1Taⁿ做你求叫，看有是誰應你ah？chiah-ê聖ê ê中間，你beh ǹg 是誰 ah？Taⁿ chòe lí kiû-kiò, khòaⁿ ū chī-chūi ìn lí ah? Chiah ê sèng--ê ê tiong-kan, lí beh ǹg chī-chūi ah?

2因為受氣ê心，會害死戇人；怨妒會thâi死ham-bān ê人。In-ūi siū-khì ê sim, ōe hāi-sí gōng-lâng; Oàn-tò͘ ōe thâi-sí ham-bān ê lâng.

3我bat看見戇人釘根，總是忽然間我咒詛伊khiā起ê所在。Góa bat khòaⁿ-kìⁿ gōng-lâng tèng-kun, Chóng-sī hut-jiân-kan góa chiù-chó͘ i khiā-khí ê só͘-chāi.

4伊ê kiáⁿ兒離開安穩遠遠；tī城門受壓迫，也無有拯救in ê。I ê kiáⁿ-jî lī-khui an-ún hn̄g-hn̄g; Tī siâⁿ-mn̂g siū ap-pek, iā bô ū chín-kiù in ê.

5Iau ê人食伊所收成ê，tī刺phè內也搶去，有活tauh開嘴吞伊ê財物。Iau ê lâng chia̍h i só͘ siu-sêng ê, Tī chhì-phè-lāi iā chhiúⁿ--khì, Ū oa̍h-tauh khui-chhùi thun i ê châi-bu̍t.

6因為災厄m̄是tùi土裡出來，患難也m̄是tùi地裡發生；In-ūi chai-ē m̄-sī tùi thô͘--nih chhut-lâi, Hoān-lān iā m̄-sī tùi tōe--nih hoat-siⁿ;

7總是人出世定tio̍h有患難，親像火星飛上高。Chóng-sī lâng chhut-sì tiāⁿ-tio̍h ū hoān-lān, Chhin-chhiūⁿ hé-chhiⁿ pe-chiūⁿ koâiⁿ.

8換做我，我beh求叫上帝；將我ê事交代上帝。Ōaⁿ-chòe góa, góa beh kiû-kiò Siōng-tè; Chiong góa ê sū kau-tài Siōng-tè.

9就是行tāi-chì大到bōe測度得ê，行奇事算bōe了ê。Chiū-sī kiâⁿ tāi-chì tōa kàu bōe chhek-to̍k-tit ê, Kiâⁿ kî-sū sǹg-bōe-liáu-ê.

10伊落雨tī地面上，賞賜水tī田園裡。I lo̍h hō͘ tī tōe-bīn-chiūⁿ, Siúⁿ-sù chúi tī chhân-hn̂g--nih.

11Beh安置卑微ê tī高ê所在；beh舉起哀慘ê tī安穩ê地。Beh an-tì pi-bî-ê tī koâiⁿ ê só͘-chāi; Beh kú-khí ai-chhám-ê tī an-ún ê tōe.

12伊破壞káu-koài ê人ê計謀，致到in ê手所做ê bōe成功。I phò-hoāi káu-koài ê lâng ê kè-bô͘, Tì-kàu in ê chhiú só͘ chòe ê bōe sêng-kong.

13伊hō͘智慧ê人中家己ê詭計；hō͘詭譎ê人ê計謀緊緊敗。I hō͘ tì-hūi ê lâng tiòng ka-kī ê khúi-kè; Hō͘ khúi-khiat ê lâng ê kè-bô͘ kín-kín pāi.

14In日時tú-tio̍h烏暗，日中晝四界bong，親像暝時。In ji̍t--sî tú-tio̍h o͘-àm, Ji̍t tiong-tàu sì-kòe bong, chhin-chhiūⁿ mî--sî.

15伊救sòng-hiong人，脫離in ê嘴ê刀劍，以及強暴ê人ê手。I kiù sòng-hiong lâng, thoat-lī in ê chhùi ê to-kiàm, Í-ki̍p kiông-pō ê lâng ê chhiú.

16Tùi án-ni，軟chiáⁿ-ê有ǹg望，不義ê，嘴塞密。Tùi án-ni, nńg-chiáⁿ-ê ū ǹg-bāng, Put-gī-ê, chhùi that-ba̍t.

17看ah，上帝所警戒ê，hit人有福氣；所以m̄-thang看輕全能ê ê督責。Khòaⁿ ah, Siōng-tè só͘ kéng-kài-ê, hit-lâng ū hok-khì; Só͘-í m̄-thang khòaⁿ-khin Choân-lêng--ê ê tok-chek.

18因為伊hō͘人痛疼，就kā伊包密；伊傷人，也伊ê手醫好伊。In-ūi I hō͘ lâng thàng-thiàⁿ, chiū kā i pau-ba̍t; I siong lâng, iā I ê chhiú i-hó i.

19伊beh救你，tī六pái ê患難；就若七pái，災害也無kha̍p-tio̍h你。I beh kiù lí, tī la̍k-pái ê hoān-lān; chiū nā chhit-pái, chai-hāi iā bô kha̍p-tio̍h lí.

20Tī飢荒ê時，伊beh救你脫離死；tī交戰ê時，伊beh救你脫離刀劍ê勢力。Tī ki-hng ê sî, I beh kiù lí thoat-lī sí; Tī kau-chiàn ê sî, I beh kiù lí thoat-lī to-kiàm ê sè-le̍k.

21你beh得tio̍h khǹg密，免受嘴舌ê攻擊；災厄到ê時，你也免驚。Lí beh tit-tio̍h khǹg-ba̍t, bián siū chhùi-chi̍h ê kong-kek; Chai-ē kàu ê sî, lí iā bián kiaⁿ.

22災害kap飢荒，你beh笑伊，地上ê野獸，你也免驚。Chai-hāi kap ki-hng, lí beh chhiò i, tōe-chiūⁿ ê iá-siù, lí iā bián kiaⁿ.

23因為你beh kap田園裡ê石結約；田野ê獸也beh kap你和好。In-ūi lí beh kap chhân-hn̂g--nih ê chio̍h kiat-iok; Chhân-iá ê siù iā beh kap lí hô-hó.

24你beh知你ê布棚平安；你beh去看你ê羊寮lóng無欠缺。Lí beh chai lí ê pò͘-pîⁿ pêng-an; Lí beh khì khòaⁿ lí ê iûⁿ-tiâu lóng bô khiàm-kheh.

25你也beh知你ê kiáⁿ孫chōe-chōe，你ê後裔親像地上ê青草。Lí iā beh chai lí ê kiáⁿ-sun chōe-chōe, Lí ê hō͘-è chhin-chhiūⁿ tōe-chiūⁿ ê chhiⁿ-chháu.

26你beh歲壽滿足chiah歸墓，親像稻綑到時收khǹg。Lí beh hè-siū móa-chiok chiah kui bōng, Chhin-chhiūⁿ tiū-khún kàu-sî siu-khǹg.

27看ah，這阮有查到徹底，實在是án-ni；你tio̍h聽，知是做你ê利益。Khòaⁿ ah, che goán ū chhâ kàu thiat-tí, si̍t-chāi sī án-ni; Lí tio̍h thiaⁿ, chai sī chòe lí ê lī-ek.

1約伯應講。Iok-pek ìn kóng.

2願我ê憂悶過秤重，願我一切ê災害平平hē tī天秤；Goān góa ê iu-būn kè chhìn-tāng, Goān góa it-chhè ê chai-hāi pîⁿ-pîⁿ hē tī thian-phêng;

3的確比海沙khah重；所以我ê話亂亂講。Tek-khak pí hái-soa khah-tāng; Só͘-í góa ê ōe loān-loān kóng.

4因為全能ê ê箭射tio̍h我；我ê心神lim-tio̍h伊ê毒。上帝hō͘我驚ê事排陣攻擊我。In-ūi Choân-lêng--ê ê chìⁿ siā-tio̍h góa; Góa ê sim-sîn lim-tio̍h i ê to̍k. Siōng-tè hō͘ góa kiaⁿ ê sū pâi-tīn kong-kek góa.

5野驢有草，kiám beh出聲？牛有草料，kiám beh哮mah？Iá-lû ū chháu, kiám beh chhut-siaⁿ? Gû ū chháu-liāu, kiám beh háu mah?

6物chiáⁿ無chham鹽，kiám會食得mah？卵ê清kiám有滋味mah？Mi̍h chiáⁿ bô chham iâm, kiám ōe chia̍h-tit mah? Nn̄g ê chheng kiám ū chu-bī mah?

7我ê心厭賤，m̄-ài kha̍p-tio̍h ê，in做我pháiⁿ味素ê食物。Góa ê sim iàm-chiān, m̄-ài kha̍p-tio̍h ê, In chòe góa pháiⁿ bī-sò͘ ê chia̍h-mi̍h.

8願我得tio̍h所求ê；我所欣慕ê，願上帝賞賜我。Goān góa tit-tio̍h só͘-kiû-ê; Góa só͘ him-bō͘-ê goān Siōng-tè siúⁿ-sù góa.

9就是願上帝teh碎我，放伊ê手，來絕我ê性命。Chiū-sī goān Siōng-tè teh-chhùi góa, Pàng I ê chhiú, lâi choa̍t góa ê sìⁿ-miā.

10若án-ni，我就得tio̍h安慰；tī痛苦無得tio̍h憐憫ê中間，iáu會快樂；因為我無違背至聖ê ê話。Nā án-ni, góa chiū tit-tio̍h an-ùi; Tī thòng-khó͘ bô tit-tio̍h lîn-bín ê tiong-kan, iáu ōe khoài-lo̍k; In-ūi góa bô ûi-pōe Chì-sèng--ê ê ōe.

11我有甚麼氣力，hō͘我iáu teh ǹg望？我有甚麼結局，hō͘我iáu thang吞忍？Góa ū sím-mi̍h khùi-la̍t, hō͘ góa iáu teh ǹg-bāng? Góa ū sím-mi̍h kiat-kio̍k, hō͘ góa iáu thang thun-lún?

12我ê力kiám是石ê力？我ê肉kiám是銅ê mah？Góa ê la̍t kiám sī chio̍h ê la̍t? Góa ê bah kiám sī tâng-ê mah?

13幫贊我ê，kiám m̄是lóng無去mah？我ê智慧，kiám m̄是離開我去mah？Pang-chān góa-ê, kiám-m̄-sī lóng bô--khì mah? Góa ê tì-hūi, kiám-m̄-sī lī-khui góa khì mah?

14絕望ê人，就若無敬畏全能ê主，伊ê朋友也tio̍h用仁慈款待伊。Choa̍t-bāng ê lâng, chiū nā bô kèng-ùi choân-lêng ê Chú, I ê pêng-iú iā tio̍h ēng jîn-chû khoán-thāi i.

15我ê兄弟誤我，親像溪，koh親像溪水流過ê地；Góa ê hiaⁿ-tī gō͘ góa, chhin-chhiūⁿ khoe, Koh chhin-chhiūⁿ khoe-chúi lâu-kè ê tōe;

16因為有冰塊就濁(lô)，有雪khǹg tī hiT內面；In-ūi ū peng-tè chiū lô, Ū seh khǹg tī hí(**hit) lāi-bīn;

17燒lō ê時chūn，in就消無，熱ê時，就tùi in ê所在乾去。Sio-lō ê sî-chūn, in chiū siau-bô, Joa̍h ê sî, chiū tùi in ê só͘-chāi ta--khì.

18沿溪kui陣teh行ê人彎來oat去，in上到拋荒ê所在就死。Iân-khoe kui-tīn teh-kiâⁿ ê lâng oan-lâi oat-khì, In chiūⁿ kàu pha-hng ê só͘-chāi chiū sí.

19Thê-má kui陣行ê人teh瞭望，Sī-pa kui群ê人teh thèng候。Thê-má kui-tīn kiâⁿ ê lâng teh liâu-bāng, Sī-pa kui-kûn ê lâng teh thèng-hāu.

20In為tio̍h所ǹg望來見笑，到tè就漏氣。In ūi-tio̍h só͘ ǹg-bāng lâi kiàn-siàu, kàu-tè chiū làu-khùi.

21Taⁿ lín真正無物；看見thang驚ê事就忍。Taⁿ lín chin-chiàⁿ bô mi̍h; Khòaⁿ-kìⁿ thang kiaⁿ ê sū chiū lún.

22我kiám bat講，請lín hō͘我？á是，tùi lín ê財產用物送我？Góa kiám bat kóng, Chhiáⁿ lín hō͘ góa? Á-sī, Tùi lín ê châi-sán ēng mi̍h sàng góa?

23á是，救我脫離對敵ê手ah？á是，屬我脫離強暴ê人ê手ah？Á-sī, Kiù góa thoat-lī tùi-te̍k ê chhiú ah? Á-sī, Sio̍k góa thoat-lī kiông-pō ê lâng ê chhiú ah?

24請lín教示我，我就靜靜；也hō͘我明白tī甚麼事有錯誤。Chhiáⁿ lín kà-sī góa, góa chiū chēng-chēng; Iā hō͘ góa bêng-pe̍k tī sím-mi̍h sū ū chhò-gō͘.

25正直ê話，伊ê力大到怎樣！總是lín teh辯駁，是辯駁甚麼？Chèng-ti̍t ê ōe, i ê la̍t tōa kàu cháiⁿ-iūⁿ! Chóng-sī lín teh piān-pok, sī piān-pok sím-mi̍h?

26Lín想beh辯駁人ê話mah？絕望ê人ê言論，是親像風。Lín siūⁿ beh piān-pok lâng ê ōe mah? Choa̍t-bāng ê lâng ê giân-lūn, sī chhin-chhiūⁿ hong.

27Lín liam-khau ài得tio̍h無父ê kiáⁿ，用你ê朋友做買賣ê物。Lín liam-khau ài tit-tio̍h bô-pē ê kiáⁿ, Ēng lí ê pêng-iú chòe bóe-bōe ê mi̍h.

28Taⁿ請lín甘願看我；我決斷無當lín ê面來講白賊。Taⁿ chhiáⁿ lín kam-goān khòaⁿ góa; Góa koat-toàn bô tng lín ê bīn lâi kóng pe̍h-chha̍t.

29請lín oa̍t-tńg，m̄-thang有不義，koh oa̍t倒tńg，我ê公義iáu-kú tī-teh。Chhiáⁿ lín oa̍t-tńg, m̄-thang ū put-gī, Koh oa̍t-tò-tńg, góa ê kong-gī iáu-kú tī-teh.

30我ê舌有不義mah？我ê嘴bōe分別災害mah？Góa ê chi̍h ū put-gī mah? Góa ê chhùi bōe hun-piat chai-hāi mah?

1人tī世間kiám m̄是勞苦ê時期mah？伊ê日子kiám m̄是親像chhiàⁿ工人ê日子mah？Lâng tī sè-kan kiám-m̄-sī lô-khó͘ ê sî-kî mah? I ê ji̍t-chí kiám m̄-sī chhin-chhiūⁿ chhiàⁿ-kang lâng ê ji̍t-chí mah?

2親像奴僕切切欣慕日落ê影，親像chhiàⁿ工人ǹg望工錢；Chhin-chhiūⁿ lô͘-po̍k chhiat-chhiat him-bō͘ ji̍t-lo̍h ê iáⁿ, Chhin-chhiūⁿ chhiàⁿ-kang lâng ǹg-bāng kang-chîⁿ;

3我也án-ni一定經過chōe-chōe空虛ê月，koh有厭倦ê暝kā我定tio̍h。Góa iā án-ni it-tēng keng-kè chōe-chōe khang-hu ê ge̍h, Koh ū ià-siān ê mî kā góa tiāⁿ-tio̍h.

4我倒teh ê時，就講，甚麼時thang起來？暝到hiah長。我翻來翻去直直到天光。Góa tó-teh ê sî, chiū kóng, Sím-mi̍h sî thang khí-lâi? mî kàu hiah tn̂g. Góa hoan-lâi hoan-khì ti̍t-ti̍t kàu thiⁿ-kng.

5我kui身軀lóng是蟲kap kui塊ê土；我ê皮膚收嘴，就koh出膿。Góa kui seng-khu lóng sī thâng kap kui-tè ê thô͘; Góa ê phê-hu siu chhùi, chiū koh chhut-lâng.

6我ê日子比梭khah緊，直直過去無所ǹg望。Góa ê ji̍t-chí pí so khah-kín, Ti̍t-ti̍t kè-khì bô só͘ ǹg-bāng.

7Tio̍h記得我ê活命ná喘一個氣；我ê目睭bōe koh看見好景。Tio̍h kì-tit góa ê oa̍h-miā ná chhoán chi̍t ê khùi; Góa ê ba̍k-chiu bōe koh khòaⁿ-kìⁿ hó-kéng.

8看我ê人，伊ê目睭beh無koh看見我；你ê目睭beh siòng我，總是我無tī-teh。Khòaⁿ góa ê lâng, i ê ba̍k-chiu beh bô koh khòaⁿ-kìⁿ góa; Lí ê ba̍k-chiu beh siòng góa, chóng-sī góa bô tī-teh.

9雲消散就過去，án-ni，人落陰間也bōe koh起來。Hûn siau-sòaⁿ chiū kè-khì, Án-ni, lâng lo̍h im-kan iā bōe koh khí-lâi.

10伊無koh tò來家己ê家，本所在也無koh認得伊。I bô koh tò-lâi ka-kī ê ke, Pún só͘-chāi iā bô koh jīn-tit i.

11所以我無beh約束我ê嘴；我ê神憂苦，我beh án-ni講出。我ê心苦痛，我beh án-ni分訴。Só͘-í góa bô beh iok-sok góa ê chhùi; Góa ê sîn iu-khó͘, góa beh án-ni kóng-chhut. Góa ê sim khó͘-thàng, góa beh án-ni hun-sò͘.

12我kiám是大海，á是蛟龍mah？你竟然設一個監視我ê ah？Góa kiám-sī tōa-hái, á-sī kau-lêng mah? Lí kéng-jiân siat chi̍t-ê kam(**kám)-sī góa ê ah?

13我若講，我ê眠床beh安慰我，我ê床舖beh改我ê憂悶；Góa nā kóng, Góa ê bîn-chhn̂g beh an-ùi góa, Góa ê chhn̂g-pho͘ beh kóe góa ê iu-būn;

14你就用眠夢hō͘我驚，用異象hō͘我忍。Lí chiū ēng bîn-bāng hō͘ góa kiaⁿ, Ēng īⁿ-siōng hō͘ góa lún.

15致到我ài摧死；ài死無，khah贏chhun chiah-ê骨。Tì-kàu góa ài chhui-sí; Ài sí-bô, khah-iâⁿ chhun chiah ê kut.

16我厭恨性命，m̄-ài永遠活teh；願你chhut-chāi我；因為我ê日子lóng是空虛。Góa iàm-hūn sìⁿ-miā, m̄-ài éng-oán oa̍h-teh; Goān lí chhut-chāi góa; in-ūi góa ê ji̍t-chí lóng-sī khang-hu.

17人是甚麼，致到你掠伊做大，致到你將伊khòa tī心裡，Lâng sī sím-mi̍h, tì-kàu Lí lia̍h i chòe-tōa, Tì-kàu Lí chiong i khòa tī sim--nih,

18致到你ta̍k早起鑑察伊，時刻試驗伊？Tì-kàu Lí ta̍k chá-khí kàm-chhat i, Sî-khek chhì-giām i?

19你beh到tī時chiah oa̍t-tńg無看我，寬我tiap-á久，hō͘我吞nōa-cheh？Lí beh kàu tī-sî chiah oa̍t-tńg bô khòaⁿ góa, Khoan góa tiap-á-kú, hō͘ góa thun-nōa-cheh?

20鑑察人ê ah，我若有罪，礙tio̍h你甚麼？你啥事用我做你ê箭靶？致到我看家己做重擔。Kàm-chhat lâng--ê ah, góa nā ū chōe, gāi-tio̍h Lí sím-mi̍h? Lí siáⁿ-sū ēng góa chòe Lí ê chìⁿ-pé? Tì-kàu góa khòaⁿ ka-kī chòe tāng-tàⁿ.

21你啥事m̄赦免我ê過失，除去我ê罪過？因為我taⁿ beh倒tī塵埃；你beh致意chhē我，總是我已經無tī-teh。Lí siáⁿ-sū m̄ sià-bián góa ê kè-sit, tû-khì góa ê chōe-kòa? In-ūi góa taⁿ beh tó tī tîn-ai; Lí beh tì-ì chhē góa, chóng-sī góa í-keng bô tī-teh.