1以色列人ê全會lóng聚集tī Sī-lô，搭會幕tī-hia；因為地方已經hō͘ in khah贏。Í-sek-lia̍t lâng ê choân-hōe lóng chū-chi̍p tī Sī-lô, tah hōe-bō͘ tī-hia; in-ūi tōe-hng í-keng hō͘ in khah-iâⁿ.

2以色列人中，iáu有七支派未得tio̍h in ê業。Í-sek-lia̍t lâng tiong, iáu ū chhit chi-phài bē tit-tio̍h in ê gia̍p.

3約書亞對以色列人講：耶和華，lín列祖ê上帝，所賞賜lín ê地，lín 延chhiân m̄去取伊，beh到tī時ah？Iok-su-a tùi Í-sek-lia̍t lâng kóng, Iâ-hô-hoa, lín lia̍t-chó͘ ê Siōng-tè, só͘ siúⁿ-sù lín ê tōe, lín iân-chhiân m̄-khì chhú i, beh kàu tī-sî ah?

4Lín ta̍k支派tio̍h揀三人，我beh 差in去；in就起身遍行hit-ê地，照in ê份額畫圖，就tò來我chia。Lín ta̍k chi-phài tio̍h kéng saⁿ-lâng, góa beh chhe in khì; in chiū khí-sin piàn-kiâⁿ hit ê tōe, chiàu in ê hūn-gia̍h ūi-tô͘, chiū tò-lâi góa chia.

5In tio̍h將地分做七份；猶大猶原tī南方，tiàm tī伊ê境內；約瑟家猶原tī北方tiàm tī伊ê境內。In tio̍h chiong tōe pun chòe chhit-hūn; Iû-tāi iû-goân tī lâm-hng, tiàm tī i ê kéng-lāi; Iok-sek ke iû-goân tī pak-hng tiàm tī i ê kéng-lāi.

6Lín tio̍h將地分做七份，畫圖the̍h來我chia；我就beh tī耶和華咱上帝ê面前kā lín liam-khau。Lín tio̍h chiong tōe pun chòe chhit-hūn, ūi-tô͘ the̍h-lâi góa chia; góa chiū beh tī Iâ-hô-hoa lán Siōng-tè ê bīn-chêng kā lín liam-khau.

7獨獨利未人tī lín中間無份，因為耶和華祭司ê職就是in ê業；Ka-tek、Liû-piān kap Má-ná-se半支派，已經tī約旦hit-pêng東勢得tio̍h地做業，就是耶和華ê奴僕摩西所hō͘ in ê。To̍k-to̍k Lī-bī lâng tī lín tiong-kan bô hūn, in-ūi Iâ-hô-hoa chè-si ê chit chiū-sī in ê gia̍p; Ka-tek Liû-piān kap Má-ná-se pòaⁿ-chi-phài, í-keng tī Iok-tàn hit-pêng tang-sì tit-tio̍h tōe chòe-gia̍p, chiū-sī Iâ-hô-hoa ê lô͘-po̍k Mô͘-se só͘ hō͘ in ê .

8Hiah-ê人起身去；約書亞命令hiah-ê去beh畫地圖ê人講：lín去遍行hit-ê地，畫圖倒tńg來我chia；我beh tī Sī-lô chia，耶和華ê面前，kā lín liam-khau。Hiah ê lâng khí-sin khì; Iok-su-a bēng-lēng hiah-ê khì beh ūi tē-tô͘ ê lâng kóng, Lín khì piàn-kiâⁿ hit ê tōe, ūi-tô͘ tò-tńg-lâi góa chia; góa beh tī Sī-lô chia, Iâ-hô-hoa ê bīn-chêng, kā lín liam-khau.

9In就去，遍行hit-ê地，照in ê城畫做七份，記tī冊裡，倒tńg到Sī-lô ê營中，見約書亞。In chiū khì, piàn-kiâⁿ hit ê tōe, chiàu in ê siâⁿ ūi-chòe chhit-hūn, kì tī chheh-ni̍h, tò-tńg kàu Sī-lô ê iâⁿ-tiong, kìⁿ Iok-su-a.

10約書亞就tī Sī-lô耶和華ê面前，kā in liam-khau；約書亞tī-hia分地hō͘以色列人，照in ê宗族。Iok-su-a chiū tī Sī-lô Iâ-hô-hoa ê bīn-chêng, kā in liam-khau; Iok-su-a tī-hia pun-tōe hō͘ Í-sek-lia̍t lâng, chiàu in ê chong-cho̍k.

11Kā便雅憫ê支派liam-khau，照in ê宗族所得tio̍h ê地；hit-ê界是tī猶大ê kiáⁿ孫，約瑟ê kiáⁿ孫ê中間。Kā Piān-ngá-bín ê chi-phài liam-khau, chiàu in ê chong-cho̍k só͘ tit-tio̍h ê tōe; hit ê kài sī tī Iû-tāi ê kiáⁿ-sun, Iok-sek ê kiáⁿ-sun ê tiong-kan.

12In北pêng ê界，是tùi約旦河起；伊ê界上去到耶利哥邊á ê北勢，koh上去，pôaⁿ過山，ǹg西勢去，直直到Pek-a-bûn ê曠野。In pak-pêng ê kài, sī tùi Iok-tàn hô khí; i ê kài chiūⁿ-khì kàu Iâ-lī-ko piⁿ-á ê pak-sì, koh chiūⁿ-khì, pôaⁿ-kè soaⁿ, ǹg sai-sì khì, ti̍t-ti̍t kàu Pek-a-bûn ê khòng-iá.

13Hit-ê界tùi-hia去到Lō͘-su，到Lō͘-su南勢ê邊á ( Lō͘-su就是Pek-te̍k-lī)。伊ê界koh落去到A-tha-lio̍k-a-ta̍t，óa近下面ê Pek-hô-lûn南pêng ê山；Hit ê kài tùi-hia khì kàu Lō͘-su, kàu Lō͘-su lâm-sì ê piⁿ-á ( Lō͘-su chiū-sī Pek-te̍k-lī). I ê kài koh lo̍h-khì kàu A-tha-lio̍k-a-ta̍t, óa-kūn ē-bīn ê Pek-hô-lûn lâm-pêng ê soaⁿ;

14伊ê界tùi西勢oat落南，tùi Pek-hô-lûn頭前南勢ê山，直到猶大人ê城Ki-lia̍t-pa-le̍k，(就是Ki-lia̍t-iâ-lîm) ；這是in西勢ê界。i ê kài tùi sai-sì oat-lo̍h lâm, tùi Pek-hô-lûn thâu-chêng lâm-sì ê soaⁿ, ti̍t-kàu Iû-tāi lâng ê siâⁿ Ki-lia̍t-pa-le̍k, (chiū-sī Ki-lia̍t-iâ-lîm); che sī in sai-sì ê kài.

15南pêng是tùi Ki-lia̍t-iâ-lîm ê極頭起；伊ê界tùi西勢出，到Nî-hut-to-a ê水泉；Lâm-pêng sī tùi Ki-lia̍t-iâ-lîm ê ke̍k-thâu khí; i ê kài tùi sai-sì chhut, kàu Nî-hut-to-a ê chúi-chôaⁿ;

16伊ê界koh落去到Piān-him-lùn山谷對面ê山邊，就是Lī-hoa̍t-im山谷北勢ê山；koh落去到Him-lùn山谷，到Iâ-pò͘-su ê南pêng；koh落去到Ún-lô-kiat；i ê kài koh lo̍h-khì kàu Piān-him-lùn soaⁿ-kok tùi-bīn ê soaⁿ-piⁿ, chiū-sī Lī-hoa̍t-im soaⁿ-kok pak-sì ê soaⁿ; koh lo̍h-khì kàu Him-lùn soaⁿ-kok, kàu Iâ-pò͘-su ê lâm-pêng; koh lo̍h-khì kàu Ún-lô-kiat;

17koh tùi北勢出去，到Ún-sī-le̍k，出去到A-to͘-bêng山坪對面ê Ki-lī-lio̍k，koh落去到Liû-piān ê kiáⁿ Pho-hán ê石磐。koh tùi pak-sì chhut-khì, kàu Ún-sī-le̍k, chhut-khì kàu A-to͘-bêng soaⁿ-phiâⁿ tùi-bīn ê Ki-lī-lio̍k, koh lo̍h-khì kàu Liû-piān ê kiáⁿ Pho-hán ê chio̍h-pôaⁿ.

18koh去A-la̍h-pa對面北勢ê邊á，落去到A-la̍h-pa；Koh khì A-la̍h-pa tùi-bīn pak-sì ê piⁿ-á, lo̍h-khì kàu A-la̍h-pa;

19伊ê界到Pek-hat-la̍h 北勢ê邊á；chit-ê界直直到鹽海北pêng ê海灣，就是約旦南勢ê河口；這是伊南pêng ê界；i ê kài kàu Pek-hat-la̍h pak-sì ê piⁿ-á; chit ê kài ti̍t-ti̍t kàu Iâm-hái pak-pêng ê hái-oan, chiū-sī Iok-tàn lâm-sì ê hô-kháu; che sī i lâm-pêng ê kài;

20東pêng ê界到約旦河。這是便雅憫人ê業，照in ê宗族，in四圍ê交界。tang-pêng ê kài kàu Iok-tàn hô. Che sī Piān-ngá-bín lâng ê gia̍p, chiàu in ê chong-cho̍k, in sì-ûi ê kau-kài.

21便雅憫ê支派照in ê宗族所得tio̍h ê城，就是耶利哥、Pek-hat-la̍h、I-be̍k-ki-sek；Piān-ngá-bín ê chi-phài chiàu in ê chong-cho̍k só͘ tit-tio̍h ê siâⁿ, chiū-sī Iâ-lī-ko, Pek-hat-la̍h, I-be̍k-ki-sek;

22Pek-a-la̍h-pa、Sé-má-liám、Pek-te̍k-lī；Pek-a-la̍h-pa, Sé-má-liám, Pek-te̍k-lī;

23A-bûn、Pa-la̍h、Gô-hut-la̍h；A-bûn, Pa-la̍h, Gô-hut-la̍h;

24Ki-hoat-a-mô͘-nî、Gô-hut-nî、Ka-pa；共十二座城，kap伊ê鄉社。Ki-hoat-a-mô͘-nî, Gô-hut-nî, Ka-pa; kiōng cha̍p-jī chō siâⁿ, kap i ê hiuⁿ-siā.

25Koh有Ki-piàn、La̍h-má、Pí-lo̍k；Koh ū Ki-piàn, La̍h-má, Pí-lo̍k;

26Bí-su-pa、Ki-hui-la̍h、Mô͘-sat；Bí-su-pa, Ki-hui-la̍h, Mô͘-sat;

27Lī-kian、I-lī-pì-le̍k、Tha-la̍h-la̍h；Lī-kian, I-lī-pì-le̍k, Tha-la̍h-la̍h;

28Sé-la̍h、Í-lī-hut、Iâ-pò͘-su，就是耶路撒冷、Ki-pí-a、Ki-lia̍t；共十四座城，kap伊ê鄉社。這是便雅憫人所得tio̍h ê業，照in ê宗族。Sé-la̍h, Í-lī-hut, Iâ-pò͘-su, chiū-sī Iâ-lō͘-sat-léng, Ki-pí-a, Ki-lia̍t; kiōng cha̍p-sì chō siâⁿ, kap i ê hiuⁿ-siā. Che sī Piān-ngá-bín lâng só͘ tit-tio̍h ê gia̍p, chiàu in ê chong-cho̍k.

1第二pái liam-khau是為tio̍h西門，就是為tio̍h西門人ê支派；照in ê宗族。In ê業是tī猶大人ê業ê中間。Tē-jī pái liam-khau sī ūi-tio̍h Se-biān, chiū-sī ūi-tio̍h Se-biān lâng ê chi-phài; chiàu in ê chong-cho̍k. In ê gia̍p sī tī Iû-tāi lâng ê gia̍p ê tiong-kan.

2In所得tio̍h ê產業，就是別是巴、Sī-pa、Mô͘-la̍h-tāi；In só͘ tit-tio̍h ê sán-gia̍p, chiū-sī Pia̍t-sī-pa, Sī-pa, Mô͘-la̍h-tāi;

3Hap-sat-su-a、Pa-la̍h、Í-sim；Hap-sat-su-a, Pa-la̍h, Í-sim;

4I-lī-to-la̍h、Pí-thó͘-le̍k、Hô-jíⁿ-má；I-lī-to-la̍h, Pí-thó͘-le̍k, Hô-jíⁿ-má;

5Sé-kek-la̍h、Pek-má-ka-phok、Hap-sat-so͘-sat；Sé-kek-la̍h, Pek-má-ka-phok, Hap-sat-so͘-sat;

6Pek-lī-pa-bu̍t、Sa-ló͘-hiám；共十三座城，kap伊ê鄉社。Pek-lī-pa-bu̍t, Sa-ló͘-hiám; kiōng cha̍p-saⁿ chō siâⁿ, kap i ê hiuⁿ-siā.

7A-in、Lī-bûn、Í-thiap、A-san；共四座城，kap伊ê鄉社；A-in, Lī-bûn, Í-thiap, A-san; kiōng sì chō siâⁿ, kap i ê hiuⁿ-siā;

8kap chiah-ê城四圍一切ê鄉社，直到Pa-la̍h-pí-jíⁿ南勢ê La̍h-má。這是西門人ê支派所得tio̍h ê業，照in ê宗族。kap chiah ê siâⁿ sì-ûi it-chhè ê hiuⁿ-siā, ti̍t-kàu Pa-la̍h-pí-jíⁿ lâm-sì ê La̍h-má. Che sī Se-biān lâng ê chi-phài só͘ tit-tio̍h ê gia̍p, chiàu in ê chong-cho̍k.

9西門人ê業是tùi猶大人ê業中得tio̍h ê；因為猶大人ê份業siuⁿ-chōe；所以西門人tī in ê業中得tio̍h業。Se-biān lâng ê gia̍p sī tùi Iû-tāi lâng ê gia̍p-tiong tit-tio̍h ê; in-ūi Iû-tāi lâng ê hūn-gia̍p siuⁿ-chōe; só͘-í Se-biān lâng tī in ê gia̍p-tiong tit-tio̍h gia̍p.

10第三pái liam-khau是為tio̍h Se-pò͘-lûn人，照in ê宗族。Tē-saⁿ pái liam-khau sī ūi-tio̍h Se-pò͘-lûn lâng, chiàu in ê chong-cho̍k.

11In ê業ê地界是到Sat-li̍p；in ê界西勢上去到Má-la̍h-la̍h，透到Tāi-pa-siat，koh透到 Iok-liām頭前ê溪；In ê gia̍p ê tōe-kài sī kàu Sat-li̍p; in ê kài sai-sì chiūⁿ-khì kàu Má-la̍h-la̍h, thàu-kàu Tāi-pa-siat, koh thàu-kàu Iok-liām thâu-chêng ê khoe;

12koh tùi Sat-li̍p oat tùi東勢，ǹg日出ê所在，到Kiat-su-lio̍k-tha-po̍k ê交界；koh thàng到Tāi-pi-la̍h，上到Ngá-hui-a。koh tùi Sat-li̍p oat tùi tang-sì, ǹg ji̍t-chhut ê só͘-chāi, kàu Kiat-su-lio̍k-tha-po̍k ê kau-kài; koh thàng-kàu Tāi-pi-la̍h, chiūⁿ kàu Ngá-hui-a.

13Tùi hia ǹg東去到Ka-te̍k-hí-hut，koh到Í-te̍k-ka-sìn，koh出去Lîm-bûn，thàng到Nî-a；Tùi hia ǹg-tang khì kàu Ka-te̍k-hí-hut, koh kàu Í-te̍k-ka-sìn, koh chhut-khì Lîm-bûn, thàng-kàu Nî-a;

14Hit-ê界tùi北方se̍h伊，到Hap-ná-tùn，thàng到I-hut-tha-i-le̍k ê山谷止；hit ê kài tùi pak-hng se̍h i, kàu Hap-ná-tùn, thàng-kàu I-hut-tha-i-le̍k ê soaⁿ-kok chí;

15iáu有Ka-tha、Ná-hap-la̍h、Sin-lûn、Í-tāi-la̍h、伯利恆；共十二座城，kap in ê鄉社。iáu ū Ka-tha, Ná-hap-la̍h, Sin-lûn, Í-tāi-la̍h, Pek-lī-hêng; kiōng cha̍p-jī chō siâⁿ, kap in ê hiuⁿ-siā.

16Chiah-ê城，kap in ê鄉社，就是Se-pò͘-lûn人所得tio̍h ê業，照in ê宗族。Chiah ê siâⁿ, kap in ê hiuⁿ-siā, chiū-sī Se-pò͘-lûn lâng só͘ tit-tio̍h ê gia̍p, chiàu in ê chong-cho̍k.

17第四pái liam-khau為tio̍h Í-sat-ka，就是為tio̍h Í-sat-ka人，照in ê宗族；Tē-sì pái liam-khau ūi-tio̍h Í-sat-ka, chiū-sī ūi-tio̍h Í-sat-ka lâng, chiàu in ê chong-cho̍k;

18in ê地界有Iâ-su-lia̍t、Ki-so͘-lu̍t、Su-liām；in ê tōe-kài ū Iâ-su-lia̍t, Ki-so͘-lu̍t, Su-liām;

19Hap-hut-liân、Sī-àn、A-ná-hap-la̍h；Hap-hut-liân, Sī-àn, A-ná-hap-la̍h;

20La̍h-phek、Ki-siān、A-pia̍t；La̍h-phek, Ki-siān, A-pia̍t;

21Lī-bia̍t、Ún-kan-lêng、Ún-hap-tāi、Pek-phàⁿ-siat；Lī-bia̍t, Ún-kan-lêng, Ún-hap-tāi, Pek-phàⁿ-siat;

22Hit-ê交界到Tha-po̍k、Sa-hap-sé-má、Pek-sī-be̍k；in ê界ê極頭是tī約旦；共十六座城，kap in ê鄉社。hit ê kau-kài kàu Tha-po̍k, Sa-hap-sé-má, Pek-sī-be̍k; in ê kài ê ke̍k-thâu sī tī Iok-tàn; kiōng cha̍p-la̍k chō siâⁿ, kap in ê hiuⁿ-siā.

23Chiah-ê城，kap in ê鄉社，就是Í-sat-ka人ê支派所得tio̍h ê業，照in ê宗族。Chiah ê siâⁿ, kap in ê hiuⁿ-siā, chiū-sī Í-sat-ka lâng ê chi-phài só͘ tit-tio̍h ê gia̍p, chiàu in ê chong-cho̍k.

24第五pái liam-khau是為tio̍h A-siat人ê支派，照in ê宗族。Tē-gō͘ pái liam-khau sī ūi-tio̍h A-siat lâng ê chi-phài, chiàu in ê chong-cho̍k.

25In ê地界是Hek-kah、Hap-lī、Pí-tiân、Ap-soah；In ê tōe-kài sī Hek-kah, Hap-lī, Pí-tiân, Ap-soah;

26A-la̍h-bí-le̍k、A-boa̍t、Bí-sa-le̍k，ǹg西勢到Ka-bi̍t，koh到Hi-hat-li̍p-la̍p；A-la̍h-bí-le̍k, A-boa̍t, Bí-sa-le̍k, ǹg sai-sì kàu Ka-bi̍t, koh kàu Hi-hat-li̍p-la̍p;

27oat ǹg日出ê所在，到Pek-tāi-kún，thàng到Se-pò͘-lûn，oat北勢到I-hut-tha-i-le̍k山谷，到Pek-í-be̍k，kap Nî-gia̍p，也thàng到Ka-pō͘-le̍k ê tò-pêng。oat ǹg ji̍t-chhut ê só͘-chāi, kàu Pek-tāi-kún, thàng-kàu Se-pò͘-lûn, oat pak-sì kàu I-hut-tha-i-le̍k soaⁿ-kok, kàu Pek-í-be̍k, kap Nî-gia̍p, iā thàng-kàu Ka-pō͘-le̍k ê tò-pêng.

28Koh到Gī-pek-lûn、Lī-ha̍p、Hap-bûn、Ka-ná，直到Se-tùn ê大城。Koh kàu Gī-pek-lûn, Lī-ha̍p, Hap-bûn, Ka-ná, ti̍t-kàu Se-tùn ê tōa-siâⁿ.

29Hit-ê界oat到La̍h-má，kap堅固ê城Chhui-lô；hit-ê界koh se̍h到Hô-sat；伊ê極頭到tī海，近A-hek-sek一帶ê地方；Hit ê kài oat kàu La̍h-má, kap kian-kò͘ ê siâⁿ Chhui-lô; hit ê kài koh se̍h kàu Hô-sat; i ê ke̍k-thâu kàu tī hái, kūn A-h[k]ek-sek it-tài ê tōe-hng;

30koh有O͘-má、A-hut、Lī-ha̍p；共二十二座城，kap伊ê鄉社。koh ū O͘-má, A-hut, Lī-ha̍p; kiōng jī-cha̍p-jī chō siâⁿ, kap i ê hiuⁿ-siā.

31Chiah-ê城，kap in ê鄉社，就是A-siat人ê支派所得tio̍h ê業，照in ê宗族。Chiah ê siâⁿ, kap in ê hiuⁿ-siā, chiū-sī A-siat lâng ê chi-phài só͘ tit-tio̍h ê gia̍p, chiàu in ê chong-cho̍k.

32第六pái liam-khau為tio̍h Ná-hut-tha-lī人，就是Ná-hut-tha-lī ê人，照in ê宗族。Tē-la̍k pái liam-khau ūi-tio̍h Ná-hut-tha-lī lâng, chiū-sī Ná-hut-tha-lī ê lâng, chiàu in ê chong-cho̍k.

33In ê界是tùi Hi-lī-hut，tùi Sat-ná-im ê橡樹，tùi A-tāi-bí-nî-kiat，kap Ngá-pí-liap，直到La̍h-kiōng，thàng到約旦河；In ê kài sī tùi Hi-lī-hut, tùi Sat-ná-im ê siōng-chhiū, tùi A-tāi-bí-nî-kiat, kap Ngá-pí-liap, ti̍t-kàu La̍h-kiōng, thàng-kàu Iok-tàn hô;

34Hit-ê界oat ǹg西勢，到A-su-la̍p-tha-po̍k；tùi hia出去到Hō͘-kat，南pêng到Se-pò͘-lûn，西pêng到A-siat；koh ǹg日出ê所在，透到約旦河hia，到猶大。hit ê kài oat ǹg sai-sì, kàu A-su-la̍p-tha-po̍k; tùi hia chhut-khì kàu Hō͘-kat, lâm-pêng kàu Se-pò͘-lûn, sai-pêng kàu A-siat; koh ǹg ji̍t-chhut ê só͘-chāi, thàu-kàu Iok-tàn hô hia, kàu Iû-tāi.

35堅固ê城就是Se-teng，Chhek-jíⁿ，Hap-boa̍t，La̍h-kah，Ki-nî-lia̍t；Kian-kò͘ ê siâⁿ chiū-sī Se-teng, Chhek-jíⁿ, Hap-boa̍t, La̍h-kah, Ki-nî-lia̍t;

36A-tāi-má，La̍h-má，Hā-só；A-tāi-má, La̍h-má, Hā-só;

37Ki-te-su，Í-tek-lâi，Ún-hā-só；Ki-te-su, Í-tek-lâi, Ún-hā-só;

38Í-lī-ún，Bi̍t-tāi-i-le̍k，Hô-liân，Pek-a-la̍p，Pek-sī-be̍k；共十九座城，kap in ê鄉社。Í-lī-ún, Bi̍t-tāi-i-le̍k, Hô-liân, Pek-a-la̍p, Pek-sī-be̍k; kiōng cha̍p-káu chō siâⁿ, kap in ê hiuⁿ-siā.

39Chiah-ê城kap in ê鄉社就是Ná-hut-tha-lī人ê支派所得tio̍h ê業，照in ê宗族。Chiah ê siâⁿ kap in ê hiuⁿ-siā chiū-sī Ná-hut-tha-lī lâng ê chi-phài só͘ tit-tio̍h ê gia̍p, chiàu in ê chong-cho̍k.

40第七pái liam-khau為tio̍h Tàn ê kiáⁿ孫ê支派，照in ê宗族。Tē-chhit pái liam-khau ūi-tio̍h Tàn ê kiáⁿ-sun ê chi-phài, chiàu in ê chong-cho̍k.

41In ê業ê地界是Só-la̍h，Í-si̍t-tô，I-jíⁿ-sī-be̍k；In ê gia̍p ê tōe-kài sī Só-la̍h, Í-si̍t-tô, I-jíⁿ-sī-be̍k;

42Sa-la̍h-pin，A-ngá-lûn，I-thê-la̍h；Sa-la̍h-pin, A-ngá-lûn, I-thê-la̍h;

43Í-lûn，Têng-ná-tha，Í-kek-lûn；Í-lûn, Têng-ná-tha, Í-kek-lûn;

44I-lī-thê-ki，Ki-pí-tùn，Pa-la̍h；I-lī-thê-ki, Ki-pí-tùn, Pa-la̍h;

45I-ô͘-tek，Pí-nî-pí-la̍h，Ka-te̍k-lîm-bûn；I-ô͘-tek, Pí-nî-pí-la̍h, Ka-te̍k-lîm-bûn;

46Bí-iâ-khun，La̍h-khun，kap約-冇對面ê地界。Bí-iâ-khun, La̍h-khun, kap Iok-phàⁿ tùi-bīn ê tōe-kài.

47Tàn ê kiáⁿ孫ê地界pôaⁿ過in ê本-業；因為Tàn ê kiáⁿ孫上去攻擊Lī-siān，來取伊，用刀thâi城內ê人，得tio̍h hit-ê城；用in祖公Tàn ê名叫Lī-siān做Tàn。Tàn ê kiáⁿ-sun ê tōe-kài pôaⁿ-kè in ê pún-gia̍p; in-ūi Tàn ê kiáⁿ-sun chiūⁿ-khì kong-kek Lī-siān, lâi chhú i, ēng to thâi siâⁿ-lāi ê lâng, tit-tio̍h hit ê siâⁿ; ēng in chó͘-kong Tàn ê miâ kiò Lī-siān chòe Tàn.

48Chiah-ê城，kap in ê鄉社，就是Tàn ê kiáⁿ孫ê支派所得tio̍h ê業，照in ê宗族。Chiah ê siâⁿ, kap in ê hiuⁿ-siā, chiū-sī Tàn ê kiáⁿ-sun ê chi-phài só͘ tit-tio̍h ê gia̍p, chiàu in ê chong-cho̍k.

49In照地界分地做業已經完，以色列人就tī in中間將地 hō͘ Lùn ê kiáⁿ約書亞做業。In chiàu tōe-kài pun tōe chòe-gia̍p í-keng oân, Í-sek-lia̍t lâng chiū tī in tiong-kan chiong tōe hō͘ Lùn ê kiáⁿ Iok-su-a chòe-gia̍p.

50照耶和華ê命令，將伊所求ê城hō͘伊，就是Í-hoat-liân山地ê Têng-ná-se-la̍h；伊就起hit-ê城，tiàm tī hit中間。Chiàu Iâ-hô-hoa ê bēng-lēng, chiong i só͘ kiû ê siâⁿ hō͘ i, chiū-sī Í-hoat-liân soaⁿ-tōe ê Têng-ná-se-la̍h; i chiū khí hit ê siâⁿ, tiàm tī hit tiong-kan.

51Chiah-ê就是祭司Í-lī-a-sat，kap Lùn ê kiáⁿ約書亞，以及以色列人支派中ê族長，tī Sī-lô，tī會幕門口，耶和華ê面前，liam-khau所分ê業。Án-ni in分完hit-ê地。Chiah-ê chiū-sī chè-si Í-lī-a-sat, kap Lùn ê kiáⁿ Iok-su-a, í-ki̍p Í-sek-lia̍t lâng chi-phài-tiong ê cho̍k-tiúⁿ, tī Sī-lô, tī hōe-bō͘ mn̂g-kháu, Iâ-hô-hoa ê bīn-chêng, liam-khau só͘ pun ê gia̍p. Án-ni in pun-oân hit ê tōe.

1耶和華吩咐約書亞講：Iâ-hô-hoa hoan-hù Iok-su-a kóng,

2你吩咐以色列人，講：Lín tio̍h照我託摩西所kā lín講ê，為家己設立逃閃ê城；Lí hoan-hù Í-sek-lia̍t lâng, kóng, Lín tio̍h chiàu Góa thok Mô͘-se só͘ kā lín kóng ê, ūi ka-kī siat-li̍p tô-siám ê siâⁿ;

3Hō͘ hit-ê無意中錯誤thâi人ê，thang走到hia；hiah-ê城thang做lín閃避報人命ê人ê所在。hō͘ hit ê bô-ì-tiong chhò-gō͘ thâi-lâng-ê, thang cháu kàu hia; hiah ê siâⁿ thang chòe lín siám-pī pò-jîn-bēng ê lâng ê só͘-chāi.

4伊beh走到chiah-ê城ê一個，khiā tī城門口，將伊ê事情講hō͘ hit-ê城ê長老聽；in就收伊入城，hō͘伊一所在，hō͘伊tiàm tī in中間。I beh cháu kàu chiah ê siâⁿ ê chi̍t-ê, khiā tī siâⁿ-mn̂g-kháu, chiong i ê sū-chêng kóng hō͘ hit ê siâⁿ ê tiúⁿ-ló thiaⁿ; in chiū siu i ji̍p siâⁿ, hō͘ i chi̍t só͘-chāi, hō͘ i tiàm tī in tiong-kan.

5報人命ê若追jip伊，in m̄-thang用thâi人ê交tī伊ê手；因為伊錯誤thâi死伊ê厝邊，平素無怨恨伊。Pò-jîn-bēng-ê nā tui-jip i, in m̄-thang ēng thâi-lâng-ê kau tī i ê chhiú; in-ūi i chhò-gō͘ thâi-sí i ê chhù-piⁿ, pêng-sò͘ bô oàn-hūn i.

6伊beh tòa tī hit-ê城，thèng候khiā tī會眾ê面前受審判，thèng候hit時ê祭司長已經死，thâi人ê chiah thang tò去到本城，本家，就是伊所tùi hia走出來hit-ê城。I beh tòa tī hit ê siâⁿ, thèng-hāu khiā tī hōe-chiòng ê bīn-chêng siū sím-phòaⁿ, thèng-hāu hit-sî ê chè-si-tiúⁿ í-keng sí, thâi-lâng-ê chiah thang tò-khì kàu pún-siâⁿ, pún-ke, chiū-sī i só͘ tùi hia cháu-chhut-lâi hit ê siâⁿ.

7In就定tio̍h 設 tī Ná-hut-tha-lī山地，tī加利利ê Ki-te-su，kap tī Í-hoat-liân山地ê示劍，以及tī猶大山地ê Ki-lia̍t-a-pa，就是Hi-pek-lûn。In chiū tiāⁿ-tio̍h siat tī Ná-hut-tha-lī soaⁿ-tōe, tī Ka-lī-lī ê Ki-te-su, kap tī Í-hoat-liân soaⁿ-tōe ê Sī-kiàm, í-ki̍p tī Iû-tāi soaⁿ-tōe ê Ki-lia̍t-a-pa, chiū-sī Hi-pek-lûn.

8Koh tī約旦hit-pêng，近耶利哥東勢，設立屬Liû-piān支派，tī曠野，tī平洋ê Pí-sek；kap屬Ka-tek支派Ki-lia̍t ê La̍h-boa̍t；以及屬Má-ná-se支派，Pa-san ê Ko-lân。Koh tī Iok-tàn hit-pêng, kūn Iâ-lī-ko tang-sì, siat-li̍p sio̍k Liû-piān chi-phài, tī khòng-iá, tī pîⁿ-iûⁿ ê Pí-sek; kap sio̍k Ka-tek chi-phài Ki-lia̍t ê La̍h-boa̍t; í-ki̍p sio̍k Má-ná-se chi-phài, Pa-san ê Ko-lân.

9Chiah-ê是為tio̍h以色列眾人，kap寄腳tī中間所設ê城，hō͘錯誤thâi人ê lóng thang走到hia，無死tī報人命ê人ê手，thèng候伊khiā tī會眾ê面前。Chiah-ê sī ūi-tio̍h Í-sek-lia̍t chèng-lâng, kap kià-kha tī tiong-kan só͘ siat ê siâⁿ, hō͘ chhò-gō͘ thâi-lâng-ê lóng thang cháu kàu hia, bô sí tī pò-jîn-bēng ê lâng ê chhiú, thèng-hāu i khiā tī hōe-chiòng ê bīn-chêng.