1約瑟ê kiáⁿ孫liam-khau所得tio̍h ê地，是tùi óa近耶利哥ê約旦河起，tī耶利哥水ê東pêng，tùi耶利哥上去，thàng過山地ê曠野，到Pek-te̍k-lī；Iok-sek ê kiáⁿ-sun liam-khau só͘ tit-tio̍h ê tōe, sī tùi óa-kūn Iâ-lī-ko ê Iok-tàn hô khí, tī Iâ-lī-ko chúi ê tang-pêng, tùi Iâ-lī-ko chiūⁿ-khì, thàng-kè soaⁿ-tōe ê khòng-iá, kàu Pek-te̍k-lī;

2koh tùi Pek-te̍k-lī到Lō͘-su，連到A-ki人ê境界，到A-tha-lio̍k；koh tùi Pek-te̍k-lī kàu Lō͘-su, liân kàu A-ki lâng ê kéng-kài, kàu A-tha-lio̍k;

3koh ǹg西落去到Ap-lī-thê人ê境界，到下面ê Pek-hô-lûn ê境界，直到Ki-sek，thàng到海為止。koh ǹg-sai lo̍h-khì kàu Ap-lī-thê lâng ê kéng-kài, kàu ē-bīn ê Pek-hô-lûn ê kéng-kài, ti̍t-kàu Ki-sek, thàng-kàu hái ûi-chí.

4約瑟ê kiáⁿ Má-ná-se、Í-hoat-liân就得tio̍h這做in ê業。Iok-sek ê kiáⁿ Má-ná-se Í-hoat-liân chiū tit-tio̍h che chòe in ê gia̍p.

5Í-hoat-liân kiáⁿ孫ê境界，照in ê宗族所得tio̍h ê，記tī下面；in ê業東勢ê界是A-tha-lio̍k-a-ta̍t到頂面ê Pek-hô-lûn；Í-hoat-liân kiáⁿ-sun ê kéng-kài, chiàu in ê chong-cho̍k só͘ tit-tio̍h ê, kì tī ē-bīn; in ê gia̍p tang-sì ê kài sī A-tha-lio̍k-a-ta̍t kàu téng-bīn ê Pek-hô-lûn;

6Hit-ê界ǹg西thàng到北pêng ê Bi̍t-bí-tha，hit-ê界ǹg東se̍h到Tha-la̍p-sī-lô，koh連到Ngá-lô-hap ê東pêng。hit ê kài ǹg sai thàng-kàu pak-pêng ê Bi̍t-bí-tha, hit ê kài ǹg tang se̍h kàu Tha-la̍p-sī-lô, koh liân kàu Ngá-lô-hap ê tang-pêng.

7Tùi Ngá-lô-hap落去到A-tha-lio̍k，koh到Ná-la̍h，透到耶利哥，thàng到約旦為止。Tùi Ngá-lô-hap lo̍h-khì kàu A-tha-lio̍k, koh kàu Ná-la̍h, thàu-kàu Iâ-lī-ko, thàng-kàu Iok-tàn ûi-chí.

8Hit-ê界tùi Tha-phó͘-a ǹg西，到Ka-ná河，thàng到海為止。這就是Í-hoat-liân人ê支派，照in ê宗族，所得tio̍h ê業。Hit ê kài tùi Tha-phó͘-a ǹg-sai, kàu Ka-ná hô, thàng-kàu hái ûi-chí. Che chiū-sī Í-hoat-liân lâng ê chi-phài, chiàu in ê chong-cho̍k, só͘ tit-tio̍h ê gia̍p.

9另外tī Má-ná-se kiáⁿ孫ê業中，有分別ê城；hiah-ê城，kap伊ê鄉社，lóng分hō͘ Í-hoat-liân人。Lēng-gōa tī Má-ná-se kiáⁿ-sun ê gia̍p-tiong, ū hun-piat ê siâⁿ; hiah ê siâⁿ, kap i ê hiuⁿ-siā, lóng pun hō͘ Í-hoat-liân lâng.

10In無趕出tiàm tī Ki-sek ê迦南人；總是迦南人tiàm tī Í-hoat-liân人ê中間，做苦工ê奴僕，到今á日。In bô kóaⁿ-chhut tiàm tī Ki-sek ê Ka-lâm lâng; chóng-sī Ka-lâm lâng tiàm tī Í-hoat-liân lâng ê tiong-kan, chòe khó͘-kang ê lô͘-po̍k, kàu kin-á-ji̍t.

1這是Má-ná-se ê支派liam-khau所得tio̍h ê業；因為伊是約瑟ê大kiáⁿ。論到Má-kiat，是Má-ná-se ê大kiáⁿ，Ki-lia̍t ê老父，因為伊是勇士，就得tio̍h Ki-lia̍t kap Pa-san。Che sī Má-ná-se ê chi-phài liam-khau só͘ tit-tio̍h ê gia̍p; in-ūi i sī Iok-sek ê tōa-kiáⁿ. Lūn-kàu Má-kiat, sī Má-ná-se ê tōa-kiáⁿ, Ki-lia̍t ê lāu-pē, in-ūi i sī ióng-sū, chiū tit-tio̍h Ki-lia̍t kap Pa-san.

2Má-ná-se其餘ê kiáⁿ孫，照in ê宗族，liam-khau分地；就是A-pí-í-siā ê kiáⁿ孫，Hi-le̍k ê kiáⁿ孫，A-su-lia̍t ê kiáⁿ孫，示劍ê kiáⁿ孫，Hi-hut ê kiáⁿ孫，Sī-bí-tāi ê kiáⁿ孫；chiah-ê照in ê宗族，lóng是約瑟ê kiáⁿ Má-ná-se ê ta-po͘丁。Má-ná-se kî-û ê kiáⁿ-sun, chiàu in ê chong-cho̍k, liam-khau pun-tōe; chiū-sī A-pí-í-siā ê kiáⁿ-sun, Hi-le̍k ê kiáⁿ-sun, A-su-lia̍t ê kiáⁿ-sun, Sī-kiàm ê kiáⁿ-sun, Hi-hut ê kiáⁿ-sun, Sī-bí-tāi ê kiáⁿ-sun; chiah-ê chiàu in ê chong-cho̍k, lóng sī Iok-sek ê kiáⁿ Má-ná-se ê ta-po͘-teng.

3Má-ná-se ê元孫，Má-kiat ê曾孫，Ki-lia̍t ê孫，Hi-hut ê kiáⁿ Se-lô-hui-hap無kiáⁿ，只有cha-bó͘-kiáⁿ；伊ê cha-bó͘-kiáⁿ名叫Má-la̍h、挪亞、Hat-la̍h、Bi̍t-ka、Tek-sat。Má-ná-se ê goân-sun, Má-kiat ê cheng-sun, Ki-lia̍t ê sun, Hi-hut ê kiáⁿ Se-lô-hui-hap bô kiáⁿ, chí-ū cha-bó͘-kiáⁿ; i ê cha-bó͘-kiáⁿ miâ-kiò Má-la̍h, Ná-a, Hat-la̍h, Bi̍t-ka, Tek-sat.

4In來到祭司Í-lī-a-sat kap Lùn ê kiáⁿ約書亞，kap眾首領ê面前，講：耶和華bat命令摩西，tī阮兄弟中分業hō͘阮；伊就照耶和華所命令ê，tī in老父ê兄弟中，分業hō͘ in。In lâi kàu chè-si Í-lī-a-sat kap Lùn ê kiáⁿ Iok-su-a, kap chèng siú-léng ê bīn-chêng, kóng, Iâ-hô-hoa bat bēng-lēng Mô͘-se, tī goán hiaⁿ-tī-tiong pun gia̍p hō͘ goán; i chiū chiàu Iâ-hô-hoa só͘ bēng-lēng ê, tī in lāu-pē ê hiaⁿ-tī-tiong, pun gia̍p hō͘ in.

5Tī約旦hit-pêng、Ki-lia̍t kap Pa-san地以外，Má-ná-se koh liam-khau得tio̍h十份ê地。Tī Iok-tàn hit-pêng, Ki-lia̍t kap Pa-san tōe í-gōa, Má-ná-se koh liam-khau tit-tio̍h cha̍p-hūn ê tōe.

6因為Má-ná-se hiah-ê cha-bó͘孫，tī Má-ná-se ê kiáⁿ孫中，得tio̍h業。Ki-lia̍t地是屬Má-ná-se其餘ê kiáⁿ孫。In-ūi Má-ná-se hiah ê cha-bó͘-sun, tī Má-ná-se ê kiáⁿ-sun-tiong, tit-tio̍h gia̍p. Ki-lia̍t tōe sī sio̍k Má-ná-se kî-û ê kiáⁿ-sun.

7Má-ná-se ê地界，tùi A-siat起，到示劍ê頭前e5Bit8-bí-tha，hit-ê界ǹg chiàⁿ手pêng，到Ún-tha-phó͘-a khiā起ê百姓hia。Má-ná-se ê tōe-kài, tùi A-siat khí, kàu Sī-kiàm ê thâu-chêng ê Bi̍t-bí-tha, hit ê kài ǹg chiàⁿ-chhiú-pêng, kàu Ún-tha-phó͘-a khiā-khí ê peh-sìⁿ hia.

8Tha-phó͘-a ê地歸Má-ná-se；獨獨Má-ná-se ê交界ê Tha-phó͘-a歸Í-hoat-liân ê kiáⁿ孫。Tha-phó͘-a ê tōe kui Má-ná-se; to̍k-to̍k Má-ná-se ê kau-kài ê Tha-phó͘-a kui Í-hoat-liân ê kiáⁿ-sun.

9伊ê界落去到Ka-ná河；tī河ê南pêng，tī Má-ná-se hiah-ê城ê中間，chiah-ê城是屬Í-hoat-liân；Má-ná-se ê地界是tī河ê北勢，thàng到海為止。I ê kài lo̍h-khì kàu Ka-ná hô; tī hô ê lâm-pêng, tī Má-ná-se hiah ê siâⁿ ê tiong-kan, chiah ê siâⁿ sī sio̍k Í-hoat-liân; Má-ná-se ê tōe-kài sī tī hô ê pak-sì, thàng-kàu hái ûi-chí.

10南屬Í-hoat-liân，北屬Má-ná-se，用海做伊ê界；北pêng到A-siat，東pêng到Í-sat-ka。Lâm sio̍k Í-hoat-liân, pak sio̍k Má-ná-se, ēng hái chòe i ê kài; pak-pêng kàu A-siat, tang-pêng kàu Í-sat-ka.

11Má-ná-se tī Í-sat-ka kap A-siat ê境內，有Pek-siān kap伊ê鄉社，Í-pek-liân kap伊ê鄉社，Tô-jíⁿ khiā起ê百姓kap伊ê鄉社；koh有三所在山地，就是Ún-to-jíⁿ kap伊ê鄉社，Tha-la̍p khiā起ê百姓kap伊ê鄉社，Bí-kiat-to khiā起ê百姓kap伊ê鄉社。Má-ná-se tī Í-sat-ka kap A-siat ê kéng-lāi, ū Pek-siān kap i ê hiuⁿ-siā, Í-pek-liân kap i ê hiuⁿ-siā, Tô-jíⁿ khiā-khí ê peh-sìⁿ kap i ê hiuⁿ-siā; koh ū saⁿ só͘-chāi soaⁿ-tōe, chiū-sī Ún-to-jíⁿ kap i ê hiuⁿ-siā, Tha-la̍p khiā-khí ê peh-sìⁿ kap i ê hiuⁿ-siā, Bí-kiat-to khiā-khí ê peh-sìⁿ kap i ê hiuⁿ-siā.

12總是Má-ná-se ê kiáⁿ孫bōe會趕出hiah-ê城ê百姓；迦南人決意beh tiàm tī hit-ê地；Chóng-sī Má-ná-se ê kiáⁿ-sun bōe-ōe kóaⁿ-chhut hiah ê siâⁿ ê peh-sìⁿ; Ka-lâm lâng koat-ì beh tiàm tī hit ê tōe;

13到以色列人強盛ê時就hō͘迦南人做苦工，無一盡趕in出。kàu Í-sek-lia̍t lâng kiông-sēng ê sî chiū hō͘ Ka-lâm lâng chòe khó͘-kang, bô it-chīn kóaⁿ in chhut.

14約瑟ê kiáⁿ孫對約書亞講：耶和華平時賜福阮，阮就成做大族，你啥事kan-ta用一khau ê份額hō͘阮做業ah？Iok-sek ê kiáⁿ-sun tùi Iok-su-a kóng, Iâ-hô-hoa pêng-sî sù-hok goán, goán chiū chiâⁿ-chòe tōa-cho̍k, lí siáⁿ-sū kan-ta ēng chi̍t-khau ê hūn-gia̍h hō͘ goán chòe-gia̍p ah?

15約書亞對in講，Lín若果然成做大族，Í-hoat-liân地對tī lín是khah 狹細，就你thang上去樹林，tī Pí-lī-sé人、Lī-hoa̍t-im人ê地，tī-hia為家己來開墾。Iok-su-a tùi in kóng, Lín nā kó-jiân chiâⁿ-chòe tōa-cho̍k, Í-hoat-liân tōe tùi tī lín sī khah oe̍h-sòe, chiū lí thang chiūⁿ-khì chhiū-nâ, tī Pí-lī-sé lâng, Lī-hoa̍t-im lâng ê tōe, tī-hia ūi ka-kī lâi khai-khún.

16約瑟ê kiáⁿ孫講：hit-ê地無夠額容允阮；koh tiàm tī平洋ê迦南人，就是tiàm-tī Pek-siān kap伊ê鄉社，kap tiàm Iâ-su-lia̍t平洋ê人，lóng有鐵車。Iok-sek ê kiáⁿ-sun kóng, Hit ê tōe bô kàu-gia̍h iông-ún goán; koh tiàm tī pîⁿ-iûⁿ ê Ka-lâm lâng, chiū-sī tiàm-tī Pek-siān kap i ê hiuⁿ-siā, kap tiàm Iâ-su-lia̍t pîⁿ-iûⁿ ê lâng, lóng ū thih-chhia.

17約書亞對約瑟ê家，就是Í-hoat-liân kap Má-ná-se ê人，講：你是大族koh強盛；m̄-nā一khau ê份額，Iok-su-a tùi Iok-sek ê ke, chiū-sī Í-hoat-liân kap Má-ná-se ê lâng, kóng, Lí sī tōa-cho̍k koh kiông-sēng; m̄-nā chi̍t-khau ê hūn-gia̍h,

18山地也beh歸你；雖然是樹林你也thang剉伊；伊ê極頭也beh屬你；迦南人雖然有鐵車，koh強盛，你也會趕in出去。soaⁿ-tōe iā beh kui lí; sui-jiân sī chhiū-nâ lí iā thang chhò i; i ê ke̍k-thâu iā beh sio̍k lí; Ka-lâm lâng sui-jiân ū thih-chhia, koh kiông-sēng, lí iā ōe kóaⁿ in chhut-khì.

1以色列人ê全會lóng聚集tī Sī-lô，搭會幕tī-hia；因為地方已經hō͘ in khah贏。Í-sek-lia̍t lâng ê choân-hōe lóng chū-chi̍p tī Sī-lô, tah hōe-bō͘ tī-hia; in-ūi tōe-hng í-keng hō͘ in khah-iâⁿ.

2以色列人中，iáu有七支派未得tio̍h in ê業。Í-sek-lia̍t lâng tiong, iáu ū chhit chi-phài bē tit-tio̍h in ê gia̍p.

3約書亞對以色列人講：耶和華，lín列祖ê上帝，所賞賜lín ê地，lín 延chhiân m̄去取伊，beh到tī時ah？Iok-su-a tùi Í-sek-lia̍t lâng kóng, Iâ-hô-hoa, lín lia̍t-chó͘ ê Siōng-tè, só͘ siúⁿ-sù lín ê tōe, lín iân-chhiân m̄-khì chhú i, beh kàu tī-sî ah?

4Lín ta̍k支派tio̍h揀三人，我beh 差in去；in就起身遍行hit-ê地，照in ê份額畫圖，就tò來我chia。Lín ta̍k chi-phài tio̍h kéng saⁿ-lâng, góa beh chhe in khì; in chiū khí-sin piàn-kiâⁿ hit ê tōe, chiàu in ê hūn-gia̍h ūi-tô͘, chiū tò-lâi góa chia.

5In tio̍h將地分做七份；猶大猶原tī南方，tiàm tī伊ê境內；約瑟家猶原tī北方tiàm tī伊ê境內。In tio̍h chiong tōe pun chòe chhit-hūn; Iû-tāi iû-goân tī lâm-hng, tiàm tī i ê kéng-lāi; Iok-sek ke iû-goân tī pak-hng tiàm tī i ê kéng-lāi.

6Lín tio̍h將地分做七份，畫圖the̍h來我chia；我就beh tī耶和華咱上帝ê面前kā lín liam-khau。Lín tio̍h chiong tōe pun chòe chhit-hūn, ūi-tô͘ the̍h-lâi góa chia; góa chiū beh tī Iâ-hô-hoa lán Siōng-tè ê bīn-chêng kā lín liam-khau.

7獨獨利未人tī lín中間無份，因為耶和華祭司ê職就是in ê業；Ka-tek、Liû-piān kap Má-ná-se半支派，已經tī約旦hit-pêng東勢得tio̍h地做業，就是耶和華ê奴僕摩西所hō͘ in ê。To̍k-to̍k Lī-bī lâng tī lín tiong-kan bô hūn, in-ūi Iâ-hô-hoa chè-si ê chit chiū-sī in ê gia̍p; Ka-tek Liû-piān kap Má-ná-se pòaⁿ-chi-phài, í-keng tī Iok-tàn hit-pêng tang-sì tit-tio̍h tōe chòe-gia̍p, chiū-sī Iâ-hô-hoa ê lô͘-po̍k Mô͘-se só͘ hō͘ in ê .

8Hiah-ê人起身去；約書亞命令hiah-ê去beh畫地圖ê人講：lín去遍行hit-ê地，畫圖倒tńg來我chia；我beh tī Sī-lô chia，耶和華ê面前，kā lín liam-khau。Hiah ê lâng khí-sin khì; Iok-su-a bēng-lēng hiah-ê khì beh ūi tē-tô͘ ê lâng kóng, Lín khì piàn-kiâⁿ hit ê tōe, ūi-tô͘ tò-tńg-lâi góa chia; góa beh tī Sī-lô chia, Iâ-hô-hoa ê bīn-chêng, kā lín liam-khau.

9In就去，遍行hit-ê地，照in ê城畫做七份，記tī冊裡，倒tńg到Sī-lô ê營中，見約書亞。In chiū khì, piàn-kiâⁿ hit ê tōe, chiàu in ê siâⁿ ūi-chòe chhit-hūn, kì tī chheh-ni̍h, tò-tńg kàu Sī-lô ê iâⁿ-tiong, kìⁿ Iok-su-a.

10約書亞就tī Sī-lô耶和華ê面前，kā in liam-khau；約書亞tī-hia分地hō͘以色列人，照in ê宗族。Iok-su-a chiū tī Sī-lô Iâ-hô-hoa ê bīn-chêng, kā in liam-khau; Iok-su-a tī-hia pun-tōe hō͘ Í-sek-lia̍t lâng, chiàu in ê chong-cho̍k.

11Kā便雅憫ê支派liam-khau，照in ê宗族所得tio̍h ê地；hit-ê界是tī猶大ê kiáⁿ孫，約瑟ê kiáⁿ孫ê中間。Kā Piān-ngá-bín ê chi-phài liam-khau, chiàu in ê chong-cho̍k só͘ tit-tio̍h ê tōe; hit ê kài sī tī Iû-tāi ê kiáⁿ-sun, Iok-sek ê kiáⁿ-sun ê tiong-kan.

12In北pêng ê界，是tùi約旦河起；伊ê界上去到耶利哥邊á ê北勢，koh上去，pôaⁿ過山，ǹg西勢去，直直到Pek-a-bûn ê曠野。In pak-pêng ê kài, sī tùi Iok-tàn hô khí; i ê kài chiūⁿ-khì kàu Iâ-lī-ko piⁿ-á ê pak-sì, koh chiūⁿ-khì, pôaⁿ-kè soaⁿ, ǹg sai-sì khì, ti̍t-ti̍t kàu Pek-a-bûn ê khòng-iá.

13Hit-ê界tùi-hia去到Lō͘-su，到Lō͘-su南勢ê邊á ( Lō͘-su就是Pek-te̍k-lī)。伊ê界koh落去到A-tha-lio̍k-a-ta̍t，óa近下面ê Pek-hô-lûn南pêng ê山；Hit ê kài tùi-hia khì kàu Lō͘-su, kàu Lō͘-su lâm-sì ê piⁿ-á ( Lō͘-su chiū-sī Pek-te̍k-lī). I ê kài koh lo̍h-khì kàu A-tha-lio̍k-a-ta̍t, óa-kūn ē-bīn ê Pek-hô-lûn lâm-pêng ê soaⁿ;

14伊ê界tùi西勢oat落南，tùi Pek-hô-lûn頭前南勢ê山，直到猶大人ê城Ki-lia̍t-pa-le̍k，(就是Ki-lia̍t-iâ-lîm) ；這是in西勢ê界。i ê kài tùi sai-sì oat-lo̍h lâm, tùi Pek-hô-lûn thâu-chêng lâm-sì ê soaⁿ, ti̍t-kàu Iû-tāi lâng ê siâⁿ Ki-lia̍t-pa-le̍k, (chiū-sī Ki-lia̍t-iâ-lîm); che sī in sai-sì ê kài.

15南pêng是tùi Ki-lia̍t-iâ-lîm ê極頭起；伊ê界tùi西勢出，到Nî-hut-to-a ê水泉；Lâm-pêng sī tùi Ki-lia̍t-iâ-lîm ê ke̍k-thâu khí; i ê kài tùi sai-sì chhut, kàu Nî-hut-to-a ê chúi-chôaⁿ;

16伊ê界koh落去到Piān-him-lùn山谷對面ê山邊，就是Lī-hoa̍t-im山谷北勢ê山；koh落去到Him-lùn山谷，到Iâ-pò͘-su ê南pêng；koh落去到Ún-lô-kiat；i ê kài koh lo̍h-khì kàu Piān-him-lùn soaⁿ-kok tùi-bīn ê soaⁿ-piⁿ, chiū-sī Lī-hoa̍t-im soaⁿ-kok pak-sì ê soaⁿ; koh lo̍h-khì kàu Him-lùn soaⁿ-kok, kàu Iâ-pò͘-su ê lâm-pêng; koh lo̍h-khì kàu Ún-lô-kiat;

17koh tùi北勢出去，到Ún-sī-le̍k，出去到A-to͘-bêng山坪對面ê Ki-lī-lio̍k，koh落去到Liû-piān ê kiáⁿ Pho-hán ê石磐。koh tùi pak-sì chhut-khì, kàu Ún-sī-le̍k, chhut-khì kàu A-to͘-bêng soaⁿ-phiâⁿ tùi-bīn ê Ki-lī-lio̍k, koh lo̍h-khì kàu Liû-piān ê kiáⁿ Pho-hán ê chio̍h-pôaⁿ.

18koh去A-la̍h-pa對面北勢ê邊á，落去到A-la̍h-pa；Koh khì A-la̍h-pa tùi-bīn pak-sì ê piⁿ-á, lo̍h-khì kàu A-la̍h-pa;

19伊ê界到Pek-hat-la̍h 北勢ê邊á；chit-ê界直直到鹽海北pêng ê海灣，就是約旦南勢ê河口；這是伊南pêng ê界；i ê kài kàu Pek-hat-la̍h pak-sì ê piⁿ-á; chit ê kài ti̍t-ti̍t kàu Iâm-hái pak-pêng ê hái-oan, chiū-sī Iok-tàn lâm-sì ê hô-kháu; che sī i lâm-pêng ê kài;

20東pêng ê界到約旦河。這是便雅憫人ê業，照in ê宗族，in四圍ê交界。tang-pêng ê kài kàu Iok-tàn hô. Che sī Piān-ngá-bín lâng ê gia̍p, chiàu in ê chong-cho̍k, in sì-ûi ê kau-kài.

21便雅憫ê支派照in ê宗族所得tio̍h ê城，就是耶利哥、Pek-hat-la̍h、I-be̍k-ki-sek；Piān-ngá-bín ê chi-phài chiàu in ê chong-cho̍k só͘ tit-tio̍h ê siâⁿ, chiū-sī Iâ-lī-ko, Pek-hat-la̍h, I-be̍k-ki-sek;

22Pek-a-la̍h-pa、Sé-má-liám、Pek-te̍k-lī；Pek-a-la̍h-pa, Sé-má-liám, Pek-te̍k-lī;

23A-bûn、Pa-la̍h、Gô-hut-la̍h；A-bûn, Pa-la̍h, Gô-hut-la̍h;

24Ki-hoat-a-mô͘-nî、Gô-hut-nî、Ka-pa；共十二座城，kap伊ê鄉社。Ki-hoat-a-mô͘-nî, Gô-hut-nî, Ka-pa; kiōng cha̍p-jī chō siâⁿ, kap i ê hiuⁿ-siā.

25Koh有Ki-piàn、La̍h-má、Pí-lo̍k；Koh ū Ki-piàn, La̍h-má, Pí-lo̍k;

26Bí-su-pa、Ki-hui-la̍h、Mô͘-sat；Bí-su-pa, Ki-hui-la̍h, Mô͘-sat;

27Lī-kian、I-lī-pì-le̍k、Tha-la̍h-la̍h；Lī-kian, I-lī-pì-le̍k, Tha-la̍h-la̍h;

28Sé-la̍h、Í-lī-hut、Iâ-pò͘-su，就是耶路撒冷、Ki-pí-a、Ki-lia̍t；共十四座城，kap伊ê鄉社。這是便雅憫人所得tio̍h ê業，照in ê宗族。Sé-la̍h, Í-lī-hut, Iâ-pò͘-su, chiū-sī Iâ-lō͘-sat-léng, Ki-pí-a, Ki-lia̍t; kiōng cha̍p-sì chō siâⁿ, kap i ê hiuⁿ-siā. Che sī Piān-ngá-bín lâng só͘ tit-tio̍h ê gia̍p, chiàu in ê chong-cho̍k.