1(耶利哥ê城門，因為以色列人ê緣故，就關tiâu-tiâu，無人出，也無人入。)(Iâ-lī-ko ê siâⁿ-mn̂g, in-ūi Í-sek-lia̍t lâng ê iân-kò͘, chiū koaiⁿ tiâu-tiâu, bô lâng chhut, iā bô lâng ji̍p.)

2耶和華kā約書亞講：看ah，我有將耶利哥kap伊ê王，kap伊大力ê勇士，lóng交tī你ê手。Iâ-hô-hoa kā Iok-su-a kóng, Khòaⁿ ah, Góa ū chiong Iâ-lī-ko kap i ê ông, kap i tōa-la̍t ê ióng-sū, lóng kau tī lí ê chhiú.

3Lín一切ê戰士tio̍h圍se̍h chit-ê城一pái；六日lóng tio̍h án-ni行；Lín it-chhè ê chiàn-sū tio̍h ûi-se̍h chit ê siâⁿ chi̍t-pái; la̍k-ji̍t lóng tio̍h án-ni kiâⁿ;

4七個祭司tio̍h kia̍h七支羊角ê號筒行tī約櫃ê頭前，到第七日lín tio̍h se̍h城七pái，祭司也tio̍h pûn號筒；chhit ê chè-si tio̍h kia̍h chhit ki iûⁿ-kak ê hō-tâng kiâⁿ tī iok-kūi ê thâu-chêng, kàu tē-chhit ji̍t lín tio̍h se̍h-siâⁿ chhit-pái, chè-si iā tio̍h pûn hō-tâng;

5in pûn角ê聲拖長，lín聽見號筒ê聲，眾百姓tio̍h大聲hoah，城牆就beh倒平平，ta̍k人lóng tio̍h直直進前去。in pûn-kak ê siaⁿ thoa-tn̂g, lín thiaⁿ-kìⁿ hō-tâng ê siaⁿ, chèng peh-sìⁿ tio̍h tōa-siaⁿ hoah, siâⁿ-chhiûⁿ chiū beh tó pîⁿ-pîⁿ, ta̍k-lâng lóng tio̍h ti̍t-ti̍t chìn-chêng khì.

6Lùn ê kiáⁿ約書亞叫祭司來，kā in講：Lín tio̍h 扛約櫃，祭司七人kia̍h七支羊角ê號筒tī耶和華ê櫃前。Lùn ê kiáⁿ Iok-su-a kiò chè-si lâi, kā in kóng, Lín tio̍h kng iok-kūi, chè-si chhit-lâng kia̍h chhit ki iûⁿ-kak ê hō-tâng tī Iâ-hô-hoa ê kūi-chêng.

7Koh kā百姓講：Lín tio̍h進前去se̍h城，帶軍器ê tio̍h行tī耶和華ê櫃前。Koh kā peh-sìⁿ kóng, Lín tio̍h chìn-chêng khì se̍h-siâⁿ, tòa kun-khì-ê tio̍h kiâⁿ tī Iâ-hô-hoa ê kūi-chêng.

8約書亞對百姓講soah，七個祭司kia̍h七支羊角ê號筒，行tī耶和華ê面前，pûn號筒，耶和華ê約櫃tè tī in ê後面；Iok-su-a tùi peh-sìⁿ kóng soah, chhit ê chè-si kia̍h chhit ki iûⁿ-kak ê hō-tâng, kiâⁿ tī Iâ-hô-hoa ê bīn-chêng, pûn hō-tâng, Iâ-hô-hoa ê iok-kūi tè tī in ê āu-bīn;

9帶軍器ê行tī pûn號筒ê祭司ê頭前，後隊tè約櫃行；祭司ná行ná-pûn號筒。tòa kun-khì-ê kiâⁿ tī pûn hō-tâng ê chè-si ê thâu-chêng, āu-tūi tè iok-kūi kiâⁿ; chè-si ná-kiâⁿ ná-pûn hō-tâng.

10約書亞命令百姓講：Lín m̄-thang hoah，m̄-thang hō͘人聽見lín ê聲，連一句也m̄-thang出嘴，thèng候我吩咐lín hoah ê日，hit時chiah thang hoah。Iok-su-a bēng-lēng peh-sìⁿ kóng, Lín m̄-thang hoah, m̄-thang hō͘ lâng thiaⁿ-kìⁿ lín ê siaⁿ, liân chi̍t-kù iā m̄-thang chhut-chhùi, thèng-hāu góa hoan-hù lín hoah ê ji̍t, hit-sî chiah thang hoah.

11Tùi án-ni，伊hō͘耶和華ê約櫃圍城，se̍h一pái；in就tò來營盤，歇tī營內。Tùi án-ni, i hō͘ Iâ-hô-hoa ê iok-kūi ûi-siâⁿ, se̍h chi̍t-pái; in chiū tò-lâi iâⁿ-pôaⁿ, hioh tī iâⁿ-lāi.

12天光約書亞早早起來，祭司也扛耶和華ê約櫃。Thiⁿ-kng Iok-su-a chá-chá khí-lâi, chè-si iā kng Iâ-hô-hoa ê iok-kūi.

13Kia̍h七支羊角ê號筒ê七個祭司，tī耶和華ê櫃前直直行，pûn號筒；帶軍器ê tī in ê頭前行；後隊tè耶和華ê約櫃行，祭司ná行ná-pûn號筒；Kia̍h chhit ki iûⁿ-kak ê hō-tâng ê chhit ê chè-si, tī Iâ-hô-hoa ê kūi-chêng ti̍t-ti̍t kiâⁿ, pûn hō-tâng; tòa kun-khì-ê tī in ê thâu-chêng kiâⁿ; āu-tūi tè Iâ-hô-hoa ê iok-kūi kiâⁿ, chè-si ná-kiâⁿ ná-pûn hō-tâng;

14第二日in se̍h城一pái；就tò來營盤；六日lóng是án-ni行。tē-jī ji̍t in se̍h-siâⁿ chi̍t-pái; chiū tò-lâi iâⁿ-pôaⁿ; la̍k-ji̍t lóng sī án-ni kiâⁿ.

15第七日phah-phú光ê時，in早早起來，照án-ni se̍h城七pái；只有chit日se̍h城七pái。Tē-chhit ji̍t phah-phú-kng ê sî, in chá-chá khí-lâi, chiàu án-ni se̍h-siâⁿ chhit-pái; chí-ū chit-ji̍t se̍h-siâⁿ chhit-pái.

16到第七pái，祭司pûn號筒ê時，約書亞kā百姓講：Tio̍h hoah ah，因為耶和華用城交hō͘ lín lah。Kàu tē-chhit pái, chè-si pûn hō-tâng ê sî, Iok-su-a kā peh-sìⁿ kóng, Tio̍h hoah ah, in-ūi Iâ-hô-hoa ēng siâⁿ kau hō͘ lín lah.

17Chit-ê城kap其中一切所有ê，lóng tio̍h分別歸hō͘耶和華；只有娼妓Lat-ha̍p，以及一切kap伊tī厝內ê，thang活teh；因為伊有khǹg密咱所差ê使者。Chit ê siâⁿ kap kî-tiong it-chhè só͘-ū-ê, lóng tio̍h hun-piat kui hō͘ Iâ-hô-hoa; chí-ū chhiong-ki Lat-ha̍p, í-ki̍p it-chhè kap i tī chhù-lāi-ê, thang oa̍h-teh; in-ūi i ū khǹg-ba̍t lán só͘ chhe ê sù-chiá.

18Lín tī應該滅ê物tio̍h家己謹慎，驚了lín the̍h應該滅ê物，致到家己也做應該滅ê；koh連累以色列全營也做應該滅ê，來害tio̍h伊。Lín tī eng-kai bia̍t ê mi̍h tio̍h ka-kī kín-sīn, kiaⁿ-liáu lín the̍h eng-kai bia̍t ê mi̍h, tì-kàu ka-kī iā chòe eng-kai bia̍t-ê; koh liân-lūi Í-sek-lia̍t choân-iâⁿ iā chòe eng-kai bia̍t-ê, lâi hāi-tio̍h i.

19只有金、銀，kap銅鐵ê器具，lóng tio̍h分別歸hō͘耶和華，收入耶和華ê府庫。Chí-ū kim, gûn, kap tâng thih ê khì-kū, lóng tio̍h hun-piat kui hō͘ Iâ-hô-hoa, siu-ji̍p Iâ-hô-hoa ê hú-khò͘.

20百姓就hoah，祭司也pûn號筒；百姓聽見號筒ê聲，就大聲hoah，城牆就倒到平平，百姓就進前入城，ta̍k人直直去；tùi án-ni，取hit-ê城。Peh-sìⁿ chiū hoah, chè-si iā pûn hō-tâng; peh-sìⁿ thiaⁿ-kìⁿ hō-tâng ê siaⁿ, chiū tōa-siaⁿ hoah, siâⁿ-chhiûⁿ chiū tó kàu pîⁿ-pîⁿ, peh-sìⁿ chiū chìn-chêng ji̍p siâⁿ, ta̍k-lâng ti̍t-ti̍t khì; tùi án-ni chhú hit ê siâⁿ.

21Koh將城內所有ê，無論男女老幼、牛、羊，kap驢，lóng用刀一盡滅伊。Koh chiong siâⁿ-lāi só͘-ū-ê, bô-lūn lâm-lú ló-iù, gû, iûⁿ, kap lû, lóng ēng to it-chīn bia̍t i.

22約書亞kā偵探hit-ê地hit兩人講：Lín入去hit-ê娼妓ê厝，照lín對伊所chiù-chōa-ê，chhōa hit-ê婦人人kap一切屬tī伊ê lóng tùi-hia出來。Iok-su-a kā cheng-thàm hit ê tōe hí nn̄g lâng kóng, Lín ji̍p-khì hit ê chhiong-ki ê chhù, chiàu lín tùi i só͘ chiù-chōa-ê, chhōa hit ê hū-jîn-lâng kap it-chhè sio̍k tī i-ê lóng tùi-hia chhut-lâi.

23Hiah-ê做偵探ê少年人就入去，chhōa Lat-ha̍p kap伊ê老父、老母、兄弟，以及一切屬tī伊ê出來，也chhōa伊ê親戚出來，hō͘ in tòa tī以色列ê營外。Hiah ê chòe cheng-thàm ê siàu-liân lâng chiū ji̍p-khì, chhōa Lat-ha̍p kap i ê lāu-pē, lāu-bú, hiaⁿ-tī, í-ki̍p it-chhè sio̍k tī i-ê chhut-lâi, iā chhōa i ê chhin-chhek chhut-lâi, hō͘ in tòa tī Í-sek-lia̍t ê iâⁿ-gōa.

24In就用火燒hit-ê城kap其中一切所有ê；獨獨金、銀，kap銅鐵ê器具，lóng hē tī耶和華厝內ê府庫。In chiū ēng hé sio hit ê siâⁿ kap kî-tiong it-chhè só͘-ū-ê; to̍k-to̍k kim, gûn, kap tâng thih ê khì-kū, lóng hē tī Iâ-hô-hoa chhù-lāi ê hú-khò͘.

25約書亞就保全娼妓Lat-ha̍p，kap伊老父ê家眷，kap一切屬tī伊ê ê活命；因為伊有khǹg密約書亞所差偷看耶利哥ê使者；伊就tiàm tī以色列中，到今á日。Iok-su-a chiū pó-choân chhiong-ki Lat-ha̍p, kap i lāu-pē ê ke-koàn, kap it-chhè sio̍k tī i-ê ê oa̍h-miā; in-ūi i ū khǹg-ba̍t Iok-su-a só͘ chhe thau-khòaⁿ Iâ-lī-ko ê sù-chiá; i chiū tiàm tī Í-sek-lia̍t tiong, kàu kin-á-ji̍t.

26當時約書亞對眾人chiù-chōa講：見若起來起造chit-ê耶利哥城ê，tio̍h tī耶和華ê面前受咒詛；伊hē地基ê時，beh死大kiáⁿ，hē門ê時beh死soah尾kiáⁿ。Tng-sî Iok-su-a tùi chèng-lâng chiù-chōa kóng, Kìⁿ-nā khí-lâi khí-chō chit ê Iâ-lī-ko siâⁿ ê, tio̍h tī Iâ-hô-hoa ê bīn-chêng siū chiù-chó͘; i hē tōe-ki ê sî, beh sí tōa-kiáⁿ, hē-mn̂g ê sî beh sí soah-bé-kiáⁿ.

27耶和華kap約書亞相kap tī-teh，伊ê名聲滿滿tī hit所在。Iâ-hô-hoa kap Iok-su-a saⁿ-kap tī-teh, i ê miâ-siaⁿ móa-móa tī hit só͘-chāi.

1總是以色列人tī應該獻ê物有犯罪；因為猶大ê支派中，謝拉 ê曾孫，Sat-tí ê孫，Ka-bí ê kiáⁿ，A-kan the̍h應該獻ê物；耶和華就受氣以色列人。Chóng-sī Í-sek-lia̍t lâng tī eng-kai hiàn ê mi̍h ū hoān-chōe; in-ūi Iû-tāi ê chi-phài-tiong, Siā-la̍h ê cheng-sun, Sat-tí ê sun, Ka-bí ê kiáⁿ, A-kan the̍h eng-kai hiàn ê mi̍h; Iâ-hô-hoa chiū siū-khì Í-sek-lia̍t lâng.

2約書亞tùi耶利哥差人去Pek-te̍k-lī東勢，óa近Pek-a-bûn ê Ai城，吩咐in講：Lín上去偷看hit-ê地；in就上去偷看Ai ê城。Iok-su-a tùi Iâ-lī-ko chhe lâng khì Pek-te̍k-lī tang-sì, óa-kūn Pek-a-bûn ê Ai siâⁿ, hoan-hù in kóng, Lín chiūⁿ-khì thau-khòaⁿ hit ê tōe; in chiū chiūⁿ-khì thau-khòaⁿ Ai ê siâⁿ.

3In tò來到約書亞hia，kā伊講，m̄免hō͘眾百姓上去；大約兩三千人上去phah Ai城，就好；m̄免勞動眾百姓去到hia；因為hia ê人少少。In tò-lâi kàu Iok-su-a hia, kā i kóng, M̄-bián hō͘ chèng peh-sìⁿ chiūⁿ-khì; tāi-iok nn̄g-saⁿ chheng lâng chiūⁿ-khì phah Ai siâⁿ, chiū hó; m̄-bián lô-tōng chèng peh-sìⁿ khì kàu hia; in-ūi hia ê lâng chió-chió.

4Tùi án-ni，百姓中約略三千人上去hia；竟然tī Ai城ê人ê面前逃走。Tùi án-ni peh-sìⁿ-tiong iok-lio̍k saⁿ-chheng lâng chiūⁿ-khì hia; kéng-jiân tī Ai siâⁿ ê lâng ê bīn-chêng tô-cháu.

5Ai城ê人thâi死in約略三十六人；in tùi城門前追趕in，到Sī-pa-lîm tī in落Ai siâⁿ ê lâng thâi-sí in iok-lio̍k saⁿ-cha̍p-la̍k lâng; in tùi siâⁿ-mn̂g-chêng tui-kóaⁿ in, kàu Sī-pa-lîm tī in lo̍h-kē ê só͘-chāi phah-sí in; chèng peh-sìⁿ chiū sit-táⁿ, loán-jio̍k chhin-chhiūⁿ chúi.

6約書亞就拆裂衫；伊kap以色列ê長老，tī耶和華ê櫃前，仆tī土腳，到ê-hng，也用塵埃sám tī頭殼。Iok-su-a chiū thiah-li̍h saⁿ; i kap Í-sek-lia̍t ê tiúⁿ-ló, tī Iâ-hô-hoa ê kūi-chêng, phak tī thô͘-kha, kàu ê-hng, iā ēng tîn-ai sám tī thâu-khak.

7約書亞講：Aiah，主耶和華ah，你啥事chhōa chiah-ê百姓過chit-ê約旦，將阮交tī A-mô͘-lī人ê手，hō͘阮滅無ah？可惜阮無掠tiàm tī約旦hit-pêng做夠額。Iok-su-a kóng, Ai-ah, Chú Iâ-hô-hoa ah, Lí siáⁿ-sū chhōa chiah ê peh-sìⁿ kè chit ê Iok-tàn, chiong goán kau tī A-mô͘-lī lâng ê chhiú, hō͘ goán bia̍t-bô ah? Khó-sioh goán bô lia̍h tiàm tī Iok-tàn hit-pêng chòe kàu-gia̍h.

8主ah，以色列人已經tī對敵ê面前oa̍t-tńg身走，我iáu有甚麼thang講ah？Chú ah, Í-sek-lia̍t lâng í-keng tī tùi-te̍k ê bīn-chêng oa̍t-tńg-sin cháu, góa iáu-ū sím-mi̍h thang kóng ah?

9因為迦南人kap chit所在一切khiā起ê百姓聽見，就beh圍困阮，除滅阮ê名tī地上；hit時你為tio̍h你ê大-名beh怎樣ah？In-ūi Ka-lâm lâng kap chit só͘-chāi it-chhè khiā-khí ê peh-sìⁿ thiaⁿ-kìⁿ, chiū beh ûi-khùn goán, tû-bia̍t goán ê miâ tī tōe-chiūⁿ; hit-sî Lí ūi-tio̍h Lí ê tōa-miâ beh cháiⁿ-iūⁿ ah?

10耶和華kā約書亞講：起來，你啥事án-ni仆tī地裡ah？Iâ-hô-hoa kā Iok-su-a kóng, Khí-lâi, lí siáⁿ-sū án-ni phak tī tōe-ni̍h ah?

11以色列犯罪，違背我所命令in ê約，取應該獻ê物，也偷the̍h，也行詭詐，khǹg tī in ê家器中。Í-sek-lia̍t hoān-chōe, ûi-pōe Góa só͘ bēng-lēng in ê iok, chhú eng-kai hiàn ê mi̍h, iā thau-the̍h, iā kiâⁿ khúi-chà, khǹg tī in ê ke-khì-tiong.

12因為án-ni以色列人tī對敵ê面前khiā-bōe-tiâu；in tī對敵ê面前oa̍t-tńg身走，是因為in成做受咒詛；lín若無將應該獻ê物，tùi lín中間除去，我就無koh kap lín相kap tī-teh。In-ūi án-ni Í-sek-lia̍t lâng tī tùi-te̍k ê bīn-chêng khiā-bōe-tiâu; in tī tùi-te̍k ê bīn-chêng oa̍t-tńg-sin cháu, sī in-ūi in chiâⁿ-chòe siū chiù-chó͘; lín nā bô chiong eng-kai hiàn ê mi̍h, tùi lín tiong-kan tû-khì, Góa chiū bô koh kap lín saⁿ-kap tī-teh.

13你起來，hō͘百姓清氣，kā in講：Lín tio̍h家己清氣備辦明á日；因為耶和華以色列ê上帝án-ni講：以色列ah，lín iáu未交出hit-ê物，就tī對敵ê面前lín beh khiā-bōe-tiâu。Lí khí-lâi, hō͘ peh-sìⁿ chheng-khì, kā in kóng, Lín tio̍h ka-kī chheng-khì pī-pān bîn-á-ji̍t; in-ūi Iâ-hô-hoa Í-sek-lia̍t ê Siōng-tè án-ni kóng, Í-sek-lia̍t ah, lín iáu-bē kau-chhut hit ê mi̍h, chiū tī tùi-te̍k ê bīn-chêng lín beh khiā-bōe-tiâu.

14明á早起lín tio̍h照lín ê支派近前來；耶和華所取ê支派，tio̍h照宗族近前來；耶和華所取ê宗族，tio̍h照家眷近前來；耶和華所取ê家眷，tio̍h照人丁，一個一個近前來。Bîn-á-chá-khí lín tio̍h chiàu lín ê chi-phài kūn-chêng lâi; Iâ-hô-hoa só͘ chhú ê chi-phài, tio̍h chiàu chong-cho̍k kūn-chêng lâi; Iâ-hô-hoa só͘ chhú ê chong-cho̍k, tio̍h chiàu ke-koàn kūn-chêng lâi; Iâ-hô-hoa só͘ chhú ê ke-koàn, tio̍h chiàu jîn-teng, chi̍t-ê chi̍t-ê kūn-chêng lâi.

15受取tio̍h ê人，有應該獻ê物tī伊hia，伊kap 伊所有ê，tio̍h受火燒；因為伊有背耶和華ê約，koh因為伊tī以色列中有行戇戇ê事。Siū chhú-tio̍h ê lâng, ū eng-kai hiàn ê mi̍h tī i hia, i kap i só͘-ū-ê, tio̍h siū hé sio; in-ūi i ū pōe Iâ-hô-hoa ê iok, koh in-ūi i tī Í-sek-lia̍t tiong ū kiâⁿ gōng-gōng ê sū.

16天光，約書亞早早起來，hō͘以色列人照支派近前來；取tio̍h-ê是猶大支派；Thiⁿ-kng, Iok-su-a chá-chá khí-lâi, hō͘ Í-sek-lia̍t lâng chiàu chi-phài kūn-chêng lâi; chhú-tio̍h-ê sī Iû-tāi chi-phài;

17Hō͘猶大ê宗族近前來，就取tio̍h 謝拉 ê宗族；hō͘ 謝拉宗族ê人丁一個一個近前來，就取tio̍h Sat-tí；hō͘ Iû-tāi ê chong-cho̍k kūn-chêng-lâi, chiū chhú-tio̍h Siā-la̍h ê chong-cho̍k; hō͘ Siā-la̍h chong-cho̍k ê jîn-teng chi̍t-ê chi̍t-ê kūn-chêng lâi, chiū chhú-tio̍h Sat-tí;

18Hō͘伊ê家照人丁一個一個近前來，就取tio̍h猶大支派ê人謝拉 ê曾孫，Sat-tí ê孫，Ka-bí ê kiáⁿ A-kan。hō͘ i ê ke chiàu jîn-teng chi̍t-ê chi̍t-ê kūn-chêng lâi, chiū chhú-tio̍h Iû-tāi chi-phài ê lâng Siā-la̍h ê cheng-sun, Sat-tí ê sun, Ka-bí ê kiáⁿ A-kan.

19約書亞對A-kan講：我ê kiáⁿ，我勸你tio̍h歸榮光耶和華以色列ê上帝，tī伊ê面前認罪，將你所做ê事kā我講：m̄-thang對我隱瞞。Iok-su-a tùi A-kan kóng, Góa ê kiáⁿ, góa khǹg lí tio̍h kui êng-kng Iâ-hô-hoa Í-sek-lia̍t ê Siōng-tè, tī I ê bīn-chêng jīn-chōe, chiong lí só͘ chòe ê sū kā góa kóng, m̄-thang tùi góa ún-môa.

20A-kan 應約書亞講：我實在得罪耶和華以色列ê上帝；我所做ê事是án-ni，án-ni；A-kan ìn Iok-su-a kóng, Góa si̍t-chāi tek-chōe Iâ-hô-hoa Í-sek-lia̍t ê Siōng-tè; góa só͘ chòe ê sū sī án-ni, án-ni;

21我tī所搶ê財物中看見一領Sī-ná ê súi衫，銀兩百sià-khek-le̍k，金一tiāⁿ，重五十sià-khek-le̍k，我貪 chiah-ê物，就the̍h伊，taⁿ tâi tī我ê布棚內ê土腳下，銀tī伊ê下底。góa tī só͘ chhiúⁿ ê châi-bu̍t-tiong khòaⁿ-kìⁿ chi̍t-niá Sī-ná ê súi-saⁿ, gûn nn̄g-pah sià-khek-le̍k, kim chi̍t-tiāⁿ, tāng gō͘-cha̍p sià-khek-le̍k, góa tham chiah ê mi̍h, chiū the̍h i, taⁿ tâi tī góa ê pò͘-pîⁿ-lāi ê thô͘-kha-ē, gûn tī i ê ē-tóe.

22約書亞就差人去，in就去，到伊ê布棚；看ah，hit-ê物果然khǹg tī伊ê布棚內，銀tī下底。Iok-su-a chiū chhe lâng khì, in chiū khì, kàu i ê pò͘-pîⁿ; khòaⁿ ah, hit ê mi̍h kó-jiân khǹg tī i ê pò͘-pîⁿ-lāi, gûn tī ē-tóe.

23In就tùi布棚內the̍h出來，帶到約書亞kap以色列眾人hia，hē tī耶和華ê面前。In chiū tùi pò͘-pîⁿ-lāi the̍h-chhut-lâi, tòa kàu Iok-su-a kap Í-sek-lia̍t chèng-lâng hia, hē tī Iâ-hô-hoa ê bīn-chêng.

24約書亞kap以色列眾人，將謝拉 ê曾孫A-kan，kap hit-ê銀，hit 件相衫，hit tiāⁿ金，kap伊ê kiáⁿ、cha-bó͘-kiáⁿ、牛、驢、羊、布棚，以及伊一切所有ê，lóng帶到A-kat ê山谷。Iok-su-a kap Í-sek-lia̍t chèng-lâng, chiong Siā-la̍h ê cheng-sun A-kan, kap hit ê gûn, hit kiāⁿ saⁿ, hit tiāⁿ kim, kap i ê kiáⁿ, cha-bó͘-kiáⁿ, gû, lû, iûⁿ, pò͘-pîⁿ, í-ki̍p i it-chhè só͘-ū-ê, lóng tòa kàu A-kat ê soaⁿ-kok.

25約書亞講：你啥事害阮？今á日耶和華也beh害你。Tùi án-ni，以色列眾人用石頭tìm死伊；用火燒in，將石頭tìm in。Iok-su-a kóng, Lí siáⁿ-sū hāi goán? kin-á-ji̍t Iâ-hô-hoa iā beh hāi lí. Tùi án-ni Í-sek-lia̍t chèng-lâng ēng chio̍h-thâu tìm-sí i; ēng hé sio in, chiong chio̍h-thâu tìm in.

26眾人tī伊ê頂面疊一大堆ê石，到tī今á日；tùi án-ni，耶和華收回伊ê大受氣。所以hit所在名叫A-kat ê山谷，到今á日。Chèng-lâng tī i ê téng-bīn thia̍p chi̍t tōa-tui ê chio̍h, kàu tī kin-á-ji̍t; tùi án-ni Iâ-hô-hoa siu-hôe I ê tōa siū-khì. Só͘-í hit só͘-chāi miâ-kiò A-kat ê soaⁿ-kok, kàu kin-á-ji̍t.

1耶和華對約書亞講：莫得驚，也莫得忍；你起來chhōa lóng總ê戰士上去Ai城，我已經將Ai城ê王，kap伊ê百姓，伊ê城，伊ê地，lóng交tī你ê手。Iâ-hô-hoa tùi Iok-su-a kóng, Bo̍h-tit kiaⁿ, iā bo̍h-tit lún; lí khí-lâi chhōa lóng-chóng ê chiàn-sū chiūⁿ-khì Ai siâⁿ, Góa í-keng chiong Ai siâⁿ ê ông, kap i ê peh-sìⁿ, i ê siâⁿ, i ê tōe, lóng kau tī lí ê chhiú.

2你款待Ai城，kap伊ê王，tio̍h親像前款待耶利哥kap伊ê王一樣；總是所搶伊ê財物，kap cheng-siⁿ，lín thang 取做家己ê；你tio̍h用兵埋伏tī城後。Lí khoán-thāi Ai siâⁿ, kap i ê ông, tio̍h chhin-chhiūⁿ chêng khoán-thāi Iâ-lī-ko kap i ê ông chi̍t-iūⁿ; chóng-sī só͘ chhiúⁿ i ê châi-bu̍t, kap cheng-siⁿ, lín thang chhú chòe ka-kī ê; lí tio̍h ēng peng bâi-ho̍k tī siâⁿ-āu.

3Tùi án-ni，約書亞kap一切ê戰士lóng起來，beh上去Ai城；約書亞揀三萬大力ê勇士，暝時差in去；Tùi án-ni Iok-su-a kap it-chhè ê chiàn-sū lóng khí-lâi, beh chiūⁿ-khì Ai siâⁿ; Iok-su-a kéng saⁿ-bān tōa-la̍t ê ióng-sū, mî-sî chhe in khì;

4吩咐in講：Lín tio̍h埋伏兵攻城，就是tī城後，m̄-thang離開城siuⁿ遠，lóng tio̍h備辦便。hoan-hù in kóng, Lín tio̍h bâi-ho̍k peng kong-siâⁿ, chiū-sī tī siâⁿ-āu, m̄-thang lī-khui siâⁿ siuⁿ hn̄g, lóng tio̍h pī-pān piān.

5我kap我所chhōa ê眾百姓beh近óa城；in親像頭pái出來攻擊阮，hit時阮就beh tī in ê面前逃走。Góa kap góa só͘ chhōa ê chèng peh-sìⁿ beh kūn-óa siâⁿ; in chhin-chhiūⁿ thâu-pái chhut-lâi kong-kek goán, hit-sî goán chiū beh tī in ê bīn-chêng tô-cháu.

6In beh出來追jip阮，到阮引誘in離開城；因為in beh講：chiah-ê人親像頭pái tī阮ê面前逃走；所以阮beh tī in ê面前逃走；In beh chhut-lâi tui-jip goán, kàu goán ín-iú in lī-khui siâⁿ; in-ūi in beh kóng, Chiah ê lâng chhin-chhiūⁿ thâu-pái tī goán ê bīn-chêng tô-cháu; só͘-í goán beh tī in ê bīn-chêng tô-cháu;

7Hit時lín就tio̍h tùi埋伏ê所在起來，取hit-ê城，因為耶和華lín ê上帝beh將伊交tī lín ê手。hit-sî lín chiū tio̍h tùi bâi-ho̍k ê só͘-chāi khí-lâi, chhú hit ê siâⁿ, in-ūi Iâ-hô-hoa lín ê Siōng-tè beh chiong i kau tī lín ê chhiú.

8Lín已經取城，就tio̍h用火燒城，tio̍h照耶和華ê話行；看ah，這是我所命令lín ê。Lín í-keng chhú siâⁿ, chiū tio̍h ēng hé sio siâⁿ, tio̍h chiàu Iâ-hô-hoa ê ōe kiâⁿ; khòaⁿ ah, che sī góa só͘ bēng-lēng lín ê.

9約書亞差in，in就去埋伏ê所在，tiàm tī Pek-te̍k-lī kap Ai城ê中間，就是Ai城ê西勢；hit暝約書亞歇tī百姓ê中間。Iok-su-a chhe in, in chiū khì bâi-ho̍k ê só͘-chāi, tiàm tī Pek-te̍k-lī kap Ai siâⁿ ê tiong-kan, chiū-sī Ai siâⁿ ê sai-sì; hit-mî Iok-su-a hioh tī peh-sìⁿ ê tiong-kan.

10天光約書亞早早起來，點算百姓；伊kap以色列ê長老tī百姓ê頭前上去Ai城。Thiⁿ-kng Iok-su-a chá-chá khí-lâi, tiám-sǹg peh-sìⁿ; i kap Í-sek-lia̍t ê tiúⁿ-ló tī peh-sìⁿ ê thâu-chêng chiūⁿ-khì Ai siâⁿ.

11眾百姓，就是kap伊tī-teh ê戰士，lóng上去近óa城ê頭前，tī Ai ê北pêng紮營；tī伊kap Ai ê中間有一個山谷。Chèng peh-sìⁿ, chiū-sī kap i tī-teh ê chiàn-sū, lóng chiūⁿ-khì kūn-óa siâⁿ ê thâu-chêng, tī Ai ê pak-pêng chat-iâⁿ; tī i kap Ai ê tiong-kan ū chi̍t ê soaⁿ-kok.

12伊約略有揀五千人，hō͘ in埋伏tī Pek-te̍k-lī kap Ai城ê中間，就是tī城ê西勢。I iok-lio̍k ū kéng gō͘-chheng lâng, hō͘ in bâi-ho̍k tī Pek-te̍k-lī kap Ai siâⁿ ê tiong-kan, chiū-sī tī siâⁿ ê sai-sì.

13Tùi án-ni，安置百姓，就是城北勢ê全軍，kap城西勢埋伏ê兵；chit暝約書亞入山谷中。Tùi án-ni an-tì peh-sìⁿ, chiū-sī siâⁿ pak-sì ê choân-kun, kap siâⁿ sai-sì bâi-ho̍k ê peng; chit-mî Iok-su-a ji̍p soaⁿ-kok tiong.

14Ai城ê王看見，城內hiah-ê人趕緊透早起來，照所定tio̍h ê時，出去到A-la̍h-pa ê頭前，beh kap以色列人交戰，王kap眾百姓lóng去；總是in m̄知tī城後有兵埋伏，beh攻擊in。Ai siâⁿ ê ông khòaⁿ-kìⁿ, siâⁿ-lāi hiah ê lâng kóaⁿ-kín thàu-chá khí-lâi, chiàu só͘ tiāⁿ-tio̍h ê sî, chhut-khì kàu A-la̍h-pa ê thâu-chêng, beh kap Í-sek-lia̍t lâng kau-chiàn, ông kap chèng peh-sìⁿ lóng khì; chóng-sī in m̄-chai tī siâⁿ-āu ū peng bâi-ho̍k, beh kong-kek in.

15約書亞kap以色列ê眾人tī in ê頭前假thâi輸，tùi曠野ê路逃走。Iok-su-a kap Í-sek-lia̍t ê chèng-lâng tī in ê thâu-chêng ké thâi-su, tùi khòng-iá ê lō͘ tô-cháu.

16城內ê眾百姓lóng聚集，追jip in；in追jip約書亞，就受引誘離開in ê城。Siâⁿ-lāi ê chèng peh-sìⁿ lóng chū-chi̍p, tui-jip in; in tui-jip Iok-su-a, chiū siū ín-iú lī-khui in ê siâⁿ.

17Ai城，kap Pek-te̍k-lī城，無留一人無出去追jip以色列人；城門放開開，去追jip以色列人。Ai siâⁿ, kap Pek-te̍k-lī siâⁿ, bô lâu chi̍t-lâng bô chhut-khì tui-jip Í-sek-lia̍t lâng; siâⁿ-mn̂g pàng khui-khui, khì tui-jip Í-sek-lia̍t lâng.

18耶和華對約書亞講：你伸出手裡所kia̍h ê鎗來kí Ai城；因為我beh將伊交tī你ê手。約書亞就伸出手裡所kia̍h ê鎗來kí hit-ê城。Iâ-hô-hoa tùi Iok-su-a kóng, Lí chhun-chhut chhiú-ni̍h só͘ kia̍h ê chhiuⁿ lâi kí Ai siâⁿ; in-ūi Góa beh chiong i kau tī lí ê chhiú. Iok-su-a chiū chhun-chhut chhiú-ni̍h só͘ kia̍h ê chhiuⁿ lâi kí hit ê siâⁿ.

19伊一下伸手，埋伏ê兵就對伊ê所在緊緊起來，走去入城取伊，緊緊放火燒城。I chi̍t-ē chhun chhiú, bâi-ho̍k ê peng chiū tùi i ê só͘-chāi kín-kín khí-lâi, cháu-khì ji̍p siâⁿ chhú i, kín-kín pàng hé sio siâⁿ.

20Ai城ê人oa̍t頭一下看；無phah算，城內火煙chhèng上天；in就走chia走hia，lóng無路；hiah-ê走去曠野ê百姓就hoan頭來攻擊追jip in。Ai siâⁿ ê lâng oa̍t-thâu chi̍t-ē khòaⁿ; bô phah-sǹg, siâⁿ-lāi hé-ian chhèng chiūⁿ thiⁿ; in chiū cháu-chia cháu-hia, lóng bô lō͘; hiah ê cháu-khì khòng-iá ê peh-sìⁿ chiū hoan-thâu lâi kong-kek tui-jip in.

21約書亞kap以色列ê眾人看見埋伏ê兵已經取城，城內火煙chhèng上高，就oa̍t-tńg身thâi死Ai城ê人；Iok-su-a kap Í-sek-lia̍t ê chèng-lâng khòaⁿ-kìⁿ bâi-ho̍k ê peng í-keng chhú siâⁿ, siâⁿ-lāi hé-ian chhèng chiūⁿ-koâiⁿ, chiū oa̍t-tńg-sin thâi-sí Ai siâⁿ ê lâng;

22埋伏ê兵也出來攻擊in；in受圍困tī以色列人ê中間，前後lóng是以色列人；tùi án-ni，thâi死in；無一個留teh，也無一個走去。bâi-ho̍k ê peng iā chhut-lâi kong-kek in; in siū ûi-khùn tī Í-sek-lia̍t lâng ê tiong-kan, chêng-āu lóng sī Í-sek-lia̍t lâng; tùi án-ni thâi-sí in; bô chi̍t-ê lâu-teh, iā bô chi̍t-ê cháu-khì.

23In就活掠Ai城ê王，押伊到約書亞hia。In chiū oa̍h-lia̍h Ai siâⁿ ê ông, ah i kàu Iok-su-a hia.

24以色列人一盡thâi死khiā起tī Ai ê百姓，tī田裡，tī曠野jip-tio̍h ê所在，in lóng倒tī刀下，到滅無。以色列眾人就倒tńg來Ai城，用刀thâi城中ê人。Í-sek-lia̍t lâng it-chīn thâi-sí khiā-khí tī Ai ê peh-sìⁿ, tī chhân-ni̍h, tī khòng-iá jip-tio̍h ê só͘-chāi, in lóng tó tī to-ē, kàu bia̍t-bô. Í-sek-lia̍t chèng-lâng chiū tò-tńg lâi Ai siâⁿ, ēng to thâi siâⁿ-tiong ê lâng.

25當hit日thâi死ê男女，共一萬兩千，就是Ai城ê百姓。Tng hit-ji̍t thâi-sí ê lâm-lú, kiōng chi̍t-bān nn̄g-chheng, chiū-sī Ai siâⁿ ê peh-sìⁿ.

26約書亞無kiu伊伸出鎗ê手，直到一盡滅Ai城ê百姓。Iok-su-a bô kiu i chhun-chhut chhiuⁿ ê chhiú, ti̍t-kàu it-chīn bia̍t Ai siâⁿ ê peh-sìⁿ.

27獨獨cheng-siⁿ，kap所搶城內ê財物，以色列人lóng 取做家己ê，照耶和華所命令約書亞ê話。To̍k-to̍k cheng-siⁿ, kap só͘ chhiúⁿ siâⁿ-lāi ê châi-bu̍t, Í-sek-lia̍t lâng lóng chhú chòe ka-kī-ê, chiàu Iâ-hô-hoa só͘ bēng-lēng Iok-su-a ê ōe.

28約書亞燒Ai城，hō͘伊永永做土堆，荒廢到今á日；Iok-su-a sio Ai siâⁿ, hō͘ i éng-éng chòe thô͘-tui, hong-hòe kàu kin-á-ji̍t;

29koh召Ai城ê王tī樹裡；到黃昏日落ê時，約書亞出命令，人就tùi樹裡收身屍落來，hiat tī城門口；tī hit頂面疊一大堆ê石頭，到今á日iáu tī-teh。koh tiàu Ai siâⁿ ê ông tī chhiū-ni̍h; kàu hông-hun ji̍t-lo̍h ê sî, Iok-su-a chhut bēng-lēng, lâng chiū tùi chhiū-ni̍h siu sin-si lo̍h-lâi, hiat tī siâⁿ-mn̂g-kháu; tī hit téng-bīn thia̍p chi̍t tōa-tui ê chio̍h-thâu, kàu kin-á-ji̍t iáu tī-teh.

30Hit時約書亞tī Í-pa-lō͘山，為耶和華以色列ê上帝，起一座壇；Hit-sî Iok-su-a tī Í-pa-lō͘ soaⁿ, ūi Iâ-hô-hoa Í-sek-lia̍t ê Siōng-tè, khí chi̍t chō tôaⁿ;

31是用自然ê石，hit頂面無動tio̍h鐵器ê，來起伊，照耶和華ê奴僕摩西所命令以色列人ê話，照摩西律法冊內所記ê；in tī chit-ê壇頂獻燒祭hō͘耶和華，也奉謝恩ê祭。sī ēng chū-jiân ê chio̍h, hí téng-bīn bô tāng-tio̍h thih-khì-ê, lâi khí i, chiàu Iâ-hô-hoa ê lô͘-po̍k Mô͘-se só͘ bēng-lēng Í-sek-lia̍t lâng ê ōe, chiàu Mô͘-se lu̍t-hoat chheh-lāi só͘ kì ê; in tī chit ê tôaⁿ-téng hiàn sio-chè hō͘ Iâ-hô-hoa, iā hōng siā-un ê chè.

32約書亞tī-hia用摩西ê律法抄寫tī石頂，就是伊tī以色列人ê面前所寫ê。Iok-su-a tī-hia ēng Mô͘-se ê lu̍t-hoat chhau-siá tī chio̍h-téng, chiū-sī i tī Í-sek-lia̍t lâng ê bīn-chêng só͘ siá-ê.

33以色列眾人，kap in ê長老、官長，以及審判官，lóng khiā tī約櫃ê雙pêng，tī 扛耶和華約櫃ê祭司利未人ê面前，無論是本地人，是寄腳-ê；一半tī Ki-lī-sim山ê頭前，一半tī Í-pa-lō͘山ê頭前，kā以色列百姓祝福，照耶和華ê奴僕摩西前所命令ê。Í-sek-lia̍t chèng-lâng, kap in ê tiúⁿ-ló, koaⁿ-tiúⁿ, í-ki̍p sím-phòaⁿ-koaⁿ, lóng khiā tī iok-kūi ê siang-pêng, tī kng Iâ-hô-hoa iok-kūi ê chè-si Lī-bī lâng ê bīn-chêng, bô-lūn sī pún-tōe lâng, sī kià-kha-ê; chi̍t-pòaⁿ tī Ki-lī-sim soaⁿ ê thâu-chêng, chi̍t-pòaⁿ tī Í-pa-lō͘ soaⁿ ê thâu-chêng, kā Í-sek-lia̍t peh-sìⁿ chiok-hok, chiàu Iâ-hô-hoa ê lô͘-po̍k Mô͘-se chêng só͘ bēng-lēng ê.

34然後約書亞讀律法lóng總ê話，祝福ê，咒詛ê，照lóng總記tī律法ê。Jiân-āu Iok-su-a tha̍k lu̍t-hoat lóng-chóng ê ōe, chiok-hok-ê, chiù-chó͘-ê, chiàu lóng-chóng kì tī lu̍t-hoat ê.

35摩西所命令一切ê話，約書亞tī以色列ê全會，kap婦人人、gín-ná，kap in中間往來出外人ê面前，無一句無讀。Mô͘-se só͘ bēng-lēng it-chhè ê ōe, Iok-su-a tī Í-sek-lia̍t ê choân-hōe, kap hū-jîn-lâng, gín-ná, kap in tiong-kan óng-lâi chhut-gōa lâng ê bīn-chêng, bô chi̍t-kù bô tha̍k.