1Hit時約書亞叫Liû-piān人、Ka-tek人，Kap Má-ná-se半支派ê人來，Hit-sî Iok-su-a kiò Liû-piān lâng, Ka-tek lâng, Kap Má-ná-se pòaⁿ-chi-phài ê lâng lâi,

2對in講，耶和華ê奴僕摩西所命令lín ê，lín lóng遵守，我所命令lín ê，lín也lóng聽thàn；tùi in kóng, Iâ-hô-hoa ê lô͘-po̍k Mô͘-se só͘ bēng-lēng lín ê, lín lóng chun-siú, góa só͘ bēng-lēng lín ê, lín iā lóng thiaⁿ-thàn;

3lín chiah-chōe日，lóng無離開lín ê兄弟，直到今á日，lín也有守耶和華lín上帝所命令lín tio̍h守ê。lín chiah-chōe ji̍t, lóng bô lī-khui lín ê hiaⁿ-tī, ti̍t-kàu kin-á-ji̍t, lín iā ū siú Iâ-hô-hoa lín Siōng-tè só͘ bēng-lēng lín tio̍h siú ê.

4Taⁿ耶和華lín上帝照祂所應允ê，hō͘ lín兄弟得tio̍h平安；taⁿ lín thang 倒tńg去lín ê布棚，到耶和華ê奴僕摩西tī約旦hit-pêng所賜hō͘ lín做業ê地。Taⁿ Iâ-hô-hoa lín Siōng-tè chiàu I só͘ èng-ún-ê, hō͘ lín hiaⁿ-tī tit-tio̍h pêng-an; taⁿ lín thang tò-tńg-khì lín ê pò͘-pîⁿ, kàu Iâ-hô-hoa ê lô͘-po̍k Mô͘-se tī Iok-tàn hit-pêng só͘ sù-hō͘ lín chòe-gia̍p ê tōe.

5總是lín切切tio̍h謹慎，遵thàn耶和華ê奴僕摩西所命令lín ê誡命律法，疼耶和華lín ê上帝，行伊一切ê道路，守伊ê誡命，結聯tī伊，盡心盡性服事伊。Chóng-sī lín chhiat-chhiat tio̍h kín-sīn, chun-thàn Iâ-hô-hoa ê lô͘-po̍k Mô͘-se só͘ bēng-lēng lín ê kài-bēng lu̍t-hoat, thiàⁿ Iâ-hô-hoa lín ê Siōng-tè, kiâⁿ I it-chhè ê tō-lō͘, siú I ê kài-bēng, kiat-liân tī I, chīn-sim chīn-sèng ho̍k-sāi I.

6Tùi án-ni，約書亞kā in祝福，差in去；in就tò去in ê布棚。Tùi án-ni Iok-su-a kā in chiok-hok, chhe in khì; in chiū tò-khì in ê pò͘-pîⁿ.

7Má-ná-se半支派，摩西已經tī Pa-san分業hō͘ in；iáu半支派約書亞tī約旦hit-pêng西勢，tī in兄弟中分業hō͘ in；約書亞差in tò去布棚ê時，kā in祝福；Má-ná-se pòaⁿ-chi-phài, Mô͘-se í-keng tī Pa-san pun-gia̍p hō͘ in; iáu pòaⁿ-chi-phài Iok-su-a tī Iok-tàn hit-pêng sai-sì, tī in hiaⁿ-tī-tiong pun-gia̍p hō͘ in; Iok-su-a chhe in tò-khì pò͘-pîⁿ ê sî, kā in chiok-hok;

8吩咐in講：Lín tio̍h 帶chōe-chōe財物，chōe-chōe cheng-siⁿ，kap銀、金、銅、鐵，kap chōe-chōe衣服，tò去lín ê布棚；將lín所搶對敵ê贓物，kap lín ê兄弟相kap分。hoan-hù in kóng, Lín tio̍h tòa chōe-chōe châi-bu̍t, chōe-chōe cheng-siⁿ, kap gûn, kim, tâng, thih, kap chōe-chōe i-ho̍k, tò-khì lín ê pò͘-pîⁿ; chiong lín só͘ chhiúⁿ tùi-te̍k ê chong-bu̍t, kap lín ê hiaⁿ-tī saⁿ-kap pun.

9Tùi án-ni，Liû-piān人、Ka-tek人、Má-ná-se半支派ê人，tùi迦南地ê Sī-lô起身，離開以色列人，beh tò去in得tio̍h Ki-lia̍t地；就是照耶和華託摩西所命令ê，得tio̍h做業ê地。Tùi án-ni Liû-piān lâng, Ka-tek lâng, Má-ná-se pòaⁿ-chi-phài ê lâng, tùi Ka-lâm tōe ê Sī-lô khí-sin, lī-khui Í-sek-lia̍t lâng, beh tò-khì in tit-tio̍h Ki-lia̍t tōe; chiū-sī chiàu Iâ-hô-hoa thok Mô͘-se só͘ bēng-lēng ê, tit-tio̍h chòe-gia̍p ê tōe.

10Liû-piān人、Ka-tek人，kap Má-ná-se半支派，到約旦河邊一帶ê迦南地，就tī近約旦hia，起一座壇，hit-ê壇看了真大。Liû-piān lâng, Ka-tek lâng, kap Má-ná-se pòaⁿ-chi-phài, kàu Iok-tàn hô-piⁿ it-tài ê Ka-lâm tōe, chiū tī kūn Iok-tàn hia, khí chi̍t chō tôaⁿ, hit ê tôaⁿ khòaⁿ-liáu chin-tōa.

11以色列人聽見講：看ah，Liû-piān人、Ka-tek人，kap Má-ná-se半支派有起一座壇tī迦南地ê頭前，約旦ê邊á，以色列人過去ê所在。Í-sek-lia̍t lâng thiaⁿ-kìⁿ kóng, Khòaⁿ ah, Liû-piān lâng, Ka-tek lâng, kap Má-ná-se pòaⁿ-chi-phài ū khí chi̍t chō tôaⁿ tī Ka-lâm tōe ê thâu-chêng, Iok-tàn ê piⁿ-á, Í-sek-lia̍t lâng kè-khì ê só͘-chāi.

12以色列人聽見，以色列人全會lóng聚集tī Sī-lô，beh上去kap in交戰。Í-sek-lia̍t lâng thiaⁿ-kìⁿ, Í-sek-lia̍t lâng choân-hōe lóng chū-chi̍p tī Sī-lô, beh chiūⁿ-khì kap in kau-chiàn.

13以色列人差祭司Í-lī-a-sat ê kiáⁿ Hui-nî-hap去Ki-lia̍t地見Liû-piān人、Ka-tek人，Má-ná-se半支派；Í-sek-lia̍t lâng chhe chè-si Í-lī-a-sat ê kiáⁿ Hui-nî-hap khì Ki-lia̍t tōe kìⁿ Liû-piān lâng, Ka-tek lâng, Má-ná-se pòaⁿ-chi-phài;

14koh差十個首領kap伊去，就是以色列ta̍k支派ta̍k族一個首領ta̍k人tī以色列軍隊中做族長。koh chhe cha̍p ê siú-léng kap i khì, chiū-sī Í-sek-lia̍t ta̍k chi-phài ta̍k-cho̍k chi̍t ê siú-léng ta̍k-lâng tī Í-sek-lia̍t kun-tūi-tiong chòe cho̍k-tiúⁿ.

15In到Ki-lia̍t地，見Liû-piān人、Ka-tek人，kap Má-ná-se半支派，對in講，In kàu Ki-lia̍t tōe, kìⁿ Liû-piān lâng, Ka-tek lâng, kap Má-ná-se pòaⁿ-chi-phài, tùi in kóng,

16耶和華全會ê眾人án-ni講：Lín干犯以色列ê上帝，今á日oa̍t-tńg無tè耶和華，為家己起一座壇，致到今á日悖逆耶和華，犯tio̍h這是甚麼罪ah？Iâ-hô-hoa choân-hōe ê chèng-lâng án-ni kóng, Lín kan-hoān Í-sek-lia̍t ê Siōng-tè, kin-á-ji̍t oa̍t-tńg bô tè Iâ-hô-hoa, ūi ka-kī khí chi̍t chō tôaⁿ, tì-kàu kin-á-ji̍t pōe-ge̍k Iâ-hô-hoa, hoān-tio̍h che sī sím-mi̍h chōe ah?

17早對tī Pí-jíⁿ ê罪，咱iáu掠做小khóa mah？雖然瘟疫到耶和華ê會眾，到今á日咱iáu未清氣；Chá tùi tī Pí-jíⁿ ê chōe, lán iáu lia̍h-chòe sió-khóa mah? Sui-jiân un-e̍k kàu Iâ-hô-hoa ê hōe-chiòng, kàu kin-á-ji̍t lán iáu-bē chheng-khì;

18lín今á日竟然oa̍t-tńg無tè耶和華ah！lín今á日悖逆耶和華，明á日伊beh受氣以色列ê全會。lín kin-á-ji̍t kéng-jiân oa̍t-tńg bô tè Iâ-hô-hoa ah! lín kin-á-ji̍t pōe-ge̍k Iâ-hô-hoa, bîn-á-ji̍t I beh siū-khì Í-sek-lia̍t ê choân-hōe.

19Lín所得tio̍h做業ê地，若無清氣，就thang過來耶和華ê地ê業，就是耶和華會幕所tiàm ê所在，tī阮中間得tio̍h業；總是m̄-thang悖逆耶和華，也m̄-thang悖逆阮，m̄-thang tī耶和華咱上帝ê壇以外，為家己koh起壇。Lín só͘ tit-tio̍h chòe-gia̍p ê tōe, nā bô chheng-khì, chiū thang kè-lâi Iâ-hô-hoa ê tōe ê gia̍p, chiū-sī Iâ-hô-hoa hōe-bō͘ só͘ tiàm ê só͘-chāi, tī goán tiong-kan tit-tio̍h gia̍p; chóng-sī m̄-thang pōe-ge̍k Iâ-hô-hoa, iā m̄-thang pōe-ge̍k goán, m̄-thang tī Iâ-hô-hoa lán Siōng-tè ê tôaⁿ í-gōa, ūi ka-kī koh khí tôaⁿ.

20前謝拉 ê曾孫A-kan，kiám無tī hit-ê應該獻ê物犯罪，就有受氣臨到tī以色列ê全會mah？hit-ê人tī伊所犯ê罪，m̄-nā伊家己一人死。Chêng Siā-la̍h ê cheng-sun A-kan, kiám bô tī hit ê eng-kai hiàn ê mi̍h hoān-chōe, chiū ū siū-khì lîm-kàu tī Í-sek-lia̍t ê choân-hōe mah? hit ê lâng tī i só͘ hoān ê chōe, m̄-nā i ka-kī chi̍t-lâng sí.

21Tùi án-ni，Liû-piān人、Ka-tek人、Má-ná-se半支派應以色列軍隊ê頭人講：Tùi án-ni Liû-piān lâng, Ka-tek lâng, Má-ná-se pòaⁿ-chi-phài ìn Í-sek-lia̍t kun-tūi ê thâu-lâng kóng,

22全能ê上帝耶和華，全能ê上帝耶和華，伊知，以色列也beh知，阮若有悖逆ê意思，á是干犯耶和華，Choân-lêng ê Siōng-tè Iâ-hô-hoa, choân-lêng ê Siōng-tè Iâ-hô-hoa, I chai, Í-sek-lia̍t iā beh chai, goán nā ū pōe-ge̍k ê ì-sù, á-sī kan-hoān Iâ-hô-hoa,

23(今á日無救阮) ，為家己起壇，beh oa̍t-tńg無tè耶和華，á是beh獻燒祭、素祭、謝恩祭，tī hit頂面，耶和華beh歸咎伊；(kin-á-ji̍t bô kiù goán), ūi ka-kī khí tôaⁿ, beh oa̍t-tńg bô tè Iâ-hô-hoa, á-sī beh hiàn sio-chè, sò͘-chè, siā-un chè, tī hí téng-bīn, Iâ-hô-hoa beh kui-kiū i;

24阮做chit-ê tāi-chì是為tio̍h持防chiah故意做；是驚了後日lín ê kiáⁿ孫對阮ê kiáⁿ孫講：Lín kap耶和華以色列ê上帝有甚麼關係ah？goán chòe chit ê tāi-chì sī ūi-tio̍h tî-hông chiah kò͘-ì chòe; sī kiaⁿ-liáu āu-ji̍t lín ê kiáⁿ-sun tùi goán ê kiáⁿ-sun kóng, Lín kap Iâ-hô-hoa Í-sek-lia̍t ê Siōng-tè ū sím-mi̍h koan-hē ah?

25Liû-piān人、Ka-tek人ah，耶和華設 chit-ê約旦，tī lín kap阮ê中間做界限；taⁿ lín tī耶和華無份；án-ni就lín ê kiáⁿ孫會hō͘阮ê kiáⁿ孫無koh敬畏耶和華。Liû-piān lâng, Ka-tek lâng ah, Iâ-hô-hoa siat chit ê Iok-tàn, tī lín kap goán ê tiong-kan chòe kài-hān; taⁿ lín tī Iâ-hô-hoa bô hūn; án-ni chiū lín ê kiáⁿ-sun ōe hō͘ goán ê kiáⁿ-sun bô koh kèng-ùi Iâ-hô-hoa.

26所以阮相kap講：Taⁿ咱tio̍h為家己起一座壇，m̄是為tio̍h燒祭，也m̄是為tio̍h別號ê祭；Só͘-í goán saⁿ-kap kóng, Taⁿ lán tio̍h ūi ka-kī khí chi̍t chō tôaⁿ, m̄-sī ūi-tio̍h sio-chè, iā m̄-sī ūi-tio̍h pa̍t-hō ê chè;

27就是為tio̍h lín阮ê中間，以及lín kap阮後代ê中間做證據；hō͘阮thang tī耶和華ê面前，用阮ê燒祭、謝恩祭，kap別號祭，來服事伊；免得lín ê kiáⁿ孫後日對阮ê kiáⁿ孫講：Lín無份tī耶和華。chiū-sī ūi-tio̍h lín goán ê tiong-kan, í-ki̍p lín kap goán āu-tāi ê tiong-kan chòe chèng-kù; hō͘ goán thang tī Iâ-hô-hoa ê bīn-chêng, ēng goán ê sio-chè, siā-un-chè, kap pa̍t-hō chè, lâi ho̍k-sāi I; bián-tit lín ê kiáⁿ-sun āu-ji̍t tùi goán ê kiáⁿ-sun kóng, Lín bô hūn tī Iâ-hô-hoa.

28所以阮講：別日in若對阮，á是阮ê後代，án-ni講：阮thang應講，Lín thang看耶和華ê壇ê款式，就是阮ê列祖前所起ê；m̄是為tio̍h燒祭kap別號ê祭，就是為tio̍h beh做lín阮中間ê證據。Só͘-í goán kóng, Pa̍t-ji̍t in nā tùi goán, á-sī goán ê āu-tāi, án-ni kóng, goán thang ìn kóng, Lín thang khòaⁿ Iâ-hô-hoa ê tôaⁿ ê khoán-sit, chiū-sī goán ê lia̍t-chó͘ chêng só͘ khí-ê; m̄-sī ūi-tio̍h sio-chè kap pa̍t-hō ê chè, chiū-sī ūi-tio̍h beh chòe lín goán tiong-kan ê chèng-kù.

29阮tī耶和華咱上帝會幕前以外，另外koh起一座壇，為tio̍h燒祭、素祭，kap別號ê祭，來悖逆耶和華，今á日oa̍t-tńg無tè耶和華，阮決斷無chit號意思。Goán tī Iâ-hô-hoa lán Siōng-tè hōe-bō͘-chêng í-gōa, lēng-gōa koh khí chi̍t chō tôaⁿ, ūi-tio̍h sio-chè, sò͘-chè, kap pa̍t-hō ê chè, lâi pōe-ge̍k Iâ-hô-hoa, kin-á-ji̍t oa̍t-tńg bô tè Iâ-hô-hoa, goán koat-toàn bô chit-hō ì-sù.

30祭司Hui-nî-hap kap會中hiah-ê首領，以及kap伊相kap來以色列中軍隊ê頭人，就是kap伊相kap來ê，聽見Liû-piān人、Ka-tek人、Má-ná-se人，所講ê話，就lóng掠做好。Chè-si Hui-nî-hap kap hōe-tiong hiah ê siú-léng, í-ki̍p kap i saⁿ-kap lâi Í-sek-lia̍t tiong kun-tūi ê thâu-lâng, chiū-sī kap i saⁿ-kap lâi-ê, thiaⁿ-kìⁿ Liû-piān lâng, Ka-tek lâng, Má-ná-se lâng, só͘ kóng ê ōe, chiū lóng lia̍h-chòe hó.

31祭司Í-lī-a-sat ê kiáⁿ Hui-nî-hap對Liû-piān人、Ka-tek人、Má-ná-se人講：今á日阮知耶和華tī咱ê中間，因為lín無犯tio̍h chit-ê罪來得罪耶和華；taⁿ lín有救以色列人脫離耶和華ê手。Chè-si Í-lī-a-sat ê kiáⁿ Hui-nî-hap tùi Liû-piān lâng, Ka-tek lâng, Má-ná-se lâng kóng, Kin-á-ji̍t goán chai Iâ-hô-hoa tī lán ê tiong-kan, in-ūi lín bô hoān-tio̍h chit ê chōe lâi tek-chōe Iâ-hô-hoa; taⁿ lín ū kiù Í-sek-lia̍t lâng thoat-lī Iâ-hô-hoa ê chhiú.

32祭司Í-lī-a-sat ê kiáⁿ Hui-nî-hap，kap hiah-ê首領，離別Liû-piān人、Ka-tek人，tùi Ki-lia̍t地 tò去迦南地，到以色列人hia，回覆in。Chè-si Í-lī-a-sat ê kiáⁿ Hui-nî-hap, kap hiah ê siú-léng, lī-pia̍t Liû-piān lâng, Ka-tek lâng, tùi Ki-lia̍t tōe tò-khì Ka-lâm tōe, kàu Í-sek-lia̍t lâng hia, hê-hok in.

33以色列人掠chit-ê事做好；tùi án-ni，以色列人o-ló上帝，無koh提起beh上去kap Liû-piān人、Ka-tek人交戰，來毀壞in所khiā起ê地。Í-sek-lia̍t lâng lia̍h chit ê sū chòe-hó; tùi án-ni Í-sek-lia̍t lâng o-ló Siōng-tè, bô koh thê-khí beh chiūⁿ-khì kap Liû-piān lâng Ka-tek lâng kau-chiàn, lâi húi-hoāi in só͘ khiā-khí ê tōe.

34Liû-piān人、Ka-tek人叫hit-ê壇名做證據；因為講：chit-ê壇tī咱中間證明耶和華是上帝。Liû-piān lâng Ka-tek lâng kiò hit ê tôaⁿ miâ chòe Chèng-kù; in-ūi kóng, Chit ê tôaⁿ tī lán tiong-kan chèng-bêng Iâ-hô-hoa sī Siōng-tè.

1耶和華已經hō͘以色列人安靜，無kap四圍一切ê對敵交戰，已經歷過chōe-chōe日，約書亞也歲壽chōe，年老；Iâ-hô-hoa í-keng hō͘ Í-sek-lia̍t lâng an-chēng, bô kap sì-ûi it-chhè ê tùi-te̍k kau-chiàn, í-keng le̍k-kè chōe-chōe ji̍t, Iok-su-a iā hè-siū chōe, nî-lāu;

2Hit時約書亞就叫以色列眾人，in ê長老，kap in ê族長，in ê審判官，in ê官長，lóng總來，對in講，我已經歲壽chōe，年老；hit-sî Iok-su-a chiū kiò Í-sek-lia̍t chèng-lâng, in ê tiúⁿ-ló, kap in ê cho̍k-tiúⁿ, in ê sím-phòaⁿ-koaⁿ, in ê koaⁿ-tiúⁿ, lóng-chóng lâi, tùi in kóng, Góa í-keng hè-siū chōe, nî-lāu;

3耶和華lín ê上帝，因為lín ê緣故，對hiah-ê國所行一切ê事，lín有看見；因為替lín交戰ê是耶和華lín ê上帝。Iâ-hô-hoa lín ê Siōng-tè, in-ūi lín ê iân-kò͘, tùi hiah ê kok só͘ kiâⁿ it-chhè ê sū, lín ū khòaⁿ-kìⁿ; in-ūi thòe lín kau-chiàn-ê sī Iâ-hô-hoa lín ê Siōng-tè.

4所chhun chiah-ê國，以及我所剪除hiah-ê國，tùi約旦到大海，ǹg日落ê所在，我已經分hō͘ lín ta̍k支派做業。Só͘ chhun chiah ê kok, í-ki̍p góa só͘ chián-tû hiah ê kok, tùi Iok-tàn kàu tōa-hái, ǹg ji̍t-lo̍h ê só͘-chāi, góa í-keng pun hō͘ lín ta̍k chi-phài chòe-gia̍p.

5耶和華lín ê上帝beh tùi lín ê面前趕逐in，也beh tùi lín ê頭前激逐(tio̍k) in；lín就beh得tio̍h in ê地做業，照耶和華lín ê上帝所對lín講ê。Iâ-hô-hoa lín ê Siōng-tè beh tùi lín ê bīn-chêng kóaⁿ-tio̍k in, iā beh tùi lín ê thâu-chêng kek-tio̍k in; lín chiū beh tit-tio̍h in ê tōe chòe-gia̍p, chiàu Iâ-hô-hoa lín ê Siōng-tè só͘ tùi lín kóng ê.

6所以lín tio̍h大大壯膽，執守來行摩西律法ê冊一切所記載ê，m̄-thang離開伊來偏左偏右；Só͘-í lín tio̍h tōa-tōa chòng-táⁿ, chip-siú lâi kiâⁿ Mô͘-se lu̍t-hoat ê chheh it-chhè só͘ kì-chài ê, m̄-thang lī-khui i lâi phian-chó phian-iū;

7tī lín中間所chhun hiah-ê國，lín m̄-thang kap伊chham-chhap，m̄-thang提起in hiah-ê上帝ê名，m̄-thang hō͘人kí in來chiù-chōa，也m̄-thang服事伊，m̄-thang跪拜伊；tī lín tiong-kan só͘ chhun hiah ê kok, lín m̄-thang kap i chham-chhap, m̄-thang thê-khí in hiah ê siōng-tè ê miâ, m̄-thang hō͘ lâng kí in lâi chiù-chōa, iā m̄-thang ho̍k-sāi i, m̄-thang kūi-pài i;

8總是tio̍h照lín到今á日所行ê，結聯耶和華lín ê上帝。chóng-sī tio̍h chiàu lín kàu kin-á-ji̍t só͘-kiâⁿ-ê, kiat-liân Iâ-hô-hoa lín ê Siōng-tè.

9因為耶和華已經用大koh強ê國tùi lín ê面前趕出；到今á日無一人能khiā-tiâu tī lín ê面前。In-ūi Iâ-hô-hoa í-keng ēng tōa koh kiông ê kok tùi lín ê bīn-chêng kóaⁿ-chhut; kàu kin-á-ji̍t bô chi̍t-lâng ōe khiā-tiâu tī lín ê bīn-chêng.

10Lín一人beh趕逐一千人，因為替lín交戰ê，是耶和華lín ê上帝，照伊所對lín講ê。Lín chi̍t-lâng beh kóaⁿ-tio̍k chi̍t-chheng lâng, in-ūi thòe lín kau-chiàn-ê, sī Iâ-hô-hoa lín ê Siōng-tè, chiàu I só͘ tùi lín kóng-ê.

11Lín tio̍h大大家己謹慎，疼耶和華lín ê上帝。Lín tio̍h tōa-tōa ka-kī kín-sīn, thiàⁿ Iâ-hô-hoa lín ê Siōng-tè.

12Lín若略á倒退，kap存tī lín中間所chhun hiah-ê百姓結聯，kap in結親，相kap往來；Lín nā lio̍h-á tò-thè, kap chûn tī lín tiong-kan só͘ chhun hiah ê peh-sìⁿ kiat-liân, kap in kiat-chhin, saⁿ-kap óng-lâi;

13lín tio̍h確實知，耶和華lín ê上帝的確無beh koh將hiah-ê百姓tùi lín ê面前趕出；總是in beh成做lín ê羅網活tauh，phah lín身軀ê箠，目睭內ê刺，直到lín對tī耶和華lín上帝所賞賜lín chit-ê好ê地滅無。lín tio̍h khak-si̍t chai, Iâ-hô-hoa lín ê Siōng-tè tek-khak bô beh koh chiong hiah ê peh-sìⁿ tùi lín ê bīn-chêng kóaⁿ-chhut; chóng-sī in beh chiâⁿ-chòe lín ê lô-bāng oa̍h-tauh, phah lín seng-khu ê chhê, ba̍k-chiu-lāi ê chhì, ti̍t-kàu lín tùi tī Iâ-hô-hoa lín Siōng-tè só͘ siúⁿ-sù lín chit ê hó ê tōe bia̍t-bô.

14看ah，我今á日beh行世間人所tio̍h行ê路；lín一心一意知耶和華lín上帝所應允賜福lín ê話，無一句落空，lóng應驗tī lín ê身上，其中無落空一項。Khòaⁿ ah, góa kin-á-ji̍t beh kiâⁿ sè-kan lâng só͘ tio̍h kiâⁿ ê lō͘; lín chi̍t-sim chi̍t-ì chai Iâ-hô-hoa lín Siōng-tè só͘ èng-ún sù-hok lín ê ōe, bô chi̍t-kù lo̍k-khong, lóng èng-giām tī lín ê sin-chiūⁿ, kî-tiong bô lo̍k-khong chi̍t-hāng.

15耶和華lín上帝所應允一切ê福氣，怎樣臨到lín ê，耶和華也beh照án-ni hō͘ ta̍k樣ê災厄到tī lín，直到伊滅無lín tī耶和華lín上帝所賞賜lín chit-ê好ê地。Iâ-hô-hoa lín Siōng-tè só͘ èng-ún it-chhè ê hok-khì, cháiⁿ-iūⁿ lîm-kàu lín ê, Iâ-hô-hoa iā beh chiàu án-ni hō͘ ta̍k-iūⁿ ê chai-ē kàu tī lín, ti̍t-kàu I bia̍t-bô lín tī Iâ-hô-hoa lín Siōng-tè só͘ siúⁿ-sù lín chit ê hó ê tōe.

16Lín若違背耶和華lín上帝所命令lín ê約，去服事別ê上帝，跪拜伊，耶和華ê受氣beh tùi lín發出，lín beh緊緊滅無tī伊所賞賜lín好ê地。Lín nā ûi-pōe Iâ-hô-hoa lín Siōng-tè só͘ bēng-lēng lín ê iok, khì ho̍k-sāi pa̍t ê siōng-tè, kūi-pài i, Iâ-hô-hoa ê siū-khì beh tùi lín hoat-chhut, lín beh kín-kín bia̍t-bô tī I só͘ siúⁿ-sù lín hó ê tōe.

1約書亞聚集以色列眾支派到tī示劍，召以色列ê長老，kap in ê族長、審判官，以及官長來；in就khiā tī上帝ê面前。Iok-su-a chū-chi̍p Í-sek-lia̍t chèng chi-phài kàu tī Sī-kiàm, tiàu Í-sek-lia̍t ê tiúⁿ-ló, kap in ê cho̍k-tiúⁿ, sím-phòaⁿ-koaⁿ, í-ki̍p koaⁿ-tiúⁿ lâi; in chiū khiā tī Siōng-tè ê bīn-chêng.

2約書亞kā眾百姓講：耶和華以色列ê上帝án-ni講：在早lín ê列祖，就是亞伯拉罕ê老父，Ná-ho̍k ê老父，Tha-la̍h，tiàm tī大河hit-pêng，服事別ê上帝。Iok-su-a kā chèng peh-sìⁿ kóng, Iâ-hô-hoa Í-sek-lia̍t ê Siōng-tè án-ni kóng, Chāi-chá lín ê lia̍t-chó͘, chiū-sī A-pek-la̍h-hán ê lāu-pē, Ná-ho̍k ê lāu-pē, Tha-la̍h, tiàm tī Tōa-hô hit-pêng, ho̍k-sāi pa̍t ê siōng-tè.

3我取lín ê祖亞伯拉罕tùi大河hit-pêng chhōa伊遍行迦南全地；koh hō͘伊ê kiáⁿ孫chōe-chōe，用以撒賞賜伊；Góa chhú lín ê chó͘ A-pek-la̍h-hán tùi Tōa-hô hit-pêng chhōa i piàn-kiâⁿ Ka-lâm choân-tōe; koh hō͘ i ê kiáⁿ-sun chōe-chōe, ēng Í-sat siúⁿ-sù i;

4koh用雅各kap以掃賞賜以撒，將Se-jíⁿ山賞賜以掃做業；後來雅各kap伊ê kiáⁿ孫落去埃及。koh ēng Ngá-kok kap Í-sò siúⁿ-sù Í-sat, chiong Se-jíⁿ soaⁿ siúⁿ-sù Í-sò chòe-gia̍p; āu-lâi Ngá-kok kap i ê kiáⁿ-sun lo̍h-khì Ai-ki̍p.

5我差摩西kap亞倫，我也降災厄tī埃及，照我tī hit中間所行ê；然後chhōa lín出來。Góa chhe Mô͘-se kap A-lûn, Góa iā kàng chai-ē tī Ai-ki̍p, chiàu Góa tī hí tiong-kan só͘ kiâⁿ ê; jiân-āu chhōa lín chhut-lâi.

6我chhōa lín ê列祖出埃及，lín就到海墘，埃及人chhōa in ê車kap馬兵追jip lín ê列祖到紅海；Góa chhōa lín ê lia̍t-chó͘ chhut Ai-ki̍p, lín chiū kàu hái-kîⁿ, Ai-ki̍p lâng chhōa in ê chhia kap bé-peng tui-jip lín ê lia̍t-chó͘ kàu Âng-hái;

7in求叫耶和華，伊就用烏暗hē tī lín kap埃及人ê中間，koh hō͘海來淹密in；我tī埃及所行ê事lín親目看見；lín tiàm tī曠野chōe-chōe日。in kiû-kiò Iâ-hô-hoa, I chiū ēng o͘-àm hē tī lín kap Ai-ki̍p lâng ê tiong-kan, koh hō͘ hái lâi im-ba̍t in; Góa tī Ai-ki̍p só͘ kiâⁿ ê sū lín chhin-ba̍k khòaⁿ-kìⁿ; lín tiàm tī khòng-iá chōe-chōe ji̍t.

8我chhōa lín到khiā起tī約旦hit-pêng，A-mô͘-lī人ê地；in kap lín交戰；我將in交tī lín ê手；lín就得tio̍h in ê地；我剿滅in tī lín ê面前。Góa chhōa lín kàu khiā-khí tī Iok-tàn hit-pêng, A-mô͘-lī lâng ê tōe; in kap lín kau-chiàn; Góa chiong in kau tī lín ê chhiú; lín chiū tit-tio̍h in ê tōe; Góa châu-bia̍t in tī lín ê bīn-chêng.

9Hit時Mô͘-ap王Se-phoat ê kiáⁿ Pa-le̍k起來kap以色列交戰；差人去叫Pí-jíⁿ ê kiáⁿ Pa-lân來咒詛lín。Hit-sî Mô͘-ap ông Se-phoat ê kiáⁿ Pa-le̍k khí-lâi kap Í-sek-lia̍t kau-chiàn; chhe lâng khì kiò Pí-jíⁿ ê kiáⁿ Pa-lân lâi chiù-chó͘ lín.

10我m̄聽Pa-lân ê話；所以伊連連kā lín祝福；án-ni，我就救lín脫離伊ê手。Góa m̄-thiaⁿ Pa-lân ê ōe; só͘-í i liân-liân kā lín chiok-hok; án-ni, Góa chiū kiù lín thoat-lī i ê chhiú.

11Lín過約旦，到耶利哥；耶利哥人、A-mô͘-lī人、Pí-lī-sé人、迦南人、Hek人、Kek-ka-sat人、Hi-bī人、Iâ-pò͘-su人，lóng kap lín交戰；我將in交tī lín ê手。Lín kè Iok-tàn, kàu Iâ-lī-ko; Iâ-lī-ko lâng, A-mô͘-lī lâng, Pí-lī-sé lâng, Ka-lâm lâng, Hek lâng, Kek-ka-sat lâng, Hi-bī lâng, Iâ-pò͘-su lâng, lóng kap lín kau-chiàn ; Góa chiong in kau tī lín ê chhiú.

12我差大隻蜂飛tī lín ê頭前，將A-mô͘-lī人兩個王，tùi lín ê面前趕出去；m̄是用你ê刀，也m̄是用你ê弓。Góa chhe tōa-chiah-phang pe tī lín ê thâu-chêng, chiong A-mô͘-lī lâng nn̄g ê ông, tùi lín ê bīn-chêng kóaⁿ-chhut-khì; m̄-sī ēng lí ê to, iā m̄-sī ēng lí ê keng.

13我賞賜lín ê土地，m̄是lín所tio̍h磨ê，也賞賜lín城，m̄是lín所起造ê，lín就tiàm tī hit中間；koh m̄是lín所栽種ê葡萄園橄欖-園，lín得tio̍h食伊ê果子。Góa siúⁿ-sù lín ê thó͘-tōe, m̄-sī lín só͘ tio̍h-bôa-ê, iā siúⁿ-sù lín siâⁿ, m̄-sī lín só͘ khí-chō-ê, lín chiū tiàm tī hí tiong-kan; koh m̄-sī lín só͘ chai-chèng ê phû-tô-hn̂g kaⁿ-ná-hn̂g, lín tit-tio̍h chia̍h i ê ké-chí.

14Taⁿ lín tio̍h敬畏耶和華，誠心實意服事伊，將lín列祖tī大河hit-pêng kap tī埃及所服事ê上帝除去，來服事耶和華。Taⁿ lín tio̍h kèng-ùi Iâ-hô-hoa, sêng-sim si̍t-ì ho̍k-sāi I, chiong lín lia̍t-chó͘ tī Tōa-hô hit-pêng kap tī Ai-ki̍p só͘ ho̍k-sāi ê siōng-tè tû-khì, lâi ho̍k-sāi Iâ-hô-hoa.

15Nā是lín掠服事耶和華做m̄好，今á日lín tio̍h揀lín所beh服事ê；看是lín列祖tī大河hit-pêng所服事hiah-ê上帝，á是lín所khiā起in ê地， A-mô͘-lī人，hiah-ê上帝ah。論到我kap我ê家，阮決斷beh服事耶和華。Nā sī lín lia̍h ho̍k-sāi Iâ-hô-hoa chòe m̄-hó, kin-á-ji̍t lín tio̍h kéng lín só͘ beh ho̍k-sāi-ê; khòaⁿ sī lín lia̍t-chó͘ tī Tôa-hô hit-pêng só͘ ho̍k-sāi hiah ê siōng-tè, á-sī lín só͘ khiā-khí in ê tōe, A-mô͘-lī lâng, hiah ê siōng-tè ah. Lūn-kàu góa kap góa ê ke, goán koat-toàn beh ho̍k-sāi Iâ-hô-hoa.

16百姓應講，阮決斷無意思beh棄sak耶和華去服事別ê上帝。Peh-sìⁿ ìn kóng, Goán koat-toàn bô ì-sù beh khì-sak Iâ-hô-hoa khì ho̍k-sāi pa̍t ê siōng-tè.

17因為耶和華阮ê上帝bat chhōa阮kap阮ê列祖tùi埃及地做奴才ê家出來，tī阮ê目睭前行hiah-ê大ê神蹟，tī阮所行一切ê路，所經過ê ta̍k國，lóng有保護阮。In-ūi Iâ-hô-hoa goán ê Siōng-tè bat chhōa goán kap goán ê lia̍t-chó͘ tùi Ai-ki̍p tōe chòe lô͘-châi ê ke chhut-lâi, tī goán ê ba̍k-chiu-chêng kiâⁿ hiah ê tōa ê sîn-jiah, tī goán só͘ kiâⁿ it-chhè ê lō͘, só͘ keng-kè ê ta̍k-kok, lóng ū pó-hō͘ goán.

18耶和華也tī阮ê面前趕出lóng總ê百姓，趕出khiā起chit-ê所在ê A-mô͘-lī人；所以阮也beh服事耶和華，因為祂是阮ê上帝。Iâ-hô-hoa iā tī goán ê bīn-chêng kóaⁿ-chhut lóng-chóng ê peh-sìⁿ, kóaⁿ-chhut khiā-khí chit ê só͘-chāi ê A-mô͘-lī lâng; só͘-í goán iā beh ho̍k-sāi Iâ-hô-hoa, in-ūi I sī goán ê Siōng-tè.

19約書亞對百姓講：Lín bōe會服事耶和華，因為伊是聖ê上帝，決斷無容允用別ê上帝匹配伊，無beh赦免lín ê過失，lín ê罪惡。Iok-su-a tùi peh-sìⁿ kóng, Lín bōe-ōe ho̍k-sāi Iâ-hô-hoa, in-ūi I sī sèng ê Siōng-tè, koat-toàn bô iông-ún ēng pa̍t ê Siōng-tè phit-phòe I, bô beh sià-bián lín ê kè-sit, lín ê chōe-ok.

20Lín若離開耶和華去服事外邦ê上帝，耶和華tī降福氣hō͘ lín了後，beh oa̍t-tńg來降災厄hō͘ lín，滅無lín。Lín nā lī-khui Iâ-hô-hoa khì ho̍k-sāi gōa-pang ê Siōng-tè, Iâ-hô-hoa tī kàng hok-khì hō͘ lín liáu-āu, beh oa̍t-tńg lâi kàng chai-ē hō͘ lín, bia̍t-bô lín.

21百姓ìn約書亞講：無lah；阮定tio̍h beh服事耶和華。Peh-sìⁿ ìn Iok-su-a kóng, Bô-lah; goán tiāⁿ-tio̍h beh ho̍k-sāi Iâ-hô-hoa.

22約書亞對百姓講：Lín揀耶和華beh服事伊，lín家己做lín ê干證。In應講，好，阮做干證。Iok-su-a tùi peh-sìⁿ kóng, Lín kéng Iâ-hô-hoa beh ho̍k-sāi I, lín ka-kī chòe lín ê kan-chèng. In ìn kóng, Hó, goán chòe kan-chèng.

23約書亞講：Lín taⁿ tio̍h除去lín中間所有外邦ê上帝，hō͘ lín專心歸向耶和華以色列ê上帝。Iok-su-a kóng, Lín taⁿ tio̍h tû-khì lín tiong-kan só͘ ū gōa-pang ê siōng-tè, hō͘ lín choan-sim kui-ǹg Iâ-hô-hoa Í-sek-lia̍t ê Siōng-tè.

24百姓ìn約書亞講：阮beh服事耶和華阮ê上帝，聽thàn伊ê話。Peh-sìⁿ ìn Iok-su-a kóng, Goán beh ho̍k-sāi Iâ-hô-hoa goán ê Siōng-tè, thiaⁿ-thàn I ê ōe.

25Hit日約書亞就kap百姓立約，tī示劍kā in設立律例法度。Hit-ji̍t Iok-su-a chiū kap peh-sìⁿ li̍p-iok, tī Sī-kiàm kā in siat-li̍p lu̍t-lē hoat-tō͘.

26約書亞將chiah-ê話lóng寫tī上帝律法ê冊，koh將一塊大石頭khiā tī-hia，tī橡樹腳，耶和華聖所ê邊á。Iok-su-a chiong chiah ê ōe lóng siá tī Siōng-tè lu̍t-hoat ê chheh, koh chiong chi̍t-tè tōa chio̍h-thâu khiā tī-hia, tī siōng-chhiū kha, Iâ-hô-hoa sèng-só͘ ê piⁿ-á.

27約書亞對眾百姓講：看ah，chit-ê石頭beh做咱ê干證；因為伊有聽見耶和華所吩咐咱一切ê話，所以beh對lín做干證，驚了lín悖逆lín ê上帝。Iok-su-a tùi chèng peh-sìⁿ kóng, Khòaⁿ ah, chit ê chio̍h-thâu beh chòe lán ê kan-chèng; in-ūi i ū thiaⁿ-kìⁿ Iâ-hô-hoa só͘ hoan-hù lán it-chhè ê ōe, só͘-í beh tùi lín chòe kan-chèng, kiaⁿ-liáu lín pōe-ge̍k lín ê Siōng-tè.

28約書亞就差百姓去；ta̍k人就tò去伊所得tio̍h ê地。Iok-su-a chiū chhe peh-sìⁿ khì; ta̍k-lâng chiū tò-khì i só͘ tit-tio̍h ê tōe.

29Chiah-ê事以後，耶和華ê奴僕，Lùn ê kiáⁿ約書亞，一百一十歲就死。Chiah ê sū í-āu, Iâ-hô-hoa ê lô͘-po̍k, Lùn ê kiáⁿ Iok-su-a, chi̍t-pah it-cha̍p hè chiū sí.

30In就埋葬伊tī伊ê業ê界內，就是tī Í-hoat-liân山地ê Têng-ná-se-la̍h，tī Ka-si̍t山ê北勢。In chiū bâi-chòng i tī i ê gia̍p ê kài-lāi, chiū-sī tī Í-hoat-liân soaⁿ-tōe ê Têng-ná-se-la̍h, tī Ka-si̍t soaⁿ ê pak-sì.

31約書亞tī-teh ê日，kap約書亞死了後，hiah-ê知耶和華為以色列人所行chiah-ê事ê長老iáu tī-teh ê時，以色列人服事耶和華。Iok-su-a tī-teh ê ji̍t, kap Iok-su-a sí liáu-āu, hiah ê chai Iâ-hô-hoa ūi Í-sek-lia̍t lâng só͘ kiâⁿ chiah ê sū ê tióng-ló iáu tī-teh ê sî, Í-sek-lia̍t lâng ho̍k-sāi Iâ-hô-hoa.

32以色列人tùi埃及所帶來約瑟ê骨頭，in埋葬伊tī示劍，就是雅各早前用一百銀tùi示劍ê老父Hap-boa̍t hiah-ê kiáⁿ所買ê地；就做約瑟kiáⁿ孫ê業。Í-sek-lia̍t lâng tùi Ai-ki̍p só͘ tòa lâi Iok-sek ê kut-thâu, in bâi-chòng i tī Sī-kiàm, chiū-sī Ngá-kok chá-chêng ēng chi̍t-pah gûn tùi Sī-kiàm ê lāu-pē Hap-boa̍t hiah ê kiáⁿ só͘ bóe ê tōe; chiū chòe Iok-sek kiáⁿ-sun ê gia̍p.

33亞倫ê kiáⁿ Í-lī-a-sat也死；in就埋葬伊tī伊ê kiáⁿ Hui-nî-hap所得tio̍h ê山崙á，就是tī Í-hoat-liân ê山地。A-lûn ê kiáⁿ Í-lī-a-sat iā sí; in chiū bâi-chòng i tī i ê kiáⁿ Hui-nî-hap só͘ tit-tio̍h ê soaⁿ-lūn-á, chiū-sī tī Í-hoat-liân ê soaⁿ-tōe.