1Thê-bān人Í-lī-hoat應講，Thê-bān lâng Í-lī-hoat ìn kóng,

2人若beh kap你談論，你會嫌厭bōe？總是是誰能家己約束無講話ah？Lâng nā beh kap lí tâm-lūn, lí ōe hiâm-ià bōe? Chóng-sī chī-chūi ōe ka-kī iok-sok bô kóng-ōe ah?

3看ah，你bat教示chōe-chōe人，軟弱ê手你也hō͘伊giám硬。Khòaⁿ ah, lí bat kà-sī chōe-chōe lâng, Loán-jio̍k ê chhiú lí iā hō͘ i giám-ngī.

4Beh跋倒ê，你用話扶伊；腳頭u酸軟ê，你hō͘伊勇健。Beh poa̍h-tó-ê, lí ēng ōe hû i; Kha-thâu-u sng-nńg ê, lí hō͘ i ióng-kiāⁿ.

5總是taⁿ tāi-chì到tī你，你就昏迷；kha̍p-tio̍h你，你就驚惶。Chóng-sī taⁿ tāi-chì kàu tī lí, lí chiū hun-bê; Kha̍p-tio̍h lí, lí chiū kiaⁿ-hiâⁿ.

6你ê óa靠kiám m̄是在tī你ê敬畏mah？你ê ǹg望kiám m̄是在tī你所行ê純全mah？Lí ê óa-khò kiám m̄-sī chāi-tī lí ê kèng-ùi mah? Lí ê ǹg-bāng kiám m̄-sī chāi-tī lí só͘ kiâⁿ ê sûn-choân mah?

7請你想看，無罪ê人是誰有死無？正直ê人tī甚麼所在受剪除？Chhiáⁿ lí siūⁿ-khòaⁿ, bô-chōe ê lâng chī-chūi ū sí-bô? Chèng-ti̍t ê lâng tī sím-mi̍h só͘-chāi siū chián-tû?

8照我看，用罪過種作，用惡毒做種子來掖ê，所收成也是án-ni。Chiàu góa khòaⁿ, ēng chōe-kòa chèng-choh, Ēng ok-to̍k chòe chéng-chí lâi iā ê, só͘ siu-sêng iā sī án-ni.

9上帝pûn氣，in就死無；對伊大受氣ê風，in就消滅。Siōng-tè pûn-khùi, in chiū sí-bô; Tùi I tōa siū-khì ê hong, in chiū siau-bia̍t.

10獅ê哮，猛獅ê聲，lóng soah；獅á-thûn ê嘴齒，lóng phah折。Sai ê háu, béng-sai ê siaⁿ, lóng soah; Sai-á-thûn ê chhùi-khí, lóng phah-chi̍h.

11老ê獅，因為無thang食就死；母ê獅，hiah-ê kiáⁿ也lóng四散。Lāu ê sai, in-ūi bô thang chia̍h chiū sí; Bú ê sai, hiah ê kiáⁿ iā lóng sì-sòaⁿ.

12有tāi-chì暗靜到tī我，我耳孔也聽見伊細細ê聲。Ū tāi-chì àm-chīⁿ kàu tī góa, Góa hī-khang iā thiaⁿ-kìⁿ i sòe-sòe ê siaⁿ.

13Tùi暝時異象ê思想，就是人睏重眠ê時，Tùi mî--sî īⁿ-siōng ê su-siúⁿ, Chiū-sī lâng khùn tāng-bîn ê sî,

14驚惶ngia̍uh-ngia̍uh-chhoah臨到我，hō͘我ê百骨khe̍h-khe̍h-tiō。Kiaⁿ-hiâⁿ ngia̍uh-ngia̍uh-chhoah lîm-kàu góa, Hō͘ góa ê pah-kut khe̍h-khe̍h-tiō.

15有神tùi我面前經過；我身軀ê毛管chhàng起來。Ū sîn tùi góa bīn-chêng keng-kè; Góa seng-khu ê mn̂g-kńg chhàng--khí-lâi.

16伊停teh，總是我bōe看明伊ê形狀；有像tī我目睭前；靜chauh-chauh，我聽見有聲，講，I thêng-teh, chóng-sī góa bōe khòaⁿ-bêng i ê hêng-chōng; Ū siōng tī góa ba̍k-chiu chêng; Chēng chauh-chauh, góa thiaⁿ-kìⁿ ū siaⁿ, kóng,

17會死ê人對tī上帝kiám是義mah？人對tī創造伊ê，kiám是清氣mah？Ōe-sí ê lâng tùi tī Siōng-tè kiám-sī gī mah? Lâng tùi tī chhòng-chō i ê, kiám sī chheng-khì mah?

18看ah，伊lóng無信用伊ê奴僕，也嫌伊ê使者做愚戇。Khòaⁿ ah, I lóng bô sìn-iōng I ê lô͘-po̍k, Iā hiâm I ê sù-chiá chòe gû-gōng.

19何況hiah-ê khiā起tī土厝，伊ê根基在tī土粉，比蛀蟲khah快死ê。Hô-hòng hiah ê khiā-khí tī thô͘-chhù, I ê kun-ki chāi-tī thô͘-hún, Pí chiù-thâng khah-khoài sí--ê.

20Tùi早起到ê-hng，就tú-tio̍h毀滅，永永無去，無人掛意。Tùi chá-khí kàu ê-hng, chiū tú-tio̍h húi-bia̍t, Éng-éng bô--khì, bô lâng khòa-ì.

21伊布棚ê索kiám無tùi中央拔出來？伊ê死，lóng無智慧。I pò͘-pîⁿ ê soh kiám bô tùi tiong-ng pu̍ih--chhut-lâi? I ê sí, lóng bô tì-hūi.

1Taⁿ做你求叫，看有是誰應你ah？chiah-ê聖ê ê中間，你beh ǹg 是誰 ah？Taⁿ chòe lí kiû-kiò, khòaⁿ ū chī-chūi ìn lí ah? Chiah ê sèng--ê ê tiong-kan, lí beh ǹg chī-chūi ah?

2因為受氣ê心，會害死戇人；怨妒會thâi死ham-bān ê人。In-ūi siū-khì ê sim, ōe hāi-sí gōng-lâng; Oàn-tò͘ ōe thâi-sí ham-bān ê lâng.

3我bat看見戇人釘根，總是忽然間我咒詛伊khiā起ê所在。Góa bat khòaⁿ-kìⁿ gōng-lâng tèng-kun, Chóng-sī hut-jiân-kan góa chiù-chó͘ i khiā-khí ê só͘-chāi.

4伊ê kiáⁿ兒離開安穩遠遠；tī城門受壓迫，也無有拯救in ê。I ê kiáⁿ-jî lī-khui an-ún hn̄g-hn̄g; Tī siâⁿ-mn̂g siū ap-pek, iā bô ū chín-kiù in ê.

5Iau ê人食伊所收成ê，tī刺phè內也搶去，有活tauh開嘴吞伊ê財物。Iau ê lâng chia̍h i só͘ siu-sêng ê, Tī chhì-phè-lāi iā chhiúⁿ--khì, Ū oa̍h-tauh khui-chhùi thun i ê châi-bu̍t.

6因為災厄m̄是tùi土裡出來，患難也m̄是tùi地裡發生；In-ūi chai-ē m̄-sī tùi thô͘--nih chhut-lâi, Hoān-lān iā m̄-sī tùi tōe--nih hoat-siⁿ;

7總是人出世定tio̍h有患難，親像火星飛上高。Chóng-sī lâng chhut-sì tiāⁿ-tio̍h ū hoān-lān, Chhin-chhiūⁿ hé-chhiⁿ pe-chiūⁿ koâiⁿ.

8換做我，我beh求叫上帝；將我ê事交代上帝。Ōaⁿ-chòe góa, góa beh kiû-kiò Siōng-tè; Chiong góa ê sū kau-tài Siōng-tè.

9就是行tāi-chì大到bōe測度得ê，行奇事算bōe了ê。Chiū-sī kiâⁿ tāi-chì tōa kàu bōe chhek-to̍k-tit ê, Kiâⁿ kî-sū sǹg-bōe-liáu-ê.

10伊落雨tī地面上，賞賜水tī田園裡。I lo̍h hō͘ tī tōe-bīn-chiūⁿ, Siúⁿ-sù chúi tī chhân-hn̂g--nih.

11Beh安置卑微ê tī高ê所在；beh舉起哀慘ê tī安穩ê地。Beh an-tì pi-bî-ê tī koâiⁿ ê só͘-chāi; Beh kú-khí ai-chhám-ê tī an-ún ê tōe.

12伊破壞káu-koài ê人ê計謀，致到in ê手所做ê bōe成功。I phò-hoāi káu-koài ê lâng ê kè-bô͘, Tì-kàu in ê chhiú só͘ chòe ê bōe sêng-kong.

13伊hō͘智慧ê人中家己ê詭計；hō͘詭譎ê人ê計謀緊緊敗。I hō͘ tì-hūi ê lâng tiòng ka-kī ê khúi-kè; Hō͘ khúi-khiat ê lâng ê kè-bô͘ kín-kín pāi.

14In日時tú-tio̍h烏暗，日中晝四界bong，親像暝時。In ji̍t--sî tú-tio̍h o͘-àm, Ji̍t tiong-tàu sì-kòe bong, chhin-chhiūⁿ mî--sî.

15伊救sòng-hiong人，脫離in ê嘴ê刀劍，以及強暴ê人ê手。I kiù sòng-hiong lâng, thoat-lī in ê chhùi ê to-kiàm, Í-ki̍p kiông-pō ê lâng ê chhiú.

16Tùi án-ni，軟chiáⁿ-ê有ǹg望，不義ê，嘴塞密。Tùi án-ni, nńg-chiáⁿ-ê ū ǹg-bāng, Put-gī-ê, chhùi that-ba̍t.

17看ah，上帝所警戒ê，hit人有福氣；所以m̄-thang看輕全能ê ê督責。Khòaⁿ ah, Siōng-tè só͘ kéng-kài-ê, hit-lâng ū hok-khì; Só͘-í m̄-thang khòaⁿ-khin Choân-lêng--ê ê tok-chek.

18因為伊hō͘人痛疼，就kā伊包密；伊傷人，也伊ê手醫好伊。In-ūi I hō͘ lâng thàng-thiàⁿ, chiū kā i pau-ba̍t; I siong lâng, iā I ê chhiú i-hó i.

19伊beh救你，tī六pái ê患難；就若七pái，災害也無kha̍p-tio̍h你。I beh kiù lí, tī la̍k-pái ê hoān-lān; chiū nā chhit-pái, chai-hāi iā bô kha̍p-tio̍h lí.

20Tī飢荒ê時，伊beh救你脫離死；tī交戰ê時，伊beh救你脫離刀劍ê勢力。Tī ki-hng ê sî, I beh kiù lí thoat-lī sí; Tī kau-chiàn ê sî, I beh kiù lí thoat-lī to-kiàm ê sè-le̍k.

21你beh得tio̍h khǹg密，免受嘴舌ê攻擊；災厄到ê時，你也免驚。Lí beh tit-tio̍h khǹg-ba̍t, bián siū chhùi-chi̍h ê kong-kek; Chai-ē kàu ê sî, lí iā bián kiaⁿ.

22災害kap飢荒，你beh笑伊，地上ê野獸，你也免驚。Chai-hāi kap ki-hng, lí beh chhiò i, tōe-chiūⁿ ê iá-siù, lí iā bián kiaⁿ.

23因為你beh kap田園裡ê石結約；田野ê獸也beh kap你和好。In-ūi lí beh kap chhân-hn̂g--nih ê chio̍h kiat-iok; Chhân-iá ê siù iā beh kap lí hô-hó.

24你beh知你ê布棚平安；你beh去看你ê羊寮lóng無欠缺。Lí beh chai lí ê pò͘-pîⁿ pêng-an; Lí beh khì khòaⁿ lí ê iûⁿ-tiâu lóng bô khiàm-kheh.

25你也beh知你ê kiáⁿ孫chōe-chōe，你ê後裔親像地上ê青草。Lí iā beh chai lí ê kiáⁿ-sun chōe-chōe, Lí ê hō͘-è chhin-chhiūⁿ tōe-chiūⁿ ê chhiⁿ-chháu.

26你beh歲壽滿足chiah歸墓，親像稻綑到時收khǹg。Lí beh hè-siū móa-chiok chiah kui bōng, Chhin-chhiūⁿ tiū-khún kàu-sî siu-khǹg.

27看ah，這阮有查到徹底，實在是án-ni；你tio̍h聽，知是做你ê利益。Khòaⁿ ah, che goán ū chhâ kàu thiat-tí, si̍t-chāi sī án-ni; Lí tio̍h thiaⁿ, chai sī chòe lí ê lī-ek.

1約伯應講。Iok-pek ìn kóng.

2願我ê憂悶過秤重，願我一切ê災害平平hē tī天秤；Goān góa ê iu-būn kè chhìn-tāng, Goān góa it-chhè ê chai-hāi pîⁿ-pîⁿ hē tī thian-phêng;

3的確比海沙khah重；所以我ê話亂亂講。Tek-khak pí hái-soa khah-tāng; Só͘-í góa ê ōe loān-loān kóng.

4因為全能ê ê箭射tio̍h我；我ê心神lim-tio̍h伊ê毒。上帝hō͘我驚ê事排陣攻擊我。In-ūi Choân-lêng--ê ê chìⁿ siā-tio̍h góa; Góa ê sim-sîn lim-tio̍h i ê to̍k. Siōng-tè hō͘ góa kiaⁿ ê sū pâi-tīn kong-kek góa.

5野驢有草，kiám beh出聲？牛有草料，kiám beh哮mah？Iá-lû ū chháu, kiám beh chhut-siaⁿ? Gû ū chháu-liāu, kiám beh háu mah?

6物chiáⁿ無chham鹽，kiám會食得mah？卵ê清kiám有滋味mah？Mi̍h chiáⁿ bô chham iâm, kiám ōe chia̍h-tit mah? Nn̄g ê chheng kiám ū chu-bī mah?

7我ê心厭賤，m̄-ài kha̍p-tio̍h ê，in做我pháiⁿ味素ê食物。Góa ê sim iàm-chiān, m̄-ài kha̍p-tio̍h ê, In chòe góa pháiⁿ bī-sò͘ ê chia̍h-mi̍h.

8願我得tio̍h所求ê；我所欣慕ê，願上帝賞賜我。Goān góa tit-tio̍h só͘-kiû-ê; Góa só͘ him-bō͘-ê goān Siōng-tè siúⁿ-sù góa.

9就是願上帝teh碎我，放伊ê手，來絕我ê性命。Chiū-sī goān Siōng-tè teh-chhùi góa, Pàng I ê chhiú, lâi choa̍t góa ê sìⁿ-miā.

10若án-ni，我就得tio̍h安慰；tī痛苦無得tio̍h憐憫ê中間，iáu會快樂；因為我無違背至聖ê ê話。Nā án-ni, góa chiū tit-tio̍h an-ùi; Tī thòng-khó͘ bô tit-tio̍h lîn-bín ê tiong-kan, iáu ōe khoài-lo̍k; In-ūi góa bô ûi-pōe Chì-sèng--ê ê ōe.

11我有甚麼氣力，hō͘我iáu teh ǹg望？我有甚麼結局，hō͘我iáu thang吞忍？Góa ū sím-mi̍h khùi-la̍t, hō͘ góa iáu teh ǹg-bāng? Góa ū sím-mi̍h kiat-kio̍k, hō͘ góa iáu thang thun-lún?

12我ê力kiám是石ê力？我ê肉kiám是銅ê mah？Góa ê la̍t kiám sī chio̍h ê la̍t? Góa ê bah kiám sī tâng-ê mah?

13幫贊我ê，kiám m̄是lóng無去mah？我ê智慧，kiám m̄是離開我去mah？Pang-chān góa-ê, kiám-m̄-sī lóng bô--khì mah? Góa ê tì-hūi, kiám-m̄-sī lī-khui góa khì mah?

14絕望ê人，就若無敬畏全能ê主，伊ê朋友也tio̍h用仁慈款待伊。Choa̍t-bāng ê lâng, chiū nā bô kèng-ùi choân-lêng ê Chú, I ê pêng-iú iā tio̍h ēng jîn-chû khoán-thāi i.

15我ê兄弟誤我，親像溪，koh親像溪水流過ê地；Góa ê hiaⁿ-tī gō͘ góa, chhin-chhiūⁿ khoe, Koh chhin-chhiūⁿ khoe-chúi lâu-kè ê tōe;

16因為有冰塊就濁(lô)，有雪khǹg tī hiT內面；In-ūi ū peng-tè chiū lô, Ū seh khǹg tī hí(**hit) lāi-bīn;

17燒lō ê時chūn，in就消無，熱ê時，就tùi in ê所在乾去。Sio-lō ê sî-chūn, in chiū siau-bô, Joa̍h ê sî, chiū tùi in ê só͘-chāi ta--khì.

18沿溪kui陣teh行ê人彎來oat去，in上到拋荒ê所在就死。Iân-khoe kui-tīn teh-kiâⁿ ê lâng oan-lâi oat-khì, In chiūⁿ kàu pha-hng ê só͘-chāi chiū sí.

19Thê-má kui陣行ê人teh瞭望，Sī-pa kui群ê人teh thèng候。Thê-má kui-tīn kiâⁿ ê lâng teh liâu-bāng, Sī-pa kui-kûn ê lâng teh thèng-hāu.

20In為tio̍h所ǹg望來見笑，到tè就漏氣。In ūi-tio̍h só͘ ǹg-bāng lâi kiàn-siàu, kàu-tè chiū làu-khùi.

21Taⁿ lín真正無物；看見thang驚ê事就忍。Taⁿ lín chin-chiàⁿ bô mi̍h; Khòaⁿ-kìⁿ thang kiaⁿ ê sū chiū lún.

22我kiám bat講，請lín hō͘我？á是，tùi lín ê財產用物送我？Góa kiám bat kóng, Chhiáⁿ lín hō͘ góa? Á-sī, Tùi lín ê châi-sán ēng mi̍h sàng góa?

23á是，救我脫離對敵ê手ah？á是，屬我脫離強暴ê人ê手ah？Á-sī, Kiù góa thoat-lī tùi-te̍k ê chhiú ah? Á-sī, Sio̍k góa thoat-lī kiông-pō ê lâng ê chhiú ah?

24請lín教示我，我就靜靜；也hō͘我明白tī甚麼事有錯誤。Chhiáⁿ lín kà-sī góa, góa chiū chēng-chēng; Iā hō͘ góa bêng-pe̍k tī sím-mi̍h sū ū chhò-gō͘.

25正直ê話，伊ê力大到怎樣！總是lín teh辯駁，是辯駁甚麼？Chèng-ti̍t ê ōe, i ê la̍t tōa kàu cháiⁿ-iūⁿ! Chóng-sī lín teh piān-pok, sī piān-pok sím-mi̍h?

26Lín想beh辯駁人ê話mah？絕望ê人ê言論，是親像風。Lín siūⁿ beh piān-pok lâng ê ōe mah? Choa̍t-bāng ê lâng ê giân-lūn, sī chhin-chhiūⁿ hong.

27Lín liam-khau ài得tio̍h無父ê kiáⁿ，用你ê朋友做買賣ê物。Lín liam-khau ài tit-tio̍h bô-pē ê kiáⁿ, Ēng lí ê pêng-iú chòe bóe-bōe ê mi̍h.

28Taⁿ請lín甘願看我；我決斷無當lín ê面來講白賊。Taⁿ chhiáⁿ lín kam-goān khòaⁿ góa; Góa koat-toàn bô tng lín ê bīn lâi kóng pe̍h-chha̍t.

29請lín oa̍t-tńg，m̄-thang有不義，koh oa̍t倒tńg，我ê公義iáu-kú tī-teh。Chhiáⁿ lín oa̍t-tńg, m̄-thang ū put-gī, Koh oa̍t-tò-tńg, góa ê kong-gī iáu-kú tī-teh.

30我ê舌有不義mah？我ê嘴bōe分別災害mah？Góa ê chi̍h ū put-gī mah? Góa ê chhùi bōe hun-piat chai-hāi mah?