1所以耶穌tī pôaⁿ過節前六日到伯大尼，就是拉撒路所tòa ê所在；伊是耶穌tùi死人中hō͘伊koh活ê。Só͘-í Iâ-so͘ tī pôaⁿ-kè-choeh chêng la̍k ji̍t kàu Pek-tāi-nî, chiū-sī Lia̍p-sat-lō͘ só͘ tòa ê só͘-chāi; i sī Iâ-so͘ tùi sí-lâng tiong hō͘ i koh-oa̍h ê.

2In就tī hia為tio̍h耶穌備辦ê-hng頓；馬大teh伺候；拉撒路亦是同桌ê一個。In chiū tī hia ūi-tio̍h Iâ-so͘ pī-pān ê-hng tǹg; Má-tāi teh su-hāu; Lia̍p-sat-lō͘ ia̍h sī tâng toh ê chi̍t-ê.

3馬利亞就the̍h一斤極貴氣真ê ná-ta̍t香油，抹耶穌ê腳，koh用家己ê頭毛拭伊ê腳，香油ê芳滿厝。Má-lī-a chiū the̍h chi̍t kun ke̍k kùi-khì chin ê ná-ta̍t hiuⁿ-iû, boah Iâ-so͘ ê kha, koh ēng ka-kī ê thâu-mn̂g chhit I ê kha, hiuⁿ-iû ê phang móa chhù.

4有伊ê學生一個，beh賣伊ê，就是加略人猶大，講，Ū I ê ha̍k-seng chi̍t ê, beh bōe I ê, chiū-sī Ka-lio̍k lâng Iû-tāi, kóng,

5啥事m̄將chit-ê膏油賣銀á三百個，來hō͘ sòng-hiong人ah？Siáⁿ-sū m̄ chiong chit ê ko-iû bōe gûn-á saⁿ-pah ê, lâi hō͘ sòng-hiong lâng ah?

6伊講án-ni，m̄是因為伊關心tī sòng-hiong人；是因為伊是賊，koh管錢袋偷the̍h所hē ê nā-tiāⁿ。I kóng án-ni, m̄ sī in-ūi i koan-sim tī sòng-hiong lâng; sī in-ūi i sī chha̍t, koh koán chîⁿ-tē thau-the̍h só͘ hē ê nā-tiāⁿ.

7耶穌就講，chhut-chāi伊將chit-ê留teh，到我埋葬ê日。Iâ-so͘ chiū kóng, Chhut-chāi i chiong chit-ê lâu-teh, kàu góa bâi-chòng ê ji̍t.

8因為常常有sòng-hiong人kap lín tī-teh；但是我無常常kap lín tī-teh。In-ūi siông-siông ū sòng-hiong lâng kap lín tī-teh; nā-sī góa bô siông-siông kap lín tī-teh.

9猶太ê百姓chōe-chōe知耶穌tī hia；就來，m̄-nā因為耶穌ê緣故，亦ài beh看伊所hō͘伊tùi死人中koh活ê拉撒路。Iû-thài ê peh-sìⁿ chōe-chōe chai Iâ-so͘ tī hia; chiū lâi, m̄ nā in-ūi Iâ-so͘ ê iân-kò͘, ia̍h ài beh khòaⁿ I só͘ hō͘ i tùi sí-lâng tiong koh-oa̍h ê Lia̍p-sat-lō͘.

10獨獨chiah-ê祭司頭計謀beh續thâi死拉撒路；To̍k-to̍k chiah ê chè-si-thâu kè-bô͘ beh sòa thâi-sí Lia̍p-sat-lō͘;

11因為猶太人chōe-chōe為tio̍h伊ê緣故，去信耶穌。in-ūi Iû-thài lâng chōe-chōe ūi-tio̍h i ê iân-kò͘, khì sìn Iâ-so͘.

12隔日，有chōe-chōe赴節ê人，已經聽見耶穌beh到耶路撒冷，Keh ji̍t, ū chōe-chōe hù choeh ê lâng, í-keng thiaⁿ-kìⁿ Iâ-so͘ beh kàu Iâ-lō͘-sat-léng,

13就kia̍h棕樹枝，出去迎接伊，叫講，和散那，奉主ê名來ê，就是以色列ê王，願伊得tio̍h o-ló。chiū kia̍h chang-chhiū ki, chhut-khì ngiâ-chih I, kiò kóng, Hô-sàn-ná, hōng Chú ê miâ lâi ê, chiū-sī Í-sek-lia̍t ê ông, goān I tit-tio̍h o-ló.

14耶穌得tio̍h一隻細隻驢，騎伊；親像聖經所記，郇城ê cha-bó͘-kiáⁿ ah，莫得驚；Iâ-so͘ tit-tio̍h chi̍t chiah sòe chiah lû, khiâ i; chhin-chhiūⁿ sèng-keng só͘ kì, Sûn-siâⁿ ê cha-bó͘-kiáⁿ ah, bo̍h-tit kiaⁿ;

15你ê王來lah，khiā驢á-kiáⁿ。lí ê Ông lâi lah, khiā lû-á-kiáⁿ.

16學生起頭bōe 明chiah-ê事；到耶穌已經得tio̍h榮光ê時，chiah記得有記載chiah-ê事指伊，亦人果然對伊行chiah-ê事。Ha̍k-seng khí-thâu bōe bêng chiah ê sū; kàu Iâ-so͘ í-keng tit-tio̍h êng-kng ê sî, chiah kì-tit ū kì-chài chiah ê sū chí I, ia̍h lâng kó-jiân tùi I kiâⁿ chiah ê sū.

17當耶穌叫拉撒路出墓，hō͘伊tùi死人中koh活ê時，kap伊tī-teh ê眾人做干證。Tng Iâ-so͘ kiò Lia̍p-sat-lō͘ chhut bōng, hō͘ i tùi sí-lâng tiong koh-oa̍h ê sî, kap I tī-teh ê chèng lâng chòe kan-chèng.

18Tùi án-ni，眾人去迎接伊，因為聽見伊有行chit-ê神蹟。Tùi án-ni chèng lâng khì ngiâ-chih I, in-ūi thiaⁿ-kìⁿ I ū kiâⁿ chit ê sîn-jiah.

19法利賽人saⁿ-kap講，可見lín lóng無chhái-kang；lín看，thong世間lóng去tè伊lah。Hoat-lī-sài lâng saⁿ-kap kóng, Khó-kiàn lín lóng bô chhái-kang; lín khòaⁿ, thong sè-kan lóng khì tè I lah.

20當節期上來敬拜ê，中間有kúi-nā個希利尼人；Tng choeh-kî chiūⁿ lâi kèng-pài ê, tiong-kan ū kúi-nā ê Hi-lī-nî lâng;

21in就近加利利ê伯賽大人腓力，求伊講，先生ah，阮ài見耶穌。in chiū-kūn Ka-lī-lī ê Pek-sài-tāi lâng Hui-le̍k, kiû i kóng, Sian-siⁿ ah, goán ài kìⁿ Iâ-so͘.

22腓力來kā安得烈講；安得烈kap腓力來kā耶穌講。Hui-le̍k lâi kā An-tek-lia̍t kóng; An-tek-lia̍t kap Hui-le̍k lâi kā Iâ-so͘ kóng.

23耶穌應講，人子得tio̍h榮光ê時到lah。Iâ-so͘ ìn kóng, Jîn-chú tit-tio̍h êng-kng ê sî kàu lah.

24我實實kā lín講，一粒麥無落tī地裡來死，就猶原一粒nā-tiāⁿ；死，就結實chōe-chōe。Góa si̍t-si̍t kā lín kóng, Chi̍t lia̍p be̍h bô lo̍h tī tōe-ni̍h lâi sí, chiū iû-goân chi̍t lia̍p nā-tiāⁿ; sí, chiū kiat-si̍t chōe-chōe.

25疼家己ê性命ê，就喪失伊；怨恨家己ê性命tī chit世間ê，的確保伊到永活。Thiàⁿ ka-kī ê sìⁿ-miā ê, chiū sòng-sit i; oàn-hūn ka-kī ê sìⁿ-miā tī chit sè-kan ê, tek-khak pó i kàu éng-oa̍h.

26人若服事我，就tio̍h tè我；我所tī-teh ê所在，服事我ê人亦beh tī hia；人若服事我，我ê父beh對重伊。Lâng nā ho̍k-sāi góa, chiū tio̍h tè góa; góa só͘ tī-teh ê só͘-chāi, ho̍k-sāi góa ê lâng ia̍h beh tī hia; lâng nā ho̍k-sāi góa, góa ê Pē beh tùi-tiōng i.

27Taⁿ我ê心大擘腹；beh怎樣講？父ah，救我出chit-ê時。總是我為tio̍h chit-ê，chiah到tī chit時。Taⁿ góa ê sim tōa peh-pak; beh cháiⁿ-iūⁿ kóng? Pē ah, kiù góa chhut chit ê sî. Chóng-sī góa ūi-tio̍h chit-ê, chiah kàu tī chit sî.

28父ah，願你榮顯你ê名。就tùi天有聲講，我已經榮顯，beh koh再榮顯伊。Pē ah, goān lí êng-hián lí ê miâ. Chiū tùi thiⁿ ū siaⁿ kóng, Góa í-keng êng-hián, beh koh-chài êng-hián i.

29Khiā tī邊á ê眾人聽見就講，是雷tân；有人講，是天使kā伊講話。Khiā tī piⁿ-á ê chèng lâng thiaⁿ-kìⁿ chiū kóng, Sī lûi tân; ū lâng kóng, sī thiⁿ-sài kā I kóng ōe.

30耶穌應講，Chit-ê聲來，m̄是為tio̍h我，就是為tio̍h lín。Iâ-so͘ ìn kóng, Chit ê siaⁿ lâi, m̄ sī ūi-tio̍h góa, chiū-sī ūi-tio̍h lín.

31Tī chit-tia̍p chit世間受審判；tī chit-tia̍p chit世間ê人君beh受趕逐。Tī chit tia̍p chit sè-kan siū sím-phòaⁿ; tī chit tia̍p chit sè-kan ê jîn-kun beh siū kóaⁿ-tio̍k.

32我若受舉起離開地，就beh引chhōa眾人就近我。Góa nā siū kú-khí lī-khui tōe, chiū beh ín-chhōa chèng lâng chiū-kūn góa.

33伊講chit-ê話，是指伊beh甚麼款來死。I kóng chit ê ōe, sī chí I beh sím-mi̍h khoán lâi sí.

34眾人就應伊講，阮聽見律法有講，基督永永tī-teh；你怎樣講，人子tio̍h受舉起？chit-ê人子是是誰 ah？Chèng lâng chiū ìn I kóng, Goán thiaⁿ-kìⁿ lu̍t-hoat ū kóng, Ki-tok éng-éng tī-teh; lí cháiⁿ-iūⁿ kóng, Jîn-chú tio̍h siū kú-khí? chit ê Jîn-chú sī chī-chūi ah?

35耶穌就kā in講，光tī lín ê中間iáu有tiap-á久ê時。Lín有光ê時，就tio̍h行，免得暗到tī lín；hit-ê行tī暗ê，伊m̄知行到tá-lo̍h。Iâ-so͘ chiū kā in kóng, Kng tī lín ê tiong-kan iáu ū tiap-á kú ê sî. Lín ū kng ê sî, chiū tio̍h kiâⁿ, bián-tit àm kàu tī lín; hit-ê kiâⁿ tī àm ê, i m̄ chai kiâⁿ kàu tá-lo̍h.

36Lín有光ê時，就tio̍h信光，hō͘ lín成做光明ê人。 耶穌講chiah-ê話，就離開in，家己隱密。Lín ū kng ê sî, chiū tio̍h sìn kng, hō͘ lín chiâⁿ-chòe kng-bêng ê lâng. Iâ-so͘ kóng chiah ê ōe, chiū lī-khui in, ka-kī ún-ba̍t.

37雖然tī in ê面前行chiah chōe神蹟，in猶原m̄信伊；Sui-jiân tī in ê bīn-chêng kiâⁿ chiah chōe sîn-jiah, in iû-goân m̄ sìn I;

38這是beh應驗先知以賽亞ê話，講， 主ah，阮所傳hō͘人聽，是誰信ah？ 主手骨ê力，tùi 是誰顯明ah？che sī beh èng-giām sian-ti Í-sài-a ê ōe, kóng, Chú ah, goán só͘ thoân hō͘ lâng thiaⁿ, chī-chūi sìn ah? Chú chhiú-kut ê la̍t, tùi chī-chūi hián-bêng ah?

39所以in bōe信；因為以賽亞koh有講， 主hō͘ in ê目睭chhiⁿ-mî，心硬； 免得in用目睭看見，用心曉悟， Oa̍t-倒tńg， 就我醫好in。Só͘-í in bōe sìn; in-ūi Í-sài-a koh ū kóng, Chú hō͘ in ê ba̍k-chiu chhiⁿ-mî, sim ngī; Bián-tit in ēng ba̍k-chiu khòaⁿ-kìⁿ, ēng sim hiáu-ngō͘, Oa̍t-tò-tńg, Chiū góa i-hó in.

41以賽亞講chiah-ê，因為看見伊ê榮光，來論到伊。Í-sài-a kóng chiah-ê, in-ūi khòaⁿ-kìⁿ I ê êng-kng, lâi lūn-kàu I.

42雖然án-ni，in ê序大卻有chōe-chōe信伊；為tio̍h法利賽人chiah無認伊，免得kek出會堂；Sui-jiân án-ni, in ê sī-tōa khiok ū chōe-chōe sìn I; ūi-tio̍h Hoat-lī-sài lâng chiah bô jīn I, bián-tit kek-chhut hōe-tn̂g;

43因為in意愛tùi人來ê榮光，khah過頭tùi上帝來ê榮光。in-ūi in ì-ài tùi lâng lâi ê êng-kng, khah kè-thâu tùi Siōng-tè lâi ê êng-kng.

44耶穌叫講，信我ê人m̄是信我，就是信差我ê。Iâ-so͘ kiò kóng, Sìn góa ê lâng m̄ sī sìn góa, chiū-sī sìn chhe góa ê.

45看見我ê，就是看見差我ê。Khòaⁿ-kìⁿ góa ê, chiū-sī khòaⁿ-kìⁿ chhe góa ê.

46我就是光來入世間，hō͘見若信我ê人無khiā起tī暗。Góa chiū-sī kng lâi ji̍p sè-kan, hō͘ kìⁿ-nā sìn góa ê lâng bô khiā-khí tī àm.

47人若聽我ê話亦m̄守，我無審判伊；因為我來，m̄是beh審判世間，是beh救世間。Lâng nā thiaⁿ góa ê ōe ia̍h m̄ siú, góa bô sím-phòaⁿ i; in-ūi góa lâi, m̄ sī beh sím-phòaⁿ sè-kan, sī beh kiù sè-kan.

48棄sak我，亦m̄接納我ê話ê人，就有審判伊ê，就是我所講ê道理，beh tī末日審判伊。Khì-sak góa, ia̍h m̄ chiap-la̍p góa ê ōe ê lâng, chiū ū sím-phòaⁿ i ê, chiū-sī góa só͘ kóng ê tō-lí, beh tī boa̍t-ji̍t sím-phòaⁿ i.

49因為我所講m̄是出tī家己；就是差我ê父，伊有命令我，tio̍h傳甚麼，講甚麼。In-ūi góa só͘ kóng m̄ sī chhut tī ka-kī; chiū-sī chhe góa ê Pē, I ū bēng-lēng góa, tio̍h thoân sím-mi̍h, kóng sím-mi̍h.

50我知伊ê命令是永活；所以我所講ê，是照父所傳hō͘我ê，來講伊。Góa chai I ê bēng-lēng sī éng-oa̍h; só͘-í góa só͘ kóng ê, sī chiàu Pē só͘ thoân hō͘ góa ê, lâi kóng i.

1pôaⁿ過節前，耶穌知伊離開chit世間歸tī父ê時到，已經疼tī世間屬伊ê人，到尾亦疼in。Pôaⁿ-kè-choeh chêng, Iâ-so͘ chai I lī-khui chit sè-kan kui tī Pē ê sî kàu, í-keng thiàⁿ tī sè-kan sio̍k I ê lâng, kàu bé ia̍h thiàⁿ in.

2食ê-hng頓ê時，魔鬼已經將賣耶穌ê意思hē tī 加略人西門ê kiáⁿ猶大ê心；Chia̍h ê-hng tǹg ê sî, Mô͘-kúi í-keng chiong bōe Iâ-so͘ ê ì-sù hē tī Ka-lio̍k lâng Se-bûn ê kiáⁿ Iû-tāi ê sim;

3耶穌知父已經將萬物交tī伊ê手，koh知伊tùi上帝出，亦beh歸tī上帝，Iâ-so͘ chai Pē í-keng chiong bān mi̍h kau tī I ê chhiú, koh chai I tùi Siōng-tè chhut, ia̍h beh kui tī Siōng-tè,

4就離開桌，thǹg衫；the̍h巾家己hâ。chiū lī-khui toh, thǹg saⁿ; the̍h kun ka-kī hâ.

5倒水tī盤裡，洗學生ê腳，將所hâ ê巾kā in拭。Tò chúi tī pôaⁿ-ni̍h, sóe ha̍k-seng ê kha, chiong só͘ hâ ê kun kā in chhit.

6洗到西門彼得，彼得kā伊講，主ah，你洗我ê腳mah？Sóe kàu Se-bûn Pí-tek. Pí-tek kā I kóng, Chú ah, lí sóe góa ê kha mah?

7耶穌應伊講，我所做ê，你現今m̄知，後來就會曉得。Iâ-so͘ ìn i kóng, Góa só͘ chòe ê, lí hiān-kim m̄ chai, āu-lâi chiū ōe hiáu-tit.

8彼得講，你永遠無thang洗我ê腳。耶穌應伊講，我無kā你洗，你就kap我無干涉。Pí-tek kóng, Lí éng-oán bô thang sóe góa ê kha. Iâ-so͘ ìn i kóng, Góa bô kā lí sóe, lí chiū kap góa bô kan-sia̍p.

9西門彼得kā伊講，主ah，m̄-nā我ê腳，連手kap頭殼亦tio̍h。Se-bûn Pí-tek kā I kóng, Chú ah, m̄ nā góa ê kha, liân chhiú kap thâu-khak ia̍h tio̍h.

10耶穌kā伊講，人洗浴了，只有tio̍h洗腳，就齊全清氣；lín chiah-ê是清氣，但是無ta̍k-ê án-ni。Iâ-so͘ kā i kóng, Lâng sóe-e̍k liáu, chí-ū tio̍h sóe kha, chiū chiâu-chn̂g chheng-khì; lín chiah-ê sī chheng-khì, nā-sī bô ta̍k-ê án-ni.

11因為耶穌知賣伊ê人是是誰；所以講，Lín無ta̍k-ê清氣。In-ūi Iâ-so͘ chai bōe I ê lâng sī chī-chūi; só͘-í kóng, Lín bô ta̍k-ê chheng-khì.

12已經洗in ê腳，穿衫koh坐，就kā in講，我對lín所有行ê，lín知mah？Í-keng sóe in ê kha, chhēng saⁿ koh chē, chiū kā in kóng, Góa tùi lín só͘ ū kiâⁿ ê, lín chai mah?

13Lín稱呼我先生ah，主ah；lín ê話tio̍h；我實在是。Lín chheng-ho͘ góa Sian-siⁿ ah, Chú ah; lín ê ōe tio̍h; góa si̍t-chāi sī.

14我做主，做先生，尚且kā lín洗腳，lín亦tio̍h相仝洗腳。Góa chòe Chú, chòe Sian-siⁿ, siōng-chhiáⁿ kā lín sóe kha, lín ia̍h tio̍h saⁿ-kāng sóe kha.

15因為我已經用模樣hō͘ lín，hō͘ lín照我所對lín行ê來行。In-ūi góa í-keng ēng bô͘-iūⁿ hō͘ lín, hō͘ lín chiàu góa só͘ tùi lín kiâⁿ ê lâi kiâⁿ.

16我實實kā lín講，奴僕無khah大伊ê主人；奉差ê無khah大差伊ê。Góa si̍t-si̍t kā lín kóng, Lô͘-po̍k bô khah tōa i ê chú-lâng; hōng chhe ê bô khah tōa chhe i ê.

17Lín既然知chiah-ê事，若去行伊，就有福氣。Lín kì-jiân chai chiah ê sū, nā khì kiâⁿ i, chiū ū hok-khì.

18我m̄是指lín眾人來講；我所揀ê，我知in；獨獨beh hō͘聖經應驗，食我ê餅ê人kia̍h起腳後tiⁿ踢我。Góa m̄ sī chí lín chèng lâng lâi kóng; góa só͘ kéng ê, góa chai in; to̍k-to̍k beh hō͘ sèng-keng èng-giām, Chia̍h góa ê piáⁿ ê lâng kia̍h-khí kha-āu-tiⁿ that góa.

19Taⁿ tāi-chì iáu-bē成，我先kā lín講；到tāi-chì成，hō͘ lín信我就是伊。Taⁿ tāi-chì iáu-bē chiâⁿ, góa seng kā lín kóng; kàu tāi-chì chiâⁿ, hō͘ lín sìn góa chiū-sī I.

20我實實kā lín講，接納我所差ê，就是接納我，接納我，就是接納差我ê。Góa si̍t-si̍t kā lín kóng, Chiap-la̍p góa só͘ chhe ê, chiū-sī chiap-la̍p góa, chiap-la̍p góa, chiū-sī chiap-la̍p chhe góa ê.

21耶穌講án-ni，心內大擘腹，就干證講，我實實kā lín講，lín中間一人beh賣我。Iâ-so͘ kóng án-ni, sim-lāi tōa peh-pak, chiū kan-chèng kóng, Góa si̍t-si̍t kā lín kóng, lín tiong-kan chi̍t lâng beh bōe góa.

22學生相看，想m̄出伊是講甚麼人。Ha̍k-seng saⁿ-khòaⁿ, siūⁿ m̄ chhut I sī kóng sím-mi̍h lâng.

23有一個學生，就是耶穌所疼ê，撐近耶穌ê胸前。Ū chi̍t ê ha̍k-seng, chiū-sī Iâ-so͘ só͘ thiàⁿ ê, the kūn Iâ-so͘ ê heng-chêng.

24西門彼得tìm頭kā伊講，請kā阮講，伊所講ê是甚麼人。Se-bûn Pí-tek tìm thâu kā i kóng, Chhiáⁿ kā goán kóng, I só͘ kóng ê sī sím-mi̍h lâng.

25伊就hiàⁿ身óa耶穌ê胸坎，kā伊講，主ah，是是誰？I chiū hiàⁿ sin óa Iâ-so͘ ê heng-khám, kā I kóng, Chú ah, sī chī-chūi?

26耶穌就應講，我ùn一塊á物hō͘伊，hit-ê人就是。隨時ùn一塊á，the̍h hō͘ 加略人西門ê kiáⁿ猶大。Iâ-so͘ chiū ìn kóng, Góa ùn chi̍t tè-á mi̍h hō͘ i, hit ê lâng chiū-sī. Sûi-sî ùn chi̍t tè-á, the̍h hō͘ Ka-lio̍k lâng Se-bûn ê kiáⁿ Iû-tāi.

27伊受物了後，撒旦就入伊ê心。耶穌就kā伊講，你所做ê，緊緊去做。I siū mi̍h liáu-āu, Sat-tàn chiū ji̍p i ê sim. Iâ-so͘ chiū kā i kóng, Lí só͘ chòe ê, kín-kín khì chòe.

28同桌ê人，無人知為tio̍h怎樣對伊講chit-ê。Tâng toh ê lâng, bô lâng chai ūi-tio̍h cháiⁿ-iūⁿ tùi i kóng chit-ê.

29因為猶大管錢袋，有人phah算，敢是耶穌kā伊講，你去買咱守節所欠用ê；á是kah伊去賑濟sòng-hiong人。In-ūi Iû-tāi koán chîⁿ-tē, ū lâng phah-sǹg, káⁿ sī Iâ-so͘ kā i kóng, Lí khì bóe lán siú choeh só͘ khiàm-ēng ê; á-sī kah i khì chín-chè sòng-hiong lâng.

30猶大接tio̍h hit-ê物，liâm-piⁿ出去；hit時暝時。Iû-tāi chih-tio̍h hit ê mi̍h, liâm-piⁿ chhut-khì; hit sî mî-sî.

31已經出去，耶穌講，Taⁿ人子得tio̍h榮光，上帝亦tī伊得tio̍h榮光；Í-keng chhut-khì, Iâ-so͘ kóng, Taⁿ Jîn-chú tit-tio̍h êng-kng, Siōng-tè ia̍h tī I tit-tio̍h êng-kng;

32koh上帝beh tī本身榮光人子，亦beh liâm-piⁿ榮光伊。koh Siōng-tè beh tī pún-sin êng-kng Jîn-chú, ia̍h beh liâm-piⁿ êng-kng I.

33細kiáⁿ ah，我iáu有tiap-á久kap lín tī-teh。Lín beh chhē我；我所去ê所在，lín bōe能到；我bat kā猶太人講，taⁿ亦án-ni kā lín講。Sòe-kiáⁿ ah, góa iáu ū tiap-á-kú kap lín tī-teh. Lín beh chhē góa; góa só͘ khì ê só͘-chāi, lín bōe-ōe kàu; góa bat kā Iû-thài lâng kóng, taⁿ ia̍h án-ni kā lín kóng.

34我用新ê誡命hō͘ lín，就是lín tio̍h相疼；親像我bat疼lín，lín亦tio̍h án-ni相疼。Góa ēng sin ê kài-bēng hō͘ lín, chiū-sī lín tio̍h saⁿ-thiàⁿ; chhin-chhiūⁿ góa bat thiàⁿ lín, lín ia̍h tio̍h án-ni saⁿ-thiàⁿ.

35Lín若相疼，眾人beh tùi án-ni知lín是我ê學生。Lín nā saⁿ-thiàⁿ, chèng lâng beh tùi án-ni chai lín sī góa ê ha̍k-seng.

36西門彼得kā伊講，主ah，beh tá-lo̍h去？耶穌應伊講，我所去ê所在，你現時bōe tè我；後來beh tè我。Se-bûn Pí-tek kā I kóng, Chú ah, beh tá-lo̍h khì? Iâ-so͘ ìn i kóng, Góa só͘ khì ê só͘-chāi, lí hiān-sî bōe tè góa; āu-lâi beh tè góa.

37彼得kā伊講，主ah，我現時怎樣bōe tè你ah？我beh為tio̍h你放sak性命。Pí-tek kā I kóng, Chú ah, góa hiān-sî cháiⁿ-iūⁿ bōe tè lí ah? Góa beh ūi-tio̍h lí pàng-sak sìⁿ-miā.

38耶穌應講，你beh為tio̍h我放sak你ê性命mah？我實實kā你講，雞iáu-bē啼，你beh三pái m̄認我。Iâ-so͘ ìn kóng, Lí beh ūi-tio̍h góa pàng-sak lí ê sìⁿ-miā mah? Góa si̍t-si̍t kā lí kóng, Koe iáu-bē thî, lí beh saⁿ pái m̄ jīn góa.

1Lín ê心莫得擘腹；lín tio̍h信上帝，亦tio̍h信我。Lín ê sim bo̍h-tit peh-pak; lín tio̍h sìn Siōng-tè, ia̍h tio̍h sìn góa.

2Tī我ê父ê家，有chōe-chōe厝宅；若無，就我已經kā lín講lah；因為我去，是kā lín備辦所在。Tī góa ê Pē ê ke, ū chōe-chōe chhù-the̍h; nā bô, chiū góa í-keng kā lín kóng lah; in-ūi góa khì, sī kā lín pī-pān só͘-chāi.

3若去kā lín備辦所在，就beh koh來，接納lín歸tī我；hō͘我所tī-teh ê，lín亦tī hia。Nā khì kā lín pī-pān só͘-chāi, chiū beh koh lâi, chiap-la̍p lín kui tī góa; hō͘ góa só͘ tī-teh ê, lín ia̍h tī hia.

4我所去ê所在，lín bat hit條路。Góa só͘ khì ê só͘-chāi, lín bat hit tiâu lō͘.

5多馬kā伊講，主ah，你去ê所在，阮都m̄知；thài會知hit條路ah？To-má kā I kóng, Chú ah, lí khì ê só͘-chāi, goán to m̄ chai; thái ōe chai hit tiâu lō͘ ah?

6耶穌kā伊講，我就是路，是真理，是活命；若無tùi我，就無人就近父。Iâ-so͘ kā i kóng, Góa chiū-sī lō͘, sī chin-lí, sī oa̍h-miā; nā bô tùi góa, chiū bô lâng chiū-kūn Pē.

7Lín若已經bat我，就亦bat我ê父；taⁿ了後lín bat伊，亦bat看見伊。Lín nā í-keng bat góa, chiū ia̍h bat góa ê Pē; taⁿ liáu-āu lín bat I, ia̍h bat khòaⁿ-kìⁿ I.

8腓力kā伊講，主ah，用父hō͘阮看，就夠額。Hui-le̍k kā I kóng, Chú ah, ēng Pē hō͘ goán khòaⁿ, chiū kàu-gia̍h.

9耶穌kā伊講，腓力，我kap lín tiàm到chiah久，你iáu m̄-bat我mah？已經看見我ê，就是看見父；你怎樣講，用父hō͘阮看ah？Iâ-so͘ kā i kóng, Hui-le̍k, góa kap lín tiàm kàu chiah kú, lí iáu m̄ bat góa mah? í-keng khòaⁿ-kìⁿ góa ê, chiū-sī khòaⁿ-kìⁿ Pē; lí cháiⁿ-iūⁿ kóng, Ēng Pē hō͘ goán khòaⁿ ah?

10我tiàm-tī父，父亦tiàm-tī我，你m̄信mah？我所kā lín講ê話，m̄是出tī家己來講；就是父tòa tī我來行伊ê tāi-chì。Góa tiàm-tī Pē, Pē ia̍h tiàm-tī góa, lí m̄ sìn mah? Góa só͘ kā lín kóng ê ōe, m̄ sī chhut tī ka-kī lâi kóng; chiū-sī Pē tòa tī góa lâi kiâⁿ I ê tāi-chì.

11我tiàm-tī父，父tiàm-tī我，lín tio̍h信我；若無，就tio̍h因為所行ê事來信我。Góa tiàm-tī Pē, Pē tiàm-tī góa, lín tio̍h sìn góa; nā bô, chiū tio̍h in-ūi só͘ kiâⁿ ê sū lâi sìn góa.

12我實實kā lín講，信我ê人，我所行ê，伊beh行伊；就比chiah-ê事khah大ê，亦beh行伊；因為我歸tī父。Góa si̍t-si̍t kā lín kóng, Sìn góa ê lâng, góa só͘ kiâⁿ ê, i beh kiâⁿ i; chiū pí chiah ê sū khah tōa ê, ia̍h beh kiâⁿ i; in-ūi góa kui tī Pē.

13Lín tī我ê名，凡所求ê，我beh行伊；hō͘父tī Kiáⁿ得tio̍h榮光。Lín tī góa ê miâ, hoān só͘ kiû ê, góa beh kiâⁿ i; hō͘ Pē tī Kiáⁿ tit-tio̍h êng-kng.

14Lín若tī我ê名有所求我ê，我beh行伊。Lín nā tī góa ê miâ ū só͘ kiû góa ê, góa beh kiâⁿ i.

15Lín若疼我，就beh守我ê命令。Lín nā thiàⁿ góa, chiū beh siú góa ê bēng-lēng.

16我亦beh對父求，就伊beh用koh一個保惠師hō͘ lín，hō͘伊永遠kap lín tòa；Góa ia̍h beh tùi Pē kiû, chiū I beh ēng koh chi̍t ê Pó-hūi-su hō͘ lín, hō͘ I éng-oán kap lín tòa;

17就是真理ê神；世間所bōe接納ê，因為無看見伊，koh m̄-bat伊；獨獨lín bat伊；因為伊kap lín saⁿ-kap tòa，koh beh tiàm-tī lín。chiū-sī chin-lí ê Sîn; sè-kan só͘ bōe chiap-la̍p ê, in-ūi bô khòaⁿ-kìⁿ I, koh m̄ bat I; to̍k-to̍k lín bat I; in-ūi I kap lín saⁿ-kap tòa, koh beh tiàm-tī lín.

18我無beh放lín做無父ê kiáⁿ；我來就近lín。Góa bô beh pàng lín chòe bô pē ê kiáⁿ; góa lâi chiū-kūn lín.

19Iáu tiap-á久，世間無koh看見我；獨獨lín看見我；因為我活，lín亦活。Iáu tiap-á-kú, sè-kan bô koh khòaⁿ-kìⁿ góa; to̍k-to̍k lín khòaⁿ-kìⁿ góa; in-ūi góa oa̍h, lín ia̍h oa̍h.

20Hit日lín beh知我tiàm-tī我ê父，lín tiàm-tī我，我tiàm-tī lín。Hit ji̍t lín beh chai góa tiàm-tī góa ê Pē, lín tiàm-tī góa, góa tiàm-tī lín.

21有我ê命令，koh守伊ê人，chit-ê就是疼我；疼我ê人，beh得tio̍h我ê父疼伊，我亦beh疼伊，koh將本身顯明tī伊。Ū góa ê bēng-lēng, koh siú i ê lâng, chit-ê chiū-sī thiàⁿ góa; thiàⁿ góa ê lâng, beh tit-tio̍h góa ê Pē thiàⁿ i, góa ia̍h beh thiàⁿ i, koh chiong pún-sin hián-bêng tī i.

22有猶大(m̄是加略人ê) ，kā伊講，主ah，有甚麼事你beh將本身顯明tī阮，無顯明tī世間ah？Ū Iû-tāi, (m̄ sī Ka-lio̍k lâng ê), kā I kóng, Chú ah, ū sím-mi̍h sū lí beh chiong pún-sin hián-bêng tī goán, bô hián-bêng tī sè-kan ah?

23耶穌應伊講，人若疼我，伊beh守我ê道理，我ê父beh疼伊，阮亦beh就近伊，koh kap伊同khiā起。Iâ-so͘ ìn i kóng, lâng nā thiàⁿ góa, i beh siú góa ê tō-lí, góa ê Pē beh thiàⁿ i, goán ia̍h beh chiū-kūn i, koh kap i tâng khiā-khí.

24無疼我ê人，就無守我chiah-ê話；koh lín所聽ê道理，m̄是我ê，就是差我ê父ê。Bô thiàⁿ góa ê lâng, chiū bô siú góa chiah ê ōe; koh lín só͘ thiaⁿ ê tō-lí, m̄ sī góa ê, chiū-sī chhe góa ê Pē ê.

25我iáu kap lín tòa ê時，有將chiah-ê話kā lín講。Góa iáu kap lín tòa ê sî, ū chiong chiah ê ōe kā lín kóng.

26但是保惠師，就是聖神，父tī我ê名所beh差ê，伊beh將一切ê事教示lín，koh beh hō͘ lín記得我一切所kā lín講ê。Nā-sī Pó-hūi-su, chiū-sī Sèng Sîn, Pē tī góa ê miâ só͘ beh chhe ê, I beh chiong it-chhè ê sū kà-sī lín, koh beh hō͘ lín kì-tit góa it-chhè só͘ kā lín kóng ê.

27我用平安留tehhou7 lín；我將我ê平安賞賜lín；我teh hō͘ lín，m̄是親像世間teh hō͘人ê款。Lín ê心莫得擘腹，亦莫得驚惶。Góa ēng pêng-an lâu-teh hō͘ lín; góa chiong góa ê pêng-an siúⁿ-sù lín; góa teh hō͘ lín, m̄ sī chhin-chhiūⁿ sè-kan teh hō͘ lâng ê khoán. Lín ê sim bo̍h-tit peh-pak, ia̍h bo̍h-tit kiaⁿ-hiâⁿ.

28Lín已經聽見我有kā lín講，我去，koh來就近lín。Lín若疼我，就因為我歸tī父lín會歡喜；因為父比我khah大。Lín í-keng thiaⁿ-kìⁿ góa ū kā lín kóng, Góa khì, koh lâi chiū-kūn lín. Lín nā thiàⁿ góa, chiū in-ūi góa kui tī Pē lín ōe hoaⁿ-hí; in-ūi Pē pí góa khah tōa.

29Taⁿ事iáu-bē成，我已經kā lín講，hō͘ lín tī事成ê時thang信。Taⁿ sū iáu-bē chiâⁿ, góa í-keng kā lín kóng, hō͘ lín tī sū chiâⁿ ê sî thang sìn.

30以後我無kap lín講chōe-chōe話，因為世間ê人君teh來lah；伊tī我無所有；Í-āu góa bô kap lín kóng chōe-chōe ōe, in-ūi sè-kan ê jîn-kun teh lâi lah; i tī góa bô só͘ ū;

31獨獨beh hō͘世間知我疼父，亦照父所命令我ê，我án-ni來行。起來，咱tùi chia來去。to̍k-to̍k beh hō͘ sè-kan chai góa thiàⁿ Pē, ia̍h chiàu Pē só͘ bēng-lēng góa ê, góa án-ni lâi kiâⁿ. Khí-lâi, lán tùi chia lâi khì.