah?

3In屈身生kiáⁿ，放出in ê勞苦。In khut-sin siⁿ-kiáⁿ, Pàng-chhut in ê lô-khó͘.

4In ê kiáⁿ漸漸肥phauh，tī山野長大；in出去，就無koh 倒tńg來。In ê kiáⁿ chiām-chiām pûi-phauh, tī soaⁿ-iá tióng-tōa; In chhut-khì, chiū bô koh tò-tńg lâi.

5Chī-chūi放野驢出去自由？Chī-chūi tháu山驢ê索？Chī-chūi pàng iá-lû chhut-khì chū-iû? Chī-chūi tháu soaⁿ-lû ê soh?

6我用曠野做伊ê厝，用鹹ê地做伊khiā起ê所在。Góa ēng khòng-iá chòe i ê chhù, Ēng kiâm ê tōe chòe i khiā-khí ê só͘-chāi.

7伊恥笑城內ê喧嘩，趕 cheng-siⁿ-ê teh hoah，伊也m̄聽。I thí-chhiò siâⁿ-lāi ê soan-hoa, Kóaⁿ cheng-siⁿ-ê teh hoah, i iā m̄-thiaⁿ.

8遍山是伊ê草場；伊也chhē ta̍k樣青翠ê物。Piàn-soaⁿ sī i ê chháu-tiûⁿ; I iā chhē ta̍k-iūⁿ chhiⁿ-chhùi ê mi̍h.

9野牛kiám肯服事你？á是歇tī你ê槽邊？Iá-gû kiám khéng ho̍k-sāi lí? Á-sī hioh tī lí ê chô-piⁿ?

10你會用索縛野牛tī犁溝mah？伊beh tè你耙(pē)山谷mah？Lí ōe ēng soh pa̍k iá-gû tī lôe-kau mah? I beh tè lí pē soaⁿ-kok mah?

11Kiám thang因為伊力大，就óa靠伊？Kiám thang用你ê工交代伊mah？Kiám thang in-ūi i la̍t tōa, chiū óa-khò i? Kiám thang ēng lí ê kang kau-tài i mah?

12你kiám thang信靠伊帶你ê種子tò來；koh收拾你ê五穀場mah？Lí kiám thang sìn-khò i tòa lí ê chéng-chí tò-lâi; Koh siu-si̍p lí ê gō͘-kak-tiûⁿ mah?

13鴕鳥ê翼歡喜teh ia̍t；總是伊ê翼kap毛有慈愛無？Tô-chiáu ê si̍t hoaⁿ-hí teh ia̍t; Chóng-sī i ê si̍t kap mn̂g ū chû-ài bô?

14因為伊放sak伊ê卵tī地裡，hō͘伊tī土沙得tio̍h燒lō；In-ūi i pàng-sak i ê nn̄g tī tōe--nih, Hō͘ i tī thô͘-soa tit-tio̍h sio-lō;

15無想tio̍h腳會lap-tio̍h，野獸會踏tio̍h。Bô siūⁿ-tio̍h kha ōe lap-tio̍h, Iá-siù ōe ta̍h-tio̍h.

16伊無可憐伊ê kiáⁿ，親像m̄是伊ê；伊ê tio̍h磨空空，伊也無掛慮。I bô khó-lîn i ê kiáⁿ, chhin-chhiūⁿ m̄-sī i-ê; I ê tio̍h-bôa khang-khang, i iā bô khòa-lū.

17因為上帝hō͘伊無智慧，也無hō͘伊有靈竅。In-ūi Siōng-tè hō͘ i bô tì-hūi, Iā bô hō͘ i ū lêng-khiàu.

18伊挺身高高ê時，就藐視馬kap騎馬ê。I théng-sin koâiⁿ-koâiⁿ ê sî, Chiū biáu-sī bé kap khiâ-bé--ê.

19馬ê力是你hō͘伊mah？你用話chhàng起來ê鬃moa伊ê頷頸mah？Bé ê la̍t sī lí hō͘ i mah? Lí ēng ōe chhàng--khí-lâi ê chang moa i ê ām-kún mah?

20你hō͘伊tiô跳親像草蜢mah？伊展威phǹg-phǹg哮真thang驚。Lí hō͘ i tiô-thiàu chhin-chhiūⁿ chháu-meh mah? I tián-ui phǹg-phǹg-háu chin thang kiaⁿ.

21伊tī山谷中用蹄耙(pê)土，家己歡喜伊ê力；伊出去迎接兵器。I tī soaⁿ-kok-tiong ēng tôe pê thô͘, ka-kī hoaⁿ-hí i ê la̍t; I chhut-khì ngiâ-chih peng-khì.

22伊藐視thang驚ê事，也無忍；也無因為刀劍來oa̍t倒tńg。I biáu-sī thang kiaⁿ ê sū, iā bô lún; Iā bô in-ūi to-kiàm lâi oa̍t-tò-tńg.

23箭袋kap光nà-nà ê鎗，以及手鏢，tī伊ê身上khiang-khiang哮有聲。Chìⁿ-tē kap kng-nà-nà ê chhiuⁿ, í-ki̍p chhiú-pio, Tī i ê sin-chiūⁿ khiang-khiang-háu ū siaⁿ.

24伊發性kap大受氣，將土吞落去；一下聽見哨角ê聲，就m̄定定khiā-teh。I hoat-sèng kap tōa siū-khì, chiong thô͘ thun--lo̍h-khì; Chi̍t-ē thiaⁿ-kìⁿ sàu-kak ê siaⁿ, chiū m̄ tiāⁿ-tiāⁿ khiā-teh.

25見若哨角tân，伊就講，ā-hah，伊tùi遠遠鼻見交戰，kap軍長親像雷ê聲，以及hoah-hiàm ê聲。Kìⁿ-nā sàu-kak tân, i chiū kóng, Ā-hah, I tùi hn̄g-hn̄g phīⁿ-kìⁿ kau-chiàn, Kap kun-tiúⁿ chhin-chhiūⁿ lûi ê siaⁿ, í-ki̍p hoah-hiàm ê siaⁿ.

26Boa̍h-hio̍h teh飛，thí開伊ê翼，ǹg南去，kiám是靠你ê智慧mah？Boa̍h-hio̍h teh pe, thí-khui i ê si̍t, ǹg-lâm khì, Kiám sī khò lí ê tì-hūi mah?

27鷹鳥chhèng高tī高ê所在作siū，是thàn你ê命令mah？Eng-chiáu chhèng-koâiⁿ tī koâiⁿ ê só͘-chāi choh-siū, Sī thàn lí ê bēng-lēng mah?

28伊tiàm tī石phiâⁿ，khiā起tī山尖kap堅固ê所在。I tiàm tī chio̍h-phiâⁿ, Khiā-khí tī soaⁿ-chiam kap kian-kò͘ ê só͘-chāi.

29Tùi-hia chhē食物，目睭金金看遠遠。Tùi-hia chhē chia̍h-mi̍h, Ba̍k-chiu kim-kim khòaⁿ hn̄g-hn̄g.

30伊ê kiáⁿ suh血；受thâi-ê tī toh落，伊也tī-hia。I ê kiáⁿ suh huih; Siū-thâi-ê tī toh-lo̍h, i iā tī-hia.

1耶和華koh應約伯講，Iâ-hô-hoa koh ìn Iok-pek kóng,

2好辯ê，kiám thang kap全能ê辯論mah？辯駁上帝ê，taⁿ tio̍h應伊。Hò͘ⁿ-piān-ê, kiám thang kap Choân-lêng--ê piān-lūn mah? Piān-pok Siōng-tè ê, taⁿ tio̍h ìn i.

3約伯就應耶和華講，Iok-pek chiū ìn Iâ-hô-hoa kóng,

4看ah，我是微細，我beh用甚麼應答你？我用手掩我ê嘴。Khòaⁿ ah, góa sī bî-sòe, góa beh ēng sím-mi̍h ìn-tap Lí? Góa ēng chhiú ng góa ê chhùi.

5我已經講一pái，taⁿ無beh應；講兩pái，也無koh講。Góa í-keng kóng chi̍t-pái, taⁿ bô beh ìn; Kóng nn̄g-pái, iā bô koh kóng.

6耶和華就tùi大風ê中間應約伯講，Iâ-hô-hoa chiū tùi tōa-hong ê tiong-kan ìn Iok-pek kóng,

7你tio̍h hâ腰親像大丈夫，我問你，你tio̍h應我。Lí tio̍h hâ-io chhin-chhiūⁿ tāi-tiōng-hu, Góa mn̄g lí, lí tio̍h ìn Góa.

8你beh廢無我ê公平mah？你beh擬定我有罪，來顯明家己做義mah？Lí beh hòe-bô Góa ê kong-pêng mah? Lí beh gí-tiāⁿ Góa ū chōe, lâi hián-bêng ka-kī chòe-gī mah?

9你有親像上帝hit號ê手骨mah？你能出聲起雷，親像伊mah？Lí ū chhin-chhiūⁿ Siōng-tè hit-hō ê chhiú-kut mah? Lí ōe chhut-siaⁿ khí-lûi, chhin-chhiūⁿ I mah?

10Taⁿ你thang用尊貴威嚴做裝飾，用榮光美妙做衣服。Taⁿ lí thang ēng chun-kùi ui-giâm chòe chng-thāⁿ, Ēng êng-kng bí-biāu chòe i-ho̍k.

11Tio̍h piàⁿ出你滿滿ê受氣；看一切驕傲ê人，hō͘伊降低。Tio̍h piàⁿ-chhut lí móa-móa ê siū-khì; Khòaⁿ it-chhè kiau-ngō͘ ê lâng, hō͘ i kàng-kē.

12看一切驕傲ê人，押chhi̍h hō͘伊低，踏pháiⁿ人tī in所khiā ê地。Khòaⁿ it-chhè kiau-ngō͘ ê lâng, ah-chhi̍h hō͘ i kē, Ta̍h pháiⁿ-lâng tī in só͘ khiā ê tōe.

13Kā in做一下khǹg tī土粉；包密in ê面tī烏暗密ê所在。Kā in chòe chi̍t-ē khǹg tī thô͘-hún; Pau-ba̍t in ê bīn tī o͘-àm ba̍t ê só͘-chāi.

14Án-ni我就承認你；真正你ê chiàⁿ手能救你。Án-ni Góa chiū sêng-jīn lí; Chin-chiàⁿ lí ê chiàⁿ-chhiú ōe kiù lí.

15Taⁿ你看河馬，我造你，也造伊；伊食草親像牛。Taⁿ lí khòaⁿ hô-bé, Góa chō lí, iā chō i; I chia̍h-chháu chhin-chhiūⁿ gû.

16看ah，伊ê氣力在tī伊ê腰，伊ê能力tī伊腹肚ê肌肉。Khòaⁿ ah, i ê khùi-la̍t chāi-tī i ê io, I ê lêng-le̍k tī i pak-tó͘ ê ki-bah.

17伊搖尾親像柏香樹；伊大腿ê筋相連絡；I iô-bé chhin-chhiūⁿ pek-hiuⁿ-chhiū; I tōa-thúi ê kun saⁿ liân-lo̍k;

18伊ê骨頭親像銅管，伊ê肢體親像鐵條。I ê kut-thâu chhin-chhiūⁿ tâng-kńg, I ê chi-thé chhin-chhiūⁿ thih-tiâu.

19伊是上帝chiah-ê工ê第一；創造伊ê會用刀親近伊。I sī Siōng-tè chiah ê kang ê tē-it; Chhòng-chō i--ê ōe ēng to chhin-kūn i.

20Chiah-ê山實在kā伊出食物，田野ê百獸也thit-thô tī-hia。Chiah ê soaⁿ si̍t-chāi kā i chhut chia̍h-mi̍h, Chhân-iá ê pah-siù iā thit-thô tī-hia.

21伊倒tī連花葉腳，睏tī kui苞蘆竹ê蔭影下，kap水窟內。I tó tī liân-hoe-hio̍h kha, Khùn tī kui-phō lô͘-tek ê ìm-ńg-ē, kap chúi-khut-lāi.

22連花葉ê蔭影遮蓋伊；溪邊ê柳樹圍se̍h伊。Liân-hoe-hio̍h ê ìm-ńg jia-khàm i; Khoe-piⁿ ê liú-chhiū ûi-se̍h i.

23看ah，就若河水氾濫，伊也無驚；約旦河漲到伊ê嘴，伊也安然。Khòaⁿ ah, chiū nā hô-chúi hoàn-lām, i iā bô kiaⁿ; Iok-tàn hô tiòng kàu i ê chhùi, i iā an-jiân.

24Chī-chūi能tī伊目睭金金ê時掠tio̍h伊，á是用活釦kǹg伊ê鼻ah？Chī-chūi ōe tī i ba̍k-chiu kim-kim ê sî lia̍h-tio̍h i, Á-sī ēng oa̍h-khàu kǹg i ê phīⁿ ah?

1你能用鉤拖鱷魚起來mah？能用索liù伊ê舌mah？Lí ōe ēng kau thoa go̍k-hî khí-lâi mah? Ōe ēng soh liù i ê chi̍h mah?

2你能用索kǹg伊ê鼻mah？能用刺鑿透伊ê牙槽mah？Lí ōe ēng soh kǹg i ê phīⁿ mah? Ōe ēng chhì chha̍k-thàu i ê gê-chô mah?

3伊beh用chōe-chōe話求你mah？對你講溫柔ê話mah？I beh ēng chōe-chōe ōe kiû lí mah? Tùi lí kóng un-jiû ê ōe mah?

4伊kiám beh kap你立約，hō͘你永遠掠伊做奴僕mah？I kiám beh kap lí li̍p-iok, Hō͘ lí éng-oán lia̍h i chòe lô͘-po̍k mah?

5你kiám會kap伊thit-thô，親像鳥á mah？你能縛伊，hō͘你少年ê女子牽mah？Lí kiám ōe kap i thit-thô, chhin-chhiūⁿ chiáu-á mah? Lí ōe pa̍k--i, hō͘ lí siàu-liân ê lú-chú khan mah?

6Kui-pang ê討魚人，kiám thang用伊做買賣ê物？á是會kā伊分開hō͘ seng-lí人？Kui-pang ê thó-hî lâng, kiám thang ēng i chòe bóe-bōe ê mi̍h? Á-sī ōe kā i pun-khui hō͘ seng-lí lâng?

7你能用khau鐮遍鑿伊ê皮mah？能用魚叉遍差伊ê頭殼？Lí ōe ēng khau-liâm piàn-chha̍k i ê phê mah? Ōe ēng hî-chhe piàn-chhe i ê thâu-khak?

8你ê手hōaⁿ tī伊ê頂面；記得kap伊交戰ê事，就m̄敢koh án-ni做。Lí ê chhiú hōaⁿ tī i ê téng-bīn; Kì-tit kap i kau-chiàn ê sū, chiū m̄-káⁿ koh án-ni chòe.

9看ah，你siàu想伊是空空；一下看見伊，kiám bōe失膽mah？Khòaⁿ ah, lí siàu-siūⁿ i sī khang-khang; Chi̍t-ē khòaⁿ-kìⁿ i, kiám bōe sit-táⁿ mah?

10無一人hiah好膽敢惹tio̍h伊；án-ni，是誰能khiā tī我ê面前ah？Bô chi̍t-lâng hiah hó-táⁿ káⁿ jiá-tio̍h i; Án-ni, chī-chūi ōe khiā tī Góa ê bīn-chêng ah?

11Chī-chūi事先hō͘我，hō͘我tio̍h報答伊？Thong天下lóng是我ê。Chī-chūi tāi-seng hō͘ Góa, hō͘ Góa tio̍h pò-tap i? Thong thiⁿ-ē lóng sī Góa-ê.

12論到鱷魚ê肢體，kap伊ê大力，以及伊súi ê骨格，我bōe會無講。Lūn-kàu go̍k-hî ê chi-thé, kap i ê tōa-la̍t, Í-ki̍p i súi ê kut-keh, Góa bōe-ōe bô kóng.

13Chī-chūi能剝伊ê外衫？Chī-chūi能入伊頂下ham ê中間？Chī-chūi ōe pak i ê gōa-saⁿ? Chī-chūi ōe ji̍p i téng-ē ham ê tiong-kan?

14Chī-chūi能開伊ê嘴？伊ê嘴齒四圍lóng是thang驚ê。Chī-chūi ōe khui i ê chhùi? I ê chhùi-khí sì-ûi lóng sī thang kiaⁿ ê.

15伊所誇口ê是伊勇ê鱗，合óa就親像封密密，I só͘ khoa-kháu--ê sī i ióng ê lân. Ha̍p-óa chiū chhin-chhiūⁿ hong ba̍t-ba̍t,

16一個一個相連，到氣bōe能透入hit中間。Chi̍t-ê chi̍t-ê saⁿ-liân, Kàu khì bōe-ōe thàu-ji̍p hí(**hit) tiong-kan.

17Lóng相連絡，連做一個，bōe相分開。Lóng saⁿ liân-lo̍k, Liâm chòe chi̍t-ê, bōe saⁿ pun-khui.

18伊phah-ka-chhiùⁿ，就發出光；伊ê目睭親像早起時ê目睭皮。I phah-ka-chhiùⁿ, chiū hoat-chhut kng; I ê ba̍k-chiu chhin-chhiūⁿ chá-khí-sî ê ba̍k-chiu-phê.

19對伊ê嘴發出to̍h ê火把，kap飛出來ê火星。Tùi i ê chhùi hoat-chhut to̍h ê hé-pé, Kap pe--chhut-lâi ê hé-chhiⁿ.

20對伊ê鼻出煙，親像hiâⁿ蘆葦ê鼎teh滾。Tùi i ê phīⁿ chhut-ian, Chhin-chhiūⁿ hiâⁿ lô͘-úi ê tiáⁿ teh kún.

21伊ê氣hō͘火炭to̍h，有火燄對伊ê嘴出。I ê khì hō͘ hé-thòaⁿ to̍h, Ū hé-iām tùi i ê chhùi chhut.

22伊ê頷頸有氣力常常tī-hia，驚惶tī伊ê面前tiô跳。I ê ām-kún ū khùi-la̍t siông-siông tī-hia, Kiaⁿ-hiâⁿ tī i ê bīn-chêng tiô-thiàu.

23伊頷kui ê肉相連絡，kha̍h-tiâu伊ê身軀，bōe會搖動。I ām-kui ê bah saⁿ liân-lo̍k, Kha̍h-tiâu i ê seng-khu, bōe-ōe iô-tāng.

24伊ê心tēng親像石頭，親像下tún ê磨石hiah-tēng。I ê sim tēng chhin-chhiūⁿ chio̍h-thâu, Chhin-chhiūⁿ ē-tún ê bō-chio̍h hiah-tēng.

25伊一下起來，勇士lóng驚惶，驚到失神。I chi̍t-ē khí-lâi, ióng-sū lóng kiaⁿ-hiâⁿ, Kiaⁿ kàu sit-sîn.

26人若用劍，用khau鐮，用鏢，用尖鎗，鑿伊lóng bōe入。Lâng nā ēng kiàm, ēng khau-liâm, ēng pio, ēng chiam-chhiuⁿ, Chha̍k i lóng bōe ji̍p.

27伊看鐵做乾草，看銅做po͘ ê柴。I khòaⁿ thih chòe ta-chháu, Khòaⁿ tâng chòe po͘ ê chhâ.

28弓箭bōe會hō͘伊逃走；用索hìⁿ石，伊準做稻草。Keng-chìⁿ bōe-ōe hō͘ i tô-cháu; Ēng soh hìⁿ chio̍h, i chún-chòe tiū-chháu.

29槌á伊算做稻草；人舞弄鎗，伊就恥笑。Thûi-á i sǹg chòe tiū-chháu; Lâng bú-lāng chhiuⁿ, i chiū thí-chhiò.

30伊ê腹肚下親像利ê厝瓦phè；伊親像鐵耙拖過土。I ê pak-tó͘-ē chhin-chhiūⁿ lāi ê chhù-hiā-phè; I chhin-chhiūⁿ thih-pē thoa-kè thô͘.

31伊hō͘深淵滾親像鼎；hō͘海親像調和油ê缽(poah)。I hō͘ chhim-ian kún chhin-chhiūⁿ tiáⁿ; Hō͘ hái chhin-chhiūⁿ tiau-hô iû ê poah.

32伊hō͘伊後面ê路發光；hō͘人phah算深淵是白頭毛。I hō͘ i āu-bīn ê lō͘ hoat-kng; Hō͘ lâng phah-sǹg chhim-ian sī pe̍h-thâu-mn̂g.

33全地無一個能比得伊；伊受造做無驚惶ê。Choân-tōe bô chi̍t-ê ōe pí-tit i; I siū-chō chòe bô kiaⁿ-hiâⁿ-ê.

34見若高大ê伊看輕伊；伊tī一切驕傲ê族類做王。Kìⁿ-nā koâiⁿ-tōa--ê i khòaⁿ-khin i; I tī it-chhè kiau-ngō͘ ê cho̍k-lūi chòe-ông.