1Lùn ê kiáⁿ約書亞tùi Si̍p-têng暗靜差兩人做偵探，吩咐in講：lín去看hit-ê地，kap耶利哥。In就去，到一個娼妓Lat-ha̍p ê厝，就歇tī-hia。Lùn ê kiáⁿ Iok-su-a tùi Si̍p-têng àm-chīⁿ chhe nn̄g-lâng chòe cheng-thàm, hoan-hù in kóng, Lín khì khòaⁿ hit ê tōe, kap Iâ-lī-ko. In chiū khì, kàu chi̍t ê chhiong-ki Lat-ha̍p ê chhù, chiū hioh tī-hia.

2有人報耶利哥王講：看ah，今暗有以色列人來chia偷看chit-ê地。Ū lâng pò Iâ-lī-ko ông kóng, Khòaⁿ ah, kin-àm ū Í-sek-lia̍t lâng lâi chia thau-khòaⁿ chit ê tōe.

3耶利哥王差人去Lat-ha̍p hia講：Hiah-ê來你chia，入你ê厝ê人，你tio̍h chhōa in出來；因為in來，是beh偷看chit-ê全地。Iâ-lī-ko ông chhe lâng khì Lat-ha̍p hia kóng, Hiah-ê lâi lí chia, ji̍p lí ê chhù ê lâng, lí tio̍h chhōa in chhut-lâi; in-ūi in lâi, sī beh thau-khòaⁿ chit ê choân-tōe.

4婦人人將hit兩人khǹg密，就應講，真正有人來我chia；總是in tùi toh落來，我m̄知；Hū-jîn-lâng chiong hí nn̄g-lâng khǹg-ba̍t, chiū ìn kóng, Chin-chiàⁿ ū lâng lâi góa chia; chóng-sī in tùi toh-lo̍h lâi, góa m̄-chai;

5日暗，beh關城門ê時，hiah-ê人出去；in去toh落我m̄知，lín緊緊去jip，就會jip-tio̍h。ji̍t àm, beh koaiⁿ siâⁿ-mn̂g ê sî, hiah ê lâng chhut-khì; in khì toh-lo̍h góa m̄-chai, lín kín-kín khì jip, chiū ōe jip-tio̍h.

6(總是婦人人已經chhōa in上厝頂，將所排tī厝頂ê麻稿(môa-kó)來蓋in。)(Chóng-sī hū-jîn-lâng í-keng chhōa in chiūⁿ chhù-téng, chiong só͘ pâi tī chhù-téng ê môa-kó lâi khàm in.)

7Hiah-ê人就àn約旦hit條路jip伊，到路頭；jip in ê人一下出去，城門就關。Hiah ê lâng chiū àn Iok-tàn hit tiâu lō͘ jip i, kàu lō͘-thâu; jip in ê lâng chi̍t-ē chhut-khì, siâⁿ-mn̂g chiū koaiⁿ.

8兩人iáu未去睏，婦人人就上厝頂到in hia；Nn̄g-lâng iáu-bē khì khùn, hū-jîn-lâng chiū chiūⁿ chhù-téng kàu in hia;

9對in講，我知耶和華已經將chit-ê地賞賜lín，koh因為lín ê緣故阮lóng驚，chit所在一切khiā起ê百姓，tī lín ê面前lóng失膽。tùi in kóng, Góa chai Iâ-hô-hoa í-keng chiong chit ê tōe siúⁿ-sù lín, koh in-ūi lín ê iân-kò͘ goán lóng kiaⁿ, chit só͘-chāi it-chhè khiā-khí ê peh-sìⁿ, tī lín ê bīn-chêng lóng sit-táⁿ.

10因為阮有聽見lín出埃及ê時，耶和華怎樣tī lín ê頭前hō͘紅海ê水乾去；koh lín怎樣款待約旦hit-pêng兩個A-mô͘-lī王，Se-hông kap Go̍k，就是lín所毀滅ê。In-ūi goán ū thiaⁿ-kìⁿ lín chhut Ai-ki̍p ê sî, Iâ-hô-hoa cháiⁿ-iūⁿ tī lín ê thâu-chêng hō͘ Âng-hái ê chúi ta-khì; koh lín cháiⁿ-iūⁿ khoán-thāi Iok-tàn hit pêng nn̄g ê A-mô͘-lī ông, Se-hông kap Go̍k, chiū-sī lín só͘ húi-bia̍t-ê.

11阮一下聽見chiah-ê事，就失膽，因為lín ê緣故ta̍k-ê神不附體；因為耶和華lín ê上帝，tī天頂地下做上帝。Goán chi̍t-ē thiaⁿ-kìⁿ chiah ê sū, chiū sit-táⁿ, in-ūi lín ê iân-kò͘ ta̍k-ê sîn put-hū-thé; in-ūi Iâ-hô-hoa lín ê Siōng-tè, tī thiⁿ-téng tōe-ē chòe Siōng-tè.

12Taⁿ我已經好款待lín，請lín kí耶和華對我chiù-chōa，beh好款待我老父ê家，續hō͘我一個實在ê記號；Taⁿ góa í-keng hó khoán-thāi lín, chhiáⁿ lín kí Iâ-hô-hoa tùi góa chiù-chōa, beh hó khoán-thāi góa lāu-pē ê ke, sòa hō͘ góa chi̍t-ê si̍t-chāi ê kì-hō;

13beh救活我ê老父、老母，我ê兄弟、姊妹，kap一切屬in所有ê，拯救阮ê性命免死。beh kiù-oa̍h góa ê lāu-pē, lāu-bú, góa ê hiaⁿ-tī, chí-bē, kap it-chhè sio̍k in só͘-ū-ê, chín-kiù goán ê sìⁿ-miā bián sí.

14兩人應伊講：你若無漏洩(設)阮chit-ê事，阮甘願用阮ê性命替lín，到耶和華將chit-ê地賞賜阮ê時，阮beh用慈愛誠實款待你。Nn̄g-lâng ìn i kóng, Lí nā bô lāu-siat goán chit ê sū, goán kam-goān ēng goán ê sìⁿ-miā thòe lín, kàu Iâ-hô-hoa chiong chit ê tōe siúⁿ-sù goán ê sî, goán beh ēng chû-ài sêng-si̍t khoán-thāi lí.

15Tùi án-ni，伊用索tùi窗á kā in 墜落去；因為伊ê厝起tī城牆，伊也khiā起tī牆頂。Tùi án-ni i ēng soh tùi thang-á kā in tūi-lo̍h-khì; in-ūi i ê chhù khí tī siâⁿ-chhiûⁿ, i iā khiā-khí tī chhiûⁿ-téng.

16伊對in講，Lín tio̍h上去山裡，驚了追jip ê人tú-tio̍h lín；tio̍h tī-hia bih三日，thèng候追jip ê人tò來；然後chiah thang行lín ê路。I tùi in kóng, Lín tio̍h chiūⁿ-khì soaⁿ-ni̍h, kiaⁿ-liáu tui-jip ê lâng tú-tio̍h lín; tio̍h tī-hia bih saⁿ-ji̍t, thèng-hāu tui-jip ê lâng tò-lâi; jiân-āu chiah thang kiâⁿ lín ê lō͘.

17兩人對伊講，你kah阮所chiù-chōa ê，阮的確無為tio̍h hit-ê來犯罪；Nn̄g-lâng tùi i kóng, Lí kah goán só͘ chiù-chōa ê, goán tek-khak bô ūi-tio̍h hit-ê lâi hoān-chōe;

18阮若到chit所在ê時，你tio̍h將chit條朱紅ê索縛tī墜阮落去ê窗á裡；也tio̍h聚集你ê老父、老母、兄弟，kap你ê老父全家lóng tiàm你ê厝內；goán nā kàu chit só͘-chāi ê sî, lí tio̍h chiong chit-tiâu chu-âng ê soh pa̍k tī tūi goán lo̍h-khì ê thang-á-ni̍h; iā tio̍h chū-chi̍p lí ê lāu-pē, lāu-bú, hiaⁿ-tī, kap lí ê lāu-pē choân-ke lóng tiàm lí ê chhù-lāi;

19見若出你ê家ê門去街路ê，伊ê死是自取ê，無阮ê罪；見若kap你tī厝內ê，若有人下手害伊，就伊ê死是阮ê罪；kìⁿ-nā chhut lí ê ke ê mn̂g khì ke-lō͘-ê, i ê sí sī chū-chhú-ê, bô goán ê chōe; kìⁿ-nā kap lí tī chhù-lāi-ê, nā ū lâng hē-chhiú hāi i, chiū i ê sí sī goán ê chōe;

20總是你若漏洩阮chit-ê事，就你所kah阮chiù-chōa-ê，kap阮無干涉。chóng-sī lí nā lāu-siat goán chit ê sū, chiū lí só͘ kah goán chiù-chōa-ê, kap goán bô kan-sia̍p.

21伊講：Thang照lín ê話來行。Tùi án-ni，伊差in去；in就去；伊用朱紅ê索縛tī窗á。I kóng, Thang chiàu lín ê ōe lâi kiâⁿ. Tùi án-ni i chhe in khì; in chiū khì; i ēng chu-âng ê soh pa̍k tī thang-á.

22兩人去到山裡，tiàm hia三日，thèng候追jip ê人tò去，追jip ê人沿路chhē in，也chhē無tio̍h。Nn̄g-lâng khì kàu soaⁿ-ni̍h, tiàm hia saⁿ-ji̍t, thèng-hāu tui-jip ê lâng tò-khì, tui-jip ê lâng iân-lō͘ chhē in, iā chhē-bô-tio̍h.

23兩人就落山tò來，過河到Lùn ê kiáⁿ約書亞hia；對伊講起in所tú-tio̍h一切ê事。Nn̄g-lâng chiū lo̍h-soaⁿ tò-lâi, kè hô kàu Lùn ê kiáⁿ Iok-su-a hia; tùi i kóng-khí in só͘ tú-tio̍h it-chhè ê sū.

24Koh對`約書亞講：耶和華果然用hit-ê全地交tī咱ê手；hit所在一切khiā起ê百姓，tī咱ê面前lóng失膽。Koh tùi Iok-su-a kóng, Iâ-hô-hoa kó-jiân ēng hit ê choân-tōe kau tī lán ê chhiú; hit só͘-chāi it-chhè khiā-khí ê peh-sìⁿ, tī lán ê bīn-chêng lóng sit-táⁿ.

1天光約書亞透早起來，kap以色列眾人lóng離開Si̍p-têng，來到約旦；iáu未過去，就歇tī-hia，thèng候過河。Thiⁿ-kng Iok-su-a thàu-chá khí-lâi, kap Í-sek-lia̍t chèng lâng lóng lī-khui Si̍p-têng, lâi kàu Iok-tàn; iáu-bē kè-khì, chiū hioh tī-hia, thèng-hāu kè-hô.

2過三日，官長遍行營中；Kè saⁿ-ji̍t, koaⁿ-tiúⁿ piàn-kiâⁿ iâⁿ-tiong;

3命令百姓講：Lín看見耶和華lín上帝ê約櫃，koh看見祭司利未人扛伊ê時，tio̍h離開lín ê所在，來tè in ê後面。bēng-lēng peh-sìⁿ kóng, Lín khòaⁿ-kìⁿ Iâ-hô-hoa lín Siōng-tè ê iok-kūi, koh khòaⁿ-kìⁿ chè-si Lī-bī lâng kng i ê sî, tio̍h lī-khui lín ê só͘-chāi, lâi tè in ê āu-bīn.

4總是lín kap約櫃相離，約略tio̍h量兩千肘ê遠；m̄-thang 逼近伊，hō͘ lín知所tio̍h行ê路；因為lín平時m̄-bat行chit條路。Chóng-sī lín kap iok-kūi saⁿ-lī, iok-lio̍k tio̍h niû nn̄g-chheng tiú ê hn̄g; m̄-thang pek-kūn i, hō͘ lín chai só͘ tio̍h kiâⁿ ê lō͘; in-ūi lín pêng-sî m̄-bat kiâⁿ chit tiâu lō͘.

5約書亞對百姓講：Lín tio̍h家己聖潔，因為明á日耶和華beh tī lín中間行奇事。Iok-su-a tùi peh-sìⁿ kóng, Lín tio̍h ka-kī sèng-kiat, in-ūi bîn-á-ji̍t Iâ-hô-hoa beh tī lín tiong-kan kiâⁿ kî-sū.

6約書亞koh吩咐祭司講：Lín扛約櫃起來，tī百姓ê頭前行；in就扛約櫃起來，行tī百姓ê頭前。Iok-su-a koh hoan-hù chè-si kóng, Lín kng iok-kūi khí-lâi, tī peh-sìⁿ ê thâu-chêng kiâⁿ; in chiū kng iok-kūi khí-lâi, kiâⁿ tī peh-sìⁿ ê thâu-chêng.

7耶和華對約書亞講：Tùi今á日起，我beh hō͘你tī以色列眾人ê目睭前做大，hō͘ in知我kap你tī-teh，親像前kap摩西tī-teh一樣。Iâ-hô-hoa tùi Iok-su-a kóng, Tùi kin-á-ji̍t khí, Góa beh hō͘ lí tī Í-sek-lia̍t chèng-lâng ê ba̍k-chiu-chêng chòe-tōa, hō͘ in chai Góa kap lí tī-teh, chhin-chhiūⁿ chêng kap Mô͘-se tī-teh chi̍t-iūⁿ.

8你tio̍h吩咐扛約櫃ê祭司講：Lín到約旦水邊ê時，tio̍h停腳tī約旦。Lí tio̍h hoan-hù kng iok-kūi ê chè-si kóng, Lín kàu Iok-tàn chúi-piⁿ ê sî, tio̍h thêng-kha tī Iok-tàn.

9約書亞對以色列人講：Lín近前來，聽耶和華lín上帝ê話。Iok-su-a tùi Í-sek-lia̍t lâng kóng, Lín kūn-chêng lâi, thiaⁿ Iâ-hô-hoa lín Siōng-tè ê ōe.

10約書亞koh講：Tùi án-ni，lín thang知活ê上帝tī lín中間，beh tī lín ê頭前趕逐迦南人，Hek人、Hi-bī人、Pí-lī-sé人、Kek-ka-sat人、A-mô͘-lī人、Iâ-pò͘-su人。Iok-su-a koh kóng, Tùi án-ni lín thang chai oa̍h ê Siōng-tè tī lín tiong-kan, beh tī lín ê thâu-chêng kóaⁿ-tio̍k Ka-lâm lâng, Hek lâng, Hi-bī lâng, Pí-lī-sé lâng, Kek-ka-sat lâng, A-mô͘-lī lâng, Iâ-pò͘-su lâng.

11看ah，普天下ê主宰ê約櫃beh tī lín ê頭前過去，入約旦。Khòaⁿ ah, phó͘-thiⁿ-ē ê Chú-cháiⁿ ê iok-kūi beh tī lín ê thâu-chêng kè-khì, ji̍p Iok-tàn.

12Lín taⁿ tio̍h tùi以色列支派中揀十二人，每支派一個人；Lín taⁿ tio̍h tùi Í-sek-lia̍t chi-phài-tiong kéng cha̍p-jī lâng, múi chi-phài chi̍t ê lâng;

13到扛普天下ê主耶和華ê約櫃ê祭司，in ê腳khiā tī約旦河ê水，約旦河ê水，就是tùi頂面流落來ê水，beh截斷，khiā起來kui堆。kàu kng phó͘-thiⁿ-ē ê Chú Iâ-hô-hoa ê iok-kūi ê chè-si, in ê kha khiā tī Iok-tàn hô ê chúi, Iok-tàn hô ê chúi, chiū-sī tùi téng-bīn lâu-lo̍h-lâi ê chúi, beh chia̍t-tn̄g, khiā-khí-lâi kui-tui.

14百姓離開布棚，beh過約旦ê時，祭司就扛約櫃tī百姓ê頭前。Peh-sìⁿ lī-khui pò͘-pîⁿ, beh kè Iok-tàn ê sî, chè-si chiū kng iok-kūi tī peh-sìⁿ ê thâu-chêng.

15Tī收成ê時，約旦ê水常常pôaⁿ過伊ê岸。扛約櫃ê到約旦，扛約櫃ê祭司，Tī siu-sêng ê sî, Iok-tàn ê chúi siông-siông pôaⁿ-kè i ê hōaⁿ. Kng iok-kūi-ê kàu Iok-tàn, kng iok-kūi ê chè-si,

16腳一下ùn-tio̍h水，hit-ê tùi頂面流落來ê水，就khiā起來kui堆，相離真遠，tī Sat-la̍h-tàn邊頭ê亞當城；hit-ê流tī A-la̍h-pa海，就是鹽海，hiah-ê水全然截斷；百姓就tī耶利哥ê對面過去。kha chi̍t-ē ùn-tio̍h chúi, hit-ê tùi téng-bīn lâu-lo̍h-lâi ê chúi, chiū khiā-khí-lâi kui-tui, saⁿ-lī chin-hn̄g, tī Sat-la̍h-tàn piⁿ-thâu ê A-tong siâⁿ; hit ê lâu tī A-la̍h-pa hái, chiū-sī Iâm-hái, hiah ê chúi choân-jiân chia̍t-tn̄g; peh-sìⁿ chiū tī Iâ-lī-ko ê tùi-bīn kè-khì.

17扛耶和華約櫃ê祭司tī約旦ê乾地定定khiā-teh；以色列眾人lóng tùi乾地過去，直到百姓一盡過約旦。Kng Iâ-hô-hoa iok-kūi ê chè-si tī Iok-tàn ê ta-tōe tiāⁿ-tiāⁿ khiā-teh; Í-sek-lia̍t chèng-lâng lóng tùi ta-tōe kè-khì, ti̍t-kàu peh-sìⁿ it-chīn kè Iok-tàn.

1百姓已經一盡過約旦，耶和華就吩咐約書亞講：Peh-sìⁿ í-keng it-chīn kè Iok-tàn, Iâ-hô-hoa chiū hoan-hù Iok-su-a kóng,

2Tio̍h tùi百姓中揀十二人，每支派一人；Tio̍h tùi peh-sìⁿ-tiong kéng cha̍p-jī lâng, múi chi-phài chi̍t-lâng;

3命令in講：Lín tùi hia，tùi約旦河中，祭司ê腳定定khiā ê所在，取十二塊石，帶伊kap lín過去，hē tī lín今暝beh歇ê所在。bēng-lēng in kóng, Lín tùi hia, tùi Iok-tàn hô-tiong, chè-si ê kha tiāⁿ-tiāⁿ khiā ê só͘-chāi, chhú cha̍p-jī tè chio̍h, tòa i kap lín kè-khì, hē tī lín kim-mî beh hioh ê só͘-chāi.

4約書亞就照伊tùi以色列人中所備辦ê hit十二人，每支派一人，lóng叫in來。Iok-su-a chiū chiàu i tùi Í-sek-lia̍t lâng tiong só͘ pī-pān ê hí cha̍p-jī lâng, múi chi-phài chi̍t-lâng, lóng kiò in lâi.

5約書亞就kā in講：Lín過去tī耶和華lín上帝約櫃ê頭前，到約旦河中，照以色列人支派ê數額，ta̍k人取一塊石頭giâ tī肩頭裡；Iok-su-a chiū kā in kóng, Lín kè-khì tī Iâ-hô-hoa lín Siōng-tè iok-kūi ê thâu-chêng, kàu Iok-tàn hô-tiong, chiàu Í-sek-lia̍t lâng chi-phài ê siàu-gia̍h, ta̍k-lâng chhú chi̍t tè chio̍h-thâu giâ tī keng-thâu-ni̍h;

6thang用chit-ê tī lín中間做證據；日後lín ê kiáⁿ孫問lín講：chiah-ê石頭，對tī lín甚麼意思？thang ēng chit-ê tī lín tiong-kan chòe chèng-kù; ji̍t-āu lín ê kiáⁿ-sun mn̄g lín kóng, Chiah ê chio̍h-thâu, tùi tī lín sím-mi̍h ì-sù?

7Lín就對in講，是因為前約旦ê水，tī耶和華ê約櫃前截斷；約櫃過約旦ê時，約旦ê水截斷，chiah-ê石beh做以色列人永遠ê記念。lín chiū tùi in kóng, Sī in-ūi chêng Iok-tàn ê chúi, tī Iâ-hô-hoa ê iok-kūi chêng chia̍t-tn̄g; iok-kūi kè Iok-tàn ê sî, Iok-tàn ê chúi chia̍t-tn̄g, chiah ê chio̍h beh chòe Í-sek-lia̍t lâng éng-oán ê kì-liām.

8以色列人照約書亞所命令ê來行；照以色列人支派ê數額，tùi約旦河中取十二塊石，lóng照耶和華對約書亞所講ê；in就續帶in過去，到in歇睏ê所在，就hē tī-hia。Í-sek-lia̍t lâng chiàu Iok-su-a só͘ bēng-lēng-ê lâi kiâⁿ; chiàu Í-sek-lia̍t lâng chi-phài ê siàu-gia̍h, tùi Iok-tàn hô-tiong chhú cha̍p-jī tè chio̍h, lóng chiàu Iâ-hô-hoa tùi Iok-su-a só͘ kóng-ê; in chiū sòa tòa in kè-khì, kàu in hioh-khùn ê só͘-chāi, chiū hē tī-hia.

9約書亞另外用十二塊石，khiā tī約旦河中，tī 扛約櫃ê祭司腳khiā teh ê所在；到今á日hiah-ê石iáu-kú tī-hia。Iok-su-a lēng-gōa ēng cha̍p-jī tè chio̍h, khiā tī Iok-tàn hô-tiong, tī kng iok-kūi ê chè-si kha khiā-teh ê só͘-chāi; kàu kin-á-ji̍t hiah ê chio̍h iáu-kú tī-hia.

10扛約櫃ê祭司khiā tī約旦河中，thèng候耶和華命令約書亞對百姓講ê事做明白，是照摩西所命令約書亞一切ê話，百姓就緊緊過去。Kng iok-kūi ê chè-si khiā tī Iok-tàn hô-tiong, thèng-hāu Iâ-hô-hoa bēng-lēng Iok-su-a tùi peh-sìⁿ kóng ê sū chòe bêng-pe̍k, sī chiàu Mô͘-se só͘ bēng-lēng Iok-su-a it-chhè ê ōe, peh-sìⁿ chiū kín-kín kè-khì.

11眾百姓一盡過去，耶和華ê約櫃kap祭司就tī百姓ê面前過去。Chèng peh-sìⁿ it-chīn kè-khì, Iâ-hô-hoa ê iok-kūi kap chè-si chiū tī peh-sìⁿ ê bīn-chêng kè-khì.

12Liû-piān人、Ka-tek人、Má-ná-se半支派ê人，lóng照摩西所對in講ê，帶軍器tī以色列人ê頭前過去；Liû-piān lâng, Ka-tek lâng, Má-ná-se pòaⁿ-chi-phài ê lâng, lóng chiàu Mô͘-se só͘ tùi in kóng ê, tòa kun-khì tī Í-sek-lia̍t lâng ê thâu-chêng kè-khì;

13約略有四萬人，lóng備辦交戰，tī耶和華ê面前過去，到耶利哥ê平洋，便便beh交戰。iok-lio̍k ū sì-bān lâng, lóng pī-pān kau-chiàn, tī Iâ-hô-hoa ê bīn-chêng kè-khì, kàu Iâ-lī-ko ê pîⁿ-iûⁿ, piān-piān beh kau-chiàn.

14當hit日耶和華hō͘約書亞tī以色列眾人ê目睭前做大；tī伊一生ê日，百姓敬畏伊，親像早前敬畏摩西一樣。Tng hit-ji̍t Iâ-hô-hoa hō͘ Iok-su-a tī Í-sek-lia̍t chèng-lâng ê ba̍k-chiu-chêng chòe-tōa; tī i it-seng ê ji̍t, peh-sìⁿ kèng-ùi i, chhin-chhiūⁿ chá-chêng kèng-ùi Mô͘-se chi̍t-iūⁿ.

15耶和華吩咐約書亞講：Iâ-hô-hoa hoan-hù Iok-su-a kóng,

16你命令扛法櫃ê祭司，tùi約旦河上來。Lí bēng-lēng kng hoat-kūi ê chè-si, tùi Iok-tàn hô chiūⁿ-lâi.

17約書亞就命令祭司講：Lín tùi約旦河上來。Iok-su-a chiū bēng-lēng chè-si kóng, Lín tùi Iok-tàn hô chiūⁿ-lâi.

18扛耶和華約櫃ê祭司tùi約旦河上來；祭司ê腳掌tú-tú跨(hoa̍h)上乾地ê時，約旦河ê水就流到原位；照舊漲滿雙pêng ê岸。Kng Iâ-hô-hoa iok-kūi ê chè-si tùi Iok-tàn hô chiūⁿ-lâi; chè-si ê kha-chiúⁿ tú-tú hoa̍h-chiūⁿ ta-tōe ê sî, Iok-tàn hô ê chúi chiū lâu kàu goân-ūi; chiàu-kū tiòng-móa siang-pêng ê hōaⁿ.

19正月初十日，百姓tùi約旦上來，就安營tī Kiat-kah，tī耶利哥東勢ê界。Chiaⁿ-ge̍h chhoe-cha̍p ji̍t, peh-sìⁿ tùi Iok-tàn chiūⁿ-lâi, chiū an-iâⁿ tī Kiat-kah, tī Iâ-lī-ko tang-sì ê kài.

20In tùi約旦所取hit十二塊石，約書亞就khiā 伊tī Kiat-kah；In tùi Iok-tàn só͘ chhú hí cha̍p-jī tè chio̍h, Iok-su-a chiū khiā i tī Kiat-kah;

21就對以色列人講：日後lín ê kiáⁿ孫問in ê老父講：chiū tùi Í-sek-lia̍t lâng kóng, Ji̍t-āu lín ê kiáⁿ-sun mn̄g in ê lāu-pē kóng,

22Chiah-ê石甚麼意思？hit時就tio̍h報lín ê kiáⁿ知，講：以色列人bat行乾地，過chit-ê約旦河。Chiah ê chio̍h sím-mi̍h ì-sù? hit-sî chiū tio̍h pò lín ê kiáⁿ chai, kóng, Í-sek-lia̍t lâng bat kiâⁿ ta-tōe, kè chit ê Iok-tàn hô.

23因為耶和華lín ê上帝tī lín ê頭前hō͘約旦ê水乾去，thèng候lín過來，親像耶和華lín上帝前tī紅海所做一樣，就是hō͘伊tī咱ê頭前乾去，thèng候咱過來；In-ūi Iâ-hô-hoa lín ê Siōng-tè tī lín ê thâu-chêng hō͘ Iok-tàn ê chúi ta-khì, thèng-hāu lín kè-lâi, chhin-chhiūⁿ Iâ-hô-hoa lín Siōng-tè chêng tī Âng-hái só͘ chòe chi̍t-iūⁿ, chiū-sī hō͘ i tī lán ê thâu-chêng ta-khì, thèng-hāu lán kè-lâi;

24beh hō͘地上萬百姓lóng知耶和華ê手有大能力；也beh hō͘ lín永遠敬畏耶和華lín ê上帝。beh hō͘ tōe-chiūⁿ bān peh-sìⁿ lóng chai Iâ-hô-hoa ê chhiú ū tōa lêng-le̍k; iā beh hō͘ lín éng-oán kèng-ùi Iâ-hô-hoa lín ê Siōng-tè.