1我實實kā lín講，入羊寮，無tùi hit-ê門，來tùi別所在pôaⁿ過ê，是賊，是強盜。Góa si̍t-si̍t kā lín kóng, Ji̍p iûⁿ-tiâu, bô tùi hit ê mn̂g, lâi tùi pa̍t só͘-chāi pôaⁿ-kè ê, sī chha̍t, sī kiông-tō.

2Tùi門入ê，是羊ê牧者。Tùi mn̂g ji̍p ê, sī iûⁿ ê bo̍k-chiá.

3顧門ê kā伊開；羊聽伊ê聲；就隨名叫家己ê羊，chhōa in出。Kò͘ mn̂g ê kā i khui; iûⁿ thiaⁿ i ê siaⁿ; chiū sûi miâ kiò ka-kī ê iûⁿ, chhōa in chhut.

4已經將家己ê羊lóng放伊出去，就做頭行，羊亦tè伊；因為認得伊ê聲。Í-keng chiong ka-kī ê iûⁿ lóng pàng i chhut-khì, chiū chòe-thâu kiâⁿ, iûⁿ ia̍h tè i; in-ūi jīn-tit i ê siaⁿ.

5決斷無tè生份人，就是閃避伊；因為bōe認得生份人ê聲。Koat-toàn bô tè siⁿ-hūn lâng, chiū-sī siám-pī i; in-ūi bōe jīn-tit siⁿ-hūn lâng ê siaⁿ.

6耶穌用chit-ê譬喻kā in講；in m̄知伊所kā in講ê是甚麼。Iâ-so͘ ēng chit ê phì-jū kā in kóng; in m̄ chai I só͘ kā in kóng ê sī sím-mi̍h.

7所以耶穌koh kā in講，我實實kā lín講，我就是羊寮ê門。Só͘-í Iâ-so͘ koh kā in kóng, Góa si̍t-si̍t kā lín kóng, Góa chiū-sī iûⁿ-tiâu ê mn̂g.

8見若事先我來ê是賊，是強盜；但是羊無聽in。Kìⁿ-nā tāi-seng góa lâi ê sī chha̍t, sī kiông-tō; nā-sī iûⁿ bô thiaⁿ in.

9我就是門；若有tùi我入ê，beh得tio̍h救，koh beh出入，亦beh得tio̍h草料。Góa chiū-sī mn̂g; nā ū tùi góa ji̍p ê, beh tit-tio̍h kiù, koh beh chhut ji̍p, ia̍h beh tit-tio̍h chháu-liāu.

10賊來，無m̄是ài偷，ài thâi，ài滅無；我來是beh hō͘ in有活，koh有豐盛。Chha̍t lâi, bô m̄ sī ài thau, ài thâi, ài bia̍t-bô; góa lâi sī beh hō͘ in ū oa̍h, koh ū hong-sēng.

11我就是好ê牧者；好ê牧者為tio̍h羊放sak性命。Góa chiū-sī hó ê bo̍k-chiá; hó ê bo̍k-chiá ūi-tio̍h iûⁿ pàng-sak sìⁿ-miā.

12做倩工ê，m̄是做牧者，羊也m̄是伊家己ê羊；看見豺狼來，放sak羊就逃走，豺狼咬in，趕散in；Chòe chhiàⁿ-kang ê, m̄ sī chòe bo̍k-chiá, iûⁿ iā m̄ sī i ka-kī ê iûⁿ; khòaⁿ-kìⁿ chhâi-lông lâi, pàng-sak iûⁿ chiū tô-cháu, chhâi-lông kā in, kóaⁿ-sòaⁿ in;

13這是因為伊做倩工，無關心tī羊。che sī in-ūi i chòe chhiàⁿ-kang, bô koan-sim tī iûⁿ.

14我是好ê牧者；我bat hiah-ê屬我ê，屬我ê亦bat我。Góa sī hó ê bo̍k-chiá; góa bat hiah ê sio̍k góa ê, sio̍k góa ê ia̍h bat góa.

15親像父bat我，我bat父一樣；koh我為tio̍h羊放sak性命。Chhin-chhiūⁿ Pē bat góa, góa bat Pē chi̍t iūⁿ; koh góa ūi-tio̍h iûⁿ pàng-sak sìⁿ-miā.

16我iáu有羊，m̄是屬chit-tiâu ê；我的確tio̍h chhōa in來，in亦beh聽我ê聲；koh beh成做一群，歸一個牧者。Góa iáu ū iûⁿ, m̄ sī sio̍k chit tiâu ê; góa tek-khak tio̍h chhōa in lâi, in ia̍h beh thiaⁿ góa ê siaⁿ; koh beh chiâⁿ chòe chi̍t kûn, kui chi̍t ê bo̍k-chiá.

17所以父疼我，因為我放sak我ê性命，thang koh復到伊。Só͘-í Pē thiàⁿ góa, in-ūi góa pàng-sak góa ê sìⁿ-miā, thang koh ho̍k-tò i.

18無人tùi我取伊，是我家己放sak伊。我有權thang放sak，亦有權thang復到。這是我tùi我ê父所受ê命令。Bô lâng tùi góa chhú i, sī góa ka-kī pàng-sak i. Góa ū koân thang pàng-sak ia̍h ū koân thang ho̍k-tò. Che sī góa tùi góa ê Pē só͘ siū ê bēng-lēng.

19因為chiah-ê話猶太人ê中間koh有分pêng。In-ūi chiah ê ōe Iû-thài lâng ê tiong-kan koh ū hun-pêng.

20其中chōe-chōe人講，伊患tio̍h鬼，teh發狂；mih-sái聽伊ah？Kî-tiong chōe-chōe lâng kóng, I hoān-tio̍h kúi, teh hoat-kông; mih-sái thiaⁿ I ah?

21Koh有人講，這m̄是患tio̍h鬼ê人ê話。鬼kiám能開chhiⁿ-mî人ê目睭mah？Koh ū lâng kóng, Che m̄ sī hoān-tio̍h kúi ê lâng ê ōe. Kúi kiám ōe khui chhiⁿ-mî lâng ê ba̍k-chiu mah?

22Tī耶路撒冷，有獻殿節，是冬天時；Tī Iâ-lō͘-sat-léng, ū hiàn-tiān choeh, sī tang-thiⁿ sî;

23耶穌tī殿裡，行tī所羅門ê léng廊。Iâ-so͘ tī tiān-ni̍h, kiâⁿ tī Só͘-lô-bûn ê léng-lông.

24猶太人圍纍，來kā伊講，你hō͘阮ê心躊躇，beh到甚麼時ah？Iû-thài lâng ûi-lûi, lâi kā I kóng, Lí hō͘ goán ê sim tiû-tû, beh kàu sím-mi̍h sî ah?

25你若是基督，tio̍h明明kā阮講。耶穌應講，我bat kā lín講，但是lín m̄信；我tī我ê父ê名所行ê事，chiah-ê是做我ê干證。Lí nā sī Ki-tok, tio̍h bêng-bêng kā goán kóng. Iâ-so͘ ìn kóng, Góa bat kā lín kóng, nā-sī lín m̄ sìn; góa tī góa ê Pē ê miâ só͘ kiâⁿ ê sū, chiah-ê sī chòe góa ê kan-chèng.

26但是lín m̄信，因為lín m̄是我ê羊。Nā-sī lín m̄ sìn, in-ūi lín m̄ sī góa ê iûⁿ.

27我ê羊聽我ê聲，我bat in，in亦tè我；Góa ê iûⁿ thiaⁿ góa ê siaⁿ, góa bat in, in ia̍h tè góa;

28koh我hō͘ in有永活；in決斷永遠bōe沉淪；無一個能tùi我ê手搶in 去。koh góa hō͘ in ū éng-oa̍h; in koat-toàn éng-oán bōe tîm-lûn; bô chi̍t-ê ōe tùi góa ê chhiú chhiúⁿ in khì.

29我ê父，就是用羊hō͘我ê，khah大萬項有；無一個能tùi父ê手搶去。Góa ê Pē, chiū-sī ēng iûⁿ hō͘ góa ê, khah tōa bān-hāng-ū; bô chi̍t-ê ōe tùi Pē ê chhiú chhiúⁿ-khì.

30我kap父是一個。Góa kap Pē sī chi̍t-ê.

31猶太人koh the̍h石頭ài tìm伊。Iû-thài lâng koh the̍h chio̍h-thâu ài tìm I.

32耶穌應講，我tùi父用chōe-chōe好事hō͘ lín看；其中為tio̍h tá-lo̍h一項，用石頭tìm我？Iâ-so͘ ìn kóng, Góa tùi Pē ēng chōe-chōe hó sū hō͘ lín khòaⁿ; kî-tiong ūi-tio̍h tá-lo̍h chi̍t hāng, ēng chio̍h-thâu tìm góa?

33猶太人應伊講，阮用石tìm你，m̄是為tio̍h好事，就是為tio̍h褻瀆；因為你是人，亦家己掠做上帝。Iû-thài lâng ìn I kóng, Goán ēng chio̍h tìm lí, m̄ sī ūi-tio̍h hó sū, chiū-sī ūi-tio̍h siat-to̍k; in-ūi lí sī lâng, ia̍h ka-kī lia̍h chòe Siōng-tè.

34耶穌應講，Lín ê律法kiám無記載，講，我講lín是上帝mah？Iâ-so͘ ìn kóng, Lín ê lu̍t-hoat kiám bô kì-chài, kóng, Góa kóng lín sī Siōng-tè mah?

35既然講奉上帝ê話ê做上帝，(亦聖經bōe會廢無) ，Kì-jiân kóng hōng Siōng-tè ê ōe ê chòe Siōng-tè, (ia̍h sèng-keng bōe-ōe hòe-bô),

36taⁿ論父所分別做聖，差伊入世間ê，lín就講，你teh褻瀆mah？因為我講，我是上帝ê kiáⁿ。taⁿ lūn Pē só͘ hun-piat chòe sèng, chhe I ji̍p sè-kan ê, lín chiū kóng, Lí teh siat-to̍k mah? in-ūi góa kóng, Góa sī Siōng-tè ê Kiáⁿ.

37我若無行我ê父ê事，就莫得信我。Góa nā bô kiâⁿ góa ê Pē ê sū, chiū bo̍h-tit sìn góa.

38我若行伊，sui-bóng m̄信我，tio̍h信hiah-ê事；hō͘ lín也知也明白父tiàm-tī我，我tiàm-tī父。Góa nā kiâⁿ i, sui-bóng m̄ sìn góa, tio̍h sìn hiah ê sū; hō͘ lín iā chai iā bêng-pe̍k Pē tiàm-tī góa, góa tiàm-tī Pē.

39In koh再beh掠耶穌，伊就脫離in ê手去。In koh-chài beh lia̍h Iâ-so͘, I chiū thoat-lī in ê chhiú khì.

40koh去約旦外，到約翰起頭行洗禮ê所在，tòa hia khiā起。Koh khì Iok-tàn gōa, kàu Iok-hān khí-thâu kiâⁿ sóe-lé ê só͘-chāi, tòa hia khiā-khí.

41人chōe-chōe就近伊；koh講，約翰lóng無行神蹟，獨獨約翰所講chí chit人ê，lóng是真。Lâng chōe-chōe chiū-kūn I; koh kóng, Iok-hān lóng bô kiâⁿ sîn-jiah, to̍k-to̍k Iok-hān só͘ kóng chí chit lâng ê, lóng sī chin.

42Tī hia人chōe-chōe信伊。Tī hia lâng chōe-chōe sìn I.

1有一人，名拉撒路，破病；伊khiā tī伯大尼，就是馬利亞kap伊ê姊妹馬大ê鄉社。Ū chi̍t lâng, miâ Lia̍p-sat-lō͘, phòa-pīⁿ; i khiā tī Pek-tāi-nî, chiū-sī Má-lī-a kap i ê chí-bē Má-tāi ê hiuⁿ-siā.

2Chit-ê馬利亞就是bat用香油抹主，用伊ê頭毛拭主ê腳ê，伊ê兄弟拉撒路破病。Chit ê Má-lī-a chiū-sī bat ēng hiuⁿ-iû boah Chú, ēng i ê thâu-mn̂g chhit Chú ê kha ê, i ê hiaⁿ-tī Lia̍p-sat-lō͘ phòa-pīⁿ.

3In兩個姊妹就差人去chhē耶穌，講，主ah，你所疼ê人破病lah。In nn̄g ê chí-bē chiū chhe lâng khì chhē Iâ-so͘, kóng, Chú ah, lí só͘ thiàⁿ ê lâng phòa-pīⁿ lah.

4耶穌聽見就講，Chit-ê病不致到死，就是為tio̍h上帝ê榮光，hō͘上帝ê kiáⁿ tùi chit-ê得tio̍h榮光。Iâ-so͘ thiaⁿ-kìⁿ chiū kóng, Chit ê pīⁿ put-tì kàu sí, chiū-sī ūi-tio̍h Siōng-tè ê êng-kng, hō͘ Siōng-tè ê Kiáⁿ tùi chit-ê tit-tio̍h êng-kng.

5Taⁿ馬大，kap伊ê姊妹，kap拉撒路，lóng是耶穌所疼ê人。Taⁿ Má-tāi, kap i ê chí-bē, kap Lia̍p-sat-lō͘, lóng sī Iâ-so͘ só͘ thiàⁿ ê lâng.

6既然聽見伊破病，就tī所tòa ê所在猶原tòa兩日。Kì-jiân thiaⁿ-kìⁿ i phòa-pīⁿ, chiū tī só͘ tòa ê só͘-chāi iû-goân tòa nn̄g ji̍t.

7後來就kā學生講，咱koh來去猶太。Āu-lâi chiū kā ha̍k-seng kóng, Lán koh lâi khì Iû-thài.

8學生kā伊講，拉比，近來猶太人ài beh用石頭tìm你；你iáu beh koh去hia mah？Ha̍k-seng kā I kóng, Lia̍p-pí, kūn-lâi Iû-thài lâng ài beh ēng chio̍h-thâu tìm lí; lí iáu beh koh khì hia mah?

9耶穌應講，一日kiám無六時mah？人若日時行，就bōe tak-tio̍h，因為看見chit世間ê光。Iâ-so͘ ìn kóng, Chi̍t ji̍t kiám bô la̍k sî mah? Lâng nā ji̍t-sî kiâⁿ, chiū bōe tak-tio̍h, in-ūi khòaⁿ-kìⁿ chit sè-kan ê kng.

10總是人若暝時行，就tak-tio̍h，因為內中無光。Chóng-sī lâng nā mî-sî kiâⁿ, chiū tak-tio̍h, in-ūi lāi-tiong bô kng.

11講soah，koh kā in講，咱ê朋友拉撒路teh睏；我去是beh叫伊醒。Kóng soah, koh kā in kóng, Lán ê pêng-iú Lia̍p-sat-lō͘ teh khùn; góa khì sī beh kiò i chhíⁿ.

12學生講，主ah，伊若teh睏，就會好。Ha̍k-seng kóng, Chú ah, i nā teh khùn, chiū ōe hó.

13耶穌所講是指伊死；但是in掠chún是指伊安眠teh睏。Iâ-so͘ só͘ kóng sī chí i sí; nā-sī in lia̍h-chún sī chí i an-bîn teh khùn.

14所以耶穌明明kā in講，拉撒路死lah。Só͘-í Iâ-so͘ bêng-bêng kā in kóng, Lia̍p-sat-lō͘ sí lah.

15我亦為tio̍h Lín歡喜，因為我無tī hia，是beh hō͘ lín信；總是咱來去就近伊。Góa ia̍h ūi-tio̍h lín hoaⁿ-hí, in-ūi góa bô tī hia, sī beh hō͘ lín sìn; chóng-sī lán lâi khì chiū-kūn i.

16多馬，chhengTe2-thó͘-má ê，就kā同做學生ê人講，咱chiah-ê亦來去，kap伊相同死。To-má, chheng Té-thó͘-má ê, chiū kā tâng chòe ha̍k-seng ê lâng kóng, Lán chiah-ê ia̍h lâi khì, kap I saⁿ-tâng sí.

17耶穌到ê時，拉撒路tī墓裡已經四日lah。Iâ-so͘ kàu ê sî, Lia̍p-sat-lō͘ tī bōng-ni̍h í-keng sì ji̍t lah.

18伯大尼近耶路撒冷，相離約量五里；Pek-tāi-nî kūn Iâ-lō͘-sat-léng, saⁿ-lī iok-liōng gō͘ lí;

19有猶太chōe-chōe人已經就近馬大馬利亞，beh為tio̍h in ê兄弟來安慰in。ū Iû-thài chōe-chōe lâng í-keng chiū-kūn Má-tāi Má-lī-a, beh ūi-tio̍h in ê hiaⁿ-tī lâi an-ùi in.

20馬大聽見耶穌來，就去接伊；馬利亞猶原坐tī厝內。Má-tāi thiaⁿ-kìⁿ Iâ-so͘ lâi, chiū khì chih I; Má-lī-a iû-goân chē tī chhù-lāi.

21馬大tùi耶穌講，主ah，你若tī chia，我ê兄弟就bōe死。Má-tāi tùi Iâ-so͘ kóng, Chú ah, lí nā tī chia, góa ê hiaⁿ-tī chiū bōe sí.

22我taⁿ亦知見若你tùi上帝求ê，上帝beh hō͘你。Góa taⁿ ia̍h chai kìⁿ-nā lí tùi Siōng-tè kiû ê, Siōng-tè beh hō͘ lí.

23耶穌kā伊講，你ê兄弟beh koh活。Iâ-so͘ kā i kóng, Lí ê hiaⁿ-tī beh koh-oa̍h.

24馬大kā伊講，我知boa̍t-jīt，koh活ê時，伊beh koh活。Má-tāi kā I kóng, Góa chai boa̍t-jīt, koh-oa̍h ê sî, i beh koh-oa̍h.

25耶穌kā伊講，koh活kap活命是在tī我；信我ê人sui-bóng死，iáu-kú beh活；Iâ-so͘ kā i kóng, Koh-oa̍h kap oa̍h-miā sī chāi-tī góa; sìn góa ê lâng sui-bóng sí, iáu-kú beh oa̍h;

26見若活來信我ê人永永bōe死。你信chit-ê mah？kìⁿ-nā oa̍h lâi sìn góa ê lâng éng-éng bōe sí. Lí sìn chit-ê mah?

27伊kā伊講，主ah，是lah，我已經信你是基督，上帝ê Kiáⁿ，就是來入世間ê。I kā I kóng, Chú ah, sī lah, góa í-keng sìn lí sī Ki-tok, Siōng-tè ê Kiáⁿ, chiū-sī lâi ji̍p sè-kan ê.

28講soah，就tò去，暗靜叫伊ê姊妹馬利亞，講，先生來lah，teh叫你。Kóng soah, chiū tò-khì, àm-chīⁿ kiò i ê chí-bē Má-lī-a, kóng, Sian-siⁿ lâi lah, teh kiò lí.

29馬利亞聽見，緊緊起來，去就近伊。Má-lī-a thiaⁿ-kìⁿ, kín-kín khí-lâi, khì chiū-kūn I.

30Hit-tia̍p耶穌iáu-bē入鄉社，iáu tī馬大接伊ê所在。Hit tia̍p Iâ-so͘ iáu-bē ji̍p hiuⁿ-siā, iáu tī Má-tāi chih I ê só͘-chāi.

31Hiah-ê kap馬利亞tī厝內teh安慰伊ê猶太人，看見伊緊緊起來出去，就tè伊，phah算伊beh去墓裡啼哭。Hiah-ê kap Má-lī-a tī chhù-lāi teh an-ùi i ê Iû-thài lâng, khòaⁿ-kìⁿ i kín-kín khí-lâi chhut-khì, chiū tè i, phah-sǹg i beh khì bōng-ni̍h thî-khàu.

32馬利亞到耶穌所tī-teh ê所在，看見伊，就仆伊ê腳下，kā伊講，主ah，你若tī chia，我ê兄弟就bōe死。Má-lī-a kàu Iâ-so͘ só͘ tī-teh ê só͘-chāi, khòaⁿ-kìⁿ I, chiū phak tī I ê kha-ē, kā I kóng, Chú ah, lí nā tī chia, góa ê hiaⁿ-tī chiū bōe sí.

33耶穌看見伊啼哭，koh kap伊saⁿ-kap來ê猶太人亦啼哭，就真慼心，koh大jû亂，Iâ-so͘ khòaⁿ-kìⁿ i thî-khàu, koh kap i saⁿ-kap lâi ê Iû-thài lâng ia̍h thî-khàu, chiū chin chhoeh-sim, koh tōa jû-loān,

34講，Lín hē伊tī甚麼所在？In就kā伊講，主ah，來去看。kóng, Lín hē i tī sím-mi̍h só͘-chāi? In chiū kā I kóng, Chú ah, lâi khì khòaⁿ.

35耶穌流目屎。Iâ-so͘ lâu ba̍k-sái.

36猶太人就講，你看，伊疼chit人到án-ni！Iû-thài lâng chiū kóng, Lí khòaⁿ, I thiàⁿ chit lâng kàu án-ni!

37其中有ê講，伊bat開chhiⁿ-mî人ê目睭，kiám bōe hō͘ chit人無死mah？Kî-tiong ū-ê kóng, I bat khui chhiⁿ-mî lâng ê ba̍k-chiu, kiám bōe hō͘ chit lâng bô sí mah?

38耶穌koh慼心到墓裡。Hit-ê墓是石洞，有一塊石塞hē-teh。Iâ-so͘ koh chhoeh-sim kàu bōng-ni̍h. Hit ê bōng sī chio̍h-tōng, ū chi̍t tè chio̍h that hē-teh.

39耶穌講，徙開hit塊石。死人ê姊妹馬大kā伊講，主ah，taⁿ臭lah；已經死四日lah。Iâ-so͘ kóng, Sóa-khui hit tè chio̍h. Sí lâng ê chí-bē Má-tāi kā I kóng, Chú ah, taⁿ chhàu lah; í-keng sí sì ji̍t lah.

40耶穌kā伊講，我kiám無kā你講，你若信，能看見上帝ê榮光mah？Iâ-so͘ kā i kóng, Góa kiám bô kā lí kóng, lí nā sìn, ōe khòaⁿ-kìⁿ Siōng-tè ê êng-kng mah?

41In就徙開hit塊石。耶穌kia̍h目ǹg天，講，父ah，我感謝你，因為你已經聽我。In chiū sóa-khui hit tè chio̍h. Iâ-so͘ kia̍h ba̍k ǹg thiⁿ, kóng, Pē ah, Góa kám-siā lí, in-ūi lí í-keng thiaⁿ góa.

42我知你常常聽我；獨獨我講án-ni，是為tio̍h周圍teh khiā ê眾人，hō͘ in信你差我。Góa chai lí siông-siông thiaⁿ góa; to̍k-to̍k góa kóng án-ni, sī ūi-tio̍h chiu-ûi teh khiā ê chèng lâng, hō͘ in sìn lí chhe góa.

43講soah，就大聲喉叫，講，拉撒路，出來。Kóng soah, chiū tōa siaⁿ âu-kiò, kóng, Lia̍p-sat-lō͘, chhut-lâi.

44死人就出來，手腳紮布，面包巾。耶穌kā in講，tháu開，hō͘伊行。Sí lâng chiū chhut-lâi, chhiú kha chat pò͘, bīn pau kun. Iâ-so͘ kā in kóng, Tháu-khui, hō͘ i kiâⁿ.

45就近馬利亞ê猶太人，看見耶穌所行ê tāi-chì ê，chōe-chōe信伊。Chiū-kūn Má-lī-a ê Iû-thài lâng, khòaⁿ-kìⁿ Iâ-so͘ só͘ kiâⁿ ê tāi-chì ê, chōe-chōe sìn I.

46獨獨其中有ê去chhē法利賽人，將耶穌所行ê tāi-chì kā in講。To̍k-to̍k kî-tiong ū-ê khì chhē Hoat-lī-sài lâng, chiong Iâ-so͘ só͘ kiâⁿ ê tāi-chì kā in kóng.

47Tùi án-ni， chiah-ê祭司頭kap法利賽人聚集公會，講，咱teh chhòng甚麼？因為chit人行chōe-chōe神蹟。Tùi án-ni chiah ê chè-si-thâu kap Hoat-lī-sài lâng chū-chi̍p kong-hōe, kóng, Lán teh chhòng sím-mi̍h? in-ūi chit lâng kiâⁿ chōe-chōe sîn-jiah.

48咱若容允伊án-ni，眾人beh信伊；亦羅馬人beh來，收拾咱ê地方kap百姓。Lán nā iông-ún I án-ni, chèng lâng beh sìn I; ia̍h Lô-má lâng beh lâi, siu-si̍p lán ê tōe-hng kap peh-sìⁿ.

49其中一人，就是Kai-a-hoat，hit年做祭司頭ê，kā in講，Lín m̄知半項，亦無想，Kî-tiong chi̍t lâng, chiū-sī Kai-a-hoat, hit nî chòe chè-si-thâu ê, kā in kóng, Lín m̄ chai pòaⁿ-hāng, ia̍h bô siūⁿ,

50一人替百姓死，hō͘ thong國免滅無，是lín ê利益。chi̍t lâng thòe peh-sìⁿ sí, hō͘ thong kok bián bia̍t-bô, sī lín ê lī-ek.

51伊講chit-ê話，m̄是tùi家己；是因為hit年伊做祭司頭，讖語耶穌beh為tio̍h chit-ê百姓死；I kóng chit ê ōe, m̄ sī tùi ka-kī; sī in-ūi hit nî i chòe chè-si-thâu, chhàm-gú Iâ-so͘ beh ūi-tio̍h chit ê peh-sìⁿ sí;

52koh m̄-nā為tio̍h chit-ê百姓；亦是beh聚集上帝四散ê kiáⁿ兒合做一個。koh m̄ nā ūi-tio̍h chit ê peh-sìⁿ; ia̍h sī beh chū-chi̍p Siōng-tè sì-sòaⁿ ê kiáⁿ-jî ha̍p chòe chi̍t-ê.

53所以tùi hit日，in計謀beh thâi伊。Só͘-í tùi hit ji̍t, in kè-bô͘ beh thâi I.

54Tùi án-ni，耶穌無koh顯然行tī猶太人ê中間，就離開hia，去近曠野ê地，到一個城，名Í-hoat-liân；kap學生tòa hia。Tùi án-ni Iâ-so͘ bô koh hián-jiân kiâⁿ tī Iû-thài lâng ê tiong-kan, chiū lī-khui hia, khì kūn khòng-iá ê tōe, kàu chi̍t ê siâⁿ, miâ Í-hoat-liân; kap ha̍k-seng tòa hia.

55猶太人pôaⁿ過節近lah；節期前，chōe-chōe人tùi鄉社上耶路撒冷，beh家己清氣。Iû-thài lâng pôaⁿ-kè-choeh kūn lah; choeh-kî chêng, chōe-chōe lâng tùi hiuⁿ-siā chiūⁿ Iâ-lō͘-sat-léng, beh ka-kī chheng-khì.

56In就chhē耶穌，koh khiā tī殿內，saⁿ-kap講，Lín phah算怎樣？伊無beh來赴節mah？In chiū chhē Iâ-so͘, koh khiā tī tiān-lāi, saⁿ-kap kóng, Lín phah-sǹg cháiⁿ-iūⁿ? I bô beh lâi hù choeh mah?

57Chiah-ê祭司頭kap法利賽人已經出命令，若有人知伊tī tá-lo̍h，就tio̍h來報，hō͘ in thang去掠伊。Chiah ê chè-si-thâu kap Hoat-lī-sài lâng í-keng chhut bēng-lēng, nā ū lâng chai I tī tá-lo̍h, chiū tio̍h lâi pò, hō͘ in thang khì lia̍h I.

1所以耶穌tī pôaⁿ過節前六日到伯大尼，就是拉撒路所tòa ê所在；伊是耶穌tùi死人中hō͘伊koh活ê。Só͘-í Iâ-so͘ tī pôaⁿ-kè-choeh chêng la̍k ji̍t kàu Pek-tāi-nî, chiū-sī Lia̍p-sat-lō͘ só͘ tòa ê só͘-chāi; i sī Iâ-so͘ tùi sí-lâng tiong hō͘ i koh-oa̍h ê.

2In就tī hia為tio̍h耶穌備辦ê-hng頓；馬大teh伺候；拉撒路亦是同桌ê一個。In chiū tī hia ūi-tio̍h Iâ-so͘ pī-pān ê-hng tǹg; Má-tāi teh su-hāu; Lia̍p-sat-lō͘ ia̍h sī tâng toh ê chi̍t-ê.

3馬利亞就the̍h一斤極貴氣真ê ná-ta̍t香油，抹耶穌ê腳，koh用家己ê頭毛拭伊ê腳，香油ê芳滿厝。Má-lī-a chiū the̍h chi̍t kun ke̍k kùi-khì chin ê ná-ta̍t hiuⁿ-iû, boah Iâ-so͘ ê kha, koh ēng ka-kī ê thâu-mn̂g chhit I ê kha, hiuⁿ-iû ê phang móa chhù.

4有伊ê學生一個，beh賣伊ê，就是加略人猶大，講，Ū I ê ha̍k-seng chi̍t ê, beh bōe I ê, chiū-sī Ka-lio̍k lâng Iû-tāi, kóng,

5啥事m̄將chit-ê膏油賣銀á三百個，來hō͘ sòng-hiong人ah？Siáⁿ-sū m̄ chiong chit ê ko-iû bōe gûn-á saⁿ-pah ê, lâi hō͘ sòng-hiong lâng ah?

6伊講án-ni，m̄是因為伊關心tī sòng-hiong人；是因為伊是賊，koh管錢袋偷the̍h所hē ê nā-tiāⁿ。I kóng án-ni, m̄ sī in-ūi i koan-sim tī sòng-hiong lâng; sī in-ūi i sī chha̍t, koh koán chîⁿ-tē thau-the̍h só͘ hē ê nā-tiāⁿ.

7耶穌就講，chhut-chāi伊將chit-ê留teh，到我埋葬ê日。Iâ-so͘ chiū kóng, Chhut-chāi i chiong chit-ê lâu-teh, kàu góa bâi-chòng ê ji̍t.

8因為常常有sòng-hiong人kap lín tī-teh；但是我無常常kap lín tī-teh。In-ūi siông-siông ū sòng-hiong lâng kap lín tī-teh; nā-sī góa bô siông-siông kap lín tī-teh.

9猶太ê百姓chōe-chōe知耶穌tī hia；就來，m̄-nā因為耶穌ê緣故，亦ài beh看伊所hō͘伊tùi死人中koh活ê拉撒路。Iû-thài ê peh-sìⁿ chōe-chōe chai Iâ-so͘ tī hia; chiū lâi, m̄ nā in-ūi Iâ-so͘ ê iân-kò͘, ia̍h ài beh khòaⁿ I só͘ hō͘ i tùi sí-lâng tiong koh-oa̍h ê Lia̍p-sat-lō͘.

10獨獨chiah-ê祭司頭計謀beh續thâi死拉撒路；To̍k-to̍k chiah ê chè-si-thâu kè-bô͘ beh sòa thâi-sí Lia̍p-sat-lō͘;

11因為猶太人chōe-chōe為tio̍h伊ê緣故，去信耶穌。in-ūi Iû-thài lâng chōe-chōe ūi-tio̍h i ê iân-kò͘, khì sìn Iâ-so͘.

12隔日，有chōe-chōe赴節ê人，已經聽見耶穌beh到耶路撒冷，Keh ji̍t, ū chōe-chōe hù choeh ê lâng, í-keng thiaⁿ-kìⁿ Iâ-so͘ beh kàu Iâ-lō͘-sat-léng,

13就kia̍h棕樹枝，出去迎接伊，叫講，和散那，奉主ê名來ê，就是以色列ê王，願伊得tio̍h o-ló。chiū kia̍h chang-chhiū ki, chhut-khì ngiâ-chih I, kiò kóng, Hô-sàn-ná, hōng Chú ê miâ lâi ê, chiū-sī Í-sek-lia̍t ê ông, goān I tit-tio̍h o-ló.

14耶穌得tio̍h一隻細隻驢，騎伊；親像聖經所記，郇城ê cha-bó͘-kiáⁿ ah，莫得驚；Iâ-so͘ tit-tio̍h chi̍t chiah sòe chiah lû, khiâ i; chhin-chhiūⁿ sèng-keng só͘ kì, Sûn-siâⁿ ê cha-bó͘-kiáⁿ ah, bo̍h-tit kiaⁿ;

15你ê王來lah，khiā驢á-kiáⁿ。lí ê Ông lâi lah, khiā lû-á-kiáⁿ.

16學生起頭bōe 明chiah-ê事；到耶穌已經得tio̍h榮光ê時，chiah記得有記載chiah-ê事指伊，亦人果然對伊行chiah-ê事。Ha̍k-seng khí-thâu bōe bêng chiah ê sū; kàu Iâ-so͘ í-keng tit-tio̍h êng-kng ê sî, chiah kì-tit ū kì-chài chiah ê sū chí I, ia̍h lâng kó-jiân tùi I kiâⁿ chiah ê sū.

17當耶穌叫拉撒路出墓，hō͘伊tùi死人中koh活ê時，kap伊tī-teh ê眾人做干證。Tng Iâ-so͘ kiò Lia̍p-sat-lō͘ chhut bōng, hō͘ i tùi sí-lâng tiong koh-oa̍h ê sî, kap I tī-teh ê chèng lâng chòe kan-chèng.

18Tùi án-ni，眾人去迎接伊，因為聽見伊有行chit-ê神蹟。Tùi án-ni chèng lâng khì ngiâ-chih I, in-ūi thiaⁿ-kìⁿ I ū kiâⁿ chit ê sîn-jiah.

19法利賽人saⁿ-kap講，可見lín lóng無chhái-kang；lín看，thong世間lóng去tè伊lah。Hoat-lī-sài lâng saⁿ-kap kóng, Khó-kiàn lín lóng bô chhái-kang; lín khòaⁿ, thong sè-kan lóng khì tè I lah.

20當節期上來敬拜ê，中間有kúi-nā個希利尼人；Tng choeh-kî chiūⁿ lâi kèng-pài ê, tiong-kan ū kúi-nā ê Hi-lī-nî lâng;

21in就近加利利ê伯賽大人腓力，求伊講，先生ah，阮ài見耶穌。in chiū-kūn Ka-lī-lī ê Pek-sài-tāi lâng Hui-le̍k, kiû i kóng, Sian-siⁿ ah, goán ài kìⁿ Iâ-so͘.

22腓力來kā安得烈講；安得烈kap腓力來kā耶穌講。Hui-le̍k lâi kā An-tek-lia̍t kóng; An-tek-lia̍t kap Hui-le̍k lâi kā Iâ-so͘ kóng.

23耶穌應講，人子得tio̍h榮光ê時到lah。Iâ-so͘ ìn kóng, Jîn-chú tit-tio̍h êng-kng ê sî kàu lah.

24我實實kā lín講，一粒麥無落tī地裡來死，就猶原一粒nā-tiāⁿ；死，就結實chōe-chōe。Góa si̍t-si̍t kā lín kóng, Chi̍t lia̍p be̍h bô lo̍h tī tōe-ni̍h lâi sí, chiū iû-goân chi̍t lia̍p nā-tiāⁿ; sí, chiū kiat-si̍t chōe-chōe.

25疼家己ê性命ê，就喪失伊；怨恨家己ê性命tī chit世間ê，的確保伊到永活。Thiàⁿ ka-kī ê sìⁿ-miā ê, chiū sòng-sit i; oàn-hūn ka-kī ê sìⁿ-miā tī chit sè-kan ê, tek-khak pó i kàu éng-oa̍h.

26人若服事我，就tio̍h tè我；我所tī-teh ê所在，服事我ê人亦beh tī hia；人若服事我，我ê父beh對重伊。Lâng nā ho̍k-sāi góa, chiū tio̍h tè góa; góa só͘ tī-teh ê só͘-chāi, ho̍k-sāi góa ê lâng ia̍h beh tī hia; lâng nā ho̍k-sāi góa, góa ê Pē beh tùi-tiōng i.

27Taⁿ我ê心大擘腹；beh怎樣講？父ah，救我出chit-ê時。總是我為tio̍h chit-ê，chiah到tī chit時。Taⁿ góa ê sim tōa peh-pak; beh cháiⁿ-iūⁿ kóng? Pē ah, kiù góa chhut chit ê sî. Chóng-sī góa ūi-tio̍h chit-ê, chiah kàu tī chit sî.

28父ah，願你榮顯你ê名。就tùi天有聲講，我已經榮顯，beh koh再榮顯伊。Pē ah, goān lí êng-hián lí ê miâ. Chiū tùi thiⁿ ū siaⁿ kóng, Góa í-keng êng-hián, beh koh-chài êng-hián i.

29Khiā tī邊á ê眾人聽見就講，是雷tân；有人講，是天使kā伊講話。Khiā tī piⁿ-á ê chèng lâng thiaⁿ-kìⁿ chiū kóng, Sī lûi tân; ū lâng kóng, sī thiⁿ-sài kā I kóng ōe.

30耶穌應講，Chit-ê聲來，m̄是為tio̍h我，就是為tio̍h lín。Iâ-so͘ ìn kóng, Chit ê siaⁿ lâi, m̄ sī ūi-tio̍h góa, chiū-sī ūi-tio̍h lín.

31Tī chit-tia̍p chit世間受審判；tī chit-tia̍p chit世間ê人君beh受趕逐。Tī chit tia̍p chit sè-kan siū sím-phòaⁿ; tī chit tia̍p chit sè-kan ê jîn-kun beh siū kóaⁿ-tio̍k.

32我若受舉起離開地，就beh引chhōa眾人就近我。Góa nā siū kú-khí lī-khui tōe, chiū beh ín-chhōa chèng lâng chiū-kūn góa.

33伊講chit-ê話，是指伊beh甚麼款來死。I kóng chit ê ōe, sī chí I beh sím-mi̍h khoán lâi sí.

34眾人就應伊講，阮聽見律法有講，基督永永tī-teh；你怎樣講，人子tio̍h受舉起？chit-ê人子是是誰 ah？Chèng lâng chiū ìn I kóng, Goán thiaⁿ-kìⁿ lu̍t-hoat ū kóng, Ki-tok éng-éng tī-teh; lí cháiⁿ-iūⁿ kóng, Jîn-chú tio̍h siū kú-khí? chit ê Jîn-chú sī chī-chūi ah?

35耶穌就kā in講，光tī lín ê中間iáu有tiap-á久ê時。Lín有光ê時，就tio̍h行，免得暗到tī lín；hit-ê行tī暗ê，伊m̄知行到tá-lo̍h。Iâ-so͘ chiū kā in kóng, Kng tī lín ê tiong-kan iáu ū tiap-á kú ê sî. Lín ū kng ê sî, chiū tio̍h kiâⁿ, bián-tit àm kàu tī lín; hit-ê kiâⁿ tī àm ê, i m̄ chai kiâⁿ kàu tá-lo̍h.

36Lín有光ê時，就tio̍h信光，hō͘ lín成做光明ê人。 耶穌講chiah-ê話，就離開in，家己隱密。Lín ū kng ê sî, chiū tio̍h sìn kng, hō͘ lín chiâⁿ-chòe kng-bêng ê lâng. Iâ-so͘ kóng chiah ê ōe, chiū lī-khui in, ka-kī ún-ba̍t.

37雖然tī in ê面前行chiah chōe神蹟，in猶原m̄信伊；Sui-jiân tī in ê bīn-chêng kiâⁿ chiah chōe sîn-jiah, in iû-goân m̄ sìn I;

38這是beh應驗先知以賽亞ê話，講， 主ah，阮所傳hō͘人聽，是誰信ah？ 主手骨ê力，tùi 是誰顯明ah？che sī beh èng-giām sian-ti Í-sài-a ê ōe, kóng, Chú ah, goán só͘ thoân hō͘ lâng thiaⁿ, chī-chūi sìn ah? Chú chhiú-kut ê la̍t, tùi chī-chūi hián-bêng ah?

39所以in bōe信；因為以賽亞koh有講， 主hō͘ in ê目睭chhiⁿ-mî，心硬； 免得in用目睭看見，用心曉悟， Oa̍t-倒tńg， 就我醫好in。Só͘-í in bōe sìn; in-ūi Í-sài-a koh ū kóng, Chú hō͘ in ê ba̍k-chiu chhiⁿ-mî, sim ngī; Bián-tit in ēng ba̍k-chiu khòaⁿ-kìⁿ, ēng sim hiáu-ngō͘, Oa̍t-tò-tńg, Chiū góa i-hó in.

41以賽亞講chiah-ê，因為看見伊ê榮光，來論到伊。Í-sài-a kóng chiah-ê, in-ūi khòaⁿ-kìⁿ I ê êng-kng, lâi lūn-kàu I.

42雖然án-ni，in ê序大卻有chōe-chōe信伊；為tio̍h法利賽人chiah無認伊，免得kek出會堂；Sui-jiân án-ni, in ê sī-tōa khiok ū chōe-chōe sìn I; ūi-tio̍h Hoat-lī-sài lâng chiah bô jīn I, bián-tit kek-chhut hōe-tn̂g;

43因為in意愛tùi人來ê榮光，khah過頭tùi上帝來ê榮光。in-ūi in ì-ài tùi lâng lâi ê êng-kng, khah kè-thâu tùi Siōng-tè lâi ê êng-kng.

44耶穌叫講，信我ê人m̄是信我，就是信差我ê。Iâ-so͘ kiò kóng, Sìn góa ê lâng m̄ sī sìn góa, chiū-sī sìn chhe góa ê.

45看見我ê，就是看見差我ê。Khòaⁿ-kìⁿ góa ê, chiū-sī khòaⁿ-kìⁿ chhe góa ê.

46我就是光來入世間，hō͘見若信我ê人無khiā起tī暗。Góa chiū-sī kng lâi ji̍p sè-kan, hō͘ kìⁿ-nā sìn góa ê lâng bô khiā-khí tī àm.

47人若聽我ê話亦m̄守，我無審判伊；因為我來，m̄是beh審判世間，是beh救世間。Lâng nā thiaⁿ góa ê ōe ia̍h m̄ siú, góa bô sím-phòaⁿ i; in-ūi góa lâi, m̄ sī beh sím-phòaⁿ sè-kan, sī beh kiù sè-kan.

48棄sak我，亦m̄接納我ê話ê人，就有審判伊ê，就是我所講ê道理，beh tī末日審判伊。Khì-sak góa, ia̍h m̄ chiap-la̍p góa ê ōe ê lâng, chiū ū sím-phòaⁿ i ê, chiū-sī góa só͘ kóng ê tō-lí, beh tī boa̍t-ji̍t sím-phòaⁿ i.

49因為我所講m̄是出tī家己；就是差我ê父，伊有命令我，tio̍h傳甚麼，講甚麼。In-ūi góa só͘ kóng m̄ sī chhut tī ka-kī; chiū-sī chhe góa ê Pē, I ū bēng-lēng góa, tio̍h thoân sím-mi̍h, kóng sím-mi̍h.

50我知伊ê命令是永活；所以我所講ê，是照父所傳hō͘我ê，來講伊。Góa chai I ê bēng-lēng sī éng-oa̍h; só͘-í góa só͘ kóng ê, sī chiàu Pē só͘ thoân hō͘ góa ê, lâi kóng i.