1以色列ah，你tio̍h 倒tńg來歸耶和華，你ê上帝；因為你對你ê罪來跋倒。Í-sek-lia̍t ah, lí tio̍h tò-tńg-lâi kui Iâ-hô-hoa, lí ê Siōng-tè; in-ūi lí tùi lí ê chōe lâi poa̍h-tó.

2Tio̍h備辦話倒tńg來歸耶和華，對伊講，求你赦免lóng總ê罪，用恩典接納阮；阮就用嘴o-ló來替牲禮。Tio̍h pī-pān ōe tò-tńg-lâi kui Iâ-hô-hoa, tùi I kóng, Kiû Lí sià-bián lóng-chóng ê chōe, ēng un-tián chiap-la̍p goán; goán chiū ēng chhùi o-ló lâi thòe seng-lé.

3亞述bōe能救阮；阮無koh騎馬，也無koh對阮ê手所造ê講，你是阮ê上帝，因為無父ê kiáⁿ tùi你得tio̍h憐憫。A-su̍t bōe-ōe kiù goán; goán bô koh khiâ-bé, iā bô koh tùi goán ê chhiú só͘-chō--ê kóng, Lí sī goán ê siōng-tè, in-ūi bô-pē ê kiáⁿ tùi Lí tit-tio̍h lîn-bín.

4我beh醫好伊ê背叛，我beh白白疼in；因為我已經對in soah我ê受氣。Góa beh i-hó i ê pōe-poān, Góa beh pe̍h-pe̍h thiàⁿ--in; in-ūi Góa í-keng tùi in soah Góa ê siū-khì.

5我beh tī以色列親像露水；伊beh開花親像百合花；伊beh伸根親像黎巴嫩。Góa beh tī Í-sek-lia̍t chhin-chhiūⁿ lō͘-chúi; i beh khui-hoe chhin-chhiūⁿ pek-ha̍p-hoe; i beh chhun-kun chhin-chhiūⁿ Lī-pa-lùn.

6伊ê枝beh伸長，伊ê súi beh親像橄欖樹；伊ê芳beh親像黎巴嫩。I ê ki beh chhun-tn̂g, i ê súi beh chhin-chhiūⁿ kaⁿ-ná-chhiū; i ê phang beh chhin-chhiūⁿ Lī-pa-lùn.

7Tiàm-tī伊ê蔭影ê，beh 倒tńg來；in beh親像五穀koh翻青，開花親像葡萄樹；伊ê芳beh親像黎巴嫩ê酒。Tiàm-tī i ê ìm-ńg--ê, beh tò-tńg-lâi; in beh chhin-chhiūⁿ gō͘-kak koh hoan-chhiⁿ, khui-hoe chhin-chhiūⁿ phû-tô-chhiū; i ê phang beh chhin-chhiūⁿ Lī-pa-lùn ê chiú.

8Í-hoat-liân beh講，我kap偶像iáu有甚麼干涉ah？我有應伊，koh看顧伊。我親像青翠ê松樹，你ê果子tùi我來得tio̍h。Í-hoat-liân beh kóng, Góa kap ngó͘-siōng iáu ū sím-mi̍h kan-sia̍p ah? Góa ū ìn i, koh khòaⁿ-kò͘ i. Góa chhin-chhiūⁿ chhiⁿ-chhùi ê chêng-chhiū, lí ê ké-chí tùi Góa lâi tit-tio̍h.

9Chī-chūi是智慧ê人，能明白chiah-ê事？是誰是通達ê人，能知chiah-ê？因為耶和華ê道路是正直，義人beh行tī hit中間，悖逆ê人beh跋倒tī hit頂面。Chī-chūi sī tì-hūi ê lâng, ōe bêng-pe̍k chiah ê sū? chī-chūi sī thong-ta̍t ê lâng, ōe chai chiah-ê? in-ūi Iâ-hô-hoa ê tō-lō͘ sī chèng-ti̍t, gī-lâng beh kiâⁿ tī hit tiong-kan, pōe-ge̍k ê lâng beh poa̍h-tó tī hit téng-bīn.

1耶和華ê話臨到Pí-thó͘-jíⁿ ê kiáⁿ約珥ê。Iâ-hô-hoa ê ōe lîm-kàu Pí-thó͘-jíⁿ ê kiáⁿ Iok-jíⁿ--ê.

2老大人ah，lín tio̍h聽chit-ê，chit所在khiā起ê百姓ah，lín tio̍h俯耳孔，當lín ê日á是lín ê列祖ê日，bat有chit-ê事mah？Lāu-tōa lâng ah, lín tio̍h thiaⁿ chit-ê, chit só͘-chāi khiā-khí ê peh-sìⁿ ah, lín tio̍h àⁿ hī-khang, tng lín ê ji̍t á-sī lín ê lia̍t-chó͘ ê ji̍t, bat ū chit ê sū mah?

3Lín tio̍h將chit-ê事傳hō͘ lín ê kiáⁿ，kiáⁿ傳hō͘孫，孫傳hō͘後代。Lín tio̍h chiong chit ê sū thoân hō͘ lín ê kiáⁿ, kiáⁿ thoân hō͘ sun, sun thoân hō͘ āu-tāi.

4草蜢食chhun-ê，第二種 ê草蜢來食伊；第二種食chhun-ê，第三種ê草蜢來食伊；第三種食chhun-ê，第四種ê草蜢來食伊。Chháu-meh chia̍h chhun--ê, tē-jī-chéng ê chháu-meh lâi chia̍h i; tē-jī-chéng chia̍h-chhun--ê, tē-saⁿ-chéng ê chháu-meh lâi chia̍h i; tē-saⁿ-chéng chia̍h-chhun-ê, tē-sì-chéng ê chháu-meh lâi chia̍h--i.

5酒醉ê人ah，lín tio̍h醒來啼哭；好酒ê人ah，tio̍h為tio̍h甜酒來啼哭；因為無酒thang koh到你ê嘴lah。Chiú-chùi ê lâng ah, lín tio̍h chhíⁿ lâi thî-khàu; hò͘ⁿ-chiú ê lâng ah, tio̍h ūi-tio̍h tiⁿ-chiú lâi thî-khàu; in-ūi bô chiú thang koh kàu lí ê chhùi lah.

6因為有一族上來我ê地，強猛koh bōe算得；伊ê齒親像獅ê齒，伊ê牙親像母ê獅ê牙；In-ūi ū chi̍t-cho̍k chiūⁿ--lâi góa ê tōe, kiông-béng koh bōe-sǹg-tit; i ê khí chhin-chhiūⁿ sai ê khí, i ê gê chhin-chhiūⁿ bú ê sai ê gê;

7伊毀壞我ê葡萄樹，剝(pak)我ê無花果樹，hō͘伊光liu-liu，來棄sak伊；伊ê枝變做白。i húi-hoāi góa ê phû-tô-chhiū, pak góa ê bû-hoa-kó chhiū, hō͘ i kng liu-liu, lâi khì-sak i; i ê ki piàn-chòe pe̍h.

8你tio̍h啼哭，親像在室女腰hâ麻布，為tio̍h少年ê時ê丈夫啼哭。Lí tio̍h thî-khàu, chhin-chhiūⁿ chāi-sek-lú io hâ môa-pò͘, ūi-tio̍h siàu-liân ê sî ê tiōng-hu thî-khàu.

9素祭kap奠酒，lóng無thang到耶和華ê殿；服事耶和華ê祭司lóng悲哀。Sò͘-chè kap tiān-chiú, lóng bô thang kàu Iâ-hô-hoa ê tiān; ho̍k-sāi Iâ-hô-hoa ê chè-si lóng pi-ai.

10田拋荒，地悲哀；因為五穀毀壞，新酒乾去，油也欠缺。Chhân pha-hng, tōe pi-ai; in-ūi gō͘-kak húi-hoāi, sin-chiú ta--khì, iû iā khiàm-kheh.

11作田人ah，lín tio̍h見笑，修理葡萄園ê ah，lín tio̍h哀叫，為tio̍h小麥kap大麥ê緣故；因為田園ê收成lóng無去。Choh-chhân lâng ah, lín tio̍h kiàn-siàu, siu-lí phû-tô-hn̂g--ê ah, lín tio̍h ai-kiò, ūi-tio̍h sió-be̍h kap tōa-be̍h ê iân-kò͘; in-ūi chhân-hn̂g ê siu-sêng lóng bô--khì.

12葡萄樹乾去，無花果樹枯焦，石榴、棗樹、蘋果，連田野一切ê樹木，也lóng枯焦；人間ê快樂lóng消無。Phû-tô-chhiū ta--khì, bû-hoa-kó chhiū ko͘-tâ, sia̍h-liû, chó-chhiū, pîn-kó, liân chhân-iá it-chhè ê chhiū-ba̍k, iā lóng ko͘-tâ; jîn-kan ê khoài-lo̍k lóng siau-bô.

13祭司ah，lín tio̍h hâ麻布啼哭；tī祭壇服事ê ah，lín tio̍h哀叫；做我ê上帝差用ê人ah，lín tio̍h來，穿麻布過暝；因為素祭kap奠酒，lóng無thang獻tī lín ê上帝ê殿。Chè-si ah, lín tio̍h hâ môa-pò͘ thî-khàu; tī chè-tôaⁿ ho̍k-sāi--ê ah, lín tio̍h ai-kiò; chòe góa ê Siōng-tè chhe-ēng ê lâng ah, lín tio̍h lâi, chhēng môa-pò͘ kè-mî; in-ūi sò͘-chè kap tiān-chiú, lóng bô thang hiàn tī lín ê Siōng-tè ê tiān.

14Lín tio̍h設一個禁食ê聖日，召集嚴肅會，招集老大，kap國內一切khiā起ê百姓，到耶和華lín上帝ê殿，哀求耶和華。Lín tio̍h siat chi̍t ê kìm-chia̍h ê sèng-ji̍t, tiàu-chi̍p giâm-siok-hōe, chio-chi̍p lāu-tōa, kap kok-lāi it-chhè khiā-khí ê peh-sìⁿ, kàu Iâ-hô-hoa lín Siōng-tè ê tiān, ai-kiû Iâ-hô-hoa.

15慘ah，hit日，因為耶和華ê日近lah，親像毀滅beh tùi全能ê來。Chhám ah, hit-ji̍t, in-ūi Iâ-hô-hoa ê ji̍t kūn lah, chhin-chhiūⁿ húi-bia̍t beh tùi Choân-lêng--ê lâi.

16食物kiám m̄是對咱ê目前斷絕mah？歡喜快樂kiám m̄是對咱ê上帝ê殿停止mah？Chia̍h-mi̍h kiám-m̄-sī tùi lán ê ba̍k-chêng toān-choa̍t mah? Hoaⁿ-hí khoài-lo̍k kiám-m̄-sī tùi lán ê Siōng-tè ê tiān thêng-chí mah?

17種子爛tī土內；粟倉荒廢；粟siāⁿ倒壞；因為五穀乾la去。Chéng-chí nōa tī thô͘-lāi; chhek-chhng hong-hòe; chhek-siāⁿ tó-hoāi; in-ūi gō͘-kak ta-la--khì.

18Cheng-siⁿ 哀哮到怎樣！牛群紛亂，因為無草；羊群也困苦。Cheng-siⁿ ai-háu kàu cháiⁿ-iūⁿ! gû-kûn hun-loān, in-ūi bô chháu; iûⁿ-kûn iā khùn-khó͘.

19耶和華ah，我求叫你；因為火燒滅曠野ê草場，火燄燒盡田野ê樹木。Iâ-hô-hoa ah, góa kiû-kiò Lí; in-ūi hé sio-bia̍t khòng-iá ê chháu-tiûⁿ, hé-iām sio-chīn chhân-iá ê chhiū-ba̍k.

20田野ê走獸ǹg你teh喘；因為溪水乾去，火也燒滅曠野ê草場。Chhân-iá ê cháu-siù ǹg Lí teh chhoán; in-ūi khoe-chúi ta--khì, hé iā sio-bia̍t khòng-iá ê chháu-tiûⁿ.

1Lín tio̍h tī錫安pûn哨角，tī我ê聖山pûn號頭；國內khiā起ê百姓lóng tio̍h ngia̍uh-ngia̍uh-chhoah；因為耶和華ê日beh到，taⁿ近lah。Lín tio̍h tī Sek-an pûn sàu-kak, tī Góa ê sèng-soaⁿ pûn hō-thâu; kok-lāi khiā-khí ê peh-sìⁿ lóng tio̍h ngia̍uh-ngia̍uh-chhoah; in-ūi Iâ-hô-hoa ê ji̍t beh kàu, taⁿ kūn--lah.

2Hit日是烏烏暗暗，密雲烏暗ê日，親像phah-phú光色緻鋪滿山頭；有一族大koh強，從來bē-bat有án-ni-ê，以後到代代也無。Hit-ji̍t sī o͘-o͘ àm-àm, ba̍t-hûn o͘-àm ê ji̍t, chhin-chhiūⁿ phah-phú-kng sek-tì pho͘-móa soaⁿ-thâu; ū chi̍t-cho̍k tōa koh kiông, chiông-lâi bē-bat ū án-ni--ê, í-āu kàu tāi-tāi iā bô.

3火to̍h tī in ê頭前，火燄燒tī in ê後面；in未到ê地，親像伊甸園，in過了ê地，成做拋荒ê曠野；無一項能閃避in。Hé to̍h tī in ê thâu-chêng, hé-iām sio tī in ê āu-bīn; in bē kàu ê tōe, chhin-chhiūⁿ Ai-tiân hn̂g, in kè-liáu ê tōe, chiâⁿ-chòe pha-hng ê khòng-iá; bô chi̍t-hāng ōe siám-pī in.

4In ê形狀親像馬，跑走親像馬兵。In ê hêng-chōng chhin-chhiūⁿ bé, pháu-cháu chhin-chhiūⁿ bé-peng.

5In跳tī山頂，親像車ê聲，koh親像火燄燒草ê聲，親像強猛ê百姓排tī戰陣。In thiàu tī soaⁿ-téng, chhin-chhiūⁿ chhia ê siaⁿ, koh chhin-chhiūⁿ hé-iām sio-chháu ê siaⁿ, chhin-chhiūⁿ kiông-béng ê peh-sìⁿ pâi tī chiàn-tīn.

6In一下來，眾百姓慘到極，面lóng變色。In chi̍t-ē lâi, chèng peh-sìⁿ chhám kàu-ke̍k, bīn lóng piàn-sek.

7In跑走親像勇士，爬上城親像戰士，ta̍k-ê照路行，無亂隊伍；In pháu-cháu chhin-chhiūⁿ ióng-sū, peh-chiūⁿ siâⁿ chhin-chhiūⁿ chiàn-sū, ta̍k-ê chiàu-lō͘ kiâⁿ, bô loān tūi-ngó͘;

8大家無相oe-khoeh，ta̍k-ê行伊ê路；tú-tio̍h鎗刀，亦無閃避；tāi-ke bô saⁿ oe-khoeh, ta̍k-ê kiâⁿ i ê lō͘; tú-tio̍h chhiuⁿ-to, ia̍h bô siám-pī;

9in跳入城，pôaⁿ過牆，爬上厝頂，入窗á親像賊；in thiàu-ji̍p siâⁿ, pôaⁿ-kè chhiûⁿ, pê-chiūⁿ chhù-téng, ji̍p thang-á chhin-chhiūⁿ chha̍t;

10in一下來，地振動，天搖choah，日月烏暗，星辰無光。in chi̍t-ē lâi, tōe tín-tāng, thiⁿ iô-choah, ji̍t-ge̍h o͘-àm, chhiⁿ-sîn bô kng.

11耶和華tī祂ê軍兵ê面前出聲，祂ê軍隊真大；行祂ê命令ê真強猛；因為耶和華ê日大koh thang驚，是誰當能起ah？Iâ-hô-hoa tī I ê kun-peng ê bīn-chêng chhut-siaⁿ, I ê kun-tūi chin-tōa; kiâⁿ I ê bēng-lēng--ê chin kiông-béng; in-ūi Iâ-hô-hoa ê ji̍t tōa koh thang kiaⁿ, chī-chūi tng ōe khí ah?

12耶和華講，雖然án-ni，lín tio̍h用專心，用禁食，用啼哭，用悲哀oa̍t-tńg歸ǹg我。Iâ-hô-hoa kóng, Sui-jiân án-ni, lín tio̍h ēng choan-sim, ēng kìm-chia̍h, ēng thî-khàu, ēng pi-ai oa̍t-tńg kui-ǹg Góa.

13Tio̍h拆裂lín ê心，莫得拆裂lín ê衫，歸ǹg耶和華lín ê上帝；因為祂有仁慈憐憫，無快快受氣，滿滿恩惠，koh退悔祂ê災厄。Tio̍h thiah-li̍h lín ê sim, bo̍h-tit thiah-li̍h lín ê saⁿ, kui-ǹg Iâ-hô-hoa lín ê Siōng-tè; in-ūi I ū jîn-chû lîn-bín, bô khoài-khoài siū-khì, móa-móa un-hūi, koh thè-hóe I ê chai-ē.

14Chī-chūi會知伊肯oa̍t倒tńg來退悔， 留福氣tī後來，就是有素祭灌奠獻hō͘ lín ê上帝耶和華？Chī-chūi ōe chai I khéng oa̍t-tò-tńg lâi thè-hóe, lâu hok-khì tī āu-lâi, chiū-sī ū sò͘-chè koàn-tiān hiàn hō͘ lín ê Siōng-tè Iâ-hô-hoa?

15Lín tio̍h tī錫安pûn哨角，設一個禁食ê聖日，召集嚴肅會；Lín tio̍h tī Sek-an pûn sàu-kak, siat chi̍t ê kìm-chia̍h ê sèng-ji̍t, tiàu-chi̍p giâm-siok-hōe;

16聚集眾百姓分別hit-ê會做聖，招集老人，聚集gín-ná kap食奶ê；hō͘新kiáⁿ婿出伊ê厝，新娘離開伊ê房。chū-chi̍p chèng peh-sìⁿ hun-piat hit ê hōe chòe-sèng, chio-chi̍p lāu-lâng, chū-chi̍p gín-ná kap chia̍h-ni--ê; hō͘ sin-kiáⁿ-sài chhut i ê chhù, sin-niû lī-khui i ê pâng.

17服事耶和華ê祭司，tio̍h tī冷廊kap祭壇ê中間啼哭，講，耶和華ah，求祢寬恕祢ê百姓，莫得hō͘祢ê產業受凌辱，hō͘列邦管轄in；啥事hō͘列國ê人講，In ê上帝tī toh-lo̍h？Ho̍k-sāi Iâ-hô-hoa ê chè-si, tio̍h tī léng-lông kap chè-tôaⁿ ê tiong-kan thî-khàu, kóng, Iâ-hô-hoa ah, kiû Lí khoan-sù Lí ê peh-sìⁿ, bo̍h-tit hō͘ Lí ê sán-gia̍p siū lêng-jio̍k, hō͘ lia̍t-pang koán-hat in; siáⁿ-sū hō͘ lia̍t-kok ê lâng kóng, In ê Siōng-tè tī toh-lo̍h?

18Hit時耶和華為tio̍h祂ê地來熱心，憐憫祂ê百姓。Hit-sî Iâ-hô-hoa ūi-tio̍h I ê tōe lâi jia̍t-sim, lîn-bín I ê peh-sìⁿ.

19耶和華應祂ê百姓講，看ah，我beh hō͘ lín有五穀、新酒kap油，lín就滿足；我無koh hō͘ lín tī列邦中受凌辱。Iâ-hô-hoa ìn I ê peh-sìⁿ kóng, Khòaⁿ ah, Góa beh hō͘ lín ū gō͘-kak sin-chiú kap iû, lín chiū móa-chiok; Góa bô koh hō͘ lín tī lia̍t-pang-tiong siū lêng-jio̍k.

20我也beh hō͘北方ê軍隊離開lín遠遠，趕伊到炕旱拋荒ê地；伊ê前隊到東海，後隊到西海；因為伊行大tāi-chì，伊ê pháiⁿ味chhèng起，臭味發起。Góa iā beh hō͘ pak-hng ê kun-tūi lī-khui lín hn̄g-hn̄g, kóaⁿ i kàu khòng-hān pha-hng ê tōe; i-ê chêng-tūi kàu tang-hái, āu-tūi kàu sai-hái; in-ūi i kiâⁿ tōa tāi-chì, i ê pháiⁿ-bī chhèng-khí, chhàu-bī hoat-khí.

21地土ah，莫得驚，tio̍h歡喜快樂；因為耶和華行大事。Tōe-thó͘ ah, bo̍h-tit kiaⁿ, tio̍h hoaⁿ-hí khoài-lo̍k; in-ūi Iâ-hô-hoa kiâⁿ tōa-sū.

22田野ê走獸ah，莫得驚，因為曠野ê草場發生，樹結伊ê果子，無花果樹、葡萄樹，亦lóng結實。Chhân-iá ê cháu-siù ah, bo̍h-tit kiaⁿ, in-ūi khòng-iá ê chháu-tiûⁿ hoat-siⁿ, chhiū kiat i ê ké-chí, bû-hoa-kó chhiū, phû-tô chhiū, ia̍h lóng kiat-si̍t.

23錫安ê百姓ah，lín tio̍h快樂，ūi耶和華lín ê上帝來歡喜；因為祂用前ê雨及時賞賜lín；為tio̍h lín落雨水，就是前ê雨，後ê雨，kap以前一樣。Sek-an ê peh-sìⁿ ah, lín tio̍h khoài-lo̍k, ūi Iâ-hô-hoa lín ê Siōng-tè lâi hoaⁿ-hí; in-ūi I ēng chêng ê hō͘ ki̍p-sî siúⁿ-sù lín; ūi-tio̍h lín lo̍h hō͘-chúi, chiū-sī chêng ê hō͘, āu ê hō͘, kap í-chêng chi̍t-iūⁿ.

24五穀場beh有麥滿滿，窟中ê新酒kap油beh滿出來。Gō͘-kak-tiûⁿ beh ū be̍h móa-móa, khut-tiong ê sin-chiú kap iû beh móa--chhut-lâi.

25我差到lín中間ê大軍隊，就是第一種、第二種、第三種、第四種 ê草蜢，所食hiah-ê年冬，我lóng beh還lín。Góa chhe kàu lín tiong-kan ê tōa kun-tūi, chiū-sī tē-it-chéng, tē-jī-chéng, tē-saⁿ-chéng, tē-sì-chéng ê chháu-meh, só͘ chia̍h hiah ê nî-tang, Góa lóng beh hêng lín.

26Lín beh食來知足；亦beh o-ló lín ê上帝耶和華ê名；因為祂為tio̍h lín行奇妙ê事，我ê百姓的確永遠無見笑。Lín beh chia̍h lâi ti-chiok; ia̍h beh o-ló lín ê Siōng-tè Iâ-hô-hoa ê miâ; in-ūi I ūi-tio̍h lín kiâⁿ kî-biāu ê sū, Góa ê peh-sìⁿ tek-khak éng-oán bô kiàn-siàu.

27Lín就beh知我tī以色列ê中間，koh知我是耶和華lín ê上帝，以外無別ê；我ê百姓的確永遠無見笑。Lín chiū beh chai Góa tī Í-sek-lia̍t ê tiong-kan, koh chai Góa sī Iâ-hô-hoa lín ê Siōng-tè, í-gōa bô pa̍t-ê; Góa ê peh-sìⁿ tek-khak éng-oán bô kiàn-siàu.

28了後我beh用我ê神降落hō͘凡有肉體ê；lín ê kiáⁿ cha-bó͘-kiáⁿ beh做先知講話，lín ê老人beh得tio̍h眠夢，lín ê少年人beh看見異象；Liáu-āu Góa beh ēng Góa ê Sîn kàng-lo̍h hō͘ hoān ū jio̍k-thé--ê; lín ê kiáⁿ cha-bó͘-kiáⁿ beh chòe sian-ti kóng-ōe, lín ê lāu-lâng beh tit-tio̍h bîn-bāng, lín ê siàu-liân lâng beh khòaⁿ-kìⁿ īⁿ-siōng;

29tī hiah-ê日，我beh用我ê神降落tī奴僕女婢。tī hiah ê ji̍t, Góa beh ēng Góa ê Sîn kàng-lo̍h tī lô͘-po̍k lú-pī.

30我beh顯明奇事tī天裡，tī地裡，血kap火；kap火薰ê柱。Góa beh hián-bêng kî-sū tī thiⁿ--nih, tī tōe--nih, huih kap hé; kap hé-hun ê thiāu.

31日頭beh變烏暗，月beh變做血，tī耶和華大koh thang驚ê日未到ê事先。Ji̍t-thâu beh piàn o͘-àm, ge̍h beh piàn-chòe huih, tī Iâ-hô-hoa tōa koh thang kiaⁿ ê ji̍t bē kàu ê tāi-seng.

32到hit時，見有求叫耶和華ê名ê，beh得tio̍h救；因為tī錫安山kap tī耶路撒冷beh有逃脫ê人，照耶和華所講ê，tī chhun ê百姓中beh有耶和華所召ê。Kàu hit-sî, kìⁿ-ū kiû-kiò Iâ-hô-hoa ê miâ--ê, beh tit-tio̍h kiù; in-ūi tī Sek-an soaⁿ kap tī Iâ-lō͘-sat-léng beh ū tô-thoat ê lâng, chiàu Iâ-hô-hoa só͘ kóng--ê, tī chhun ê peh-sìⁿ-tiong beh ū Iâ-hô-hoa só͘ tiàu--ê.