1約書亞歲壽chōe，年老，耶和華對伊講，你歲壽chōe，年老，應該取ê地，iáu有chhun真chōe；Iok-su-a hè-siū chōe, nî-lāu, Iâ-hô-hoa tùi i kóng, Lí hè-siū chōe, nî-lāu, eng-kai chhú ê tōe, iáu ū chhun chin-chōe;

2所chhun ê地，就是腓利士人ê全境，kap Ki-su̍t人ê全地；só͘ chhun ê tōe, chiū-sī Hui-lī-sū lâng ê choân-kéng, kap Ki-su̍t lâng ê choân-tōe;

3tùi埃及頭前ê Se-hat，ǹg北到Í-kek-lûn ê境界，這就算做迦南人ê地；腓利士人五個首領，就是Ka-sat人、A-si̍t-tu̍t人、A-si̍t-ki-lûn人、Ka-tek人、Í-kek-lûn人；koh有南方A-ōe人；tùi Ai-ki̍p thâu-chêng ê Se-hat, ǹg-pak kàu Í-kek-lûn ê kéng-kài, che chiū sǹg-chòe Ka-lâm lâng ê tōe; Hui-lī-sū lâng gō͘ ê siú-léng, chiū-sī Ka-sat lâng, A-si̍t-tu̍t lâng, A-si̍t-ki-lûn lâng, Ka-tek lâng, Í-kek-lûn lâng; koh ū lâm-hng A-ōe lâng;

4迦南人ê全地，Se-tùn人ê Bí-a-la̍h，到A-hut，直到A-mô͘-lī人ê交界；Ka-lâm lâng ê choân-tōe, Se-tùn lâng ê Bí-a-la̍h, kàu A-hut, ti̍t-kàu A-mô͘-lī lâng ê kau-kài;

5koh有Ka-pa-le̍k人ê地，kap ǹg日出ka-nn̂g ê Lī-pa-lùn，tùi Hek-bûn山腳ê Pa-le̍k-ka-tek，到Hap-má ê路口；koh ū Ka-pa-le̍k lâng ê tōe, kap ǹg ji̍t-chhut ka-nn̂g ê Lī-pa-lùn, tùi Hek-bûn soaⁿ-kha ê Pa-le̍k-ka-tek, kàu Hap-má ê lō͘-kháu;

6khiā起山地lóng總ê百姓，tùi Lī-pa-lùn到Bí-su-lī-hut-má-im、Se-tùn ê眾人，我beh tī以色列人ê面前趕in出去；你thang照我所命令你ê，分hiah-ê地hō͘以色列人做業。khiā-khí soaⁿ-tōe lóng-chóng ê peh-sìⁿ, tùi Lī-pa-lùn kàu Bí-su-lī-hut-má-im, Se-tùn ê chèng-lâng, Góa beh tī Í-sek-lia̍t lâng ê bīn-chêng kóaⁿ in chhut-khì; lí thang chiàu Góa só͘ bēng-lēng lí ê, pun hiah ê tōe hō͘ Í-sek-lia̍t lâng chòe-gia̍p.

7Taⁿ你tio̍h將chit-ê地分hō͘九支派kap Má-ná-se半支派做業。Taⁿ lí tio̍h chiong chit ê tōe pun hō͘ káu chi-phài kap Má-ná-se pòaⁿ-chi-phài chòe-gia̍p.

8Liû-piān、Ka-tek，兩支派，kap Má-ná-se iáu半支派，相kap得tio̍h摩西所賞賜ê業，tī約旦東勢hit-pêng，就是照耶和華ê奴僕摩西所hō͘ in ê。Liû-piān, Ka-tek, nn̄g chi-phài, kap Má-ná-se iáu pòaⁿ-chi-phài, saⁿ-kap tit-tio̍h Mô͘-se só͘ siúⁿ-sù ê gia̍p, tī Iok-tàn tang-sì hit-pêng, chiū-sī chiàu Iâ-hô-hoa ê lô͘-po̍k Mô͘-se só͘ hō͘ in ê.

9是tùi A-lùn山谷邊ê A-lô-jíⁿ，kap山谷中ê城，以及Bí-tí-pa ê全平洋，直到Tí-pún；Sī tùi A-lùn soaⁿ-kok-piⁿ ê A-lô-jíⁿ, kap soaⁿ-kok-tiong ê siâⁿ, í-ki̍p Bí-tí-pa ê choân pîⁿ-iûⁿ, ti̍t-kàu Tí-pún;

10kap tiàm tī Hi-si̍t-pún做王，A-mô͘-lī人ê王Se-hông chiah-ê城，到A-bûn人ê交界；kap tiàm tī Hi-si̍t-pún chòe-ông, A-mô͘-lī lâng ê ông Se-hông chiah ê siâⁿ, kàu A-bûn lâng ê kau-kài;

11koh有Ki-lia̍t地，Ki-su̍t人、Má-ka人ê地界，kap ka-nn̂g ê Hek-bûn山，ka-nn̂g ê Pa-san，到Sat-ka；koh ū Ki-lia̍t tōe, Ki-su̍t lâng, Má-ka lâng ê tōe-kài, kap ka-nn̂g ê Hek-bûn soaⁿ, ka-nn̂g ê Pa-san, kàu Sat-ka;

12koh Pa-san王Go̍k ê全國，伊tī A-su-tha-lio̍k kap Í-tek-lâi做王；伊是Lī-hoa̍t-im族所chhun-ê；因為chiah-ê lóng是摩西所phah ê，所管ê。koh Pa-san ông Go̍k ê choân-kok, i tī A-su-tha-lio̍k kap Í-tek-lâi chòe-ông; i sī Lī-hoa̍t-im cho̍k só͘ chhun-ê; in-ūi chiah-ê lóng sī Mô͘-se só͘ phah ê, só͘ kóaⁿ ê.

13總是以色列人無趕Ki-su̍t人、Má-ka人；到今á日Ki-su̍t、Má-ka猶原tiàm tī以色列人ê中間。Chóng-sī Í-sek-lia̍t lâng bô kóaⁿ Ki-su̍t lâng, Má-ka lâng; kàu kin-á-ji̍t Ki-su̍t, Má-ka iû-goân tiàm tī Í-sek-lia̍t lâng ê tiong-kan.

14獨獨無分業hō͘利未ê支派；耶和華以色列ê上帝燒祭ê祭物做in ê業，照伊所對伊講ê。To̍k-to̍k bô pun gia̍p hō͘ Lī-bī ê chi-phài; Iâ-hô-hoa Í-sek-lia̍t ê Siōng-tè sio-chè ê chè-mi̍h chòe in ê gia̍p, chiàu I só͘ tùi i kóng ê.

15摩西分hō͘ Liû-piān支派ê，照in ê宗族。Mô͘-se pun hō͘ Liû-piān chi-phài ê, chiàu in ê chong-cho̍k.

16In ê境界是A-lùn山谷邊ê A-lô-jíⁿ，kap山谷中ê城，óa近Bí-tí-pa ê全平洋，In ê kéng-kài sī A-lùn soaⁿ-kok-piⁿ ê A-lô-jíⁿ, kap soaⁿ-kok-tiong ê siâⁿ, óa-kūn Bí-tí-pa ê choân pîⁿ-iûⁿ,

17Hi-si̍t-pún kap伊平洋hiah-ê城，Tí-pún、Pa-boa̍t-pa-le̍k、Pek-pa-le̍k-bián；Hi-si̍t-pún kap i pîⁿ-iûⁿ hiah ê siâⁿ, Tí-pún, Pa-boa̍t-pa-le̍k, Pek-pa-le̍k-bián;

18Ngá-cha̍p、Ki-tí-bo̍k、Bí-hoat-ap；Ngá-cha̍p, Ki-tí-bo̍k, Bí-hoat-ap;

19Ki-lia̍t-têng、Se-pí-má，kap山谷中ê山Sè-lia̍t-hap-sa-hat；Ki-lia̍t-têng, Se-pí-má, kap soaⁿ-kok tiong ê soaⁿ Sè-lia̍t-hap-sa-hat;

20Pek-pì-jíⁿ、Pì-su-ka ê山坪，Pek-iâ-se-boa̍t；Pek-pì-jíⁿ, Pì-su-ka ê soaⁿ-phiâⁿ, Pek-iâ-se-boa̍t;

21koh平洋hiah-ê城，tī Hi-si̍t-pún做王ê A-mô͘-lī人ê王Se-hông ê全國；摩西phah 伊kap米甸hiah-ê首領，就是Í-bī、Lī-kimou-jíⁿ、Hō͘-jíⁿ、Lī-pa；chiah-ê lóng是tiàm tī hit所在做首領，屬tī Se-hông ê。koh pîⁿ-iûⁿ hiah ê siâⁿ, tī Hi-si̍t-pún chòe-ông ê A-mô͘-lī lâng ê ông Se-hông ê choân-kok; Mô͘-se phah i kap Bí-tiân hiah ê siú-léng, chiū-sī Í-bī, Lī-kim, So͘-jíⁿ, Hō͘-jíⁿ, Lī-pa; chiah-ê lóng sī tiàm tī hit só͘-chāi chòe siú-léng, sio̍k tī Se-hông ê.

22以色列人thâi hiah-ê人ê時，也用刀thâi Pí-jíⁿ ê kiáⁿ，術士Pa-lân。Í-sek-lia̍t lâng thâi hiah ê lâng ê sî, iā ēng to thâi Pí-jíⁿ ê kiáⁿ, su̍t-sū Pa-lân.

23Liû-piān人ê境界，伊ê業tī約旦kap河邊ê地。這是Liû-piān人ê業，照in ê宗族，chiah-ê城，chiah-ê鄉社。Liû-piān lâng ê kéng-kài, i ê gia̍p tī Iok-tàn kap hô-piⁿ ê tōe. Che sī Liû-piān lâng ê gia̍p, chiàu in ê chong-cho̍k, chiah ê siâⁿ, chiah ê hiuⁿ-siā.

24摩西分hō͘ Ka-tek人，照Ka-tek支派ê宗族。Mô͘-se pun hō͘ Ka-tek lâng, chiàu Ka-tek chi-phài ê chong-cho̍k.

25In ê境界是Ngá-siā kap Ki-lia̍t一切ê城，kap A-bûn人一半ê地，到La̍h-pa頭前ê A-lô-jíⁿ。In ê kéng-kài sī Ngá-siā kap Ki-lia̍t it-chhè ê siâⁿ, kap A-bûn lâng chi̍t-pòaⁿ ê tōe, kàu La̍h-pa thâu-chêng ê A-lô-jíⁿ.

26Tùi Hi-si̍t-pún到La̍h-boa̍t-bí-su-pa，kap Pí-to-lêng，koh tùi Má-hap-liām，到Tí-phek ê境界；Tùi Hi-si̍t-pún kàu La̍h-boa̍t-bí-su-pa, kap Pí-to-lêng, koh tùi Má-hap-liām, kàu Tí-phek ê kéng-kài;

27kap山谷中ê Pek-a-lân、Pek-lêng-la̍h、So͘-kat，Sat-hun，就是Hi-si̍t-pún王Se-hông國內所chhun ê地，以及約旦河kap河邊ê地，直到Ki-nî-lia̍t海ê極頭，tī約旦hit-pêng ê東勢。kap soaⁿ-kok-tiong ê Pek-a-lân, Pek-lêng-la̍h, So͘-kat, Sat-hun, chiū-sī Hi-si̍t-pún ông Se-hông kok-lāi só͘ chhun ê tōe, í-ki̍p Iok-tàn hô kap hô-piⁿ ê tōe, ti̍t-kàu Ki-nî-lia̍t hái ê ke̍k-thâu, tī Iok-tàn hit-pêng ê tang-sì.

28這是Ka-tek人照伊ê宗族所得tio̍h做業chiah-ê城，kap鄉社。Che sī Ka-tek lâng chiàu i ê chong-cho̍k só͘ tit-tio̍h chòe-gia̍p chiah ê siâⁿ, kap hiuⁿ-siā.

29摩西分hō͘ Má-ná-se半支派ê，是照Má-ná-se人半支派ê宗族。Mô͘-se pun hō͘ Má-ná-se pòaⁿ-chi-phài-ê, sī chiàu Má-ná-se lâng pòaⁿ-chi-phài ê chong-cho̍k.

30In ê境界是tùi Má-hap-liām起，包含Pa-san全地，就是Pa-san王Go̍k ê全國，kap tī Pa-san、Gāi-jíⁿ一切ê城，共六十ê城；In ê kéng-kài sī tùi Má-hap-liām khí, pau-hâm Pa-san choân-tōe, chiū-sī Pa-san ông Go̍k ê choân-kok, kap tī Pa-san Gāi-jíⁿ it-chhè ê siâⁿ, kiōng la̍k-cha̍p ê siâⁿ;

31Ki-lia̍t ê一半，kap A-su-tha-lio̍k，Í-tek-lâi，是屬Pa-san王Go̍k ê國ê城，是hō͘ Má-ná-se ê kiáⁿ，Má-kiat，就是Má-kiat ê kiáⁿ孫ê一半，照伊ê宗族。Ki-lia̍t ê chi̍t-pòaⁿ, kap A-su-tha-lio̍k, Í-tek-lâi, sī sio̍k Pa-san ông Go̍k ê kok ê siâⁿ, sī hō͘ Má-ná-se ê kiáⁿ, Má-kiat, chiū-sī Má-kiat ê kiáⁿ-sun ê chi̍t-pòaⁿ, chiàu i ê chong-cho̍k.

32頂面是摩西tī約旦hit-pêng東勢，耶利哥對面Mô͘-ap ê平洋，所分ê業。Téng-bīn sī Mô͘-se tī Iok-tàn hit-pêng tang-sì, Iâ-lī-ko tùi-bīn Mô͘-ap ê pîⁿ-iûⁿ, só͘ pun ê gia̍p.

33獨獨利未支派，摩西無分業hō͘ in；耶和華以色列ê上帝是做in ê產業，照伊所kā in講ê。To̍k-to̍k Lī-bī chi-phài, Mô͘-se bô pun-gia̍p hō͘ in; Iâ-hô-hoa Í-sek-lia̍t ê Siōng-tè sī chòe in ê sán-gia̍p, chiàu I só͘ kā in kóng ê.

1以色列人tī迦南地所得tio̍h ê業，就是祭司Í-lī-a-sat，kap Lùn ê kiáⁿ約書亞，kap以色列ta̍k支派ê族長，所分hō͘ in ê，lóng記tī下底。Í-sek-lia̍t lâng tī Ka-lâm tōe só͘ tit-tio̍h ê gia̍p, chiū-sī chè-si Í-lī-a-sat, kap Lùn ê kiáⁿ Iok-su-a, kap Í-sek-lia̍t ta̍k chi-phài ê cho̍k-tiúⁿ, só͘ pun hō͘ in ê, lóng kì tī ē-tóe.

2是照耶和華託摩西所命令ê，liam-khau分hō͘九支派koh半支派。Sī chiàu Iâ-hô-hoa thok Mô͘-se só͘ bēng-lēng ê, liam-khau pun hō͘ káu chi-phài koh pòaⁿ-chi-phài.

3因為摩西tī約旦河hit-pêng，已經分業hō͘兩個支派koh半支派；獨獨tī in中間無分業hō͘利未人。In-ūi Mô͘-se tī Iok-tàn hô hit-pêng, í-keng pun-gia̍p hō͘ nn̄g ê chi-phài koh pòaⁿ-chi-phài; to̍k-to̍k tī in tiong-kan bô pun-gia̍p hō͘ Lī-bī lâng.

4因為約瑟ê kiáⁿ孫是兩支派，就是Má-ná-se kap Í-hoat-liân；總是無用地分hō͘利未人做業；只有hō͘ in城thang khiā起，kap城ê郊野，thang做cheng-siⁿ kap財物ê路用。In-ūi Iok-sek ê kiáⁿ-sun sī nn̄g chi-phài, chiū-sī Má-ná-se kap Í-hoat-liân; chóng-sī bô ēng tōe pun hō͘ Lī-bī lâng chòe-gia̍p; chí-ū hō͘ in siâⁿ thang khiā-khí, kap siâⁿ ê kau-iá, thang chòe cheng-siⁿ kap châi-bu̍t ê lō͘-ēng.

5以色列人照耶和華所命令摩西ê去行，來分hit-ê地。Í-sek-lia̍t lâng chiàu Iâ-hô-hoa só͘ bēng-lēng Mô͘-se ê khì kiâⁿ, lâi pun hit ê tōe.

6Hit時猶大人tī Kiat-kah見約書亞；有Ki-nî-sé族，Iâ-hu-nî ê kiáⁿ迦勒，kā伊講，早tī Ka-te-su-pa-nî-a，耶和華對上帝ê奴僕摩西所講：關係你我ê tāi-chì ê，你lóng知。Hit-sî Iû-tāi lâng tī Kiat-kah kìⁿ Iok-su-a; ū Ki-nî-sé cho̍k, Iâ-hu-nî ê kiáⁿ Ka-le̍k, kā i kóng, Chá tī Ka-te-su-pa-nî-a, Iâ-hô-hoa tùi Siōng-tè ê lô͘-po̍k Mô͘-se só͘ kóng, koan-hē lí góa ê tāi-chì ê, lí lóng chai.

7耶和華ê奴僕摩西tùi Ka-te-su-pa-nî-a差我偷看chit-ê地，hit時我tú-á四十歲；我盡我ê心回覆伊。Iâ-hô-hoa ê lô͘-po̍k Mô͘-se tùi Ka-te-su-pa-nî-a chhe góa thau-khòaⁿ chit ê tōe, hit-sî góa tú-á sì-cha̍p hè; góa chīn góa ê sim hê-hok i.

8總是kap我上去hiah-ê兄弟hō͘百姓心失志；獨獨我專心tè耶和華我ê上帝。Chóng-sī kap góa chiūⁿ-khì hiah ê hiaⁿ-tī hō͘ peh-sìⁿ sim sit-chì; to̍k-to̍k góa choan-sim tè Iâ-hô-hoa góa ê Siōng-tè.

9當日摩西chiù-chōa講：你ê腳所踏ê地，定tio̍h beh歸你kap你ê kiáⁿ孫，永遠做業；因為你專心跟tè耶和華我ê上帝。Tng-ji̍t Mô͘-se chiù-chōa kóng, Lí ê kha só͘ ta̍h ê tōe, tiāⁿ-tio̍h beh kui lí kap lí ê kiáⁿ-sun, éng-oán chòe-gia̍p; in-ūi lí choan-sim kun-tè Iâ-hô-hoa góa ê Siōng-tè.

10看ah，耶和華照伊所講ê，hō͘我活teh已經四十五年，就是tùi以色列人行tī曠野，耶和華kā摩西講這話ê時；看ah，現今我八十五歲 lah。Khòaⁿ ah, Iâ-hô-hoa chiàu I só͘ kóng ê, hō͘ góa oa̍h-teh í-keng sì-cha̍p-gō͘ nî, chiū-sī tùi Í-sek-lia̍t lâng kiâⁿ tī khòng-iá, Iâ-hô-hoa kā Mô͘-se kóng che ōe ê sî; khòaⁿ ah, hiān-kim góa poeh-cha̍p-gō͘ hè lah.

11我iáu-kú勇健，親像摩西差我去hit日一樣，無論是爭戰，是出入，我ê氣力hit時怎樣，現在我ê氣力也是án-ni。Góa iáu-kú ióng-kiāⁿ, chhin-chhiūⁿ Mô͘-se chhe góa khì hit-ji̍t chi̍t-iūⁿ, bô-lūn sī cheng-chiàn, sī chhut-ji̍p, góa ê khùi-la̍t hit-sî cháiⁿ-iūⁿ, hiān-chāi góa ê khùi-la̍t iā sī án-ni.

12求你用耶和華hit日所講ê山地hō͘我；因為hit日你也有聽見；tī-hia有A-la̍p族ê人，伊ê城闊大堅固；若耶和華kap我tī-teh，我就beh趕in出，照耶和華所講ê。Kiû lí ēng Iâ-hô-hoa hit-ji̍t só͘ kóng ê soaⁿ-tōe hō͘ góa; in-ūi hit-ji̍t lí iā ū thiaⁿ-kìⁿ; tī-hia ū A-la̍p cho̍k ê lâng, i ê siâⁿ khoah-tōa kian-kò͘; nā Iâ-hô-hoa kap góa tī-teh, góa chiū beh kóaⁿ in chhut, chiàu Iâ-hô-hoa só͘ kóng ê.

13約書亞就kā伊祝福，用Hi-pek-lûn hō͘ Iâ-hu-nî ê kiáⁿ迦勒做業。Iok-su-a chiū kā i chiok-hok, ēng Hi-pek-lûn hō͘ Iâ-hu-nî ê kiáⁿ Ka-le̍k chòe-gia̍p.

14所以Hi-pek-lûn做Ki-nî-sé族Iâ-hu-nî ê kiáⁿ迦勒ê產業，直到今á日；因為伊專心跟tè耶和華以色列ê上帝。Só͘-í Hi-pek-lûn chòe Ki-nî-sé cho̍k Iâ-hu-nî ê kiáⁿ Ka-le̍k ê sán-gia̍p, ti̍t-kàu kin-á-ji̍t; in-ūi i choan-sim kun-tè Iâ-hô-hoa Í-sek-lia̍t ê Siōng-tè.

15Hi-pek-lûn前叫Ki-lia̍t-a-pa；chit-ê A-pa是A-la̍p族中第一大ê人。Tùi án-ni，國內太平，無koh交戰。Hi-pek-lûn chêng kiò Ki-lia̍t-a-pa; chit ê A-pa sī A-la̍p cho̍k-tiong tē-it tōa ê lâng. Tùi án-ni kok-lāi thài-pêng, bô koh kau-chiàn.

1猶大支派照宗族liam-khau所得tio̍h ê地，是tī極南勢，到Í-tong ê交界，ǹg南直到Sîm ê曠野。Iû-tāi chi-phài chiàu chong-cho̍k liam-khau só͘ tit-tio̍h ê tōe, sī tī ke̍k lâm-sì, kàu Í-tong ê kau-kài, ǹg-lâm ti̍t-kàu Sîm ê khòng-iá.

2In南勢ê界，是tùi鹽海ê極頭，就是ǹg南ê海灣；In lâm-sì ê kài, sī tùi Iâm-hái ê ke̍k-thâu, chiū-sī ǹg-lâm ê hái-oan;

3thàng到A-khek-la̍h-pin山坪ê南勢，連到Sîm，上到Ka-te-su-pa-nî-a ê南勢，koh過Hi-su-lûn，上到A-ta̍t-jíⁿ，se̍h到Kah-ka；thàng-kàu A-khek-la̍h-pin soaⁿ-phiâⁿ ê lâm-sì, liân-kàu Sîm, chiūⁿ-kàu Ka-te-su-pa-nî-a ê lâm-sì, koh kè Hi-su-lûn, chiūⁿ kàu A-ta̍t-jíⁿ, se̍h kàu Kah-ka;

4連到Ap-bún，thàng到埃及ê小河，chit-ê界到海為止；這就是lín南勢ê界；liân kàu Ap-bún, thàng-kàu Ai-ki̍p ê sió-hô, chit ê kài kàu hái ûi-chí; che chiū-sī lín lâm-sì ê kài;

5東勢ê界，就是鹽海，到約旦河口；北勢ê界，是tùi約旦河口ê海灣起；tang-sì ê kài, chiū-sī Iâm-hái, kàu Iok-tàn hô-kháu; pak-sì ê kài, sī tùi Iok-tàn hô-kháu ê hái-oan khí;

6上到Pek-hat-la̍h，過Pek-a-la̍h-pa ê北勢，上到Liû-piān ê kiáⁿ Pho-hán ê石磐；chiūⁿ-kàu Pek-hat-la̍h, kè Pek-a-la̍h-pa ê pak-sì, chiūⁿ-kàu Liû-piān ê kiáⁿ Pho-hán ê chio̍h-pôaⁿ;

7Hit-ê界koh tùi A-kat ê山谷上到Tí-phek，tùi北勢上去，ǹg A-to͘-bêng ê山坪對面ê Kiat-kah，tī河ê南pêng ê；hit-ê界到Ún-sī-be̍k ê水，到Ún-lô-kiat為止；hit ê kài koh tùi A-kat ê soaⁿ-kok chiūⁿ-kàu Tí-phek, tùi pak-sì chiūⁿ-khì, ǹg A-to͘-bêng ê soaⁿ-phiâⁿ tùi-bīn ê Kiat-kah, tī hô ê lâm-pêng ê; hit ê kài kàu Ún-sī-be̍k ê chúi, kàu Ún-lô-kiat ûi-chí;

8Chit-ê界經過Piān-him-lùn ê山谷，上到Iâ-pò͘-su山墘ê南勢，(Iâ-pò͘-su就是耶路撒冷) ；hit-ê界koh上到Piān-him-lùn山谷西勢ê山頂，就是Lī-hoat-im山谷北勢ê極頭；chit ê kài keng-kè Piān-him-lùn ê soaⁿ-kok, chiūⁿ kàu Iâ-pò͘-su soaⁿ-kîⁿ ê lâm-sì, (Iâ-pò͘-su chiū-sī Iâ-lō͘-sat-léng); hit ê kài koh chiūⁿ-kàu Piān-him-lùn soaⁿ-kok sai-sì ê soaⁿ-téng, chiū-sī Lī-hoat-im soaⁿ-kok pak-sì ê ke̍k-thâu;

9Hit-ê界koh tùi山頂到Nî-hut-to-a ê水泉，thàng到Í-hut-lûn山hiah-ê城；hit-ê界koh到Pa-la̍h， (Pa-la̍h就是Ki-lia̍t-iâ-lîm) ；hit ê kài koh tùi soaⁿ-téng kàu Nî-hut-to-a ê chúi-chôaⁿ, thàng-kàu Í-hut-lûn soaⁿ hiah ê siâⁿ; hit ê kài koh kàu Pa-la̍h, (Pa-la̍h chiū-sī Ki-lia̍t-iâ-lîm);

10Hit-ê界koh tùi Pa-la̍h ǹg西勢se̍h到Se-jíⁿ山，過到Iâ-lîm山邊ê北pêng (Iâ-lîm就是Ki-sat-lûn) ，koh落去到Pek-sī-be̍k，經過Têng-la̍p；hit ê kài koh tùi Pa-la̍h ǹg sai-sì se̍h kàu Se-jíⁿ soaⁿ, kè-kàu Iâ-lîm soaⁿ-piⁿ ê pak-pêng (Iâ-lîm chiū-sī Ki-sat-lûn), koh lo̍h-khì kàu Pek-sī-be̍k, keng-kè Têng-la̍p;

11Hit-ê界koh thàng到Í-kek-lûn邊á ê北勢，hit-ê界續到Si-kí-lûn，經過到Pa-la̍h山，koh thàng到Ngá-pí-liap；chit-ê界到海為止；hit ê kài koh thàng-kàu Í-kek-lûn piⁿ-á ê pak-sì, hit ê kài sòa kàu Si-kí-lûn, keng-kè kàu Pa-la̍h soaⁿ, koh thàng-kàu Ngá-pí-liap; chit ê kài kàu hái ûi-chí;

12西勢ê界到大海，kap伊ê海墘。這是猶大人，照in ê宗族，四圍ê交界。sai-sì ê kài kàu tōa-hái, kap i ê hái-kîⁿ. Che sī Iû-tāi lâng, chiàu in ê chong-cho̍k, sì-ûi ê kau-kài.

13照耶和華命令約書亞ê，伊就tī猶大ê族中，將一份hō͘ Iâ-hu-nî ê kiáⁿ迦勒做業，就是Ki-lia̍t-a-pa，也名Hi-pek-lûn；A-pa是A-la̍p族ê祖。Chiàu Iâ-hô-hoa bēng-lēng Iok-su-a ê, i chiū tī Iû-tāi ê cho̍k-tiong, chiong chi̍t-hūn hō͘ Iâ-hu-nî ê kiáⁿ Ka-le̍k chòe-gia̍p, chiū-sī Ki-lia̍t-a-pa, iā miâ Hi-pek-lûn; A-pa sī A-la̍p cho̍k ê chó͘.

14迦勒tùi hia趕出A-la̍p三個kiáⁿ，就是Sī-su、A-hi-bān、That-mái，lóng是A-la̍p ê kiáⁿ。Ka-le̍k tùi hia kóaⁿ-chhut A-la̍p saⁿ ê kiáⁿ, chiū-sī Sī-su, A-hi-bān, That-mái, lóng sī A-la̍p ê kiáⁿ.

15Koh tùi hia上去攻Tí-phek khiā起ê百姓；chit-ê Tí-phek前名叫Ki-lia̍t-se-hut。Koh tùi hia chiūⁿ-khì kong Tí-phek khiā-khí ê peh-sìⁿ; chit ê Tí-phek chêng miâ kiò Ki-lia̍t-se-hut.

16迦勒講：若有人phah Ki-lia̍t-se-hut來取伊，我beh將我ê cha-bó͘-kiáⁿ Ap-sat hō͘伊做bó͘。Ka-le̍k kóng, Nā ū lâng phah Ki-lia̍t-se-hut lâi chhú i, góa beh chiong góa ê cha-bó͘-kiáⁿ Ap-sat hō͘ i chòe-bó͘.

17迦勒ê兄弟Ki-la̍p-su ê kiáⁿ Gô-tô-liap取伊；伊就將伊ê cha-bó͘-kiáⁿ Ap-sat hō͘伊做bó͘。Ka-le̍k ê hiaⁿ-tī Ki-la̍p-su ê kiáⁿ Gô-tô-liap chhú i; i chiū chiong i ê cha-bó͘-kiáⁿ Ap-sat hō͘ i chòe-bó͘.

18Ap-sat過門ê時，勸丈夫tùi in老父討一坵田；Ap-sat tùi驢落來；迦勒問講：你beh甚麼ah？Ap-sat kè-mn̂g ê sî, khǹg tiōng-hu tùi in lāu-pē thó chi̍t khu chhân; Ap-sat tùi lû lo̍h-lâi; Ka-le̍k mn̄g kóng, Lí beh sím-mi̍h ah?

19伊講：求你賜福我；你已經安置我tī南方ê地，求你hō͘我水泉。伊就用頂ê水泉，下ê水泉hō͘伊。I kóng, Kiû lí sù-hok góa; lí í-keng an-tì góa tī lâm-hng ê tōe, kiû lí hō͘ góa chúi-chôaⁿ. I chiū ēng téng ê chúi-chôaⁿ, ē ê chúi-chôaⁿ hō͘ i.

20這是猶大人ê支派所得tio̍h ê業，照伊ê宗族。Che sī Iû-tāi lâng ê chi-phài só͘ tit-tio̍h ê gia̍p, chiàu i ê chong-cho̍k.

21猶大人ê支派南勢極頭ê城，kap Í-tong 交界相近ê，就是Kah-siat、Í-tek、Ngá-ko͘-jíⁿ；Iû-tāi lâng ê chi-phài lâm-sì ke̍k-thâu ê siâⁿ, kap Í-tong kau-kài saⁿ-kūn ê, chiū-sī Kah-siat, Í-tek, Ngá-ko͘-jíⁿ;

22Ki-ná、Tí-mô͘-ná、A-tāi-ta̍t；Ki-ná, Tí-mô͘-ná, A-tāi-ta̍t;

23Ki-te-su、Hā-só、Í-thê-lâm；Ki-te-su, Hā-só, Í-thê-lâm;

24Se-hut、Thê-liān、Pí-a-lio̍k；Se-hut, Thê-liān, Pí-a-lio̍k;

25Hā-só-hap-tāi-tha、Ka-lio̍k-hi-su-lûn，(就是Hā-só) ；Hā-só-hap-tāi-tha, Ka-lio̍k-hi-su-lûn, (chiū-sī Hā-só);

26A-bān、Sī-má、Mô͘-la̍h-tāi；A-bān, Sī-má, Mô͘-la̍h-tāi;

27Hap-sat-ka-tāi、Hek-si̍t-bûn、Pek-phàⁿ-lia̍t；Hap-sat-ka-tāi, Hek-si̍t-bûn, Pek-phàⁿ-lia̍t;

28Hap-sat-su-a、別是巴、Pí-su-iok-tha；Hap-sat-su-a, Pia̍t-sī-pa, Pí-su-iok-tha;

29Pa-la̍h、Í-in、Í-sim；Pa-la̍h, Í-in, Í-sim;

30I-le̍k-to-lia̍p、Ki-sit、Hô-jíⁿ-má；I-le̍k-to-lia̍p, Ki-sit, Hô-jíⁿ-má;

31Sé-kek-la̍h、Be̍k-má-ná、Sam-sat-ná；Sé-kek-la̍h, Be̍k-má-ná, Sam-sat-ná;

32Lī-pa-bu̍t、Si̍t-him、A-in、Lîm-bûn；共二十九座城，kap in ê鄉社。Lī-pa-bu̍t, Si̍t-him, A-in, Lîm-bûn; kiōng jī-cha̍p-káu chō siâⁿ, kap in ê hiuⁿ-siā.

33Tī平洋有Í-si̍t-tô、Só-la̍h、A-si̍t-ná；Tī pîⁿ-iûⁿ ū Í-si̍t-tô, Só-la̍h, A-si̍t-ná;

34Sat-lô-a、Ún-kan-lêng、Tha-phó͘-a、Í-lâm；Sat-lô-a, Ún-kan-lêng, Tha-phó͘-a, Í-lâm;

35Iâ-boa̍t、A-tō͘-lân、So-ko、A-se-ka；Iâ-boa̍t, A-tō͘-lân, So-ko, A-se-ka;

36Sa-la̍h-im、A-tí-tha-im、Ki-tí-la̍h、Ki-tí-lô-tha-im；共十四座城，kap伊ê鄉社。Sa-la̍h-im, A-tí-tha-im, Ki-tí-la̍h, Ki-tí-lô-tha-im; kiōng cha̍p-sì chō siâⁿ, kap i ê hiuⁿ-siā.

37Sé-lâm、Hap-tāi-sa、Be̍k-tāi-ka-tek；Sé-lâm, Hap-tāi-sa, Be̍k-tāi-ka-tek;

38Tí-liân、Bí-su-pa、Iok-thiap；Tí-liân, Bí-su-pa, Iok-thiap;

39拉結、Pho-su-ka、I-ki-lûn；La̍h-kiat, Pho-su-ka, I-ki-lûn;

40Ka-pún、La̍h-bān、Ki-thê-lī；Ka-pún, La̍h-bān, Ki-thê-lī;

41Ki-te-lô、Pek-tāi-kún、Ná-má、Má-ki-tāi；共十六座城，kap伊ê鄉社。Ki-te-lô, Pek-tāi-kún, Ná-má, Má-ki-tāi; kiōng cha̍p-la̍k chō siâⁿ, kap i ê hiuⁿ-siā.

42Li̍p-ná、Í-thiap、A-san；Li̍p-ná, Í-thiap, A-san;

43Ek-hut-tha、A-si̍t-ná、Nî-sek；Ek-hut-tha, A-si̍t-ná, Nî-sek;

44Ki-i-la̍h、A-kek-sek、Má-lī-sa；共九座城，kap伊ê鄉社。Ki-i-la̍h, A-kek-sek, Má-lī-sa; kiōng káu chō siâⁿ, kap i ê hiuⁿ-siā.

45Koh有Í-kek-lûn kap伊ê街市，伊ê鄉社；Koh ū Í-kek-lûn kap i ê koe-chhī, i ê hiuⁿ-siā;

46tùi Í-kek-lûn到海，一切óa近A-si̍t-tu̍t ê，kap伊ê鄉社。tùi Í-kek-lûn kàu hái, it-chhè óa-kūn A-si̍t-tu̍t ê, kap i ê hiuⁿ-siā.

47A-si̍t-tu̍t kap伊ê街市，伊ê鄉社；Ka-sat，kap伊ê街市，伊ê鄉社；到埃及小河，kap大海，以及伊ê海墘。A-si̍t-tu̍t kap i ê koe-chhī, i ê hiuⁿ-siā; Ka-sat, kap i ê koe-chhī, i ê hiuⁿ-siā; kàu Ai-ki̍p sió-hô, kap tōa-hái, í-ki̍p i ê hái-kîⁿ.

48Tī山地有Sa-bi̍t、Ngá-thê-jíⁿ、So-ko；Tī soaⁿ-tōe ū Sa-bi̍t, Ngá-thê-jíⁿ, So-ko;

49Tāi-ná、Ki-lia̍t-sat-ná，就是Tí-phek；Tāi-ná, Ki-lia̍t-sat-ná, chiū-sī Tí-phek;

50A-ná-pek、Í-si̍t-thê-bo̍k、A-liām；A-ná-pek, Í-si̍t-thê-bo̍k, A-liām;

51Ko-san、Hô-lûn、Ki-lô；共十一座城，kap伊ê鄉社。Ko-san, Hô-lûn, Ki-lô; kiōng cha̍p-it chō siâⁿ, kap i ê hiuⁿ-siā.

52Koh有A-la̍h、Tō͘-má、Í-san；Koh ū A-la̍h, Tō͘-má, Í-san;

53Ngá-lông、Pek-tha-phó͘-a、A-hui-ka；Ngá-lông, Pek-tha-phó͘-a, A-hui-ka;

54Hông-tha、Ki-lia̍t-a-pa，就是Hi-pek-lûn，Sé-jíⁿ；共九座城，kap伊ê鄉社。Hông-tha, Ki-lia̍t-a-pa, chiū-sī Hi-pek-lûn, Sé-jíⁿ; kiōng káu chō siâⁿ, kap i ê hiuⁿ-siā.

55Koh有Má-hûn、Ka-bi̍t、Se-hut、Iû-tha；Koh ū Má-hûn, Ka-bi̍t, Se-hut, Iû-tha;

56Iâ-su-lia̍t、Iok-tiān、Sat-lô-a；Iâ-su-lia̍t, Iok-tiān, Sat-lô-a;

57該隱、Ki-pí-a、Têng-la̍p；共十座城，kap伊ê鄉社。Kai-ún, Ki-pí-a, Têng-la̍p; kiōng cha̍p chō siâⁿ, kap i ê hiuⁿ-siā.

58Koh有Hap-hut、Pek-siok、Ki-tu̍t；Koh ū Hap-hut, Pek-siok, Ki-tu̍t;

59Má-lia̍p、Pek-a-lo̍k、Í-le̍k-thê-kun；共六個城，kap伊ê鄉社。Má-lia̍p, Pek-a-lo̍k, Í-le̍k-thê-kun; kiōng la̍k ê siâⁿ, kap i ê hiuⁿ-siā.

60Koh有Ki-lia̍t-pa-le̍k，就是Ki-lia̍t-iâ-lîm、La̍h-pa；共兩座城，kap伊ê鄉社。Koh ū Ki-lia̍t-pa-le̍k, chiū-sī Ki-lia̍t-iâ-lîm, La̍h-pa; kiōng nn̄g chō siâⁿ, kap i ê hiuⁿ-siā.

61Tī曠野有Pek-a-la̍h-pa、Bi̍t-teng、Se-ka-ka；Tī khòng-iá ū Pek-a-la̍h-pa, Bi̍t-teng, Se-ka-ka;

62Le̍k-san、鹽城、Ún-ki-tí；共六座城，kap伊ê鄉社。Le̍k-san, Iâm-siâⁿ, Ún-ki-tí; kiōng la̍k chō siâⁿ, kap i ê hiuⁿ-siā.

63論到tiàm tī耶路撒冷ê Iâ-pò͘-su人、猶大人bōe會趕in出去；總是Iâ-pò͘-su tī耶路撒冷kap猶大人相kap khiā起直到今á日。Lūn-kàu tiàm tī Iâ-lō͘-sat-léng ê Iâ-pò͘-su lâng, Iû-tāi lâng bōe-ōe kóaⁿ in chhut-khì; chóng-sī Iâ-pò͘-su tī Iâ-lō͘-sat-léng kap Iû-tāi lâng saⁿ-kap khiā-khí ti̍t-kàu kin-á-ji̍t.