1Su-a人Pí-le̍k-ta̍t應講，Su-a lâng Pí-le̍k-ta̍t ìn kóng,

2Chiah-ê話你beh講到tī時？你嘴內ê話親像狂風beh到jōa久？Chiah ê ōe lí beh kóng kàu tī-sî? Lí chhùi-lāi ê ōe chhin-chhiūⁿ kông-hong beh kàu jōa-kú?

3上帝kiám有偏私來審判？全能ê kiám有偏私，無公義？Siōng-tè kiám ū phian-su lâi sím-phòaⁿ? Choân-lêng--ê kiám ū phian-su, bô kong-gī?

4你ê kiáⁿ兒若有得罪 伊，伊交付in tī in ê過失ê手頭。Lí ê kiáⁿ-jî nā ū tek-chōe I, I kau-hù in tī in ê kè-sit ê chhiú-thâu.

5你若致意chhē上帝，koh tùi全能ê求恩；Lí nā tì-ì chhē Siōng-tè, Koh tùi Choân-lêng--ê kiû un;

6你若清氣正直，伊beh為tio̍h你醒起來，koh hō͘你公義ê厝興通。Lí nā chheng-khì chèng-ti̍t, I beh ūi-tio̍h lí chhíⁿ--khí-lâi, Koh hō͘ lí kong-gī ê chhù heng-thong.

7你起頭雖然微細，到尾beh真發達。Lí khí-thâu sui-jiân bî-sòe, Kàu-bé beh chin hoat-ta̍t.

8請你查問前代，追念in ê列祖所查出ê；Chhiáⁿ lí chhâ-mn̄g chêng-tāi, Tui-liām in ê lia̍t-chó͘ só͘ chhâ-chhut-ê;

9因為咱不過是昨昏chiah有，m̄知半項；咱tī世間ê日子親像影；In-ūi lán put-kò sī cha-hng chiah ū, m̄-chai pòaⁿ-hāng; Lán tī sè-kan ê ji̍t-chí chhin-chhiūⁿ iáⁿ;

10In kiám無教示你，kā你講，講出伊心腹ê話？In kiám bô kà-sī lí, kā lí kóng, Kóng-chhut i sim-pak ê ōe?

11蘆葦無土糜，能發mah？蘆竹無水，能大叢mah？Lô͘-úi bô thô͘-bê, ōe hoat mah? Lô͘-tek bô chúi, ōe tōa châng mah?

12當伊青翠，iáu未割起來，比lóng總ê草事先枯焦。Tng i chhiⁿ-chhùi, iáu-bē koah-khí-lâi, Pí lóng-chóng ê chháu tāi-seng ko͘-tâ.

13見若bōe記得上帝ê人，伊ê路徑也是án-ni；無敬虔ê人，伊ê ǹg望beh無去。Kìⁿ-nā bōe-kì-tit Siōng-tè ê lâng, i ê lō͘-kèng iā sī án-ni; Bô kèng-khiân ê lâng, i ê ǹg-bāng beh bô--khì.

14伊所依óa-ê beh絕斷；伊所óa靠ê是蜘蛛網。I só͘ i-óa-ê beh choa̍t-tn̄g; I só͘ óa-khò-ê sī ti-tu-bāng.

15伊beh óa靠厝，總是厝beh倒；伊beh擒tiâu厝，總是厝bōe久長tī-teh。I beh óa-khò chhù, chóng-sī chhù beh tó; I beh khîⁿ-tiâu chhù, chóng-sī chhù bōe kú-tn̂g tī-teh.

16伊受日照，就青翠。伊ê藤soan到滿園。I siū ji̍t chiò, chiū chhiⁿ-chhùi. I ê tîn soan kàu móa-hn̂g.

17伊ê根khûn tī石堆，透到石ê所在。I ê kun khûn tī chio̍h-tui, Thàu-kàu chio̍h ê só͘-chāi.

18伊若對伊ê所在除去，hit所在就m̄承認伊，講，我bē-bat看見你。I nā tùi i ê só͘-chāi tû-khì, hit só͘-chāi chiū m̄ sêng-jīn i, Kóng, Góa bē-bat khòaⁿ-kìⁿ lí.

19看ah，這就是伊ê路ê快樂，以後beh有別ê tùi地裡生出來。Khòaⁿ ah, che chiū-sī i ê lō͘ ê khoài-lo̍k, Í-āu beh ū pa̍t-ê tùi tōe--nih siⁿ--chhut-lâi.

20看ah，上帝的確無棄sak完全ê人，也無扶助行pháiⁿ ê人。Khòaⁿ ah, Siōng-tè tek-khak bô khì-sak oân-choân ê lâng, Iā bô hû-chō͘ kiâⁿ-pháiⁿ ê lâng.

21伊iáu beh hō͘你滿嘴笑gī-gī，hō͘你ê嘴唇出歡喜ê聲。I iáu beh hō͘ lí móa-chhùi chhiò-gī-gī, Hō͘ lí ê chhùi-tûn chhut hoaⁿ-hí ê siaⁿ.

22怨恨你ê人beh滿身見笑，pháiⁿ人ê布棚beh歸tī無。Oàn-hūn lí ê lâng beh móa-sin kiàn-siàu, Pháiⁿ-lâng ê pò͘-pîⁿ beh kui tī bô.

1約伯應講，Iok-pek ìn kóng,

2我真正知是án-ni；因為人tī上帝ê面前，thái能算做義ah？Góa chin-chiàⁿ chai sī án-ni; In-ūi lâng tī Siōng-tè ê bīn-chêng, thái ōe sǹg-chòe-gī ah?

3若beh kap伊辯論，千項也bōe應伊一項。Nā beh kap I piān-lūn, Chheng-hāng iā bōe ìn I chi̍t-hāng.

4伊ê心是智慧，伊ê力是大；是誰抵抗伊，也得tio̍h安然？I ê sim sī tì-hūi, I ê la̍t sī tōa; Chī-chūi tí-khòng I, iā tit-tio̍h an-jiân?

5伊移徙山，山也m̄知；伊受氣中，hō͘山崩落去。I î-sóa soaⁿ, soaⁿ iā m̄-chai; I siū-khì tiong, hō͘ soaⁿ pang--lo̍h-khì.

6伊hō͘地振動，離開伊ê本位，地ê柱就搖choah。I hō͘ tōe tín-tāng, lī-khui i ê pún-ūi, Tōe ê thiāu chiū iô-choah.

7伊命令日，日就無出；koh封密眾星。I bēng-lēng ji̍t, ji̍t chiū bô chhut; Koh hong-ba̍t chèng chhiⁿ.

8伊家己thí開天；koh行踏tī海湧ê頂面。I ka-kī thí-khui thiⁿ; Koh kiâⁿ-ta̍h tī hái-éng ê téng-bīn.

9伊創造北斗、參星、卯星，kap南方ê密宮。I chhòng-chō Pak-táu, Chham-chhiⁿ, Báu-chhiⁿ, kap lâm-hng ê bi̍t-kiong.

10伊行tāi-chí大到bōe測度得，行奇事算bōe了。I kiâⁿ tāi-chì tōa kàu bōe chhek-to̍k-tit, Kiâⁿ kî-sū sǹg-bōe-liáu.

11看ah，伊tùi我chia經過，我也無看見，伊行過去，我也m̄知。Khòaⁿ ah, I tùi góa chia keng-kè, góa iā bô khòaⁿ-kìⁿ, I kiâⁿ kè--khì, góa iā m̄-chai.

12看ah，伊搶去，是誰能阻擋伊？Chī-chūi敢問伊，你做甚麼？Khòaⁿ ah, I chhiúⁿ-khì, chī-chūi ōe chó͘-tòng I? Chī-chūi káⁿ mn̄g I, Lí chòe sím-mi̍h?

13上帝的確無收回伊ê受氣，扶助La̍h-hap-pek ê，屈落tī伊ê下面。Siōng-tè tek-khak bô siu-hôe I ê siū-khì, Hû-chō͘ La̍h-hap-pek ê, khut-lo̍h tī I ê ē-bīn.

14何況我thái-thó敢應伊，á是揀甚麼話來kap伊辯論？Hô-hòng góa thái-thó káⁿ ìn I, Á-sī kéng sím-mi̍h ōe lâi kap I piān-lūn?

15我雖然是公義，也m̄敢應伊；獨獨對審判我ê求恩。Góa sui-jiân sī kong-gī, iā m̄-káⁿ ìn I; To̍k-to̍k tùi sím-phòaⁿ góa--ê kiû-un.

16我若求叫伊，伊若應我，我也m̄信伊有聽我ê聲。Góa nā kiû-kiò I, I nā ìn góa, Góa iā m̄-sìn I ū thiaⁿ góa ê siaⁿ.

17因為伊用大風phah我；無緣故加添我ê傷。In-ūi I ēng tōa-hong phah góa; Bô iân-kò͘ ke-thiⁿ góa ê siong.

18伊m̄容允我喘一個氣；獨獨用苦充滿我。I m̄ iông-ún góa chhoán chi̍t-ê khùi; To̍k-to̍k ēng khó͘ chhiong-móa góa.

19若論強猛，看ah，伊ê力tī-chia，若論審判，是誰能kā我定tio̍h期日？Nā lūn kiông-béng, khòaⁿ ah, I ê la̍t tī-chia, Nā lūn sím-phòaⁿ, chī-chūi ōe kā góa tiāⁿ-tio̍h kî-ji̍t?

20我雖然做義，我家己ê嘴beh定我ê罪；我雖然完全，伊beh顯明我ê橫逆。Góa sui-jiân chòe-gī, góa ka-kī ê chhùi beh tēng góa ê chōe; Góa sui-jiân oân-choân, i beh hián-bêng góa ê hêng-ge̍k.

21我是完全ê，我無顧家己；我看輕我ê活命。Góa sī oân-choân-ê, góa bô kò͘ ka-kī; Góa khòaⁿ-khin góa ê oa̍h-miā.

22通通是一樣，所以我講，完全ê kap行pháiⁿ-ê，伊lóng剿滅。Thong-thong sī chi̍t-iūⁿ, só͘-í góa kóng, Oân-choân--ê kap kiâⁿ-pháiⁿ-ê, I lóng châu-bia̍t.

23災厄若忽然phah死人，伊就恥笑無罪ê人tú-tio̍h試煉。Chai-ē nā hut-jiân phah-sí lâng, I chiū thí-chhiò bô-chōe ê lâng tú-tio̍h chhì-liān.

24世界交付tī pháiⁿ人ê手；伊遮蓋審判司ê面；若m̄是伊，是是誰 ah？Sè-kài kau-hù tī pháiⁿ-lâng ê chhiú; I jia-khàm sím-phòaⁿ-si ê bīn; Nā m̄-sī I, sī chī-chūi ah?

25我ê日子比走文書ê khah緊，緊緊過去，無看見甚麼福氣。Góa ê ji̍t-chí pí cháu-bûn-su--ê khah-kín, Kín-kín kè--khì, bô khòaⁿ-kìⁿ sím-mi̍h hok-khì.

26緊緊過去親像快船；koh親像鷹緊緊飛落去la̍k物。Kín-kín kè-khì chhin-chhiūⁿ khoài-chûn; Koh chhin-chhiūⁿ eng kín-kín pe--lo̍h-khì la̍k-mi̍h.

27我若講beh bōe記得我ê哀怨，beh改我ê憂容做歡喜；Góa nā kóng beh bōe-kì-tit góa ê ai-oàn, Beh kóe góa ê iu-iông chòe hoaⁿ-hí;

28我就驚我chiah-ê憂苦；因為我知你的確無掠我做無罪。Góa chiū kiaⁿ góa chiah ê iu-khó͘; In-ūi góa chai Lí tek-khak bô lia̍h góa chòe bô-chōe.

29我beh受定罪，我啥事空空tio̍h磨ah？Góa beh siū tēng-chōe, Góa siáⁿ-sū khang-khang tio̍h-bôa ah?

30我若用雪ê水家己洗，用鹼(kiⁿ)清氣我ê手，Góa nā ēng seh ê chúi ka-kī sóe, Ēng kiⁿ chheng-khì góa ê chhiú,

31你beh hiat我tī溝á底，我ê衫也beh厭惡我。Lí beh hiat góa tī kau-á-tóe, Góa ê saⁿ iā beh iàm-ò͘ⁿ góa.

32因為伊m̄是世間人親像我，hō͘我thang應伊，也hō͘阮thang對訊。In-ūi I m̄-sī sè-kan lâng chhin-chhiūⁿ góa, hō͘ góa thang ìn I, Iā hō͘ goán thang tùi-sìn.

33阮中間無有判斷ê。Thang hō͘阮二彼(jī-pí)降服伊。Goán tiong-kan bô ū phòaⁿ-toàn--ê. Thang hō͘ goán jī-pí hâng-ho̍k i.

34願伊徙伊ê柺á 離開我，無用伊ê威嚴hō͘我驚；Goān I sóa I ê koáiⁿ-á lî-khui góa, Bô ēng I ê ui-giâm hō͘ góa kiaⁿ;

35我就敢講，也無驚伊；總是我本m̄是hit款。Góa chiū káⁿ kóng, iā bô kiaⁿ I; Chóng-sī góa pún m̄-sī hit-khoán.

1我ê心m̄-ài活：我beh大膽講出我ê哀怨；我心內ê苦痛，我chiah beh講。Góa ê sim m̄-ài oa̍h: Góa beh tōa-táⁿ kóng-chhut góa ê ai-oàn; Góa sim-lāi ê khó͘-thàng, góa chiah beh kóng.

2我beh對上帝講，莫得定我有罪，tio̍h指示我，你為甚麼因端kap我爭辯。Góa beh tùi Siōng-tè kóng, Bo̍h-tit tēng góa ū-chōe, Tio̍h chí-sī góa, Lí ūi sím-mi̍h in-toaⁿ kap góa cheng-piān.

3你行壓制，koh看輕你ê手所造ê，koh用光照pháiⁿ人ê計謀，你kiám掠chiah-ê做好mah？Lí kiâⁿ ap-chè, koh khòaⁿ-khin Lí ê chhiú só͘-chō-ê, Koh ēng kng chiò pháiⁿ-lâng ê kè-bô͘, Lí kiám lia̍h chiah-ê chòe-hó mah?

4你ê目睭kiám是肉ê，á是你teh看親像人teh看mah？Lí ê ba̍k-chiu kiám sī bah-ê, Á-sī Lí teh khòaⁿ chhin-chhiūⁿ lâng teh khòaⁿ mah?

5你ê日子kiám親像人ê日子？á是你ê年親像人ê年mah？Lí ê ji̍t-chí kiám chhin-chhiūⁿ lâng ê ji̍t-chí? Á-sī Lí ê nî chhin-chhiūⁿ lâng ê nî mah?

6你chiah究勘我ê罪孽，查察我ê罪過。Lí chiah kiù-khàm góa ê chōe-gia̍t, Cha-chhat góa ê chōe-kòa.

7你是m̄知我無罪，也無一個能救我脫離你ê手mah？Lí sī m̄-chai góa bô chōe, Iā bô chi̍t-ê ōe kiù góa thoat-lī Lí ê chhiú mah?

8你ê手有創造我，雕琢我ê 四肢百體，你iáu-kú teh毀滅我。Lí ê chhiú ū chhòng-chō góa, tiau-tok góa ê sù-chi pah-thé, Lí iáu-kú teh húi-bia̍t góa.

9求你記念，你bat製造我親像chhiau土一般；你beh hō͘我koh歸tī土粉mah？Kiû Lí kì-liām, Lí bat chè-chō góa chhin-chhiūⁿ chhiau-thô͘ chi̍t-poaⁿ; Lí beh hō͘ góa koh kui tī thô͘-hún mah?

10你kiám m̄是piàⁿ出我親像奶，hō͘我吉kui-thn̂g親像奶餅mah？Lí kiám m̄-sī piàⁿ-chhut góa chhin-chhiūⁿ ni, Hō͘ góa kiat kui-thn̂g chhin-chhiūⁿ ni-piáⁿ mah?

11你用皮kap肉hō͘我穿，koh用骨kap筋hō͘我連絡。Lí ēng phê kap bah hō͘ góa chhēng, Koh ēng kut kap kun hō͘ góa liân-lo̍k.

12你用活命kap慈愛hō͘我，你ê眷顧保全我ê性命。Lí ēng oa̍h-miā kap chû-ài hō͘ góa, Lí ê koàn-kò͘ pó-choân góa ê sìⁿ-miā.

13Chiah-ê事你lóng khǹg tī你ê心；我知你本有chit-ê意思。Chiah ê sū Lí lóng khǹg tī Lí ê sim; Góa chai Lí pún ū chit ê ì-sù.

14我若犯罪，你就注意我；也無beh掠我做無罪。Góa nā hoān-chōe, Lí chiū chù-ì góa; Iā bô beh lia̍h góa chòe bô chōe.

15我若行pháiⁿ，就有災厄，我若做義，也m̄敢kia̍h起頭；滿心見笑，親目看見我ê艱苦。Góa nā kiâⁿ-pháiⁿ, chiū ū chai-ē, Góa nā chòe-gī, iā m̄-káⁿ kia̍h-khí thâu; Móa-sim kiàn-siàu, Chhin-ba̍k khòaⁿ-kìⁿ góa ê kan-khó͘.

16我若頭kia̍h高，你就jip beh掠我親像獅，koh顯出你ê奇異tī我。Góa nā thâu kia̍h-koâiⁿ, Lí chiū jip beh lia̍h góa chhin-chhiūⁿ sai, Koh hián-chhut Lí ê kî-īⁿ tī góa.

17你koh 設你ê干證攻擊我。加添你ê受氣tī我；軍兵一隊過一隊，攻擊我。Lí koh siat Lí ê kan-chèng kong-kek góa. Ke-thiⁿ Lí ê siū-khì tī góa; Kun-peng chi̍t-tūi kè chi̍t-tūi, kong-kek góa.

18你啥事hō͘我出胎？m̄值tio̍h hit時斷氣，無hō͘人ê目睭看見我。Lí siáⁿ-sū hō͘ góa chhut-thai? m̄-ta̍t-tio̍h hit-sî tn̄g-khùi, Bô hō͘ lâng ê ba̍k-chiu khòaⁿ-kìⁿ góa.

19Án-ni我就有，ná親像無；一下出胎就送入墓。Án-ni góa chiū ū, ná chhin-chhiūⁿ bô; Chi̍t-ē chhut-thai chiū sàng ji̍p bōng.

20我ê日子kiám m̄是真少mah？求你請停，放寬我，Góa ê ji̍t-chí kiám m̄-sī chin-chió mah? Kiû Lí chhiáⁿ-thêng, pàng-khoan góa,

21Hō͘我tī去無倒tńg，就是去烏暗kap死蔭ê地ê事先，thang略á得tio̍h安慰。Hō͘ góa tī khì, bô tò-tńg, chiū-sī khì o͘-àm kap sí-ìm ê tōe ê tāi-seng, Thang lio̍h-á tit-tio̍h an-ùi.

22Hit-ê地暗暗親像烏墨，是死蔭渾沌，伊ê光親像烏墨。Hit ê tōe àm-àm chhin-chhiūⁿ o͘-ba̍k, Sī sí-ìm hūn-tūn, I ê kng chhin-chhiūⁿ o͘-ba̍k.