1Chiah-ê事以後，耶穌過去加利利海hit-pêng，就是Thê-pì-lí-a海。Chiah ê sū í-āu, Iâ-so͘ kè-khì Ka-lī-lī hái hit pêng, chiū-sī Thê-pì-lí-a hái.

2有chōe-chōe人tè伊，是因為看見伊所行tī病人ê神蹟。Ū chōe-chōe lâng tè I, sī in-ūi khòaⁿ-kìⁿ I só͘ kiâⁿ tī pīⁿ lâng ê sîn-jiah.

3耶穌上山，kap伊ê學生坐tī hia。Iâ-so͘ chiūⁿ soaⁿ, kap I ê ha̍k-seng chē tī hia.

4Pôaⁿ過節，就是猶太人ê節，近lah。Pôaⁿ-kè-choeh, chiū-sī Iû-thài lâng ê choeh, kūn lah.

5耶穌kia̍h目看見chōe-chōe人就近伊，就kā腓力講，咱beh tùi tá-lo̍h買餅來hō͘ chiah-ê人食ah？Iâ-so͘ kia̍h ba̍k khòaⁿ-kìⁿ chōe-chōe lâng chiū-kūn I, chiū kā Hui-le̍k kóng, Lán beh tùi tá-lo̍h bóe piáⁿ lâi hō͘ chiah ê lâng chia̍h ah?

6伊講chit-ê是teh試伊；因為伊家己知所beh行ê。I kóng chit-ê sī teh chhì i; in-ūi I ka-kī chai só͘ beh kiâⁿ ê.

7腓力應伊講，用兩百ê銀á來買餅，亦無夠額hō͘ in ta̍k人得tio̍h淡薄。Hui-le̍k ìn I kóng, Ēng nn̄g pah ê gûn-á lâi bóe piáⁿ, ia̍h bô kàu-gia̍h hō͘ in ta̍k lâng tit-tio̍h tām-po̍h.

8伊ê學生中一人，就是西門彼得ê兄弟，安得烈，kā伊講，I ê ha̍k-seng tiong chi̍t lâng, chiū-sī Se-bûn Pí-tek ê hiaⁿ-tī, An-tek-lia̍t, kā I kóng,

9Tī chia一個gín-ná有五個大麥餅、兩尾魚；總是將chiah-ê hō͘ hiah chōe人，有夠tá-lo̍h？Tī chia chi̍t ê gín-ná ū gō͘ ê tōa-be̍h piáⁿ, nn̄g bé hî; chóng-sī chiong chiah-ê hō͘ hiah chōe lâng, ū kàu tá-lo̍h?

10耶穌講，Lín kah hiah-ê人坐teh。Hit所在chōe-chōe草。人就lóng坐，數額約略五千。Iâ-so͘ kóng, Lín kah hiah ê lâng chē-teh. Hit só͘-chāi chōe-chōe chháu. Lâng chiū lóng chē, siàu-gia̍h iok-lio̍k gō͘ chheng.

11耶穌the̍h hiah-ê餅；祝謝了後，就分hō͘坐ê人；魚亦是án-ni，lóng照in所ài。Iâ-so͘ the̍h hiah ê piáⁿ; chiok-siā liáu-āu, chiū pun hō͘ chē ê lâng; hî ia̍h sī án-ni, lóng chiàu in só͘ ài.

12In已經食飽，耶穌kā伊ê學生講，拾所食chhun ê屑á，免得有phah-sńg，In í-keng chia̍h pá, Iâ-so͘ kā I ê ha̍k-seng kóng, Khioh só͘ chia̍h chhun ê sut-á, bián-tit ū phah-sńg,

13就將所食chhun五個大麥餅ê餅碎，拾滿十二筐。Chiū chiong só͘ chia̍h chhun gō͘ ê tōa-be̍h piáⁿ ê piáⁿ-chhùi, khioh móa cha̍p-jī kheng.

14Hiah-ê人看見伊所行ê神蹟，就講，Chit-ê真正是所beh來世間ê先知。Hiah ê lâng khòaⁿ-kìⁿ I só͘ kiâⁿ ê sîn-jiah, chiū kóng, Chit-ê chin-chiàⁿ sī só͘ beh lâi sè-kan ê sian-ti.

15耶穌知眾人beh來，ài硬掠伊，hō͘伊做王，就koh退去入山，只有伊家己tī hia。Iâ-so͘ chai chèng lâng beh lâi, ài ngī-lia̍h I, hō͘ I chòe ông, chiū koh thè-khì ji̍p soaⁿ, chí-ū I ka-kī tī hia.

16黃昏暗，伊ê學生落去到海邊；Hông-hun àm, I ê ha̍k-seng lo̍h-khì kàu hái-piⁿ;

17上船，beh過海去迦百農。已經暗，耶穌iáu-bē到。chiūⁿ chûn, beh kè hái khì Ka-pek-lông. Í-keng àm, Iâ-so͘ iáu-bē kàu.

18因為風真thàu，海湧就ná大。In-ūi hong chin thàu, hái-éng chiū ná tōa.

19Tùi án-ni學生告船，約略行八里，á十里，看見耶穌行海面，ná óa近船，就驚。Tùi án-ni ha̍k-seng kò chûn, iok-lio̍k kiâⁿ poeh lí, á cha̍p lí, khòaⁿ-kìⁿ Iâ-so͘ kiâⁿ hái-bīn, ná óa-kūn chûn, chiū kiaⁿ.

20但是耶穌對in講，是我，免驚。Nā-sī Iâ-so͘ tùi in kóng, Sī góa, bián kiaⁿ.

21學生就歡喜chih接伊上船；船liâm-piⁿ到in所beh去ê所在。Ha̍k-seng chiū hoaⁿ-hí chih-chiap I chiūⁿ chûn; chûn liâm-piⁿ kàu in só͘ beh khì ê só͘-chāi.

22隔日，khiā tī海hit-pêng岸ê眾人，看見hit位無別隻船á，只有一隻nā-tiāⁿ，koh耶穌無kap伊ê學生搭hit隻船，只有學生家己去；Keh ji̍t, khiā tī hái hit pêng hōaⁿ ê chèng lâng, khòaⁿ-kìⁿ hit ūi bô pa̍t chiah chûn-á, chí-ū chi̍t chiah nā-tiāⁿ, koh Iâ-so͘ bô kap I ê ha̍k-seng tah hit chiah chûn, chí-ū ha̍k-seng ka-kī khì;

23(總是有幾隻船á tùi Th ê-pì-lí-a來，到近tī主祝謝了後眾人食餅ê所在) ；(chóng-sī ū kúi chiah chûn-á tùi Thê-pì-lí-a lâi, kàu kūn tī Chú chiok-siā liáu-āu chèng lâng chia̍h piáⁿ ê só͘-chāi);

24眾人看見耶穌kap伊ê學生lóng無tī hia，就搭hit幾隻船á，到迦百農chhē耶穌。chèng lâng khòaⁿ-kìⁿ Iâ-so͘ kap I ê ha̍k-seng lóng bô tī hia, chiū tah hit kúi chiah chûn-á, kàu Ka-pek-lông chhē Iâ-so͘.

25已經tú-tio̍h伊tī海ê hit-pêng岸，就kā伊講，拉比，你甚麼時到chia？Í-keng tú-tio̍h I tī hái ê hit pêng hōaⁿ, chiū kā I kóng, Lia̍p-pí, lí sím-mi̍h sî kàu chia?

26耶穌應講，我實實kā lín講，Lín chiah-ê chhē我，m̄是因為看見神蹟，是因為食餅到飽nā-tiāⁿ。Iâ-so͘ ìn kóng, Góa si̍t-si̍t kā lín kóng, Lín chiah-ê chhē góa, m̄ sī in-ūi khòaⁿ-kìⁿ sîn-jiah, sī in-ūi chia̍h piáⁿ kàu pá nā-tiāⁿ.

27莫得為tio̍h會敗壞ê米糧來tio̍h磨，tio̍h為tio̍h長長tī-teh永活ê米糧來tio̍h磨，就是人子所beh hō͘ lín ê；因為伊是父上帝所蓋印ê。Bo̍h-tit ūi-tio̍h ōe pāi-hoāi ê bí-niû lâi tio̍h-bôa, tio̍h ūi-tio̍h tn̂g-tn̂g tī-teh éng-oa̍h ê bí-niû lâi tio̍h-bôa, chiū-sī Jîn-chú só͘ beh hō͘ lín ê; in-ūi I sī Pē Siōng-tè só͘ khàm-ìn ê.

28In就對伊講，阮tio̍h怎樣行，來做上帝ê工？In chiū tùi I kóng, Goán tio̍h cháiⁿ-iūⁿ kiâⁿ, lâi chòe Siōng-tè ê kang?

29耶穌應講，信伊所差ê，chit-ê就是上帝ê工。Iâ-so͘ ìn kóng, Sìn I só͘ chhe ê, chit-ê chiū-sī Siōng-tè ê kang.

30In kā伊講，你行甚麼神蹟，hō͘阮看，來信你ah？你行甚麼ah？In kā I kóng, Lí kiâⁿ sím-mi̍h sîn-jiah, hō͘ goán khòaⁿ, lâi sìn lí ah? Lí kiâⁿ sím-mi̍h ah?

31阮ê祖tī曠野食má-ná；照所記載講，用tùi天來ê餅hō͘ in食。Goán ê chó͘ tī khòng-iá chia̍h má-ná; chiàu só͘ kì-chài kóng, Ēng tùi thiⁿ lâi ê piáⁿ hō͘ in chia̍h.

32耶穌kā in講，我實實kā lín講，m̄是摩西用tùi天來ê餅hō͘ lín，就是我ê父用tùi天來ê真餅hō͘ lín。Iâ-so͘ kā in kóng, Góa si̍t-si̍t kā lín kóng, M̄ sī Mô͘-se ēng tùi thiⁿ lâi ê piáⁿ hō͘ lín, chiū-sī góa ê Pē ēng tùi thiⁿ lâi ê chin piáⁿ hō͘ lín.

33因為上帝ê餅，就是hit-ê tùi天落來，也用活命賞賜世間ê。In-ūi Siōng-tè ê piáⁿ, chiū-sī hit ê tùi thiⁿ lo̍h-lâi, iā ēng oa̍h-miā siúⁿ-sù sè-kan ê.

34In就對伊講，主ah，常常用chit號餅hō͘阮。In chiū tùi I kóng, Chú ah, siông-siông ēng chit hō piáⁿ hō͘ goán.

35耶穌kā in講，我就是活命ê餅；就近我ê人決斷bōe iau，信我ê人永永bōe嘴乾。Iâ-so͘ kā in kóng, Góa chiū-sī oa̍h-miā ê piáⁿ; chiū-kūn góa ê lâng koat-toàn bōe iau, sìn góa ê lâng éng-éng bōe chhùi-ta.

36但是我bat kā lín講，Lín已經看見我，亦猶原m̄信。Nā-sī góa bat kā lín kóng, Lín í-keng khòaⁿ-kìⁿ góa, ia̍h iû-goân m̄ sìn.

37見若父所hō͘我ê，beh lóng就近我；就近我ê人，我決斷無棄sak伊。Kìⁿ-nā Pē só͘ hō͘ góa ê, beh lóng chiū-kūn góa; chiū-kūn góa ê lâng, góa koat-toàn bô khì-sak i.

38因為我tùi天降落m̄是行家己ê旨意，就是行差我ê ê旨意。In-ūi góa tùi thiⁿ kàng-lo̍h m̄ sī kiâⁿ ka-kī ê chí-ì, chiū-sī kiâⁿ chhe góa ê ê chí-ì.

39Taⁿ差我ê ê旨意，就是見若伊所hō͘我ê，我無失落一個，是tī末日hō͘伊koh活。Taⁿ chhe góa ê ê chí-ì, chiū-sī kìⁿ-nā I só͘ hō͘ góa ê, góa bô sit-lo̍h chi̍t-ê, sī tī boa̍t-ji̍t hō͘ i koh-oa̍h.

40因為我ê父ê旨意就是見若看見Kiáⁿ來信伊ê人，lóng有永活；也我tī末日hō͘伊koh活。In-ūi góa ê Pē ê chí-ì chiū-sī kìⁿ-nā khòaⁿ-kìⁿ Kiáⁿ lâi sìn I ê lâng, lóng ū éng-oa̍h; iā góa tī boa̍t-ji̍t hō͘ i koh-oa̍h.

41猶太人因為耶穌講，我是tùi天降落ê餅，就nga̍uh-nga̍uh念伊，講，Iû-thài lâng in-ūi Iâ-so͘ kóng, Góa sī tùi thiⁿ kàng-lo̍h ê piáⁿ, chiū nga̍uh-nga̍uh-liām I, kóng,

42Chit-ê kiám m̄是約瑟ê kiáⁿ耶穌mah？伊ê父母是咱所bat ê。Taⁿ怎樣講，我是tùi天降落ah？Chit-ê kiám m̄ sī Iok-sek ê kiáⁿ Iâ-so͘ mah? I ê pē-bú sī lán só͘ bat ê. Taⁿ cháiⁿ-iūⁿ kóng, Góa sī tùi thiⁿ kàng-lo̍h ah?

43耶穌應講，Lín莫得án-ni nga̍uh-nga̍uh念。Iâ-so͘ ìn kóng, Lín bo̍h-tit án-ni nga̍uh-nga̍uh-liām.

44若m̄是差我ê父引chhōa伊，就無人會就近我；就近我ê，我tī末日beh hō͘伊koh活。Nā m̄ sī chhe góa ê Pē ín-chhōa i, chiū bô lâng ōe chiū-kūn góa; chiū-kūn góa ê, góa tī boa̍t-ji̍t beh hō͘ i koh-oa̍h.

45Tī chiah-ê先知有記載講，Iⁿ lóng beh hō͘上帝教in。見若tùi父聽見來學ê人，就就近我。Tī chiah ê sian-ti ū kì-chài kóng, In lóng beh hō͘ Siōng-tè kà in. Kìⁿ-nā tùi Pē thiaⁿ-kìⁿ lâi o̍h ê lâng, chiū chiū-kūn góa.

46這m̄是講有人bat看見父，只有tùi上帝來ê，伊bat看見父。Che m̄ sī kóng ū lâng bat khòaⁿ-kìⁿ Pē, chí ū tùi Siōng-tè lâi ê, I bat khòaⁿ-kìⁿ Pē.

47我實實kā lín講，信ê人有永活。Góa si̍t-si̍t kā lín kóng, Sìn ê lâng ū éng-oa̍h.

48我是活命ê餅。Góa sī oa̍h-miā ê piáⁿ.

49Lín ê祖tī曠野食má-ná，in亦死。Lín ê chó͘ tī khòng-iá chia̍h má-ná, in ia̍h sí.

50Chit-ê就是tùi天降落ê餅，hō͘人食ê，也bōe死。Chit-ê chiū-sī tùi thiⁿ kàng-lo̍h ê piáⁿ, hō͘ lâng chia̍h ê, iā bōe sí.

51我是活ê餅，tùi天降落ê；人若食chit-ê餅，就活到永世代；koh我所beh hō͘人ê餅，就是我ê肉為tio̍h世間ê活命chiah賞賜ê。Góa sī oa̍h ê piáⁿ, tùi thiⁿ kàng-lo̍h ê; lâng nā chia̍h chit ê piáⁿ, chiū oa̍h kàu éng sè-tāi; koh góa só͘ beh hō͘ lâng ê piáⁿ, chiū-sī góa ê bah ūi-tio̍h sè-kan ê oa̍h-miā chiah siúⁿ-sù ê.

52Tùi án-ni猶太人相爭，講，Chit人thài會用伊ê肉hō͘咱食？Tùi án-ni Iû-thài lâng saⁿ-chiⁿ, kóng, Chit lâng thái ōe ēng I ê bah hō͘ lán chia̍h?

53耶穌就kā in講，我實實kā lín講，Lín若無食人子ê肉，無lim伊ê血，就lín ê內面無活。Iâ-so͘ chiū kā in kóng, Góa si̍t-si̍t kā lín kóng, Lín nā bô chia̍h Jîn-chú ê bah, bô lim I ê huih, chiū lín ê lāi-bīn bô oa̍h.

54食我ê肉，lim我ê血ê人有永活；末日我beh hō͘伊koh活。Chia̍h góa ê bah, lim góa ê huih ê lâng ū éng-oa̍h; boa̍t-ji̍t góa beh hō͘ i koh-oa̍h.

55我ê肉是真ê食物，我ê血是真實thang lim ê。Góa ê bah sī chin ê chia̍h-mi̍h, góa ê huih sī chin-si̍t thang lim ê.

56食我ê肉，lim我ê血ê人，伊tiàm-tī我，我亦tiàm-tī伊。Chia̍h góa ê bah, lim góa ê huih ê lâng, i tiàm-tī góa, góa ia̍h tiàm-tī i.

57親像活ê父差我，koh我tùi父來活；食我ê，beh tùi我來活，亦是án-ni。Chhin-chhiūⁿ oa̍h ê Pē chhe góa, koh góa tùi Pē lâi oa̍h; chia̍h góa ê, beh tùi góa lâi oa̍h, ia̍h sī án-ni.

58這就是tùi天降落ê餅；m̄是親像列祖ê食má-ná，也死去；食chit-ê餅ê人，beh活到永世代。Che chiū-sī tùi thiⁿ kàng-lo̍h ê piáⁿ; m̄ sī chhin-chhiūⁿ lia̍t-chó͘ ê chia̍h má-ná, iā sí-khì; chia̍h chit ê piáⁿ ê lâng, beh oa̍h kàu éng sè-tāi.

59Chiah-ê話是耶穌tiàm-tī迦百農會堂來教示人ê時所講ê。Chiah ê ōe sī Iâ-so͘ tiàm tī Ka-pek-lông hōe-tn̂g lâi kà-sī lâng ê sî só͘ kóng ê.

60伊ê學生中chōe-chōe人聽了就講，Chit-ê話真oh；是誰會聽伊？I ê ha̍k-seng tiong chōe-chōe lâng thiaⁿ-liáu chiū kóng, Chit ê ōe chin oh; chī-chūi ōe thiaⁿ i?

61耶穌心內知伊ê學生因為chit-ê nga̍uh-nga̍uh念，就kā in講，chit-ê是塞礙tio̍h lín mah？Iâ-so͘ sim-lāi chai I ê ha̍k-seng in-ūi chit-ê nga̍uh-nga̍uh-liām, chiū kā in kóng, Chit-ê sī that-gāi-tio̍h lín mah?

62設使lín看見人子上到伊原本ê所在裡？Siat-sú lín khòaⁿ-kìⁿ Jîn-chú chiūⁿ kàu i goân-pún ê só͘-chāi ni̍h?

63hō͘人活ê就是神：肉體就無利益；我所kā lín講ê話是神，是活命。Hō͘ lâng oa̍h ê chiū-sī Sîn: jio̍k-thé chiū bô lī-ek; góa só͘ kā lín kóng ê ōe sī sîn, sī oa̍h-miā.

64但是lín中間有m̄信ê人lah。因為耶穌tùi起頭就知是誰 m̄信伊，是誰 beh賣伊。Nā-sī lín tiong-kan ū m̄ sìn ê lâng lah. In-ūi Iâ-so͘ tùi khí-thâu chiū chai chī-chūi m̄ sìn I, chī-chūi beh bōe I.

65Koh講，因為án-ni，我bat kā lín講，若m̄是tùi父hō͘伊，無人會就近我。Koh kóng, In-ūi án-ni, góa bat kā lín kóng, nā m̄ sī tùi Pē hō͘ i, bô lâng ōe chiū-kūn góa.

66Tùi án-ni伊ê學生chōe-chōe退去，無koh kap伊行。Tùi án-ni I ê ha̍k-seng chōe-chōe thè-khì, bô koh kap I kiâⁿ.

67耶穌就kā十二個學生講，Lín亦beh去mah？Iâ-so͘ chiū kā cha̍p-jī ê ha̍k-seng kóng, Lín ia̍h beh khì mah?

68西門彼得應伊講，主ah，你有永活ê話，阮beh去chhē 是誰 ah？Se-bûn Pí-tek ìn I kóng, Chú ah, lí ū éng-oa̍h ê ōe, goán beh khì chhē chī-chūi ah?

69阮已經信，koh知你是上帝ê聖ê。Goán í-keng sìn, koh chai lí sī Siōng-tè ê Sèng-ê.

70耶穌應講，我kiám m̄是揀lín十二人，亦lín中間一個是魔鬼ah？Iâ-so͘ ìn kóng, Góa kiám m̄ sī kéng lín cha̍p-jī lâng, ia̍h lín tiong-kan chi̍t-ê sī mô͘-kúi ah?

71伊講án-ni是指加略人西門ê kiáⁿ猶大，因為伊是十二學生ê一個teh-beh賣伊ê。I kóng án-ni sī chí Ka-lio̍k lâng Se-bûn ê kiáⁿ Iû-tāi, in-ūi i sī cha̍p-jī ha̍k-seng ê chi̍t-ê teh-beh bōe I ê.

1Chiah-ê事以後，耶穌四界行tī加利利，m̄-ài行tī猶太，因為猶太人ài beh thâi伊。Chiah ê sū í-āu, Iâ-so͘ sì-kè kiâⁿ tī Ka-lī-lī, m̄ ài kiâⁿ tī Iû-thài, in-ūi Iû-thài lâng ài beh thâi I.

2Hit時猶太人ê節，就是搭寮節，近lah。Hit sî Iû-thài lâng ê choeh, chiū-sī tah-liâu-choeh, kūn lah.

3伊ê兄弟就對伊講，你tio̍h離開chia，去猶太，hō͘你ê學生亦thang看見你所行ê事。I ê hiaⁿ-tī chiū tùi I kóng, Lí tio̍h lī-khui chia, khì Iû-thài, hō͘ lí ê ha̍k-seng ia̍h thang khòaⁿ-kìⁿ lí só͘ kiâⁿ ê sū.

4人ài出名，就無tī暗靜ê所在做tāi-chì。你若行chiah-ê事，就tio̍h將家己顯明tī世間。Lâng ài chhut-miâ, chiū bô tī àm-chīⁿ ê só͘-chāi chòe tāi-chì. Lí nā kiâⁿ chiah ê sū, chiū tio̍h chiong ka-kī hián-bêng tī sè-kan.

5因為伊ê兄弟亦無信伊。In-ūi I ê hiaⁿ-tī ia̍h bô sìn I.

6耶穌就kā in講，我ê時iáu-bē到；但是lín ê時常常便。Iâ-so͘ chiū kā in kóng, Góa ê sî iáu-bē kàu; nā-sī lín ê sî siông-siông piān.

7世間bōe會怨恨lín；是怨恨我，因為我干證伊ê所行是pháiⁿ。Sè-kan bōe-ōe oàn-hūn lín; sī oàn-hūn góa, in-ūi góa kan-chèng i ê só͘ kiâⁿ sī pháiⁿ.

8Lín上去赴節；我iáu-bē thang上去赴 chit-ê節；因為我ê時iáu-bē滿。Lín chiūⁿ-khì hù choeh; góa iáu-bē thang chiūⁿ-khì hù chit ê choeh; in-ūi góa ê sî iáu-bē móa.

9已經kā in講án-ni，就猶原tiàm加利利。Í-keng kā in kóng án-ni, chiū iû-goân tiàm Ka-lī-lī.

10伊ê兄弟已經上去赴節，伊本身亦上去，m̄是顯然，是親像暗靜。I ê hiaⁿ-tī í-keng chiūⁿ-khì hù choeh, I pún-sin ia̍h chiūⁿ-khì, m̄ sī hián-jiân, sī chhin-chhiūⁿ àm-chīⁿ.

11猶太人tī節期中chhē耶穌講，伊tī tá-lo̍h？Iû-thài lâng tī choeh-kî tiong chhē Iâ-so͘ kóng, I tī tá-lo̍h?

12眾人為tio̍h伊chōe-chōe chī-bú chī-chū；有ê講，是好人；有ê講，m̄是，是迷惑眾人nā-tiāⁿ。Chèng lâng ūi-tio̍h I chōe-chōe chī-bú chī-chū; ū-ê kóng, sī hó lâng; ū-ê kóng, M̄ sī, sī bê-he̍k chèng lâng nā-tiāⁿ.

13獨獨無人顯然講伊ê事，因為驚猶太人ê緣故。To̍k-to̍k bô lâng hián-jiân kóng I ê sū, in-ūi kiaⁿ Iû-thài lâng ê iân-kò͘.

14當節期ê中站耶穌上殿教示。Tng choeh-kî ê tiong-chām Iâ-so͘ chiūⁿ tiān kà-sī.

15猶太人就奇怪，講，Chit-ê人bē有入學，tùi tá-lo̍h bat冊？Iû-thài lâng chiū kî-koài, kóng, Chit ê lâng bē ū ji̍p o̍h, tùi tá-lo̍h bat chheh?

16耶穌就應講，我ê教示m̄是屬tī家己，是屬tī差我ê。Iâ-so͘ chiū ìn kóng, Góa ê kà-sī m̄ sī sio̍k tī ka-kī, sī sio̍k tī chhe góa ê.

17人若願行伊ê旨意，就會知chit-ê教示是tùi上帝出，á是我tùi家己來講ê。Lâng nā goān kiâⁿ I ê chí-ì, chiū ōe chai chit ê kà-sī sī tùi Siōng-tè chhut, á-sī góa tùi ka-kī lâi kóng ê.

18Tùi家己來講ê，是求家己ê榮光；獨獨求差伊ê ê榮光，hit-ê人就是真，亦伊ê內面無不義。Tùi ka-kī lâi kóng ê, sī kiû ka-kī ê êng-kng; to̍k-to̍k kiû chhe i ê ê êng-kng, hit ê lâng chiū-sī chin, ia̍h i ê lāi-bīn bô put-gī.

19摩西kiám無用律法傳hō͘ lín mah？但是lín中間無一人行律法。Lín啥事ài beh thâi我？Mô͘-se kiám bô ēng lu̍t-hoat thoân hō͘ lín mah? Nā-sī lín tiong-kan bô chi̍t lâng kiâⁿ lu̍t-hoat. Lín siáⁿ-sū ài beh thâi góa?

20眾人應講，你患tio̍h鬼，是誰 ài beh thâi你？Chèng lâng ìn kóng, Lí hoān-tio̍h kúi, chī-chūi ài beh thâi lí?

21耶穌應講，我bat行一項事，lín lóng掠做奇怪。Iâ-so͘ ìn kóng, Góa bat kiâⁿ chi̍t hāng sū, lín lóng lia̍h chòe kî-koài.

22因為án-ni摩西用割禮傳hō͘ lín，(其實m̄是tùi摩西，是tùi列祖) ；亦lín tī安歇日kā人行割禮。In-ūi án-ni Mô͘-se ēng kat-lé thoân hō͘ lín, (kî-si̍t m̄ sī tùi Mô͘-se, sī tùi lia̍t-chó͘); ia̍h lín tī an-hioh-ji̍t kā lâng kiâⁿ kat-lé.

23人若tī安歇日受割禮，免得違逆摩西ê律法；就我tī安歇日hō͘一人全體lóng好，lín因為án-ni受氣我mah？Lâng nā tī an-hioh-ji̍t siū kat-lé, bián-tit ûi-ke̍h Mô͘-se ê lu̍t-hoat; chiū góa tī an-hioh-ji̍t hō͘ chi̍t lâng choân-thé lóng hó, lín in-ūi án-ni siū-khì góa mah?

24莫得照外貌來擬斷，tio̍h thàn公義來擬斷。Bo̍h-tit chiàu gōa-māu lâi gí-toàn, tio̍h thàn kong-gī lâi gí-toàn.

25Tùi án-ni耶路撒冷ê人，有ê講，Chit-ê kiám m̄是in所ài thâi ê mah？Tùi án-ni Iâ-lō͘-sat-léng ê lâng, ū-ê kóng, Chit-ê kiám m̄ sī in só͘ ài thâi ê mah?

26你看，伊好膽teh講，亦無人對伊講甚麼。kiám是chiah-ê官府真正知chit-ê是基督mah？Lí khòaⁿ, I hó-táⁿ teh kóng, ia̍h bô lâng tùi I kóng sím-mi̍h. Kiám sī chiah ê koaⁿ-hú chin-chiàⁿ chai chit-ê sī Ki-tok mah?

27但是咱bat chit-ê人tùi tá-lo̍h來；m̄-kú基督來ê時無人知伊tùi tá-lo̍h來。Nā-sī lán bat chit ê lâng tùi tá-lo̍h lâi; m̄ kú Ki-tok lâi ê sî bô lâng chai I tùi tá-lo̍h lâi.

28Tùi án-ni耶穌tī殿裡教示，叫講，Lín bat我，亦知我tùi tá-lo̍h來；我m̄是自專來，差我來ê是真實，lín m̄-bat伊。Tùi án-ni Iâ-so͘ tī tiān-ni̍h kà-sī, kiò kóng, Lín bat góa, ia̍h chai góa tùi tá-lo̍h lâi; góa m̄ sī chū-choan lâi, chhe góa lâi ê sī chin-si̍t, lín m̄ bat I.

29我bat伊；因為我對伊來，亦伊差我。Góa bat I; in-ūi góa tùi I lâi, ia̍h I chhe góa.

30In就ài beh掠伊；總是無人下手，因為伊ê時iáu-bē到。In chiū ài beh lia̍h I; chóng-sī bô lâng hē chhiú, in-ūi I ê sî iáu-bē kàu.

31眾人中chōe-chōe人信伊，講，基督來ê時，kiám beh行神蹟比chit人所行ê khah chōe mah？Chèng lâng tiong chōe-chōe lâng sìn I, kóng, Ki-tok lâi ê sî, kiám beh kiâⁿ sîn-jiah pí chit lâng só͘ kiâⁿ ê khah chōe mah?

32法利賽人聽見眾人án-ni chī-bú chī-chū teh講伊，就chiah-ê祭司頭kap法利賽人差衙役beh掠伊。Hoat-lī-sài lâng thiaⁿ-kìⁿ chèng lâng án-ni chī-bú chī-chū teh kóng I, chiū chiah ê chè-si-thâu kap Hoat-lī-sài lâng chhe gê-ia̍h beh lia̍h I.

33耶穌就講，我iáu有tiap-á久kap lín tī-teh，後來beh tò去就近差我ê。Iâ-so͘ chiū kóng, Góa iáu ū tiap-á kú kap lín tī-teh, āu-lâi beh tò-khì chiū-kūn chhe góa ê.

34Lín beh chhē我，亦chhē bōe tio̍h；我所tòa ê所在，lín bōe能到。Lín beh chhē góa, ia̍h chhē bōe tio̍h; góa só͘ tòa ê só͘-chāi, lín bōe-ōe kàu.

35猶太人就saⁿ-kap講，伊beh tá-lo̍h去，致到咱chhē伊bōe tio̍h？kiám beh就近希利尼中四散khiā起ê猶太人，來教示希利尼人mah？Iû-thài lâng chiū saⁿ-kap kóng, I beh tá-lo̍h khì, tì-kàu lán chhē I bōe tio̍h? kiám beh chiū-kūn Hi-lī-nî tiong sì-sòaⁿ khiā-khí ê Iû-thài lâng, lâi kà-sī Hi-lī-nî lâng mah?

36伊所講，Lín beh chhē我bōe tio̍h；我所tòa ê所在，lín bōe會到；這是甚麼話ah？I só͘ kóng, Lín beh chhē góa bōe tio̍h; góa só͘ tòa ê só͘-chāi, lín bōe-ōe kàu; che sī sím-mi̍h ōe ah?

37當節期ê尾日，就是siōng大ê日，耶穌khiā-teh，叫講，若有嘴乾ê人，tio̍h就近我來lim。Tng choeh-kî ê bé ji̍t, chiū-sī siōng tōa ê ji̍t, Iâ-so͘ khiā-teh, kiò kóng, Nā ū chhùi-ta ê lâng, tio̍h chiū-kūn góa lâi lim.

38信我ê人，親像聖經所講，有活水ê溪，beh對伊ê腹內流出。Sìn góa ê lâng, chhin-chhiūⁿ sèng-keng só͘ kóng, ū oa̍h chúi ê khoe, beh tùi i ê pak-lāi lâu-chhut.

39伊講án-ni是指信伊ê人所beh受ê聖神；hit時bē有賞賜聖神；因為耶穌bē有得tio̍h榮光。I kóng án-ni sī chí sìn I ê lâng só͘ beh siū ê Sèng Sîn; hit sî bē ū siúⁿ-sù Sèng Sîn; in-ūi Iâ-so͘ bē ū tit-tio̍h êng-kng.

40眾人中有ê聽見chiah-ê話來講，Chit人真正是hit-ê先知。Chèng lâng tiong ū-ê thiaⁿ-kìⁿ chiah ê ōe lâi kóng, Chit lâng chin-chiàⁿ sī hit ê sian-ti.

41有ê講，Chit人就是基督。若是有ê講，基督kiám tùi加利利出mah？Ū-ê kóng, Chit lâng chiū-sī Ki-tok. Nā-sī ū-ê kóng, Ki-tok kiám tùi Ka-lī-lī chhut mah?

42聖經kiám無講，基督是大衛ê後裔，tùi大衛ê本鄉伯利恆出mah？Sèng-keng kiám bô kóng, Ki-tok sī Tāi-pi̍t ê hō͘-è, tùi Tāi-pi̍t ê pún-hiuⁿ Pek-lī-hêng chhut mah?

43Tùi án-ni眾人因為伊來分pêng。Tùi án-ni chèng lâng in-ūi I lâi hun-pêng.

44其中有人ài掠伊；總是無人下手。Kî-tiong ū lâng ài lia̍h I; chóng-sī bô lâng hē chhiú.

45衙役就來見chiah-ê祭司頭kap法利賽人；in就tùi衙役講，啥事無帶伊來？Gê-ia̍h chiū lâi kìⁿ chiah ê chè-si-thâu kap Hoat-lī-sài lâng; in chiū tùi gê-ia̍h kóng, Siáⁿ-sū bô tòa I lâi?

46衙役應講，從來bē有人講話親像伊án-ni。Gê-ia̍h ìn kóng, Chiông-lâi bē ū lâng kóng ōe chhin-chhiūⁿ I án-ni.

47法利賽人應講，Lín亦受迷惑mah？Hoat-lī-sài lâng ìn kóng, Lín ia̍h siū bê-he̍k mah?

48Chiah-ê官府á是法利賽人，kiám有人信伊？Chiah ê koaⁿ-hú á-sī Hoat-lī-sài lâng, kiám ū lâng sìn I?

49獨獨chiah-ê m̄-bat律法ê百姓，是受咒詛ê。To̍k-to̍k chiah-ê m̄ bat lu̍t-hoat ê peh-sìⁿ, sī siū chiù-chó͘ ê.

50In中間有尼哥底某，就是前就近耶穌ê，kā in講，In tiong-kan ū Nî-ko-tí-bó͘, chiū-sī chêng chiū-kūn Iâ-so͘ ê, kā in kóng,

51無事先聽人ê話，來知伊ê所行；咱ê律法kiám有定伊ê罪mah？Bô tāi-seng thiaⁿ lâng ê ōe, lâi chai i ê só͘ kiâⁿ; lán ê lu̍t-hoat kiám ū tēng i ê chōe mah?

52In就應伊講，你亦是tùi加利利出mah？你去查考，就知加利利無出先知。In chiū ìn i kóng, Lí ia̍h sī tùi Ka-lī-lī chhut mah? Lí khì chhâ-khó, chiū chai Ka-lī-lī bô chhut sian-ti.

1Ta̍k人就tò去in tau；耶穌去橄欖山。Ta̍k lâng chiū tò-khì in tau; Iâ-so͘ khì Kaⁿ-ná soaⁿ.

2透早koh到tī殿裡，百姓lóng就近伊；伊就坐teh來教示in。Thàu-chá koh kàu tī tiān-ni̍h, peh-sìⁿ lóng chiū-kūn I; I chiū chē-teh lâi kà-sī in.

3經學士kap法利賽人帶一個婦人人來，是tī行姦淫ê時hō͘人掠tio̍h ê；Keng-ha̍k-sū kap Hoat-lī-sài lâng tòa chi̍t ê hū-jîn-lâng lâi, sī tī kiâⁿ kan-îm ê sî hō͘ lâng lia̍h-tio̍h-ê;

4已經hō͘伊khiā tī中央，in就tùi耶穌講，先生，chit-ê婦人人是tú-tú行姦淫ê時hō͘人掠tio̍h。í-keng hō͘ i khiā tī tiong-ng, in chiū tùi Iâ-so͘ kóng, Sian-siⁿ, chit ê hū-jîn-lâng sī tú-tú kiâⁿ kan-îm ê sî hō͘ lâng lia̍h-tio̍h.

5摩西tī律法命令阮用石頭tìm死chit號ê婦人人，taⁿ你講怎樣？Mô͘-se tī lu̍t-hoat bēng-lēng goán ēng chio̍h-thâu tìm-sí chit hō ê hū-jîn-lâng, taⁿ lí kóng cháiⁿ-iūⁿ?

6In講án-ni是beh試耶穌，ài得tio̍h有縫thang告伊。耶穌就àⁿ腰，用指頭á寫字tī土腳。In kóng án-ni sī beh chhì Iâ-so͘, ài tit-tio̍h ū phāng thang kò I. Iâ-so͘ chiū àⁿ io, ēng chńg-thâu-á siá-jī tī thô͘-kha.

7In猶原問伊無soah。耶穌就挺身起來，對in講，Lín中間無罪ê人thang事先用石頭tìm伊。In iû-goân mn̄g I bô soah. Iâ-so͘ chiū thêng sin khí-lâi, tùi in kóng, Lín tiong-kan bô chōe ê lâng thang tāi-seng ēng chio̍h-thâu tìm i.

8就koh àⁿ腰，用指頭á寫字tī土腳。Chiū koh àⁿ io, ēng chńg-thâu-á siá-jī tī thô͘-kha.

9In聽了，tùi老到少年，一個一個lóng出去；只有耶穌家己tī-teh，婦人人猶原khiā tī中央。In thiaⁿ-liáu, tùi lāu kàu siàu-liân, chi̍t-ê chi̍t-ê lóng chhut-khì; chí-ū Iâ-so͘ ka-kī tī-teh, hū-jîn-lâng iû-goân khiā tī tiong-ng.

10耶穌挺身起來kā伊講，婦人人ah，in tī tá-lo̍h？無人定你ê罪mah？Iâ-so͘ thêng sin khí-lâi kā i kóng, Hū-jîn-lâng ah, in tī tá-lo̍h? Bô lâng tēng lí ê chōe mah?

11伊講，主ah，無。耶穌講，我亦無定你ê罪；去ah；taⁿ以後莫得koh犯罪。I kóng, Chú ah, bô. Iâ-so͘ kóng, Góa ia̍h bô tēng lí ê chōe; khì ah; taⁿ í-āu bo̍h-tit koh hoān-chōe.

12耶穌koh kā眾人講，我是世間ê光；tè我ê人無行tī暗，反tńg beh有活命ê光。Iâ-so͘ koh kā chèng lâng kóng, Góa sī sè-kan ê kng; tè góa ê lâng bô kiâⁿ tī àm, hoán-tńg beh ū oa̍h-miā ê kng.

13法利賽人就kā伊講，你為tio̍h本身做干證；你ê干證m̄是真。Hoat-lī-sài lâng chiū kā I kóng, Lí ūi-tio̍h pún-sin chòe kan-chèng; lí ê kan-chèng m̄ sī chin.

14耶穌應講，我sui-bóng為tio̍h本身做干證，我ê干證亦是真；因為我知本身tùi tá-lo̍h來，tùi tá-lo̍h去；lín m̄知我tùi tá-lo̍h來，tùi tá-lo̍h去。Iâ-so͘ ìn kóng, Góa sui-bóng ūi-tio̍h pún-sin chòe kan-chèng, góa ê kan-chèng ia̍h sī chin; in-ūi góa chai pún-sin tùi tá-lo̍h lâi, tùi tá-lo̍h khì; lín m̄ chai góa tùi tá-lo̍h lâi, tùi tá-lo̍h khì.

15Lín照肉體擬斷人；我無擬斷人。Lín chiàu jio̍k-thé gí-toàn lâng; góa bô gí-toàn lâng.

16我就若擬斷，我ê擬斷是真；因為我m̄是家己tī-teh，是我kap差我ê父saⁿ-kap tī-teh。Góa chiū nā gí-toàn, góa ê gí-toàn sī chin; in-ūi góa m̄ sī ka-kī tī-teh, sī góa kap chhe góa ê Pē saⁿ-kap tī-teh.

17Koh tī lín ê律法有記載，兩人ê干證就是真。Koh tī lín ê lu̍t-hoat ū kì-chài, Nn̄g lâng ê kan-chèng chiū-sī chin.

18我是為tio̍h家己做干證，差我ê父亦為tio̍h我干證。Góa sī ūi-tio̍h ka-kī chòe kan-chèng, chhe góa ê Pē ia̍h ūi-tio̍h góa kan-chèng.

19In就kā伊講，你ê父tī tá-lo̍h？耶穌應講，Lín m̄-bat我，亦m̄-bat我ê父；lín若bat我，就亦bat我ê父。In chiū kā i kóng, Lí ê Pē tī tá-lo̍h? Iâ-so͘ ìn kóng, Lín m̄ bat góa, ia̍h m̄ bat góa ê Pē; lín nā bat góa, chiū ia̍h bat góa ê Pē.

20耶穌tī殿裡教示人，tī庫房內講chiah-ê話；亦無人掠伊，因為伊ê時iáu-bē到。Iâ-so͘ tī tiān-ni̍h kà-sī lâng, tī khò͘-pâng lāi kóng chiah ê ōe; ia̍h bô lâng lia̍h I, in-ūi I ê sî iáu-bē kàu.

21耶穌koh kā in講，我beh去lah，lín beh chhē我，亦beh死tī lín ê罪；我去ê所在，lín bōe能到。Iâ-so͘ koh kā in kóng, Góa beh khì lah, lín beh chhē góa, ia̍h beh sí tī lín ê chōe; góa khì ê só͘-chāi, lín bōe-ōe kàu.

22猶太人就講，伊講，我去ê所在，lín bōe能到，kiám是beh自盡mah？Iû-thài lâng chiū kóng, I kóng, Góa khì ê só͘-chāi, lín bōe-ōe kàu, kiám sī beh chū-chīn mah?

23耶穌kā in講，Lín是tùi下面，我是tùi頂面；lín是tùi chit世間；我m̄是tùi chit世間。Iâ-so͘ kā in kóng, Lín sī tùi ē-bīn, góa sī tùi téng-bīn; lín sī tùi chit sè-kan; góa m̄ sī tùi chit sè-kan.

24所以我有kā lín講，lín beh死tī lín ê罪；因為lín若m̄信我是伊，就lín beh死tī lín ê罪。Só͘-í góa ū kā lín kóng, lín beh sí tī lín ê chōe; in-ūi lín nā m̄ sìn góa sī I, chiū lín beh sí tī lín ê chōe.

25In就kā伊講，你是是誰？耶穌kā in講，就是我tùi起頭所kā lín講ê。In chiū kā I kóng, Lí sī chī-chūi? Iâ-so͘ kā in kóng, Chiū-sī góa tùi khí-thâu só͘ kā lín kóng ê.

26我有chōe-chōe項beh議論lín，beh判斷lín；獨獨差我ê是真；我所對伊聽見ê，就傳hō͘世間。Góa ū chōe-chōe hāng beh gī-lūn lín, beh phòaⁿ-toàn lín; to̍k-to̍k chhe góa ê sī chin; góa só͘ tùi I thiaⁿ-kìⁿ ê, chiū thoân hō͘ sè-kan.

27In m̄知伊所對in講ê是指父。In m̄ chai I só͘ tùi in kóng ê sī chí Pē.

28耶穌就講，Lín舉起人子ê時，就知我是伊，亦我所行ê無一項tùi家己；是照父所教示我ê，來講chiah-ê。Iâ-so͘ chiū kóng, Lín kú-khí Jîn-chú ê sî, chiū chai góa sī I, ia̍h góa só͘ kiâⁿ ê bô chi̍t hāng tùi ka-kī; sī chiàu Pē só͘ kà-sī góa ê, lâi kóng chiah-ê.

29差我ê kap我tī-teh；伊無放我家己tī-teh；因為我常常行伊所歡喜ê。Chhe góa ê kap góa tī-teh; I bô pàng góa ka-kī tī-teh; in-ūi góa siông-siông kiâⁿ I só͘ hoaⁿ-hí ê.

30當耶穌講chiah-ê話ê時，chōe-chōe人信伊。Tng Iâ-so͘ kóng chiah ê ōe ê sî, chōe-chōe lâng sìn I.

31耶穌就對信伊ê猶太人講，Lín若常常tiàm-tī我ê道理，就真正是我ê學生；Iâ-so͘ chiū tùi sìn I ê Iû-thài lâng kóng, Lín nā siông-siông tiàm tī góa ê tō-lí, chiū chin-chiàⁿ sī góa ê ha̍k-seng;

32Lín beh bat真理，亦真理beh hō͘ lín自由。Lín beh bat chin-lí, ia̍h chin-lí beh hō͘ lín chū-iû.

33In應伊講，阮chiah-ê是亞伯拉罕ê後裔，從來bē bat做人ê奴才；你怎樣講，Lín beh得tio̍h自由ah？In ìn I kóng, Goán chiah-ê sī A-pek-la̍h-hán ê hō͘-è, chiông-lâi bē bat chòe lâng ê lô͘-châi; lí cháiⁿ-iūⁿ kóng, Lín beh tit-tio̍h chū-iû ah?

34耶穌應講，我實實kā lín講，見若犯罪ê，就是罪ê奴才。Iâ-so͘ ìn kóng, Góa si̍t-si̍t kā lín kóng, Kìⁿ-nā hoān chōe ê, chiū-sī chōe ê lô͘-châi.

35奴才無永永tòa tī家內；kiáⁿ就永永tòa。Lô͘-châi bô éng-éng tòa tī ke-lāi; kiáⁿ chiū éng-éng tòa.

36所以Kiáⁿ若hō͘ lín自由，lín就真正自由。Só͘-í Kiáⁿ nā hō͘ lín chū-iû, lín chiū chin-chiàⁿ chū-iû.

37我知lín是亞伯拉罕ê後裔；獨獨lín ài beh thâi我，因為我ê道理無船tī lín ê心。Góa chai lín sī A-pek-la̍h-hán ê hō͘-è; to̍k-to̍k lín ài beh thâi góa, in-ūi góa ê tō-lí bô chûn tī lín ê sim.

38我tùi我ê父看見ê，我就講伊；lín tùi lín ê父聽見ê，lín就行伊。Góa tùi góa ê Pē khòaⁿ-kìⁿ ê, góa chiū kóng i; lín tùi lín ê pē thiaⁿ-kìⁿ ê, lín chiū kiâⁿ i.

39In應伊講，阮ê父就是亞伯拉罕。耶穌kā in講，Lín若是亞伯拉罕ê kiáⁿ，就beh行亞伯拉罕ê所行。In ìn I kóng, Goán ê pē chiū-sī A-pek-la̍h-hán. Iâ-so͘ kā in kóng, Lín nā sī A-pek-la̍h-hán ê kiáⁿ, chiū beh kiâⁿ A-pek-la̍h-hán ê só͘ kiâⁿ.

40Taⁿ我是將我tùi上帝所聽ê真理來kā lín講ê人，亦lín ài beh thâi我；這m̄是亞伯拉罕ê所行。Taⁿ góa sī chiong góa tùi Siōng-tè só͘ thiaⁿ ê chin-lí lâi kā lín kóng ê lâng, ia̍h lín ài beh thâi góa; che m̄ sī A-pek-la̍h-hán ê só͘ kiâⁿ.

41Lín是行lín ê父ê所行。In kā伊講，阮m̄是tùi姦淫來生；阮有一個父，就是上帝。Lín sī kiâⁿ lín ê pē ê só͘ kiâⁿ. In kā I kóng, Goán m̄ sī tùi kan-îm lâi siⁿ; goán ū chi̍t ê Pē, chiū-sī Siōng-tè.

42耶穌kā in講，若是上帝做lín ê父，lín就疼我；因為我是tùi上帝出；亦來到chia，m̄是自專來，是伊差我。Iâ-so͘ kā in kóng, Nā sī Siōng-tè chòe lín ê Pē, lín chiū thiàⁿ góa; in-ūi góa sī tùi Siōng-tè chhut; ia̍h lâi kàu chia, m̄ sī chū-choan lâi, sī I chhe góa.

43Lín無明我ê話是怎樣？是因為lín bōe會聽我ê道理。Lín bô bêng góa ê ōe sī cháiⁿ-iūⁿ? Sī in-ūi lín bōe-ōe thiaⁿ góa ê tō-lí.

44Lín所對伊出ê父，就是魔鬼；lín ê父ê私慾，lín ài beh行伊。伊tùi起頭做thâi人ê，無khiā-tiâu tī真理，因為伊內面無真理。伊講白賊ê時，就是對家己所有ê來講；因為伊是白賊ê，亦做白賊ê父。Lín só͘ tùi i chhut ê pē, chiū-sī Mô͘-kúi; lín ê pē ê su-io̍k, lín ài beh kiâⁿ i. I tùi khí-thâu chòe thâi-lâng ê, bô khiā-tiâu tī chin-lí, in-ūi i lāi-bīn bô chin-lí. I kóng pe̍h-chha̍t ê sî, chiū-sī tùi ka-kī só͘ ū ê lâi kóng; in-ūi i sī pe̍h-chha̍t ê, ia̍h chòe pe̍h-chha̍t ê pē.

45因為我講真理，lín m̄信我。In-ūi góa kóng chin-lí, lín m̄ sìn góa.

46Lín中間是誰擬我有罪？我若講真理，lín啥事m̄信我？Lín tiong-kan chī-chūi gí góa ū chōe? Góa nā kóng chin-lí, lín siáⁿ-sū m̄ sìn góa?

47Tùi上帝出ê聽上帝ê話；lín所以m̄聽，因為lín m̄是tùi上帝出。Tùi Siōng-tè chhut-ê thiaⁿ Siōng-tè ê ōe; lín só͘-í m̄ thiaⁿ, in-ūi lín m̄ sī tùi Siōng-tè chhut.

48猶太人應伊講，阮講你是撒馬利亞人，koh患tio̍h鬼，kiám無真tio̍h？Iû-thài lâng ìn I kóng, Goán kóng lí sī Sat-má-lī-a lâng, koh hoān-tio̍h kúi, kiám bô chin tio̍h?

49耶穌應講，我m̄是患tio̍h鬼；我是尊敬我ê父，但是lín侮慢我。Iâ-so͘ ìn kóng, Góa m̄ sī hoān-tio̍h kúi; góa sī chun-kèng góa ê Pē, nā-sī lín bú-bān góa.

50我無求家己ê榮光；有一個teh替我求koh審判ê。Góa bô kiû ka-kī ê êng-kng; ū chi̍t-ê teh thòe góa kiû koh sím-phòaⁿ ê.

51我實實kā lín講，人若守我ê道理，就永遠無見tio̍h死。Góa si̍t-si̍t kā lín kóng, Lâng nā siú góa ê tō-lí, chiū éng-oán bô kìⁿ-tio̍h sí.

52猶太人kā伊講，Taⁿ阮知你是患tio̍h鬼。亞伯拉罕死，chiah-ê先知亦死，但是你講，人若守我ê道理，就永遠無死。Iû-thài lâng kā I kóng, Taⁿ goán chai lí sī hoān-tio̍h kúi. A-pek-la̍h-hán sí, chiah ê sian-ti ia̍h sí, nā-sī lí kóng, Lâng nā siú góa ê tō-lí, chiū éng-oán bô sí.

53你kiám比阮ê祖亞伯拉罕khah大mah？伊已經死，chiah-ê先知亦死，你家己算做甚麼人ah？Lí kiám pí goán ê chó͘ A-pek-la̍h-hán khah tōa mah? i í-keng sí, chiah ê sian-ti ia̍h sí, lí ka-kī sǹg chòe sím-mi̍h lâng ah?

54耶穌應講，我若榮光家己，我ê榮光就m̄上算；榮光我ê是我ê父；就是lín所講做lín ê上帝ê。Iâ-so͘ ìn kóng, Góa nā êng-kng ka-kī, góa ê êng-kng chiū m̄ chiūⁿ-sǹg; êng-kng góa ê sī góa ê Pē; chiū-sī lín só͘ kóng chòe lín ê Siōng-tè ê.

55Lín m̄-bat伊；獨獨我bat伊；我若講，M̄-bat伊，就我是白賊親像lín；獨獨我bat伊，亦守伊ê道理。Lín m̄ bat I; to̍k-to̍k góa bat I; góa nā kóng, M̄ bat I, chiū góa sī pe̍h-chha̍t chhin-chhiūⁿ lín; to̍k-to̍k góa bat I, ia̍h siú I ê tō-lí.

56Lín ê祖亞伯拉罕極歡喜，是beh看見我ê日子；看見，就歡喜。Lín ê chó͘ A-pek-la̍h-hán ke̍k hoaⁿ-hí, sī beh khòaⁿ-kìⁿ góa ê ji̍t-chí; khòaⁿ-kìⁿ, chiū hoaⁿ-hí.

57猶太人就對伊講，你bē上五十歲，kiám bat看見亞伯拉罕mah？Iû-thài lâng chiū tùi I kóng, Lí bē chiūⁿ gō͘-cha̍p hè, kiám bat khòaⁿ-kìⁿ A-pek-la̍h-hán mah?

58耶穌kā in講，我實實kā lín講，Bē有亞伯拉罕，我就tī-teh。Iâ-so͘ kā in kóng, Góa si̍t-si̍t kā lín kóng, Bē ū A-pek-la̍h-hán, góa chiū tī-teh.

59In就the̍h石頭beh tìm伊；但是耶穌家己隱密，tùi殿堂出去。In chiū the̍h chio̍h-thâu beh tìm I; nā-sī Iâ-so͘ ka-kī ún-ba̍t, tùi tiān-tn̂g chhut-khì.