1天光約書亞透早起來，kap以色列眾人lóng離開Si̍p-têng，來到約旦；iáu未過去，就歇tī-hia，thèng候過河。Thiⁿ-kng Iok-su-a thàu-chá khí-lâi, kap Í-sek-lia̍t chèng lâng lóng lī-khui Si̍p-têng, lâi kàu Iok-tàn; iáu-bē kè-khì, chiū hioh tī-hia, thèng-hāu kè-hô.

2過三日，官長遍行營中；Kè saⁿ-ji̍t, koaⁿ-tiúⁿ piàn-kiâⁿ iâⁿ-tiong;

3命令百姓講：Lín看見耶和華lín上帝ê約櫃，koh看見祭司利未人扛伊ê時，tio̍h離開lín ê所在，來tè in ê後面。bēng-lēng peh-sìⁿ kóng, Lín khòaⁿ-kìⁿ Iâ-hô-hoa lín Siōng-tè ê iok-kūi, koh khòaⁿ-kìⁿ chè-si Lī-bī lâng kng i ê sî, tio̍h lī-khui lín ê só͘-chāi, lâi tè in ê āu-bīn.

4總是lín kap約櫃相離，約略tio̍h量兩千肘ê遠；m̄-thang 逼近伊，hō͘ lín知所tio̍h行ê路；因為lín平時m̄-bat行chit條路。Chóng-sī lín kap iok-kūi saⁿ-lī, iok-lio̍k tio̍h niû nn̄g-chheng tiú ê hn̄g; m̄-thang pek-kūn i, hō͘ lín chai só͘ tio̍h kiâⁿ ê lō͘; in-ūi lín pêng-sî m̄-bat kiâⁿ chit tiâu lō͘.

5約書亞對百姓講：Lín tio̍h家己聖潔，因為明á日耶和華beh tī lín中間行奇事。Iok-su-a tùi peh-sìⁿ kóng, Lín tio̍h ka-kī sèng-kiat, in-ūi bîn-á-ji̍t Iâ-hô-hoa beh tī lín tiong-kan kiâⁿ kî-sū.

6約書亞koh吩咐祭司講：Lín扛約櫃起來，tī百姓ê頭前行；in就扛約櫃起來，行tī百姓ê頭前。Iok-su-a koh hoan-hù chè-si kóng, Lín kng iok-kūi khí-lâi, tī peh-sìⁿ ê thâu-chêng kiâⁿ; in chiū kng iok-kūi khí-lâi, kiâⁿ tī peh-sìⁿ ê thâu-chêng.

7耶和華對約書亞講：Tùi今á日起，我beh hō͘你tī以色列眾人ê目睭前做大，hō͘ in知我kap你tī-teh，親像前kap摩西tī-teh一樣。Iâ-hô-hoa tùi Iok-su-a kóng, Tùi kin-á-ji̍t khí, Góa beh hō͘ lí tī Í-sek-lia̍t chèng-lâng ê ba̍k-chiu-chêng chòe-tōa, hō͘ in chai Góa kap lí tī-teh, chhin-chhiūⁿ chêng kap Mô͘-se tī-teh chi̍t-iūⁿ.

8你tio̍h吩咐扛約櫃ê祭司講：Lín到約旦水邊ê時，tio̍h停腳tī約旦。Lí tio̍h hoan-hù kng iok-kūi ê chè-si kóng, Lín kàu Iok-tàn chúi-piⁿ ê sî, tio̍h thêng-kha tī Iok-tàn.

9約書亞對以色列人講：Lín近前來，聽耶和華lín上帝ê話。Iok-su-a tùi Í-sek-lia̍t lâng kóng, Lín kūn-chêng lâi, thiaⁿ Iâ-hô-hoa lín Siōng-tè ê ōe.

10約書亞koh講：Tùi án-ni，lín thang知活ê上帝tī lín中間，beh tī lín ê頭前趕逐迦南人，Hek人、Hi-bī人、Pí-lī-sé人、Kek-ka-sat人、A-mô͘-lī人、Iâ-pò͘-su人。Iok-su-a koh kóng, Tùi án-ni lín thang chai oa̍h ê Siōng-tè tī lín tiong-kan, beh tī lín ê thâu-chêng kóaⁿ-tio̍k Ka-lâm lâng, Hek lâng, Hi-bī lâng, Pí-lī-sé lâng, Kek-ka-sat lâng, A-mô͘-lī lâng, Iâ-pò͘-su lâng.

11看ah，普天下ê主宰ê約櫃beh tī lín ê頭前過去，入約旦。Khòaⁿ ah, phó͘-thiⁿ-ē ê Chú-cháiⁿ ê iok-kūi beh tī lín ê thâu-chêng kè-khì, ji̍p Iok-tàn.

12Lín taⁿ tio̍h tùi以色列支派中揀十二人，每支派一個人；Lín taⁿ tio̍h tùi Í-sek-lia̍t chi-phài-tiong kéng cha̍p-jī lâng, múi chi-phài chi̍t ê lâng;

13到扛普天下ê主耶和華ê約櫃ê祭司，in ê腳khiā tī約旦河ê水，約旦河ê水，就是tùi頂面流落來ê水，beh截斷，khiā起來kui堆。kàu kng phó͘-thiⁿ-ē ê Chú Iâ-hô-hoa ê iok-kūi ê chè-si, in ê kha khiā tī Iok-tàn hô ê chúi, Iok-tàn hô ê chúi, chiū-sī tùi téng-bīn lâu-lo̍h-lâi ê chúi, beh chia̍t-tn̄g, khiā-khí-lâi kui-tui.

14百姓離開布棚，beh過約旦ê時，祭司就扛約櫃tī百姓ê頭前。Peh-sìⁿ lī-khui pò͘-pîⁿ, beh kè Iok-tàn ê sî, chè-si chiū kng iok-kūi tī peh-sìⁿ ê thâu-chêng.

15Tī收成ê時，約旦ê水常常pôaⁿ過伊ê岸。扛約櫃ê到約旦，扛約櫃ê祭司，Tī siu-sêng ê sî, Iok-tàn ê chúi siông-siông pôaⁿ-kè i ê hōaⁿ. Kng iok-kūi-ê kàu Iok-tàn, kng iok-kūi ê chè-si,

16腳一下ùn-tio̍h水，hit-ê tùi頂面流落來ê水，就khiā起來kui堆，相離真遠，tī Sat-la̍h-tàn邊頭ê亞當城；hit-ê流tī A-la̍h-pa海，就是鹽海，hiah-ê水全然截斷；百姓就tī耶利哥ê對面過去。kha chi̍t-ē ùn-tio̍h chúi, hit-ê tùi téng-bīn lâu-lo̍h-lâi ê chúi, chiū khiā-khí-lâi kui-tui, saⁿ-lī chin-hn̄g, tī Sat-la̍h-tàn piⁿ-thâu ê A-tong siâⁿ; hit ê lâu tī A-la̍h-pa hái, chiū-sī Iâm-hái, hiah ê chúi choân-jiân chia̍t-tn̄g; peh-sìⁿ chiū tī Iâ-lī-ko ê tùi-bīn kè-khì.

17扛耶和華約櫃ê祭司tī約旦ê乾地定定khiā-teh；以色列眾人lóng tùi乾地過去，直到百姓一盡過約旦。Kng Iâ-hô-hoa iok-kūi ê chè-si tī Iok-tàn ê ta-tōe tiāⁿ-tiāⁿ khiā-teh; Í-sek-lia̍t chèng-lâng lóng tùi ta-tōe kè-khì, ti̍t-kàu peh-sìⁿ it-chīn kè Iok-tàn.

1百姓已經一盡過約旦，耶和華就吩咐約書亞講：Peh-sìⁿ í-keng it-chīn kè Iok-tàn, Iâ-hô-hoa chiū hoan-hù Iok-su-a kóng,

2Tio̍h tùi百姓中揀十二人，每支派一人；Tio̍h tùi peh-sìⁿ-tiong kéng cha̍p-jī lâng, múi chi-phài chi̍t-lâng;

3命令in講：Lín tùi hia，tùi約旦河中，祭司ê腳定定khiā ê所在，取十二塊石，帶伊kap lín過去，hē tī lín今暝beh歇ê所在。bēng-lēng in kóng, Lín tùi hia, tùi Iok-tàn hô-tiong, chè-si ê kha tiāⁿ-tiāⁿ khiā ê só͘-chāi, chhú cha̍p-jī tè chio̍h, tòa i kap lín kè-khì, hē tī lín kim-mî beh hioh ê só͘-chāi.

4約書亞就照伊tùi以色列人中所備辦ê hit十二人，每支派一人，lóng叫in來。Iok-su-a chiū chiàu i tùi Í-sek-lia̍t lâng tiong só͘ pī-pān ê hí cha̍p-jī lâng, múi chi-phài chi̍t-lâng, lóng kiò in lâi.

5約書亞就kā in講：Lín過去tī耶和華lín上帝約櫃ê頭前，到約旦河中，照以色列人支派ê數額，ta̍k人取一塊石頭giâ tī肩頭裡；Iok-su-a chiū kā in kóng, Lín kè-khì tī Iâ-hô-hoa lín Siōng-tè iok-kūi ê thâu-chêng, kàu Iok-tàn hô-tiong, chiàu Í-sek-lia̍t lâng chi-phài ê siàu-gia̍h, ta̍k-lâng chhú chi̍t tè chio̍h-thâu giâ tī keng-thâu-ni̍h;

6thang用chit-ê tī lín中間做證據；日後lín ê kiáⁿ孫問lín講：chiah-ê石頭，對tī lín甚麼意思？thang ēng chit-ê tī lín tiong-kan chòe chèng-kù; ji̍t-āu lín ê kiáⁿ-sun mn̄g lín kóng, Chiah ê chio̍h-thâu, tùi tī lín sím-mi̍h ì-sù?

7Lín就對in講，是因為前約旦ê水，tī耶和華ê約櫃前截斷；約櫃過約旦ê時，約旦ê水截斷，chiah-ê石beh做以色列人永遠ê記念。lín chiū tùi in kóng, Sī in-ūi chêng Iok-tàn ê chúi, tī Iâ-hô-hoa ê iok-kūi chêng chia̍t-tn̄g; iok-kūi kè Iok-tàn ê sî, Iok-tàn ê chúi chia̍t-tn̄g, chiah ê chio̍h beh chòe Í-sek-lia̍t lâng éng-oán ê kì-liām.

8以色列人照約書亞所命令ê來行；照以色列人支派ê數額，tùi約旦河中取十二塊石，lóng照耶和華對約書亞所講ê；in就續帶in過去，到in歇睏ê所在，就hē tī-hia。Í-sek-lia̍t lâng chiàu Iok-su-a só͘ bēng-lēng-ê lâi kiâⁿ; chiàu Í-sek-lia̍t lâng chi-phài ê siàu-gia̍h, tùi Iok-tàn hô-tiong chhú cha̍p-jī tè chio̍h, lóng chiàu Iâ-hô-hoa tùi Iok-su-a só͘ kóng-ê; in chiū sòa tòa in kè-khì, kàu in hioh-khùn ê só͘-chāi, chiū hē tī-hia.

9約書亞另外用十二塊石，khiā tī約旦河中，tī 扛約櫃ê祭司腳khiā teh ê所在；到今á日hiah-ê石iáu-kú tī-hia。Iok-su-a lēng-gōa ēng cha̍p-jī tè chio̍h, khiā tī Iok-tàn hô-tiong, tī kng iok-kūi ê chè-si kha khiā-teh ê só͘-chāi; kàu kin-á-ji̍t hiah ê chio̍h iáu-kú tī-hia.

10扛約櫃ê祭司khiā tī約旦河中，thèng候耶和華命令約書亞對百姓講ê事做明白，是照摩西所命令約書亞一切ê話，百姓就緊緊過去。Kng iok-kūi ê chè-si khiā tī Iok-tàn hô-tiong, thèng-hāu Iâ-hô-hoa bēng-lēng Iok-su-a tùi peh-sìⁿ kóng ê sū chòe bêng-pe̍k, sī chiàu Mô͘-se só͘ bēng-lēng Iok-su-a it-chhè ê ōe, peh-sìⁿ chiū kín-kín kè-khì.

11眾百姓一盡過去，耶和華ê約櫃kap祭司就tī百姓ê面前過去。Chèng peh-sìⁿ it-chīn kè-khì, Iâ-hô-hoa ê iok-kūi kap chè-si chiū tī peh-sìⁿ ê bīn-chêng kè-khì.

12Liû-piān人、Ka-tek人、Má-ná-se半支派ê人，lóng照摩西所對in講ê，帶軍器tī以色列人ê頭前過去；Liû-piān lâng, Ka-tek lâng, Má-ná-se pòaⁿ-chi-phài ê lâng, lóng chiàu Mô͘-se só͘ tùi in kóng ê, tòa kun-khì tī Í-sek-lia̍t lâng ê thâu-chêng kè-khì;

13約略有四萬人，lóng備辦交戰，tī耶和華ê面前過去，到耶利哥ê平洋，便便beh交戰。iok-lio̍k ū sì-bān lâng, lóng pī-pān kau-chiàn, tī Iâ-hô-hoa ê bīn-chêng kè-khì, kàu Iâ-lī-ko ê pîⁿ-iûⁿ, piān-piān beh kau-chiàn.

14當hit日耶和華hō͘約書亞tī以色列眾人ê目睭前做大；tī伊一生ê日，百姓敬畏伊，親像早前敬畏摩西一樣。Tng hit-ji̍t Iâ-hô-hoa hō͘ Iok-su-a tī Í-sek-lia̍t chèng-lâng ê ba̍k-chiu-chêng chòe-tōa; tī i it-seng ê ji̍t, peh-sìⁿ kèng-ùi i, chhin-chhiūⁿ chá-chêng kèng-ùi Mô͘-se chi̍t-iūⁿ.

15耶和華吩咐約書亞講：Iâ-hô-hoa hoan-hù Iok-su-a kóng,

16你命令扛法櫃ê祭司，tùi約旦河上來。Lí bēng-lēng kng hoat-kūi ê chè-si, tùi Iok-tàn hô chiūⁿ-lâi.

17約書亞就命令祭司講：Lín tùi約旦河上來。Iok-su-a chiū bēng-lēng chè-si kóng, Lín tùi Iok-tàn hô chiūⁿ-lâi.

18扛耶和華約櫃ê祭司tùi約旦河上來；祭司ê腳掌tú-tú跨(hoa̍h)上乾地ê時，約旦河ê水就流到原位；照舊漲滿雙pêng ê岸。Kng Iâ-hô-hoa iok-kūi ê chè-si tùi Iok-tàn hô chiūⁿ-lâi; chè-si ê kha-chiúⁿ tú-tú hoa̍h-chiūⁿ ta-tōe ê sî, Iok-tàn hô ê chúi chiū lâu kàu goân-ūi; chiàu-kū tiòng-móa siang-pêng ê hōaⁿ.

19正月初十日，百姓tùi約旦上來，就安營tī Kiat-kah，tī耶利哥東勢ê界。Chiaⁿ-ge̍h chhoe-cha̍p ji̍t, peh-sìⁿ tùi Iok-tàn chiūⁿ-lâi, chiū an-iâⁿ tī Kiat-kah, tī Iâ-lī-ko tang-sì ê kài.

20In tùi約旦所取hit十二塊石，約書亞就khiā 伊tī Kiat-kah；In tùi Iok-tàn só͘ chhú hí cha̍p-jī tè chio̍h, Iok-su-a chiū khiā i tī Kiat-kah;

21就對以色列人講：日後lín ê kiáⁿ孫問in ê老父講：chiū tùi Í-sek-lia̍t lâng kóng, Ji̍t-āu lín ê kiáⁿ-sun mn̄g in ê lāu-pē kóng,

22Chiah-ê石甚麼意思？hit時就tio̍h報lín ê kiáⁿ知，講：以色列人bat行乾地，過chit-ê約旦河。Chiah ê chio̍h sím-mi̍h ì-sù? hit-sî chiū tio̍h pò lín ê kiáⁿ chai, kóng, Í-sek-lia̍t lâng bat kiâⁿ ta-tōe, kè chit ê Iok-tàn hô.

23因為耶和華lín ê上帝tī lín ê頭前hō͘約旦ê水乾去，thèng候lín過來，親像耶和華lín上帝前tī紅海所做一樣，就是hō͘伊tī咱ê頭前乾去，thèng候咱過來；In-ūi Iâ-hô-hoa lín ê Siōng-tè tī lín ê thâu-chêng hō͘ Iok-tàn ê chúi ta-khì, thèng-hāu lín kè-lâi, chhin-chhiūⁿ Iâ-hô-hoa lín Siōng-tè chêng tī Âng-hái só͘ chòe chi̍t-iūⁿ, chiū-sī hō͘ i tī lán ê thâu-chêng ta-khì, thèng-hāu lán kè-lâi;

24beh hō͘地上萬百姓lóng知耶和華ê手有大能力；也beh hō͘ lín永遠敬畏耶和華lín ê上帝。beh hō͘ tōe-chiūⁿ bān peh-sìⁿ lóng chai Iâ-hô-hoa ê chhiú ū tōa lêng-le̍k; iā beh hō͘ lín éng-oán kèng-ùi Iâ-hô-hoa lín ê Siōng-tè.

1約旦河西勢ê A-mô͘-lī人chiah-ê王，kap óa海ê迦南人chiah-ê王，聽見耶和華tī以色列人ê面前hō͘約旦ê水乾去，thèng候咱過去；in ê心因為以色列人ê緣故就失膽，神不附體。Iok-tàn hô sai-sì ê A-mô͘-lī lâng chiah ê ông, kap óa-hái ê Ka-lâm lâng chiah ê ông, thiaⁿ-kìⁿ Iâ-hô-hoa tī Í-sek-lia̍t lâng ê bīn-chêng hō͘ Iok-tàn ê chúi ta-khì, thèng-hāu lán kè-khì; in ê sim in-ūi Í-sek-lia̍t lâng ê iân-kò͘ chiū sit-táⁿ, sîn put-hū-thé.

2Hit時耶和華對約書亞講：你tio̍h chhòng火石刀，第二pái kā以色列人行割禮。Hit-sî Iâ-hô-hoa tùi Iok-su-a kóng, Lí tio̍h chhòng hé-chio̍h to, tē-jī pái kā Í-sek-lia̍t lâng kiâⁿ kat-lé.

3約書亞就chhòng火石刀，tī除去皮山hia，kā以色列人行割禮。Iok-su-a chiū chhòng hé-chio̍h to, tī tû-khì-phê soaⁿ hia, kā Í-sek-lia̍t lâng kiâⁿ kat-lé.

4約書亞kā in行割禮ê緣故，是因為tùi埃及出來ê眾百姓，見能交戰ê ta-po͘丁，出埃及以後tī路裡死tī曠野。Iok-su-a kā in kiâⁿ kat-lé ê iân-kò͘, sī in-ūi tùi Ai-ki̍p chhut-lâi ê chèng peh-sìⁿ, kìⁿ ōe kau-chiàn ê ta-po͘-teng, chhut Ai-ki̍p í-āu tī lō͘-ni̍h sí tī khòng-iá.

5因為出來ê眾百姓lóng受割禮；獨獨出埃及以後tī曠野ê路裡所生ê眾百姓，lóng無受割禮。In-ūi chhut-lâi ê chèng peh-sìⁿ lóng siū kat-lé; to̍k-to̍k chhut Ai-ki̍p í-āu tī khòng-iá ê lō͘-ni̍h só͘ siⁿ ê chèng peh-sìⁿ, lóng bô siū kat-lé.

6以色列人tī曠野行四十年，到眾百姓，就是出埃及ê戰士，一盡消滅；因為in無聽thàn耶和華ê話，耶和華bat對in chiù-chōa，m̄-hō͘ in看見耶和華對in列祖所chiù-chōa beh賞賜咱ê地，就是流奶kap蜜ê地。Í-sek-lia̍t lâng tī khòng-iá kiâⁿ sì-cha̍p nî, kàu chèng peh-sìⁿ, chiū-sī chhut Ai-ki̍p ê chiàn-sū, it-chīn siau-bia̍t; in-ūi in bô thiaⁿ-thàn Iâ-hô-hoa ê ōe, Iâ-hô-hoa bat tùi in chiù-chōa, m̄-hō͘ in khòaⁿ-kìⁿ Iâ-hô-hoa tùi in lia̍t-chó͘ só͘ chiù-chōa beh siúⁿ-sù lán ê tōe, chiū-sī lâu lin kap bi̍t ê tōe.

7In ê kiáⁿ孫，就是伊所興起來續接in ê，lóng無受割禮，因為in tī路裡無kā in行割禮；約書亞chiah kā in行。In ê kiáⁿ-sun, chiū-sī I só͘ heng-khí lâi sòa-chiap in ê, lóng bô siū kat-lé, in-ūi in tī lō͘-ni̍h bô kā in kiâⁿ kat-lé; Iok-su-a chiah kā in kiâⁿ.

8百姓lóng受割禮明白，就tiàm tī營內家己ê所在，thèng候好。Peh-sìⁿ lóng siū kat-lé bêng-pe̍k, chiū tiàm tī iâⁿ-lāi ka-kī ê só͘-chāi, thèng-hāu hó.

9耶和華對約書亞講：我今á日將埃及ê凌辱移徙離開lín；tùi án-ni，hit所在名叫Kiat-kah，直到今á日。Iâ-hô-hoa tùi Iok-su-a kóng, Góa kin-á-ji̍t chiong Ai-ki̍p ê lêng-jio̍k î-sóa lī-khui lín; tùi án-ni hit só͘-chāi miâ kiò Kiat-kah, ti̍t-kàu kin-á-ji̍t.

10Hit時以色列人紮營tī Kiat-kah；hit月十四ê-hng，tī耶利哥ê平洋守pôaⁿ過節。Hit-sî Í-sek-lia̍t lâng chat-iâⁿ tī Kiat-kah; hit-ge̍h cha̍p-sì ê-hng, tī Iâ-lī-ko ê pîⁿ-iûⁿ siú pôaⁿ-kè-choeh.

11pôaⁿ過節ê隔日in就食hit所在所出ê，tú-tú hit日食無酵餅kap烘ê五穀；Pôaⁿ-kè-choeh ê keh-ji̍t in chiū chia̍h hit só͘-chāi só͘ chhut ê, tú-tú hit-ji̍t chia̍h bô-kàⁿ-piáⁿ kap hang ê ngó͘-kok;

12in食hit所在所出ê，隔日má-ná就停歇；以色列人也無koh有má-ná；hit年in就食迦南地ê土產。in chia̍h hit só͘-chāi só͘ chhut ê, keh-ji̍t má-ná chiū thêng-hioh; Í-sek-lia̍t lâng iā bô koh ū má-ná; hit-nî in chiū chia̍h Ka-lâm tōe ê thó͘-sán.

13約書亞óa近耶利哥ê時kia̍h目看，看見有一人手拔刀，khiā tī伊ê對面；約書亞近óa伊，問伊講：你是為阮ê，á是為阮ê對敵ah？Iok-su-a óa-kūn Iâ-lī-ko ê sî kia̍h-ba̍k khòaⁿ, khòaⁿ-kìⁿ ū chi̍t-lâng chhiú pu̍ih-to, khiā tī i ê tùi-bīn; Iok-su-a kūn-óa i, mn̄g i kóng, Lí sī ūi goán ê, á-sī ūi goán ê tùi-te̍k ah?

14伊應講，無，我來是做耶和華ê軍長。約書亞就仆tī地裡拜伊，講：我ê主命令奴僕甚麼？I ìn kóng, Bô, góa lâi sī chòe Iâ-hô-hoa ê kun-tiúⁿ. Iok-su-a chiū phak tī tōe-ni̍h pài i, kóng, Góa ê Chú bēng-lēng lô͘-po̍k sím-mi̍h?

15耶和華ê軍長對約書亞講：Thǹg你腳裡ê鞋，因為你所khiā ê所在是聖ê；約書亞就照án-ni行。Iâ-hô-hoa ê kun-tiúⁿ tùi Iok-su-a kóng, Thǹg lí kha-ni̍h ê ôe, in-ūi lí só͘ khiā ê só͘-chāi sī sèng ê; Iok-su-a chiū chiàu án-ni kiâⁿ.