1Lín tio̍h tī錫安pûn哨角，tī我ê聖山pûn號頭；國內khiā起ê百姓lóng tio̍h ngia̍uh-ngia̍uh-chhoah；因為耶和華ê日beh到，taⁿ近lah。Lín tio̍h tī Sek-an pûn sàu-kak, tī Góa ê sèng-soaⁿ pûn hō-thâu; kok-lāi khiā-khí ê peh-sìⁿ lóng tio̍h ngia̍uh-ngia̍uh-chhoah; in-ūi Iâ-hô-hoa ê ji̍t beh kàu, taⁿ kūn--lah.

2Hit日是烏烏暗暗，密雲烏暗ê日，親像phah-phú光色緻鋪滿山頭；有一族大koh強，從來bē-bat有án-ni-ê，以後到代代也無。Hit-ji̍t sī o͘-o͘ àm-àm, ba̍t-hûn o͘-àm ê ji̍t, chhin-chhiūⁿ phah-phú-kng sek-tì pho͘-móa soaⁿ-thâu; ū chi̍t-cho̍k tōa koh kiông, chiông-lâi bē-bat ū án-ni--ê, í-āu kàu tāi-tāi iā bô.

3火to̍h tī in ê頭前，火燄燒tī in ê後面；in未到ê地，親像伊甸園，in過了ê地，成做拋荒ê曠野；無一項能閃避in。Hé to̍h tī in ê thâu-chêng, hé-iām sio tī in ê āu-bīn; in bē kàu ê tōe, chhin-chhiūⁿ Ai-tiân hn̂g, in kè-liáu ê tōe, chiâⁿ-chòe pha-hng ê khòng-iá; bô chi̍t-hāng ōe siám-pī in.

4In ê形狀親像馬，跑走親像馬兵。In ê hêng-chōng chhin-chhiūⁿ bé, pháu-cháu chhin-chhiūⁿ bé-peng.

5In跳tī山頂，親像車ê聲，koh親像火燄燒草ê聲，親像強猛ê百姓排tī戰陣。In thiàu tī soaⁿ-téng, chhin-chhiūⁿ chhia ê siaⁿ, koh chhin-chhiūⁿ hé-iām sio-chháu ê siaⁿ, chhin-chhiūⁿ kiông-béng ê peh-sìⁿ pâi tī chiàn-tīn.

6In一下來，眾百姓慘到極，面lóng變色。In chi̍t-ē lâi, chèng peh-sìⁿ chhám kàu-ke̍k, bīn lóng piàn-sek.

7In跑走親像勇士，爬上城親像戰士，ta̍k-ê照路行，無亂隊伍；In pháu-cháu chhin-chhiūⁿ ióng-sū, peh-chiūⁿ siâⁿ chhin-chhiūⁿ chiàn-sū, ta̍k-ê chiàu-lō͘ kiâⁿ, bô loān tūi-ngó͘;

8大家無相oe-khoeh，ta̍k-ê行伊ê路；tú-tio̍h鎗刀，亦無閃避；tāi-ke bô saⁿ oe-khoeh, ta̍k-ê kiâⁿ i ê lō͘; tú-tio̍h chhiuⁿ-to, ia̍h bô siám-pī;

9in跳入城，pôaⁿ過牆，爬上厝頂，入窗á親像賊；in thiàu-ji̍p siâⁿ, pôaⁿ-kè chhiûⁿ, pê-chiūⁿ chhù-téng, ji̍p thang-á chhin-chhiūⁿ chha̍t;

10in一下來，地振動，天搖choah，日月烏暗，星辰無光。in chi̍t-ē lâi, tōe tín-tāng, thiⁿ iô-choah, ji̍t-ge̍h o͘-àm, chhiⁿ-sîn bô kng.

11耶和華tī祂ê軍兵ê面前出聲，祂ê軍隊真大；行祂ê命令ê真強猛；因為耶和華ê日大koh thang驚，是誰當能起ah？Iâ-hô-hoa tī I ê kun-peng ê bīn-chêng chhut-siaⁿ, I ê kun-tūi chin-tōa; kiâⁿ I ê bēng-lēng--ê chin kiông-béng; in-ūi Iâ-hô-hoa ê ji̍t tōa koh thang kiaⁿ, chī-chūi tng ōe khí ah?

12耶和華講，雖然án-ni，lín tio̍h用專心，用禁食，用啼哭，用悲哀oa̍t-tńg歸ǹg我。Iâ-hô-hoa kóng, Sui-jiân án-ni, lín tio̍h ēng choan-sim, ēng kìm-chia̍h, ēng thî-khàu, ēng pi-ai oa̍t-tńg kui-ǹg Góa.

13Tio̍h拆裂lín ê心，莫得拆裂lín ê衫，歸ǹg耶和華lín ê上帝；因為祂有仁慈憐憫，無快快受氣，滿滿恩惠，koh退悔祂ê災厄。Tio̍h thiah-li̍h lín ê sim, bo̍h-tit thiah-li̍h lín ê saⁿ, kui-ǹg Iâ-hô-hoa lín ê Siōng-tè; in-ūi I ū jîn-chû lîn-bín, bô khoài-khoài siū-khì, móa-móa un-hūi, koh thè-hóe I ê chai-ē.

14Chī-chūi會知伊肯oa̍t倒tńg來退悔， 留福氣tī後來，就是有素祭灌奠獻hō͘ lín ê上帝耶和華？Chī-chūi ōe chai I khéng oa̍t-tò-tńg lâi thè-hóe, lâu hok-khì tī āu-lâi, chiū-sī ū sò͘-chè koàn-tiān hiàn hō͘ lín ê Siōng-tè Iâ-hô-hoa?

15Lín tio̍h tī錫安pûn哨角，設一個禁食ê聖日，召集嚴肅會；Lín tio̍h tī Sek-an pûn sàu-kak, siat chi̍t ê kìm-chia̍h ê sèng-ji̍t, tiàu-chi̍p giâm-siok-hōe;

16聚集眾百姓分別hit-ê會做聖，招集老人，聚集gín-ná kap食奶ê；hō͘新kiáⁿ婿出伊ê厝，新娘離開伊ê房。chū-chi̍p chèng peh-sìⁿ hun-piat hit ê hōe chòe-sèng, chio-chi̍p lāu-lâng, chū-chi̍p gín-ná kap chia̍h-ni--ê; hō͘ sin-kiáⁿ-sài chhut i ê chhù, sin-niû lī-khui i ê pâng.

17服事耶和華ê祭司，tio̍h tī冷廊kap祭壇ê中間啼哭，講，耶和華ah，求祢寬恕祢ê百姓，莫得hō͘祢ê產業受凌辱，hō͘列邦管轄in；啥事hō͘列國ê人講，In ê上帝tī toh-lo̍h？Ho̍k-sāi Iâ-hô-hoa ê chè-si, tio̍h tī léng-lông kap chè-tôaⁿ ê tiong-kan thî-khàu, kóng, Iâ-hô-hoa ah, kiû Lí khoan-sù Lí ê peh-sìⁿ, bo̍h-tit hō͘ Lí ê sán-gia̍p siū lêng-jio̍k, hō͘ lia̍t-pang koán-hat in; siáⁿ-sū hō͘ lia̍t-kok ê lâng kóng, In ê Siōng-tè tī toh-lo̍h?

18Hit時耶和華為tio̍h祂ê地來熱心，憐憫祂ê百姓。Hit-sî Iâ-hô-hoa ūi-tio̍h I ê tōe lâi jia̍t-sim, lîn-bín I ê peh-sìⁿ.

19耶和華應祂ê百姓講，看ah，我beh hō͘ lín有五穀、新酒kap油，lín就滿足；我無koh hō͘ lín tī列邦中受凌辱。Iâ-hô-hoa ìn I ê peh-sìⁿ kóng, Khòaⁿ ah, Góa beh hō͘ lín ū gō͘-kak sin-chiú kap iû, lín chiū móa-chiok; Góa bô koh hō͘ lín tī lia̍t-pang-tiong siū lêng-jio̍k.

20我也beh hō͘北方ê軍隊離開lín遠遠，趕伊到炕旱拋荒ê地；伊ê前隊到東海，後隊到西海；因為伊行大tāi-chì，伊ê pháiⁿ味chhèng起，臭味發起。Góa iā beh hō͘ pak-hng ê kun-tūi lī-khui lín hn̄g-hn̄g, kóaⁿ i kàu khòng-hān pha-hng ê tōe; i-ê chêng-tūi kàu tang-hái, āu-tūi kàu sai-hái; in-ūi i kiâⁿ tōa tāi-chì, i ê pháiⁿ-bī chhèng-khí, chhàu-bī hoat-khí.

21地土ah，莫得驚，tio̍h歡喜快樂；因為耶和華行大事。Tōe-thó͘ ah, bo̍h-tit kiaⁿ, tio̍h hoaⁿ-hí khoài-lo̍k; in-ūi Iâ-hô-hoa kiâⁿ tōa-sū.

22田野ê走獸ah，莫得驚，因為曠野ê草場發生，樹結伊ê果子，無花果樹、葡萄樹，亦lóng結實。Chhân-iá ê cháu-siù ah, bo̍h-tit kiaⁿ, in-ūi khòng-iá ê chháu-tiûⁿ hoat-siⁿ, chhiū kiat i ê ké-chí, bû-hoa-kó chhiū, phû-tô chhiū, ia̍h lóng kiat-si̍t.

23錫安ê百姓ah，lín tio̍h快樂，ūi耶和華lín ê上帝來歡喜；因為祂用前ê雨及時賞賜lín；為tio̍h lín落雨水，就是前ê雨，後ê雨，kap以前一樣。Sek-an ê peh-sìⁿ ah, lín tio̍h khoài-lo̍k, ūi Iâ-hô-hoa lín ê Siōng-tè lâi hoaⁿ-hí; in-ūi I ēng chêng ê hō͘ ki̍p-sî siúⁿ-sù lín; ūi-tio̍h lín lo̍h hō͘-chúi, chiū-sī chêng ê hō͘, āu ê hō͘, kap í-chêng chi̍t-iūⁿ.

24五穀場beh有麥滿滿，窟中ê新酒kap油beh滿出來。Gō͘-kak-tiûⁿ beh ū be̍h móa-móa, khut-tiong ê sin-chiú kap iû beh móa--chhut-lâi.

25我差到lín中間ê大軍隊，就是第一種、第二種、第三種、第四種 ê草蜢，所食hiah-ê年冬，我lóng beh還lín。Góa chhe kàu lín tiong-kan ê tōa kun-tūi, chiū-sī tē-it-chéng, tē-jī-chéng, tē-saⁿ-chéng, tē-sì-chéng ê chháu-meh, só͘ chia̍h hiah ê nî-tang, Góa lóng beh hêng lín.

26Lín beh食來知足；亦beh o-ló lín ê上帝耶和華ê名；因為祂為tio̍h lín行奇妙ê事，我ê百姓的確永遠無見笑。Lín beh chia̍h lâi ti-chiok; ia̍h beh o-ló lín ê Siōng-tè Iâ-hô-hoa ê miâ; in-ūi I ūi-tio̍h lín kiâⁿ kî-biāu ê sū, Góa ê peh-sìⁿ tek-khak éng-oán bô kiàn-siàu.

27Lín就beh知我tī以色列ê中間，koh知我是耶和華lín ê上帝，以外無別ê；我ê百姓的確永遠無見笑。Lín chiū beh chai Góa tī Í-sek-lia̍t ê tiong-kan, koh chai Góa sī Iâ-hô-hoa lín ê Siōng-tè, í-gōa bô pa̍t-ê; Góa ê peh-sìⁿ tek-khak éng-oán bô kiàn-siàu.

28了後我beh用我ê神降落hō͘凡有肉體ê；lín ê kiáⁿ cha-bó͘-kiáⁿ beh做先知講話，lín ê老人beh得tio̍h眠夢，lín ê少年人beh看見異象；Liáu-āu Góa beh ēng Góa ê Sîn kàng-lo̍h hō͘ hoān ū jio̍k-thé--ê; lín ê kiáⁿ cha-bó͘-kiáⁿ beh chòe sian-ti kóng-ōe, lín ê lāu-lâng beh tit-tio̍h bîn-bāng, lín ê siàu-liân lâng beh khòaⁿ-kìⁿ īⁿ-siōng;

29tī hiah-ê日，我beh用我ê神降落tī奴僕女婢。tī hiah ê ji̍t, Góa beh ēng Góa ê Sîn kàng-lo̍h tī lô͘-po̍k lú-pī.

30我beh顯明奇事tī天裡，tī地裡，血kap火；kap火薰ê柱。Góa beh hián-bêng kî-sū tī thiⁿ--nih, tī tōe--nih, huih kap hé; kap hé-hun ê thiāu.

31日頭beh變烏暗，月beh變做血，tī耶和華大koh thang驚ê日未到ê事先。Ji̍t-thâu beh piàn o͘-àm, ge̍h beh piàn-chòe huih, tī Iâ-hô-hoa tōa koh thang kiaⁿ ê ji̍t bē kàu ê tāi-seng.

32到hit時，見有求叫耶和華ê名ê，beh得tio̍h救；因為tī錫安山kap tī耶路撒冷beh有逃脫ê人，照耶和華所講ê，tī chhun ê百姓中beh有耶和華所召ê。Kàu hit-sî, kìⁿ-ū kiû-kiò Iâ-hô-hoa ê miâ--ê, beh tit-tio̍h kiù; in-ūi tī Sek-an soaⁿ kap tī Iâ-lō͘-sat-léng beh ū tô-thoat ê lâng, chiàu Iâ-hô-hoa só͘ kóng--ê, tī chhun ê peh-sìⁿ-tiong beh ū Iâ-hô-hoa só͘ tiàu--ê.

1因為tī hiah-ê日，當hit時，就是我hō͘猶大kap耶路撒冷受掠ê人倒tńg來ê時，In-ūi tī hiah ê ji̍t, tng hit-sî, chiū-sī Góa hō͘ Iû-tāi kap Iâ-lō͘-sat-léng siū-lia̍h ê lâng tò-tńg-lâi ê sî,

2我beh聚集萬百姓，chhōa in落去Iok-sa-hoat ê山谷，tī-hia審判in；因為in將我ê百姓，就是我ê產業以色列，分散tī列國中；koh分我ê土地；Góa beh chū-chi̍p bān peh-sìⁿ, chhōa in lo̍h--khì Iok-sa-hoat ê soaⁿ-kok, tī-hia sím-phòaⁿ in; in-ūi in chiong Góa ê peh-sìⁿ, chiū-sī Góa ê sán-gia̍p Í-sek-lia̍t, hun-sòaⁿ tī lia̍t-kok-tiong; koh pun Góa ê thó͘-tōe;

3koh將我ê百姓做khau來liam，將gín-ná換妓女；賣cha-bó͘-gín-ná，買酒lim。koh chiong Góa ê peh-sìⁿ chòe-khau lâi liam, chiong gín-ná ōaⁿ ki-lú; bōe cha-bó͘-gín-ná, bóe chiú lim.

4Chhui-lô ah，Se-tùn ah，腓利士四境ah，lín kap我甚麼干涉？lín beh報應我mah？Lín若報應我，我beh緊緊hō͘ lín ê報應歸tī lín ê頭殼。Chhui-lô ah, Se-tùn ah, Hui-lī-sū sì-kéng ah, lín kap Góa sím-mi̍h kan-sia̍p? lín beh pò-èng Góa mah? Lín nā pò-èng Góa, Góa beh kín-kín hō͘ lín ê pò-èng kui tī lín ê thâu-khak.

5Lín既然搶the̍h我ê金、銀，koh將我所歡喜ê寶物，帶入lín ê宮殿；Lín kì-jiân chhiúⁿ-the̍h Góa ê kim, gûn, koh chiong Góa só͘ hoaⁿ-hí ê pó-mi̍h, tòa ji̍p lín ê kiong-tiān;

6koh lín bat用猶大人kap耶路撒冷ê人，賣hō͘希臘人，beh hō͘ in離開in ê境界遠遠。koh lín bat ēng Iû-tāi lâng kap Iâ-lō͘-sat-léng ê lâng, bōe hō͘ Hi-lia̍p lâng, beh hō͘ in lī-khui in ê kéng-kài hn̄g-hn̄g.

7看ah，我beh激動in離開lín所賣in到ê所在；我beh hō͘ lín ê報應歸tī lín ê頭殼；Khòaⁿ ah, Góa beh kek-tōng in lī-khui lín só͘ bōe in kàu ê só͘-chāi; Góa beh hō͘ lín ê pò-èng kui tī lín ê thâu-khak;

8我beh將lín ê kiáⁿ cha-bó͘-kiáⁿ賣tī猶大人ê手，in beh賣in hō͘ Sī-pa人，就是遠遠ê國；這是耶和華講ê。Góa beh chiong lín ê kiáⁿ cha-bó͘-kiáⁿ bōe tī Iû-tāi lâng ê chhiú, in beh bōe in hō͘ Sī-pa lâng, chiū-sī hn̄g-hn̄g ê kok; che sī Iâ-hô-hoa kóng--ê.

9Tio̍h用chit-ê宣佈tī列邦中，tio̍h備辦交戰，激動勇士，hō͘ lóng總ê戰士進前上來。Tio̍h ēng chit-ê soan-pò͘ tī lia̍t-pang-tiong, tio̍h pī-pān kau-chiàn, kek-tōng ióng-sū, hō͘ lóng-chóng ê chiàn-sū chìn-chêng chiūⁿ--lâi.

10Tio̍h用lín ê犁頭phah做刀劍，用lín ê鐮á phah做鎗；軟弱ê tio̍h講，我就是勇士。Tio̍h ēng lín ê lôe-thâu phah-chòe to-kiàm, ēng lín ê liâm-á phah-chòe chhiuⁿ; loán-jio̍k--ê tio̍h kóng, Góa chiū-sī ióng-sū.

11四圍ê列國ah，lín tio̍h緊緊來相kap聚集；耶和華ah，hō͘你hiah-ê勇士落去hia。Sì-ûi ê lia̍t-kok ah, lín tio̍h kín-kín lâi saⁿ-kap chū-chi̍p; Iâ-hô-hoa ah, hō͘ Lí hiah ê ióng-sū lo̍h-khì hia.

12列國ê人lóng tio̍h起來，上到Iok-sa-hoat ê山谷；因為我beh坐tī-hia審判四圍ê萬百姓。Lia̍t-kok ê lâng lóng tio̍h khí-lâi, chiūⁿ kàu Iok-sa-hoat ê soaⁿ-kok; in-ūi Góa beh chē tī-hia sím-phòaⁿ sì-ûi ê bān peh-sìⁿ.

13Lín tio̍h伸出鍥(koeh)á，因為五穀熟lah；來，踏落去；因為酒窟滿lah，酒池溢(ek)出來lah，in ê pháiⁿ真大。Lín tio̍h chhun-chhut koeh-á, in-ūi gō͘-kak se̍k--lah; lâi, ta̍h--lo̍h-khì; in-ūi chiú-khut móa lah, chiú-tî ek--chhut--lâi lah, in ê pháiⁿ chin-tōa.

14一陣一陣ê人，tī判斷ê山谷！因為耶和華ê日近lah，tī判斷ê山谷。Chi̍t-tīn chi̍t-tīn ê lâng, tī phòaⁿ-toàn ê soaⁿ-kok! in-ūi Iâ-hô-hoa ê ji̍t kūn lah, tī phòaⁿ-toàn ê soaⁿ-kok.

15日月烏暗，星辰無光。Ji̍t-ge̍h o͘-àm, chhiⁿ-sîn bô-kng.

16耶和華beh tùi錫安hoah-hiàm，tùi耶路撒冷出聲；天kap地就振動；總是耶和華beh做祂ê百姓逃閃ê所在，做以色列人ê衛所。Iâ-hô-hoa beh tùi Sek-an hoah-hiàm, tùi Iâ-lō͘-sat-léng chhut-siaⁿ; thiⁿ kap tōe chiū tín-tāng; chóng-sī Iâ-hô-hoa beh chòe I ê peh-sìⁿ tô-siám ê só͘-chāi, chòe Í-sek-lia̍t lâng ê ōe-só͘.

17Lín就知我是耶和華lín ê上帝，khiā起tī錫安我ê聖山ê；hit時耶路撒冷beh成做聖，外邦人無koh對伊ê中間經過。Lín chiū chai Góa sī Iâ-hô-hoa lín ê Siōng-tè, khiā-khí tī Sek-an Góa ê sèng-soaⁿ--ê; hit-sî Iâ-lō͘-sat-léng beh chiâⁿ-chòe sèng, gōa-pang lâng bô koh tùi i ê tiong-kan keng-kè.

18當hit日，大山beh滴甜ê酒，小山beh流奶，猶大chiah-ê溪、河，lóng有水teh流；beh有水泉tùi耶和華ê殿出來，潤澤Si̍p-têng ê山谷。Tng hit-ji̍t tōa-soaⁿ beh tih tiⁿ ê chiú, sió-soaⁿ beh lâu lin, Iû-tāi chiah ê khoe, hô, lóng ū chúi teh lâu; beh ū chúi-chôaⁿ tùi Iâ-hô-hoa ê tiān chhut--lâi, lūn-te̍k Si̍p-têng ê soaⁿ-kok.

19埃及beh拋荒，Í-tong變做拋荒ê曠野，因為in暴虐猶大人，koh流無罪ê人ê血tī in ê地。Ai-ki̍p beh pha-hng, Í-tong piàn-chòe pha-hng ê khòng-iá, in-ūi in pō-gio̍k Iû-tāi lâng, koh lâu bô-chōe ê lâng ê huih tī in ê tōe.

20總是猶大beh存到永遠，耶路撒冷beh存到代代。Chóng-sī Iû-tāi beh chûn kàu éng-oán, Iâ-lō͘-sat-léng beh chûn kàu tāi-tāi.

21早我bē-bat洗清in流血ê罪，taⁿ beh洗in；因為耶和華khiā起tī錫安。Chá Góa bē-bat sóe-chheng in lâu-huih ê chōe, taⁿ beh sóe in; in-ūi Iâ-hô-hoa khiā-khí tī Sek-an.

1Thê-ko-a牧者中阿摩司ê話，chiah-ê話就是tī猶大王O͘-se-a年間，以色列王Iok-hat ê kiáⁿ Iâ-lô-pho-àm ê年間，地動以前兩年，所看見關係以色列ê事。Thê-ko-a bo̍k-chiá-tiong A-mô͘-sū ê ōe. Chiah ê ōe chiū-sī tī Iû-tāi ông O͘-se-a nî-kan, Í-sek-lia̍t ông Iok-hat ê kiáⁿ Iâ-lô-pho-àm ê nî-kan, tōe-tāng í-chêng nn̄g-nî, só͘ khòaⁿ-kìⁿ koan-hē Í-sek-lia̍t ê sū.

2伊講，耶和華對錫安喉叫，對耶路撒冷出祂ê聲；牧者ê草場悲哀，Ka-bi̍t ê山頂枯焦。I kóng, Iâ-hô-hoa tùi Sek-an âu-kiò, tùi Iâ-lō͘-sat-léng chhut I ê siaⁿ; bo̍k-chiá ê chháu-tiûⁿ pi-ai, Ka-bi̍t ê soaⁿ-téng ko͘-tâ.

3耶和華án-ni講，為tio̍h大馬色犯罪到三pái，亦到四pái，我無beh免伊ê刑罰；因為伊用phah五穀ê鐵器phah Ki-lia̍t。Iâ-hô-hoa án-ni kóng, Ūi-tio̍h Tāi-má-sek hoān-chōe kàu saⁿ-pái, ia̍h kàu sì-pái, Góa bô beh bián i ê hêng-hoa̍t; in-ūi i ēng phah gō͘-kak ê thih-khì phah Ki-lia̍t.

4我beh降火tī Hap-siat ê家，燒滅Piān-hap-ta̍t ê宮殿。Góa beh kàng-hé tī Hap-siat ê ke, sio-bia̍t Piān-hap-ta̍t ê kiong-tiān.

5我beh斬斷大馬色ê門栱，剪除A-bûn平洋khiā起ê百姓，kap Pek-i-tiân掌權柄ê；A-lân人beh受掠到Kiat-jíⁿ；這是耶和華講ê。Góa beh chám-tn̄g Tāi-má-sek ê mn̂g-kông, chián-tû A-bûn pîⁿ-iûⁿ khiā-khí ê peh-sìⁿ, kap Pek-i-tiân chiáng-koân-pèng--ê; A-lân lâng beh siū-lia̍h kàu Kiat-jíⁿ; che sī Iâ-hô-hoa kóng--ê.

6耶和華án-ni講，為tio̍h Ka-sat犯罪到三pái，亦到四pái，我無beh免伊ê刑罰；因為in掠kui族ê百姓交hō͘ Í-tong。Iâ-hô-hoa án-ni kóng, Ūi-tio̍h Ka-sat hoān-chōe kàu saⁿ-pái, ia̍h kàu sì-pái, Góa bô beh bián i ê hêng-hoa̍t; in-ūi in lia̍h kui-cho̍k ê peh-sìⁿ kau hō͘ Í-tong.

7我beh降火tī Ka-sat ê城牆，燒滅伊ê宮殿。Góa beh kàng-hé tī Ka-sat ê siâⁿ-chhiûⁿ, sio-bia̍t i ê kiong-tiān.

8我beh剪除A-si̍t-tu̍t khiā起ê百姓，kap A-si̍t-ki-lûn掌權柄ê；亦beh oa̍t-tńg手攻擊Í-kek-lûn；腓利士人所chhun-ê，beh lóng滅無；這是主耶和華講ê。Góa beh chián-tû A-si̍t-tu̍t khiā-khí ê peh-sìⁿ, kap A-si̍t-ki-lûn chiáng-koân-pèng--ê; ia̍h beh oa̍t-tńg chhiú kong-kek Í-kek-lûn; Hui-lī-sū lâng só͘ chhun--ê, beh lóng bia̍t-bô; che sī Chú Iâ-hô-hoa kóng--ê.

9耶和華án-ni講，為tio̍h Chhui-lô犯罪到三pái，亦到四pái，我無beh免伊ê刑罰；因為in將kui族ê百姓交hō͘ Í-tong，亦無記念兄弟ê盟約。Iâ-hô-hoa án-ni kóng, Ūi-tio̍h Chhui-lô hoān-chōe kàu saⁿ-pái, ia̍h kàu sì-pái, Góa bô beh bián i ê hêng-hoa̍t; in-ūi in chiong kui-cho̍k ê peh-sìⁿ kau hō͘ Í-tong, ia̍h bô kì-liām hiaⁿ-tī ê bêng-iok.

10我beh降火tī Chhui-lô ê城牆，燒滅伊ê宮殿。Góa beh kàng-hé tī Chhui-lô ê siâⁿ-chhiûⁿ, sio-bia̍t i ê kiong-tiān.

11耶和華án-ni講，為tio̍h Í-tong犯罪到三pái，亦到四pái，我無beh免伊ê刑罰；因為伊kia̍h刀追jip伊ê兄弟，lóng無憐憫；伊ê受氣猛烈，發出無soah，永遠khǹg受氣。Iâ-hô-hoa án-ni kóng, Ūi-tio̍h Í-tong hoān-chōe kàu saⁿ-pái, ia̍h kàu sì-pái, Góa bô beh bián i ê hêng-hoa̍t; in-ūi i kia̍h-to tui-jip i ê hiaⁿ-tī, lóng bô lîn-bín; i ê siū-khì béng-lia̍t, hoat-chhut bô soah, éng-oán khǹg siū-khì.

12我beh降火tī Thê-bān，燒滅Pho-su-la̍h ê宮殿。Góa beh kàng-hé tī Thê-bān, sio-bia̍t Pho-su-la̍h ê kiong-tiān.

13耶和華án-ni講，為tio̍h A-bûn族犯罪到三pái，亦到四pái，我無beh免伊ê刑罰；因為in破開Ki-lia̍t有身孕ê婦人人，beh開闊in ê境界。Iâ-hô-hoa án-ni kóng, Ūi-tio̍h A-bûn-cho̍k hoān-chōe kàu saⁿ-pái, ia̍h kàu sì-pái, Góa bô beh bián i ê hêng-hoa̍t; in-ūi in phòa-khui Ki-lia̍t ū sin-īn ê hū-jîn-lâng, beh khui-khoah in ê kéng-kài.

14我beh tī交戰hoah-hiàm ê日，捲螺風狂風ê日，起火tī La̍h-pa ê城牆，燒滅伊ê宮殿。Góa beh tī kau-chiàn hoah-hiàm ê ji̍t, kńg-lê-hong kông-hong ê ji̍t, khí-hé tī La̍h-pa ê siâⁿ-chhiûⁿ, sio-bia̍t i ê kiong-tiān.

15In ê王kap伊hiah-ê首領，beh做一下hō͘人掠去；這是耶和華講ê。In ê ông kap i hiah ê siú-léng, beh chòe chi̍t-ē hō͘ lâng lia̍h-khì; che sī Iâ-hô-hoa kóng--ê.