1主已經知法利賽人聽見耶穌招學生，亦kā in行洗禮，比約翰khah chōe，Chú í-keng chai Hoat-lī-sài lâng thiaⁿ-kìⁿ Iâ-so͘ chio-tio̍h ha̍k-seng, ia̍h kā in kiâⁿ sóe-lé, pí Iok-hān khah chōe,

2(其實耶穌家己無行洗禮，是伊ê學生行伊) ，(kî-si̍t Iâ-so͘ ka-kī bô kiâⁿ sóe-lé, sī I ê ha̍k-seng kiâⁿ i),

3就離開猶太，koh去加利利。chiū lī-khui Iû-thài, koh khì Ka-lī-lī.

4Tio̍h tùi撒馬利亞經過。Tio̍h tùi Sat-má-lī-a keng-kè.

5Tùi án-ni到撒馬利亞一個城，名叫Sū-ka，近雅各hō͘伊ê kiáⁿ約瑟ê地；tī hia有雅各ê水井。Tùi án-ni kàu Sat-má-lī-a chi̍t ê siâⁿ, miâ kiò Sū-ka, kūn Ngá-kok hō͘ i ê kiáⁿ Iok-sek ê tōe; tī hia ū Ngá-kok ê chúi-chíⁿ.

6耶穌行路倦，就án-ni坐tī井邊。Hit時約略日中晝。Iâ-so͘ kiâⁿ lō͘ siān, chiū án-ni chē tī chíⁿ-piⁿ. Hit sî iok-lio̍k ji̍t tiong-tàu.

7有一個撒馬利亞ê婦人人來chhiūⁿ水；耶穌kā伊講，請hō͘我lim。Ū chi̍t ê Sat-má-lī-a ê hū-jîn-lâng lâi chhiūⁿ chúi; Iâ-so͘ kā i kóng, Chhiáⁿ hō͘ góa lim.

8因為伊ê學生已經入城，去買物 thang來食。In-ūi I ê ha̍k-seng í-keng ji̍p siâⁿ, khì bóe mi̍h thang lâi chia̍h.

9撒馬利亞ê婦人人kā伊講，你是猶太人，怎樣tùi我撒馬利亞ê婦人人討水lim ah？是猶太人kap撒馬利亞人無往來。Sat-má-lī-a ê hū-jîn-lâng kā I kóng, Lí sī Iû-thài lâng, cháiⁿ-iūⁿ tùi góa Sat-má-lī-a ê hū-jîn-lâng thó chúi lim ah? Sī Iû-thài lâng kap Sat-má-lī-a lâng bô óng-lâi.

10耶穌應伊講，設使你bat上帝ê恩賜，kap 對你講，hō͘我lim ê，是是誰；你的確求伊，伊就用活水hō͘你。Iâ-so͘ ìn i kóng, Siat-sú lí bat Siōng-tè ê un-sù, kap tùi lí kóng, Hō͘ góa lim ê, sī chī-chūi; lí tek-khak kiû I, I chiū ēng oa̍h chúi hō͘ lí.

11婦人人講，主ah，你無chhiūⁿ水ê器具，井koh深；tùi tá-lo̍h有hit-ê活水ah？Hū-jîn-lâng kóng, Chú ah, lí bô chhiūⁿ chúi ê khì-kū, chíⁿ koh chhim; tùi tá-lo̍h ū hit ê oa̍h chúi ah?

12阮祖雅各留chit-ê井hō͘阮，伊家己kap kiáⁿ兒kap cheng-siⁿ lóng lim chit-ê井ê水，你kiám pí伊khah大mah？Goán chó͘ Ngá-kok lâu chit ê chíⁿ hō͘ goán, i ka-kī kap kiáⁿ-jî kap cheng-siⁿ lóng lim chit ê chíⁿ ê chúi, lí kiám pí i khah tōa mah?

13耶穌應伊講，Lim chit-ê水ê，lóng beh koh嘴乾；獨獨見若lim我所beh hō͘伊ê水ê永遠bōe嘴乾；Iâ-so͘ ìn i kóng, Lim chit ê chúi ê, lóng beh koh chhùi-ta; to̍k-to̍k kìⁿ-nā lim góa só͘ beh hō͘ i ê chúi ê éng-oán bōe chhùi-ta;

14因為我所hō͘伊ê水beh tī伊ê內面成做水泉，直直chhèng起來到永遠活。in-ūi góa só͘ hō͘ i ê chúi beh tī i ê lāi-bīn chiâⁿ-chòe chúi-chôaⁿ, ti̍t-ti̍t chhèng-khí-lâi kàu éng-oán oa̍h.

15婦人人對伊講，主ah，用chit-ê水hō͘我，hō͘我bōe嘴乾，亦免來chiah遠chhiūⁿ。Hū-jîn-lâng tùi I kóng, Chú ah, ēng chit ê chúi hō͘ góa, hō͘ góa bōe chhùi-ta, ia̍h bián lâi chiah hn̄g chhiūⁿ.

16耶穌kā伊講，去叫你ê丈夫chiah koh來。Iâ-so͘ kā i kóng, Khì kiò lí ê tiōng-hu chiah koh lâi.

17婦人人應伊講，我無丈夫。耶穌kā伊講，你講，無丈夫，是tio̍h；Hū-jîn-lâng ìn I kóng, Góa bô tiōng-hu. Iâ-so͘ kā i kóng, Lí kóng, Bô tiōng-hu, sī tio̍h;

18因為你bat有五個丈夫；taⁿ所有ê m̄是你ê丈夫；你ê話真正tio̍h。in-ūi lí bat ū gō͘ ê tiōng-hu; taⁿ só͘ ū ê m̄ sī lí ê tiōng-hu; lí ê ōe chin-chiàⁿ tio̍h.

19婦人人kā伊講，主ah，我看你是先知。Hū-jîn-lâng kā i kóng, Chú ah, góa khòaⁿ lí sī sian-ti.

20阮祖 bat tī chit-ê山敬拜；但是lín講敬拜ê所在應該tī耶路撒冷。Goán chó͘ bat tī chit ê soaⁿ kèng-pài; nā-sī lín kóng kèng-pài ê só͘-chāi eng-kai tī Iâ-lō͘-sat-léng.

21耶穌kā伊講，婦人人ah，tio̍h信我，時beh到lah，lín敬拜父亦無tī chit-ê山，亦無tī耶路撒冷。Iâ-so͘ kā i kóng, Hū-jîn-lâng ah, tio̍h sìn góa, sî beh kàu lah, lín kèng-pài Pē ia̍h bô tī chit ê soaⁿ, ia̍h bô tī Iâ-lō͘-sat-léng.

22Lín敬拜lín所m̄知ê；阮敬拜阮所知ê；因為拯救是tùi猶太人出。Lín kèng-pài lín só͘ m̄ chai ê; goán kèng-pài goán só͘ chai ê; in-ūi chín-kiù sī tùi Iû-thài lâng chhut.

23但是時beh到，現今就是，真實敬拜ê beh用神用真實敬拜父；因為父是ài chit號人敬拜伊。Nā-sī sî beh kàu, hiān-kim chiū-sī, chin-si̍t kèng-pài ê beh ēng sîn ēng chin-si̍t kèng-pài Pē; in-ūi Pē sī ài chit hō lâng kèng-pài I.

24上帝是神；敬拜伊ê人，tio̍h用神用真實來敬拜。Siōng-tè sī Sîn; kèng-pài I ê lâng, tio̍h ēng sîn ēng chin-si̍t lâi kèng-pài.

25婦人人kā伊講，我知彌賽亞teh-beh到；伊若到beh用一切ê事kā阮講。(彌賽亞翻譯就是基督)Hū-jîn-lâng kā I kóng, Góa chai Bí-sài-a teh-beh kàu; I nā kàu beh ēng it-chhè ê sū kā goán kóng. (Bí-sài-a hoan-e̍k chiū-sī Ki-tok).

26耶穌kā伊講，我chit-ê teh kap你講話ê，就是。Iâ-so͘ kā i kóng, Góa chit ê teh kap lí kóng ōe ê, chiū-sī.

27Hit時伊ê學生到；奇怪伊kap婦人人講話；獨獨無人講，你beh甚麼tāi-chì？á是講，你啥事kap婦人人講話？Hit-sî I ê ha̍k-seng kàu; kî-koài I kap hū-jîn-lâng kóng ōe; to̍k-to̍k bô lâng kóng, Lí beh sím-mi̍h tāi-chì? á-sī kóng, Lí siáⁿ-sū kap hū-jîn-lâng kóng ōe?

28婦人人隨時放下伊ê水瓶，入城，kā人講，Hū-jîn-lâng sûi-sî pàng-hē i ê chúi-pân, ji̍p siâⁿ, kā lâng kóng,

29來看一人，我平素行ê事，伊lóng kā我講；chit-ê總無是基督ah？Lâi khòaⁿ chi̍t lâng, góa pêng-sò͘ kiâⁿ ê sū, I lóng kā góa kóng; chit-ê chóng bô sī Ki-tok ah?

30In就出城，來就近耶穌。In chiū chhut siâⁿ, lâi chiū-kūn Iâ-so͘.

31當時學生求伊講，拉比來食。Tng sî ha̍k-seng kiû I kóng, Lia̍p-pí lâi chia̍h.

32但是伊kā in講，我有米糧thang食，lín所m̄知ê。Nā-sī I kā in kóng, Góa ū bí-niû thang chia̍h, lín só͘ m̄ chai ê.

33學生就saⁿ-kap講，Kiám有人hō͘伊食mah？Ha̍k-seng chiū saⁿ-kap kóng, Kiám ū lâng hō͘ I chia̍h mah?

34耶穌kā in講，行差我ê ê旨意，來明白伊ê工，就是我ê米糧。Iâ-so͘ kā in kóng, Kiâⁿ chhe góa ê ê chí-ì, lâi bêng-pe̍k I ê kang, chiū-sī góa ê bí-niû.

35Lín kiám無講，iáu有四月日，就收割ê時到mah？我kā lín講，kia̍h目看園，已經熟，thang割lah。Lín kiám bô kóng, Iáu ū sì ge̍h ji̍t, chiū siu-koah ê sî kàu mah? Góa kā lín kóng, Kia̍h ba̍k khòaⁿ hn̂g, í-keng se̍k, thang koah lah.

36收割ê人得tio̍h工錢，積聚五穀到永活；hō͘掖種ê，收割ê，saⁿ-kap歡喜。Siu-koah ê lâng tit-tio̍h kang-chîⁿ, chek-chū gō͘-kak kàu éng-oa̍h; hō͘ iā-chéng ê, siu-koah ê, saⁿ-kap hoaⁿ-hí.

37因為俗語所講，Chit-ê掖種，hit-ê收割，tùi án-ni真正有影。In-ūi sio̍k-gú só͘ kóng, Chit-ê iā-chéng, hit-ê siu-koah, tùi án-ni chin-chiàⁿ ū iáⁿ.

38我差lín收割lín所無tio̍h磨ê；別人已經tio̍h磨，lín享受in所tio̍h磨ê。Góa chhe lín siu-koah lín só͘ bô tio̍h-bôa ê; pa̍t lâng í-keng tio̍h-bôa, lín hióng-siū in só͘ tio̍h-bôa ê.

39Hit-ê城有撒馬利亞人chōe-chōe信伊，是因為婦人人干證，講，我平素行ê事，伊lóng kā我講。Hit ê siâⁿ ū Sat-má-lī-a lâng chōe-chōe sìn I, sī in-ūi hū-jîn-lâng kan-chèng, kóng, Góa pêng-sò͘ kiâⁿ ê sū, I lóng kā góa kóng.

40Tùi án-ni，撒馬利亞人就近耶穌ê時，求伊kap in tòa；伊就tòa hia兩日。Tùi án-ni, Sat-má-lī-a lâng chiū-kūn Iâ-so͘ ê sî, kiû I kap in tòa; I chiū tòa hia nn̄g ji̍t.

41因為伊ê話來信ê人koh-khah chōe；In-ūi I ê ōe lâi sìn ê lâng koh khah chōe;

42kā婦人人講，阮taⁿ m̄是對你ê話來信；是親身聽見，知伊真正是世間ê救主。kā hū-jîn-lâng kóng, Goán taⁿ m̄ sī tùi lí ê ōe lâi sìn; sī chhin-sin thiaⁿ-kìⁿ, chai I chin-chiàⁿ sī sè-kan ê Kiù-chú.

43過兩日，耶穌離開hia，去加利利。Kè nn̄g ji̍t, Iâ-so͘ lī-khui hia, khì Ka-lī-lī.

44因為耶穌家己干證，講，先知人tī本所在無尊貴。In-ūi Iâ-so͘ ka-kī kan-chèng, kóng, Sian-ti lâng tī pún só͘-chāi bô chun-kùi.

45到加利利ê時，加利利人接納伊，因為bat看伊tī耶路撒冷當節期中所行一切ê tāi-chì；因為in本身亦有去赴節期。Kàu Ka-lī-lī ê sî, Ka-lī-lī lâng chiap-la̍p I, in-ūi bat khòaⁿ I tī Iâ-lō͘-sat-léng tng choeh-kî tiong só͘ kiâⁿ it-chhè ê tāi-chì; in-ūi in pún-sin ia̍h ū khì hù choeh-kî.

46耶穌koh到加利利ê Ka-ná，就是伊用水變酒ê所在。有王ê人臣，伊ê kiáⁿ破病tī迦百農。Iâ-so͘ koh kàu Ka-lī-lī ê Ka-ná, chiū-sī I ēng chúi piàn chiú ê só͘-chāi. Ū ông ê jîn-sîn, i ê kiáⁿ phòa-pīⁿ tī Ka-pek-lông.

47聽見耶穌tùi猶太到加利利，就去就近伊，求伊落去醫治伊ê kiáⁿ；因為teh-beh死lah。Thiaⁿ-kìⁿ Iâ-so͘ tùi Iû-thài kàu Ka-lī-lī, chiū khì chiū-kūn I, kiû I lo̍h-khì i-tī i ê kiáⁿ; in-ūi teh-beh sí lah.

48耶穌對伊講，若無看見神蹟奇事，lín的確m̄信。Iâ-so͘ tùi i kóng, Nā bô khòaⁿ-kìⁿ sîn-jiah kî-sū, lín tek-khak m̄ sìn.

49王ê人臣對伊講，主ah，趁我ê細kiáⁿ iáu-bē死，落來去。Ông ê jîn-sîn tùi I kóng, Chú ah, thàn góa ê sòe-kiáⁿ iáu-bē sí, lo̍h-lâi-khì.

50耶穌kā伊講，去ah，你ê kiáⁿ活lah。Hit人信耶穌kā伊講ê話，就去。Iâ-so͘ kā i kóng, Khì ah, lí ê kiáⁿ oa̍h lah. Hit lâng sìn Iâ-so͘ kā i kóng ê ōe, chiū khì.

51Tú-tú落去ê時，伊ê奴僕kúi-nā人tú-tio̍h伊，kā伊講伊ê kiáⁿ活lah。Tú-tú lo̍h-khì ê sî, i ê lô͘-po̍k kúi-nā lâng tú-tio̍h i, kā i kóng i ê kiáⁿ oa̍h lah.

52就問in，甚麼時chiah khah好？In就kā伊講，昨日晝一點鐘，熱退。Chiū mn̄g in, Sím-mi̍h sî chiah khah hó? In chiū kā i kóng, Chā-ji̍t-tàu chi̍t tiám cheng jia̍t thè.

53老父知hit時tú-tú是耶穌講，你ê kiáⁿ活lah，ê時；伊家己kap全家就lóng信。Lāu-pē chai hit sî tú-tú sī Iâ-so͘ kóng, Lí ê kiáⁿ oa̍h lah, ê sî; i ka-kī kap choân-ke chiū lóng sìn.

54Chit-ê第二pái ê神蹟，是耶穌tùi猶太到加利利以後所行ê。Chit ê tē jī pái ê sîn-jiah, sī Iâ-so͘ tùi Iû-thài kàu Ka-lī-lī í-āu só͘ kiâⁿ ê.

1Chiah-ê事以後，有猶太人ê節期；耶穌上耶路撒冷。Chiah ê sū í-āu, ū Iû-thài lâng ê choeh-kî; Iâ-so͘ chiūⁿ Iâ-lō͘-sat-léng.

2Tī耶路撒冷，近羊門，有池，希伯來ê腔口叫做Pit-sū-tāi，有五個léng廊。Tī Iâ-lō͘-sat-léng, kūn Iûⁿ-mn̂g, ū tî, Hi-pek-lâi ê khiuⁿ-kháu kiò chòe Pit-sū-tāi, ū gō͘ ê léng-lông.

3Hit內面有chhiⁿ-mî ê，跛腳ê，血枯焦ê，chōe-chōe病人倒teh。Hit lāi-bīn ū chhiⁿ-mî ê, pái-kha ê, huih ko͘-tâ ê, chōe-chōe pīⁿ lâng tó-teh.

5Tī hia有一人，破病三十八年。Tī hia ū chi̍t lâng, phòa-pīⁿ saⁿ-cha̍p-poeh nî.

6耶穌看見伊倒teh，知伊ê病已經久，kā伊講，你ài得tio̍h好mah？Iâ-so͘ khòaⁿ-kìⁿ i tó-teh, chai i ê pīⁿ í-keng kú, kā i kóng, Lí ài tit-tio̍h hó mah?

7破病ê人應伊講，主ah，水振動ê時，無人thang扶我落池；到我來ê時，別人事先我落去lah。Phòa-pīⁿ ê lâng ìn I kóng, Chú ah, chúi tín-tāng ê sî, bô lâng thang hû góa lo̍h tî; kàu góa lâi ê sî, pa̍t lâng tāi-seng góa lo̍h-khì lah.

8耶穌kā伊講，起來，giâ你ê舖á去行。Iâ-so͘ kā i kóng, Khí-lâi, giâ lí ê pho͘-á khì kiâⁿ.

9Hit人即時好，就giâ伊ê舖á去行。Hit lâng chek-sî hó, chiū giâ i ê pho͘-á khì kiâⁿ.

10Hit日是安歇日，猶太人就kā得tio̍h醫好ê人講，今á日是安歇日，你giâ舖á是m̄合宜。Hit ji̍t sī an-hioh-ji̍t, Iû-thài lâng chiū kā tit-tio̍h i-hó ê lâng kóng, kin-á-ji̍t sī an-hioh-ji̍t, lí giâ pho͘-á sī m̄ ha̍p-gî.

11但是伊應講，Hit-ê醫好我ê kā我講，Giâ你ê舖á來行。Nā-sī i ìn kóng, Hit-ê i-hó góa ê kā góa kóng, Giâ lí ê pho͘-á lâi kiâⁿ.

12In問伊，講，Kā你講，Giâ舖á來行ê，是甚麼人？In mn̄g i, kóng, Kā lí kóng, Giâ pho͘-á lâi kiâⁿ ê, sī sím-mi̍h lâng?

13得tio̍h好ê人m̄知伊是是誰；因為耶穌已經去別位，是hit所在ê人chōe。Tit-tio̍h hó ê lâng m̄ chai I sī chī-chūi; in-ūi Iâ-so͘ í-keng khì pa̍t ūi, sī hit só͘-chāi ê lâng chōe.

14後來耶穌tī殿裡tú-tio̍h伊，就kā伊講，你已經得tio̍h好；莫得koh犯罪，驚了你tú-tio̍h koh-khah慘。Āu-lâi Iâ-so͘ tī tiān-ni̍h tú-tio̍h i, chiū kā i kóng, Lí í-keng tit-tio̍h hó; bo̍h-tit koh hoān-chōe, kiaⁿ-liáu lí tú-tio̍h koh khah chhám.

15Hit人就去kā猶太人講，醫好伊ê就是耶穌。Hit lâng chiū khì kā Iû-thài lâng kóng, i-hó i ê chiū-sī Iâ-so͘.

16所以猶太人khún-tio̍k耶穌，因為伊tī安歇日做chiah-ê tāi-chì。Só͘-í Iû-thài lâng khún-tio̍k Iâ-so͘, in-ūi I tī an-hioh-ji̍t chòe chiah ê tāi-chì.

17耶穌應講，我ê父行tāi-chì到taⁿ，我亦行tāi-chì。Iâ-so͘ ìn kóng, Góa ê Pē kiâⁿ tāi-chì kàu taⁿ, góa ia̍h kiâⁿ tāi-chì.

18所以猶太人益發beh thâi伊，因為伊m̄若患tio̍h安歇日，koh講上帝做伊ê父，將本身算做kap上帝平。Só͘-í Iû-thài lâng it-hoat beh thâi I, in-ūi I m̄ nā hoān-tio̍h an-hioh-ji̍t, koh kóng Siōng-tè chòe I ê Pē, chiong pún-sin sǹg chòe kap Siōng-tè pîⁿ.

19耶穌就應講，我實實kā lín講，Kiáⁿ若m̄是看見父行ê，就家己bōe行甚麼；因為見若父所行ê，Kiáⁿ亦照án-ni行。Iâ-so͘ chiū ìn kóng, Góa si̍t-si̍t kā lín kóng, Kiáⁿ nā m̄ sī khòaⁿ-kìⁿ Pē kiâⁿ ê, chiū ka-kī bōe kiâⁿ sím-mi̍h; in-ūi kìⁿ-nā Pē só͘ kiâⁿ ê, Kiáⁿ ia̍h chiàu án-ni kiâⁿ.

20因為父疼Kiáⁿ，將本身所行ê lóng總hō͘伊看；亦beh將比chiah-ê khah大ê所行hō͘伊看，致到lín奇怪。In-ūi Pē thiàⁿ Kiáⁿ, chiong pún-sin só͘ kiâⁿ ê lóng-chóng hō͘ I khòaⁿ; ia̍h beh chiong pí chiah-ê khah tōa ê só͘ kiâⁿ hō͘ I khòaⁿ, tì-kàu lín kî-koài.

21因為親像父hō͘死人起來，koh hō͘ in活，Kiáⁿ亦是án-ni hō͘伊所ài ê人koh活。In-ūi chhin-chhiūⁿ Pē hō͘ sí-lâng khí-lâi, koh hō͘ in oa̍h, Kiáⁿ ia̍h sī án-ni hō͘ I só͘ ài ê lâng koh oa̍h.

22因為父亦無審判人，獨獨用審判ê事lóng交代Kiáⁿ；beh hō͘眾人lóng尊敬Kiáⁿ，親像尊敬父。In-ūi Pē ia̍h bô sím-phòaⁿ lâng, to̍k-to̍k ēng sím-phòaⁿ ê sū lóng kau-tāi Kiáⁿ; beh hō͘ chèng lâng lóng chun-kèng Kiáⁿ, chhin-chhiūⁿ chun-kèng Pē.

23無尊敬Kiáⁿ ê人，就是無尊敬差伊ê父。Bô chun-kèng Kiáⁿ ê lâng, chiū-sī bô chun-kèng chhe I ê Pē.

24我實實kā lín講，聽我ê話，亦信差我ê，就有永活，bōe到受審判，是已經出死入活lah。Góa si̍t-si̍t kā lín kóng, Thiaⁿ góa ê ōe, ia̍h sìn chhe góa ê, chiū ū éng-oa̍h, bōe kàu siū sím-phòaⁿ, sī í-keng chhut sí ji̍p oa̍h lah.

25我實實kā lín講，時beh到，現在就是lah，死人teh-beh聽見上帝ê kiáⁿ ê聲，也聽見ê人teh-beh活。Góa si̍t-si̍t kā lín kóng, Sî beh kàu, hiān-chāi chiū-sī lah, sí-lâng teh-beh thiaⁿ-kìⁿ Siōng-tè ê Kiáⁿ ê siaⁿ, iā thiaⁿ-kìⁿ ê lâng teh-beh oa̍h.

26因為親像父tī本身有活命，伊亦是án-ni hō͘ Kiáⁿ tī本身有活命；In-ūi chhin-chhiūⁿ Pē tī pún-sin ū oa̍h-miā, I ia̍h sī án-ni hō͘ Kiáⁿ tī pún-sin ū oa̍h-miā;

27koh hō͘伊有權thang審判，因為伊是做人子。koh hō͘ I ū koân thang sím-phòaⁿ, in-ūi I sī chòe Jîn-chú.

28莫得掠chit-ê做奇怪；因為時beh到，見若tī墓內ê beh聽伊ê聲，chiah出來；Bo̍h-tit lia̍h chit-ê chòe kî-koài; in-ūi sî beh kàu, kìⁿ-nā tī bōng-lāi ê beh thiaⁿ I ê siaⁿ, chiah chhut-lâi;

29行好ê koh起來，得tio̍h活；行pháiⁿ ê koh起來，受審判。kiâⁿ hó ê koh khí-lâi, tit-tio̍h oa̍h; kiâⁿ pháiⁿ ê koh khí-lâi, siū sím-phòaⁿ.

30我家己bōe做甚麼；我照所聽見來審判；我ê審判亦是公義；因為我無求家己ê意思，就是求差我ê ê意思。Góa ka-kī bōe chòe sím-mi̍h; góa chiàu só͘ thiaⁿ-kìⁿ lâi sím-phòaⁿ; góa ê sím-phòaⁿ ia̍h sī kong-gī; in-ūi góa bô kiû ka-kī ê ì-sù, chiū-sī kiû chhe góa ê ê ì-sù.

31我若為tio̍h家己做干證，我ê干證就無真。Góa nā ūi-tio̍h ka-kī chòe kan-chèng, góa ê kan-chèng chiū bô chin.

32iáu有為tio̍h我做干證ê；我知伊所為tio̍h我做干證ê是真。Iáu ū ūi-tio̍h góa chòe kan-chèng ê; góa chai I só͘ ūi-tio̍h góa chòe kan-chèng ê sī chin.

33Lín bat差人就近約翰，伊有為tio̍h真理做干證。Lín bat chhe lâng chiū-kūn Iok-hān, i ū ūi-tio̍h chin-lí chòe kan-chèng.

34但是我所受ê干證，m̄是tùi人；獨獨我講chiah-ê，是beh hō͘ lín得tio̍h救。Nā-sī góa só͘ siū ê kan-chèng , m̄ sī tùi lâng; to̍k-to̍k góa kóng chiah-ê, sī beh hō͘ lín tit-tio̍h kiù.

35約翰就是燈，點to̍h koh光；lín情願暫時歡喜伊ê光。Iok-hān chiū-sī teng, tiám to̍h koh kng; lín chêng-goān chiām-sî hoaⁿ-hí i ê kng.

36總是我有干證，比約翰ê khah大；因為父所交代我來成ê事，就是我所行chiah-ê事，干證我是父所差ê。Chóng-sī góa ū kan-chèng, pí Iok-hān ê khah tōa; in-ūi Pē só͘ kau-tāi góa lâi chiâⁿ ê sū, chiū-sī góa só͘ kiâⁿ chiah ê sū, kan-chèng góa sī Pē só͘ chhe ê.

37差我ê父，伊ia̍h bat為tio̍h我做干證。Lín從來m̄-bat聽見伊ê聲，亦m̄-bat看見伊ê形象。Chhe góa ê Pē, I ia̍h bat ūi-tio̍h góa chòe kan-chèng. Lín chiông-lâi m̄ bat thiaⁿ-kìⁿ I ê siaⁿ, ia̍h m̄ bat khòaⁿ-kìⁿ I ê hêng-siōng.

38Koh lín無伊ê道理船tī lín，因為伊所差ê，lín m̄信伊。Koh lín bô I ê tō-lí chûn tī lín, in-ūi I só͘ chhe ê, lín m̄ sìn I.

39Lín講究chiah-ê聖經，因為phah算hit中間lín有永活；亦為tio̍h我做干證ê，就是chiah-ê聖經；Lín káng-kiù chiah ê sèng-keng, in-ūi phah-sǹg hit tiong-kan lín ū éng-oa̍h; ia̍h ūi-tio̍h góa chòe kan-chèng ê, chiū-sī chiah ê sèng-keng;

40lín又無beh就近我來得tio̍h活。lín iū bô beh chiū-kūn góa lâi tit-tio̍h oa̍h.

41我無tùi人受榮光。Góa bô tùi lâng siū êng-kng.

42總是我知lín無有上帝ê疼tī lín ê心。Chóng-sī góa chai lín bô ū Siōng-tè ê thiàⁿ tī lín ê sim.

43我tī我ê父ê名來，lín m̄接納我；若有別人tī家己ê名來，lín beh接納伊。Góa tī góa ê Pē ê miâ lâi, lín m̄ chiap-la̍p góa; nā ū pa̍t lâng tī ka-kī ê miâ lâi, lín beh chiap-la̍p i.

44Lín大家相仝求榮光，m̄求tùi獨一ê上帝來ê榮光；怎樣會信？Lín tāi-ke saⁿ-kāng kiû êng-kng, m̄ kiû tùi to̍k-it ê Siōng-tè lâi ê êng-kng; cháiⁿ-iūⁿ ōe sìn?

45莫得phah算我beh tùi父告lín；有teh告lín ê，就是lín所óa靠ê摩西。Bo̍h-tit phah-sǹg góa beh tùi Pē kò lín; ū teh kò lín ê, chiū-sī lín só͘ óa-khò ê Mô͘-se.

46Lín若信摩西，亦beh信我，因為伊所寫ê有論我。Lín nā sìn Mô͘-se, ia̍h beh sìn góa, in-ūi i só͘ siá ê ū lūn góa.

47Lín若m̄信伊ê冊，thài ōe信我ê話ah？Lín nā m̄ sìn i ê chheh, thái ōe sìn góa ê ōe ah?

1Chiah-ê事以後，耶穌過去加利利海hit-pêng，就是Thê-pì-lí-a海。Chiah ê sū í-āu, Iâ-so͘ kè-khì Ka-lī-lī hái hit pêng, chiū-sī Thê-pì-lí-a hái.

2有chōe-chōe人tè伊，是因為看見伊所行tī病人ê神蹟。Ū chōe-chōe lâng tè I, sī in-ūi khòaⁿ-kìⁿ I só͘ kiâⁿ tī pīⁿ lâng ê sîn-jiah.

3耶穌上山，kap伊ê學生坐tī hia。Iâ-so͘ chiūⁿ soaⁿ, kap I ê ha̍k-seng chē tī hia.

4Pôaⁿ過節，就是猶太人ê節，近lah。Pôaⁿ-kè-choeh, chiū-sī Iû-thài lâng ê choeh, kūn lah.

5耶穌kia̍h目看見chōe-chōe人就近伊，就kā腓力講，咱beh tùi tá-lo̍h買餅來hō͘ chiah-ê人食ah？Iâ-so͘ kia̍h ba̍k khòaⁿ-kìⁿ chōe-chōe lâng chiū-kūn I, chiū kā Hui-le̍k kóng, Lán beh tùi tá-lo̍h bóe piáⁿ lâi hō͘ chiah ê lâng chia̍h ah?

6伊講chit-ê是teh試伊；因為伊家己知所beh行ê。I kóng chit-ê sī teh chhì i; in-ūi I ka-kī chai só͘ beh kiâⁿ ê.

7腓力應伊講，用兩百ê銀á來買餅，亦無夠額hō͘ in ta̍k人得tio̍h淡薄。Hui-le̍k ìn I kóng, Ēng nn̄g pah ê gûn-á lâi bóe piáⁿ, ia̍h bô kàu-gia̍h hō͘ in ta̍k lâng tit-tio̍h tām-po̍h.

8伊ê學生中一人，就是西門彼得ê兄弟，安得烈，kā伊講，I ê ha̍k-seng tiong chi̍t lâng, chiū-sī Se-bûn Pí-tek ê hiaⁿ-tī, An-tek-lia̍t, kā I kóng,

9Tī chia一個gín-ná有五個大麥餅、兩尾魚；總是將chiah-ê hō͘ hiah chōe人，有夠tá-lo̍h？Tī chia chi̍t ê gín-ná ū gō͘ ê tōa-be̍h piáⁿ, nn̄g bé hî; chóng-sī chiong chiah-ê hō͘ hiah chōe lâng, ū kàu tá-lo̍h?

10耶穌講，Lín kah hiah-ê人坐teh。Hit所在chōe-chōe草。人就lóng坐，數額約略五千。Iâ-so͘ kóng, Lín kah hiah ê lâng chē-teh. Hit só͘-chāi chōe-chōe chháu. Lâng chiū lóng chē, siàu-gia̍h iok-lio̍k gō͘ chheng.

11耶穌the̍h hiah-ê餅；祝謝了後，就分hō͘坐ê人；魚亦是án-ni，lóng照in所ài。Iâ-so͘ the̍h hiah ê piáⁿ; chiok-siā liáu-āu, chiū pun hō͘ chē ê lâng; hî ia̍h sī án-ni, lóng chiàu in só͘ ài.

12In已經食飽，耶穌kā伊ê學生講，拾所食chhun ê屑á，免得有phah-sńg，In í-keng chia̍h pá, Iâ-so͘ kā I ê ha̍k-seng kóng, Khioh só͘ chia̍h chhun ê sut-á, bián-tit ū phah-sńg,

13就將所食chhun五個大麥餅ê餅碎，拾滿十二筐。Chiū chiong só͘ chia̍h chhun gō͘ ê tōa-be̍h piáⁿ ê piáⁿ-chhùi, khioh móa cha̍p-jī kheng.

14Hiah-ê人看見伊所行ê神蹟，就講，Chit-ê真正是所beh來世間ê先知。Hiah ê lâng khòaⁿ-kìⁿ I só͘ kiâⁿ ê sîn-jiah, chiū kóng, Chit-ê chin-chiàⁿ sī só͘ beh lâi sè-kan ê sian-ti.

15耶穌知眾人beh來，ài硬掠伊，hō͘伊做王，就koh退去入山，只有伊家己tī hia。Iâ-so͘ chai chèng lâng beh lâi, ài ngī-lia̍h I, hō͘ I chòe ông, chiū koh thè-khì ji̍p soaⁿ, chí-ū I ka-kī tī hia.

16黃昏暗，伊ê學生落去到海邊；Hông-hun àm, I ê ha̍k-seng lo̍h-khì kàu hái-piⁿ;

17上船，beh過海去迦百農。已經暗，耶穌iáu-bē到。chiūⁿ chûn, beh kè hái khì Ka-pek-lông. Í-keng àm, Iâ-so͘ iáu-bē kàu.

18因為風真thàu，海湧就ná大。In-ūi hong chin thàu, hái-éng chiū ná tōa.

19Tùi án-ni學生告船，約略行八里，á十里，看見耶穌行海面，ná óa近船，就驚。Tùi án-ni ha̍k-seng kò chûn, iok-lio̍k kiâⁿ poeh lí, á cha̍p lí, khòaⁿ-kìⁿ Iâ-so͘ kiâⁿ hái-bīn, ná óa-kūn chûn, chiū kiaⁿ.

20但是耶穌對in講，是我，免驚。Nā-sī Iâ-so͘ tùi in kóng, Sī góa, bián kiaⁿ.

21學生就歡喜chih接伊上船；船liâm-piⁿ到in所beh去ê所在。Ha̍k-seng chiū hoaⁿ-hí chih-chiap I chiūⁿ chûn; chûn liâm-piⁿ kàu in só͘ beh khì ê só͘-chāi.

22隔日，khiā tī海hit-pêng岸ê眾人，看見hit位無別隻船á，只有一隻nā-tiāⁿ，koh耶穌無kap伊ê學生搭hit隻船，只有學生家己去；Keh ji̍t, khiā tī hái hit pêng hōaⁿ ê chèng lâng, khòaⁿ-kìⁿ hit ūi bô pa̍t chiah chûn-á, chí-ū chi̍t chiah nā-tiāⁿ, koh Iâ-so͘ bô kap I ê ha̍k-seng tah hit chiah chûn, chí-ū ha̍k-seng ka-kī khì;

23(總是有幾隻船á tùi Th ê-pì-lí-a來，到近tī主祝謝了後眾人食餅ê所在) ；(chóng-sī ū kúi chiah chûn-á tùi Thê-pì-lí-a lâi, kàu kūn tī Chú chiok-siā liáu-āu chèng lâng chia̍h piáⁿ ê só͘-chāi);

24眾人看見耶穌kap伊ê學生lóng無tī hia，就搭hit幾隻船á，到迦百農chhē耶穌。chèng lâng khòaⁿ-kìⁿ Iâ-so͘ kap I ê ha̍k-seng lóng bô tī hia, chiū tah hit kúi chiah chûn-á, kàu Ka-pek-lông chhē Iâ-so͘.

25已經tú-tio̍h伊tī海ê hit-pêng岸，就kā伊講，拉比，你甚麼時到chia？Í-keng tú-tio̍h I tī hái ê hit pêng hōaⁿ, chiū kā I kóng, Lia̍p-pí, lí sím-mi̍h sî kàu chia?

26耶穌應講，我實實kā lín講，Lín chiah-ê chhē我，m̄是因為看見神蹟，是因為食餅到飽nā-tiāⁿ。Iâ-so͘ ìn kóng, Góa si̍t-si̍t kā lín kóng, Lín chiah-ê chhē góa, m̄ sī in-ūi khòaⁿ-kìⁿ sîn-jiah, sī in-ūi chia̍h piáⁿ kàu pá nā-tiāⁿ.

27莫得為tio̍h會敗壞ê米糧來tio̍h磨，tio̍h為tio̍h長長tī-teh永活ê米糧來tio̍h磨，就是人子所beh hō͘ lín ê；因為伊是父上帝所蓋印ê。Bo̍h-tit ūi-tio̍h ōe pāi-hoāi ê bí-niû lâi tio̍h-bôa, tio̍h ūi-tio̍h tn̂g-tn̂g tī-teh éng-oa̍h ê bí-niû lâi tio̍h-bôa, chiū-sī Jîn-chú só͘ beh hō͘ lín ê; in-ūi I sī Pē Siōng-tè só͘ khàm-ìn ê.

28In就對伊講，阮tio̍h怎樣行，來做上帝ê工？In chiū tùi I kóng, Goán tio̍h cháiⁿ-iūⁿ kiâⁿ, lâi chòe Siōng-tè ê kang?

29耶穌應講，信伊所差ê，chit-ê就是上帝ê工。Iâ-so͘ ìn kóng, Sìn I só͘ chhe ê, chit-ê chiū-sī Siōng-tè ê kang.

30In kā伊講，你行甚麼神蹟，hō͘阮看，來信你ah？你行甚麼ah？In kā I kóng, Lí kiâⁿ sím-mi̍h sîn-jiah, hō͘ goán khòaⁿ, lâi sìn lí ah? Lí kiâⁿ sím-mi̍h ah?

31阮ê祖tī曠野食má-ná；照所記載講，用tùi天來ê餅hō͘ in食。Goán ê chó͘ tī khòng-iá chia̍h má-ná; chiàu só͘ kì-chài kóng, Ēng tùi thiⁿ lâi ê piáⁿ hō͘ in chia̍h.

32耶穌kā in講，我實實kā lín講，m̄是摩西用tùi天來ê餅hō͘ lín，就是我ê父用tùi天來ê真餅hō͘ lín。Iâ-so͘ kā in kóng, Góa si̍t-si̍t kā lín kóng, M̄ sī Mô͘-se ēng tùi thiⁿ lâi ê piáⁿ hō͘ lín, chiū-sī góa ê Pē ēng tùi thiⁿ lâi ê chin piáⁿ hō͘ lín.

33因為上帝ê餅，就是hit-ê tùi天落來，也用活命賞賜世間ê。In-ūi Siōng-tè ê piáⁿ, chiū-sī hit ê tùi thiⁿ lo̍h-lâi, iā ēng oa̍h-miā siúⁿ-sù sè-kan ê.

34In就對伊講，主ah，常常用chit號餅hō͘阮。In chiū tùi I kóng, Chú ah, siông-siông ēng chit hō piáⁿ hō͘ goán.

35耶穌kā in講，我就是活命ê餅；就近我ê人決斷bōe iau，信我ê人永永bōe嘴乾。Iâ-so͘ kā in kóng, Góa chiū-sī oa̍h-miā ê piáⁿ; chiū-kūn góa ê lâng koat-toàn bōe iau, sìn góa ê lâng éng-éng bōe chhùi-ta.

36但是我bat kā lín講，Lín已經看見我，亦猶原m̄信。Nā-sī góa bat kā lín kóng, Lín í-keng khòaⁿ-kìⁿ góa, ia̍h iû-goân m̄ sìn.

37見若父所hō͘我ê，beh lóng就近我；就近我ê人，我決斷無棄sak伊。Kìⁿ-nā Pē só͘ hō͘ góa ê, beh lóng chiū-kūn góa; chiū-kūn góa ê lâng, góa koat-toàn bô khì-sak i.

38因為我tùi天降落m̄是行家己ê旨意，就是行差我ê ê旨意。In-ūi góa tùi thiⁿ kàng-lo̍h m̄ sī kiâⁿ ka-kī ê chí-ì, chiū-sī kiâⁿ chhe góa ê ê chí-ì.

39Taⁿ差我ê ê旨意，就是見若伊所hō͘我ê，我無失落一個，是tī末日hō͘伊koh活。Taⁿ chhe góa ê ê chí-ì, chiū-sī kìⁿ-nā I só͘ hō͘ góa ê, góa bô sit-lo̍h chi̍t-ê, sī tī boa̍t-ji̍t hō͘ i koh-oa̍h.

40因為我ê父ê旨意就是見若看見Kiáⁿ來信伊ê人，lóng有永活；也我tī末日hō͘伊koh活。In-ūi góa ê Pē ê chí-ì chiū-sī kìⁿ-nā khòaⁿ-kìⁿ Kiáⁿ lâi sìn I ê lâng, lóng ū éng-oa̍h; iā góa tī boa̍t-ji̍t hō͘ i koh-oa̍h.

41猶太人因為耶穌講，我是tùi天降落ê餅，就nga̍uh-nga̍uh念伊，講，Iû-thài lâng in-ūi Iâ-so͘ kóng, Góa sī tùi thiⁿ kàng-lo̍h ê piáⁿ, chiū nga̍uh-nga̍uh-liām I, kóng,

42Chit-ê kiám m̄是約瑟ê kiáⁿ耶穌mah？伊ê父母是咱所bat ê。Taⁿ怎樣講，我是tùi天降落ah？Chit-ê kiám m̄ sī Iok-sek ê kiáⁿ Iâ-so͘ mah? I ê pē-bú sī lán só͘ bat ê. Taⁿ cháiⁿ-iūⁿ kóng, Góa sī tùi thiⁿ kàng-lo̍h ah?

43耶穌應講，Lín莫得án-ni nga̍uh-nga̍uh念。Iâ-so͘ ìn kóng, Lín bo̍h-tit án-ni nga̍uh-nga̍uh-liām.

44若m̄是差我ê父引chhōa伊，就無人會就近我；就近我ê，我tī末日beh hō͘伊koh活。Nā m̄ sī chhe góa ê Pē ín-chhōa i, chiū bô lâng ōe chiū-kūn góa; chiū-kūn góa ê, góa tī boa̍t-ji̍t beh hō͘ i koh-oa̍h.

45Tī chiah-ê先知有記載講，Iⁿ lóng beh hō͘上帝教in。見若tùi父聽見來學ê人，就就近我。Tī chiah ê sian-ti ū kì-chài kóng, In lóng beh hō͘ Siōng-tè kà in. Kìⁿ-nā tùi Pē thiaⁿ-kìⁿ lâi o̍h ê lâng, chiū chiū-kūn góa.

46這m̄是講有人bat看見父，只有tùi上帝來ê，伊bat看見父。Che m̄ sī kóng ū lâng bat khòaⁿ-kìⁿ Pē, chí ū tùi Siōng-tè lâi ê, I bat khòaⁿ-kìⁿ Pē.

47我實實kā lín講，信ê人有永活。Góa si̍t-si̍t kā lín kóng, Sìn ê lâng ū éng-oa̍h.

48我是活命ê餅。Góa sī oa̍h-miā ê piáⁿ.

49Lín ê祖tī曠野食má-ná，in亦死。Lín ê chó͘ tī khòng-iá chia̍h má-ná, in ia̍h sí.

50Chit-ê就是tùi天降落ê餅，hō͘人食ê，也bōe死。Chit-ê chiū-sī tùi thiⁿ kàng-lo̍h ê piáⁿ, hō͘ lâng chia̍h ê, iā bōe sí.

51我是活ê餅，tùi天降落ê；人若食chit-ê餅，就活到永世代；koh我所beh hō͘人ê餅，就是我ê肉為tio̍h世間ê活命chiah賞賜ê。Góa sī oa̍h ê piáⁿ, tùi thiⁿ kàng-lo̍h ê; lâng nā chia̍h chit ê piáⁿ, chiū oa̍h kàu éng sè-tāi; koh góa só͘ beh hō͘ lâng ê piáⁿ, chiū-sī góa ê bah ūi-tio̍h sè-kan ê oa̍h-miā chiah siúⁿ-sù ê.

52Tùi án-ni猶太人相爭，講，Chit人thài會用伊ê肉hō͘咱食？Tùi án-ni Iû-thài lâng saⁿ-chiⁿ, kóng, Chit lâng thái ōe ēng I ê bah hō͘ lán chia̍h?

53耶穌就kā in講，我實實kā lín講，Lín若無食人子ê肉，無lim伊ê血，就lín ê內面無活。Iâ-so͘ chiū kā in kóng, Góa si̍t-si̍t kā lín kóng, Lín nā bô chia̍h Jîn-chú ê bah, bô lim I ê huih, chiū lín ê lāi-bīn bô oa̍h.

54食我ê肉，lim我ê血ê人有永活；末日我beh hō͘伊koh活。Chia̍h góa ê bah, lim góa ê huih ê lâng ū éng-oa̍h; boa̍t-ji̍t góa beh hō͘ i koh-oa̍h.

55我ê肉是真ê食物，我ê血是真實thang lim ê。Góa ê bah sī chin ê chia̍h-mi̍h, góa ê huih sī chin-si̍t thang lim ê.

56食我ê肉，lim我ê血ê人，伊tiàm-tī我，我亦tiàm-tī伊。Chia̍h góa ê bah, lim góa ê huih ê lâng, i tiàm-tī góa, góa ia̍h tiàm-tī i.

57親像活ê父差我，koh我tùi父來活；食我ê，beh tùi我來活，亦是án-ni。Chhin-chhiūⁿ oa̍h ê Pē chhe góa, koh góa tùi Pē lâi oa̍h; chia̍h góa ê, beh tùi góa lâi oa̍h, ia̍h sī án-ni.

58這就是tùi天降落ê餅；m̄是親像列祖ê食má-ná，也死去；食chit-ê餅ê人，beh活到永世代。Che chiū-sī tùi thiⁿ kàng-lo̍h ê piáⁿ; m̄ sī chhin-chhiūⁿ lia̍t-chó͘ ê chia̍h má-ná, iā sí-khì; chia̍h chit ê piáⁿ ê lâng, beh oa̍h kàu éng sè-tāi.

59Chiah-ê話是耶穌tiàm-tī迦百農會堂來教示人ê時所講ê。Chiah ê ōe sī Iâ-so͘ tiàm tī Ka-pek-lông hōe-tn̂g lâi kà-sī lâng ê sî só͘ kóng ê.

60伊ê學生中chōe-chōe人聽了就講，Chit-ê話真oh；是誰會聽伊？I ê ha̍k-seng tiong chōe-chōe lâng thiaⁿ-liáu chiū kóng, Chit ê ōe chin oh; chī-chūi ōe thiaⁿ i?

61耶穌心內知伊ê學生因為chit-ê nga̍uh-nga̍uh念，就kā in講，chit-ê是塞礙tio̍h lín mah？Iâ-so͘ sim-lāi chai I ê ha̍k-seng in-ūi chit-ê nga̍uh-nga̍uh-liām, chiū kā in kóng, Chit-ê sī that-gāi-tio̍h lín mah?

62設使lín看見人子上到伊原本ê所在裡？Siat-sú lín khòaⁿ-kìⁿ Jîn-chú chiūⁿ kàu i goân-pún ê só͘-chāi ni̍h?

63hō͘人活ê就是神：肉體就無利益；我所kā lín講ê話是神，是活命。Hō͘ lâng oa̍h ê chiū-sī Sîn: jio̍k-thé chiū bô lī-ek; góa só͘ kā lín kóng ê ōe sī sîn, sī oa̍h-miā.

64但是lín中間有m̄信ê人lah。因為耶穌tùi起頭就知是誰 m̄信伊，是誰 beh賣伊。Nā-sī lín tiong-kan ū m̄ sìn ê lâng lah. In-ūi Iâ-so͘ tùi khí-thâu chiū chai chī-chūi m̄ sìn I, chī-chūi beh bōe I.

65Koh講，因為án-ni，我bat kā lín講，若m̄是tùi父hō͘伊，無人會就近我。Koh kóng, In-ūi án-ni, góa bat kā lín kóng, nā m̄ sī tùi Pē hō͘ i, bô lâng ōe chiū-kūn góa.

66Tùi án-ni伊ê學生chōe-chōe退去，無koh kap伊行。Tùi án-ni I ê ha̍k-seng chōe-chōe thè-khì, bô koh kap I kiâⁿ.

67耶穌就kā十二個學生講，Lín亦beh去mah？Iâ-so͘ chiū kā cha̍p-jī ê ha̍k-seng kóng, Lín ia̍h beh khì mah?

68西門彼得應伊講，主ah，你有永活ê話，阮beh去chhē 是誰 ah？Se-bûn Pí-tek ìn I kóng, Chú ah, lí ū éng-oa̍h ê ōe, goán beh khì chhē chī-chūi ah?

69阮已經信，koh知你是上帝ê聖ê。Goán í-keng sìn, koh chai lí sī Siōng-tè ê Sèng-ê.

70耶穌應講，我kiám m̄是揀lín十二人，亦lín中間一個是魔鬼ah？Iâ-so͘ ìn kóng, Góa kiám m̄ sī kéng lín cha̍p-jī lâng, ia̍h lín tiong-kan chi̍t-ê sī mô͘-kúi ah?

71伊講án-ni是指加略人西門ê kiáⁿ猶大，因為伊是十二學生ê一個teh-beh賣伊ê。I kóng án-ni sī chí Ka-lio̍k lâng Se-bûn ê kiáⁿ Iû-tāi, in-ūi i sī cha̍p-jī ha̍k-seng ê chi̍t-ê teh-beh bōe I ê.