1Chiah-ê話講了，耶穌kap學生出去過Khip-lûn溪；tī hia有園，耶穌kap伊ê學生入去。Chiah ê ōe kóng liáu, Iâ-so͘ kap ha̍k-seng chhut-khì kè Khip-lûn khoe; tī hia ū hn̂g, Iâ-so͘ kap I ê ha̍k-seng ji̍p-khì.

2賣伊ê猶大亦bat hit-ê所在；因為耶穌kap伊ê學生ta̍uh-ta̍uh聚集tī hia。Bōe I ê Iû-tāi ia̍h bat hit ê só͘-chāi; in-ūi Iâ-so͘ kap I ê ha̍k-seng ta̍uh-ta̍uh chū-chi̍p tī hia.

3猶大已經領一隊兵，kap chiah-ê祭司頭以及法利賽人ê差役，kia̍h 燈，kap火把，kap ke-si，來到hia。Iû-tāi í-keng niá chi̍t tūi peng, kap chiah ê chè-si-thâu í-ki̍p Hoat-lī-sài lâng ê chhe-ia̍h, kia̍h teng, kap hé-pé, kap ke-si, lâi kàu hia.

4耶穌知伊所beh tú-tio̍h一切ê事，就出去kā in講，Lín chhē 是誰？Iâ-so͘ chai I só͘ beh tú-tio̍h it-chhè ê sū, chiū chhut-khì kā in kóng, Lín chhē chī-chūi?

5應講，拿撒勒人耶穌。耶穌kā in講，我就是。賣伊ê猶大亦kap in saⁿ-kap teh khiā。Ìn kóng, Ná-sat-le̍k lâng Iâ-so͘. Iâ-so͘ kā in kóng, Góa chiū-sī. Bōe I ê Iû-tāi ia̍h kap in saⁿ-kap teh khiā.

6耶穌一下kā in講，我就是，in就倒退，跋倒tī地裡。Iâ-so͘ chi̍t-ē kā in kóng, Góa chiū-sī, in chiū tò-thè, poa̍h-tó tī tōe-ni̍h.

7所以koh問in，Lín chhē 是誰？應講，拿撒勒人耶穌。Só͘-í koh mn̄g in, Lín chhē chī-chūi? Ìn kóng, Ná-sat-le̍k lâng Iâ-so͘.

8耶穌應講，我已經kā lín講，我就是；lín若chhē我，tio̍h容允chiah-ê人去；Iâ-so͘ ìn kóng, Góa í-keng kā lín kóng, góa chiū-sī; lín nā chhē góa, tio̍h iông-ún chiah ê lâng khì;

9這是hō͘伊前所講ê話應驗，講，你所hō͘我ê人，我無失落一個。che sī hō͘ I chêng só͘ kóng ê ōe èng-giām, kóng, Lí só͘ hō͘ góa ê lâng, góa bô sit-lo̍h chi̍t-ê.

10西門彼得有刀，拔起來phut祭司頭ê奴僕，削去伊ê chiàⁿ耳。奴僕ê名叫Má-le̍k-kó͘。Se-bûn Pí-tek ū to, pu̍ih-khí-lâi phut chè-si-thâu ê lô͘-po̍k, siah-khì i ê chiàⁿ hī. Lô͘-po̍k ê miâ kiò Má-le̍k-kó͘.

11耶穌就kā彼得講，收你ê刀入鞘；父所hō͘我ê杯，我kiám無beh lim mah？Iâ-so͘ chiū kā Pí-tek kóng, Siu lí ê to ji̍p siù; Pē só͘ hō͘ góa ê poe, góa kiám bô beh lim mah?

12Tùi án-ni，兵隊kap千總，以及猶太人ê差役，掠耶穌縛伊；Tùi án-ni peng-tūi kap chhian-chóng, í-ki̍p Iû-thài lâng ê chhe-ia̍h, lia̍h Iâ-so͘ pa̍k I;

13事先帶伊去見A-ná，因為伊是hit年ê祭司頭Kai-a-hoat ê丈人。tāi-seng tòa I khì kìⁿ A-ná, in-ūi i sī hit nî ê chè-si-thâu Kai-a-hoat ê tiūⁿ-lâng.

14前替猶太人打算講，一人為tio̍h百姓死是有利益ê，就是chit-ê Kai-a-hoat。Chêng thòe Iû-thài lâng táⁿ-sǹg kóng, chi̍t lâng ūi-tio̍h peh-sìⁿ sí sī ū lī-ek ê, chiū-sī chit ê Kai-a-hoat.

15西門彼得tè耶穌，koh有一個學生tè伊。Chit-ê學生是祭司頭所bat ê，就kap耶穌入祭司頭ê院。Se-bûn Pí-tek tè Iâ-so͘, koh ū chi̍t ê ha̍k-seng tè I. Chit ê ha̍k-seng sī chè-si-thâu só͘ bat ê, chiū kap Iâ-so͘ ji̍p chè-si-thâu ê īⁿ.

16但是彼得khiā tī門外。所以hit-ê學生，就是祭司頭所bat ê，出去kap顧門ê cha-bó͘人講，就chhōa彼得入去。Nā-sī Pí-tek khiā tī mn̂g-gōa. Só͘-í hit ê ha̍k-seng, chiū-sī chè-si-thâu só͘ bat ê, chhut-khì kap kò͘-mn̂g ê cha-bó͘-lâng kóng, chiū chhōa Pí-tek ji̍p-khì.

17顧門ê女婢kā彼得講，你亦敢是chit人ê學生hò͘ⁿ？伊講，m̄是。Kò͘-mn̂g ê lú-pī kā Pí-tek kóng, Lí ia̍h káⁿ sī chit lâng ê ha̍k-seng hò͘ⁿ? I kóng, M̄ sī.

18Chiah-ê奴僕kap差役，因為寒，將炭起火，khiā teh烘燒；彼得亦kap in khiā teh烘。Chiah ê lô͘-po̍k kap chhe-ia̍h, in-ūi kôaⁿ, chiong thòaⁿ khí hé, khiā teh hang sio; Pí-tek ia̍h kap in khiā teh hang.

19祭司頭就問耶穌論伊ê學生，kap伊ê教示。Chè-si-thâu chiū mn̄g Iâ-so͘ lūn I ê ha̍k-seng, kap I ê kà-sī.

20耶穌應講，我是顯然對世間人講；我常常tī會堂kap殿裡教示，就是猶太人lóng聚集ê所在；tī隱密ê所在我bē bat講甚麼。Iâ-so͘ ìn kóng, Góa sī hián-jiân tùi sè-kan lâng kóng; góa siông-siông tī hōe-tn̂g kap tiān-ni̍h kà-sī, chiū-sī Iû-thài lâng lóng chū-chi̍p ê só͘-chāi; tī ún-ba̍t ê só͘-chāi góa bē bat kóng sím-mi̍h.

21啥事問我？thang問聽ê人，看我kap in講怎樣；in知我所講。Siáⁿ-sū mn̄g góa? thang mn̄g thiaⁿ ê lâng, khòaⁿ góa kap in kóng cháiⁿ-iūⁿ; in chai góa só͘ kóng.

22講soah，邊á teh khiā一個差役siàn耶穌，講，你應祭司頭án-ni mah？Kóng soah, piⁿ-á teh khiā chi̍t ê chhe-ia̍h siàn Iâ-so͘, kóng, Lí ìn chè-si-thâu án-ni mah?

23耶穌應伊講，我若講m̄ tio̍h，thang指正hit-ê m̄ tio̍h；若tio̍h，啥事phah我？Iâ-so͘ ìn i kóng, Góa nā kóng m̄ tio̍h, thang chí-chèng hit ê m̄ tio̍h; nā tio̍h, siáⁿ-sū phah góa?

24耶穌猶原受縛，A-ná差伊到祭司頭Kai-a-hoat ê所在。Iâ-so͘ iû-goân siū pa̍k, A-ná chhe I kàu chè-si-thâu Kai-a-hoat ê só͘-chāi.

25Hit時西門彼得khiā-teh烘火，就有人kā伊講，你亦敢是伊ê學生hò͘ⁿ？伊m̄認，講，m̄是。Hit sî Se-bûn Pí-tek khiā-teh hang hé. Chiū ū lâng kā i kóng, Lí ia̍h káⁿ sī I ê ha̍k-seng hò͘ⁿ? I m̄ jīn, kóng, M̄ sī.

26有一個祭司頭ê奴僕，是hō͘彼得siah耳á ê ê親人，講，我kiám無看見你kap伊tī園內mah？Ū chi̍t ê chè-si-thâu ê lô͘-po̍k, sī hō͘ Pí-tek siah hī-á ê ê chhin-lâng, kóng, Góa kiám bô khòaⁿ-kìⁿ lí kap I tī hn̂g-lāi mah?

27彼得koh無認；雞隨時啼。Pí-tek koh bô jīn; koe sûi-sî thî.

28In就帶耶穌tùi Kkai-a-hoat ê所在到公堂：hit-tia̍p天phú光；in家己無入公堂，免得bak-tio̍h lâ-sâm，chiah thang食pôaⁿ過節。In chiū tòa Iâ-so͘ tùi Kai-a-hoat ê só͘-chāi kàu kong-tn̂g: hit tia̍p thiⁿ phú-kng; in ka-kī bô ji̍p kong-tn̂g, bián-tit bak-tio̍h lâ-sâm, chiah thang chia̍h pôaⁿ-kè-choeh.

29所以彼拉多出來外面就近in講，Lín告chit人甚麼案件？Só͘-í Pí-lia̍p-to chhut-lâi gōa-bīn chiū-kūn in kóng, Lín kò chit lâng sím-mi̍h àn-kiāⁿ?

30應講，Chit人若m̄是pháiⁿ人，阮就無將伊交hō͘你。Ìn kóng, Chit lâng nā m̄ sī pháiⁿ lâng, goán chiū bô chiong I kau hō͘ lí.

31彼拉多就kā in講，Lín家己帶去，照lín ê律法去辦伊。猶太人kā伊講，Pí-lia̍p-to chiū kā in kóng, Lín ka-kī tòa-khì, chiàu lín ê lu̍t-hoat khì pān I. Iû-thài lâng kā i kóng,

32阮無thâi人ê koân；這是beh應驗耶穌前所講ê話，指明伊beh甚麼款來死。Goán bô thâi lâng ê koân; che sī beh èng-giām Iâ-so͘ chêng só͘ kóng ê ōe, chí-bêng I beh sím-mi̍h khoán lâi sí.

33彼拉多koh入公堂，tiàu耶穌來，kā伊講，你是猶太人ê王mah？Pí-lia̍p-to koh ji̍p kong-tn̂g, tiàu Iâ-so͘ lâi, kā I kóng, Lí sī Iû-thài lâng ê ông mah?

34耶穌應講，你講chit-ê話是對你家己，á是別人將我ê事kā你講ah？Iâ-so͘ ìn kóng, Lí kóng chit ê ōe sī tùi lí ka-kī, á-sī pa̍t lâng chiong góa ê sū kā lí kóng ah?

35彼拉多應講，我kiám是猶太人mah？你本國ê人kap chiah-ê祭司頭將你交hō͘我；你果然怎樣做ah？Pí-lia̍p-to ìn kóng, Góa kiám sī Iû-thài lâng mah? Lí pún-kok ê lâng kap chiah ê chè-si-thâu chiong lí kau hō͘ góa; lí kó-jiân cháiⁿ-iūⁿ chòe ah?

36耶穌應講，我ê國m̄是屬chit世間；我ê國若屬chit世間，就我ê差用的確爭戰，免得我交hō͘猶太人；但是taⁿ我ê國m̄是tùi chia出。Iâ-so͘ ìn kóng, Góa ê kok m̄ sī sio̍k chit sè-kan; góa ê kok nā sio̍k chit sè-kan, chiū góa ê chhe-ēng tek-khak cheng-chiàn, bián-tit góa kau hō͘ Iû-thài lâng; nā-sī taⁿ góa ê kok m̄ sī tùi chia chhut.

37彼拉多就kā伊講，Án-ni，你是王mah？耶穌應講，你講我是王。我為tio̍h án-ni出世，為tio̍h án-ni臨到世間，beh替真理做干證。凡若屬真理ê人，聽我ê聲。Pí-lia̍p-to chiū kā I kóng, Án-ni, lí sī ông mah? Iâ-so͘ ìn kóng, Lí kóng góa sī ông. Góa ūi-tio̍h án-ni chhut-sì, ūi-tio̍h án-ni lîm-kàu sè-kan, beh thòe chin-lí chòe kan-chèng. Hoān-nā sio̍k chin-lí ê lâng, thiaⁿ góa ê siaⁿ.

38彼拉多講，真理是甚麼？ 講soah，koh出去就近猶太人，kā in講，我看伊無罪。Pí-lia̍p-to kóng, Chin-lí sī sím-mi̍h? Kóng soah, koh chhut-khì chiū-kūn Iû-thài lâng, kā in kóng, Góa khòaⁿ I bô chōe.

39總是lín有例，到pôaⁿ過節，我tio̍h放一個監犯hō͘ lín；lín ài我放猶太人ê王hō͘ lín mah？Chóng-sī lín ū lē, kàu pôaⁿ-kè-choeh, góa tio̍h pàng chi̍t ê kaⁿ-hoān hō͘ lín; lín ài góa pàng Iû-thài lâng ê ông hō͘ lín mah?

40In koh大聲喉叫講，M̄-thang chit-ê，是tio̍h 巴拉巴。Chit-ê 巴拉巴是土匪。In koh tōa siaⁿ âu-kiò kóng, M̄-thang chit-ê, sī tio̍h Pa-lia̍p-pa. Chit ê Pa-lia̍p-pa sī thó͘-húi.

1Tùi án-ni，彼拉多用鞭phah耶穌。Tùi án-ni, Pí-lia̍p-to ēng piⁿ phah Iâ-so͘.

2兵丁用刺á編做冕旒，戴tī伊ê頭殼，koh用紫色ê袍kā伊穿；Peng-teng ēng chhì-á piⁿ chòe bián-liû, tì tī I ê thâu-khak, koh ēng chí-sek ê phàu kā I chhēng;

3就近伊，講，猶太人ê王，平安ah。就siàn伊。chiū-kūn I, kóng, Iû-thài lâng ê ông, Pêng-an ah. Chiū siàn I.

4彼拉多koh出去外面kā in講，你看，我chhōa伊出來hō͘ lín，hō͘ lín知我查了看伊無罪。Pí-lia̍p-to koh chhut-khì gōa-bīn kā in kóng, Lí khòaⁿ, góa chhōa I chhut-lâi hō͘ lín, hō͘ lín chai góa chhâ-liáu khòaⁿ I bô chōe.

5耶穌戴刺á ê冕旒，穿紫色ê袍，出來外面；彼拉多koh kā in講，你看，chit-ê人！Iâ-so͘ tì chhì-á ê bián-liû, chhēng chí-sek ê phàu, chhut-lâi gōa-bīn; Pí-lia̍t-to koh kā in kóng, Lí khòaⁿ, chit ê lâng!

6Chiah-ê祭司頭kap差役看見伊，就大聲喉叫講，釘伊十字架，釘伊十字架。彼拉多kā in講，Lín家己掠去釘；因為我看伊無罪。Chiah ê chè-si-thâu kap chhe-ia̍h khòaⁿ-kìⁿ I, chiū tōa siaⁿ âu-kiò kóng, Tèng I si̍p-jī-kè, tèng I si̍p-jī-kè. Pí-lia̍p-to kā in kóng, Lín ka-kī lia̍h-khì tèng; in-ūi góa khòaⁿ I bô chōe.

7猶太人應伊講，阮有律法，也照chit-ê律法伊應該死，因為伊掠本身做上帝ê Kiáⁿ。Iû-thài lâng ìn i kóng, Goán ū lu̍t-hoat, iā chiàu chit ê lu̍t-hoat I eng-kai sí, in-ūi I lia̍h pún-sin chòe Siōng-tè ê Kiáⁿ.

8彼拉多聽見chit-ê話，就益發驚；Pí-lia̍p-to thiaⁿ-kìⁿ chit ê ōe, chiū it-hoat kiaⁿ;

9koh入公堂，kā耶穌講，你tùi tá-lo̍h來？但是耶穌無應伊。koh ji̍p kong-tn̂g, kā Iâ-so͘ kóng, Lí tùi tá-lo̍h lâi? Nā-sī Iâ-so͘ bô ìn i.

10彼拉多就kā伊講，你m̄ kap我講mah？Kiám m̄知我有權thang放你，亦有權thang釘你tī十字架mah？Pí-lia̍p-to chiū kā I kóng, Lí m̄ kap góa kóng mah? Kiám m̄ chai góa ū koân thang pàng lí, ia̍h ū koân thang tèng lí tī si̍p-jī-kè mah?

11耶穌應伊講，若m̄是tùi頂面hō͘你，就你無權thang辦我；所以將我交hō͘你ê人，伊ê罪koh-khah重。Iâ-so͘ ìn i kóng, Nā m̄ sī tùi téng-bīn hō͘ lí, chiū lí bô koân thang pān góa; só͘-í chiong góa kau hō͘ lí ê lâng, i ê chōe koh khah tāng.

12Tùi án-ni， 彼拉多ài beh放伊；猶太人大聲喉叫，講，你若放chit-ê人，就m̄是該撒ê朋友；因為凡若掠家己做王ê，是背叛該撒。Tùi án-ni Pí-lia̍p-to ài beh pàng I; Iû-thài lâng tōa siaⁿ âu-kiò, kóng, Lí nā pàng chit ê lâng, chiū m̄ sī Kai-sat ê pêng-iú; in-ūi hoān-nā lia̍h ka-kī chòe ông ê, sī pōe-poān Kai-sat.

13彼拉多聽見chiah-ê話，就chhōa耶穌出來；也家己坐tī公座，tī一個名叫鋪石ê所在，希伯來ê話叫做Lek-pa-tāi。Pí-lia̍p-to thiaⁿ-kìⁿ chiah ê ōe, chiū chhōa Iâ-so͘ chhut-lâi; iā ka-kī chē tī kong-chō, tī chi̍t-ê miâ kiò Pho͘-chio̍h ê só͘-chāi, Hi-pek-lâi ê ōe kiò chòe Lek-pa-tāi.

14Hit日就是備辦pôaⁿ過節ê日；約略日中晝。就kā猶太人講，你看，lín ê王！Hit ji̍t chiū-sī pī-pān pôaⁿ-kè-choeh ê ji̍t; iok-lio̍k ji̍t tiong-tàu. Chiū kā Iû-thài lâng kóng, Lí khòaⁿ, lín ê ông!

15In大聲喉叫，講，除去，除去，釘伊tī十字架。彼拉多kā in講，我將lín ê王釘十字架mah？Chiah-ê祭司頭應講，該撒以外，阮無王。In tōa siaⁿ âu-kiò, kóng, Tû-khì, tû-khì, tèng I tī si̍p-jī-kè. Pí-lia̍p-to kā in kóng, Góa chiong lín ê ông tèng si̍p-jī-kè mah? Chiah ê chè-si-thâu ìn kóng, Kai-sat í-gōa, goán bô ông.

16Tùi án-ni，就將耶穌交hō͘ in去釘十字架。Tùi án-ni, chiū chiong Iâ-so͘ kau hō͘ in khì tèng si̍p-jī-kè.

17In就收伊；耶穌家己giâ伊ê十字架出去，到一個名叫頭殼碗ê所在，希伯來ê話叫做各各他；In chiū siu I; Iâ-so͘ ka-kī giâ i ê si̍p-jī-kè chhut-khì, kàu chi̍t-ê miâ kiò Thâu-khak-óaⁿ ê só͘-chāi, Hi-pek-lâi ê ōe kiò chòe Kok-kok-thaⁿ;

18tī hia釘伊十字架，koh有兩人kap伊同釘，一pêng一個，耶穌tī中央。tī hia tèng I si̍p-jī-kè, koh ū nn̄g lâng kap I tâng tèng, chi̍t pêng chi̍t-ê, Iâ-so͘ tī tiong-ng.

19彼拉多亦寫斬條，hē tī十字架，寫講，猶太人ê王，拿撒勒人耶穌。Pí-lia̍p-to ia̍h siá chám-tiâu, hē tī si̍p-jī-kè, siá kóng, Iû-thài lâng ê ông, Ná-sat-le̍k lâng Iâ-so͘.

20猶太人chōe-chōe讀chit-ê斬條；因為耶穌受釘ê所在近城；koh所寫ê，是用希伯來、羅馬、希利尼ê文字。Iû-thài lâng chōe-chōe tha̍k chit ê chám-tiâu; in-ūi Iâ-so͘ siū tèng ê só͘-chāi kūn siâⁿ; koh só͘ siá ê, sī ēng Hi-pek-lâi, Lô-má, Hi-lī-nî ê bûn-jī.

21所以猶太人chiah-ê祭司頭kā彼拉多講，莫得寫，猶太人ê王；tio̍h寫，伊家己講，我是猶太人ê王。Só͘-í Iû-thài lâng chiah ê chè-si-thâu kā Pí-lia̍p-to kóng, Bo̍h-tit siá, Iû-thài lâng ê ông; tio̍h siá, I ka-kī kóng, Góa sī Iû-thài lâng ê ông.

22彼拉多應講，我所寫ê，已經寫了lah。Pí-lia̍p-to ìn kóng, góa só͘ siá ê, í-keng siá-liáu lah.

23兵丁已經釘耶穌tī十字架，就the̍h伊ê衫，分做四份，ta̍k ê兵得tio̍h一份；koh the̍h伊ê內衫；chit領內衫無kap-chōa，是頂下透織ê。Peng-teng í-keng tèng Iâ-so͘ tī si̍p-jī-kè, chiū the̍h I ê saⁿ, pun chòe sì hūn, ta̍k ê peng tit-tio̍h chi̍t hūn; koh the̍h I ê lāi-saⁿ; chit niá lāi-saⁿ bô kap-chōa, sī téng-ē thàu-chit ê.

24所以saⁿ-kap講，莫得拆裂，tio̍h來liam-khau，看是誰得tio̍h；這是beh應驗聖經所講， In saⁿ-kap分我ê衫， Liam-khau我ê衣服。Só͘-í saⁿ-kap kóng, Bo̍h-tit thiah-li̍h, tio̍h lâi liam-khau, khòaⁿ chī-chūi tit-tio̍h; che sī beh èng-giām sèng-keng só͘ kóng, In saⁿ-kap pun góa ê saⁿ, Liam-khau góa ê i-ho̍k.

25兵丁果然做chiah-ê事。Khiā tī耶穌十字架邊，有伊ê老母，kap伊ê老母ê姊妹，Kek-liû-pa ê bó͘馬利亞，kap Boa̍t-tāi-lia̍p ê馬利亞。Peng-teng kó-jiân chòe chiah ê sū. Khiā tī Iâ-so͘ si̍p-jī-kè piⁿ, ū I ê lāu-bú, kap I ê lāu-bú ê chí-bē, Kek-liû-pa ê bó͘ Má-lī-a, kap Boa̍t-tāi-lia̍p ê Má-lī-a.

26耶穌看見老母kap所疼ê學生khiā tī邊頭，就tùi老母講，老母ah，看，你ê kiáⁿ！Iâ-so͘ khòaⁿ-kìⁿ lāu-bú kap só͘ thiàⁿ ê ha̍k-seng khiā tī piⁿ-thâu, chiū tùi lāu-bú kóng, Lāu-bú ah, khòaⁿ, lí ê kiáⁿ!

27Koh 對學生講，看，你ê老母！Tùi hit時，hit-ê學生chih接伊到家己ê家。Koh tùi ha̍k-seng kóng, Khòaⁿ, lí ê lāu-bú! Tùi hit sî, hit ê ha̍k-seng chih-chiap i kàu ka-kī ê ke.

28Chit-ê tāi-chì以後，耶穌知眾項事已經明白，因為beh hō͘聖經ê話應驗，就講，我嘴乾。Chit ê tāi-chì í-āu, Iâ-so͘ chai chèng hāng sū í-keng bêng-pe̍k, in-ūi beh hō͘ sèng-keng ê ōe èng-giām, chiū kóng, Góa chhùi-ta.

29Tī hia有一個器具tóe醋滿滿；in就the̍h海絨浸醋，hâ牛膝草，thuh到伊ê嘴。Tī hia ū chi̍t ê khì-kū tóe chhò͘ móa-móa; in chiū the̍h hái-jiông chìm chhò͘, hâ gû-chhek-chháu, thuh kàu I ê chhùi.

30耶穌已經受醋；就講，事明白lah；就àⁿ頭氣斷。Iâ-so͘ í-keng siū chhò͘; chiū kóng, Sū bêng-pe̍k lah; chiū àⁿ thâu khùi tn̄g.

31Hit時是備辦節ê日，猶太人ài免得tī安歇日留身屍tī十字架，因為chit-ê安歇日是大ê日；所以求彼拉多kah人kòng折in ê腳骨，來收in。Hit sî sī pī-pān choeh ê ji̍t, Iû-thài lâng ài bián-tit tī an-hioh-ji̍t lâu sin-si tī si̍p-jī-kè, in-ūi chit ê an-hioh-ji̍t sī tōa ê ji̍t; só͘-í kiû Pí-lia̍p-to kah lâng kòng-chi̍h in ê kha-kut, lâi siu in.

32兵丁到，kòng折頭一個ê腳骨，以及hit-ê kap伊同釘ê ê腳骨；Peng-teng kàu, kòng-chi̍h thâu chi̍t ê ê kha-kut, í-ki̍p hit ê kap i tâng tèng ê ê kha-kut;

33到tī耶穌，看見伊已經死就無kòng折伊ê腳骨；kàu tī Iâ-so͘, khòaⁿ-kìⁿ I í-keng sí chiū bô kòng-chi̍h I ê kha-kut;

34獨獨有一個兵，用鎗鑿伊ê hia̍p下，血kap水liâm-piⁿ流出。to̍k-to̍k ū chi̍t ê peng, ēng chhiuⁿ chha̍k I ê hia̍p-ē, huih kap chúi liâm-piⁿ lâu-chhut.

35看見ê人做干證，伊ê干證是真；家己知所講是實，hō͘ lín亦會信。Khòaⁿ-kìⁿ ê lâng chòe kan-chèng, i ê kan-chèng sī chin; ka-kī chai só͘ kóng sī si̍t, hō͘ lín ia̍h ōe sìn.

36因為chiah-ê tāi-chì成，是beh應驗聖經所講，伊ê骨無一支beh受phah碎。In-ūi chiah ê tāi-chì chiâⁿ, sī beh èng-giām sèng-keng só͘ kóng, I ê kut bô chi̍t ki beh siū phah-chhùi.

37Koh聖經有一句講，人beh看in所鑿ê。Koh sèng-keng ū chi̍t kù kóng, Lâng beh khòaⁿ in só͘ chha̍k ê.

38Chiah-ê tāi-chì以後，有A-lī-má-thài ê約瑟，是耶穌ê學生，獨獨驚猶太人，chiah暗靜做學生，伊來求彼拉多，准伊去收耶穌ê身屍；彼拉多允准。就來，收伊ê身屍去。Chiah ê tāi-chì í-āu, ū A-lī-má-thài ê Iok-sek, sī Iâ-so͘ ê ha̍k-seng, to̍k-to̍k kiaⁿ Iû-thài lâng, chiah àm-chīⁿ chòe ha̍k-seng, i lâi kiû Pí-lia̍p-to, chún i khì siu Iâ-so͘ ê sin-si; Pí-lia̍p-to ún-chún. Chiū lâi, siu I ê sin-si khì.

39Koh有尼哥底某，起頭bat暝時就近耶穌ê，亦來，帶沒藥chhiau沉香，約略一百斤。Koh ū Nî-ko-tí-bó͘, khí-thâu bat mî-sî chiū-kūn Iâ-so͘ ê, ia̍h lâi, tòa bu̍t-io̍h chhiau tîm-hiuⁿ, iok-lio̍k chi̍t pah kun.

40In就收耶穌ê身屍，用幼苧布kap香料包伊，照猶太人埋葬ê例。In chiū siu Iâ-so͘ ê sin-si, ēng iù-tōe pò͘ kap hiuⁿ-liāu pau I, chiàu Iû-thài lâng bâi-chòng ê lē.

41釘十字架ê所在有園；園內有新ê墓，lóng bē bat有人葬 ê。Tèng si̍p-jī-kè ê só͘-chāi ū hn̂g; hn̂g-lāi ū sin ê bōng, lóng bē bat ū lâng chòng ê.

42Hit日是猶太人備辦節ê日，koh因為hit-ê墓近，所以安置耶穌tī hia。Hit ji̍t sī Iû-thài lâng pī-pān choeh ê ji̍t, koh in-ūi hit ê bōng kūn, só͘-í an-tì Iâ-so͘ tī hia.

1七日ê頭一日，清早，天iáu-bē光，Boa̍t-tāi-lia̍p ê馬利亞到墓，看見石已經tùi墓徙開。Chhit ji̍t ê thâu chi̍t ji̍t, chheng chá, thiⁿ iáu-bē kng, Boa̍t-tāi-lia̍p ê Má-lī-a kàu bōng, khòaⁿ-kìⁿ chio̍h í-keng tùi bōng sóa khui.

2就走去就近西門彼得，kap別個學生，就是耶穌所疼hit-ê，kā in講，有人將主移出墓，阮m̄知hē tī tá-lo̍h。Chiū cháu-khì chiū-kūn Se-bûn Pí-tek, kap pa̍t ê ha̍k-seng, chiū-sī Iâ-so͘ só͘ thiàⁿ hit ê, kā in kóng, Ū lâng chiong Chú î chhut bōng, goán m̄ chai hē tī tá-lo̍h.

3所以彼得kap hit-ê別個學生出去到墓。Só͘-í Pí-tek kap hit ê pa̍t ê ha̍k-seng chhut-khì kàu bōng.

4兩人平平走；hit-ê別個學生走做頭，比彼得khah緊，事先到墓；Nn̄g lâng pîⁿ-pîⁿ cháu; hit ê pa̍t ê ha̍k-seng cháu chòe thâu, pí Pí-tek khah kín, tāi-seng kàu bōng;

5àⁿ落看墓內，看見幼苧布hē-teh；獨獨無入去。àⁿ-lo̍h khòaⁿ bōng lāi, khòaⁿ-kìⁿ iù-tōe pò͘ hē-teh; to̍k-to̍k bô ji̍p-khì.

6西門彼得tè後到，入墓；看見幼苧布hē-teh，Se-bûn Pí-tek tè-āu kàu, ji̍p bōng; khòaⁿ-kìⁿ iù-tōe pò͘ hē-teh,

7koh看見包頭殼ê巾，無kap幼苧布做一位，是另外tī一所在捲teh。koh khòaⁿ-kìⁿ pau thâu-khak ê kun, bô kap iù-tōe pò͘ chòe chi̍t ūi, sī lēng-gōa tī chi̍t só͘-chāi kńg teh.

8Hit時hit-ê事先到墓ê學生亦入去，看見就信。Hit sî hit ê tāi-seng kàu bōng ê ha̍k-seng ia̍h ji̍p-khì, khòaⁿ-kìⁿ chiū sìn.

9因為in iáu-bē明白聖經ê話，講伊的確tio̍h tùi死人中koh活。In-ūi in iáu-bē bêng-pe̍k sèng-keng ê ōe, kóng I tek-khak tio̍h tùi sí-lâng tiong koh-oa̍h.

10Tùi án-ni，兩個學生tò去家己ê家。Tùi án-ni nn̄g ê ha̍k-seng tò-khì ka-kī ê ke.

11獨獨馬利亞khiā tī墓外teh啼哭；哭ê時，àⁿ落看墓內；To̍k-to̍k Má-lī-a khiā tī bōng gōa teh thî-khàu; khàu ê sî, àⁿ-lo̍h khòaⁿ bōng lāi;

12看見兩個天使穿白衫，坐tī耶穌ê身屍所bat安置ê所在，一個tī頭，一個tī腳。khòaⁿ-kìⁿ nn̄g ê thiⁿ-sài chhēng pe̍h saⁿ, chē tī Iâ-so͘ ê sin-si só͘ bat an-tì ê só͘-chāi, chi̍t-ê tī thâu, chi̍t-ê tī kha.

13In就kā伊講，婦人人ah，啥事哭？應伊講，因為人將我ê主移去，我m̄知hē伊tī甚麼所在。In chiū kā i kóng, Hū-jîn-lâng ah, Siáⁿ-sū khàu? ìn i kóng, In-ūi lâng chiong góa ê Chú î khì, góa m̄ chai hē I tī sím-mi̍h só͘-chāi.

14已經講chiah-ê話，就翻身ǹg後面，看見耶穌teh khiā，也m̄知伊是耶穌。Í-keng kóng chiah ê ōe, chiū hoan-sin ǹg āu-bīn, khòaⁿ-kìⁿ Iâ-so͘ teh khiā, iā m̄ chai I sī Iâ-so͘.

15耶穌kā伊講，婦人人ah，啥事啼哭？你chhē 是誰？馬利亞phah算伊是顧園ê，就kā伊講，頭家ah，你若有扛伊去，請kā我講hē伊tī甚麼所在，我就去收伊。Iâ-so͘ kā i kóng, Hū-jîn-lâng ah, siáⁿ-sū thî-khàu? lí chhē chī-chūi? Má-lī-a phah-sǹg I sī kò͘ hn̂g ê, chiū kā I kóng, Thâu-ke ah, lí nā ū kng I khì, chhiáⁿ kā góa kóng hē I tī sím-mi̍h só͘-chāi, góa chiū khì siu I.

16耶穌kā伊講，馬利亞ah。伊就oa̍t-tńg身，用希伯來ê話kā伊講，Lia̍p-pho-nî；意思就是，先生。Iâ-so͘ kā i kóng, Má-lī-a ah. I chiū oa̍t-tńg-sin, ēng Hi-pek-lâi ê ōe kā I kóng, Lia̍p-pho-nî; ì-sù chiū-sī, Sian-siⁿ.

17耶穌kā伊講，莫得摸我；因為我iáu-bē上去見父；你tio̍h去chhē我ê兄弟kā in講，我上去見我ê父，亦是lín ê父；見我ê上帝，亦是lín ê上帝。Iâ-so͘ kā i kóng, Bo̍h-tit bong góa; in-ūi góa iáu-bē chiūⁿ-khì kìⁿ Pē; lí tio̍h khì chhē góa ê hiaⁿ-tī kā in kóng, Góa chiūⁿ-khì kìⁿ góa ê Pē, ia̍h sī lín ê Pē; kìⁿ góa ê Siōng-tè, ia̍h sī lín ê Siōng-tè.

18抹大拉ê馬利亞就去kā學生講，我已經看見主；koh講，主用chiah-ê話kā伊講。Boa̍t-tāi-lia̍p ê Má-lī-a chiū khì kā ha̍k-seng kóng, Góa í-keng khòaⁿ-kìⁿ Chú; koh kóng, Chú ēng chiah ê ōe kā i kóng.

19Hit日就是七日ê頭一日，已經暗，學生因為驚猶太人，就tī in所tòa ê所在關門；耶穌到，khiā tī中間，kā in講，願lín平安。Hit ji̍t chiū-sī chhit ji̍t ê thâu chi̍t ji̍t, í-keng àm, ha̍k-seng in-ūi kiaⁿ Iû-thài lâng, chiū tī in só͘ tòa ê só͘-chāi koaiⁿ mn̂g; Iâ-so͘ kàu, khiā tī tiong-kan, kā in kóng, Goān lín pêng-an.

20已經講chit-ê話，就用手kap hia̍p下hō͘ in看。學生看見主，就歡喜。Í-keng kóng chit ê ōe, chiū ēng chhiú kap hia̍p-ē hō͘ in khòaⁿ. Ha̍k-seng khòaⁿ-kìⁿ Chú, chiū hoaⁿ-hí.

21耶穌koh kā in講，願lín平安；我差lín，親像父有差我。Iâ-so͘ koh kā in kóng, Goān lín pêng-an; góa chhe lín, chhin-chhiūⁿ Pē ū chhe góa.

22已經講chit-ê話，就對in pûn氣講，Lín受聖神；Í-keng kóng chit ê ōe, chiū tùi in pûn khùi kóng, Lín siū Sèng Sîn;

23lín赦甚麼人ê罪，就赦去；留甚麼人ê罪，就留teh。lín sià sím-mi̍h lâng ê chōe, chiū sià-khì; lâu sím-mi̍h lâng ê chōe, chiū lâu-teh.

24有多馬稱做Té-thó͘-má ê，是十二學生ê一個，耶穌到ê時，伊無saⁿ-kap tī-teh。Ū To-má chheng chòe Té-thó͘-má ê, sī cha̍p-jī ha̍k-seng ê chi̍t-ê, Iâ-so͘ kàu ê sî, i bô saⁿ-kap tī-teh.

25其餘ê學生就kā伊講，阮chiah-ê已經看見主lah。但是多馬kā in講，我若無看見伊手中釘ê跡，無用我ê指頭á探伊釘ê跡，無用我ê手探伊ê hia̍p下，我決斷m̄信。Kî-û ê ha̍k-seng chiū kā i kóng, Goán chiah-ê í-keng khòaⁿ-kìⁿ Chú lah. Nā-sī To-má kā in kóng, Góa nā bô khòaⁿ-kìⁿ I chhiú-tiong teng ê jiah, bô ēng góa ê chńg-thâu-á thàm I teng ê jiah, bô ēng góa ê chhiú thàm I ê hia̍p-ē, góa koat-toàn m̄ sìn.

26過八日，伊ê學生koh再tī厝內，多馬亦tī-teh。門已經關，耶穌到，khiā tī中央，講，願lín平安。Kè poeh ji̍t, I ê ha̍k-seng koh-chài tī chhù-lāi, To-má ia̍h tī-teh. Mn̂g í-keng koaiⁿ, Iâ-so͘ kàu, khiā tī tiong-ng, kóng, Goān lín pêng-an.

27就kā多馬講，伸你ê指頭á來看我ê手；伸你ê手探我ê hia̍p下；莫得做m̄信ê，tio̍h做信ê。Chiū kā To-má kóng, Chhun lí ê chńg-thâu-á lâi khòaⁿ góa ê chhiú; chhun lí ê chhiú thàm góa ê hia̍p-ē; bo̍h-tit chòe m̄ sìn ê, tio̍h chòe sìn ê.

28多馬應講，我ê主ah，我ê上帝ah。To-má ìn kóng, Góa ê Chú ah, góa ê Siōng-tè ah.

29耶穌kā伊講，你因為看見我chiah信；hiah-ê無看見來信ê人，有福氣。Iâ-so͘ kā i kóng, Lí in-ūi khòaⁿ-kìⁿ góa chiah sìn; hiah ê bô khòaⁿ-kìⁿ lâi sìn ê lâng, ū hok-khì.

30耶穌tī學生ê面前，koh有行chōe-chōe神蹟，無記tī chit本冊ê；Iâ-so͘ tī ha̍k-seng ê bīn-chêng, koh ū kiâⁿ chōe-chōe sîn-jiah, bô kì tī chit pún chheh ê;

31獨獨記chiah-ê，hō͘ lín信耶穌是基督，是上帝ê Kiáⁿ；信，就tī伊ê名得tio̍h活。to̍k-to̍k kì chiah-ê, hō͘ lín sìn Iâ-so͘ sī Ki-tok, sī Siōng-tè ê Kiáⁿ; sìn, chiū tī I ê miâ tit-tio̍h oa̍h.